1 Paulus, Yexus Khetos tus timthawj raws Vajtswv Ntuj tus dejsiab, thiab Timautes, peb tus kwvtij.

Xa rau Vajtswv Ntuj pawgntseeg uas nyob hauv Kaulithaus, nrog rau cov dawbhuv txhua tus uas nyob thoob plaws Akheyas.

2 Vajhmoov thiab kev thajyeeb ntawm peb Txiv Vajtswv Ntuj thiab tus Tswv Yexus Khetos nyob nrog nej.

3 Qhuas Vajtswv Ntuj thiab Leej Txiv ntawm peb tus Tswv Yexus Khetos, Leej Txiv kev tabncuab thiab Vajtswv kev txhawbzog txhua nrho, 4 tus uas tau txhawb peb saum txhua txojkev ti kom peb muaj peevxwm txhawb cov uas raug txhua txojkev ti los ntawm txojkev txhawbzog uas peb tau txais ntawm Vajtswv Ntuj. 5 Rauqhov ibyam li Khetos tej kev txomnyem tau phwjyaws los rau peb, peb txojkev txhawbzog kuj yuav phwjyaws hauv Khetos mus. 6 Yog peb raug teebmeem, qhov ntawd yog kev txhawbzog thiab kev cawmdim rau nej. Yog peb raug txhawb, qhov ntawd kuj yog kev txhawbzog rau nej uas yuav txhawv kev siabntev rau nej thaum nej raug tej kev txomnyem uas peb tau raug thiab. 7 Hos peb txojkev ciasiab ruajkhov ntawd yog kom nej paub tias, nej tau ua cov koom peb tej kev txomnyem li cas lawm, nej kuj yuav ua cov koom peb txojkev txhawbzog thiab.

8 Peb tsis xav kom nej tsis paub, cov kwvtij, txog peb txojkev ti uas tau tshwmsim hauv Axias. Peb tau raug kev ti hnyav tshaj li peb muaj peevxwm tiv, txog qhov uas peb tau kawg tswvyim uaneej. 9 Tiagtiag ces peb tau raug kev txiavtxim tuag. Qhov ntawd tau tshwmsim kom peb txhob tso siab rau tuskheej tabsis rau Vajtswv Ntuj, tus uas tsa neeg tuag sawv. 10 Nws tau cawm peb tawm ntawm tej kev tuag li no thiab yuav cawm peb ntxiv. Peb tau ciasiab rau Nws tias Nws tseem yuav cawm peb ntxiv, 11 vim nej tau koom pab peb saum kev thov Vajtswv. Ces coob leej yuav nco Vajtswv Ntuj txiajntsig rau qhov koobhmoov uas peb tau txais vim ntau leej txojkev thov Vajtswv.

12 Rauqhov peb txojkev khav yog qhov no: Peb qhov timkhawv saum kev totaub tuskheej yog li no, tias peb tau coj xeebceem tus thiab kev siabdawb li Vajtswv rau ntawm nej hauv lub cejntug, tsis raws tswvyim sab nqaijtawv tabsis raws Vajtswv Ntuj vajhmoov. 13 Peb tsis sau lwm yam rau nej, tshwj tej uas nej nyeem thiab totaub xwb. Kuv ciasiab tias nej yuav totaub peb tiavlog, 14 ibyam li nej tau totaub peb ib feem lawm, rauqhov peb yuav dhau ua nej txojkev khav ibyam nej yuav ua peb txojkev khav rau hnub peb tus Tswv Yexus los.

15 Los ntawm kev ruajsiab, kuv yeej tau npajsiab yuav tuaj cuag nej uantej kom nej txais vajhmoov ob npaug, 16 tuaj dhau nej mus rau Makedonias thiab ho rov Makedonias los rau ntawm nej, es nej ho xa kuv mus rau Yudas. 17 Yog li, thaum npaj ntawd, kuv tau npaj dogdig xwb lod? Lossis kuv tau npaj raws nqaijtawv kom kuv thoojtxhij hais tias “yog, yog” thiab “tsis, tsis” lod?

