Lukas
Txojmoo zoo raws li
Lukas
Taw Qhia
Lukas, tus kws khomob (Klx 4:14) thiab Paulus tus kwvluag qhia Txojmoo Zoo (2 Tim 4:11), tau sau phau Lukas Txojmoo Zoo thiab Cov Tubtxib Tes Haujlwm kwvlam li xyoo 60. Nws tau tshawb keebkwm txojkev ntseeg Yexus thiab tau muab tej xwmtxheej tseeb ntawd los teeb rau hauv nws ob phau ntawv. Nws tau xa ob phau ntawv rau Theaufilaus (Luk 1:1-4; Ctu 1:1-5), tabsis nws lub homphiaj yog qhia rau pejkum neeg tias Yexus yog neeg ntiajteb tus Cawmseej (Chk 3:15; 12:3; Luk 3:23-38; Ctu 28:25-31).
Li Mathais, Lukas tau sau txog Yexus kev yug, kev qhuabqhia, kev khomob, kev theejtxhoj, kev sawv hauv cov tuag rovlos, thiab kev cob tswjchim rau cov thwjtim (timthawj) mus qhia txog Tswv Yexus thoob ntiajteb. Tswv Yexus yog Txojmoo Zoo: Noobneej tau poob rau kev txhaum thiab kev plojtuag, tabsis hauv Tswv Yexus muaj kev zamtxim thiab txojsia ibtxhis rau tus ntseeg (Luk 24:44-48).

1
1 Txawm coob leej tau nqistes los teev zaj xwmtxheej ntsig txog tej uas twb tiav nruab nrab peb, 2 raws nraim li cov qhovmuag pom thaum chiv thiab cov uas tau dhau ua tubtxib rau txojlus tau muab rau peb, 3 los nws tseem zoo rau kuv muab sau raws txheejtxheem, vim kuv twb taug qab txhua yam meejmeej pem hauvpaus los, yawg hlob Theaufilaus, 4 kom koj paub qhov tseeb ntsig txog tej lus uas koj tau raug cob ntawd.
Kev Cevlus Txog Yauhas Npatitaus Hnub Yug
5 Lub sijhawm Helauj tau ua vajntxwv kav Yudas, tau muaj ib tug povthawj hauv Anpiyas tsevneeg npe hu ua Xakhaliyas, thiab nws tus pojniam yeej yog Aloos ib tug ntxhais, npe hu ua Elixanpes. 6 Nkawv ob leeg yeej yog neeg ncajncees ntawm Vajtswv Ntuj xubntiag thiab tau uaneej raws tus Tswv tej kevcai thiab tej kabke kev dawbhuv txhua nqe uas thuam tsis tau. 7 Tabsis nkawv tsis tau muaj menyuam vim Elixanpes lub cev tau xeebtub tsis tau. Nkawv puavleej tau muaj hnubnyoog hnyav lawm.
8 Ib hnub thaum Xakhaliyas pab samsim tu tes haujlwm povthawj ntawm Vajtswv Ntuj xubntiag, 9 nws tau raug xaiv raws li cov povthawj kabke mus hlawv hmoov tshuaj hauv tus Tswv lub tuamtsev, 10 thiab tagnrho zejtsoom sawvdaws tau thov Vajtswv sab nraud lub tsamthawj hlawv hmoov tshuaj ntawd.
11 Ces tus Tswv ib tug timtswv tau tshwm rau nws, sawv ntawm lub thaj hmoov tshuaj sab xis. 12 Thaum pom li ntawd, Xakhaliyas tau ceeb thiab kev ntshai tau mooj nws. 13 Tabsis tus timtswv tau hais rau nws tias, “Txhob ntshai Xakhaliyas! Vajtswv Ntuj tau hnov koj txojlus thov lawm, mas koj tus pojniam Elixanpes yuav yug ib tug tub rau koj thiab koj yuav hu nws lub npe ua Yauhas. 14 Nws yuav yog koj txojkev zoo siab thiab kev txaussiab, thiab coob leej yuav zoo siab rau nws hnub yug, 15 rauqhov nws yuav ua tus loj rau ntawm tus Tswv xubntiag. Cawv iab thiab cawv ntsim nws yuav tsis haus, tabsis nws yuav puvnpo tus Ntsujplig Dawbhuv txij hnub nws yug hauv niam lub plab los. 16 Thiab nws yuav tig zejtsoom Yixayees coob leej mus cuag tus Tswv, lawv tus Vajtswv Ntuj. 17 Nws yuav mus ua tus Tswv ntej nrog Eliyas tus ntsujplig thiab lub hwjchim, mus tig cov txiv tej siab rau lawv cov menyuam thiab cov tsis ntseeg los ntawm cov neeg ncajncees tej tswvyim, thiab mus npaj ib haivneeg tiavlog rau tus Tswv.”
18 Ces Xakhaliyas tau hais rau tus timtswv tias, “Kuv yuav paub qhov no li cas? Rauqhov kuv kuj laus thiab pojniam kuj muaj hnub nyoog hnyav lawm.”
19 Tus timtswv tau teb nws tias, “Kuv yog Khaliees, tus sawv ntawm Vajtswv Ntuj xubntiag, thiab kuv tau raug xa los qhia thiab tshajtawm tej xov zoo no rau koj. 20 Nimno koj yuav ntsiag thiab tsis muaj peevxwm hais lus mus txog hnub tej no tshwmsim, vim qhov uas koj tsis ntseeg kuv tej lus. Txhua yam yuav tiav hauv lawv lub sijhawm.”
21 Zejtsoom tau tos Xakhaliyas thiab xav tsis thoob thaum nws tau laug hauv lub tuamtsev. 22 Thaum tawm los, nws tsis tau peevxwm hais lus rau lawv, ces lawv thiaj tau paub tias nws twb pom ib qhov zeemmuag hauv lub tuamtsev. Nws tau dhau ua neeg piavtes rau lawv thiab nws tau nyob ntsiagto.
23 Thaum xaus nws lub sijhawm ua tes haujlwm povthawj lawm, nws tau rovqab mus tsev. 24 Dhau lub caij ntawd, nws tus pojniam Elixanpes tau xeebtub thiab tau zais cev tsib hlis, vim nws tau hais 25 tias, “Tus Tswv twb ua li no hauv lub caij uas Nws tau los saib kuv, kom Nws tau tshem kuv txojkev txajmuag hauv noobneej.”
Kev Cevlus Txog Yexus Hnub Yug
26 Txwm nkaus rau lub hlis, tus timtswv Khaliees tau raug xa ntawm Vajtswv Ntuj mus hauv ib lub nroog hauv Kalilais uas hu ua Naxalev, 27 mus rau ib tug nkaujxwb uas twb raug qhaib rau ib tug txivneej npe hu ua Yauxej, uas yog Daviv tsevneeg. Tus nkaujxwb ntawd hu ua Malis. 28 Thaum mus hauv, nws tau hais rau Malis tias, “Nyobzoo, tus ntxhais tau vajhmoov lawm! Tus Tswv nrog koj os.”
29 Malis tau ceeb rau lolus ntawd thiab tau xav hauv siab tias lo lus nyobzoo ntawd yog lus dabtsi. 30 Tus timtswv tau hais rau nws tias, “Txhob ntshai Malis, rauqhov koj twb txais Vajtswv Ntuj vajhmoov. 31 Nimno koj yuav xeebtub thiab yug ib tug tub, thiab koj yuav hu Nws npe ua Yexus. 32 Nws yuav ua tus loj thiab yuav raug hu ua tus Loj Kawgnkaus tus Tub. Tus Tswv, Vajtswv Ntuj, yuav muab Nws txiv Daviv lub zwmtxwv rau Nws, 33 thiab Nws yuav ua vajntxwv rau Yakhauj tsevneeg mus ibtxhis, Nws lub tswvkuj yuav tsis kawg li.”
34 Ces Malis tau hais rau tus timtswv tias, “Qhov no yuav muaj li cas, vim kuv tsis paub txivneej ne?”
35 Tus timtswv tau teb nws tias, “Tus Ntsujplig Dawbhuv yuav los rau saum koj thiab tus Loj Kawgnkaus lub hwjchim yuav roos koj, vim tus raug xeeb dawbhuv ntawd yuav raug hu ua Vajtswv Ntuj tus Tub. 36 Nimno Elixanpes, koj tus txheebze, kuj tau xeeb ib tug tub rau yav laus. Tus menyuam ntawd twb muaj rau hli hauv tus pojniam uas raug hu ua pog qhuav. 37 Vim Vajtswv Ntuj ua tau txhua lolus.”
38 Malis tau teb tias, “Nimno, kuv yog tus Tswv li ntxhais txib. Cia tshwmsim rau kuv li koj lolus.” Ces tus timtswv tau ncaim nws.
Malis Mus Saib Elixanpes
39 Malis tau sawv tsees lub sijhawm ntawd thiab tau taugkev ceev nrooj mus pem roob, mus rau ib lub nroog hauv Yudas, 40 thiab nws tau mus hauv Xakhaliyas tsev thiab tau hais nyobzoo rau Elixanpes. 41 Thaum Elixanpes hnov Malis lolus nyobzoo, tus menyuam hauv nws plab tau dhia, thiab Elixanpes tau puvnpo tus Ntsujplig Dawbhuv, 42 mas nws tau qw thiab hais tias, “Koj yog tus tau koobhmoov saum tsoom pojniam, thiab tus menyuam hauv koj plab kuj tau koobhmoov. 43 Qhov no tshwm qhov twg los, es kuv tus Tswv leej niam yov tuaj cuag kuv? 44 Rauqhov thaum kuv lub pobntseg hnov dheev koj lolus nyobzoo, tus menyuam hauv kuv plab tau dhia txaussiab hlo. 45 Thiab tau koobhmoov yog tus pojniam uas ntseeg tias tus Tswv tej lus rau nws yuav tiav xwb.”
Malis Zaj Nkauj
1 Xam 2:1-10
46 Ces Malis tau hais tias:
“Kuv me siabntsws txhawbnqa tus Tswv,
47 thiab kuv tus ntsujplig txaussiab rau Vajtswv,
kuv tus Cawmseej,
48 vim Nws tau saib Nws tus ntxhais txib txojkev poobtsag.
Txij no mus tagnrho tej pojniam yuav foom koobhmoov rau kuv,
49 vim tus Muaj Hwjchim tau ua tej yam loj rau kuv.
Nws lub npe dawbhuv!
50 Nws kev tabncuab yog rau cov hwm Nws,
ib tiam rau ib tiam.
51 Nws tau siv Nws txhais npab muaj zog,
Nws tau caum cov khavtheeb saum hlwb thiab hauv siab tawg rirws,
52 Nws tau txo cov muaj hwjchim saum zwmtxwv,
thiab Nws tau tsa cov txo hwjchim.
53 Nws tau ntim yam zoo phwjyaws rau cov tshaib,
thiab tau ntiab cov npluanuj mus qhuav tes qhawv.
54 Nws tau tsa Nws tus tubtxib Yixayees,
los nco kev tabncuab,
55 raws nraim li Nws tau hais rau peb tej yawgkoob,
rau Anplahas thiab nws lub noob mus ibtxhis.”

56 Malis tau nrog Elixanpes nyob peb lub hlis, es nws mam tau rovlos tsev.
Yauhas Npatitaus Yug
57 Thaum lub caijnyoog tau puv rau Elixanpes yug menyuam, nws tau yug ib tug tub. 58 Neeg zejzog thiab nws cov txheebze tau hnov tias tus Tswv tau tsa Nws kev tabncuab rau saum Elixanpes, mas lawv tau nrog nws zoo siab.
59 Txwm nkaus rau hnub yim, lawv tau tuaj muab tus menyuam txiavtawv thiab lawv tau hu nws npe ua Xakhaliyas raws nws txiv. 60 Ces nws niam tau teb tias, “Tsis ua li, tabsis nws yuav raug hu ua Yauhas.”
61 Lawv kuj tau hais rau nws tias, “Tsis muaj leejtwg hauv koj cajces uas tau hu lub npe no.”
62 Ces lawv tau piavtes rau tus menyuam leej txiv seb nws xav kom tis tus menyuam npe li cas. 63 Thaum taij tau ib daim txhais yias, nws tau sau tias, “Yauhas yog nws lub npe.” Sawvdaws tau xav tsis thoob. 64 Nws lub qhovncauj thiab nplaig tau qhib tamsis, thiab nws tau hais lus qhuas Vajtswv Ntuj. 65 Tagnrho tej neeg zejzog tau ntshai thiab tej lus no tau raug hais thoob plaws tej roob hauv Yudas, 66 thiab txhua leej uas tau hnov tau cim rau hauv lawv siab tias, “Tus menyuam no yuav peemtsheej dabtsi?” Rauqhov tus Tswv txhais tes kuj tau nrog Nws.
Xakhaliyas Zaj Nkauj
67 Nws txiv Xakhaliyas tau puvnpo tus Ntsujplig Dawbhuv thiab tau cevlus tias:
68 “Qhuas tus Tswv, Yixayees tus Vajtswv Ntuj,
rauqhov Nws tau tuaj ua kev theejtxhoj rau Nws haivneeg.
69 Nws tau tsa peb tus kub kev cawmdim
rau hauv Nws tus tubtxib Daviv lub tsev,
70 (raws li Nws tau hais los ntawm Nws cov cevlus dawbhuv
tej qhovncauj nram ntej,)
71 kev cawmdim tawm ntawm tej yeebncuab
thiab cov ntxub peb txhais tes,
72 uas yog los tabncuab peb tej niam tej txiv,
thiab los nco txog Nws tus txhooj dawbhuv,
73 xws li tej lus twv uas Nws tau twv rau peb txiv Anplahas,
tias yuav muab rau peb,
74 yuav cawm peb tawm ntawm yeebncuab txhais tes,
los teev Nws tsis ntshai kiag
75 hauv kev dawbhuv thiab kev ncajncees
rau ntawm Nws xubntiag mus tag peb sim neej.
76 Thiab koj, metub, yuav raug hu ua tus cevlus rau tus Loj Kawgnkaus,
rauqhov koj yuav mus uantej tus Tswv mus npaj Nws tej kev,
77 mus muab kev paub kev cawmdim rau Nws haivneeg
los ntawm kev zam lawv tej kev txhaum;
78 vim peb tus Vajtswv Ntuj txojkev mobsiab tabncuab,
lub hnub samsim tawm saum ntuj tuaj rau peb,
79 thiab ci mus rau cov zaum hauv qhov tsausntuj
thiab ntawm kev tuag tus duab ntxoo,
kom peb kotaw tsuj ncaj saum txojkev thajyeeb.”
80 Tus metub tau lojhlob thiab tau khovkho sab ntsujplig; thiab nws tau nyob tom mojsab qhua mus txog hnub nws tau tshwm rau Yixayees.
2
Yexus Yug
1 Lub sijhawm ntawd, Fajtim Aunkuxataus tau tawmcai kom muaj kev teevnpe thoob plaws lub ntuj nws kav. 2 Kev teevnpe thawj zaug no tau muaj thaum Kulenius tau ua tus kavxeev hauv Xilias. 3 Ces sawvdaws tau taugkev mus teevnpe, nyias mus rau nyias lub nroog.
4 Yauxej tau sawv hauv nroog Naxalev pem Kalilais mus rau hauv Yudas, mus hauv Daviv lub nroog uas hu ua Npelehees, vim nws yog Daviv tsevneeg thiab cajces. 5 Nws tau mus teevnpe nrog Malis, tus uas tau raug qhaib rau nws ntawd, thiab Malis samsim suab ib plab menyuam. 6 Sijhawm nkawv tau nyob rau ntawd, Malis tau txog caij yug menyuam, 7 thiab nws tau yug nws thawj tug tub. Nws tau muab ntaub qhwv tus me tub thiab muab pw rau hauv lub dabzaub, vim tias lub tsev so tsis tau muaj chaw rau nkawv.
Cov Zov Yaj thiab Timtswv
8 Cheebtsam ntawd tau muaj cov zov yaj tom nras uas tau zov lawv cov yaj hmontuj. 9 Tus Tswv tus timtswv tau tshwm rau lawv thiab tus Tswv tus tshwjchim tau ci ntsavus ibncig lawv, mas lawv tau ntshai heev. 10 Tabsis tus timtswv tau hais rau lawv tias, “Txhob ntshai! Rauqhov nimno kuv los tshajtawm txojkev zoo siab loj heev rau nej uas yog rau txhua haivneeg, 11 vim tias hnub no tus Cawmseej tau yug rau nej hauv Daviv lub nroog. Nws yog tus Tswv, tus Khetos. 12 Thiab qhov no yog lub cim rau nej: Nej yuav nrhiav pom ib tug menyuam qhwv ntaub thiab pw hauv lub dabzaub.”
13 Cov tubrog saum ntuj coobcoob tau tshwm nrog tus timtswv; lawv tau hu nkauj qhuas Vajtswv Ntuj thiab hais tias:

14 “Tshwjchim rau Vajtswv Ntuj saum ntuj,
thiab kev thajyeeb rau tej neeg haumxeeb hauv ntiajteb.”

15 Tomqab cov timtswv ncaim lawv mus saum ntuj lawm, cov zov yaj ibleeg tau hais rau ibleeg tias, “Cia peb mus kom txog Npelehees thiab kom peb pom qhov xwmtxheej uas tau tshwmsim no, thiab tus Tswv tau qhia rau peb.”
16 Ces lawv tau khiav mus thiab tau nrhiav pom Malis, Yauxej thiab tus metub mos uas tau pw hauv lub dabzaub. 17 Thaum pom lawm, lawv tau qhia zaj lus uas tau raug hais rau lawv txog tus metub no. 18 Txhua leej uas tau hnov ntawd tau xav tsis thoob txog cov zov yaj tej lus rau lawv; 19 tabsis Malis tau khaws txhua lolus no, muab xav tujtoog hauv nws lub siab. 20 Cov zov yaj tau rovqab mus, ibke tsa tshwjchim thiab ibke hu nkauj qhuas Vajtswv Ntuj txog txhua yam uas lawv tau hnov thiab tau pom, raws nraim li twb raug hais rau lawv.
21 Thaum txog hnub yim, hnub uas Nws tau raug txiavtawv, Nws lub npe tau raug tis ua Yexus, lub npe uas tus timtswv tau hu uantej Nws tau xeeb hauv plab.
Coj Yexus Mus Fij Hauv Tuamtsev
22 Thaum txog sijhawm lawv yuav tau ntxuav tuskheej raws Mauxes Kevcai, Yauxej thiab Malis tau coj tus metub mus fij rau tus Tswv hauv Yeluxalees, 23 raws li twb sau tseg hauv tus Tswv Kevcai tias, “Txhua tus tub uas qhib niam lub plab yuav raug hu ua tus dawbhuv rau tus Tswv,” 24 thiab mus muab khoom fij raws li lolus hauv tus Tswv Kevcai tias, “Ib txwm nquab dawb lossis ob tug nquab nyeg.”
25 Nimno ib tug txivneej, npe hu ua Ximeoos, tau nyob hauv Yeluxalees, thiab nws yeej yog ib tug neeg ncajncees thiab teev Vajtswv Ntuj zoo. Nws tau tos ntsoov Yixayees txojkev npligsiab, thiab tus Ntsujplig Dawbhuv kuj tau nyob rau saum nws. 26 Tus Ntsujplig Dawbhuv twb muab puavpheej rau nws lawm tias nws yov tsis tuag uantej nws tau pom tus Tswv tus Khetos. 27 Vim tus Ntsujplig Dawbhuv coj, nws tau tuaj hauv lub tuamtsev. Sijhawm ob niamtxiv ntawd tau coj tus metub Yexus los hauv tuamtsev kom nkawv yuav ua raws li Kevcai tau teev tseg txog Nws, 28 Ximeoos tau txais tus menyuam rau ntawm npab, tau qhuas Vajtswv Ntuj thiab hais tias:

29 “Nimno tso koj tus tubtxib mus nrog kev thajyeeb os, tus Tswv,
raws li koj lolus hais;
30 rauqhov kuv ob lub qhovmuag tau pom koj txojkev cawmdim,
31 uas koj tau npaj rau ntawm txhua haivneeg xubntiag,
32 ua qhov kaj mus ci rau pejkum neeg
thiab ua tshwjchim rau Yixayees, koj haivneeg.”

33 Yexus txiv thiab niam tau xav tsis thoob txog tej lus uas tau hais txog Nws. 34 Ximeoos tau foom koobhmoov rau nkawv thiab nws tau hais rau Malis, Yexus niam: “Saib, Nws tau tshwmsim los kom coob leej hauv Yixayees ntog thiab sawv, thiab los ua lub cim rau luag tsawm 35 kom coob leej tej kev xav yuav raug nthuav tawm. Thiab rab ntaj kuj yuav hlais rhe koj siabntsws.”
36 Nyob ntawd kuj tau muaj Anas, tus cevlus, uas yog Fanuees tus txhais hauv xeem Aseles. Nws twb laus heev lawm. Tomqab sibyuav, nws tau nrog nws tus txiv uaneej xya lub xyoo 37 thiab tau ua pojntsuam yimcaum-plaub xyoos. Nws tsis tau tawm ntawm lub tuamtsev, niaj hnub niaj hmo pehawm Vajtswv Ntuj los ntawm kev yoo mov thiab kev thov Vajtswv. 38 Tib lub sijhawm no, nws tau sawv ntawd, qhuas Vajtswv Ntuj thiab hais txog Yexus rau tagnrho cov neeg uas tos ntsoov kev txhiv Yeluxalees.
39 Thaum nkawv tau ua tiav txhua yam raws tus Tswv Kevcai, nkawv tau rovmus rau Naxalev hauv Kalilais. 40 Tus me tub tau lojhlob thiab khov. Nws tau puvnpo tswvyim thiab Vajtswv Ntuj vajhmoov tau nrog Nws.
Tus Metub Yexus Hauv Tuamtsev
41 Nws niam thiab txiv txeev tau nce mus Yeluxalees hauv lub koobtsheej hladhau raws li kabke. 42 Thaum Yexus tau muaj kaum-ob xyoos, lawv tau nce mus hauv lub koobtsheej raws li kabke. 43 Txog hnub xaus, sijhawm lawv tau rovlos ntawd, tus tub Yexus tau poobqab hauv Yeluxalees tabsis nws niam thiab txiv tsis tau paub. 44 Vim nkawv tau xav tias Nws tau nrog cov neeg taugkev uake lawm, nkawv tau los ib hnub ke es nkawv mam tau tig nrhiav Nws nruab nrab cov txheebze thiab cov neeg sibpaub. 45 Thaum nrhiav tsis pom, nkawv tau rovmus nrhiav Nws hauv Yeluxalees. 46 Peb hnub tomqab, nkawv tau pom Nws ntawm tuamtsev, zaum nruab nrab cov xibfwb, mloog lawv thiab nug lawv. 47 Txhua tus uas tau hnov Nws kuj tau xav tsis thoob txog Nws kev totaub thiab tej lus nug. 48 Pom dheev Nws, nkawv tau xav tsis tawm, ces Nws niam tau hais rau Nws tias, “Metub, koj tau ua dabtsi li no rau wb? Nimno, koj txiv thiab kuv tau taugkev rau qhov txhia chaw nrhiav koj.”
49 Ces Nws tau teb nkawv tias, “Vim li cas neb tau nrhiav kuv? Neb tsis tau paub tias kuv cheemtsum nyob hauv kuv Txiv lub tsev lod?” 50 Tabsis nkawv tsis tau totaub lolus uas Nws tau hais rau nkawv.
51 Nws tau nqis nrog nkawv mus rau Naxalev; thiab Nws tau nyob qab tswjhwm ntawm nkawv. Nws niam tau ceev txhua lolus no rau hauv nws lub siab. 52 Yexus tau lojhlob thiab tau khov, puvnpo tswvyim thiab vajhmoov nrog Vajtswv Ntuj thiab neeg.
3
Yauhas Npaj Txojkev
Mat 3:1-12; Mak 1:3-8
1 Hauv xyoo kaum-tsib uas Fajtim Tinpelius tau kav tebchaws, Pootius Philaj tau ua tus kavxeev hauv Yudas, thiab Helauj tau ua tus kav ib-feem plaub hauv Kalilais, Filiv thiab nws tus kwv nkawv tau kav cheemtsam Ituleas thiab Takaunitis, nyias saib nyias ib-feem plaub, thiab Lixaniyas tau kav ib-feem plaub nyob Anpilees. 2 Ntu Anas thiab Kaiyafas tau ua povthawj hlob, Vajtswv Ntuj lolus tau los rau Yauhas, Xakhaliyas tus tub, tom mojsab. 3 Ces nws tau mus rau txhua qhov chaw ntawm tus dej Yuladees, tshajtawm txojkev rausdej txog kev thimxav mus rau kev zamtxim, 4 ibyam li twb sau hauv tus cevlus Yaxayas phau ntawv:

“Lub suab ntawm tus qw tom mojsab:
‘Npaj tus Tswv txojkev,
kho Nws tej kev kom ncaj.
5 Txhub txhua lub hav,
txo txhua lub roob thiab txhua phab toj.
Npoog tej qhovzawj kom tiaj,
ncaws tej pobtsag kom tus.
6 Ces tagnrho nqaijtawv yuav pom
Vajtswv Ntuj txojkev cawmdim.’”

