1 Paulus, Yexus Khetos tus timthawj raws li kev tawmcai ntawm Vajtswv Ntuj, peb tus Cawmseej, thiab ntawm Yexus Khetos, peb txojkev ciasiab,

2 Xa rau Timautes, tus tseem tub kev ntseeg.

Vajhmoov, kev tabncuab, thiab kev thajyeeb ntawm peb Txiv Vajtswv Ntuj thiab peb tus Tswv Yexus Khetos rau koj.

3 Ibyam li kuv tau nquahu koj kom nyob hauv Efexaus thaum kuv yuav mus rau Makedonias, xwv koj yuav tau cob qee tus kom txhob qhia lwm yam, 4 thiab txhob tuav rawv tej dabneeg thiab cajces uas tsis txawj kawg. Tej ntawd qhib kev sibcav tsis txawj kawg tshaj li kev txhawb Vajtswv Ntuj haujlwm uas txawm rau saum kev ntseeg. 5 Homphiaj ntawm txojkev cobqhia no yog kev hlub ntawm lub siab dawbpaug, kev totaub tuskheej zoo, thiab kev ntseeg tsis xyuam plhu. 6 Cov uas tsis tau cog cag rau tej no tau tig mus rau kev tham tsis muaj qabhau. 7 Lawv xav ua xibfwb qhia Kevcai, tabsis lawv tsis tau siv hlwb los xav txog tej lawv tham lossis tej uas lawv hais ruaj nrees txog ntawd.

8 Peb paub tias Kevcai yeej zoo, yog leejtwg siv Kevcai raws kis. 9 Peb paub li no, rauqhov Kevcai tsis raug tsim rau neeg ncajncees tabsis rau neeg tsis cojcai thiab neeg ntxeevsiab, neeg tsis hwm Vajtswv Ntuj thiab neeg txhaum, cov tsis dawbhuv thiab cov yoog kev ntiajteb, cov tua niamtxiv, cov tua neeg, 10 cov vuabtsuab, cov txivneej deev txivneej, cov nyiag neeg, neeg dag, timkhawv cuav, thiab lwm leej uas sawv tawmtsam kev cobqhia zoo 11 raws li txojmoo zoo ntsig txog Vajtswv Ntuj tus muaj koobhmoov lub tshwjchim, uas tau raug cob rau kuv.

12 Kuv txais vajhmoov ntawm peb tus Tswv Yexus Khetos, tus uas tau muab peevxwm rau kuv, rauqhov Nws tau xam kuv ua ib tug txaus ntseeg thaum Nws tau cob Nws txoj haujlwm rau kuv. 13 Nramntej, kuv tau ua ib tug neeg tuammom, tsimtxom thiab heev neeg, tabsis Nws tau tabncuab kuv vim kuv tsis tau paub tej uas kuv tau ua saum kev tsis ntseeg. 14 Vajhmoov ntawm peb tus Tswv tau raug nchuav phwjyaws rau kuv, nrog kev ntseeg thiab kev hlub hauv Khetos Yexus.

15 Zaj lus no txaus ntseeg thiab tsimnyog rau txhua tus txais yuav: Yexus Khetos tau los rau hauv lub cejntug los cawm cov neeg txhaum. Kuv yog tus tuam thawj ntawm cov neeg txhaum. 16 Tabsis vim qhov ntawd, Nws tau tabncuab kuv, kom Yexus Khetos yov ua timkhawv txog Nws txojkev siabntev rau saum kuv, tus tuam thawj neeg txhaum, mus ua qauv rau cov samsim yuav ntseeg Nws mus rau txojsia ibtxhis. 17 Rau tus Vajntxwv ibtxhis, tib tug Vajtswv Ntuj, tus uas tsis txawj puastsuaj thiab qhovmuag tsis pom, yog meejmom thiab tshwjchim mus ibtxhiab ibtxhis! Amees.

