1 Paulus thiab Timautes, Yexus Khetos cov tubtxib,

Xa rau tagnrho cov dawbhuv hauv Khetos Yexus uas nyob Filipis, nrog rau cov saibxyuas thiab cov ncignum.

2 Vajhmoov thiab kev thajyeeb ntawm peb Txiv Vajtswv Ntuj thiab tus Tswv Yexus Khetos rau nej.

3 Kuv ua kuv tus Vajtswv Ntuj tsaug txhua zaus kuv nco txog nej. 4 Hauv txhua txojkev thov Vajtswv rau nej sawvdaws, kuv thov nraim nrog kev zoo siab 5 txog nej txojkev koomtes rau txojmoo zoo txij thawj hnub los txog nimno, 6 rauqhov kuv twb ruajsiab rau qhov no, tias tus uas tau chiv tes haujlwm zoo hauv nej yuav ua qhov ntawd tiav rau Yexus Khetos hnub.

7 Nws kuj yog kev ncajncees rau kuv los xav txog nej sawvdaws li no, vim kuv muaj nej rau hauv kuv lub siab; thiab tsis hais saum kuv cov saw hlau lossis saum kev txheem thiab txhawb txojmoo zoo, nej tagnrho yog cov koom qhov vajhmoov no nrog kuv. 8 Rauqhov Vajtswv Ntuj yog kuv tus timkhawv tias kuv nco nej sawvdaws npaum cas nrog txojkev hmovtshua hauv Khetos Yexus.

9 Mas kuv thov Vajtswv li no: Kom nej txojkev hlub yov huam ntxiv ntau li ntau saum kev paub thiab kev thoobtsib txhua nrho 10 mus txog thaum nej sojntsuam paub tej uas zoo tshaj, kom nej dhau ua cov pheejxeeb thiab thuam tsis taus rau Khetos hnub, 11 puvnpo lub txiv kev ncajncees, uas ntws ntawm Yexus Khetos los, mus ua tshwjchim thiab meejmom rau Vajtswv Ntuj.

12 Kuv xav kom nej paub, cov kwvtij, tias tej kev tawmtsam kuv ntawd twb los ua kev vammeej rau txojmoo zoo, 13 txog qhov tias kuv tej saw hlau hauv Khetos tau ua rau cov tubrog hauv vajloog tagnrho thiab rau lwm tus pom, 14 thiab tau ua rau cov kwvtij uas ntseeg hauv tus Tswv feem coob mus tshajtawm txojlus tabmeeg lug thiab tsis ntshai vim kuv cov saw hlau.

15 Txawm tias qee tus tau tshajtawm txog Khetos nrog kev khib thiab kev chim, qee tus kuj tau qhia nrog lub siab dawbpawg. 16 Cov qhia tawm ntawm kev hlub vim lawv paub tias kuv raug tsa ua tus txheem txojmoo zoo. 17 Tabsis cov uas tshajtawm Khetos tawm ntawm kev cibnyeej, tsis tawm ntawm kev siabdawb, thaum lawv xav tias lawv ua kev mob rau kuv saum kuv tej saw hlau. 18 Khaus kuv tus dabtsi? Tsuav tias Khetos raug tshajtawm rau txhua txojkev, tsis hais saum kev ua txuj lossis kev tseeb. Kuv zoo siab rau qhov no.

Thiab kuv yuav zoo siab ntxiv. 19 Kuv paub tias qhov no yuav dhau ua kev cawmdim rau kuv vim nej tej lus thov Vajtswv thiab vim Yexus Khetos tus Ntsujplig kev pab. 20 Raws kuv kev npaj siab thiab kev ciasiab, kuv yuav tsis raug txajmuag ib zaug li; tabsis raws kev ruajsiab ibtxwm thiab nimno los li, Khetos yuav raug tsa siabsiab los ntawm kuv lub cev, tsis hais saum txojsia lossis kev tuag. 21 Rau kuv mas, kev ciajsia yog Khetos tug thiab kev tuag yog kuv kev tsam. 22 Yog kuv ho ciajsia sab nqaijtawv, qhov no kuj yog tes haujlwm txi txiv rau kuv. Mas kuv tsis paub yuav xaiv. 23 Kuv raug nias los ntawm ob qhov no: Kuv muaj kev ntshaw kom ncaim thiab mus nrog Khetos nyob, vim tias qhov ntawd yog qhov zoo tshaj rau kuv; 24 tabsis kev nyob sab nqaijtawv no kuj cheemtsum heev rau nej. 25 Vim kuv twb ruajsiab li no, kuv paub tias kuv yuav nyob thiab yuav nyob ntawm nej sawvdaws ib sab rau nej kev vammeej thiab kev zoo siab saum kev ntseeg, 26 kom nej txojkev khav hauv Khetos Yexus ntawm kuv yuav phwjyaws vim qhov kuv rovlos cuag nej.