7 Yog li ntawd, nws tau hais rau tej neeg coobcoob uas tau taugkev tawm tuaj rausdej ntawm nws tias, “Cov niag nab xya, leejtwg ceebtoom rau nej kom khiav tawm ntawm txojkev chim uas samsim los? 8 Yog li ntawd, txi txiv kom phim kev thimxav. Txhob pib hais tuskheej tias, ‘Peb muaj txiv Anplahas.’ Rauqhov kuv hais rau nej tias Vajtswv Ntuj muaj peevxwm tsa tej pobzeb los ua Anplahas menyuam. 9 Rab taus twb rhais rau ntawm tej hauvpaus ntoo lawm. Yog li ntawd, txhua tsob ntoo uas tsis txi txiv zoo yuav raug ntov thiab muab pov rau hauv cubtawg.”
10 Ces tej neeg coobcoob tau nug nws tias, “Yog li ntawd, peb yov ua li cas?”
11 Nws tau teb lawv thiab hais tias, “Tus muaj ob lub tsho, cia nws muab ib lub rau tus tsis muaj, thiab tus muaj zaubmov, cia nws ua tibyam li.”
12 Cov sau se tau tuaj rausdej thiab lawv tau nug tias, “Xibfwb, peb yov ua li cas?”
13 Nws tau teb rau lawv tias, “Txhob sau tshaj qhov uas tau tawmcai rau nej.”
14 Cov tubrog kuj tau nug nws tias, “Thiab peb ne, peb ho yov ua li cas?”
Nws tau teb rau lawv, “Txhob huab ib yam dabtsi, txhob ntxo lus, tabsis txaussiab rau nej lub nyiaj hli.”
15 Nimno thaum zejtsoom samsim tos ntawd, lawv tau xav hauv lawv siab txog Yauhas tias nws puas yov yog tus Khetos. 16 Yauhas tau teb rau lawv sawvdaws tias, “Kuv muab nej raus hauv dej, tabsis tus muaj zog dua kuv samsim los, tus uas kuv tsis tsimnyog daws Nws tej hlua khau. Nws yuav muab nej raus hauv tus Ntsujplig thiab hauv hluavtaws. 17 Nws rab ntxuam nyob ntawm Nws tes; Nws yuav ntxuaj Nws lub tshav nplej thiab sau cov qoob mus rau hauv Nws lub txhab, tabsis Nws yuav hlawv cov npluag hauv lub cubtawg tsis txawj kug.” 18 Yog li ntawd, nws kuj tau nquahu ntau yam ntxiv thiab tau tshajtawm txojmoo zoo rau nws haivneeg.
19 Tabsis thaum Helauj tus kav ib-feem plaub tau raug Yauhas txhwj ntsig txog Helaudias, uas yog nws tus kwv tus pojniam, thiab ntsig txog tej kev phem uas nws tau ua, 20 Helauj tau tsub qhov nram no ntxiv rau tej kev phem ntawd: Nws tau muab Yauhas kaw hauv tsev lojcuj.
Yexus Rausdej thiab Nws Cajces
Mat 1:1-17; Mak 1:9-11
21 Thaum tagnrho zejtsoom tau tuaj rausdej ntawd, Yexus tau tuaj rausdej thiab. Sijhawm Nws samsim thov Vajtswv, ntuj tau qhib plho 22 thiab tus Ntsujplig Dawbhuv tau nqis los rau saum Nws thiab muaj lub cev yamnkaus tus nquab dawb. Ib lub suab tau hais saum ntuj tias, “Koj yog kuv tus Tub uas kuv hlub. Kuv raugsiab rau koj.”
23 Mas thaum pib ua haujlwm, Yexus tuskheej tau muaj pebcaug xyoo. Li sawvdaws paub, Nws yog Yauxej tub,
Eli tub, 24 Mathaj tub,
Levis tub, Melekhis tub,
Yanenais tub, Yauxej tub,
25 Matatiyas tub, Amaus tub,
Nahus tub, Exalis tub,
Nakhais tub, 26 Maas tub,
Matatiyas tub, Xemis tub,
Yauxes tub, Yaudas tub,
27 Yauanas tub, Lexas tub,
Xelunpanpees tub, Seathiyees tub,
Nelis tub, 28 Melekhis tub,
Adis tub, Kauxas tub,
Emadas tub, Eles tub,
29 Yausuas tub, Eliexes tub,
Yaulees tub, Mathaj tub,
Levis tub, 30 Ximeoos tub,
Yudas tub, Yauxej tub,
Yaunames tub, Eliyakees tub,
31 Meleas tub, Menas tub,
Matathas tub, Nathas tub,
Daviv Tub, 32 Yexais tub,
Aunpes tub, Npau-am tub,
Xalemoos tub, Nasoos tub,
33 Aminadas tub, Lasa tub,
Heloos tub, Peles tub,
Yudas tub, 34 Yakhauj tub,
Ixaj tub, Anplahas Tub,
Telas tub, Nahaus tub,
35 Xelus tub, Leus tub,
Pelej tub, Enpes tub,
Selas tub, 36 Kainas tub,
Afaxas tub, Sees tub,
Naues tub, Lamej tub,
37 Methuxelas tub, Enauj tub,
Yales tub, Mahalalees tub,
Kenas tub, 38 Enauses tub,
Xej tub, Adas tub,
Vajtswv Ntuj Tub.
4
Yexus Raug Simsiab
Mat 4:1-11; Mat 1:12-13
1 Puvnpo tus Ntsujplig Dawbhuv, Yexus tau tawm ntawm tus dej Yuladees thiab tus Ntsujplig tau coj Nws mus tom mojsab. 2 Plaubcaug hnub, Nws tau raug ntxwgnyoog simsiab. Sijhawm ntawd Nws tsis tau noj dabtsi, thiab tomqab ntawd Nws tau tshaib heev.
3 Ntxwgnyoog tau hais rau Nws tias, “Yog koj yog Vajtswv Ntuj tus Tub, hais rau lub pobzeb no kom ua movci.”
4 Yexus tau teb nws tias, “Twb sau tseg tias, ‘Neeg yuav tsis muajsia los ntawm movci xwb.”
5 Ntxwgnyoog tau coj Nws nce mus ib qhov chaw siab thiab ib sijhuam nws tau muab txhua lub tswvkuj hauv ntiajteb rau Nws saib. 6 Ntxwgnyoog tau hais rau Nws tias, “Kuv yuav muab tswjchim thiab tshwjchim saum tej tswvkuj no tagnrho rau koj, vim tej no tau raug muab rau kuv thiab kuv yuav muab rau tus uas kuv xav muab. 7 Yog li ntawd, yog koj txhoscaug ntawm kuv xubntiag, txhua yam yuav yog koj tug.”
8 Yexus tau teb tias, “Twb sau tseg tias, ‘Koj txhoscaug rau ntawm Vajtswv Ntuj, koj tus Tswv, thiab tiam Nws xwb.’”
9 Nws tau coj Yexus los Yeluxalees thiab los sawv saum qhov siab tshaj ntawm lub tuamtsev. Nws tau hais rau Yexus tias, “Yog koj yog Vajtswv Ntuj tus Tub, pov tuskheej ntawm no mus rau hauv. 10 Rauqhov twb sau tseg tias:

‘Nws yuav tawmlus rau Nws cov timtswv txog koj
kom los ceev koj,
11 ces lawv yuav txais koj saum lawv tes
kom koj kotaw txhob tsoo pobzeb.’”

12 Yexus tau teb nws tias, “Twb hais tseg tias, ‘Koj txhob sim Vajtswv Ntuj, koj tus Tswv li.’”
13 Tomqab xaus txhua txojkev simsiab, ntxwgnyoog tau ncaim Nws mus kom txog lwm lub zoo sijhawm.
Yexus Tsis Raug Txais Hauv Naxalev
14 Ces Yexus tau rovmus Kalilais nrog tus Ntsujplig lub hwjchim. Nws lub moo tau nrov mus thoob plaws cheebtsam ntawd. 15 Nws tau qhuabqhia hauv lawv tej txoos sablaj thiab tau raug sawvdaws qhuas.
16 Nws tau mus hauv Naxalev, lub chaw uas Nws tau lojhlob, thiab Nws tau mus hauv lub txoos sablaj raws li Nws kev coj hnub Xanpataus. Nws tau sawv los nyeem. 17 Luag tau muab tus cevlus Yaxayas phau ntawv rau Nws thiab Nws tau nthuav phau ntawv los pom qhov uas twb raug sau tias:

18 “Tus Tswv tus Ntsujplig nyob saum kuv;
rauqhov Nws tau muab roj pleev kuv
mus tshajtawm txojmoo zoo rau cov pluag.
Nws tau xa kuv mus tshajtawm kev dim rau cov raug ntes
thiab kev kaj rau cov digmuag,
mus tso cov neeg raug quabyuam tawm,
19 mus tshajtawm tus Tswv lub zoo xyoo.”

20 Thaum muab phau ntawv kaw thiab cev rovqab rau tus tubtxib, Yexus tau zaum. Txhua lub qhovmuag hauv lub txoos sablaj tau saib ntsoov Nws. 21 Ces Nws tau pib hais rau lawv tias, “Hnub no, nqe Vajlugkub no twb tiav ntawm nej pobntseg.”
22 Tagnrho sawvdaws tau ua timkhawv txog Nws thiab lawv tau xav tsis thoob rau tej lus vajhmoov uas tau laublug tawm hauv Nws qhovncauj thiab lawv tau nug tias, “Nws tsis yog Yauxej tus tub lod?”
23 Ces Nws tau teb lawv tias, “Tseeb tiag, nej hais lo luspiv no rau kuv, ‘Kws khomob, kho tuskheej! Tej xwmtxheej uas peb tau hnov hauv Kapenaus ntawd, ua hauv koj txiv lub zos no thiab.’”
24 Nws tau hais ntxiv tias, “Kuv hais tseeb rau nej tias, tsis muaj ib tug cevlus raug txais hauv nws txiv lub zos. 25 Thiab kuv hais rau nej raws qhov tseeb. Tau muaj coob tus pojntsuam hauv Yixayees sijhawm Eliyas nyob, thaum ntuj tau raug kaw peb xyoos thiab rau hli, mas kev tshaib tau tshwm hnyav heev thoob plaws tebchaws, 26 tabsis Eliyas tsis tau raug xa mus rau lawv ib tug li, tshwj mus cuag tus pojntsuam Xalefas hauv Xidoos. 27 Thiab tau muaj coob tus mob ruas hauv Yixayees sijhawm tus cevlus Elisas nyob, tabsis tsis tau muaj ib tug tau raug kho huv, tshwj Naamas, tus neeg Xilias.”
28 Tagnrho cov neeg hauv lub txoos sablaj tau npautaws vog thaum lawv tau hnov tej no. 29 Lawv tau sawv los ntiab Nws tawm hauv lub nroog, thiab lawv tau coj Nws mus txog phab toj ntxhab ntawm ntug nroog, kom lawv muab Nws thawb poob tsag kiag. 30 Tabsis Nws tau taugkev phua plhawv hauv nruab nrab lawv mus lawm.
Yexus Ntiab Dab
Mak 1:21-28
31 Yexus tau nqis mus Kapenaus, ib lub nroog hauv Kalilais, thiab ntau hnub Xanpataus Nws tau qhuabqhia lawv. 32 Lawv tau xav tsis thoob txog Nws kev qhia, vim Nws txojlus tau muaj tswjchim.
33 Hauv lub txoos sablaj tau muaj ib tug txivneej raug ib tug ntsujplig dab qias. Nws tau qw lub suab nrovnrov tias, 34 “Ab, peb muaj dabtsi tawmtsam koj, Yexus Naxalev? Koj tuaj rhuav peb lod? Peb paub koj yog leejtwg, Vajtswv Ntuj tus Tub Dawbhuv!”
35 Ces Yexus tau txwv nws tias, “Ntsiag kiag thiab tawm ntawm tus txivneej no!” Thaum tus dab tau ua rau tus txivneej ntawd ntog rau hauv nruab nrab lawv, nws tau tawm ntawm tus txivneej thiab tsis tau ua rau nws raug mob dabtsi.
36 Sawvdaws tau ntshai thiab tau sibtham zomzaws tias, “Txojlus no yog dabtsi? vim Nws tau tawmlus nrog tswjchim thiab hwjchim rau tej ntsujplig qias ces lawv tawm plaws lawm.” 37 Nws lub moo tau nrov mus thoob txhua qhov hauv cheebtsam ntawd.
Yexus Kho Coob Leej
Mat 8:14-17; Mak 1:29-38
38 Yexus tau sawv ntawm lub txoos sablaj thiab tau mus hauv Ximoos lub tsev. Ximoos niam tais tabtom tau raug ib tug npaws hnyav thiab lawv tau qhia nws rau Yexus. 39 Yexus tau los sawv rau ntawm nws thiab tau txwv tus npaws; ces tus npaws tau tso nws tseg thiab tamsis ntawd nws tau sawv los tiam lawv.
40 Tomqab hnub poob, tagnrho zejtsoom tau coj lawv tej neeg mob, tsis hais tej mob yam twg, tuaj cuag Yexus. Nws tau tsa tes rau ib tug zujzus thiab kho lawv zoo. 41 Tej dab kuj tau tawm ntawm coob leej tomqab lawv tau qw tias, “Koj yog Vajtswv Ntuj tus Tub.” Yexus kuj tau txwv kom lawv txhob hais lus, rauqhov lawv tau paub tias Nws yog Khetos.
42 Thaum kaj ntug, Nws tau tawm mus rau ib lub mojsab. Tej neeg coobcoob tau nrhiav Nws, thiab thaum lawv tuaj txog ntawm Nws, lawv tau cheem Nws kom txhob ncaim lawv mus. 43 Tabsis Nws tau hais rau lawv tias, “Kuv cheemtsum mus tshajtawm txojmoo zoo txog Vajtswv Ntuj lub tswvkuj rau lwm tej nroog thiab, vim kuv tau raug xa los rau qhov no.” 44 Ces Nws txeev tau qhuabqhia li no hauv cov Yudais tej txoos sablaj.
5
Hu Thawj Cov Thwjtim
Mat 4:18-22; Mat 1:16-20; Yhs 1:40-42
1 Muaj ib zaug tej neeg coobcoob tau sibtxiv tuaj mloog Vajtswv Ntuj txojlus ntawm Yexus, thaum Nws sawv ntawm ntug lub pasdej Nkenexales. 2 Nws tau pom ob lub nkoj nres ntawm ntug dej, hos cov neeg muab ntses tau nqis saum nkoj thiab tau tabtom ntxuav lawv tej moo. 3 Yexus tau nce rau hauv ib lub nkoj, uas yog Ximoos lub, thiab tau taij nws kom nquam lub nkoj tawm ntawm ntug mentsis. Tomqab zaum lawm, Nws tau qhia tej neeg coobcoob.
4 Thaum Nws tau so qhuabqhia, Nws tau hais rau Ximoos tias, “Nquam mus tom qhov tob thiab tso koj tej moo cuab ntses.”
5 Ximoos tau teb tias, “Yawg hlob, peb tau khwv ib hmos thiab peb twb tsis tau ib tug li, tabsis kuv yuav tso tej moo vim koj lolus.”
6 Thaum ua li ntawd, lawv tau kuav ntses ntau puvnkaus moo thiab lawv tej moo kuj tsis tau ntuag. 7 Ces lawv tau co tes rau cov kwvluag nyob lwm lub nkoj kom tuaj nrog lawv rub. Cov kwvluag tau tuaj thiab lawv tau muab ntim rau ob lub nkoj txog qhov ob lub nkoj yuav tog.
8 Thaum pom li no, Ximoos Petus tau qhaucev rau ntawm Yexus hauvcaug thiab hais tias, “Txav tawm ntawm kuv, tus Tswv, rauqhov kuv yog neeg txhaum.” 9 Kev ntshai tau mooj nws thiab cov nrog nws tagnrho vim cov ntses ntauntau uas lawv tau ntes ntawd. 10 unpaus thiab Yauhas, Xenpedais ob tug tub, yog Ximoos ob tug kwvluag.
Ces Yexus tau hais rau Ximoos tias, “Txhob ntshai, txij no mus koj yuav ua tus muab neeg.” 11 Ces tomqab rub tej nkoj rau saum nqhuab, lawv tau tso txhua yam tseg thiab caum Yexus.
Tus Txivneej Mob Ruas
Mat 8:2-4; Mak 1:40-44
12 Thaum Yexus tau nyob hauv ib lub nroog, uas muaj ib tug txivneej mob ruas thoob plaws. Thaum pom Yexus, nws tau txhoscaug rau ntawm Yexus xubntiag thiab thov Nws tias, “Tus Tswv, yog koj txaussiab, koj muaj hwjchim ntxuav kuv kom huv.”
13 Cev tes mus tuav nkaus nws, Yexus tau hais tias, “Kuv txaussiab, zoo huvsi.” Tamsis ntawm tus ruas tau ncaim ntawm nws. 14 Yexus tau hais ntsees rau nws tias, “Txhob qhia rau leejtwg, tabsis mus qhia tuskheej rau ib tug povthawj, thiab nqa khoom fij mus ua timkhawv txog txojkev raug ntxuav dawbhuv raws li Mauxes tau tawmcai.” 15 Txojlus ntsig txog Yexus tau hajyam nthuav mus, thiab tej neeg coobcoob tau sibsau tuaj mloog Nws qhia thiab kho lawv tej mob. 16 Tabsis Nws txeev tau tawm mus rau tom tej mojsab thiab tau thov Vajtswv.
Kho Tus Txivneej Tuag Testaw
Mat 9:2-8; Mak 2:3-12
17 Ib hnub, thaum Yexus tabtom qhuabqhia, cov Falixais thiab cov xibfwb qhia Kevcai uas tawm txhua nrho Kalilais, Yudas, thiab Yeluxalees tau tuaj zaum ntawd. Tus Tswv lub hwjchim kho mob kuj tau nrog Nws. 18 Ces ib cov txivneej tau nqa ib tug txivneej uas tau qhuav testaw saum lav tuaj. Lawv tau nrhiav kev coj nws los tso rau ntawm Yexus xubntiag. 19 Thaum nrhiav tsis tau kev coj nws nkag los vim tej neeg coobcoob, lawv tau nqa nws mus saum ruv thiab muab nws tso nrog daim lev saum cov vuas los rau ntawm Yexus xubntiag nruab nrab tej neeg.
20 Thaum pom lawv kev ntseeg, Yexus tau hais tias, “Phoojywg, koj tej kev txhaum raug zam rau koj lawm.”
21 Cov xibfwb qhia Kevcai thiab cov Falixais tau pib xav hauv nruab siab tias, “Nws yog leejtwg es Nws hais lus tuammom? Leejtwg thiaj muaj hwjchim zamtxim, tsuas yog Vajtswv Ntuj nkaus xwb sad?”
22 Tabsis Yexus tau paub lawv tej kev xav nruab siab, Nws thiaj tau teb rau lawv tias, “Vim li cas nej xav hauv nej siab li? 23 Dabtsi yoojyim dua, hais tias: ‘Koj tej kev txhaum raug zam rau koj lawm’ lossis hais tias, ‘Sawv thiab muskev’? 24 Tabsis kom nej paub tias Neeg Leej Tub muaj tswjchim zamtxim hauv ntiajteb,” Nws tau hais rau tus qhuav testaw tias, “Kuv hais rau koj: Sawv, nqa koj daim lev, thiab taugkev mus tom koj lub tsev.” 25 Ces nws tau sawv tsees ntawm lawv xubntiag tamsis ntawd, nqa kiag lub chaw uas nws tau pw, thiab tau tawm, ibke mus ibke qhuas Vajtswv Ntuj, rau tom tsev lawm. 26 Tagnrho sawvdaws tau xav tsis thoob. Lawv tau ntshai thiab tau qhuas Vajtswv Ntuj tias, “Hnub no, peb pom yam tsis txaus ntseeg.”
Hu Levis
Mat 9:9-13; Mak 2:14-17
27 Tomqab tej no, Yexus tau tawm mus pom ib tug sau se uas npe hu ua Levis zaum ntawm lub rooj se. Ces Yexus tau hais rau nws tias, “Caum kuv los.” 28 Ces tso plhuav txhua yam, nws tau sawv tsees thiab tau caum Yexus. 29 Levis tau ua ib rooj mov rau Yexus hauv nws tsev. Cov sau se thiab lwm cov coobcoob tau nrog lawv zaum uake. 30 Cov Falixais thiab lawv cov xibfwb qhia Kevcai tau yws rau Yexus cov thwjtim tias, “Vim li cas nej noj thiab haus nrog cov sau se thiab cov neeg txhaum?”
31 Yexus tau teb rau lawv tias, “Cov neeg nyobzoo tsis muaj kev cheemtsum tau tus kws khomob tabsis cov neeg mob muaj. 32 Kuv twb tsis los hu cov neeg ncajncees tabsis los hu cov neeg txhaum mus rau kev thimxav.”
Lus Nug Txog Kev Yoo Mov
Mat 9:14-17; Mak 2:18-22
33 Ces Lawv tau hais rau Nws tias, “Yauhas cov thwjtim txeev yoo mov thiab thov Vajtswv, ibyam li Falixais cov, tabsis koj cov tsuas pom noj thiab haus.”
34 Yexus tau hais rau lawv tias, “Nej tsis muaj peevxwm ua kom tus nraug vauv cov phoojywg yoo mov thaum nws tseem nyob nrog lawv pod? 35 Tabsis sijhawm yuav los txog thaum tus nraug vauv raug coj ntawm lawv lawm, ces lawv yuav yoo mov thaum ntawd.”
36 Nws tau hais ib zaj luspiv rau lawv tias, “Leejtwg tsis muab lub tsholoj tshiab dua mus ntxiv lub tsholoj qub. Yog ua li, nws yuav muab lub tshiab dua! Thiab daim ntaub ntawm lub tsholoj tshiab yov tsis phim lub qub. 37 Thiab leejtwg tsis hliv cawv tshiab rau lub hnab tawv qub. Yog ua li, cov cawv tshiab yuav tom tej hnab tawv thiab cov cawv yuav nchuav thiab tej hnab yuav puastsuaj. 38 Tabsis luag muab cov cawv tshiab ntim rau tej hnab tawv tshiab. 39 Leejtwg haus cawv qub, nws yuav tsis ntshaw haus cawv tshiab, rauqhov nws hais tias, ‘Cov qub zoo txaus lawm.’”
6
Tus Tswv Hnub Xanpataus
Mat 12:1-14; Mak 2:23-28; 3:1-6
1 Ib hnub Xanpataus, Yexus tau taugkev hla ib daim qoob. Nws cov thwjtim tau de, tev, thiab noj cov txhuv. 2 Cov Falixais tau hais tias, “Vim li cas nej ua qhov tsis raugcai hnub Xanpataus?”
3 Teb ntua lawv, Yexus tau hais tias, “Nej tsis tau hnov txog qhov uas Daviv tau ua thaum nws thiab cov nrog nws tau tshaib lod? 4 Nws tau mus hauv Vajtswv Ntuj lub tsev, thiab tomqab txais cov movci saum thaj, nws tau noj thiab tau muab rau cov nrog nws noj. Cov movci ntawd tsis raugcai noj, tshwj rau cov povthawj xwb.” 5 Ces Nws tau hais rau lawv tias, “Neeg Leej Tub yog tus Tswv hnub Xanpataus.”
6 Muaj dua ib hnub Xanpataus, Yexus tau mus qhuabqhia hauv lub txoos sablaj. Ib tug txivneej tau nyob ntawd uas nws sab tes xis tau qhuav lawm. 7 Cov xibfwb qhia Kevcai thiab cov Falixais tau soj seb Yexus puas yov kho mob hnub Xanpataus, kom lawv yuav nrhiav kev nkaug Nws. 8 Yexus tau paub lawv tej kev xav nruab siab, Nws tau hais rau tus txivneej uas muaj txhais tes qhuav tias, “Tawm los sawv hauv plawv.” Ces nws tau tawm los sawv hauv plawv.
9 Yexus tau hais rau lawv tias, “Kuv nug nej, raugcai ua zoo lossis ua phem hnub Xanpataus, cawm txojsia lossis cia puastsuaj?”
10 Tomqab saib lawv ib ncig tagnrho, Nws tau hais rau tus qhuav tes tias, “Xyab koj txhais tes.” Nws tau ua li hais, thiab nws txhais tes tau zoo li qub. 11 Ces lawv tau puvnpo kev tsis totaub thiab tau sibtham seb lawv yov ua li cas rau Yexus.
Xaiv Kaum-ob Tug Thwjtim
Mat 10:2-4; Mak 3:16-19; Ctu 1:13
12 Lub caij ntawm, Yexus tau tawm mus rau saum roob, mus thov Vajtswv, thiab Nws tau tauvpem ib hmos rau kev thov Vajtswv Ntuj. 13 Thaum kaj ntug, Nws tau hu Nws cov thwjtim thiab tau xaiv lawv kaum-ob leeg uas Nws kuj tau tis npe ua cov timthawj: 14 Ximoos tus uas tau raug hu ua Petus thiab nws tus kwv Anres, unpaus thiab Yauhas, Filiv, Npathaulaumais, 15 Mathais, Thaumas, Alafais tus tub unpaus, Ximoos tus tau raug hu ua yawg siabkub, 16 unpaus tus tub Yudas, thiab Yudas Ikhalaus uas tau dhau ua tus ntxeevsiab.
Koobhmoov thiab Vijnpog
Mat 5:3-12
17 Tomqab nqis nrog cov thwjtim los txog qhov tiaj, Nws cov thwjtim coobcoob uas tawm txhua qhov hauv Yudas, Yeluxalees, thiab tom ntug hiavtxwv pem Tiles thiab Xidoos 18 tau tuaj mloog Nws qhia thiab kho lawv tej mob. Cov neeg raug tej ntsujplig qias tsimtxom kuj tau raug kho zoo. 19 Pab neeg coobcoob ntawd tau nrhiav kev los tuav Nws kom Nws lub hwjchim yuav tawm thiab kho txhua tus zoo.
20 Yexus tau tsa qhovmuag saib Nws cov thwjtim thiab tau hais tias:
“Tau koobhmoov yog nej cov pluag,
rauqhov Vajtswv Ntuj lub tswvkuj yog nej tug.
21 Tau koobhmoov yog nej cov tshaib nimno,
rauqhov nej yuav tsaunpo.
Tau koobhmoov yog nej cov quaj nimno,
rauqhov nej yuav luag.
22 Tau koobhmoov yog nej thaum neeg ntxub nej,
thiab thaum lawv txiav nej thiab rhuav nej,
thiab muab nej lub npe hais phem vim Neeg Leej Tub.”
23 “Zoo siab thiab dhia pajpaws thaum ntawd, rauqhov nej tej nqizog muaj ntau heev saum ntuj. Lawv tej yawgkoob tau ua ibyam li no rau cov cevlus thaud.”
24 “Tabsis kev vijnpog rau nej cov npluanuj,
vim nej cais tuskheej deb ntawm nej txojkev npligsiab.
25 Vijnpog rau nej cov uas twb tau tsaunpo nimno,
vim nej yuav tshaib.
Vijnpog rau nej cov niaj hnub luag,
vim nej yuav nyiav thiab yuav quaj.
26 Vijnpog rau nej thaum neeg sawvdaws hais zoo txog nej,
rauqhov lawv tej yawgkoob kuj tau ua ibyam li no
rau cov cevlus cuav thaud.”
Hlub Yeebncuab
Mat 5:39-42
27 “Tabsis kuv hais rau nej cov mloog: Hlub nej cov yeebncuab, ua zoo rau cov ntxub nej, 28 foom zoo rau cov tsawm nej, thov Vajtswv rau cov nkaug nej. 29 Rau tus ntaus nej plhu, tig sab tod rau nws thiab; thiab leej twg txeeb nej lub tsholoj, txhob cheem nws txog lub tsho tab thiab. 30 Muab rau txhua tus uas taij koj, thiab yog leejtwg txeeb koj teejtug lawm, txhob taij rovqab. 31 Nej xav kom neeg ua rau nej li cas, ua ibyam li ntawd rau lawv.”
32 “Yog nej hlub tus uas hlub nej, nej qhov txiajntsig yog dabtsi? Rauqhov tej neeg txhaum kuj hlub cov uas hlub lawv thiab. 33 Thiab yog nej ua zoo rau cov uas ua zoo rau nej, nej muaj vajhmoov dabtsi? Tej neeg txhaum kuj ua tibyam li. 34 Yog nej qiv rau tej uas nej ciasiab tias nej yuav txais tau ntawm lawv, nej muaj vajhmoov dabtsi? Tej neeg txhaum kuj qiv rau cov neeg txhaum kom lawv yuav txais tau thiab. 35 Tabsis hlub nej cov yeebncuab thiab ua zoo rau lawv, qiv rau cov uas nej tsis ciasiab tias nej yuav txais dabtsi rovqab. Ces nej tej nqizog yuav ntau heev thiab nej yuav dhau ua tus Loj Kawgnkaus cov tub, vim tias Nws yog tus siab zoo rau cov neeg mojtxheej thiab cov neeg phem. 36 Dhau ua neeg tabncuab ibyam li nej Txiv yog tus tabncuab.”
Kev Txiavtxim Rau Lwm Tus
Mat 7:1-5
37 Txhob txiavtxim, es nej yuav tsis raug txiavtxim. Thiab txhob liamtxim, es nej thiaj tsis raug liamtxim. Tso luag dim, es nej thiaj yuav raug tso. 38 Muab, es nws yuav raug muab rau nej: Luag yuav muab ib lub zoo ntim uas ntim phwjyaws, tswm ceevceev, thiab theev txiv qev rau ntawm nej xubntiag. Rauqhov lub ntim uas nej ntim rau luag yuav raug muab ntim rovqab rau nej.”
39 Thiab Nws tau hais zaj luspiv no rau lawv: “Tus digmuag puas muaj peevxwm coj ib tug digmuag kev? Nkawv ob leeg yov tsis poob rau kwj deg? 40 Tus thwjtim tsis loj dua tus xibfwb, tabsis tomqab raug cob tiav txhua leej yuav zoo li nws tus xibfwb.”
41 Vim li cas koj saib qhov hmoov ntoo hauv koj tus kwvtij lub qhovmuag tabsis yav ntoo hauv koj lub qhovmuag koj ho tsis nwm txog? 42 Cas koj yov muaj peevxwm hais rau koj tus kwvtij tias, ‘Kwvtij, cia kuv muab qhov hmoov ntoo hauv koj lub qhovmuag,’ tabsis yav ntoo hauv koj lub qhovmuag koj ho tsis pom? Neeg xyuam plhu, xub muab yav ntoo hauv koj lub qhovmuag, ces koj thiaj pom tseeb mus muab qhov hmoov ntoo hauv koj tus kwvtij lub qhovmuag.”
Tsob Ntoo thiab Nws Cov Txiv
Mat 7:16,18,20
43 “Vim tias tsis muaj ntoo zoo txi txiv qaub, thiab kuj ho tsis muaj ntoo lwj txi txiv zoo. 44 Rauqhov txhua tsob ntoo raug paub los ntawm nws cov txiv. Luag tsis de txiv ncuavpias ntawm ntoo pos thiab tsis de txivhmab ntawm tauv pos. 45 Tus zoo neeg nqa qhov zoo tawm ntawm lub txhab siab zoo thiab tus phem nqa qhov phem tawm ntawm lub txhab siab phem. Vim tias nws lub ncauj hais tawm qhov puvnpo hauv lub siab.”
Neeg Ruam thiab Ntse Ua Tsev
Mat 7:24-27
46 “Vim li cas nej hu kuv ua ‘Tus Tswv, tus Tswv,’ tabsis nej tsis ua tej kuv hais? 47 Kuv yuav qhia nej tias, txhua tus uas los cuag kuv mloog kuv tej lus thiab ua li tej lus ntawd; kuv yuav nthuav rau nej saib nws zoo li cas: 48 Nws zoo li tus neeg ua tsev uas tau khawb tobtob thiab tso lub plagtsev pobzeb rau; mas thaum dej nyab, tus niam dej tau ntaus lub tsev tabsis nws tsis muaj peevxwm ua rau lub tsev puas vim lub tsev raug tsa zoo heev. 49 Tabsis tus hnov thiab tsis ua mas nws zoo li tus txivneej uas ua tsev rau saum av, tsis tso lub plagtsev pobzeb rau. Tus niam dej tau ntaus lub tsev thiab lub tsev tau vau kiag tamsis; kev puastsuaj tau tshwmsim loj heev rau lub tsev ntawd.”
7
Tus Thawj Tubrog Kev Ntseeg
Mat 8:5-13
1 Thaum Yexus tau xaus Nws tej lus no rau zejtsoom pobntseg, Nws tau nkag mus hauv Kapenaus. 2 Ib tug thawj tubrog pawgpua tus tubtxib tau muaj mob thiab yuav tuag. Tus tubtxib no raugsiab rau nws tus tswv heev. 3 Thaum hnov txog Yexus, tus thawj tubrog tau xa cov txwjlaug Yudais tuaj cuag Yexus thiab taij kom Nws mus cawm nws tus tubtxib. 4 Cov uas tuaj cuag Yexus ntawd tau nquahu Nws heev tias, “Nws yog ib tug uas tsimnyog rau koj pab, 5 vim nws tau hlub peb haivneeg thiab nws tuskheej tau tsa peb lub tsev sablaj rau peb.” 6 Ces Yexus tau taugkev nrog lawv mus.
Thaum Nws los txog tsis deb ntawm tus thawj tubrog lub tsev, tus thawj tubrog tau xa cov phoojywg tuaj hais rau Nws tias, “Tus Tswv, txhob tabkaum, rauqhov kuv tsis txaus kom koj nkag los hauv qab kuv lub ruvtsev, 7 vim kuv tuskheej twb tsis tsimnyog tuaj cuag koj. Tabsis hais tib lolus, ces kuv tus tubtxib yuav zoo. 8 Rauqhov kuv tuskheej nyob qab tswjchim thiab muaj cov tubrog nyob hauvqab kuv. Ces kuv hais rau tus no, ‘Mus’ los nws kuj mus, thiab hais rau tus tod tias, ‘Los’ los nws kuj los. Thiab kuv hais rau kuv tus tubtxib, ‘Ua qhov no’ los nws ua.”
9 Thaum hnov tej no, Yexus tau xav tsis thoob txog nws. Tig mus rau pab neeg coobcoob uas caum Nws, Yexus tau hais tias, “Kuv hais rau nej, kuv tsis tau pom txojkev ntseeg loj li no hauv Yixayees.” 10 Thaum cov raug xa tuaj ntawd rovmus txog tsev, lawv tau pom tus tubtxib zoo mob lawm.
Pojntsuam Tus Tub Sawv Rovlos
1 Vaj 17:17-24; 2 Vaj 4:32-37; Mak 5:21-24,35-43; Yhs 11:1-44
11 Tsis ntev tomqab ntawd, Yexus tau mus hauv ib lub nroog hu ua Nais. Nws cov thwjtim thiab ib pab neeg coobcoob kuj tau nrog Nws mus. 12 Thaum Nws tau tuaj ze lub roojvag ntawm lub nroog, nimno ib tug tuag tabtom tau raug kwv tuaj. Nws yog nws niam tibleeg tub thiab nws niam kuj yog ib tug pojntsuam. Ib pab neeg coobcoob hauv nroog tau nrog tus pojntsuam no. 13 Thaum pom tus pojntsuam no, tus Tswv tau tabncuab nws thiab tau hais rau nws tias, “Txhob quaj.”
14 Nws tau mus rau tom hauvntej thiab tau tuav lub hleb, ces cov kwv lub hleb tau nres. Yexus tau hais tias, “Tus hluas, kuv hais rau koj: Sawv los!” 15 Tus tuag tau sawv zaum thiab tau pib hais lus, ces Yexus tau muab nws rau nws niam.
16 Tagnrho sawvdaws tau ntshai thiab tau qhuas Vajtswv Ntuj tias, “Ib tug cevlus loj tau raug tsa nruab nrab peb!” Thiab lawv tau hais tias, “Vajtswv Ntuj tau los xyuas Nws haivneeg.” 17 Ces txojlus ntsig txog Yexus no tau tawm mus thoob plaws Yudas thiab thoob plaws cheebtsam ntawd.
Yexus thiab Yauhas Npatitaus
Mat 11:2-19
18 Yauhas cov thwjtim tau tshabxo rau nws ntsig txog txhua yam no. 19 Thaum hu ob tug thwjtim los, Yauhas tau xa nkawv mus cuag tus Tswv tias, “Koj puas yog tus samsim los lossis peb yuav tos lwm tus?”
20 Thaum tuaj txog ntawm Yexus, nkawv tau hais tias, “Yauhas Npatitaus tau xa wb tuaj cuag koj, kom nug tias, ‘Koj puas yog tus samsim los lossis peb yuav tos lwm tus?’”
21 Lub tsamthawj ntawd Nws tau kho ntau tus neeg muaj mob, muaj nkeeg, thiab raug ntsujplig phem, thiab Nws tau nchuav vajhmoov rau ntau tus digmuag kom pomkev. 22 Yexus tau teb thiab hais rau nkawv tias, “Thaum neb mus, tshabxo rau Yauhas txog tej uas neb tau pom thiab tau hnov: Cov digmuag tau pomkev, cov qhuav ceg tau muskev, cov mob ruas tau huv, cov lagntseg tau hnov lus, cov neeg tuag tau sawv, thiab cov pluag tau txais txojmoo zoo. 23 Tau koobhmoov yog tus uas tsis ntog saum kuv.”
24 Thaum Yauhas ob tug thwjtim ncaim lawm, Yexus tau pib hais rau tej neeg coobcoob txog Yauhas: “Nej tau tawm mus tom mojsab mus saib dabtsi? Tus tauj uas tau raug cua ntsawj rawvrws? 25 Tabsis nej tau tawm mus pom dabtsi? Ib tug txivneej hnav tsoos npliaglias? Saib, cov neeg hnav tsoos zoo thiab uaneej khuam testaw ntawd nyob hauv vajntxwv loog. 26 Tabsis nej tau tawm mus pom dabtsi? Tus cevlus? Yog, kuv hais rau nej, tus loj dua tus cevlus. 27 Nws yog tus uas twb sau tseg tias:

‘Nimno, kuv xa kuv tus tubtxib ua koj ntej,
nws yuav npaj koj txojkev uantej koj.’”

28 “Kuv hais rau nej, hauv tej neeg uas yug ntawm pojniam los tsis muaj ib tug loj dua Yauhas; tabsis tus me tshaj hauv Vajtswv Ntuj lub tswvkuj tseem loj dua nws.”
29 Ces tagnrho zejtsoom thiab cov sau se tau hnov li mas lawv tau qhuas Vajtswv Ntuj ua tus ncajncees, vim lawv tau rausdej ntawm Yauhas. 30 Tabsis cov Falixais thiab cov kws Kevcai tau tawmtsam Vajtswv Ntuj lub homphiaj rau lawv tuskheej, vim lawv tsis tau rausdej ntawm nws.
31 Yexus tau hais tias, “Yog li ntawd, kuv yuav muab tiam neeg no piv rau dabtsi, thiab lawv zoo li cas? 32 Lawv zoo li cov menyuam uas zaum hauv khw thiab sibhu tias:

‘Peb tshuab raj rau nej tabsis nej tsis seevcev,
peb hu nkauj ntsuag tabsis nej tsis quaj.’”

33 “Vim tias Yauhas Npatitaus tau los, nws tsis tau noj movci thiab tsis tau haus cawv, ces nej hais tias, ‘Nws muaj dab;’ 34 Neeg Leej Tub tau los, Nws tau noj thiab tau haus, nej ho hais tias, ‘Saib, niag neeg vumloj thiab quavcawv, phoojywg rau tej neeg sau se thiab neeg txhaum.’ 35 Tiamsis lub tswvyim tau raug xam ncajncees los ntawm nws tej menyuam tagnrho.”
Yexus Raug Muab Roj Pleev
Mat 18:23-34; 26:6-13; Mak 14:3-9; Yhs 12:1-8
36 Ib tug Falixais tau caw Yexus kom mus nrog nws noj mov. Thaum nkag mus hauv tus Falixais tsev, Nws tau zaum. 37 Hauv lub nroog ntawd tau muaj ib tug pojniam uas yog neeg txhaum. Thaum nws tau hnov tias Yexus tau zaum hauv tus Falixais tsev, nws tau nqa ib hwj tshuaj tswqab alanpatas 38 thiab tau tuaj sawv tom Yexus nrobqaum thiab quaj rau ntawm Nws kotaw. Nws tau nrog kuamuag rau Yexus ob txhais kotaw thiab pheej muab nws cov plaubhau los so. Ces nws ho tau nwj Yexus ob txhais kotaw thiab tau muab tshuaj tswqab pleev.
39 Thaum pom li ntawd, tus Falixais uas tau hu Yexus tuaj noj mov tau hais hauv nruab siab tias, “Yog tus no yog tus cevlus, Nws yeej paub tias tus pojniam uas tabtom tuav Nws no yog hom neeg dabtsi, rauqhov nws yog neeg txhaum.”
40 Ces Yexus tau teb thiab hais rau nws tias, “Ximoos, kuv muaj dabtsi hais rau koj.”
Nws tau teb tias, “Xibfwb, hais mas.”
41 “Muaj ob tug txivneej tshuav nqi rau ib yawg npluanuj: Ib tug tshuav tsib puas denalis thiab dua ib tug tshuav tsibcaug. 42 Thaum obleeg puavleej tsis muaj peevxwm them, nws tau zam rau nkawv tibsi. Yog li ntawd, nkawv leejtwg yuav hlub nws tshaj?”
43 Ximoos tau teb thiab hais tias, “Kuv txais raug tias yog tus uas nws tau zam ntau dua.”
Yexus tau teb nws tias, “Koj txiavtxim yog lawm.”
44 Tig mus rau tus pojniam, Yexus tau hais rau Ximoos tias, “Koj puas pom tus pojniam no? Kuv tau nkag los hauv koj tsev, tabsis dej koj tsis tau muab rau kuv ob txhais kotaw. Tabsis nws tau nrog kuamuag rau kuv ob txhais kotaw thiab muab plaubhau so. 45 Koj tsis tau nwj kuv, tabsis txij thaum kuv nkag los, nws tau nwj kuv ob txhais kotaw tsis tseg. 46 Koj tsis tau muab roj pleev kuv taubhau, tabsis nws tau muab tshuaj tswqab pleev kuv ob txhais kotaw. 47 Vim li no, kuv hais rau koj, tus pojniam no tej kev txhaum, uas muaj ntauntau, twb raug zam huvsi lawm, rauqhov nws tau hlub ntau dua. Hos rau tus raug zam tsawg, nws yeej hlub tsawg.”
48 Yexus tau hais rau tus pojniam tias, “Koj tej kev txhaum raug zam lawm.”
49 Ces cov neeg koom tsum tau pib hais hauv tuskheej tias, “Nws yog leejtwg uas ho zam kev txhaum thiab?”
50 Yexus tau hais rau tus pojniam tias, “Koj txojkev ntseeg twb cawm koj lawm. Mus thajyeeb lug.”
8
Zaj Luspiv Txog Tus Tseb Noob
Mat 13:2-23; Mak 4:1-20
1 Dhau qhov ntawd, Yexus tau taugkev mus rau tej nroog thiab tej zos, tshajtawm thiab qhia txojmoo zoo txog Vajtswv Ntuj lub tswvkuj thiab pab kaum-ob leeg kuj tau nrog Nws. 2 Thiab nrog Nws kuj tau muaj ibtxhia pojniam uas tau raug kho zoo ntawm tej ntsujplig phem thiab tej kev mobnkeeg: Malis tus raug hu ua Madalees uas xya tus dab twb tawm ntawm nws; 3 Yauhanas uas yog Khuxas, tus ceev Helauj lub cuabtam, tus pojniam; Xuxanas; thiab ntau tus pojniam. Cov pojniam no tau siv lawv tej nyiajtxiag los tiam Yexus thiab cov thwjtim.
4 Thaum cov neeg coobcoob tau tawm hauv tej nroog tuaj rau ntawm Nws thiab tau tuaj nyob uake, Yexus tau qhia lawv ua luspiv: 5 “Ib tug tseb noob qoob tau tawm mus tseb nws cov noob. Thaum tseb ntawd, ib lub tau poob rau saum txojkev thiab tau raug tsuj, ces tej noog saum ntuj tau noj nws lawm. 6 Thiab ib lub tau poob rau saum zeb, mas nws tau tuaj kaus thiab tau qhuav lawm vim nws tsis tau muaj av noo. 7 Dua ib lub tau poob nruab nrab cov pos, mas cov pos tau hlob nrog nws uake thiab tau muab nws zawm. 8 Hos ib lub tau poob rau saum qhov av zoo, thiab nws tau tuaj kaus thiab txi txiv ib puas npaug.”
Sijhawm qhia tej no, Nws tau qw tias, “Tus uas muaj pobntseg, cia nws mloog.”
9 Nws cov thwjtim tau nug Nws seb zaj luspiv no hais txog dabtsi. 10 Ces Nws tau qhia tias, “Tej mixatawlis ntawm Vajtswv Ntuj lub tswvkuj twb muab rau nej paub, tabsis rau tej sab nraud mas nws raug muab ua luspiv, kom

‘Saib ntsoov lawv yov tsis pom
thiab mloog ntsoov lawv yov tsis totaub.’”