18 Kuv cob txojkev cobqhia no rau koj, tub Timautes, raws nraim li cov lus cevlus uas tau hais txog koj, kom koj sawv khovkho hauv tej lus ntawd li ib tug tubrog zoo, 19 tuav rawv kev ntseeg thiab txojkev totaub tuskheej zoo. Ibtxhia tau tso tej no tseg thiab lawv lub nkoj kev ntseeg tau nchuav, 20 xws li Himenais thiab Alexadaws, ob tug uas kuv tau muab rau Xatas kom nkawv raug qhuab thiab txhob tuammom luag.

1 Yog li ntawd, kuv nquahu koj kom, uantej txhua yam, taij Vajtswv, thov Vajtswv, nug Vajtswv thiab ua Vajtswv tsaug rau txhua tus neeg, 2 rau tej vajntxwv, thiab txhua tus nomtswv, kom peb ua lub neej ntsiagto thiab nyobxeeb hauv kev pehawm thiab lub koobnpe zoo. 3 Qhov no zoo thiab nws raug siab rau Vajtswv Ntuj, peb tus Cawmseej, 4 tus uas xav kom txhua tus neeg los txais kev cawmdim thiab los paub qhov tseeb tias:

8 Yog li ntawd, kuv xav kom tej txivneej txhua qhov tsa lawv tej tes dawbhuv thov Vajtswv, txhob muaj kev chim thiab kev sibcav. 9 Ibyam li ntawd, kuv xav kom cov pojniam nyias tu nyias cev tsoos thiab lub ntsejmuag, txhob ntxias plaubhau, coj kub, coj povhaum, lossis hnav tej daim tiab kimkim, 10 tabsis hnav tej haujlwm zoo uas phim li tsoom pojniam uas tau coglus rau kev hwm Vajtswv Ntuj. 11 Cia tus pojniam kawm ntsiagto hauv qab kev tswjhwm txhua nrho. 12 Kuv tsis tso rau pojniam qhia thiab muaj tswjchim rau saum txivneej, tabsis tso lawv ua cov nyob twjywm. 13 Rauqhov Adas tsis tau xub plaskev, tabsis Evas tau xub ua. 14 Thiab Adas tsis tau raug ntxias, hos tus pojniam tau raug ntxias tawm mus txhaum cai. 15 Txawm li ntawd, lawv yuav dim los ntawm kev yug tubki, yog lawv nyob hauv kev ntseeg, kev hlub, thiab kev dawbhuv nrog kev tswj tuskheej.

1 Txojlus no txaus ntseeg: Leejtwg peem ua tus saibxyuas, nws kuj ntshaw txoj haujlwm zoo. 2 Yog li ntawd, tus saibxyuas cheemtsum yog tus tsis muaj kev thuam tau, tus txivneej muaj ib tug pojniam, feeb meej, tswj tau tuskheej, nyiam qhua, txawj qhuabqhia, 3 tsis quav cawv, tsis heev tabsis siabmos siabmuag, tsis nyiam sibcav, tsis nyiam nyiaj, 4 tswj tau nws tsevneeg zoo, muaj menyuam mlooglus nrog kev tomsiab 5 (yog leejtwg tsis paub tswj nws tsevneeg, nws yov ua cas tu tau Vajtswv Ntuj pawgntseeg?). 6 Nws yuavtsum tsis yog tus ntseeg tshiab, tsam nws khav thiab poob mus raug kev txiavtxim li ntxwgnyoog. 7 Thiab nws cheemtsum muaj timkhawv zoo los ntawm tej neeg sab nraud kom nws txhob raug thuam thiab mag ntxwgnyoog rooj ntxiab.

8 Ibyam li ntawd, cov ncignum yuavtsum yog cov ua dabtsi los tsheej, tsis ntxeev lus, tsis nyiam cawv ntau, tsis nrhiav kev tsam rau tuskheej, 9 thiab tuav timkhawv saum kev ntseeg los ntawm txojkev totaub meej. 10 Tabsis lawv yuavtsum raug ceem uantej, thiab yog lawv raug thuam tsis tau, ces cia lawv ua cov ncignum.