18 Tabsis ibyam li Vajtswv Ntuj yog tus ncajncees, peb lolus rau nej tsis yog “yog” thiab “tsis” tibsi. 19 Rauqhov Vajtswv Ntuj tus Tub, Yexus Khetos, uas tau raug tshajtawm rau nej los ntawm kuv, Xilas thiab Timautes ntawd tsis tau yog tus uas “yog” thiab “tsis,” tabsis hauv Nws tsuas muaj “yog” ibtxwm. 20 Vajtswv Ntuj tej lus cogtseg txeev yog “yog” rau hauv Khetos, rauqhov hauv Nws, peb tau hais “Amees” kom Vajtswv Ntuj tau tshwjchim. 21 Vajtswv Ntuj, tus uas ceev peb nrog nej khovkho hauv Khetos, kuj yog tus uas tau pleev roj rau peb, 22 nias cim rau peb, thiab muab kev ruajsiab ntawm Vajtswv Ntsujplig rau hauv peb lub siab.

23 Kuv hu Vajtswv Ntuj ua timkhawv txog kuv tuskheej tias, kuv tsis tau rovqab los rau Kaulithaus vim kuv zam nra rau nej. 24 Tsis yog peb tswj nej kev ntseeg, tabsis peb ua cov koom haujlwm rau nej txojkev zoo siab, rauqhov nej tau sawv khovkho saum kev ntseeg.

1 Kuv tau txiavsiab kheej rau qhov no, kom kuv txhob rovlos ua rau nej quajntsuag. 2 Yog kuv ua nej quajntsuag, leejtwg yov ua rau kuv zoo siab tuaj, tshwj tsis yog nej cov uas kuv ua quajntsuag ntag? 3 Kuv tau sau li ntawd, kom thaum kuv tau tuaj, kuv yuav tsis ua rau cov uas cheemtsum ua rau kuv zoo siab ntawd quajntsuag. Kuv tau muaj kev ruajsiab rau nej sawvdaws tias, kuv txojkev zoo siab yog nej sawvdaws txoj ntag. 4 Kuv tau sau rau nej tawm ntawm kev nyuajsiab, kev ntxhovsiab, thiab kev los kuamuag heev, tsis yog kom nej quajntsuag tabsis kom nej paub txojkev hlub uas kuv muaj puvnpo rau nej.

5 Yog leejtwg tau tsim kev quajntsuag, nws tsis tau tsim kev quajntsuag rau kuv tabsis rau nej sawvdaws ib ntus. 6 Lub txim uas feem coob tau txiav rau nws ntawd txaus lawm. 7 Yog li ntawd, nej zam thiab txhawb nws, tsam nws ho txais kev quajntsuag ntau dhau, tiv tsis taus. 8 Li ntawd, kuv nquahu nej mus nthuav nej txojkev hlub rau nws tiagtiag. 9 Kuv tau sau rau nej txog qhov no kom kuv paub nej txojkev simsiab thiab seb nej puas peemtsheej ua cov mlooglus rau txhua yam. 10 Nej zam rau leejtwg, kuv yuav zam thiab, rauqhov kuv twb zam rau nws lawm. Thiab yog kuv twb zam rau leejtwg, kuv tau ua los ntawm nej rau ntawm Khetos xubntiag, 11 kom peb txhob mag Xatas rooj ntxiab vim peb tsis yog cov tsis paub nws tej kev xav.

12 Thaum kuv tau mus tshajtawm Khetos txojmoo zoo rau Tauas, tus Tswv tau qhib lub qhovrooj rau kuv, 13 tabsis kuv tsis tau muaj kev nyabxeeb ntawm kuv tus ntsujplig vim kuv tsis tau ntsib tus kwv Titus. Ces kuv tau tso lawv tseg thiab tau tawm mus rau Makedonias.

14 Tabsis nco Vajtswv Ntuj txiajntsig! Nws ibtxwm muab kev muajyeej rau peb hauv Khetos thiab tau nthuav kev paub txog Nws los ntawm peb rau txhua qhov chaw. 15 Peb yog Khetos cov tshuaj tswqab rau Vajtswv Ntuj nruab nrab cov uas samsim dim thiab cov uas samsim puastsuaj. 16 Rau cov yuav tuag, peb yog cov tshuaj lom neeg tuag, tabsis rau cov yuav txais txojsia, peb yog cov tshuaj txojsia. Leejtwg thiaj phim txoj haujlwm no? 17 Rauqhov peb tsis ua li tej neeg uas muab Vajtswv Ntuj txojlus ua luam, tabsis peb qhia tawm ntawm lub siab dawbpaug hauv Khetos yam li Vajtswv Ntuj cov sawvcev uas tau raug Vajtswv Ntuj xa los.