11 “Qhov no yog zaj luspiv: Lub noob qoob yog Vajtswv Ntuj txojlus. 12 Cov uas poob rau saum txojkev yog cov tau hnov, tabsis tomqab ntawd ntxwgnyoog tau los thiab tau nqa txojlus tawm hauv lawv lub siab, kom lawv txhob ntseeg thiab ho raug cawm. 13 Hos cov poob rau saum zeb yog cov uas thaum lawv hnov, lawv tau txais txojlus nrog kev zoo siab, tabsis lawv tsis muaj cag; lawv ntseeg ibpliag thiab thaum raug ntxias, lawv tau tsotseg. 14 Cov poob nruab nrab cov pos yog cov uas tau hnov, tabsis thaum lawv uaneej, lawv raug zawm los ntawm tej kev ntxhovsiab, kev npluanuj, thiab kev lomzem hauv lub neej. Lawv tej txiv tsis qoos. 15 Tabsis lub noob hauv qhov av zoo, lawv yog cov uas tau hnov txojlus nrog lub siab pheejxeeb thiab zoo. Lawv tau tuav ruaj thiab tau tivzees txi txiv.”
Lub Teeb Saum Tus Ncej
16 “Tsis muaj leejtwg taws teeb es ho muab kawm khwb lossis muab txawb hauv qab txag, tabsis nws muab txawb saum tus ncejteeb kom cov neeg uas nkag los yuav pom qhov kaj. 17 Rauqhov tsis muaj yam raug zais uas yuav tsis tshwm rau neeg pom, thiab tsis muaj yam raug vov uas neeg yuav tsis paub lossis tsis tawm rau neeg pom. 18 Yog li ntawd, ceevfaj seb nej hnov li cas: Rauqhov tus muaj, luag yuav muab ntxiv rau nws, tabsis tus tsis muaj, qhov uas nws xav tias nws muaj los yuav raug muab rho tawm ntawm nws.”
Yexus Niam thiab Cov Kwv
Mat 12:46-50; Mak 3:31-35
19 Yexus niam thiab cov kwv tau tuaj cuag Nws, tabsis lawv tsis tau muaj peevxwm txiv hauv pab neeg coobcoob los ntsib Nws. 20 Luag tau muab xov rau Nws tias, “Koj niam thiab koj cov kwv sawv sab nraud, xav pom koj.” 21 Ces Nws tau teb thiab hais rau lawv tias, “Kuv niam thiab kuv cov kwv yog cov no uas hnov thiab coj Vajtswv Ntuj txojlus.”
Yexus Txwv Cua
Mat 8:23-27; Mak 4:36-41; 6:47-52; Yhs 6:16-21
22 Ib hnub thaum ntawd, Yexus thiab Nws cov thwjtim tau nce rau hauv nkoj, thiab Nws tau hais rau lawv tias, “Peb hla mus rau sab pasdej tid.” Ces lawv tau caij nkoj mus. 23 Thaum lawv samsim caij nkoj ntawd, Yexus tau tsaugzog. Mas ib nthwv cua khaubzig loj tau los rau hauv lub pasdej thiab lawv lub nkoj tau ntim dej thiab lawv tau raug kev phomsij.
24 Lawv tau los thiab tau diaj Nws hais tias, “Yawg hlob, yawg hlob, peb puastsuaj lau!”
Ces sawv tsees, Nws tau txwv nthwv cua khaubzig thiab tej dej ntas, mas tej ntawd tau tu nrho. Lub pasdej tau tus yees. 25 Yexus tau hais rau lawv tias, “Nej kev ntseeg nyob qhovtwg?”
Lawv tau ntshai thiab xav tsis thoob, ibleeg hais rau ibleeg tias, “Nws yog leejtwg? Rauqhov Nws tau tawmcai rau tej cua khaubzig thiab dej, los lawv kuj tau mloog Nws.”
Kho Tus Txivneej Raug Dab
Mat 8:28-34; Mak 5:1-20
26 Lawv tau nqis nkoj rau cheebtsam Nkelaxees, uas nyob ncaj Kalilais sab tid. 27 Thaum Nws tawm hauv nkoj rau saum av, Yexus tau ntsib ib tug txivneej sab nraum lub nroog, uas tau muaj ntau tus dab. Nws tsis tau hnav tsoos thiab tsis tau nyob hauv tsev los ntev lawm, tabsis nwg tau nyob hauv tojntxas. 28 Pom dheev Yexus, nws tau qw thiab qhaucev hlo rau ntawm Yexus. Nws tau hais nrovnrov tias, “Muaj dabtsi nruab nrab kuv thiab koj, Yexus, Vajtswv Ntuj tus Loj Kawgnkaus tus Tub? Kuv thov koj, txhob tsimtxom kuv.” 29 Vim Yexus tau ntiab tus ntsujplig qias kom tawm ntawm tus txivneej ntawd. Txawm nws tau raug khi, raug xauv, thiab raug ceev ntauntau zaus, los nws tau muab tej saw lov thiab dab tau ntiab nws mus rau tom mojsab.
30 Yexus tau nug nws tias, “Koj lub npe hu li cas?”
Nws tau teb tias, “Lwj txheeb!” Vim ntau tus dab tau nkag rau hauv nws. 31 Lawv tau taij Nws kom txhob ntiab lawv mus hauv lub qhov ntuj tobtob.
32 Nimno, ze ntawd tau muaj ib pab npua coobcoob noj zaub saum roob. Mas lawv tau taij Nws kom tso lawv mus rau hauv pab npua ntawd. Ces Nws tau tso lus rau lawv. 33 Cov dab tau tawm ntawm tus txivneej thiab nkag rau hauv cov npua, thiab pab npua tau rag ntws ntawm tsag mus rau hauv lub pasdej thiab tau poob dej tuag.
34 Thaum cov zov npua tau pom qhov xwmtxheej no, lawv tau khiav mus tshajtawm rau hauv nroog thiab hauv tej teb. 35 Neeg tau tawm tuaj saib qhov xwmtxheej thiab lawv tau tuaj rau ntawm Yexus. Lawv tau pom tus txivneej uas tej dab tau tawm ntawd zaum ntawm Yexus kotaw, hnav tsoos, thiab feeb meej, mas lawv tau ntshai heev. 36 Cov uas tau pom ntawd tau tshajtawm rau tej neeg tias tus txivneej raug dab tau dim li cas. 37 Ces tagnrho tej neeg hauv cheebtsam Nkelaxees tau taij kom Yexus tawm ntawm lawv mus vim lawv tau raug kev ntshai mooj. Nws tau nce rau hauv nkoj thiab tau rovmus.
38 Tabsis tus txivneej uas tej dab twb tawm lawm ntawd tau taij Yexus kom cia nws nyob nrog Yexus, tabsis Yexus tau xa nws mus thiab hais tias, 39 “Mus rau koj tsevneeg, thiab qhia rau lawv paub tej uas Vajtswv Ntuj tau ua rau koj.” Ces nws tau mus thoob plaws lub nroog thiab tshajtawm txog tej uas Yexus tau ua rau nws.
Tus Ntxhais Tuag thiab Tus Pojniam Mob
Mat 9:18-26; Mak 5:22-43
40 Thaum Yexus tau rovqab los txog, tej neeg coobcoob tau zoo siab hlo txais Nws vim lawv sawvdaws tau tos Nws. 41 Nimno ib tug txivneej npe hu ua Yailus tau tuaj. Nws yog tus thawj hauv lub txoos sablaj. Qhaucev hlo rau ntawm Yexus kotaw, Yailus tau taij Nws kom mus hauv nws tsev 42 vim tias nws tau muaj tib tug ntxhais, hnub nyoog kaum-ob xyoos, uas tau samsim yuav tuag.
Sijhawm Yexus tau taugkev mus ntawd, tej neeg coobcoob tau txiv Nws. 43 Tau muaj ib tug pojniam, uas tau tsob ntshav kaum-ob xyoos lawm thiab tau siv tagnrho nws lub cuabtam ntiav tej kws khomob, los tsis tau muaj ib tug muaj peevxwm kho nws. 44 Nws tau txiv tom nrobqaum los tuav Yexus lub tw tsholoj thiab tamsis ntawd nws cov ntshav tau tu nrho.
45 Ces Yexus tau nug tias, “Leejtwg yog tus uas tau tuav kuv?”
Thaum tagnrho sawvdaws tsis tau lees, Petus tau hais tias, “Yawg hlob, tej neeg coobcoob tau phoom koj thiab tau txiv koj.”
46 Tabsis Yexus tau teb tias, “Leejtwg tau tuav kuv. Kuv paub vim hwjchim twb tawm ntawm kuv lawm.”
47 Thaum pom tias nws yuav zais cev tsis tau, tus pojniam tau los qhaucev rau ntawm Yexus ntshee na. Nws tau tshajtawm rau sawvdaws paub tias vimchij dabtsi es nws tau kov Yexus thiab nws tau zoo tamsis ntawd. 48 Yexus tau hais rau nws tias, “Me ntxhais, koj txojkev ntseeg twb cawm koj dim. Mus kajsiab lug mog.”
49 Lub tsamthawj uas Yexus tau tseem hais lus, ib tug neeg tau tawm tom tus thawj txoos sablaj lub tsev tuaj txog thiab tau hais tias, “Koj tus ntxhais twb tuag lawm. Txhob tabkaum xibfwb.”
50 Hnov dheev li ntawd, Yexus tau teb rau Yailus tias, “Txhob ntshai, ntseeg xwb, thiab nws yuav zoo mob.”
51 Thaum los txog rau ntawm tsev, Yexus tsis tau tso leejtwg nrog Nws mus hauv, tshwj Petus, Yauhas, unpaus, thiab tus me ntxhais leej txiv thiab niam nkaus xwb. 52 Txhua leej tau quaj thiab nyiav tus ntxhais, tabsis Yexus tau hais tias, “Txhob quaj, rauqhov nws tsis tau tuag tabsis nws tsaugzog xwb.”
53 Sawvdaws tau rhuav Yexus vim lawm twb paub tias tus ntxhais tau tuag lawm. 54 Tabsis thaum tuav nkaus tus ntxhais txhais tes, Yexus tau hu tias, “Me ntxhais, sawv os.” 55 Ces nws tus ntsujplig tau rovlos thiab nws tau sawv tamsis ntawd. Yexus tau txhib kom muab mov rau tus ntxhais noj. 56 Nws niam thiab txiv tau xav tsis thoob; tabsis Yexus tau txwv lawv kom txhob tham qhov xwm no rau leejtwg li.
9
Yexus Xa Kaum-ob Tug
Mat 10:9-15; 14:1-2; Mak 6:8-11,14-16
1 Thaum hu pab kaum-ob leeg los uake, Yexus tau muab hwjchim thiab tswjchim rau lawv mus ntiab tej dab tagnrho thiab kho tej mob. 2 Nws tau xa lawv mus tshajtawm Vajtswv Ntuj lub tswvkuj thiab kho tej neeg mob. 3 Nws tau hais rau lawv tias, “Txhob nqa dabtsi taugkev, tsis hais tus cwj, hnab thooj, movci, nyiaj, lossis ob lub tsho. 4 Lub tsev twg nej nkag mus rau hauv lawm, nyob qhov ntawd mus txog thaum nej tawm. 5 Hos qhovtwg tsis txais nej ces thaum nej tawm hauv lub nroog ntawd, nchos cov hmoov av tawm ntawm nej kotaw ua timkhawv tawmtsam lawv.” 6 Cov timthawj tau tawm mus rau tej zejzog, tshajtawm txojmoo zoo thiab kho mob rau txhua qhov.
7 Nimno Helauj tus kav ib-feem plaub tau hnov txog tej xwmtxheej tagnrho thiab nws tau txhovsiab vim ibtxhia tau hais tias Yauhas tau sawv ntawm cov tuag lawm. 8 Ibtxhia ho tau hais tias Eliyas tau tshwm los, thiab lwm pab ho tau hais tias ib tug cevlus thaud tau sawv rovlos. 9 Helauj tau nroo tias, “Kuv twb muab Yauhas txiav taubhau lawm, tabsis tus uas kuv tau hnov tej xwm txog no ho yog leejtwg?” Ces nws tau nrhiav kev mus pom Yexus.
Yexus Yug Tsib Txheeb Leej
2 Vaj 4:42-44; Mat 14:13-21; Mak 6:32-44; Yhs 6:5-13
10 Thaum cov timthawj tau rovlos, lawv tau tshabxo rau Yexus txog tej uas lawv tau ua. Yexus tau coj lawv thiab tau mus twjywm rau ib lub nroog hu ua Npexaidas. 11 Tabsis ntau pab neeg tau paub thiab caum Nws qab. Nws tau txais lawv thiab qhia lawv txog Vajtswv Ntuj lub tswvkuj thiab tau kho tej uas muaj mob.
12 Thaum hnub qaij, lawv kaum-ob tug tau los thiab hais rau Nws tias, “Tso tej neeg kom lawv yov mus rau hauv tej zejzog thiab liajteb ibncig, mus nrhiav chaw pw thiab zaubmov, rauqhov peb nyob rau ntawm mojsab xwb.”
13 Yexus tau teb rau lawv tias, “Nej muab rau lawv noj.”
Lawv tau hais tias, “Peb tsis muaj tshaj tsib lub movci thiab ob tug ntses, tshwj tias peb mus muas movci rau tagnrho tej neeg no.” 14 Rauqhov pab neeg ntawd muaj kwvlam li tsib txhiab tus txivneej.
Ces Yexus tau hais rau Nws cov thwjtim tias, “Muab lawv zaum ua tej pab tsib-caug leej.” 15 Lawv tau ua li ntawd thiab sawvdaws tau zaum. 16 Thaum txais tsib lub movci thiab ob tug ntses, Nws tau saib rau saum ntuj thiab ua tsaug. Nws tau muab ntais thiab cev rau cov thwjtim kom muab txawb rau ntawm tej neeg. 17 Txhua tus tau noj tsaunpo. Cov seem tau raug khaws puv kaum-ob lub pobtawb.
Petus Lees Yexus Ua Khetos
Mat 16:13-16,21-28; Mak 8:27-29,31-38
18 Ib zaug thaum Yexus tau samsim thov Vajtswv thiab Nws cov thwjtim nrog Nws nkaus xwb, Nws tau nug lawv tias, “Tej neeg hais tias kuv yog leejtwg?”
19 Lawv tau teb tias, “Yauhas Npatitaus, ibtxhia tias yog Eliyas, hos ibtxhia tias ib tug cevlus thaum ub tau sawv rovlos.”
20 Ces Nws tau nug lawv tias, “Nej ne, nej hais tias kuv yog leejtwg?”
Petus tau teb tias, “Vajtswv Ntuj tus Khetos.”
21 Yexus tau txwv lawv kom txhob qhia qhovno rau leejtwg. 22 Thiab Nws tau hais tias, “Neeg Leej Tub cheemtsum raug kev txomnyem ntau yam, thiab raug cov txwjlaug, cov povthawj hlob thiab cov xibfwb qhia Kevcai muab txiav tawm. Nws yuav raug tua thiab hnub peb yuav raug tsa sawv.”
23 Ces Nws tau hais rau lawv sawvdaws tias, “Yog leejtwg xav los raws kuv qab, cia nws txhob lees tuskheej, cia nws niajhnub kwv nws tus khaublig, thiab cia nws caum kuv. 24 Rauqhov tus uas xav cawm nws txojsia yuav plam txojsia; tabsis tus uas tso nws txojsia vim kuv yuav cawm nws txojsia. 25 Vim neeg yuav tsam tus dabtsi, yog nws tau tagnrho lub cejntug tabsis nws tuskheej puastsuaj lossis poob? 26 Rauqhov leejtwg txajmuag txais kuv thiab kuv tej lus, Neeg Leej Tub yuav txajmuag txais tus ntawd thaum Nws los nrog Nws lub tshwjchim, nrog Leej Txiv lub tshwjchim thiab tej timtswv dawbhuv lub tshwjchim. 27 Tseeb tiag, kuv qhia nej tias, muaj ibtxhia uas sawv ntawm no yuav tsis saj kev tuag uantej lawv pom Vajtswv Ntuj lub tswvkuj.”
Yexus Plhis Plho
Mat 17:1-8; Mak 9:2-8
28 Tomqab tej xwm no yim hnub, Yexus tau coj Petus, Yauhas thiab unpaus; thiab Nws tau nce mus thov Vajtswv rau saum ib lub roob. 29 Lub sijhawm Nws tau samsim thov Vajtswv ntawd, Nws lub ntsejmuag tau hloov thiab Nws cev tsoos tau ntsa dawbpaug. 30 Ces ob tug txivneej, Mauxes thiab Eliyas, tau nrog Nws sibtham. 31 Nkawv tau tshwm nrog tshwjchim thiab tau tham txog Nws txojkev tawm, uas Nws samsim yuav mus ua kom tiav hauv Yeluxalees. 32 Tabsis Petus thiab ob tug nrog nws tau qaug dabntub heev. Tomqab tsim los, lawv tau pom Nws tus tshwjchim thiab ob tug txivneej uas sawv nrog Nws. 33 Thaum nkawv tabtom ncaim Yexus, Petus tau hais rau Yexus tias, “Yawg hlob, zoo rau peb nyob ntawm no, thiab cia peb ua peb lub tsev ntaub: Ib lub rau koj, ib lub rau Mauxes thiab ib lub rau Eliyas.” Nws tsis tau paub xyov nws tau hais dabtsi.
34 Tomqab nws tau hais tej no tag, ib tauv huab tau los roos lawv thiab lawv tau ntshai heev thaum lawv nyob hauv cov huab. 35 Ces ib lub suab tau hais tawm hauv tauv huab tias, “Tus no yog kuv tus Tub uas kuv twb xaiv tseg. Mloog Nws hais.” 36 Thaum lub suab ntsiag, lawv tau pom Yexus tibleeg xwb. Lawv tau kaw ncauj thiab lawv tsis tau qhia rau leejtwg txog tej uas lawv twb pom ntawd.
Kho Tus Tub Raug Dab
Mat 17:14-18,22-23; Mak 9:14-27,30-32
37 Hnub tomqab thaum lawv tau nqis saum roob los, ib pab neeg coobcoob tau ntsib Nws. 38 Nimno ib tug txivneej hauv pab neeg ntawd tau qw tias, “Xibfwb, kuv thov koj los saib kuv tus tub, rauqhov nws yog kuv tibleeg tub xwb. 39 Ib tug ntsujplig muab nws ntes, ces nws txawm quaj las, chualeeg thiab ua npuasncauj tawm plaws. Tus ntsujplig tsis tawm ntawm nws thiab niajhnub tsimtxom nws. 40 Kuv tau thov koj cov thwjtim kom lawv ntiab tus ntsujplig, tabsis lawv tsis muaj peevxwm.”
41 Yexus tau teb tias, “Tiam niag neeg tsis ntseeg thiab plaskev! Kuv yuav nrog nej nyob thiab tiv nej txog thaum twg? Coj koj tus tub los ntawm no.”
42 Sijhawm nws samsim los, tus dab tau muab nws xyob, ces nws tau chualeeg. Yexus tau txwv tus ntsujplig qias thiab tau kho tus menyuam zoo thiab muab nws cob rau nws txiv. 43 Txhua tus tau xav tsis thoob rau Vajtswv Ntuj lub hwjchim loj ntawd.
Thaum sawvdaws tau tseem xav tsis thoob txog txhua yam uas Nws tau ua, Yexus tau hais rau Nws cov thwjtim tias, 44 “Nej khaws tej lus no rau hauv nej pobntseg, rauqhov Neeg Leej Tub samsim yuav raug ntes mus rau neeg txhais tes.” 45 Tabsis lawv tsis tau totaub lolus no. Lub ntsiab lus tau raug zais lawm kom lawv tau txhob mloog raug. Lawv kuj tau ntshai nug Nws txog lolus no.
Leejtwg Yuav Ua Tus Loj Dua
46 Yexus tau los rau ntawm cov thwjtim thaum lawv sibcav tias leejtwg yog tus loj dua. 47 Paub txog txojkev sibcav hauv lawv lub siab li ntawd, Nws tau muab ib tug menyuam los sawv ntawm Nws ib sab 48 thiab Nws tau hais rau lawv tias, “Tus uas txais tus menyuam no ntawm kuv lub npe kuj txais kuv, thiab tus uas txais kuv kuj txais tus uas tau xa kuv los, rauqhov tus uas me tshaj nruab nrab nej sawvdaws yog tus loj dua.”
49 Yauhas tau teb tias, “Yawg hlob, peb tau pom ib tug neeg ntiab tej dab ntawm koj lub npe mas peb tau cheem nws vim nws tsis tau nrog peb caum koj.”
50 Yexus tau hais rau nws tias, “Txhob cheem nws, rauqhov tus uas tsis tawmtsam nej yog nej tog.”
Cov Xamalis Tsis Txais Yexus
51 Thaum txog lub sijhawm Nws yuav raug coj mus, Nws tau tig ntiag mus rau Yeluxalees. 52 Nws tau txib cov tubtxib ua Nws ntej. Thaum taugkev mus ntawd lawv tau mus hauv ib lub zos Xamalis, mus npaj tos Nws, 53 tabsis cov Xamalis tsis tau txais Nws vim Nws tau samsim tig ntiag mus rau Yeluxalees. 54 Pom li ntawd, ob tug thwjtim unpaus thiab Yauhas tau hais tias, “Tus Tswv, koj puas xav kom wb hu hluavtaws pem ntuj los hlawv lawv?” 55 Tig hlo los Yexus tau txwv nkawv. 56 Ces lawv tau taugkev mus rau lwm lub zos lawm.
Tus Nqi Caum Yexus
Mat 8:19-22
57 Lub sijhawm lawv taugkev ntawm txojkev, ib tug txivneej tau hais rau Nws tias, “Kuv yuav caum koj mus txhua qhov uas koj mus.”
58 Yexus tau teb nws tias, “Tej hma muaj qhov thiab tej noog saum ntuj muaj zes, tabsis Neeg Leej Tub tsis muaj lub chaw tiag taubhau.”
59 Nws ho tau hais rau lwm tus tias, “Caum kuv los.”
Tabsis tus ntawd tau teb tias, “Tus Tswv, tso kuv xub rovmus faus kuv txiv tso.”
60 Yexus tau hais rau nws tias, “Cia cov tuag faus lawv tej tuag, tabsis koj mus tshajtawm Vajtswv Ntuj lub tswvkuj.”
61 Ho muaj ib tug tau hais tias, “Kuv yuav caum koj, tus Tswv! Tabsis tso kuv xub mus tu moo rau cov neeg hauv kuv tsev tso.”
62 Yexus tau hais rau nws tias, “Tus neeg uas txhais tes tau tuav khais lawm es haj tseem saib rau tej tomqab tsis tsimnyog rau Vajtswv Ntuj lub tswvkuj.”
10
Yexus Xa Xyacaum-ob Leej
Mat 11:21-23,25-27; 13:16-17; Luk 9:3-5
1 Tomqab tej no, tus Tswv tau tsa xyacaum-ob leeg thiab tau xa lawv ob leeg uake mus ua Nws ntej rau txhua lub nroog lossis qhov chaw uas Nws samsim yuav mus. 2 Nws tau hais rau lawv tias, “Thaj qoob siav ntau heev, tabsis cov ua haujlwm muaj tsawg. Yog li ntawd, thov tus Tswv qoob kom xa cov ua haujlwm tuaj rau hauv Nws thaj qoob. 3 Mus! Saib, kuv xa nej yam li menyuam yaj mus rau hauv cov hma. 4 Txhob nqa hnab nyiaj, hnab thoom, lossis khau; thiab txhob hais nyobzoo rau tej neeg tom kev.”
5 “Lub tsev twg nej mus rau hauv, xub hais tias, ‘Kev thajyeeb los rau lub tsev no.’ 6 Ces yog muaj tus neeg thajyeeb nyob ntawd, nej kev thajyeeb yuav so rau saum nws. Hos yog tsis muaj li ntawd ces nej kev thajyeeb yuav rovlos rau ntawm nej. 7 Nyob hauv lub tsev ntawd, noj thiab haus nrog lawv; rauqhov tus neeg ua haujlwm tsimnyog nws tus nqizog. Txhob rhais tawm ib lub tsev rau lwm lub tsev.”
8 “Lub nroog twg nej mus es lawv txais nej, ces noj tej zaubmov ntawm nej xubntiag 9 thiab kho tej mob hauv lub nroog ntawd. Nej hais rau lawv tias, ‘Vajtswv Ntuj lub tswvkuj twb los ze nej lawm.’ 10 Lub nroog twg nej mus es lawv tsis txais nej, ces tawm mus rau ntawm tej kev hauv lub nroog thiab hais tias, 11 ‘Tej hmoov av hauv nroog uas lo peb kotaw peb muab nchos tawmtsam nej; tabsis kom nej paub qhov no tias Vajtswv Ntuj lub tswvkuj twb los ze lawm.’ 12 Kuv hais rau nej tias hnub ntawd lub nroog Xaudoos yuav nyiaj taus dua li hauv lub nroog ntawd.”
13 “Kev vijnpog rau koj, Khaulaxis; kev vijnpog rau koj, Npexaidas; rauqhov yog tej hwjchim uas tau tshwmsim hauv neb tau tshwmsim hauv Tiles thiab Xidoos, lawv yov tau thimxav, npua hnabtsaj, hab nphoo tshauv rau taubhau ntev lawm. 14 Tabsis kev txiavtxim hauv Tiles thiab Xidoos yuav nyiaj taus dua li hauv neb. 15 Nimno Kapenaus, koj yov tsa tuskheej nto ntuj lod? Koj yeej yuav poob rau tub tuag teb.”
16 “Tus uas mloog nej kuj mloog kuv; tus uas tsis txais nej kuj tsis txais kuv; thiab tus uas tsis txais kuv kuj tsis txais tus uas tau xa kuv.”
17 Nimno pab xyacaum-ob leeg tau rovlos nrog kev zoo siab thiab hais tias, “Tus Tswv, tej dab los kuj mloog peb ntawm koj lub npe.”
18 Ces Nws tau teb lawv tias, “Kuv tau pom Xatas poob saum ntuj li xoblaim. 19 Kuv twb muab tswjchim rau nej mus tsuj tej nab, roobris teb, thiab tus yeebncuab txhua lub hwjchim. Kev tsis ncaj dabtsi yeej tsis raug nej. 20 Tabsis txhob zoo siab rau qhov uas tej ntsujplig tso tuskheej hauvqab nej; zoo siab tias nej tej npe twb raug sau rau saum ntuj lawm.”
21 Tib lub sijhawm ntawd Yexus tau zoo siab heev los ntawm tus Ntsujplig Dawbhuv thiab tau hais tias, “Kuv tsa suab qhuas koj, Txiv, tus Tswv saum ntuj thiab hauv ntiajteb! Koj tau muab tej no zais tawm ntawm cov muaj tswvyim thiab txawjntse, tabsis ho muab tej no nthuav rau tej menyuam yaus. Tseeb tiag, Txiv, qhov no raug koj siab.”
22 “Kuv txiv tau muab txhua tsav rau kuv, tabsis tsis muaj leejtwg paub tias Leej Tub yog leejtwg tshwj Leej Txiv; thiab Leej Txiv yog leejtwg tshwj Leej Tub thiab tus uas Leej Tub xav muab nthuav rau.”
23 Thaum tig mus rau cov thwjtim, Nws tau hais twjywm rau lawv tias, “Tej qhovmuag uas pom tej nej pom no tau koobhmoov. 24 Rauqhov kuv hais rau nej tias, coob tus cevlus thiab vajntxwv tau xav pom tej uas nej pom tabsis lawv tsis tau pom thiab tau xav hnov tej uas nej hnov tabsis lawv tsis tau hnov.”
Zaj Luspiv Txog Tus Xamalis Zoo
Mat 22:34-40; Mak 12:28-31
25 Lub tsamthawj ntawd ib tug kws Kevcai tau sawv los sim Nws tias, “Xibfwb, kuv yuav ua dabtsi kuv thiaj tau saws txojsia ibtxhis?”
26 Yexus tau teb nws tias, “Dabtsi raug sau rau hauv Kevcai? Koj nyeem hais li cas?”
27 Nws tau teb tias, “Hlub tus Tswv koj tus Vajtswv Ntuj tagnrho koj lub siab, tagnrho koj txojsia, tagnrho koj lub zog, thiab tagnrho koj kev xav, thiab hlub tus nyob ntawm koj togtsev yam li koj tuskheej.”
28 Yexus tau hais rau nws tias, “Koj teb raug lawm. Ua li no ces koj yuav muajsia.”
29 Tabsis nws tau xav tsa tuskheej ua tus ncajncees, nws tau hais rau Yexus tias, “Leejtwg thiaj yog tus ntawm kuv togtsev?”
30 Txais raug li ntawd, Yexus tau hais tias, “Ib tug txivneej tau nqis ntawm Yeluxalees mus nram Yelikaus thiab tau raug tubsab ntaus. Lawv tau txeeb nws tsoos, ntaus nws nqaij ntuag, thiab tso nws tseg tshuav siav, ces lawv tau khiav lawm. 31 Tomthawj ib tug povthawj tau nqis los ntawm txojkev ntawd. Thaum pom nws, tus povthawj tau lugkev mus. 32 Ib yam li ntawd, ib tug Levis tau taugkev los txog ntawd. Pom kiag li, nws kuj tau lugkev mus lawm thiab. 33 Tabsis ib tug Xamalis tau taugkev tuaj txog ntawd. Pom kiag li, nws tau tabncuab nws. 34 Namzog los, tus Xamalis tau hliv roj thiab cawv ntxuav nws tej qhov txhab thiab muab qhwv rau. Tomqab ntawd nws tau tsaws tus raug mob rau saum nws tus nees luav, nws tau coj mus tu thiab pw hauv lub tsev so. 35 Hnub tomqab thaum nws tawm mus, nws tau muab ob lub txiaj denalis rau tus tswv lub tsev so thiab hais tias, ‘Tu tus neeg no, thiab yog koj siv tshaj li cas, kuv yuav them rov rau koj thaum kuv rovlos.’”
36 “Rau koj, ntawm peb tug no leejtwg yog tus nyob ntawm tus tau raug tubsab ntaus lub togtsev?”
37 Ces nws tau teb tias, “Tus uas tabncuab nws.”
Yexus tau teb nws tias, “Mus thiab coj li ntawd.”
Hauv Mathas thiab Malis Tsev
38 Sijhawm lawv tau taugkev tuaj, Yexus tau mus hauv ib lub zos. Ib tug pojniam npe hu ua Mathas tau txais Nws. 39 Nws tau muaj ib tug niam hluas npe hu ua Malis, uas tau zaum ntawm tus Tswv kotaw thiab mloog Nws txojlus. 40 Mathas tau kubteg kubtaws rau kev tiam qhua. Nws tau los txog ntawm Yexus thiab tau hais tias, “Tus Tswv, koj tsis quavntsej tias kuv tus niam hluas tso kuv tiam qhua ibleeg xwb lod? Yog li ntawd, hais rau nws kom pab kuv mad.”
41 Tus Tswv tau teb tias, “Mathas nis Mathas, koj txhawj thiab ntxhovsiab txog ntau tsav 42 tabsis tsuas muaj tib qho thiaj cheemtsum xwb. Malis tau xaiv qhov zoo, mas qhov ntawd yuav tsis raug tshem ntawm nws.”
11
Yexus Qhia Txog Kev Thov Vajtswv
Mat 6:9-13; Mat 7:7-11
1 Ib zaug Yexus tau thov Vajtswv nyob ib qho. Thaum Nws tau thov tag, Nws ib tug thwjtim tau hais rau Nws tias, “Tus Tswv, qhia peb thov Vajtswv ibyam li Yauhas tau qhia nws cov thwjtim.”
2 Yexus tau hais rau lawv tias, “Thaum nej thov Vajtswv, hais li no:
‘Txiv, cia koj lub npe dawbhuv,
cia koj lub tswvkuj los.
3 Muab peb li movci leej hnub rau peb txhua hnub.
4 Zam peb tej kev txhaum rau peb,
rauqhov peb tau zam rau txhua leej uas tshuav peb nqi.
Thiab txhob coj peb mus rau kev simsiab.’”
5 Ces Nws tau hais rau lawv ntxiv tias, “Nej leejtwg muaj ib tug phoojywg tuaj cuag nws thaum ib taghmo thiab hais tias, ‘Phoojywg, txais peb lub movci rau kuv, 6 rauqhov kuv ib tug phoojywg tau taugkev tuaj ntawm kuv, tabsis kuv tsis muaj dabtsi rau nws noj.’”
7 “Tus hauv tsev yov teb tias, ‘Txhob ua rau kuv khwv! Qhovrooj twb kaw lawm thiab kuv tej menyuam puavleej nyob nrog kuv saum txaj no. Kuv sawv tsis tau los muab rau koj.’ 8 Kuv hais rau nej tias, txawm nws yov tsis sawv mus muab rau tus sab nraud vim kev phoojywg los, nws yuav sawv mus muab rau tus sab nraud ntau li nws xav tau vim kev thov tsis txajmuag.”
9 “Kuv hais ntxiv rau nej: Taij es nws yuav raug muab rau nej, nrhiav es nej yuav ntsib, thiab khob es nws yuav raug qhib rau nej. 10 Rauqhov txhua tus uas taij tau txais, tus uas nrhiav tau tsib, thiab qhovrooj yuav qhib rau tus khob.”
11 “Ntawm nej cov uas yog leej txiv, leejtwg tus tub taij ntses es ho yuav muab nab rau? 12 Lossis yog tus tub taij lub qe es ho yuav muab tus roobris teb rau? 13 Yog li ntawd, nej cov uas yog neeg phem twb paub muab qhov zoo rau nej tej menyuam, nej Txiv saum ntuj yuav muab tus Ntsujplig Dawbhuv rau cov uas taij Nws tshaj npaum cas.”
Yexus thiab Npexenpus
Mat 12:22,24-29,43-45; Mak 3:23-27
14 Yexus tau ntiab ib tug dab uas ruam. Thaum tus dab tau tawm lawm, tus txivneej ruam tau hais lus thiab tej neeg tau xav tsis thoob. 15 Ces ibtxhia tau hais tias, “Nws tau ntiab tej dab los ntawm tus thawj dab Npexenpus.” 16 Tabsis ibtxhia tau sim Nws thiab tau xav pom ib lub cim saum ntuj los.
17 Nws twb paub lawv tej tswvyim thiab tau hais rau lawv tias, “Txhua lub tswvkuj uas tau sibfaib yuav dhau ua mojsab thiab lub cuabyig uas tau sibfaib yuav vau. 18 Yog Xatas tau sibfaib ces nws lub tswvkuj yuav ua li cas sawv ntseg? Kuv hais li no vim nej hais tias, kuv ntiab tej dab los ntawm Npexenpus. 19 Yog kuv ntiab dab los ntawd Npexenpus, nej tej tub ho ntiab dab los ntawm leejtwg? Vim li no, lawv yuav ua cov txiavtxim rau nej. 20 Tabsis yog kuv ntiab tej dab los ntawm Vajtswv Ntuj tus ntivtes, ces Vajtswv Ntuj lub tswvkuj tau los txog nej lawm.”
21 “Thaum tus txivneej muaj zog tuav rawv cuabyeej zov nws lub loog, nws tej tubtxib nyob thajyeeb lug. 22 Tabsis thaum ib tug heev dua nws tau tuaj kovyeej nws, ces tus heev dua ntawd yuav nqa nws cev tsoos ntausrog uas nws tau tsosiab rau thiab yuav muab nws lub cuabtam faib.”
23 “Tus uas tsis nrog kuv yog tus tawmtsam kuv, thiab tus uas tsis txoos nrog kuv yuav tawg rirws.”
24 “Thaum tus ntsujplig qias tawm hauv ib tug neeg, nws ncig mus rau tej hav qhuav, mus nrhiav chaw so thiab nrhiav tsis tau. Ces nws hais tias, ‘Kuv yuav rovmus rau kuv lub qub tsev uas kuv tau tawm ntawd.’ 25 Thaum los txog, nws pom lub tsev twb raug cheb dudais thiab raug kho ntximsiab. 26 Ces nws mus yaum xya tus ntsujplig uas nyaum dua nws thiab lawv los nyob kiag hauv. Mas ntu xaus ntawm tus neeg ntawd yuav phem dua ntu chiv.”
27 Thaum Yexus tabtom tau hais tej lus no, ib tug pojniam hauv pab neeg coobcoob tau qw thiab hais tias, “Tau koobhmoov yog lub plab uas tau xeeb koj thiab tej txiv mis koj tau noj.”
28 Tabsis Yexus tau teb tias, “Tau koobhmoov tshaj yog cov neeg uas hnov thiab ceev Vajtswv Ntuj txojlus.”
Yaunas Lub Cim
Mat 12:39-42
29 Thaum cov neeg sibtxoos coob zujzus, Yexus tau chiv hais tias, “Tiam neeg no yog tiam vuabtsuab. Lawv nrhiav ib lub cim tabsis lub cim twg yuav tsis raug muab rau lawv, tshwj Yaunas lub cim. 30 Yaunas tau dhau ua lub cim rau cov Nineves li cas, ces Neeg Leej Tub yuav dhau ua lub cim rau tiam no li ntawd thiab. 31 Tus pojvaj nram qab teb yuav raug tsa sawv rau hnub txiavtxim nrog cov neeg tiam no thiab nws yuav nkaug lawv. Rauqhov nws tau tawm nram qab ntuj kawg tuaj mloog Xalumoos tej tswvyim, tabsis nimno tus uas loj dua Xalumoos nyob ntawm no. 32 Cov neeg Nineves yuav sawv rovlos rau hnub txiavtxim nrog cov neeg tiam no thiab yuav nkaug cov neeg tiam no, rauqhov lawv tau thimxav thaum lawv tau hnov Yaunas zaj lus qhuabqhia, thiab nimno tus loj dua Yaunas nyob ntawm no.”
Lub Teeb Rau Lub Cev
Mat 6:22-23
33 “Tsis muaj ib tug twg, thaum taws lub teeb lawm, es nws muab txawb rau qhov chaw nraim lossis hauv qab thoob, tabsis nws muab txawb rau saum tus ncejteeb kom cov uas muslos yuav pom qhov kaj. 34 Koj lub qhovmuag yog lub teeb rau lub cev. Thaum koj lub qhovmuag zoo ces tagnrho koj lub cev nyob kajnrig, tabsis thaum nws puas ces koj lub cev tsausntuj nti. 35 Yog li ntawd, saib tibzoo tsam qhov kaj hauv koj tsaus. 36 Vim tias yog tagnrho koj lub cev kaj, tsis muaj ib feem tsaus, ces nws yuav kajnrig ibyam li lub teeb ci pomkev rau koj.”
Rau Txojkev Vijnpog
37 Sijhawm Yexus tau tabtom hais lus, ib tug Falixais tau caw Nwg mus nrog nws noj mov. Tomqab mus hauv tsev lawm, Nws tau nce tsum. 38 Pom li ntawd tus Falixais tau xav tsis thoob vim Yexus tsis tau ntxuav tes uantej noj mov.
39 Tabsis tus Tswv tau hais rau nws tias, “Nimno nej cov Falixais ntxuav lub khob thiab lub phaj sab nraud, tabsis nej sab hauv puvnpo kev vum thiab kev phem. 40 Neeg tsis txawj xav! Tus uas tau puab sab nraud tsis tau puab sab hauv thiab lod? 41 Hais txog tej sab hauv, muab kev tabncuab rau cov txomnyem, ces nimno txhua yam yuav huv rau nej.”
42 “Tabsis kev vijnpog rau nej cov Falixais vim nej tso ib feem kaum ntawm tej pumhub, luamlaws, thiab tej txujlom, tabsis nej hla Vajtswv Ntuj txojkev ncajncees thiab kev hlub. Ob qhov no nej cheemtsum ua thiab txhob tso cov tod tseg.”
43 “Kev vijnpog rau nej cov Falixais vim nej nyiam thawj leej rooj hauv txoos sablaj thiab tej lus hawm tom tej kiabkhw.”
44 “Vijnpog rau nej vim nej zoo li tej ntxa saus, es neeg tsuj lawm los lawv twb tsis paub.”
45 Ib tug kws Kevcai tau teb thiab hais rau Nws tias, “Xibfwb, thaum hais tej lus no koj kuj txobthuam peb thiab.”
46 Yexus tau hais tias, “Thiab kev vijnpog rau nej cov kws Kevcai vim nej tsub tej nra hnyav rau neeg ris, tabsis nej tuskheej tsis cev ib tug ntivtes mus nqa tej nra ntawd.”
47 “Vijnpog rau nej vim nej txhim cov cevlus tej ntxa tabsis nej tej yawgkoob ho yog cov tua lawv. 48 Yog li ntawd, nej ua timkhawv thiab nej raugsiab rau nej tej yawgkoob tej haujlwm: Lawv tau tua cov cevlus hos nej txhim lawv tej ntxa. 49 Vim li no, Vajtswv Ntuj lub niam tswvyim thiaj tau hais tias, ‘Kuv yuav xa cov cevlus thiab cov timthawj mus rau lawv. Ibtxhia lawv yuav tua thiab tsimtxom, 50 kom cov cevlus tej ntshav uas tau nchuav txij thaum chivkeeb lub cejntug los yuav poob rau saum tiam neeg no, 51 tej ntshav txij Anpees los txog rau Xakhaliyas uas tau raug liamsim nruab nrab tus Tswv lub thaj hlawv tsiaj thiab lub tuamtsev. Yog laud, kuv hais rau nej: Tej ntawd yuav poob rau tiam neeg no.”
52 “Kev vijnpog rau nej cov kws Kevcai vim nej tau nqa tus yuamsij kev txawjntse. Txawm nej tuskheej tsis tau mus rau hauv, los nej tseem tau txwv cov uas yuav mus.”
53 Thaum Yexus tawm los lawm, cov xibfwb qhia Kevcai thiab cov Falixais tau pib nrhiav kev tawmtsam thiab kev xaub Nws ntau fab, 54 npaj nrhw yuav ntes Nws los ntawm Nws tej lus.
12
Lus Ceebtoom thiab Txhawbzog
Mat 10:26-33
1 Sijhawm ntawd, ntau vam leej neeg tau tuaj txoos uake, txog qhov lawv tau sibtsuj, Yexus tau pib hais rau Nws cov thwjtim uantej tias, “Ceev nej tuskheej tawm ntawm cov Falixais tej keeb uas yog kev xyuam plhu. 2 Tsis muaj ib yam raug zais lawm uas yuav tsis muab nthuav tawm lossis raug vov lawm uas yuav tsis muaj neeg paub. 3 Yog li ntawd, tej uas nej tau hais hauv qhov tsausntuj yuav raug hnov nraum qhov kaj, thiab dabtsi nej tau ntxhi rau ib tug lub pobntseg hauv tej chaw nraim yuav raug muab tshajtawm saum tej ruv tsev.”
4 “Kuv hais rau nej cov uas yog kuv phoojywg tias, txhob ntshai cov uas tua lub cev tabsis tomqab ntawd lawv tsis muaj peevxwm ua dabtsi ntxiv lawm. 5 Tabsis kuv yuav qhia nej txog ib tug uas nej yuavtsum ntshai: Ntshai tus uas muaj tswjchim muab nej pov rau hauv ntujtawg tomqab nej tuag. Yog laud, kuv hais rau nej, ntshai tus ntawd. 6 Tsis yog tsib tug noog tsev luag muag ob xu liab lod? Tabsis tib tug nyuag noog tsev ntawd twb tsis raug hnovqab rau ntawm Vajtswv Ntuj lub xubntiag. 7 Dua li, tej plaubhau saum nej taubhau twb raug suav txhua txoj. Txhob ntshai, nej tsimtxiaj dua ntau tus noog tsev.”
8 “Kuv hais rau nej, txhua tus uas lees kuv ntawm neeg xubntiag, Neeg Leej Tub yuav lees nws rau ntawm Vajtswv Ntuj tej timtswv xubntiag. 9 Tabsis tus uas tsis tau lees kuv ntawm neeg xubntiag yuav tsis raug lees rau ntawm Vajtswv Ntuj tej timtswv xubntiag. 10 Thiab txhua tus uas tawmtsam Neeg Leej Tub yuav raug zam, tabsis tus uas tuammom tus Ntsujplig Dawbhuv yuav tsis raug zam. 11 Thaum lawv coj nej mus rau ntawm tej txoos sablaj, cov thawj, thiab cov muaj tswjchim, txhob txhawj tias nej yov ua li cas thiab yov txheem tuskheej li cas, lossis yov hais dabtsi; 12 rauqhov tus Ntsujplig Dawbhuv yuav qhia tej uas nej cheemtsum hais lub sijhawm ntawd.”
Zaj Luspiv Txog Tus Npluanuj Ruam
13 Ces ib tug hauv cov neeg coobcoob tau hais rau Nws tias, “Xibfwb, thov hais kuv tus tijlaug kom faib cov nyiaj qabnas rau kuv thiab.”
14 Tabsis Yexus tau teb nws tias, “Koj yawg, leejtwg tau tsa kuv ua tus txiavtxim lossis tus phua lub cai rau neb?” 15 Nws tau hais rau lawv tias, “Ceevfaj thiab thaiv tuskheej tawm ntawm txhua txojkev vum, rauqhov neeg txojsia tsis txawm rau saum tej teejtug uas nws muaj npluamias.”
16 Yexus tau hais ib zaj luspiv rau lawv tias, “Ib tug yawg npluanuj daim teb tau ntsu qoob heev. 17 Ces nws tau xav hauv siab tias, ‘Kuv yuav ua li cas vim kuv tsis muaj chaw txaus ntim kuv tej qoob cia?’”
18 “Nws tau teb tuskheej tias, ‘Kuv yuav ua li no: Kuv yuav muab tej txhab rhuav thiab yuav tsa kom loj dua, es kuv yuav sau kuv tej qoob thiab tej txhiamxws rau hauv. 19 Ces kuv yuav hais rau kuv tuskheej tias, ‘Yawg aw, koj muaj txhiamxws ntau uas yuav kav ntau xyoo. So, noj, haus thiab txaussiab hlo!’”
20 “Tabsis Vajtswv Ntuj tau hais rau nws tias, ‘Neeg ruam e, hmo no koj txojsia samsim raug taij ntawm koj rovqab. Tej uas koj tau npaj tseg ntawd yuav dhau ua leejtwg tug?’”
21 “Zoo nkaus li no, tus uas vuag rau tuskheej tabsis tsis npluanuj rau ntawm Vajtswv Ntuj.”
Txhob Txhawj
Mat 6:25-33
22 Ces Yexus tau hais rau Nws cov thwjtim tias, “Vim li no, kuv hais rau nej: Txhob txhawj rau txojsia tias nej yuav noj dabtsi lossis rau lub cev tias nej yuav hnav dabtsi. 23 Rauqhov txojsia tsimtxiaj tshaj zaubmov thiab lub cev tsimtxiaj tshaj cev tsoos. 24 Thimxav mus rau tej uablag tias lawv tsis tseb thiab tsis sau qoob, lawv kuj tsis muaj ib tsev qoob lossis txhab qoob, tabsis Vajtswv Ntuj yug lawv. Nej tsimtxiaj dua tej noog ntawd ntau npaug. 25 Nej leejtwg muaj peevxwm ntxiv ib chim rau nws lub hnubnyoog vim kev txhawj? 26 Li ntawd, yog qhov nyuag meme nej tsis muaj peevxwm ua, cas nej yuav txhawj txog lwm yam?”
27 “Thimxav mus rau tej paj nras seb lawv hlob li cas: Lawv tsis khwv, tsis ua ntos. Tabsis kuv hais rau nej, Xalumoos, thaum hnav nws tej tshwjchim tagnrho, twb tsis hnav zoo npaum ib lub paj nras. 28 Yog Vajtswv Ntuj muab tsoos li no rau tej nroj, uas nyob hnub no thiab raug pov rau hauv cubtawg tagkis, Nws yov muab tshaj rau nej npaum cas, cov kev ntseeg me? 29 Thiab nej txhob nrhiav tias yuav noj dabtsi thiab haus dabtsi, thiab txhob txhawj. 30 Rauqhov pejkum neeg hauv lub cejntug nrhiav txhua yam no, tabsis nej Txiv paub tias nej cheemtsum muaj tej no. 31 Xub nrhiav Nws lub tswvkuj ces Nws yuav muab tej no ntxiv rau nej.”
32 “Txhob ntshai, cov menyuam yaj, rauqhov nej Txiv twb raug siab muab lub tswvkuj rau nej. 33 Muag nej tej teejtug thiab muab pub cov txomnyem. Xaws tej hnab nyiaj uas tsis txawj qub rau nej tuskheej, thiab vuag hub nyiaj tsis txawj piam saum ntuj, qhov uas tubsab tsis tuaj ze thiab ntsaum kabrwg tsis noj. 34 Rauqhov nej hub nyiaj nyob qhovtwg, nej lub siab yuav nyob qhov ntawd.”
Ceevfaj Ntsoov
Mat 24:43-51; 25:1-13; Mak 13:33-37
35 “Sia siv khovkho thiab cia nej tej teeb cig tsus. 36 Nej tuskheej yuavtsum zoo li tej tubtxib uas tos ntsoov lawv tus tswv uas samsim tawm hauv roojtshoob rovlos, kom thaum nws los khob qhovrooj, lawv yuav qhib kiag rau nws. 37 Cov tubtxib ntawd tau koobhmoov vim thaum tus tswv rovlos thiab ntsib lawv zov rawv. Tseeb tiag, kuv hais rau nej tias, nws yuav sia siv khovkho los tiam lawv, thiab cia lawv zaum. 38 Yog nws los lub caij zov nyoog thij ob thiab thij peb, es nws ntsib lawv zov rawv li no, lawv tau koobhmoov. 39 Nej paub qhov no tias, yog tus tswv tsev twb paub lub sijhawm uas tubsab tuaj, nws yeej tsis tso tubsab tsoo nws lub tsev. 40 Nej yuavtsum zoo ibyam li ntawd, rauqhov nej tsis paub lub sijhawm uas Neeg Leej Tub los.”
41 Petus tau nug tias, “Tus Tswv, koj hais zaj luspiv no rau peb lossis rau txhua leej thiab?”
42 Tus Tswv tau teb tias, “Leejtwg yog tus tubtxib saib tsev ncajncees thiab ntse, uas tus tswv tau tsa los muab mov rau nws tej tubteg tubtaw raws caijnyoog? 43 Tau koobhmoov yog tus tubtxib uas thaum nws tus tswv los ntsib nws ua li no. 44 Kuv qhia nej tseeb tias, tus tswv yuav tsa nws ua tus saib tagnrho tus tswv lub cuabtam. 45 Tabsis yog tus tubtxib ntawd hais hauv nws siab tias, ‘Kuv tus tswv yuav los lig,’ thiab nws pib ntaus cov tubtxib thiab ntxhais txib, noj tsau, haus qaug, thiab quavcawv. 46 Tus tubtxib ntawd tus tswv yuav los kiag hnub uas nws tsis tos thiab lub sijhawm uas nws tsis paub, thiab tus tswv yuav muab nws txiav ua ob ya thiab muab nws ob ya tshem mus nrog cov neeg tsis ntseeg.”