11 Ibyam li ntawd, lawv cov pojniam yuavtsum yog cov ua dabtsi los tsheej, tsis nkawg xaiv, feeb meej, thiab txaus ntseeg rau txhua yam.

12 Cov ncignum yuavtsum muaj ib tug pojniam thiab tswj tau lawv tej menyuam thiab tsevneeg zoo. 13 Cov ncignum zoo kuj ua rau tuskheej zoo ib theem thiab ruajsiab saum kev ntseeg hauv Khetos Yexus ntxiv.

14 Kuv sau tej no rau koj, ciasiab tias kuv yuav los cuag koj sai; 15 thiab yog kuv ho los qeeb, los kom koj paub tias neeg cheemtsum coj lub neej li cas hauv Vajtswv Ntuj tsevneeg, uas yog Vajtswv Ntuj tus muajsia pawgntseeg thiab yog tus ncej zeb thiab daim lagzeb txojkev tseeb. 16 Sawvdaws tau lees qhov mixatawlis ntawm txojkev pehawm ua qhov loj li no:

1 Vajtswv Ntsujplig hais meej tias, lub sijhawm yuav kawg, ibtxhia yuav ncaim txojkev ntseeg mus tuav tej ntsujplig plaskev thiab tej lus qhuabqhia ntawm dab. 2 Lawv dag xyuam plhu ntsuav thiab lawv txojkev totaub twb raug hlawv siav lawm. 3 Lawv txwv kev txijnkawm thiab caiv tej zaubmov, uas Vajtswv Ntuj tau tsim rau sawvdaws noj nrog kev uatsaug los ntawm cov ntseeg thiab cov paub qhov tseeb. 4 Rauqhov txhua yam Vajtswv Ntuj tau tsim yeej zoo thiab tsis muaj yam phem, yog yus txais nrog kev ua tsaug, 5 rauqhov nws raug ntxuav dawbhuv los ntawm Vajtswv Ntuj txojlus thiab kev thov Vajtswv.

6 Yog koj taw tej no rau cov kwvtij, koj yov ua Yexus Khetos ib tug ncignum zoo, ua tus uas kawm tej lus saum kev ntseeg thiab kev qhuabqhia zoo. Koj twb caum tej no los lawm. 7 Txhob quavntsej tej dabneeg txog kev ntiajteb thiab ntawm tej pog laus, tabsis cob tuskheej rau kev hwm Vajtswv Ntuj. 8 Kev cob lub cev muaj nqis me, tabis kev hwm Vajtswv Ntuj muaj nqis rau txhua yam, vim nws muaj txojlus cogtseg ntsig txog lub neej nimno thiab lub neej yuav los tomntej. 9 Lolus no txaus ntseeg thiab muaj nqis rau txhua tus uas txais, 10 rauqhov peb khwv thiab peem rau qhov no: Peb twb ciasiab rau Vajtswv Ntuj tus muajsia. Nws yog neeg tagnrho tus Cawmseej, tshwjxeeb rau cov ntseeg.

11 Hais ntsees thiab qhia tej no. 12 Txhob cia ib tug twg saib koj qis vim hnubnyoog hluas, tabsis ua qauv rau cov ntseeg saum kev hais lus, tus coojpwm, kev hlub, kev ntseeg, thiab kev dawbhuv. 13 Mus txog rau thaum kuv los, tuav rawv kev nyeem Vajlugkub, kev txhawbzog thiab kev qhuabqhia. 14 Txhob lasmees qhov ntsujplig koobhmoov hauv koj, uas koj tau txais los ntawm kev cevlus tomqab lub rooj txwjlaug tau tsa tes rau koj. 15 Coj tej no, tsau tsawv rau tej no, kom sawvdaws pom koj kev vammeej. 16 Ceev tuskheej thiab kev qhuabqhia. Zwm rau hauv tej no, rauqhov yog koj ua li no, koj yuav cawm tuskheej thiab cov mloog koj qhia.