1 Peb rovqab pib qhuas tuskheej lod? Lossis li ibtxhia neeg, peb cheemtsum muaj tej ntawv qhuas ntsees rau nej lossis tawm ntawm nej tuaj? 2 Nej ntag yog peb tsab ntawv, uas twb raug sau hauv peb lub siab thiab rau neeg sawvdaws paub thiab nyeem. 3 Nej qhia tias nej yog Khetos tsab ntawv, uas txhawv ntawm peb txoj haujlwm, tsis tau raug sau los ntawm kuamem dub tabsis los ntawm Vajtswv Ntuj tus muajsia tus Ntsujplig, thiab tsis sau rau saum tej txiag zeb tabsis rau saum neeg nplooj siab.

4 Peb muaj tej kev ruajsiab no hauv Khetos mus rau ntawm Vajtswv Ntuj. 5 Tsis yog peb xam tuskheej ua cov tsimnyog rau dabtsi, tabsis peb txojkev tsimnyog no tawm ntawm Vajtswv Ntuj los. 6 Nws tau tsa peb ua cov tiam tus txhooj tshiab, tsis yog tus hauv ntawv tabsis tus hauv Ntsujplig; vim tus hauv ntawv tua tuag tabsis tus hauv Ntsujplig muab txojsia.

7 Nimno yog txoj haujlwm uas coj mus rau kev tuag, txoj uas txaug ua tsiaj ntawv rau ob daim txiag zeb, tau tshwmsim nrog tshwjchim, kom cov Yixayees tsis muaj peevxwm saib Mauxes lub ntsejmuag, txawm lub tshwjchim ntawd tsaus zujzus, 8 ces txoj haujlwm ntawm tus Ntsujplig yov muaj tshwjchim loj tshaj npaum li cas? 9 Yog txoj haujlwm teemtxim twb muaj tshwjchim, ces txoj haujlwm coj neeg mus rau kev ncajncees hajyam yuav muaj tshwjchim. 10 Qhov uas tau muaj tshwjchim thaud tsis muaj tshwjchim rau ntawm qhov uas muaj tshwjchim tshaj. 11 Thiab yog yam uas piam zujzus tau tshwmsim nrog tshwjchim, ces yam uas nyob ibtxhis yuav muaj tshwjchim tshaj npaum cas!

12 Yog li ntawd, vim peb muaj kev ciasiab li no, peb ruajsiab nrees. 13 Peb tsis zoo li Mauxes, tus uas muab daim thivhauv npog nws lub ntsejmuag kom cov Yixayees txhob pom qhov ci uas tsaus zujzus. 14 Lawv tej kev xav tau tsaus lawm, rauqhov niajhnub no daim thivhauv tseem npog thaum lawv nyeem tus txhooj qub. Daim thivhauv twb tsis tau muab yaws rauqhov nws tsuas raug yaws hauv Khetos xwb. 15 Txawm niajhnub no los, thaum lawv muab Mauxes tej ntawv nyeem, daim thivhauv tseem npog lawv lub siab. 16 Tabsis yog thaum leejtwg tig los cuag tus Tswv, daim thivhauv raug yaws lawm. 17 Tus Tswv yog ntsujplig. Tus Tswv tus Ntsujplig nyob qhovtwg, qhov ntawm muaj kev ywjpheej. 18 Peb sawvdaws, cov uas daim thivhauv tsis npog ntsejmuag, ci li tus Tswv lub tshwjchim; thiab vim tus Tswv yog Ntsujplig, peb raug plhis ntawm ib lub tshwjchim mus rau ib lub tshwjchim, mus zoo li Nws tus hwvxyeej.