47 “Hos tus tubtxib uas paub nws tus tswv dejsiab, tabsis nws tsis npaj lossis ua raws tus tswv tus dejsiab, yuav raug nplawm ntau nplawm. 48 Tus tubtxib uas tsis paub thiab tsis ua tsimnyog ntawd yuav raug nplawm tsawg dua. Ntawm tus tubtxib uas tus tswv tau muab ntau rau, tus tswv yuav vam ntau ntawm nws; thiab ntawm tus tubtxib uas nws tau faib ntau rau, tus tswv yuav taij phwjyaws ntawm nws.
Tsis Yog Kev Thajyeeb tabsis Kev Sibtawg
Mat 10:34-36
49 “Kuv tau los muab hluavtaws rau ntiajteb, thiab kuv ntshaw npaum cas kom hluavtaws twb cig lawm. 50 Tabsis kuv muaj txojkev rausdej uas kuv yuav tau raus, thiab kuv raug pav nrog txojkev ntawd mus txog thaum nws tiav. 51 Nej xav tias kuv los muab kev thajyeeb rau ntiajteb lod? Tsis yog, kuv hais rau nej, tsuas yog kev sibtawg xwb. 52 Rauqhov txij no mus, tsib tug hauv ib lub tsev yuav sibtawg, peb leeg tawg ntawm ob leeg thiab ob leeg tawg ntawm peb leeg. 53 Txiv yuav tawg ntawm tus tub thiab tus tub yuav tawg ntawm leej txiv, niam yuav tawg ntawm ntxhais thiab ntxhais yuav tawg ntawm niam, thiab niam pog yuav tawg ntawm nyab thiab nyab yuav tawg ntawm niam pog.”
Txhais Caijnyoog
54 Yexus tau hais rau pab neeg coobcoob tias, “Thaum nej pom huab sawv tim hnub poob, nej hais kiag tias 'Nag yuav los' thiab nws muaj li ntawd; 55 thaum cua nplawm sab qab teb tuaj, nej hais tias, 'Nws yuav kub heev' thiab nws muaj li ntawd. 56 Cov niag xyuam plhu, nej paub txhais tej tshwm saum daim av thiab saum nruab ntug, tabsis ua li cas nej ho tsis paub txhais lub caijnyoog tamsis no?”
57 “Vim li cas nej tuskheej tsis txiavtxim seb qhovtwg yog qhov yog? 58 Thaum koj taugkev mus cuag tus txiavtxim nrog tus xyuam phaj kom koj, siv zog ntsos taij kom nws tso koj dim tom tog kev, tsam nws yov cab koj mus rau tus txiavtxim, thiab tus txiavtxim ntes koj rau tub ceevxwm, thiab tub ceevxwm muab koj pov hauv tsev lojcuj. 59 Kuv hais rau koj, koj yuav tsis tawm qhov ntawd mus txog thaum koj them tagnrho lub npib kawg.”
13
Thimxav Lossis Puastsuaj
1 Lub sijhawm ntawd ibtxhia neeg tau tshabxo rau Yexus txog cov Kalilais uas Philaj tau muab lawv cov ntshav tov xyaw lawv cov khoom fij. 2 Ces Nws tau teb lawv tias, “Nej xav tias cov Kalilais ntawd tau ua txhaum loj tshaj tej neeg Kalilais huvsi, vim lawv tau raug tua lod? 3 Tsis yog! Kuv hais rau nej tias, tshwj tias nej thimxav, nej sawvdaws yuav puastsuaj ibyam li ntawd. 4 Lossis kaum-yim leej uas lub tsev siab hauv Xilauas tau vau los ntaus tuag ntawd, nej xav tias lawv muaj txim loj tshaj tej neeg nyob hauv Yeluxalees lod? 5 Tsis yog! Kuv hais rau nej tias, tshwj tias nej thimxav, nej tagnrho yuav puastsuaj nkaus li ntawd thiab.”
6 Yexus tau hais zaj luspiv no: “Ib tug txivneej tau muaj ib tsob txiv ncuavpias uas tau raug cog hauv nws lub vaj txivhmab. Nws tau mus nrhiav txiv ntawm tsob txiv ncuavpias thiab nrhiav tsis tau. 7 Nws tau hais rau tus tu lub vaj txivhmab tias, ‘Nimno kuv tau tuaj nrhiav txiv ntawm tsob txiv ncuavpias no peb lub xyoos lawm, tabsis kuv tsis pom li. Yog li ntawd, muab nws ntov! Nws nkim av xwb ne, puas yog?’”
8 “Tabsis tus tu lub vaj tau teb tias, ‘Tus tswv, tso nws xyoo no ntxiv. Kuv yuav khawb ncig lub hauvpaus thiab pov chiv rau. 9 Yog nws txi txiv, ces zoo. Yog tsis txi, ces koj muab nws ntov.’”
Tus Pojniam Khoov Pob Tau Zoo Hnub Xanpataus
10 Hnub Xanpataus Yexus tau qhuabqhia hauv lawv ib lub txoos sablaj. 11 Nimno ib tug pojniam ntawd tau raug ib tug ntsujplig tsimtxom los lawm kaum-yim lub xyoo, ua rau nws khoov pob, tsis muaj peevxwm sawv ntseg li. 12 Pom dheev nws, Yexus tau hu nws los rau tomntej thiab tau hais rau nws tias, “Mentxhais, kuv tso koj dim ntawm koj kev mobnkees.” 13 Yexus tau tuav nkaus nws ob txhais tes. Tamsis ntawd nws tau rovsawv ntseg thiab tau qhuas Vajtswv Ntuj.
14 Tus thawj hauv lub txoos sablaj tau chim vim Yexus tau kho mob hnub Xanpataus, ces nws tau hais rau tej neeg tias, “Muaj rau hnub uas nej cheemtsum ua haujlwm. Yog li ntawd, tuaj kho mob hauv rau hnub ntawd, txhob tuaj hnub Xanpataus.”
15 Tus Tswv tau teb nws tias, “Neeg xyuam plhu, hnub Xanpataus nej leejtwg tsis tso nws tus nyuj lossis tus nees luav hauv nkuaj thiab cab nws mus haus dej? 16 Tus pojniam no yog Anplahas tus ntxhais uas Xatas tau khi los lawm kaum-yim lub xyoo, es tsis cheemtsum tso nws dim ntawm tej saw hlau ntawd rau hnub Xanpataus lod?” 17 Thaum Yexus hais li no, tagnrho cov tawmtsam Nws tau txajmuag tabsis tej neeg tau zoo siab rau txhua yam tshwjchim uas tau tshwm los ntawm Nws.
Zaj Luspiv Txog Noob Zaub thiab Keeb
Mat 13:31-33; Mak 4:30-32
18 Yog li ntawd, Nws tau hais tias, “Vajtswv Ntuj lub tswvkuj zoo li cas thiab kuv yuav muab piv rau dabtsi? 19 Nws zoo li ib lub noob zaub uas ib tug txivneej tau muab cog rau hauv nws lub vaj. Lub noob ntawd tau lojhlob thiab dhau ua ib tsob ntoo. Ces tej noog saum nruab ntug tau los ua zes rau ntawm nws cov ceg.”
20 Nws tau rovqab hais tias, “Kuv yuav muab Vajtswv Ntuj lub tswvkuj piv rau dabtsi? 21 Nws zoo li cov keeb uas ib tug pojniam tau muab tov xyaw peb tsus mov txog thaum cov mov ntawd qab thawm tagnrho.”
Lub Qhovrooj Nqaim
22 Yexus tau taugkev mus qhuabqhia hauv tej nroog thiab tej zos thaum Nws dua kev mus Yeluxalees. 23 Ib tug neeg tau nug Nws tias, “Tus Tswv, cov dim muaj tsawgtsawg lod?”
Ces Nws tau hais rau lawv tias, 24 “Coj tuskheej mus hauv lub qhovrooj nqaim, vim tias cov coob, kuv hais rau nej, nrhiav mus hauv tabsis lawv tsis muaj peevxwm. 25 Thaum tus tswv tsev sawv los kaw lub qhovrooj lawm, nej yuav sawv sab nraud thiab khob qhovrooj tias, ‘Tus Tswv, qhib rau peb.’”
“Nws yuav teb rau nej tias, ‘Kuv tsis paub nej nyob qhovtwg tuaj.’”
26 “Thaum ntawd nej yuav pib hais tias, ‘Peb tau noj thiab haus ntawm koj xubntiag thiab koj tau qhuabqhia ntawm peb tej kev.’”
27 “Ces Nws yuav hais rau nej tias, ‘Kuv tsis paub nej nyob qhovtwg tuaj. Khiav tawm ntawm kuv, tagnrho nej yog cov coj tsis ncajncees.’”
28 “Nyob rau ntawd yuav muaj kev quaj thiab kev tom hniav qev, thaum nej pom Anplahas, Ixaj, Yakhauj thiab tagnrho cov cevlus nyob hauv Vajtswv Ntuj lub tswvkuj, tabsis nej tuskheej raug pov rau sab nraud. 29 Neeg yuav tawm sab hnub tuaj, sab hnub poob, sab qaum teb thiab sab qab teb tuaj thiab lawv yuav zaum hauv Vajtswv Ntuj lub tswvkuj. 30 Nimno cov tom tw yuav dhau ua cov thawj thiab cov thawj yuav dhau ua cov tom tw.”
Yexus Tusiab Rau Yeluxalees
Mat 23:37-39; Luk 19:41
31 Lub sijhawm ntawd ib cov Falixais tau tuaj rau ntawm Yexus thiab tau hais tias, “Tawm ntawm no mus, rauqhov Helauj xav tua koj.”
32 Nws tau teb lawv tias, “Mus hais rau tus hma ntawd tias, ‘Kuv ntiab tej dab thiab kho mob hnub no thiab tagkis, hnub peb kuv yuav ua tiav. 33 Tshaj ntawd, kuv cheemtsum taugkev hnub no thiab tagkis, vim tias tus cevlus tsis lam tuag ntawm Yeluxalees sab nraud.”
34 “Yeluxalees, Yeluxalees! Lub nroog uas tua cov cevlus thiab muab pobzeb ntaus cov timthawj uas tau raug xa los rau koj. Kuv xav qaws koj tej menyuam li tus poj qaib qaws nws tej menyuam qaib rau hauv nws ob phab tis, tabsis koj tsis tau kheev. 35 Nimno nej lub tsev yuav raug muab tsotseg rau nej! Kuv hais rau nej tas, nej yuav tsis pom kuv mus txog thaum nej hais tias, ‘Qhuas tus uas los ntawm tus Tswv lub npe!’”
14
Yexus Nyob Hauv Tus Falixais Tsev
Paj 25:6-7
1 Hnub Xanpataus, thaum Yexus mus noj mov hauv ib tug thawjcoj Falixais lub tsev, cov Falixais tau soj ntsoov Nws. 2 Nimno ib tug txivneej mob plab zag tau nyob ntawm Nws hauvntej. 3 Ces Yexus tau hais rau cov kws Kevcai thiab cov Falixais tias, “Hnub Xanpataus, nws tsimnyog kho mob lossis tsis tsimnyog?” 4 Tabsis lawv tau nyob ntsiagto. Thaum cev tes mus tuav nws, Yexus tau kho nws thiab tso nws dim.
5 Yexus tau hais rau lawv tias, “Nej leejtwg muaj ib tug tub lossis nyuj poob hauv qhov tshij, es nws yuav tsis rub nws tawm hnub Xanpataus?” 6 Lawv tsis muaj cuabkaav teb tej no.
7 Ces Yexus tau hais ib zaj luspiv li no rau cov raug caw tuaj kom txhob xaiv mus zaum tej haurooj: 8 “Thaum koj raug caw mus rau hauv roojtshoob, txhob xaiv mus zaum lub haurooj, tsam tus tswv tsev tau caw ib tug nto meejmom dua koj, 9 ces nws yuav los hais rau koj tias, ‘Tseg lub chaw rau tus no.’ Koj yuav pib mus zaum lub rooj nram kawg nrog kev txajmuag. 10 Tabsis thaum koj raug caw, mus zaum lub rooj nram kawg, kom thaum tus caw koj los hais rau koj tias, ‘Phoojywg, nce los rau pem hauv ntej.’ Ces koj yuav txais tshwjchim rau ntawm cov zaum nrog koj lub xubntiag. 11 Vim tias txhua leej uas tsa tuskheej yuav raug txo thiab txhua tus uas txo tuskheej yuav raug tsa.”
12 Yexus tau hais rau tus caw Nws tias, “Thaum koj ua su lossis hmo, txhob hu koj tej phoojywg, tej kwvtij, tej txheebze lossis tej neeg zejzog npluanuj, vim lawv yuav rovqab caw koj thiab them rovqab rau koj. 13 Tabsis thaum koj ua ib pluag noj, caw cov pluag, cov puas tes-taw, cov tu tes-taw, thiab cov digmuag. 14 Ces koj yuav tau koobhmoov, vim lawv tsis muaj yuav them koj rovqab. Luag yuav them rau koj thaum cov ncajncees sawv rovlos.”
Zaj Luspiv Txog Roojnoj Loj
Mat 22:2-14
15 Hnov li ntawd, ib tug uas zaum saum rooj tau hais rau Nws tias, “Tau koobhmoov yog tus yuav noj movci hauv Vajtswv Ntuj lub tswvkuj.”
16 Tabsis Yexus tau hais rau nws tias, “Ib tug txivneej tau ua ib roojnoj loj thiab nws tau hu coob leej. 17 Thaum txog lub caij noj mov, nws tau xa nws tus tubtxib mus hais rau cov twb raug hu tias, ‘Tuaj! Txhua yam twb txhij lawm.’”
18 “Tabsis lawv ib tug zujzus tau pib thov kom zam. Thawj tug tau hais rau nws tias, ‘Kuv tau nyuamqhuav yuav ib daim teb thiab kuv cheemtsum mus saib. Kuv thov koj, zam rau kuv.’”
19 “Ib tug tau hais tias, ‘Kuv tau nyuamqhuav muas tsib txwm nyuj laij liag thiab kuv yuav mus sim cov nyuj ntawd. Kuv thov koj, zam rau kuv.’”
20 “Dua ib tug tau hais tias, ‘Kuv nyuamqhuav yuav pojniam thiab vim li no, kuv tuaj tsis tau.’”
21 “Thaum los txog, tus tubtxib tau tshab tej no rau nws tus tswv. Ces tus tswv tsev tau chim heev thiab tau hais rau tus tubtxib tias, ‘Tawm tamsis no mus rau tej kev nom thiab tej kev me hauv nroog thiab coj tej pluag, tej tuag testaw, tej digmuag, thiab tej tu testaw tuaj ntawm no.’”
22 “Tus tubtxib tau hais tias, ‘Tus Tswv, qhov koj tawmcai ua ntawd twb tiav lawm, los tseem seem chaw thiab.’”
23 “Tus tswv tau teb rau tus tubtxib tias, ‘Tawm mus rau tom tej kev thiab ntsa lajkab es coj sawvdaws tuaj, kom kuv lub tsev puv. 24 Kuv hais rau nej tias, tsis muaj ib tug ntawm cov txivneej uas twb raug caw ntawd yuav tau saj kuv rooj mov li.’”
Tus Nqi Ua Thwjtim
25 Tej neeg coobcoob tau nrog Yexus taugkev, ces Nws tau tig mus hais rau lawv tias, 26 “Yog leejtwg los cuag kuv thiab tsis ntxub nws niam, nws txiv, nws pojniam, tej menyuam, tej kwvtij, tej nkauj muam, thiab nws tuskheej, nws ua tsis tau kuv thwjtim. 27 Leejtwg tsis kwv nws tus khaublig thiab los caum kuv, nws ua tsis tau kuv thwjtim.”
28 “Nej leejtwg xav tsa ib lub tsev siab es nws tsis xub los zaum xam tus nqi seb nws puas muaj nyiaj txaus ua tiav? 29 Yog nws pua lub plagtsev tag thiab tsis muaj peevxwm ua tiav, txhua tus uas pom yuav thuam nws 30 tias, ‘Tus txivneej no pib ua tsev tabsis nws tsis muaj peevxwm ua tiav.’”
31 “Tus vajntxwv twg tawm mus ntausrog nrog lwm tus vajntxwv, es nws yov tsis los zaum nraj homphiaj seb nws kaum txhiab tus tubrog puas muaj peevxwm mus tawmtsam neesnkaum txhiab tus uas tuaj ntawd? 32 Yog nws tsis muaj peevxwm, thaum tseem nyob deb, nws yuav xa ib tug txwjlaug mus thov kev thajyeeb. 33 Yam nkaus li ntawd, nej leejtwg tsis tso txhua yam uas nws muaj tseg, nws tsis muaj peevxwm los ua kuv thwjtim.”
34 “Yog li ntawd, ntsev yog yam zoo, tabsis yog ntsev tsuag lawm, nws yuav las tau dabtsi? 35 Nws twb tsis zoo siv rau av lossis rau khoom liam thiab; luag tsuas muab nws pov tseg xwb. Leejtwg muaj pobntseg, cia nws mloog.”
15
Zaj Luspiv Txog Tus Yaj Ploj
Mat 18:12-14
1 Nimno tagnrho cov sau se thiab tej neeg txhaum tau txav ze los mloog Yexus, 2 ces cov Falixais thiab cov xibfwb qhia Kevcai tau yws tias, “Tus txivneej no txais tej neeg txhaum thiab noj nrog lawv.”
3 Yexus thiaj tau hais zaj luspiv no rau lawv tias: 4 “Tus txivneej twg hauv nej, yog nws muaj ib puas tus yaj thiab yog ib tug ploj lawm, nws yuav tsis tso cuajcaum-cuaj tug rau tom mojsab thiab mus nrhiav kom ntsib tus ploj lawm? 5 Thaum ntsib lawm, nws muab tsaws hlo rau saum nws xubpwg thiab zoo siab heev. 6 Los txog tsev, nws hu nws cov phoojywg thiab neeg zejzog tuaj thiab hais rau lawv tias, ‘Nrog kuv zoo siab, rauqhov kuv nrhiav tau kuv tus yaj ploj lawm.’ 7 Kuv hais rau nej tias, ibyam nkaus li no, nws yuav muaj kev zoo siab saum ntuj rau ib tug neeg txhaum uas thimxav tshaj li cuajcaum-cuaj tus neeg ncajncees uas tsis cheemtsum muaj kev thimxav.”
Zaj Luspiv Txog Lub Nyiaj Ploj
8 “Lossis nej cov pojniam leejtwg muaj kaum lub nyiaj thiab poob ib lub lawm, es nws yuav tsis taws teeb, cheb tsev, thiab nrhiav tibzoo mus txog thaum nws nrhiav tau? 9 Thiab thaum nrhiav tau, nws yuav hu nws cov phoojywg thiab neeg zejzog tias, ‘Nrog kuv zoo siab rauqhov kuv nrhiav tau kuv lub nyiaj uas ploj lawm.’ 10 Ibyam nkaus li no, kuv hais rau nej, nws yuav muaj kev zoo siab rau ntawm Vajtswv Ntuj cov timtswv lub xubntiag txog ib tug neeg txhaum uas thimxav.”
Zaj Luspiv Txog Tus Tub Ploj
11 Thiab Nws tau hais tias, “Nimno ib tug txivneej tau muaj ob tug tub. 12 Tus yau tau hais rau nws txiv tias, ‘Muab kuv feem hauv koj lub cuabtam rau kuv.’ Ces leej txiv tau faib lub cuabtam rau nkawv.”
13 “Tsis ntev hnub, tus tub yau tau sau txhua yam uake thiab tau taugkev mus rau ib lub tebchaws deb thiab tau nkim lub cuabtam, uaneej liam ntsuav qhov ntawd. 14 Tomqab nws siv txhua yam tag, kev tshaib tau tshwmsim hauv lub tebchaws ntawd, ces nws tau pib txomnyem. 15 Nws tau tawm mus uazog hauv lub tebchaws ntawd rau ib tug pejxeem, uas tau xa nws mus yug npua hauv nws tej teb. 16 Nws tau nqhis tej zaub npuas uas cov npua noj, tabsis tseem tsis tau muaj leejtwg muab rau nws.”
17 “Thaum nwg ras dheev los, nws tau hais tias, ‘Kuv txiv tej tubzog coobcoob ntawd muaj movci noj tsis tag, tabsis kuv ho yuav tuag tshaib ntawm no! 18 Kuv yuav sawv mus cuag kuv txiv thiab hais rau nws tias, “Txiv, kuv tau ua txhaum rau lub ntuj thiab rau koj. 19 Kuv tsis tsimnyog raug hu ua koj tus tub ntxiv lawm, muab kuv ua koj ib tug tubzog.”’ 20 Ces sawv tsees, nws tau los cuag nws txiv.”
“Tabsis thaum nws tseem nyob deb, nws txiv tau pom nws thiab tau tabncuab nws. Thaum khiav tuaj txog, leej txiv tau qawm nkaus tus tub nwj.”
21 “Tus tub tau hais rau nws tias, ‘Txiv, kuv tau ua txhaum rau lub ntuj thiab rau ntawm koj xubntiag, mas kuv tsis tsimnyog raug hu ua koj tub ntxiv lawm.’”
22 “Tabsis leej txiv tau hais rau nws cov tubtxib tias, ‘Maj nroos mus nqa cev thawj tsoos ntev thiab muab rau nws hnav, muab nplhaib rau nws txhais tes thiab khau rau nws taw. 23 Coj tus menyuam nyuj rogrog los tua. Cia peb noj thiab ua kev zoo siab, 24 rauqhov kuv tus tub no tau tuag tabsis nws tau sawv rovlos, nws tau ploj tabsis raug nrhiav tau lawm.’ Ces lawv tau pib kev zoo siab.”
25 “Nimno tus tub hlob tau nyob nram liaj. Thaum taugkev nram liaj los txog ze tsev, nws tau hnov suab pajnruag thiab suab nkauj. 26 Hu ib tug tubtxib los, nws tau nug tias tej ntawd yog dabtsi. 27 Tus tubtxib tau teb tias, ‘Koj tus kwv twb los lawm, es koj txiv tau tua ib tug menyuam nyuj rogrog, rauqhov nws tau txais koj tus kwv rovlos nrog kev nojqab nyobzoo.’”
28 “Tabsis tus tijlaug tau chim thiab tsis xav mus hauv tsev. Nws txiv tau tawm tuaj nplig nws. 29 Tiamsis nws tau teb rau nws txiv tias, ‘Saib mas, kuv twb tiam koj tau ntau xyoo npaum no thiab tsis tau cam koj txojcai ibzaug. Ib tug nyuag tshis koj twb tsis muab rau kuv kom kuv tau ua kev zoo siab nrog kuv tej phoojywg. 30 Tabsis thaum koj tus tub no los, tus uas nqos tagnrho koj lub cuabtam nrog tej niam ntiav, koj tau tua ib tug menyuam nyuj rogrog rau nws!’”
31 “Leej txiv tau hais rau nws tias, ‘Me tub, koj ibtxwm nyob nrog kuv. Txhua yam uas yog kuv tug puavleej yog koj tug. 32 Tabsis peb tsimnyog txaussiab thiab ua kev zoo siab, vim tias koj tus kwv twb tuag lawm tabsis nws ciaj rovlos, nws twb ploj lawm tabsis ho raug nrhiav tau.’”
16
Zaj Luspiv Txog Tus Thawj Tubtxib Nkhaus
1 Yexus tau hais rau Nws cov thwjtim tias, “Ib tug txivneej npluanuj muaj ib tug tubtxib saib vajtse. Tus tubtxib no raug kom tias nws tau muab yawg npluanuj lub cuabtam siv phuam lam ntsuav. 2 Thaum hu nws los, yawg npluanuj tau hais rau nws tias, ‘Zaj kuv hnov txog koj no yog dabtsi? Tshabxo txog koj kev saib vajtse rau kuv, rauqhov koj saib tsis tau ntxiv lawm.’”
3 “Tus tubtxib saib vajtse tau hais rau tuskheej tias, ‘Kuv yuav ua dabtsi, rauqhov kuv tus tswv muab kuv rho tawm kev saib vajtse lawm? Kuv tsis muaj zog mus ncaws teb thiab txajmuag mus thov khawv. 4 Kuv paub tias kuv yuav ua dabtsi, kom thaum kuv poob kev saib vajtse lawm los, neeg yuav txais kuv mus hauv lawv tsev.’”
5 “Ces nws tau hu cov neeg tshuav nqi rau nws tus tswv ib tug zujzus tuaj, thiab nws tau hais rau thawj tug tias, ‘Koj tshuav kuv tus tswv nqi npaum cas?’”
6 “Nws tau teb tias, ‘Ib puas thoob roj txiv ntoo.’”
“Tus tubtxib saib vajtse tau hais tias, ‘Zaum ntawd ko, muab tej ntaub ntawv kho, thiab sau ua tsib caug.’”
7 “Tomqab ntawd, nws ho tau hais rau lwm tus tias, ‘Koj ho tshuav nqi npaum cas?’”
“Tus ntawd tau teb tias, ‘Ib puas hnab txhuv.’”
“Nws tau hais rau tus ntawd tias, ‘Muab tej ntaub ntawv kho thiab sau ua yim caum hnab.’”
8 Tus Tswv tau qhuas tus tubtxib saib vajtse nkhaus ntawd tias nws tau ua ntse ntsuav, “Tej menyuam hauv tiam tsausntuj ntse rau kev cawm tuskheej dua  tej menyuam hauv qhov kaj. 9 Thiab kuv hais rau nej tias, siv tej nyiajtxiag qias rau nej tej phoojywg, kom thaum nyiajtxiag tag, nej yov raug txais mus hauv tej vajtse ibtxhis.”
10 “Tus uas ncaj rau yam me kuj ncaj rau yam loj; thiab tus uas tsis ncajncees rau yam me kuj tsis ncajncees rau yam loj. 11 Yog li ntawd, yog nej tsis peemtsheej ua cov ncajncees rau tej nyiajtxiag qias, leejtwg yuav ntseeg nej rau kev npluanuj tseem?”
12 “Thiab yog nej tsis ua cov ncajncees rau tej uas yog luag tug, leejtwg yuav muab dabtsi ua nej tug? 13 Ib tug tubtxib saib vajtse tiam tsis tau ob tug tswv, rauqhov nws yuav ntxub ib tug thiab hlub ib tug, lossis nws yuav nyiam ib tug thiab rhuav ib tug. Nej tiam tsis tau Vajtswv Ntuj thiab kev npluanuj.”
14 Cov Falixais yog cov nyiam nyiaj. Thaum hnov tej no, lawv tau pib thuam Yexus.  15 Ces Nws tau hais rau lawv tias, “Nej yog cov xam tuskheej ncajncees rau ntawm neeg xubntiag, tabsis Vajtswv Ntuj paub nej tej siab. Vim tias yam uas muaj nqis heev rau neeg yog yam ntxim ntxub rau ntawm Vajtswv Ntuj xubntiag.”
Lus Qhuabqhia Ntxiv
16 “Kevcai thiab cov cevlus tau nyob los txog rau Yauhas. Txij ntawd los, Vajtswv Ntuj lub tswvkuj tau raug tshajtawm thiab txhua leej tau pluav mus hauv. 17 Nws yoojyim rau lub ntuj thiab ntiajteb ploj mus tshaj li uas ib feem meme ntawd Kevcai yuav poob.”
18 “Tus uas nrauj nws tus pojniam thiab yuav dua lwm tus tau deev luag poj thiab tus uas yuav tus pojnrauj kuj tau deev luag poj.”
Yawg Npluanuj thiab Laxalaus
19 “Tau muaj ib tug txivneej npluanuj heev uas tau hnav tsho ntev tsamxem thiab ntaub tsuj ntaub npuag, thiab niajhnub lomzem txaus nkaus. 20 Thiab tau muaj ib tug pluag npe hu ua Laxalaus, uas tau raug tso rau ntawd yawg npluanuj lub roojvag, ntoog mob ntsuav; 21 nws tau ntshaw noj tej zaubmov uas poob saum yawg npluanuj lub rooj, tabsis cov dev tseem tau los yaim nws tej qhov txhab.”
22 “Tus pluag tau tuag thiab cov timtswv coj nws mus rau ntawm Anplahas xubntiag. Yawg npluanuj kuj tau tuag thiab tau raug faus. 23 Thaum nws pib raug kev txomnyem hauv tub tuag teb, yawg npluanuj tau tsa qhovmuag mus pom Anplahas debdeb thiab pom Laxalaus nyob nrog tej neeg ntawm Anplahas xubntiag. 24 Nws tau tsa suab hu tias, ‘Txiv Anplahas, tabncuab kuv os! Thiab xa Laxalaus mus muab nws tus ntivtes tub dej los rau kuv tus nplaig kom txias, rauqhov kuv txomnyem heev ntawm cov nplaim taws no.’’’
25 “Tabsis Anplahas tau teb tias, ‘Metub, nco tias thaud koj tau txais koj tej kev zoo hauv koj lub neej, thiab Laxalaus kuj tau txais kev phem ibyam nkaus. Nimno nws tau kev npligsiab ntawm no, koj ho raug kev txomnyem. 26 Nruab nrab peb thiab nej mas ib lub hav ntuj twb quas lawm. Li no, cov xav hla ntawm no tuaj tim nej los tuaj tsis tau thiab cov xav hla tim nej tuaj rau tim no los tuaj tsis tau.’”
27 “Ces nws tau hais tias, ‘Txiv, yog li ntawd, kuv thov koj xa Laxalaus mus ntawm kuv txiv tsev, 28 rauqhov kuv muaj tsib tug kwvtij. Cia nws mus ua timkhawv ntsees rau lawv kom lawv txhob los rau ntawm qhov chaw txomnyem no.’”
29 “Anplahas tau teb tias, ‘Lawv muaj Mauxes thiab cov cevlus. Cia lawv mloog cov ntawd.’”
30 “Nws tau hais dua tias, ‘Tsis yog li os, txiv Anplahas! Tabsis yog ib tug ntawm cov tuag mus cuag lawv, lawv yuav thimxav.’”
31 “Anplahas tau teb nws tias, ‘Yog lawv tsis mloog Mauxes thiab cov cevlus, ces txawm ib tug sawv hauv cov tuag rovmus qhia los lawv yuav tsis ntseeg.’”
17
Kev Txhaum, Kev Ntseeg thiab Haujlwm
1 Yexus tau hais rau Nws cov thwjtim tias, “Tej kev dawm ntog yuav muaj, tabsis vijnpog rau tus uas kev dawm ntog tawm ntawm nws los. 2 Yog muab ib txhibzeb khi rau nws cajdab thiab muab nws pov hauv hiavtxwv, mas qhov ntawd muaj tsam rau nws dua li uas nws dawm cov meme no ib tug ntog. 3 Ceev nej tuskheej!”
“Yog koj tus kwvtij ua txhaum, txhwj nws; thiab yog nws thimxav, zam rau nws. 4 Yog nws ua txhaum rau koj ib hnub xya zaus thiab nws tig los hais rau koj xya zaus tias, ‘Kuv thimxav,’ ces koj zam rau nws.”
5 Cov timthawj tau hais rau tus Tswv tias, “Ntxiv kev ntseeg rau peb.”
6 Tus Tswv tau hais tias, “Yog nej muaj kev ntseeg luaj lub noob zaub, thiab yog nej hais rau tsob ntoo xikamaus no tias, ‘Rho cag thiab mus cog hauv hiavtxwv,’ los nws yuav mloog nej.”
7 “Nej leejtwg muaj ib tug tubtxib laij liag lossis zov yaj uas samsim los nram liaj los, nws yuav tsis hais rau tus tubtxib tias, ‘Koj los lawm, ces so.’ 8 Tsis yog nws yuav hais rau tus tubtxib tias, ‘Pav duav khovkho los tiam kuv, npaj dabtsi rau kuv noj, mus txog thaum kuv noj thiab haus tsau, ces koj mam noj thiab haus’ lod? 9 Nws tsis muab vajhmoov rau tus tubtxib rauqhov tus tubtxib tsuas ua tej haujlwm uas nws raug txib. 10 Nej kuj ibyam thiab! Thaum nej ua nej txhua tes haujlwm lawm, nej hais tias, ‘Peb yog cov thawj tubtxib, peb tsimnyog ua tej uas peb twb ua ntawd.’”
Kaum Tus Mob Ruas Zoo
11 Thaum taugkev mus Yeluxalees, Yexus tau mus ntawm txojkev nruab nrab Xamalias thiab Kalilais. 12 Sijhawm Nws los rau hauv ib lub zos, kaum tus txivneej mob ruas tau los ntsib Nws. Lawv tau sawv debdeb 13 thiab tau hu tias, “Yawg hlob Yexus, tabncuab peb os!”
14 Pom li ntawd, Nws tau hais rau lawv tias, “Mus thiab muab nej tuskheej qhia rau cov povthawj.” Sijhawm lawv tau tabtom mus ntawd, lawv tau zoo huvsi lawm.
15 Ib tug ntawm lawv, thaum pom tias nws huv lawm, nws tau tig rovlos thiab qw nrovnrov qhuas Vajtswv Ntuj. 16 Nws tau qhaucev rau ntawm Yexus kotaw thiab tau ua Nws tsaug. Nws haj yog tus Xamalis.
17 Yexus tau teb nws tias, “Tsis yog kaum leej tau huv tibsi lod? Cuaj leeg ntawd ne? 18 Lawv tsis tau paub tias lawv yuav tig rovlos muab tshwjchim rau Vajtswv Ntuj, tshwj tus neeg txawv tebchaws no xwb?” 19 Ces Nws tau hais rau tus ntawd tias, “Sawv tsees mus. Koj txojkev ntseeg twb cawm koj lawm.”
Vajtswv Ntuj Lub Tswvkuj Los
Mat 24:37-39
20 Thaum teb cov Falixais lolus nug tias, thaum twg Vajtswv Ntuj lub tswvkuj li los, Yexus tau hais rau lawv tias, “Vajtswv Ntuj lub tswvkuj tsis los rau qhovmuag pom, 21 thiab luag yuav tsis hais tias, ‘Nws nyob ntawm no,’ lossis “Nws nyob tod,’ rauqhov Vajtswv Ntuj lub tswvkuj nyob hauv nej.”
22 Ces Nws tau hais rau cov thwjtim tias, “Lub caijnyoog yuav los thaum nej ntshaw pom Neeg Leej Tub thiab nej yuav tsis pom. 23 Mas lawv yuav hais tias, ‘Nyob tod’ lossis ‘Nyob ntawm no,’ tabsis nej txhob mus thiab txhob caum. 24 Rauqhov, ibyam li thaum xoblaim, nws ci ib sab ntuj mus rau ib sab ntuj, Neeg Leej Tub hnub yuav zoo nkaus li ntawd. 25 Tabsis Nws cheemtsum xub raug txomnyem ntau yam thiab raug tiam neeg no muab povtseg tso.”
26 “Raws nraim li nws tau tshwmsim thaum Naues, nws yuav tshwmsim li ntawd thaum Neeg Leej Tub los: 27 Lawv tau noj, tau haus, tau muab nyab, thiab tau qua ntxhais mus txog hnub uas Naues tau nkag hauv nkoj, dej tau nyab thiab sawvdaws tau puastsuaj.”
28 “Nws yuav tshwmsim ibyam li thaum Lauj: Lawv tau noj, tau haus, tau ua lagluam, tau cog qoobloo, thiab tau tsa vajtse; 29 tabsis hnub Lauj tau tawm hauv Xaudoos, hluavtaws thiab leejfaj tau poob saum ntuj los thiab sawvdaws tau puastsuaj.”
30 “Nws yuav muaj raws nraim li tej no rau hnub uas Neeg Leej Tub raug nthuav. 31 Hnub ntawd, cia tus txivneej saum qaum tsev txhob los nqa nws tej cuabyeej hauv tsev; thiab ibyam nkaus li ntawd, cia tus nyob tom teb txhob tig rau tom qab. 32 Nco Lauj tus pojniam. 33 Leejtwg nrhiav mus huas nws txojsia yuav plam txojsia, tabsis tus uas tso txojsia yuav cawm tau txojsia. 34 Kuv hais rau nej, hmo ntawd, ob tug pw saum ib lub txaj, ib tug yuav raug coj mus hos ib tug yuav raug tsotseg; 35 thiab ob tug zom ib lub zeb, ib tug yuav raug coj mus hos ib tug yuav raug tsotseg.”
37 Lawv tau nug Yexus tias, “Nyob qhovtwg, tus Tswv?”
Ces Nws tau hais rau lawv tias, “Lub cev tsiaj tuag nyob qhovtwg, dav noj nyug yuav sau uake rau ntawd.”
18
Zaj Luspiv Txog Tus Pojntsuam Taij Tsis Tseg
1 Ces Nws tau hais ib zaj luspiv rau lawv kom lawv yuavtsum thov Vajtswv txhua lub sijhawm thiab tsis txhob nkees 2 tias, “Tau muaj ib tug txiavtxim hauv ib lub nroog uas tsis ntshai Vajtswv Ntuj thiab tsis hwm neeg. 3 Nimno tau muaj ib tug pojntsuam hauv lub nroog ntawd thiab; nws tau tuaj cuag tus txiavtxim thiab tau hais tias, ‘Hwj kuv txojcai rau ntawm tus kom kuv.’”
4 “Thaum chiv, tus txiavtxim tsis tau xav pab, tabsis tomqab ntau zaus, nws tau hais rau tuskheej tias, ‘Txawm kuv tsis ntshai Vajtswv Ntuj thiab tsis hwm neeg los, 5 vim tus pojntsuam no txojkev khwv tuaj txob kuv, kuv yuav hwj nws txojcai, kom nws txhob tuaj ua rau kuv meemtxom tuag.’”
6 Ces tus Tswv tau hais tias, “Mloog qhov uas tus txiavtxim tsis ncaj hais. 7 Nimno Vajtswv Ntuj ho yuav tsis muab lub cai rau cov Nws tau xaiv, xws li cov quaj rau Nws nruab hnub hmontuj, thiab yuav tsis ua siabntev rau lawv lod? 8 Kuv hais rau nej tias, Nws yuav muab lub cai rau lawv tamsis. Tabsis thaum Neeg Leej Tub los, Nws puas nrhiav pom kev ntseeg hauv ntiajteb lawm?”
Zaj Luspiv Txog Tus Falixais thiab Tus Sau Se
9 Nws kuj tau hais ib zaj luspiv li no txog cov neeg uas lawv ruajsiab rau tuskheej tias lawv yog neeg ncajncees thiab lawv txobthuam luag: 10 “Ob tug txivneej tau nce tuaj thov Vajtswv rau pem lub tuamtsev; ib tug yog Falixais hos ib tug yog tus sau se. 11 Tus Falixais tau sawv thiab thov Vajtswv txog tuskheej tias: ‘Vajtswv Ntuj, kuv ua koj tsaug tias, kuv tsis zoo xws li tej neeg, tsis ua tubsab, tsis ua qias, tsis deev luag poj, lossis zoo li tus sau se no. 12 Ib limtiam kuv yoo mov ob hnub thiab kuv muab ib feem kaum ntawm txhua yam uas kuv tau los.’”
13 “Tabsis tus sau se tau sawv debdeb thiab tsis xav qhib qhovmuag ntsia rau saum ntuj; nws tau ntaus nws lub hauv siab thiab tau thov Vajtswv tias: ‘Vajtswv Ntuj, theej kuv, tus uas yog neeg txhaum.’”
14 “Kuv hais rau nej, tus no twb raug xam dawbhuv thaum nws nqis mus tsev, tsis yog thawj tug, vim tias tus uas tsa tuskheej yuav raug txo thiab tus uas txo tuskheej yuav raug tsa.”
Yexus thiab Cov Menyuam
Mat 19:13-15; Mak 10:13-16
15 Neeg tau coj tej menyuam yaus tuaj rau Yexus kom Nws plhws lawv. Thaum pom li ntawd, cov thwjtim tau txwv lawv. 16 Ces Yexus tau hu rau lawv tias, “Tso cov menyuam los cuag kuv, txhob cheem lawv, rauqhov Vajtswv Ntuj lub tswvkuj yog rau cov zoo li no. 17 Kuv hais tseeb rau nej tias, leejtwg tsis txais Vajtswv Ntuj lub tswvkuj yam ib tug menyuam, nws yeej yuav tsis nkag mus hauv lub tswvkuj li.”
Tus Nom Npluanuj
Mat 19:16-29; Mak 10:17-30
18 Ib tug nom tau nug tias, “Tus xibfwb zoo, kuv yuav ua dabtsi kom kuv tau saws txojsia ibtxhis?”
19 Yexus tau teb nws tias, “Cas koj hu kuv ua tus zoo? Tsis muaj leejtwg zoo, tshwj Vajtswv Ntuj tibleeg xwb. 20 Koj paub tej Kevcai: Txhob deev luag poj, txhob tua neeg, txhob ua tubsab, txhob ua timkhawv cuav, hwm koj niam koj txiv.”
21 Ces nws tau hais tias, “Txhua yam no kuv tau ceev txij thaum hluas los lawm.”
22 Hnov li ntawd, Yexus tau hais rau nws tias, “Koj tshuav ib qhov. Muag txhua yam uas koj muaj thiab muab rau cov pluag, kom koj yuav muaj nyiajtxiag npluamias saum ntuj, ces los caum kuv.”
23 Thaum hnov tej no, nws tau ntshaus kiag, rauqhov nws yog neeg muaj txiag heev. 24 Thaum pom nws ntshaus ntsho li ntawd, Yexus tau hais tias, “Cov neeg uas muaj teejtug ntau yuav nkag nyuaj npaum cas mus hauv Vajtswv Ntuj lub tswvkuj. 25 Rauqhov tus ntxhuav chaws lub qhov koob mas yoojyim dua li tus npluanuj mus hauv Vajtswv Ntuj lub tswvkuj.”
26 Cov hnov ntawd tau hais tias, “Leejtwg thiaj yuav dim taus?”
27 Yexus tau teb tias, “Tej uas neeg ua tsis tau ntawd Vajtswv Ntuj ua tau.”
28 Petus tau hais tias, “Saib mas, peb tau tso peb tej teejtug tseg thiab tau caum koj.”
29 Yexus tau teb lawv tias, “Kuv hais tseeb rau nej tias, tus uas tso vajtse, pojniam, kwvtij, niamtxiv thiab menyuam vim Vajtswv Ntuj lub tswvkuj, 30 tus ntawd yuav txais ntau npaug hauv tiam no thiab txojsia ibtxhis hauv tiam ibtxhis uas samsim los.”
Yexus Rovqab Hais Txog Nws Kev Tuag
Mat 20:17-19; Mak 10:32-34
31 Thaum coj pab kaum-ob leeg mus rau ib cag, Yexus tau hais tias, “Saib ov, peb nce mus rau Yeluxalees, mas txhua yam uas cov cevlus twb sau txog Neeg Leej Tub ntawd yuav tiav. 32 Rauqhov Nws yuav raug ntes mus rau cov neeg txawv tebchaws, mas Nws yuav raug thuam, raug rhuav, raug nti qaubncaug rau, 33 raug nplawm, thiab raug tua; tabsis hnub peb Nws tuskheej yuav sawv rovlos.”
34 Lawv cov ntawd tsis tau muaj ib tug totaub li vim lolus no twb raug zais ntawm lawv lawm; thiab lawv tsis tau paub tej lus hais no.
Tus Digmuag Tau Pomkev
Mat 20:29-34; Mak 10:46-52
35 Thaum Nws los ze Yelikaus, ib tug digmuag tau zaum thov khawv ntawm ntugkev. 36 Sijhawm hnov pab neeg coobcoob dua kev, nws tau nug tias, “Qhov no yog dabtsi?” 37 Lawv tau tshabxo rau nws tias, “Yexus Naxalev tabtom tuaj.”
38 Nws tau qw tias, “Yexus, Daviv tus Tub, tabncuab kuv os!”
39 Mas cov neeg uantej tau txwv nws kom ntsiag, tabsis nws hajyam tau qw tias, “Yexus, Daviv tus Tub, tabncuab kuv os!”
40 Ces Yexus tau nres thiab tau hu kom coj tus digmuag los cuag Nws. Thaum los ze lawm, Yexus tau nug tias, 41 “Koj xav kom kuv ua dabtsi rau koj?”
Nws tau teb tias, “Tus Tswv, kom kuv pomkev.”
42 Yexus tau hais rau nws tias, “Qhib hlo. Koj kev ntseeg twb cawm koj lawm.” 43 Ces tamsis ntawd nws tau pomkev. Nws tau caum Yexus thiab tau qhuas Vajtswv Ntuj. Thaum zejtsoom tau pom li no, lawv tau muab lus qhuas rau Vajtswv Ntuj.
19
Xakhais, Tus Sau Se
1 Yexus tau los hauv Yelikaus thiab tabtom phua plhawv mus. 2 Ib tug txivneej npe hu ua Xakhais tau nyob ntawd. Nws yog ib tug thawj sau se thiab yog tus npluanuj. 3 Nws tau nrhiav kev los pom Yexus seb Nws yog leejtwg, tabsis nws tsis tau muaj peevxwm los pom, vim tej neeg coobcoob thiab vim nws yog neeg qigtaub. 4 Nws tau khiav uantej thiab tau nce ib tsob xikamaus kom nws yov pom Yexus, vim tias Yexus samsim yuav los dhau qhov ntawd.
5 Ces thaum los txog qhov chaw ntawd, Yexus tau tsa qhovmuag thiab tau hu nws tias, “Xakhais, maj nroos nqis los, rauqhov hnub no kuv yuavtsum so hauv koj tsev.” 6 Xakhais majnroos nqis ntoo thiab zoo siab hlo txaistos Yexus.
7 Txhua leej uas tau pom ntawd tau nroo tias, “Nws tau los puastsuaj ntawm ib tug neeg txhaum.”
8 Tabsis Xakhais tau sawv thiab hais rau tus Tswv tias, “Saib, ib nrab ntawm kuv tej teejtug, tus Tswv, kuv muab rau cov pluag, thiab yog kuv tau huab leejtwg tug, kuv yuav them pauj plaub npaug.”
9 Ces Yexus tau hais rau nws tias, “Hnub no kev cawmdim tau tshwmsim rau tsevneeg no, vim tias tus txivneej no kuj yog Anplahas ib leeg tub thiab. 10 Neeg Leej Tub tau los nrhiav thiab cawm tus uas twb ploj lawm.”
Zaj Luspiv Txog Kaum Choj Nyiaj
Mat 25:14-30
11 Thaum sawvdaws tau hnov tej no, Yexus tau hais ib zaj luspiv ntxiv, vim Nws tau los ze Yeluxalees thiab neeg tau xav tias Vajtswv Ntuj lub tswvkuj samsim yuav raug nthuav. 12 Yog li ntawd, Nws tau hais tias, “Ib tug txivneej zoo cajces tau tawm mus txais nws lub tswvkuj rau ib lub tebchaws deb thiab mam rovlos. 13 Thaum hu nws kaum tus tubtxib los, nws tau muab kaum hub nyiaj rau lawv, thiab nws tau hais tias, ‘Siv ua lagluam mus txog thaum kuv los.’”
14 “Tabsis nws cov pejxeem uas ntxub nws tau xa tiamlis raws nws qab mus hais tias, ‘Peb tsis xav kom tus no ua vajntxwv kav peb.’”
15 “Tomqab txais nws lub tswvkuj, nws tau rovlos thiab nws tau hais rau cov tubtxib ntawd kom tuaj tshabxo rau nws txog tej nyiaj uas nws twb muab rau lawv kom nws paub tias lawv tau tsam dabtsi.”
16 “Thawj tug tau tuaj txog thiab hais tias, ‘Tus Tswv, koj hub nyiaj ntawd kuv tau ua tsam kaum hub.’”
17 “Ces vajntxwv tau hais rau nws tias, ‘Zoo heev, tus tubtxib zoo! Vim koj ncajncees rau qhov meme, los txais tswjchim rau saum kaum lub nroog.’”
18 “Tus ob tau tuaj thiab hais tias, ‘Koj hub nyiaj, tus Tswv, kuv tau ua tsam tsib hub.’”
19 “Vajntxwv kuj tau hais rau tus ntawd, ‘Koj kuj dhau ua tus kav tsib lub nroog.’”
20 “Dua ib tug tau los thiab hais tias, ‘Tus Tswv, saib koj hub nyiaj uas kuv tau muab ntaub qhwv cia. 21 Rauqhov kuv tau ntshai koj tias, koj yog ib tug heev neeg: Koj hlais tej koj tsis tau cog thiab sau tej koj tsis tau tseb.’”
22 “Vajntxwv tau hais rau tus ntawd tias, ‘Tawm ntawm koj lub qhovncauj, kuv yuav txiavtxim rau koj, tus tubtxib liam! Koj paub tias kuv yog ib tug heev neeg, thiab kuv hlais tej kuv tsis tau cog thiab sau tej uas kuv tsis tau tseb yom? 23 Vim li cas koj tsis muab kuv cov nyiaj rau cov pauv nyiaj saum rooj, kom thaum kuv los kuv ho tau paj nrog peev?’”
24 “Ces nws tau hais rau cov sawv rau ntawd tias, ‘Nqa hub nyiaj ntawm tus no thiab muab rau tus muaj kaum hub.’”
25 “Lawv tau hais rau nws tias, ‘Tus Tswv, nws twb muaj kaum hub nyiaj lawm.’”
26 “Kuv hais rau nej tias, ‘Luag yuav muab ntxiv rau txhua tus uas muaj, tabsis tus uas tsis muaj, qhov nws muaj ntawd yuav raug muab tshem mus. 27 Hos kuv cov yeebncuab, cov uas tsis xav kom kuv ua vajntxwv rau saum lawv ntawd, coj lawv los ntawm no thiab muab lawv tua kiag ntawm kuv lub xubntiag.’”
Los Hauv Yeluxalees Nrog Kev Muajyeej
Mat 21:1-9; Mat 11:1-10; Yhs 12:12-15
28 Tomqab hais tej no tag, Yexus tau taugkev thiab nce mus rau Yeluxalees. 29 Sijhawm Nws tau tuaj ze ntawm Npefankes thiab Npethanis, ntawm lub roob uas hu ua roob txiv ntooroj, Nws tau xa ob tug thwjtim uantej 30 thiab tau hais tias, “Mus rau lub zos tom ntej. Thaum neb mus ntawd, neb yuav pom ib tug menyuam nees luav khi tseg, tus uas neeg tsis tau caij ib zaug li. Daws thiab cab nws los. 31 Yog leejtwg nug tias, ‘Neb daws ua dabtsi?’ Neb teb li no: ‘Rauqhov nws tus tswv muaj kev cheemtsum siv.’”
32 Ob tug timthawj tau mus thiab ntsib raws nraim li Nws tau hais rau nkawv. 33 Thaum nkawv daws tus nees luav, cov tswv nees luav tau hais rau nkawv tias, “Neb daws tus menyuam nees luav ua dabtsi?”
34 Nkawv tau teb tias, “Rauqhov nws tus tswv muaj kev cheemtsum siv.”
35 Nkawv tau cab tus nees luav los rau Yexus. Muab kiag nkawv ob lub tsholoj pua saum tus menyuam nees luav, nkawv tau muab rau Yexus caij. 36 Sijhawm Yexus tau taugkev mus, neeg tau muab lawv tej tsholoj pua saum kev.
37 Thaum Yexus tau los ze rau ntawm lub tw roob txiv ntooroj, tagnrho Nws cov thwjtim tau pib hu nkauj nrovnrov rau Vajtswv Ntuj txog tej hwjchim uas lawv tau pom. 38 Lawv tau hu tias,