1 Txhob txhwj cov laus neeg, tabsis nquahu lawv li yus txiv, cov hluas yam li yus kwvtij, 2 cov pojniam laus yam li yus niam, cov ntxhais hluas yam li yus cov muam hauv kev dawbhuv.

3 Hwm cov pojntsuam li lawv yog pojntsuam. 4 Yog tus pojntsuam twg muaj tej tub lossis xeebntxwv, cov menyuam no yuavtsum xub ua kev zoo rau lawv tsevneeg thiab them rovqab rau cov laus, rauqhov qhov no raug Vajtswv Ntuj siab. 5 Tus uas tau dhau ua pojntsuam tiag thiab raug tso nyob ibleeg, nws twb ciasiab ntsoov rau Vajtswv Ntuj thiab nyob rau kev taij thiab thov Vajtswv nruab hnub thiab hmontuj. 6 Tabsis tus pojntsuam ntshaw kev lomzem, txawm nws tseem muajsia los, nws twb tuag lawm. 7 Cob tej no rau sawvdaws kom lawv peemtsheej ua cov tsis muaj kev thuam taus. 8 Yog leejtwg tsis saibxyuas nws cov neeg, tshwjxeeb nws tsevneeg, ces nws twb tsis lees txojkev ntseeg lawm thiab tseem phem dua tus tsis ntseeg.

9 Cia nws sau npe ua pojntsuam, yog nws hnubnyoog siab dua raucaum xyoo, thiab nws tau ua pojniam rau tib tug txiv xwb. 10 Dua li, nws yuavtsum muaj timkhawv saum tej haujlwm zoo: Seb nws puas tu tubki, puas txais qhua, puas ntxuav cov dawbhuv kotaw, puas pab cov raug kev txomnyem, thiab puas caum txhua txoj haujlwm zoo.

11 Tseg cov pojntsuam hluas, rauqhov thaum lawv ntshaw txivneej tshaj ntshaw Khetos, lawv tseem xav yuav txiv. 12 Lawv yov muab kev teemtxim rau tuskheej vim lawv tau tso thawj txojkev ntseeg tseg. 13 Lawv kawm nkees ib zaug thiab mus hauv luag tej tsev, ces tsis yog lawv ua neeg nkees xwb, lawv yuav ua neeg ncauj ntau, neeg tabkaum lwm tus, thiab tham tej tsis muaj qabhau. 14 Yog li ntawd, kuv tawm tswvyim kom cov pojntsuam hluas yuav txiv, yug tubki, tu vajtse, thiab txhob muab cibfim rau Xatas los rhuav ib tug twg. 15 Rauqhov ibtxhia tau tig mus caum Xatas lawm.

16 Yog tus ntseeg twg muaj tej pojntsuam, cia nws pab lawv; thiab txhob cia pawgntseeg ris lub nra no kom pawgntseeg yuav pab tau tej pojntsuam tiag.

17 Cov txwjlaug uas tswj pawgntseeg tsimnyog txais kev hwm ob npaug, tshwjxeeb cov khwv rau txojlus thiab kev qhuabqhia. 18 Rauqhov Vajlugkub hais tias, “Txhob xauv tus nyuj tsuj nplej lub ncauj” thiab tias, “Tus ua haujlwm tsimnyog nws lub nqizog.” 19 Txhob txais ib lolus nkaug txwjlaug, tshwj tias muaj “ob lossis peb tug timkhawv.” 20 Txhwj cov uas ua txhaum tim ntsejmuag sawvdaws, kom lwm tus muaj kev ntshai. 21 Kuv ceebtoom rau koj ntawm Vajtswv Ntuj, ntawm Yexus Khetos, thiab ntawm cov timtswv uas raug xaiv lub xubntiag tias, ceev tej no, txhob txiavtxim rau dabtsi uantej thiab txhob ua dabtsi raws kev xaiv ntsejmuag.