1 Vim li ntawd, peb txais txoj haujlwm no raws li peb twb raug tabncuab, ces peb tsis poob siab. 2 Tabsis peb tau nrauj tej kev zais ntshis thiab kev txajmuag, tsis uaneej saum kev dagntxias, thiab tsis hloov Vajtswv Ntuj txojlus. Tshaj ntawd, los ntawm kev nthuav qhov tseeb, peb tau nthuav tuskheej rau saum txhua tus txojkev totaub tuskheej ntawm Vajtswv Ntuj xubntiag. 3 Yog peb txojmoo zoo raug npog, nws raug npog rau cov neeg uas yuav puastsuaj. 4 Tus vajtswv tiam no tau ua rau cov tsis ntseeg txojkev xav tsaus lawm, kom lawv txhob pom qhov kaj ntawm txojmoo zoo, uas yog Khetos lub tshwjchim, thiab txhob pom tias Khetos yog Vajtswv Ntuj lub hwvxyeej. 5 Peb tsis tau tshajtawm txog tuskheej tabsis tias Yexus Khetos yog tus Tswv thiab tias peb ua nej qhev vim Yexus. 6 Rauqhov tus Vajtswv Ntuj uas tau hais tias, “Cia qhov kaj ci tawm hauv qhov tsausntuj tuaj” ntawd tau ci rau peb lub siab kom peb pom thiab paub Vajtswv Ntuj lub tshwjchim ntawm Yexus Khetos lub ntsejmuag.

7 Tabsis peb muaj pob nyiaj no hauv tej hub av los ua timkhawv tias lub hwjchim loj tshajplaws no yog Vajtswv Ntuj tug, tsis yog peb tug. 8 Peb tau raug nias txhua fab tabsis tsis tau ntsoog; peb tau xav tsis tawm tabsis tsis tau lwjsiab; 9 peb tau raug tsimtxom tabsis tsis tau raug tsotseg; peb tau raug ntaus vau kiag tabsis tsis tau raug puastsuaj. 10 Peb txeev tau ris Yexus txojkev tuag rau ntawm peb lub cev kom Yexus txojsia yuav tshwm rau neeg pom ntawm peb lub cev. 11 Txawm peb muajsia zees, peb raug muab cob rau txojkev tuag this Yexus, kom Yexus txojsia thiaj yuav tshwm rau ntawm peb lub cev txawj tuag. 12 Li no, txojkev tuag ua haujlwm rau hauv peb, thiab txojsia ua haujlwm rau hauv nej.

13 Nws twb sau tseg tias, “Kuv tau ntseeg; yog li ntawd, kuv tau qhia.” Vim peb muaj tib tug Ntsujplig saum kev ntseeg, peb ntseeg ces peb qhia. 14 Peb paub tias, tus uas tau tsa Tswv Yexus sawv ntawm cov tuag yuav tsa peb sawv nrog Yexus thiab coj peb los sawv uake nrog nej. 15 Txhua yam no tau tshwmsim hauv nej, kom qhov vajhmoov uas tau huamvam ntawm coob leej ntawd yuav huamvam mus ua kev uatsaug txog Vajtswv Ntuj lub tshwjchim.

16 Vim li ntawd, peb tsis poob siab. Txawm peb piam zujzus sab nraud, sab hauv peb niajhnub raug hloov tshiab. 17 Rauqhov peb tej kev txomnyem sibsib thiab ibvuag no tau txhawv lub tshwjchim tsimtxiaj ibtxhis rau hauv peb uas tej kev txomnyem ntawm piv tsis tau rau. 18 Peb tsis ua siab ntug ntoob rau tej uas qhovmuag pom tabsis rau tej uas qhovmuag tsis pom. Rauqhov tej uas qhovmuag pom nyob ib vuag, tabsis tej uas qhovmuag tsis pom nyob ibtxhis.

1 Rauqhov peb paub tias txawm peb lub tsev pheebsuab raug rhuav lawm, los peb tseem muaj lub tsev ntxoovnyos nyob ntawm Vajtswv Ntuj, lub tsev ibtxhis saum ntuj uas tsis tau xuas tes ua. 2 Lub sijhawm no, peb nroo thiab quaj dhi tias peb ntshaw lub tsev saum ntuj los hnav, 3 rauqhov peb xav kom thaum peb hle lub tsev av no, peb yuav tsis raug liabqab. 4 Thaum peb tseem nyob hauv lub tsev pheebsuab no, peb nroo thiab hnyav siab, tsis vim peb xav liabqab tabsis vim peb xav hnav lub tsev tshiab, kom qhov txawj tuag yov raug txojsia nqos kiag. 5 Vajtswv Ntuj yog tus uas tau puab peb rau lub homphiaj no thiab Nws tau muab tus Ntsujplig nqis peev rau peb.