“Qhuas tus vajntxwv uas samsim los ntawm tus Tswv lub npe.
Kev thajyeeb rau saum ntuj thiab tshwjchim rau tej chaw siab kawgnkaus.”

39 Qee tus Falixais hauv tej neeg tau hais rau Yexus tias, “Xibfwb, txwv koj cov thwjtim.”
40 Tabsis Nws tau teb lawv tias, “Kuv hais rau nej, yog lawv ntsiag, tej pobzeb yuav qw.”
41 Thaum los ze thiab pom lub nroog, Yexus tau quaj txog nws 42 tias, “Kheev lam koj paub txog hnub no thiab tej uas yuav coj koj mus rau kev thajyeeb, tabsis nws tau raug zais ntawm koj qhovmuag lawm. 43 Rauqhov lub caijnyoog yuav los txog koj, thaum koj cov yeebncuab yuav cuab txaj hmuv rau koj, sawv puagncig koj, thiab muab koj puav txhua fab. 44 Lawv yuav txiav koj rau pem teb, koj thiab koj tej menyuam. Luag yuav tsis tseg ib lub pobzeb tshooj ib lub hauv koj, vim koj tsis paub lub caij uas Vajtswv Ntuj los xyuas koj.”
Yexus Ntawm Tuamtsev
Mat 21:12-16; Mak 11:15-18; Yhs 2:13-16
45 Los txog hauv lub tuamtsev, Yexus tau pib ntiab cov tubluam 46 thiab hais rau lawv tias, “Twb sau tseg tias, ‘Kuv lub tsev yog tsev thov Vajtswv,’ tabsis nej tau muab ua ‘tubsab lub qhov nkaum.’”
47 Txhua hnub, Yexus tau qhuabqhia hauv lub tuamtsev. Cov povthawj hlob, cov xibfwb qhia Kevcai thiab cov thawjcoj ntawm haivneeg tau nrhiav tua Nws, 48 tabsis lawv tau twskev vim tagnrho zejtsoom tau ntsauv mloog Nws.
20
Nug Txog Yexus Lub Tswjchim
Mat 21:23-27; Mak 11:27-33
1 Ib hnub thaum Yexus tau tabtom qhuabqhia zejtsoom hauv lub tuamtsev thiab tau qhia txojmoo zoo, cov povthawj hlob, cov xibfwb qhia Kevcai thiab cov txwjlaug tau sawv ntawd 2 thiab lawv tau nug Nws tias, “Qhia peb seb koj ua tej no los ntawm lub tswjchim twg lossis leejtwg muab lub tswjchim no rau koj?”
3 Yexus tau teb lawv tias, “Kuv kuj yuav nug nej ib los thiab. Nej teb kuv. 4 Yauhas txojkev rausdej ntawd yog tawm saum ntuj los lossis tawm ntawm neeg los?”
5 Lawv tau sablaj uake thiab hais tias, “Yog peb hais tias ‘Tawm saum ntuj los,’ Nws yuav hais tias, ‘Vim li cas nej tsis tau ntseeg nws?’ 6 Yog peb hais tias, ‘Tawm ntawm neeg los,’ tagnrho zejtsoom yuav muab pobzeb ntaus peb, vim lawv ntseeg tias Yauhas yeej yog tus cevlus.”’
7 Ces lawv tau teb tias, “Peb tsis paub tawm qhovtwg los.”
8 Yexus tau hais rau lawv tias, “Kuv kuj yuav tsis hais tias kuv ua tej no los ntawm lub tswjchim twg.”
Zaj Luspiv Txog Cov Tu Lub Vaj
Mat 21:33-46; Mak 12:1-12
9 Yexus tau pib hais zaj luspiv no rau zejtsoom: “Ib tug txivneej tau cog ib lub vaj txivhmab thiab muab tso rau cov tubqoob. Nws tau tawm mus txawv tebchaws ib ntus. 10 Txog caij, nws tau xa ib tug tubtxib mus rau cov tubqoob kom lawv muab tej txiv hauv vaj txivhmab rau nws. Tabsis cov tubqoob tau muab nws nplawm thiab xa nws rovlos tes dawb tes npliag. 11 Nws tau xa dua ib tug tubtxib. Lawv kuj tau muab nws nplawm, muab nws rhuav thiab xa nws los tes dawb tes npliag. 12 Nws tau xa tus thij peb. Lawv tau muab nws ntaus mob ntsuav thiab muab nws pov sab nraud.”
13 “Tus tswv vaj txivhmab tau hais tias, ‘Kuv yuav ua li cas? Cia kuv xa kuv tus tub uas kuv hlub. Tej zaum lawv yuav saib taus nws.’”
14 “Thaum pom nws, cov tubqoob tau sibtham tias, ‘Tus no yog tus saws nyiaj qabnas. Cia peb muab nws tua kom nyiaj qabnas dhau ua peb tug.’ 15 Lawv tau muab tus tub pov rau lub vaj txivhmab sab nraud thiab muab nws tua.”
“Yog li ntawd, tus tswv vaj txivhmab yuav ua dabtsi rau lawv? 16 Nws yuav tuaj thiab ua kom cov tubqoob puastsuaj thiab muab lub vaj txivhmab rau lwm pab.”
Cov uas hnov ntawd tau hais tias, “Txhob cia muaj li.”
17 Saib ntsoov lawv, Yexus tau hais tias, “Yog li ntawd, qhov uas twb sau tseg no yog dabtsi:

‘Lub pobzeb uas cov kws tsev muab povtseg,
lub ntawd tau peemtsheej ua lub niam zeb teem kaum’?”

18 “Txhua tus uas poob rau saum lub pobzeb no yuav tawg ntsoog ntxaws; thiab tus uas lub pobzeb poob raug, lub pobzeb yuav muab tswm ua tshauv kiag.”
19 Cov xibfwb qhia Kevcai thiab cov povthawj hlob tau nrhiav ntes Yexus tamsis ntawd, rauqhov lawv paub tias Nws tau hais zaj luspiv no tawmtsam lawv, tabsis lawv tau ntshai zejtsoom.
Kev Them Se Rau Fajtim
Mat 22:15-22; Mak 12:13-17
20 Vim lawv soj Yexus nraim, lawv tau xa tej tub sojxwm, cov uas ua txuj ua neeg ncajncees, tuaj xaub Nws kev hais lus, kom lawv yuav ntes Nws los ntawm tus kavxeev lub hwjchim thiab tswjchim. 21 Lawv tau nug Yexus tias, “Xibfwb, koj hais lus thiab qhia ncaj nraim thiab tsis xaiv ntsejmuag, tabsis koj qhia tseeb txog Vajtswv Ntuj txojkev xwb. 22 Puas raugcai rau peb them se tebchaws rau Fajtim lossis tsis raug?”
23 Paub meej txog lawv txojkev ntse zais siab, Yexus tau hais rau lawv tias, 24 “Muab ib lub txiaj denalis rau kuv xyuas. Nws muaj leejtwg ntsejmuag thiab tej ntawv?”
Lawv tau hais tias, “Fajtim li.”
25 Ces Nws tau hais rau lawv tias, “Muab tej uas yog Fajtim li rau Fajtim thiab tej uas yog Vajtswv Ntuj li rau Vajtswv Ntuj.” 26 Lawv tsis tau muaj peevxwm ntes Nws cov lus ntawm zejtsoom xubntiag. Vim lawv tagnrho tau xav tsis thoob rau Yexus lolus teb, lawv tau nyob ntsiagto.
Kev Sawv Rovlos thiab Kev Txijnkawm
Mat 22:23-33; Mak 12:18-27
27 Ibtxhia Xadukais, cov hais tias tsis muaj kev sawv rovlos, tau tuaj nug Yexus 28 tias, “Xibfwb, Mauxes tau sau rau peb tias, yog ib tug tijlaug uas muaj pojniam tuag thiab nws tsis muaj menyuam, ces kom nws tus kwv yuav nws tus pojniam thiab tsa noob rau tus tijlaug. 29 Yog li ntawd, muaj xya tus kwvtij. Tus hlob tau yuav pojniam tabsis tau tuag tsis muaj menyuam. 30 Tus ob 31 thiab tus peb tau yuav tus pojniam ntawd. Ua li ntawd, xya leej puavleej tsis tau muaj menyuam thiab tau tuag huvsi. 32 Tshaj ntawd, tus pojniam tau tuag lawm thiab. 33 Yog li ntawd, saum kev sawv rovlos, tus pojniam ntawd yuav yog leejtwg tus, ntawm xya leej kwvtij ntawd? Rauqhov xya leej tau yuav tus pojniam ntawd.”
34 Yexus tau teb lawv tias, “Tej neeg tiam no yuav pojniam thiab qua ntxhais, 35 tabsis cov uas tsimnyog mus txais txojsia tiam tom ntej thiab kev sawv rovlos ntawm cov tuag ntawd tsis yuav pojniam thiab qua ntxhais. 36 Lawv tsis muaj peevxwm tuag ntxiv lawm rauqhov lawv zoo li tej timtswv thiab yog Vajtswv Ntuj menyuam, vim lawv yog cov uas sawv rovlos. 37 Cov tuag yuav sawv rovlos. Mauxes kuj tau teev tseg rau ntawm tauv pos cig nplaim taws, vim nws tau hu tus Tswv tias, ‘Anplahas tus Vajtswv, Ixaj tus Vajtswv, thiab Yakhauj tus Vajtswv.’ 38 Nws tsis yog Vajtswv Ntuj ntawm cov tuag tabsis ntawm cov ciaj, rauqhov txhua leej ciajsia rau ntawm Nws.”
39 Qee tus xibfwb qhia Kevcai tau teb tias, “Xibfwb, koj hais yog.” 40 Leejtwg tsis muaj cuabkav nug Nws dabtsi ntxiv.
Khetos Yog Leejtwg Tub
Mat 22:41-46; 23:1-7; Mak 12:35-40
41 Yexus tau hais rau lawv tias, “Ua li cas lawv hais tias Khetos yog Daviv tub? 42 Rauqhov Daviv tau hais hauv phau Nkauj tias,

‘Tus Tswv tau hais rau kuv tus Tswv tias,
“Zaum ntawm kuv sab xis,
43 mus txog thaum kuv muab koj cov yeebncuab
ua koj lub rooj tiagtaw.”’”