22 Txhob maj tsa tes rau saum ib tug twg thiab txhob koomtes nrog luag tej kev txhaum. Ceev tuskheej dawbhuv.

23 Txhob haus dej xwb, tabsis siv mentsis cawv vim koj lub plab thiab koj ib sij mob.

24 Ibtxhia neeg tej kev txhaum mas nyob cuab nplhiv thiab coj lawv mus raug kev txiavtxim, tabsis ibtxhia tej kev txhaum mam caum lawv qab. 25 Ibyam li ntawd, ibtxhia neeg tej kev zoo kuj nyob cuab nplhiv thiab cov uas muaj kev zoo kuj tsis muaj peevxwm zais.

1 Cov tseem nyob hauv tus quab ua qhev, lawv nyias yuavtsum xam nyias tus tswv rau saum txhua txojkev hwm kom tsimnyog, xwv Vajtswv Ntuj lub npe thiab tej lus qhuabqhia tsis raug txobthuam. 2 Cov qhev uas muaj cov tswv ntseeg los kuj txhob txo lawv vim lawv yog nej kwvtij, tabsis tiam lawv zoo tshaj vim cov uas txais nej tej haujlwm zoo ntawd yog cov ntseeg thiab cov raug hlub.

Qhia thiab nquahu txog tej no. 3 Yog leejtwg qhia lwm yam thiab tsis tuav rawv peb tus Tswv Yexus Khetos tej lus zoo thiab txojkev qhuabqhia raws kev hwm Vajtswv Ntuj, 4 ces nws twb raug mooj thiab tsis totaub dabtsi li. Nws tau tus mob kev sibxaub thiab kev sibcav txog tej lus, uas yuav tshwm muaj kev khib, kev sibceg, kev xyav moo, kev xav phem txog luag, 5 kev sibnkaug nruab nrab tej neeg puas hlwb, tej neeg plag qhov tseeb, thiab tej neeg siv kev pehawm Vajtswv Ntuj mus nrhiav nyiaj.

6 Tabsis kev pehawm Vajtswv Ntuj los ntawm kev txaussiab yeej yog kev tsam loj:

9 Tabsis cov uas npaj npluanuj yuav poob mus rau kev simsiab, mus mag luag ntxiab thiab mus ntsib ntau txojkev ntshaw uas yus tsis totaub thiab ua rau yus mob. Tej ntawd yuav nqus neeg mus rau kev puastsuaj thiab puasntsoog. 10 Rauqhov tus cag ntawm txhua txojkev phem yog kev ntshaw nyiaj. Cov uas ncav mus tuav txojkev ntshaw nyiaj tau plaskev tawm ntawm kev ntseeg thiab lawv tuskheej raug kev ntxhovsiab ntau.

17 Rau cov npluanuj tiam no, hais ntsees kom lawv txhob tsav hwjchim thiab txhob ciasiab rau kev npluanuj, uas tsis pom tomntej, tabsis kom ciasiab rau Vajtswv Ntuj, tus uas muab txhua yam npluamias rau peb, kom peb txaussiab hlo. 18 Qhia lawv coj zoo, npluanuj saum tej haujlwm zoo, thiab ua cov npaj mus pab thiab koom lwm tus. 19 Li no, lawv thiaj tsa lub txhab nyiaj saum lub plag tsev zoo rau tiam tomntej, kom lawv yuav txais txojsia uas nyob mus li.

20 Timautes, ceev yam uas Vajtswv Ntuj tso siab rau koj lawm, txhob tig mus rau tej lus qhuav hauv ntiajteb thiab rau tej tswvyim tawmtsam uas yog kev paub cuav. 21 Ibtxhia uas tau coglus rau txojkev paub cuav ntawd tau plaskev ntawm kev ntseeg lawm.

Vajhmoov nrog nej os.