6 Yog li ntawd, peb tuaj zog txhua lub sijhawm thiab peb paub meej tias thaum peb tseem nyob lub tsev ntawm lub cev no, ces peb nyob nrug deb ntawm tus Tswv. 7 Peb uaneej raws kev ntseeg, tsis ua raws li qhovmuag pom. 8 Tabsis peb ruaj siab thiab zoo siab tshaj uas peb yuav ncaim lub cev mus nyob hauv tsev nrog tus Tswv. 9 Yog li no, txawm peb nyob lossis ncaim sab nqaijtawv, peb thiaj nrhiav lub koobmeej ua cov uas coj haum tus Tswv siab. 10 Rauqhov peb sawvdaws cheemtsum mus tshwm ntsejmuag rau ntawm Khetos lub rooj txiavtxim, mus txais qhov yeebkoob uas nyias tau ua ntawm lub cev nqaijtawv, txawm zoo lossis tsis zoo.

11 Yog li ntawd, vim peb twb paub txojkev ntshai tus Tswv lawm, peb thiaj qhia neeg kom ntseeg. Peb zoo li cas Vajtswv Ntuj twb pom tagnrho, thiab kuv ciasiab tias qhov ntawd twb meej rau hauv nej txojkev totaub tuskheej lawm thiab. 12 Peb tsis rovqab qhuas tuskheej rau nej tabsis peb muab lub cibfim rau nej khav txog peb, kom nej muaj kev khav ntawm ntsejmuag, tsis yog hauv lub siab xwb. 13 Txawm peb dhau ua neeg tsis muaj hlwb, peb ua rau Vajtswv Ntuj; txawm peb dhau ua neeg zoo hlwb, peb ua rau nej. 14 Rauqhov Khetos txojkev hlub khi peb, ces peb txiavsiab li no: Ib tug tau tuag theej sawvdaws, ces sawvdaws puavleej tau tuag. 15 Nws tau tuag theej sawvdaws kom cov neeg muajsia tsis muajsia rau tuskheej tabsis rau tus uas tau tuag this sawvdaws thiab tau sawv rovlos.

16 Yog li, txij no mus peb tsis saib neeg raws nqaijtawv ntxiv lawm. Txawm yav tag los peb tau paub Khetos raws nqaijtawv, tabsis nimno peb yuav tsis paub Nws li ntawd ntxiv lawm. 17 Yog li ntawd, leejtwg nyob hauv Khetos, nws yog tus raug tsim tshiab. Tus qub tau dua mus, thiab nimno tus tshiab tau tshwm los. 18 Txhua yam no tau tshwm ntawm Vajtswv Ntuj los. Nws tau coj peb los haumxeeb nrog Nws vim Khetos thiab tau muab txoj haujlwm kev haumxeeb no rau peb. 19 Ibyam li Vajtswv Ntuj tau coj lub cejntug los haumxeeb nrog Nws tuskheej hauv Khetos thiab tsis suav neeg tej kev txhaum nkaug lawv, Nws kuj tau cob txojlus kev haumxeeb rau peb li ntawd. 20 Yog li ntawd, peb yog Khetos cov tiamlis, uas zoo li Vajtswv Ntuj caw neeg tawm hauv peb. Sawvcev Khetos peb txhib nej: Haumxeeb nrog Vajtswv Ntuj. 21 Vajtswv Ntuj tau muab Khetos, tus uas tsis muaj txhaum, ua kev txhaum this peb, kom peb yov dhau ua Vajtswv Ntuj txojkev ncajncees hauv Khetos.

1 Yam li cov koom haujlwm, peb nquahu nej kom txhob txais Vajtswv Ntuj vajhmoov dawbdo. 2 Rauqhov Nws hais tias:

3 Peb tsis muab dabtsi ua teebmeem thaiv leejtwg kev kom peb kev tiam neeg thiaj tsis raug thuam. 4 Tabsis peb tsa tuskheej ua Vajtswv Ntuj cov ncignum rau txhua txojkev: Saum kev ua siabntev; saum tej kev txomnyem, saum tej kev cheemtsum, saum tej kev nkhib kev nkhaus; 5 saum tej kev raug nplawm, hauv tej tsev lojcuj; saum kev raug liam, saum kev khwv, saum kev yoo dabntub, saum kev nyiaj tshaib; 6 saum kev ceev tuskheej dawbhuv, saum kev totaub, saum kev tsis npautaws; hauv kev siabdawb, hauv tus Ntsujplig Dawbhuv, hauv kev hlub tsis xyuam plhu; 7 saum kev hais lus tseeb, saum Vajtswv Ntuj lub hwjchim; los ntawm tej cuabyeej kev ncajncees rau sab xis thiab sab laug; 8 los ntawm koobmeej thiab phemmeej; los ntawm moo phem thiab moo zoo; yam li cov plaskev tabsis peb yog cov tseem; 9 yam cov luag tsis paub tabsis peb yog cov txhua leej paub; yam cov yuav raug tua tabsis peb tseem muajsia; yam cov raug qhuab tabsis peb tsis raug tua; 10 yam cov quaj tsis ntsiag tabsis peb luag ntxhi; yam cov pluag kugnkaws tabsis peb ua rau coob leej npluanuj; yam cov tsis muaj dabtsi tabsis peb muaj txhua yam.

