1 Yudas, Yexus Khetos tus tubtxib thiab unpaus tus kwv,

Xa rau cov raug hu, uas twb raug Txiv Vajtswv Ntuj hlub thiab twb raug ceev rau Yexus Khetos.

2 Kev tabncuab, kev thajyeeb

3 Cov kuv hlub, txawm kuv maj nroos xav sau txog txojkev koomxeeb hauv peb txojkev cawmdim, kuv cheemtsum sau thiab nquahu nej kom pluav rau txojkev ntseeg uas tau raug muab rau cov dawbhuv tib zaug xwb. 4 Rauqhov ib txhia neeg tau nkag twjywm los rau hauv nej, xws li cov uas Vajlugkub twb teemtxim puag ntxov rau ntawd. Lawv yog neeg tsis hwm Vajtswv Ntuj, cov uas tau hloov Vajtswv Ntuj vajhmoov mus ua kev ywjsiab thiab tsis lees Yexus Khetos, tus uas yog peb tib tug nom thiab tus Tswv.

5 Txawm nej twb paub txhua yam lawm, kuv xav kom nej nco tias tus Tswv tau cawm peb haivneeg ib zaug tawm nram tebchaws Iziv, tabsis Nws tau rhuav tshem cov uas tsis ntseeg. 6 Thiab cov timtswv uas tsis tuav lawv tej tswjchim tabsis tau tso lawv vajtse tseg ntawd, Vajtswv Ntuj tau muab kaw hauv lub qhov tsausnti, khi nrees ntawm txojsaw ibtxhis mus txog hnub txiavtxim loj. 7 Ibyam li Xaudoos, Nkaumaulas thiab tej nroog ibncig ntawd tau ywjsiab sibdeev thiab tau tso tuskheej mus raws lwm tus saum nqaijtawv, mas Vajtswv Ntuj tau muab lawv hlawv ua qauv txog cov yuav mus raug txim hauv lub cubtawg ibtxhis.

8 Ibyam li ntawd, cov neeg caum npausuav no tau tsuas lawv lub cev, tau tso nomtswv tseg thiab xyav cov muaj tshwjchim lub moo. 9 Txawm thaum tus thawj timtswv Mikhaees nrog ntxwgnyoog sibcav txog Mauxes lub cev, Mikhaees twb tsis khuv muab lus tuammom ua kev teemtxim rau nws, tabsis nws tau hais tias, “Tus Tswv mam txhwj koj.” 10 Cov neeg no tuammom tej uas lawv tsis totaub; tabsis yam dabtsi uas lawv totaub hauv nruab nrog li tej tsiaj, lawv yuav raug puastsuaj los ntawm tej ntawd.

11 Vijnpog rau lawv! Rauqhov lawv tau taug Kaees txojkev; lawv tau sibtw mus txais Npalaas txojkev plag ua nqizog; ces lawv tau raug puastsuaj hauv Kaules txojkev ntxeevsiab.

12 Tej neeg no yog cov uas namzog rau saum nej roojnoj roojhaus, tsis ntshai nrog nej noj. Lawv yog cov yug yaj uas ntim rau tuskheej, cov huab tsis muaj nag uas raug cua ntsawj, thiab cov ntoo uas tsis txi txiv lub caij ntuj tsaug thiab nkoj cag, tuag ob zaug. 13 Lawv zoo li tej nthwv dej hiavtxwv uas huam lawv tej npuas kev txajmuag tuaj, thiab li tej hnubqub plaskev uas yuav raug kaw hauv lub qhov ntuj tsausnti mus ibtxhis.

14 Enauj, tus thij xya tomqab Adas, tau cevlus txog lawv tias, “Saib, tus Tswv samsim nrog Nws cov tubtxib dawbhuv qas phlom phlom leej uake los, 15 los txiavtxim rau sawvdaws, los nthuav txhua leej tej haujlwm tsis hwm Vajtswv uas lawv tau ua twm Nws thiab txhua lolus hnyav uas tej neeg txhaum tau hais nkaug Nws.” 16 Lawv yog cov neeg ywstaus thiab pom ntsoov luag kev txhaum, uaneej raws lawv tej kev ntshaw, hais lus lojloj, thiab qhuas luag kom lawv tuskheej tau npe.

17 Tabsis nej, cov kuv hlub, nco peb tus Tswv Yexus Khetos cov timthawj tej lus cevlus 18 uas lawv tau hais rau nej tias, “Sijhawm kawg, cov xibfwb cuav yuav tshwm los. Lawv yuav ua neej raws lawv tej kev ntshaw saum kev tsis hwm Vajtswv.” 19 Tej neeg no yog cov tsim kev sibtawg, yoog sab nqaijtawv, thiab tsis muaj Vajtswv Ntsujplig.

20 Tabsis nej, cov kuv hlub, cog tuskheej saum nej txojkev ntseeg dawbhuv thiab thov Vajtswv los ntawm tus Ntsujplig Dawbhuv. 21 Ceev tuskheej hauv Vajtswv Ntuj txojkev hlub thaum nej samsim tos peb tus Tswv Yexus Khetos txojkev tabncuab los qaws nej mus rau txojsia ibtxhis.

22 Hais txog cov uas tseem ua xyemxyav ntawd, tabncuab lawv, 23 cawm thiab vuag lawv tawm hauv lub cubtawg, tabncuab lawv nrog kev ntshai rwg, thiab ntxub tej tsho tsuas kev phem uas lawv hle ntawm lub cev.

24 Rau tus muaj hwjchim los ceev nej kom txhob qaug thiab mus sawv luagntxhi rau ntawm Nws lub tshwjchim, thuam tsis tau, 25 rau tib tug Vajtswv Ntuj, peb tus Cawmseej hauv Yexus Khetos, peb tus Tswv, yog tshwjchim, meejmom, hwjchim, thiab tswjchim uantej txhua tiam, nimno thiab mus ibtxhis tsis kawg. Amees.