27 Tsuav nej ua pejxeem tsimnyog Khetos txojmoo zoo xwb, kom txawm yog kuv los thiab pom nej lossis tsis los, kuv yuav hnov txog nej tej neej tias nej sawv ntseg li cov koom ib tug Ntsujplig, pluav uake hauv kev ntseeg ntawm txojmoo zoo li koom ib txojsia, 28 thiab nej tsis raug cov neeg tawmtsam ntawd thuam dabtsi. Txojkev tawmtsam no yog kev puastsuaj rau lawv tabsis yog kev cawmdim rau nej; thiab qhov no kuj yog los ntawm Vajtswv Ntuj los. 29 Vim Khetos, nej tau txais vajhmoov, tsis yog los ntseeg Nws xwb tabsis los raug txomnyem this Nws. 30 Nej tabtom txais tib txojkev peem uas nej tau pom saum kuv thiab nimno nej tseem hnov txog ntawm kuv.

1 Yog li ntawd, yog nej muaj kev npligsiab dabtsi hauv Khetos, yog nej muaj kev txhawbzog dabtsi saum kev hlub, yog nej muaj kev koomxeeb dabtsi nrog tus Ntsujplig, yog nej muaj kev hmovtshua thiab lub siab mosmuag, 2 ces ua kom kuv txojkev zoo siab tiav hlo: Kom nej xav tibyam, muaj tib txojkev hlub, koom neej uake, thiab xav txog tib qhov. 3 Txhob ua raws siab kheej, raws kev khav qhuav txog tuskheej, tabsis raws kev txo hwjchim, coj xeebceem li lwm tus tseemceeb dua tuskheej, 4 txhob saibxyuas yus tej xwb tabsis saibxyuas luag tej thiab.

5 Rhawv txojkev xav no hauv nej uas kuj yog txojkev xav hauv Khetos Yexus:

12 Yog li ntawd, cov kuv hlub, ibyam li nej ibtxwm tau mlooglus, tsis yog thaum kuv nrog nej xwb tabsis tshwjxeeb yog thaum kuv tsis nrog nej, sibzog peem nej txoj kev cawmdim nrog kev ntshai tshee nyho. 13 Rauqhov Vajtswv Ntuj yog tus ua haujlwm hauv nej, muab kev ntshaw thiab lub zog rau nej ua raws Nws siab nyiam.

14 Ua txhua yam, txhob yws thiab txhob sibcav, 15 kom nej dhau ua cov thuam tsis tau thiab tib tsis tau, dhau ua Vajtswv Ntuj cov menyuam tsis muaj qhov thuam tau nruab nrab tiam neeg nkhaus thiab plaskev. Nruab nrab lawv, nej ci li tej hnubqub saum lub cejntug 16 thaum nej tuav rawv txojlus muajsia. Peemtsheej ua kuv txojkev khav hauv Khetos hnub, vim tias kuv tsis tau khiav dawbdo thiab tsis tau ua haujlwm dawbdo. 17 Txawm yog kuv raug nchuav rau saum lub thaj thiab ua khoom fij tiam nej kev ntseeg, kuv zoo siab thiab kuv yuav nrog nej sawvdaws zoo siab. 18 Ces nej yov zoo siab tibyam thiab nrog kuv zoo siab.

19 Kuv ciasiab hauv tus Tswv Yexus tias kuv yuav xa Timautes tuaj cuag nej sai, kom kuv yuav nyobxeeb thaum kuv paub txog nej tej neej. 20 Kuv tsis muaj leejtwg txawj xav li nws, uas tseem yuav txhawj txog nej tej neej, 21 vim lawv sawvdaws puavleej nrhiav tej zoo rau tuskheej, tsis yog tej zoo rau Yexus Khetos. 22 Tabsis nej paub txog Timautes lub koob tias nws tau tiam txojmoo zoo nrog kuv li txiv thiab tub. 23 Yog li ntawd, kuv ciasiab tias kuv yuav xa nws tuaj kiag tomqab kuv paub tej uas yuav tshwmsim rau kuv. 24 Tabsis kuv twb ruajsiab hauv tus Tswv tias kuv tuskheej yuav tuaj cuag nej sai.