11 Peb twb qhib ncauj tabmeeg lug qhia nej, cov Kaulithaus, thiab peb twb qhib siab davfo txais nej. 12 Txhob zais siab rau peb, txhob zais nej txojkev mobsiab peb. 13 Kuv hais li rau kuv cov menyuam. Qhov no yog kev sibpauv: Qhib nej lub siab davfo.

14 Txhob kwv quab nrog cov tsis ntseeg. Rauqhov kev ncajncees yov muaj feem dabtsi nrog kev txhaum cai? Thiab kev kaj muaj kev koomxeeb dabtsi nrog kev tsausntuj? 15 Dabtsi hauv Khetos zoo xws ntxwgnyoog? Lossis dabtsi ntawm tus ntseeg txuam nrog tus tsis ntseeg? 16 Thiab dabtsi hauv Vajtswv Ntuj lub tuamtsev zoo thooj lub tsev teev mlom? Vim tias peb yog Vajtswv Ntuj tus muajsia lub tuamtsev, raws li Vajtswv Ntuj twb hais tias:

1 Yog li ntawd, cov kuv hlub, vim peb muaj tej lus cogtseg no, cia peb ntxuav tuskheej tawm ntawm txhua yam kev tsuas sab nqaijtawv thiab sab ntsujplig, kom peb ua txojkev dawbhuv tiav los ntawm kev hwm Vajtswv Ntuj.

2 Tseg chaw rau peb. Peb tsis tau ua txhaum rau leejtwg, tsis tau rhuav leejtwg, thiab tsis tau huab leejtwg tug. 3 Kuv tsis hais lus nkaug nej os, rauqhov kuv twb hais uantej lawm tias nej nyob hauv peb nruab siab thiab peb yov uaneej thiab tuag nrog nej. 4 Kuv ruajsiab heev rau nej thiab kuv khav heev txog nej. Kuv twb muaj kev txhawbzog puvnpo; thiab kuv zoo siab heev saum peb tej kev txomnyem huvsi.

5 Txij li peb tau tuaj txog Makedonias, peb lub cev twb tsis tau so ib tsam tabsis peb tau kev ti txhua fab: Tsovrog sab nraud thiab kev ntshai sab hauv. 6 Tabsis Vajtswv Ntuj, tus txhawb cov tsaugmuas, tau txhawb peb los ntawm qhov uas Titus los, 7 tsis yog qhov nws los xwb tabsis saum txojkev txhawbzog uas nws tau raug txhawb los ntawm nej. Nws tau tshabxo rau peb txog nej txojkev tshua, kev quajntsuag, thiab kev mobsiab txog kuv uas tau ua rau kuv zoo siab dua ntais.

8 Yog tias kuv tau ua rau nej quajntsuag los ntawm tsab ntawv, kuv tsis tusiab. Txawm kuv tau tusiab mentsis, kuv pom tias tsab ntawv ntawd tau ua rau nej quaj ib lub sij xwb. 9 Nimno kuv zoo siab, tsis vim nej tau quaj, tabsis vim nej tau quaj mus txais kev thimxav. Rauqhov nej tau quaj raws li Vajtswv Ntuj tus dejsiab, kom nej leejtwg txhob poob ntawm peb. 10 Rauqhov kev quaj raws Vajtswv Ntuj yuav xeeb kev thimxav mus rau kev cawmdim, tsis rau kev khuvxim; tabsis kev quaj raws lub cejntug yuav xeeb yam uas coj mus rau kev tuag. 11 Saib txojkev quaj raws Vajtswv Ntuj no tau xeeb dabtsi rau nej: Kev nquag, kev daws tuskheej, kev chim rau tej lus liam, kev ntshai, kev xav ntsib kuv, kev mobsiab cov ntseeg, thiab kev teemtxim rau tus txhaum. Saum txhua fab no, nej tau tsa tuskheej khovkho ua cov dawbhuv saum tes haujlwm ntawd. 12 Txawm kuv tau sau ntawv rau nej, kuv tsis tau sau this tus tsis ncaj thiab tus raug txojkev tsis ncaj ntawd, tabsis kom nej paub tias nej maj mloog peb npaum cas rau ntawm Vajtswv Ntuj lub xubntiag. 13 Los ntawm tej no peb tau raug txhawbzog.