44 “Ces yog Daviv twb hu Nws ua tus Tswv, Nws yog Daviv tub tau li cas?”
45 Sijhawm zejtsoom tagnrho tabtom mloog, Yexus tau hais rau Nws cov thwjtim tias, 46 “Ceev nej tuskheej tawm ntawm cov xibfwb qhia Kevcai. Lawv xav hnav tsoos ntev taugkev, nyiam raug hawm hauv kiab, zaum thawj leej rooj hauv tej txoos sablaj, thiab zaum tej haurooj hauv ntees. 47 Lawv nqos cov pojntsuam tej vajtse thiab ua txuj thov Vajtswv ntevntev. Cov ntawd yuav txais kev teemtxim hnyav heev.”
21
Tus Pojntsuam Tso Nyiaj
Mak 12:41-44
1 Thaum tsa qhovmuag saib, Yexus tau pom neeg tso lawv tej khoom pub rau hauv lub thawv tso nyiaj tawm ntawm lawv tej kev npluanuj. 2 Nws kuj tau pom ib tug pojntsuam pluag tso ob lub txiaj toog. 3 Ces Nws tau hais tias, “Kuv hais tseeb rau nej tias, tus pojntsuam no tau tso ntau dua txhua tus, 4 rauqhov lawv txhua tus tau tso tej nyiaj seem, tabsis tus pojntsuam no tau tso tagnrho tej uas nws muaj hauv lub neej raws li nws txojkev pluag.”
Tej Cim Thaum Kawg
Mat 10:17-22; 24; Mak 13
5 Qee leej hauv Nws cov thwjtim tau tham txog lub tuamtsev tias luag tau muab tej pobzeb zoo nkauj thiab tej khoom fij los txhim tibzoo rau. Yexus tau teb tias, 6 “Hais txog tej uas nej pom no, lub sijhawm yuav los thaum ib lub pobzeb yuav tsis tseg tshooj ib lub, txhua lub yuav raug rhuav povtseg.”
7 Ces lawv tau nug Nws tias, “Xibfwb, yog li ntawd, thaum twg yuav muaj tej no thiab dabtsi yog lub cim uantej tej no yuav tshwmsim?”
8 Yexus tau teb tias, “Ceevfaj kom nej txhob plaskev, rauqhov coob leej yuav los saum kuv lub npe thiab hais tias, ‘Kuv yog nws’ thiab ‘Lub sijhawm twb los ze lawm.’ Txhob mus caum lawv. 9 Thaum nej hnov txog tsovrog thiab kev ntxeev nomtswv, txhob ntshai. Rauqhov tej no yuav xub tshwmsim, tabsis nws tsis yog thaum kawg.”
10 Ces Nws tau hais rau lawv tias, “Ib haivneeg yuav sawv tawmtsam ib haivneeg, ib lub tswvkuj yuav sawv tawmtsam ib lub tswvkuj. 11 Tej av qeeg loj, kev tshaib nqhis thiab kev mob aws yuav muaj rau txhua qhov. Tej kev txaus ntshai thiab tej cim loj yuav tshwmsim saum nruab ntug.”
12 “Uantej tej no, luag yuav tsa tes ntes nej thiab tsimtxom nej. Lawv yuav coj nej mus rau tej txoos sablaj thiab tsev lojcuj; nej yuav raug coj mus rau tej vajntxwv thiab cov kavxeev vim kuv lub npe. 13 Tej no tshwmsim kom nej ua timkhawv. 14 Yog li ntawd, tswj nej lub siab thiab txhob npaj uantej tias nej yuav daws tuskheej li cas. 15 Rauqhov kuv yuav muab lub ncauj thiab kev ntse rau nej uas txhua tus sawv tawmtsam nej yuav tsis muaj peevxwm qhau lossis hais yeej. 16 Nej yuav raug niamtxiv, kwvtij, tej txheebze thiab phoojywg ntes thiab lawv yuav tua nej ibtxhia. 17 Txhua leej yuav ntxub nej vim kuv lub npe. 18 Txawm li ntawd los, nej ib txoj plaub hau yuav tsis poob. 19 Ntawm nej txojkev ua siabntev tiv, nej yuav cawm tau nej txojsia.”
20 “Thaum nej pom tubrog puav Yeluxalees, ces nej paub tias lub nroog kev puasntsoog twb los ze lawm. 21 Thaum ntawd cia cov neeg hauv Yudas khiav mus pem roob thiab cov nyob hauv nroog tawm mus thiab cov neeg hauv tej zos txhob tuaj rau hauv nroog. 22 Rauqhov lub caij ntawd yog kev teemtxim kom txhua yam uas twb sau tseg lawd tiav. 23 Thaum ntawd kev vijnpog yuav raug cov pojniam uas xeebtub thiab pub menyuam mis, rauqhov kev txomnyem loj saum daim av thiab Vajtswv Ntuj txojkev chim rau saum zejtsoom yuav tshwmsim. 24 Lawv yuav vau los ntawd hniav ntaj thiab yuav raug ntes mus rau txhua haivneeg. Yeluxalees yuav raug pejkum neeg tsuj mus txog thaum lawv lub sijhawm tag.”
25 “Tej cim yuav tshwm rau saum lub hnub, lub hli thiab tej hnubqub. Hauv ntiajteb, txhua haivneeg yuav xav tsis thoob txog hiavtxwv nroo thiab hiavtxwv huam. 26 Neeg yuav ntshai ntsausmuag ntais rau tej xwmtxheej uas yuav los raug ntiajteb, rauqhov tej hwjchim saum nruab ntug yuav zeeg. 27 Ces lawv yuav pom Neeg Leej Tub los saum huab nrog hwjchim thiab tshwjchim loj. 28 Thaum tej no pib tshwm, sawv thiab tsa nej taubhau rauqhov nej txojkev txhiv twb los ze lawm.”
29 Yexus tau hais zaj luspiv no rau lawv: “Nej pom tsob txiv ncuavpias thiab tej ntoo tagnrho. 30 Thaum nplooj hlav, nej saib thiab paub tias lub caij ntuj kub los ze lawm. 31 Nej kuj zoo ibyam nkaus, thaum nej pom tej xwm no tshwmsim, nej paub tias Vajtswv Ntuj lub tswvkuj twb los ze lawm. 32 Kuv hais tseeb rau nej tias, tiam neeg no yuav tsis dua mus uantej txhua yam no tshwmsim. 33 Lub ntuj thiab ntiajteb yuav dua mus, tabsis kuv tej lus yuav tsis dua.”\
34 “Ceev nej tuskheej, tsam nej tej siab yuav hnyav rau kev vumloj, kev quavcawv thiab kev txhawj txog lub neej, ces hnub ntawd yuav los npog nej tamsis, 35 li rooj yej. Nws yuav los raug txhua leej uas nyob thoob plaws ntiajteb. 36 Rua muag pliav txhua lub sijhawm, thov Vajtswv kom nej kovyeej thaum nej khiav tawm ntawm txhua yam uas yuav tshwmsim ntawd thiab kom nej sawv ntseg ntsos rau ntawm Neeg Leej Tub lub xubntiag.”
37 Nruab hnub Yexus tau qhuabqhia hauv lub tuamtsev, tabsis hmontuj Nws tau tawm mus so rau pem lub roob txiv ntooroj. 38 Tagnrho zejtsoom tau sawv ntxov tuaj cuag Nws thiab mloog Nws hauv lub tuamtsev.
22
Yudas Tuajyeem Ntxeevsiab
Mat 26:2-5; Mak 14:1-2,10-11
1 Lub koobtsheej hladhau thiab movci tsis xyaw keeb tau los ze. 2 Cov povthawj hlob thiab cov xibfwb qhia Kevcai tau nrhiav seb lawv yuav ua cas txov Yexus, vim lawv ntshai zejtsoom. 3 Xatas tau nkag hauv Yudas, tus hu ua Ikhalaus, uas yog ib tug ntawm pab kaum-ob leeg. 4 Nws tau mus nrog cov povthawj hlob thiab cov tub ceevxwm sibtham tias nws yov ntes Yexus rau lawv li cas. 5 Lawv tau zoo siab thiab tau txaussiab them nyiaj rau nws. 6 Nws kuj tau lees thiab nrhiav lub zoo sijhawm kom ntes Yexus rau lawv thaum tsis muaj neeg coob.
Pluas Mov Kawg
Mat 20:25-28; 26:17-35; Mak 10:42-45; 14:12-31; Yhs 13:21-30,37-38; 1 Klt 11:23-25
7 Hnub noj movci tsis xyaw keeb tau los txog, uas yog hnub cheemtsum muab tus yaj hladhau mus tua fij. 8 Yexus tau xa Petus thiab Yauhas nkawv tias, “Mus thiab npaj pluas mov hladhau kom peb tau noj.”
9 Nkawv tau nug Nws tias, “Koj xav kom wb mus npaj rau qhovtwg?”
10 Nws tau hais rau nkawv tias “Thaum neb mus haus nroog, ib tug txivneej uas kwv ib hub dej yuav ntsib neb. Caum nws mus rau hauv lub tsev uas nws mus, 11 thiab hais rau tus tswv tsev tias: ‘Xibfwb nug koj tias, “Lub chaw txais qhua uas kuv yuav noj pluas mov hladhau nrog kuv cov thwjtim nyob qhovtwg?”’ 12 Ces nws yuav qhia ib chav tsev loj txheej saud uas twb raug tu txhij lawm. Npaj rau peb qhov ntawd.”
13 Nkawv tau mus thiab tau ntsib raws nraim li Nws tau hais rau nkawv thiab nkawv tau npaj pluas mov hladhau.
14 Thaum sijhawm los txog, Yexus tau nce mus txheej saud nrog cov timthawj. 15 Nws tau hais rau lawv tias, “Kuv ntshaw los noj pluas mov hladhau nrog nej uantej kuv tuag. 16 Rauqhov kuv hais rau nej tias, kuv yuav tsis noj ntxiv mus txog thaum nws tiav hauv Vajtswv Ntuj lub tswvkuj.”
17 Tomqab txais khob dej thiab muab ua tsaug, Nws tau hais tias, “Txais lub khob no thiab muab faib rau nej sawvdaws. 18 Rauqhov kuv hais rau nej, txij no mus kuv yuav tsis haus kua txivhmab mus txog thaum Vajtswv Ntuj lub tswvkuj los.”
19 Nws tau muab lub movci los ua tsaug, muab ntais thiab cev rau lawv. Nws tau hais tias, “Qhov no yog kuv lub cev uas raug muab theej nej. Ua li no los nco txog kuv.”
20 Ibyam li ntawd, tomqab pluas mov, Nws tau muab lub khob thiab hais tias, “Lub khob no yog tus txhooj tshiab saum kuv cov ntshav uas raug nchuav theej nej. 21 Tabsis txhais tes uas ntxeevsiab rau kuv ntawd nyob saum rooj. 22 Neeg Leej Tub yuav mus raws li twb npaj tseg lawm, tabsis vijnpog rau tus neeg uas ntxeevsiab rau Nws.” 23 Ces lawv tau pib sibnug zomzaws tias lawv leejtwg yog tus uas ua li no.
24 Cov thwjtim tau sibcav li phoojywg tias leejtwg ntxim ua tus loj. 25 Yexus tau hais rau lawv tias, “Pejkum neeg tej vajntxwv kav lawv, thiab cov uas siv tswjchim rau saum lawv ntawd hu tuskheej ua cov muaj txiajntsig. 26 Tabsis nej tsis zoo li ntawd. Tabsis cia tus loj hauv nej dhau ua tus yau thiab tus thawj ua tus tiam nej. 27 Rauqhov leejtwg yog tus loj dua, tus zaum lossis tus tiam nws? Tsis yog tus zaum lod? Tabsis kuv nyob nruab nrab nej li tus tiam nej.”
28 “Nej tau nyob nrog kuv nruab nrab kuv tej kev simsiab, 29 es kuv tshwj lub tswvkuj rau nej ibyam li kuv Txiv tau tshwj rau kuv 30 kom nej yuav noj thiab haus saum kuv lub rooj hauv kuv lub tswvkuj. Nej yuav zaum kaum-ob lub zwmtxwv thiab txiavtxim rau kaum-ob xeem Yixayees.”
31 “Ximoos, Ximoos, nimno Xatas tau taij kom nws tau nqos nej peslum li nqos tej noob qoob, 32 tabsis kuv tau thov Vajtswv rau koj kom koj txojkev ntseeg txhob tu. Thaum koj tig rovlos, txhawb koj cov kwvtij kom khov.”
33 Ximoos tau hais tias, “Tus Tswv, kuv npaj txhij nrog koj mus hauv nkuaj thiab mus tuag.”
34 Yexus tau teb tias, “Kuv hais rau koj, Petus, hnub no thaum qaib tsis tau qua, koj yuav tsis lees paub kuv peb zaug.”
35 Thiab Nws tau hais rau lawv tias, “Thaud, kuv tau xa nej tsis nrog hnab nyiaj, hnab thoom thiab khau, nej puas tau tuncua dabtsi?”
Lawv tau teb tias, “Tsis tau tuncua.”
36 Nws tau hais rau lawv tias, “Tabsis nimno cia tus uas muaj hnab nyiaj nqa nws lub hnab; tus muaj hnab thooj kuj ua ibyam; thiab tus uas tsis muaj, cia nws muag nws lub tsholoj thiab muas ib rab ntaj. 37 Rauqhov kuv hais rau nej tias, qhov uas raug sau no yuavtsum tiav hauv kuv: ‘Nws raug xam nrog cov txhaum cai.’ Rauqhov nqe hais txog kuv no tabtom tiav.”
38 Lawv tau hais tias, “Tus Tswv, saib, ob rab ntaj ntawm no.”
Nws tau hais rau lawv tias, “Txaus lawm.”
Yexus Thov Vajtswv Saum Roob Txiv Ntooroj
Mat 26:36-46; Mak 14:32-42
39 Tawm ntawd, Yexus tau taugkev mus saum roob txiv ntooroj raws li ibtxwm, thiab Nws cov thwjtim tau caum Nws. 40 Los txog rau ntawm chaw, Nws tau hais rau lawv tias, “Thov Vajtswv kom nej txhob raug kev simsiab.” 41 Nws tuskheej tau ncaim lawv mus ib ncua deb li pov pobzeb. Nws tau txhoscaug thov Vajtswv 42 tias, “Txiv, kheev lam koj tshem tau lub khob no ntawm kuv! Tabsis txhob cia tshwmsim li kuv tus dejsiab tabsis li koj tus dejsiab xwb.” 43 Ib tug timtswv saum ntuj tau tshwm los txhawb Nws. 44 Vim kev ntxhovsiab, Nws tau hajyam mobsiab thov Vajtswv. Nws cov hws tau ntws ua tej teev ntshav rau saum av.
45 Sawv ntawm qhov chaw thov Vajtswv thiab los rau ntawd cov thwjtim, Nws tau pom lawv tsaugzog thiab hnovqab lawv txojkev lwjsiab. 46 Nws tau hais rau lawv tias, “Cas nej tsaugzog? Sawv thiab thov Vajtswv kom nej txhob raug kev simsiab.”
Yexus Raug Ntes
Mat 26:47-56; Mak 14:43-50; Yhs 18:3-11
47 Sijhawm Nws hais lus ntawd, saib, Yudas, ib tug ntawm pab kaum-ob leeg, tau tuaj nrog ib pab neeg thiab nws tau los ze Yexus, los nwj Nws. 48 Yexus tau nug nws tias, “Yudas, koj ntes Neeg Leej Tub los ntawm kev nwj lod?”
49 Thaum pom qhov xwm uas yuav tshwm rau Yexus, cov thwjtim tau hais tias, “Tus Tswv, peb puas siv ntaj?”
50 Lawv ib tug tau ibntag yawg povthawj hlob tus tubtxib thiab txiav kiag nws lub pobntseg sab xis. 51 Yexus tau teb tias, “Tso tseg!” Nws tau khaws daim nplooj ntseg thiab kho nws zoo.
52 Ces Yexus tau hais rau cov povthawj hlob, cov txwjlaug thiab cov tub ceevxwm uas tawm ntawm tuamtsev tuaj rau ntawm Nws tias, “Nej tuaj nrog ntaj thiab qws li mus ntes tubsab lod? 53 Kuv niajhnub tau nrog nej nyob hauv lub tuamtsev, nej tsis tau cev tes ntes kuv, tabsis qhov no yog mej lub sijhawm thiab lub tswjchim kev tsausntuj.”
Petus Tsis Lees Yexus
Mat 26:69-75; Mak 14:66-72; Yhs 18:16-18,25-27
54 Tomqab lawv tau khi Yexus lawm, lawv tau coj Nws mus ntawm tus povthawj hlob tsev. Petus tau caum qab debdeb. 55 Lawv tau rauv ib lub cubtawg hauv plawv loog thiab zaum nte, ces Petus tau zaum nruab nrab lawv. 56 Thaum pom nws zaum ntawm ntug cub, ib tug ntxhais txib tau xauj thiab hais txog Petus tias, “Tus no tau nrog Nws uake thiab.”
57 Petus tau tsis lees tias, “Tus ntxhais, kuv tsis paub Nws os.”
58 Tomqab ntawd ibpliag, ib tug txivneej tau pom nws thiab hais tias, “Koj yog ib tug ntawm lawv pab ntawd.”
Petus tau hais tias, “Yawg, kuv tsis yog.”
59 Li ib txoovteev tomqab, muaj dua ib tug tau hais ruaj nrees tias, “Tseeb tiag, yawg no tau nyob uake nrog Yexus rauqhov nws kuj yog neeg Kalilais thiab.”
60 Petus tau hais dua tias, “Yawg, kuv tsis paub qhov koj hais.” Samsim nws tau hais lus ntawd, qaib tau qua. 61 Tus Tswv tau tig los saib Petus, ces Petus tau nco dheev txog tus Tswv lolus uas Nws tau hais rau nws tias, “Uantej qaib qua hnub no, koj yuav tsis lees kuv peb zaug.” 62 Petus tau tawm nraum zoov thiab quaj tusiab heev.
Cov Tub Ceevxwm Thuam Yexus
Mat 26:67-68; Mak 14:65; Yhs 18:22-23
63 Cov txivneej uas ceev Yexus ntawd tau nplawm thiab txobthuam Nws. 64 Thaum lawv muab Nws npog qhovmuag, lawv tau nug tias, “Twv seb, leejtwg yog tus ntaus koj?” 65 Lawv tau tuammom thiab tau tseem hais ntau yam rau Nws.
Yexus Sawv Uantej Philaj thiab Helauj
Mat 26:63-66; 27:11-26; Mak 14:61-63; 15:2-15; Yhs 18:19-21,29-40; 19:1-16
66 Thaum kaj ntug lawm, lub rooj txwjlaug ntawm haivneeg, cov povthawj hlob thiab cov xibfwb qhia Kevcai tau sibtxoos. Lawv tau coj Yexus los hauv lawv lub rooj Xuhenris 67 thiab lawv tau nug tias, “Yog koj yog Khetos, qhia rau peb.”
Nws tau teb lawv tias, “Txawm kuv hais rau nej, nej yeej yuav tsis ntseeg. 68 Thiab yog kuv nug nej, nej yeej yuav tsis teb. 69 Txij no mus, Neeg Leej Tub yuav zaum ntawm Vajtswv Ntuj, tus Muaj Hwjchim sab xis.”
70 Lawv tagnrho tau nug tias, “Yog li ntawd, koj yog Vajtswv Ntuj tus Tub lod?”
Nws tau teb lawv tias, “Nej hais tias kuv yog.”
71 Ces lawv tau hais tias, “Peb cheemtsum muaj timkhawv dabtsi ntxiv? Rauqhov peb tuskheej tau hnov tawm ntawm Nws lub qhovncauj.”
23
1 Feem coob ntawm lub rooj Xuhenris tau sawv thiab coj Yexus mus rau Philaj. 2 Lawv tau pib nkaug Nws tias, “Peb tau pom tus txivneej no ntxeevsiab rau peb haivneeg thiab txwv kev them se tebchaws rau Fajtim thiab hu tuskheej ua Khetos, uas yog vajntxwv.”
3 Philaj tau nug Yexus tias, “Koj puas yog cov Yudais tus vajntxwv?”
Nws tau teb tias, “Koj hais li.”
4 Philaj tau hais rau cov povthawj hlob thiab tej neeg coobcoob tias, “Kuv tsis pom kev txhaum hauv tus txivneej no.”
5 Lawv tau hajyam hais heev tias, “Nws tau haub zejtsoom los ntawm kev qhuabqhia thoob plaws Yudas. Nws tau pib pem Kalilais tuaj txog rau ntawm no.”
6 Thaum hnov li ntawd, Philaj tau nug seb Yexus puas yog neeg Kalilais. 7 Thaum paub tias Yexus tau nyob qab tswjchim ntawm Helauj, Philaj tau xa Nws mus rau Helauj, vim nws tau nyob hauv Yeluxalees lub sijhawm ntawd.
8 Pom Yexus, Helauj tau zoo siab heev, rauqhov nws tau xav pom Yexus los ntev lawm. Vim Yexus lub moo, Helauj kuj tau ciasiab tias nws yov pom Yexus ua ib lub cim dabtsi. 9 Nws tau nug Yexus ntau yam, tabsis Nws tsis tau teb ib yam dabtsi. 10 Cov povthawj hlob thiab cov xibfwb qhia Kevcai tau sawv nkaug Nws heev. 11 Helauj tau ntxub Nws, ces Helauj thiab nws cov tubrog tau txobthuam Nws. Lawv tau muab cev tsoos cici rau Nws thiab xa Nws mus rau Philaj. 12 Hnub ntawd, Helauj thiab Philaj tau dhau ua phoojywg, rauqhov uantej ntawd nkawv tau ua yeebncuab.
13 Philaj tau hu cov povthawj hlob, cov thawjcoj thiab zejtsoom uake 14 thiab tau hais rau lawv tias, “Nej tau coj tus txivneej no tuaj rau kuv yam li tus do zejtsoom ntxeevsiab. Tomqab taug Nws zaj rau ntawm nej xubntiag tag, kuv tsis tau pom txojkev txhaum uas nej tau nkaug Nws ntawd. 15 Helauj kuj tsis tau pom dabtsi, vim nws tau xa tus txivneej no rovlos rau peb. Raws li nej pom, Nws twb tsis tau ua dabtsi tsimnyog tuag. 16 Yog li ntawd, kuv yuav cobqhia Nws thiab muab Nws tso.”
18 Tej neeg tagnrho tau qw tias, “Coj Nws mus, tabsis tso Npa-anpas rau peb.” 19 Npa-anpas yog ib tug tau raug pov rau hauv nkuaj vim kev kubntxhov hauv nroog thiab kev tuaneeg.
20 Vim nws tau xav tso Yexus, Philaj tau rovqab hu rau lawv dua. 21 Tabsis lawv tau qw rau nws tias, “Muab Nws ntsia saum khaublig! Muab Nws ntsia saum khaublig.”
22 Philaj tau hais rau lawv zaum peb tias, “Tus txivneej no tau ua dabtsi phem? Kuv tsis pom kev txhaum dabtsi hauv nws uas tsimnyog tuag. Yog li ntawd kuv yuav cobqhia Nws thiab tso Nws mus.”
23 Lawv tau qw heevheev thiab taij kom muab Yexus ntsia saum khaublig, thiab lawv tej suab tau kovyeej. 24 Ces Philaj tau txiavtxim kom tshwmsim li lawv tau thov. 25 Nws tau tso tus txivneej raug kaw hauv nkuaj vim kev kubntxhov thiab kev tuaneeg, tus uas lawv tau thov; tabsis nws tau muab Yexus rau lawv tus dejsiab.
Kev Txomnyem Saum Khaublig
Mat 27:33-44; Mak 15:22-32; Yhs 19:17-24
26 Thaum lawv coj Nws mus, lawv tau ntes Ximoos pem Kulenes uas samsim los tom teb los thiab muab tus khaublig rau nws kwv caum Yexus. 27 Zejtsoom coobcoob tau caum Yexus. Ib cov pojniam kuj tau mobsiab thiab quaj txog Nws. 28 Yexus tau tig mus rau lawv thiab tau hais tias, “Cov ntxhais Yeluxalees, txhob quaj rau kuv tabsis quaj rau nej thiab nej tej menyuam. 29 Rauqhov lub sijhawm yuav los uas lawv yuav hais tias, ‘Tau koobhmoov yog cov pojniam qhuavcev, lub plab uas tsis tau xeebtub thiab lub mis uas menyuam tsis tau noj.’ 30 Thaum ntawd:

‘Lawv yuav hais rau tej roob tias, “Nphau los tsuam peb!”
‘Thiab hais rau tej hav tias, “Npog peb.”’

31 “Rauqhov yog lawv ua tej no rau tsob ntoo nyoos, tsob ntoo qhuav ne dabtsi yuav tshwmsim rau?”
32 Lawv kuj tau coj ob tug txivneej, ob tug neeg phem, mus tua thiab. 33 Thaum lawv tau tuaj txog qhov chaw hu ua Pobtxha Taubhau, lawv tau muab Yexus ntsia saum khaublig nrog ob tug neeg phem, ib tug rau sab xis thiab ib tug rau sab laug. 34 Yexus tau hais tias, “Txiv e, zam rau lawv, rauqhov lawv twb tsis paub tias lawv ua dabtsi.” Ces lawv tau muab Nws lub tsholoj dua thiab muab twv pov.
35 Zejtsoom kuj tau sawv ntawd saib ntsoov. Cov thawjcoj kuj tau hnyos tias, “Nws tau cawm lwm tus; cia Nws cawm tuskheej, yog Nws yog Vajtswv Ntuj tus Khetos, tus uas Vajtswv Ntuj xaiv!”
36 Tej tubrog kuj tau los thiab tau thuam Nws; lawv muab cawv qaub rau Nws 37 thiab tau hais tias, “Yog koj yog cov Yudais tus Vajntxwv, cawm koj tuskheej!”
38 Nimno muaj ib daim txiag ntsia ntawm Nws saud, uas sau tias,
“Tus no yog cov Yudais tus Vajntxwv.”
39 Ib tug neeg phem uas dai ntawd tau tuammom Yexus tias, “Koj tsis yog Khetos lod? Cawm koj thiab wb mas!”
40 Tabsis tus sab tod tau txhwj nws tias, “Koj tsis ntshai Vajtswv Ntuj, vim koj raug teemtxim ibyam nkaus lod? 41 Wb raug txiavtxim ncajncees, rauqhov wb tau ua tsimnyog qhov wb tau txais. Tabsis tus no tsis tau ua txhaum dabtsi.”
42 Nws tau hais ntxiv tias, “Yexus, nco txog kuv thaum koj los hauv koj lub tswvkuj.”
43 Yexus tau teb tias, “Tseeb tiag kuv hais rau koj, hnub no koj yuav nrog kuv nyob hauv Paladis.”
Yexus Tuag
Mat 27:45-56; Mak 15:33-41; Yhs 19:29-30
44 Thaum txog rau teev, kev tsausntuj tau tshwmsim thoob plaws tebchaws mus txog rau thaum cuaj teev 45 thiab ua rau lub hnub tsis ci. Daim ntaub uas thaiv hauv plawv lub tuamtsev tau ntuag rhe ua ob daim. 46 Yexus tau qw tias, “Txiv, kuv muab kuv tus ntsujplig rau hauv koj txhais tes.” Hais li no tagnrho, Nws tau tu siav.
47 Thaum tus thawj tubrog pawgpua tau pom qhov xwm no, nws tau tsav tshwjchim rau Vajtswv Ntuj tias, “Tseeb tiag, tus txivneej no yog ib tug ncajncees.” 48 Thaum pom tej xwm no, tagnrho cov neeg uas sibntsauv rau ntawm thaj chaw no tau ntaus lawv nrob thiab rovmus tsev. 49 Tagnrho cov paub Nws tau sawv debdeb thiab cov pojniam uas tau caum Nws pem Kalilais tuaj ntawd tau pom tej no.
Yexus Raug Faus
Mat 27:57-61; Yhs 19:39-42
50 Nimno ib tug txivneej npe hu ua Yauxej, ib tug thawjcoj hauv lub rooj txwjlaug, uas yog neeg zoo thiab ncaj; 51 nws tau tawm pem Alimathas, ib lub nroog hauv Yudais, tuaj. Nws tsis tau pom zoo nrog lub rooj txwjlaug thiab qhov lawv ua. Nws kuj tau tos ntsoov Vajtswv Ntuj lub tswvkuj. 52 Nws tau mus cuag Philaj thiab thov Yexus lub cev. 53 Tomqab txo Yexus lub cev los, nws tau muab ntaub mag qhwv thiab muab tso hauv ib lub qhov ntxa zeb uas tsis tau faus leejtwg dua. 54 Hnub ntawd tau yog hnub npaj thiab hnub Xanpataus tabtom yuav los txog.
55 Cov pojniam uas tau nrog Yexus pem Kalilais tuaj ntawd tau caum qab thiab tau pom lub ntxa zeb uas Yexus lub cev tau raug zais rau. 56 Lawv tau los npaj tej tshuaj tswqab thiab mules thiab lawv tau so hnub Xanpataus raws li Kevcai.
24
Yexus Sawv Rovlos
Mat 28:1-8; Mak 16:1-8; Yhs 20:1-8
1 Hnub ib hauv lub limtiam thaum kaj ntug txoog, lawv tau mus rau ntawm ntxa thiab nqa tej tshuaj tswqab uas lawv tau npaj lawm. 2 Lawv tau pom lub pobzeb raug dov tawn ntawm lub ntxa, 3 tabsis thaum mus rau hauv, lawv tsis tau pom tus Tswv Yexus lub cev. 4 Thaum lawv samsim xav txog qhov no, nimno ob tug txivneej hnav tsoos cici tau sawv rau ntawm lawv. 5 Lawv tau ntshai heev thiab nyo ntsejmuag rau pem teb. Nkawv tau hais rau lawv tias, “Ua cas nej nrhiav tus ciaj ntawm cov tuag? 6 Nws tsis nyob ntawm no tabsis Nws tau sawv lawm. Nco qhov Nws tau hais rau nej thaum Nws tseem nyob Kalilais: 7 ‘Neeg Leej Tub cheemtsum raug ntes mus rau neeg txhaum tes thiab raug ntsia saum khaublig thiab yuav raug tsa hnub peb.’” 8 Ces lawv tau nco txog Nws cov lus.
9 Tomqab lawv tau tig ntawm ntxa los, lawv tau tshajtawm tej no tagnrho rau pab kaum-ib leeg thiab rau lwm cov neeg tagnrho. 10 Cov pojniam ntawd tau muaj Malis Madalees, Yauhanas, Malis uas yog unpaus niam thiab lwm leej uas nrog lawv uake. Lawv tau hais tej no rau cov timthawj, 11 tabsis cov timthawj tsis tau ntseeg lawv vim lawv tej lus tau tshwm li lus uasi. 12 Petus tau sawv tsees thiab khiav mus rau ntawm lub ntxa. Khoov ntshis saib, nws tau pom cov ntaub mag xwb. Nws tau ncaim ntawm ntxa thiab nws tuskheej tau xav tsis thoob txog qhov xwm no.
Ntawm Txojkev Mus Rau Emaus
13 Tib hnub ntawd, ob tug thwjtim tau taugkev mus rau ib lub zos uas deb li rau caum lub tshav ncaws pob ntawm Yeluxalees, uas npe hu ua Emaus. 14 Nkawv tau sibtham txog tej xwm uas tau tshwmsim no. 15 Sijhawm nkawv sibtham thiab sibcav ntawd, Yexus tuskheej tau los ze thiab tau nrog nkawv taugkev, 16 tabsis nkawv tej qhovmuag tau raug mooj kom txhob paub Nws.
17 Nws tau hais rau nkawv tias, “Tej lus uas neb ibleeg hais rau ibleeg thaum taugkev ntawd yog dabtsi?”
Nkawv tau sawv ntseg ntsos, ntsejmuag ntshaus ntsho. 18 Tus npe hu ua Kheopas tau teb rau Nws tias, “Ntshe koj tibleeg hauv Yeluxalees uas thiaj tsis tau paub tej xwm hauv nroog niajhnub no xwb?”
19 Nws tau teb tias, “Tej xwm dabtsi?”
Nkawv tau hais rau Nws tias, “Tej uas hais txog Yexus Naxalev, ib tug cevlus muaj hwjchim saum haujlwm thiab kev qhuabqhia rau ntawm Vajtswv Ntuj thiab zejtsoom tagnrho lub xubntiag. 20 Cov povthawj hlob thiab peb cov thawjcoj tau ntes Nws mus teemtxim kom tuag thiab lawv tau muab Nws ntsia saum khaublig. 21 Peb tau ciasiab tias Nws yog tus yuav los txhiv Yixayees. Tshaj ntawd, twb tau peb hnub lawm txij li thaum tej xwm no tau tshwmsim. 22 Ibtxhia pojniam hauv peb tau ua rau peb xav tsis thoob txog qhov uas tau tshwmsim tagkis no sawvntxov tom ntxa. 23 Lawv tau los qhia tias lawv tau nrhiav tsis pom Nws lub cev tabsis lawv twb pom ob tug timtswv uas tau hais tias Nws muajsia. 24 Qee leej hauv peb tau mus rau tom ntxa thiab tau pom raws li cov pojniam tau hais, tabsis lawv tsis tau pom Nws.”
25 Yexus tau teb nkawv tias, “Nej yog cov tsis muaj hlwb thiab qeebsiab rau kev ntseeg tej uas cov cevlus tau qhia. 26 Tsis yog Khetos cheemtsum tuag es thiaj mus rau Nws lub tshwjchim lod?” 27 Pib ntawm Mauxes thiab tagnrho cov cevlus, Nws tau txhais txhua nqe Vajlugkub uas hais txog Nws rau nkawv.
28 Lawv tau los ze lub zos uas lawv mus ntawd, ces Nws tau ua txuj li Nws yov taugkev mus deb. 29 Nkawv tau cheem Nws heev tias, “Nrog wb nyob, rauqhov twb yuav tsausntuj thiab hnub no twb yuav dua.” Nws tau los so nrog nkawv.
30 Thaum zaum saum rooj mov nrog nkawv, Nws tau muab lub movci los ua tsaug, muab ntais thiab cev rua nkawv. 31 Nkawv tej qhovmuag tau qhib plho thiab nkawv tau paub Nws. Ces Nws tau yaj ntshis ntawm nkawv. 32 Nkawv ibleeg tau hais rau ibleeg tias, “Tsis yog wb lub siab kublug thaum Nws tau hais lus thiab nthuav Vajlugkub rau wb tom kev lod?”
33 Nkawv tau sawv tsees lub tsamthawj ntawd thiab tau tig rovlos rau Yeluxalees. Nkawv tau pom lawv kaum-ib leeg sibsau uake thiab cov uas nrog lawv. 34 Lawv tau hais tias tus Tswv tau sawv rovlos tiag thiab Nws tau tshwm rau Ximoos. 35 Nkawv tau qhia tej uas tau tshwm tom kev thiab tau hais tias Nws tau qhia tuskheej rau nkawv thaum ntais lub movci.
Yexus Tshwm Rau Cov Thwjtim
36 Thaum lawv sibtham txog tej no, Yexus tuskheej tau sawv hauv nruab nrab lawv thiab hais rau lawv tias, “Kev thajyeeb rau nej.”
37 Lawv tau ceeb thiab ntshai heev vim lawv xav tias lawv tau pom ib tug ntsujplig. 38 Nws tau hais rau lawv tias, “Vim li cas nej nyuajsiab thiab vim dabtsi nej ua xyemxyav hauv siab? 39 Nej saib kuv ob txhais tes thiab ob txhais taw tias nws yog kuv. Tuav kuv kom nej paub. Rauqhov ntsujplig tsis muaj nqaijtawv thiab txha ibyam li nej pom kuv muaj.”
40 Hais li no tag, Nws tau muab Nws ob txhais tes thiab ob txhais taw rau lawv saib. 41 Thaum lawv tseem tsis tau ntseeg, vim kev zoo siab thiab kev xav tsis thoob, Yexus tau hais rau lawv tias, “Nej muaj zaubmov dabtsi ntawm no?” 42 Lawv tau muab ib tug ntses hau rau Nws 43 ces Nws tau txais los noj ntawm lawv xubntiag.
44 Nws tau hais rau lawv tias, “Kuv tej lus uas kuv tau hais rau nej thaum kuv tau tseem nrog nej yog li no tias: Txhua yam uas twb raug sau txog kuv hauv Mauxes Kevcai, cov cevlus thiab tej nkauj yuavtsum tiav.”
45 Ces Nws tau qhib lawv tej hlwb kom totaub Vajlugkub. 46 Nws kuj tau hais rau lawv tias, “Twb sau tseg li no: Khetos yuavtsum tuag thiab yuav sawv hauv cov tuag los hnub peb, 47 ces kev thimxav mus rau kev zamtxim yuav raug tshajtawm hauv Nws lub npe mus rau txhua haivneeg, pib hauv Yeluxalees mus. 48 Nej ua timkhawv txog tej no. 49 Kuv yuav xa tus uas kuv Txiv tau coglus txog ntawd los rau saum nej; tabsis nyob hauv nroog mus txog thaum nej hnav lub hwjchim uas los saud los.”
Nce Mus Saum Ntuj
50 Nws tau coj lawv tawm mus ze Npethanis, thiab Nws tau tsa tes foom koobhmoov rau lawv. 51 Thaum Nws samsim foom koobhmoov ntawd, Nws tau raug cais tawm ntawm lawv thiab Nws tau raug nqa mus rau saum ntuj. 52 Ces lawv tau pe Nws thiab tau tig rovlos rau Yeluxalees nrog vajhmoov loj. 53 Lawv tau nyob hauv lub tuamtsev tsis tuncua thiab qhuas Vajtswv Ntuj.