25 Tabsis kuv tau xav tias kuv tsimnyog xa tus kwv Epafauditus rovlos rau nej. Nws yog ib tug koom haujlwm thiab ua tubrog nrog kuv tabsis yog nej tus sawvcev thiab tubtxib uas nej tau xa tuaj tu kuv tej kev cheemtsum. 26 Vimchij nws tau nco nej sawvdaws heev thiab tau ntxhovsiab txog qhov nej tau hnov tias nws tau mob. 27 Nws tau mob txog qhov nws yuav luag tuag, tabsis Vajtswv Ntuj tau tabncuab nws, tsis yog nws xwb tabsis kuv thiab, kom kuv yov txhob muaj kev lwjsiab li lwjsiab. 28 Yog li ntawd, kuv tau xa nws majnroos kom thaum nej rov pom nws, nej yuav zoo siab thiab kuv yuav tsis muaj kev lwjsiab. 29 Yog li ntawd, txais nws saum kev zoo siab tagnrho hauv tus Tswv thiab muab lub samxeeb rau tej neeg zoo li nws 30 vim nws yuav luag tau tuag rau Khetos tes haujlwm. Nws tau tso nws txojsia kom nws yov ua tiav txojkev tu kuv, uas yog nej kev tuncua.

1 Qhov kawg, kuv cov kwvtij, zoo siab hauv tus Tswv. Kuv sau tej no rau nej tsis ua rau kuv nkees, tabsis ua rau nej nyob ruaj.

2 Ceevfaj cov niag dev! Ceevfaj cov ua phem! Ceevfaj cov txiavtawv! 3 Rauqhov nej yog txojkev txiavtawv, yog cov pehawm Vajtswv Ntuj ntawm Ntsujplig, yog cov khav taus hauv Khetos Yexus thiab tsis yog cov ruajsiab rau nqaijtawv. 4 Yav tag los, kuv kuj tau muaj kev ruajsiab rau nqaijtawv.

Yog leejtwg xav tias nws tau ruajsiab rau nqaijtawv lawm, kuv tau muaj tshaj: 5 Raug txiavtawv hnub yim; txhawv hauv haivneeg Yixayees, xeem Npeyamees, tseem Henplais txhawv hauv neeg Henplais. Raws li Kevcai, kuv tau tsheej ib tug Falixais. 6 Raws li kev mobsiab, kuv tau ua ib tug tsimtxom pawgntseeg. Raws kev ncajncees saum Kevcai, kuv yog ib tug raug thuam tsis tau.

7 Tabsis txhua yam kuv tau tsam ntawd, kuv twb xam ua khoom liam vim Khetos. 8 Tshaj li ntawd, kuv tau xam txhua yam ua khoom lwj vim txojkev paub kuv tus Tswv Yexus Khetos uas zoo tshaj plaws. Vim li no, kuv tau tso txhua yam povtseg thiab tau xam tej ntawd ua khoom liam, kom kuv tsam Khetos 9 thiab raug nrhiav tau hauv Nws, tsis muaj kev ncajncees raws li Kevcai tabsis muaj txojkev ncajncees los ntawm Khetos txojkev ntseeg, txoj uas tawm ntawm Vajtswv Ntuj saum kev ntseeg, 10 kom kuv paub Khetos thiab lub hwjchim ntawm Nws kev sawv rovlos thiab ntawm kev koom nrog Nws txojkev txomnyem, raug plhis plho hauv Nws kev tuag, 11 saib kuv ho puas txais kev sawv rovlos ntawm cov tuag.

12 Tsis yog kuv twb tau txais lossis twb mus txog lub homphiaj lawm, tabsis kuv tseem pluav mus tuav qhov uas Khetos Yexus tau muab tuav kuv. 13 Cov kwvtij, kuv tuskheej tsis xam tias kuv tuav tau lawm, tabsis kuv xam ib qhov: Hnov qab ntshis txog tej tomqab thiab ncav tes ncuv mus rau tej tomntej. 14 Kuv pluav mus rau tus ciam kawg, rau qhov yeebkoob ntawm Vajtswv Ntuj txojkev caw mus rau sab saud hauv Khetos Yexus.

15 Yog li ntawd, cov paubtab, cia peb xav txog qhov no. Yog nej leejtwg ho xav lwm yam, los Vajtswv Ntuj yuav nthuav qhov no rau nej. 16 Txawm li cas los, peb tau los txog theem twg, tuav rawv tib tug cag uaneej no.

17 Cov kwvtij, ua cov xyaum nrog kuv thiab saib ntsoov cov uas uaneej raws tus qauv nej tau txais ntawm peb. 18 Rauqhov coob leej tau uaneej li yeebncuab rau Khetos tus khaublig, cov uas kuv tau hais rau nej thiab nimno kuv tseem hais quaj qaws. 19 Lawv qhov xaus yog kev puastsuaj, lawv tus vajtswv yog lawv lub plab, thiab lawv tus tshwjchim yog kev txajmuag. Lawv yog cov xav txog tej khoom ntiajteb. 20 Rauqhov peb yog pejxeem saum ntuj, thiab peb samsim tos peb tus Cawmseej, tus Tswv Yexus Khetos, uas yuav tawm saud los. 21 Nws yuav hloov peb lub cev poobmeej mus rau Nws lub cev tshwjchim, raws li lub hwjchim uas Nws siv mus muab txhua yam rau Nws tswj.

1 Ces yog li ntawd, cov kwvtij uas kuv hlub thiab nco, kuv txojkev zoo siab thiab lub mom yeebkoob, sawv khovkho hauv tus Tswv li no, cov kuv hlub.

2 Kuv nquahu Eaudias thiab Xitikhes kom xav tibyam hauv tus Tswv. 3 Tiag mas, kuv kuj thov koj, tus zoo kwvluag koom quab, pab nkawv, vim nkawv tau peem rau txojmoo zoo nrog kuv, li Klemas thiab cov koom haujlwm lwm tus, cov uas muaj npe sau rau hauv phau ntawv muajsia.

4 Zoo siab nraim hauv tus Tswv! Kuv hais dua, zoo siab! 5 Cia neeg sawvdaws paub nej txojkev siabmos siabmuag. Tus Tswv nyob zeze. 6 Txhob txhawj dabtsi, tabsis hauv txhuatxhia yam, cia Vajtswv Ntuj paub nej tej lus thov los ntawm kev thov, kev taij thiab kev ua tsaug. 7 Vajtswv Ntuj txojkev thajyeeb, uas tob tshaj txhua txojkev totaub, yuav ceev nej tej siab thiab tej kev xav rau hauv Khetos Yexus.

8 Qhov kawg, cov kwvtij, dabtsi yog qhov tseeb, dabtsi yog qhov txaus hwm, dabtsi yog qhov ncajncees, dabtsi yog qhov dawbhuv, dabtsi yog qhov ntxim nyiam, dabtsi yog lus zoo, seb leejtwg tus xeebceem zoo, seb leejtwg txaus qhuas, xav txog tej no. 9 Dabtsi uas nej tau kawm, tau txais, tau hnov thiab tau pom ntawm kuv, xyaum tej ntawd. Ces tus Vajtswv kev thajyeeb yuav nyob nrog nej.

10 Kuv tau zoo siab heev hauv tus Tswv vim nimno nej tau tig rovqab los xav txog kuv. Qhov tseeb, nej tau xav txog kuv lawm tabsis nej tsis tau sijhawm ua. 11 Tsis yog kuv hais raws kev ntshaw, rauqhov kuv tau kawm ua neeg txaussiab rau txhua txojkev. 12 Kuv paub kev txomnyem thiab kuv paub kev muaj npluamias. Kuv twb kawm tau qhov mixatawlis rau saum txhua txojkev, tsis hais kev noj tsau lossis kev tshaib nqhis, kev muaj ua npuv ua npo lossis kev pluag kugnkaws. 13 Kuv muaj zog ua txhua yam hauv tus uas txhawbzog rau kuv.

14 Txawm li ntawd los, nej tau ua zoo thaum nej koom nrog kuv txojkev txomnyem. 15 Thiab nej cov Filipis puavleej paub tias, thaum chivthawj ntawm txojmoo zoo, tomqab kuv tau tawm hauv Makedonias lawm, tsis tau muaj ib pawgntseeg twg los koomtes rau kuv kev qhia txojlus, tshwj nej nkaus xwb. 16 Nej tau xa kev pab tuaj daws kuv kev cheemtsum hauv Thexalaunikes zaum puav. 17 Tsis yog tias kuv nrhiav khoom pub, tabsis kuv nrhiav lub txiv uas yuav raug ntxiv rau nej. 18 Kuv tau txais txhua yam thiab muaj puvnpo. Kuv twb muaj txaus lawm vim kuv tau txais nej tej khoom ntawm Epafauditus. Tej ntawd yog cov khoom fij tswqab uas raug Vajtswv Ntuj siab. 19 Kuv tus Vajtswv Ntuj yuav txhab ntxiv rau nej tej kev cheemtsum raws li Nws txojkev npluanuj nrog tshwjchim hauv Khetos Yexus. 20 Tshwjchim rau peb Txiv Vajtswv Ntuj mus ibtxhiab ibtxhis. Amees.

21 Hais kev nojqab nyobzoo rau txhua tus dawbhuv hauv Khetos Yexus. Cov kwvtij nrog kuv ntawm no kuj hais nojqab nyobzoo rau nej. 22 Tagnrho cov dawbhuv hais nojqab nyobzoo rau nej, tshwjxeeb cov hauv fajtim tsevneeg.

23 Tswv Yexus Khetos li vajhmoov nrog nej tus ntsujplig.