Tshaj li peb txojkev txhawbzog no, peb kuj tau zoo siab rau saum Titus txojkev zoo siab, vim nej sawvdaws twb ua rau nws tus ntsujplig lossiav lawm. 14 Rauqhov kuv twb khav nej rau nws, thiab nej tsis tau ua rau kuv txajmuag; tabsis ibyam li tej uas peb twb hais txog nej ntawd yeej tseeb, peb txojkev khav txog nej rau Titus tau muaj tseeb ibyam nkaus. 15 Ces nws txojkev hmov tshua nej hajyam loj ntxiv thaum nws nco txog nej kev mlooglus, uas nej tau txais nws saum kev hwm thiab kev ntshai tshee hnyo. 16 Kuv zoo siab tias kuv muaj kev ruajsiab puvnpo rau saum nej.

1 Yog li ntawd, cov kwvtij, peb xav kom nej paub txog Vajtswv Ntuj vajhmoov uas tau raug muab rau cov pawgntseeg hauv Makedonias. 2 Nruab nrab tej kev txomnyem ntauntau uas tau ceem lawv ntawd, lawv txujkev zoosiab tau phwjyaws thiab kev pluag kugnkaws tau huam ua ib txojkev siabdawb npluamias. 3 Kuv ua timkhawv tias lawv tau muab raws peevxwm, ntshe tshaj lawv lub peevxwm. Los ntawm lawv kev tuajyeem, 4 lawv tau taij peb nqee laws txog qhov vajhmoov thiab txojkev koomxeeb rau txoj haujlwm mus pab cov dawbhuv. 5 Tsis raws li peb tau ciasiab, tabsis lawv twb xub muab tuskheej rau tus Tswv lawm, lawv mam tau muab rau peb raws li Vajtswv Ntuj tus dejsiab. 6 Ces peb tau nquahu Titus kom nws ua qhov vajhmoov hauv nej no tiav raws li nws tau chiv lawm. 7 Tabsis vim nej tau ua zoo tshaj saum txhua yam--kev ntseeg, kev hais lus, kev paub, kev tomsiab txhua nrho, thiab kev hlub peb--saib kom nej ua zoo tshaj rau qhov vajhmoov no.

8 Kuv tsis hais raws kev yuam tabsis kuv ceem nej txojkev hlub kom tseem los ntawm lwm tus txojkev tomsiab. 9 Rauqhov nej twb paub Vajtswv Ntuj vajhmoov ntawm peb tus Tswv Yexus Khetos tias txawm Nws npluanuj, Nws tau peemtsheej ua tus pluag this nej kom los ntawm Nws txojkev pluag, nej ho peemtsheej ua cov npluanuj.

10 Kuv muab tswvyim li no, vim nws yuav muaj nqis rau nej. Nej tsis yog cov uas yuav ua xwb tabsis nej twb chiv lub homphiaj no puag tsaib no lawm. 11 Ces nimno ua kom tiav qhov nej tuajyeem yuav ua. Nram ntej nej txojkev xav yog li cas, ua kom tiav li ntawd tawm ntawm tej uas nej muaj. 12 Rauqhov yog txojkev xav ua muaj nyob rau ntawd, ces nyias muab raws li nyias muaj, txhob muab tej yus tsis muaj.

13 Peb hais li no tsis yog kom lwm tus qhov sib, nej qhov hnyav, tabsis kom hnyav sibnpaug. 14 Lub sijhawm no, nej kev muaj yuav txhaws lawv kev tuncua, kom lawv kev muaj yuav tsheej ua nej kev tuncua, kom hnyav sibnpaug 15 raws li nws twb raug sau tseg tias, “Tus sau tau ntau kuj muaj tsis tshaj, thiab tus sau tau tsawg kuj tsis tsawg luaj twg.”

16 Uatsaug rau Vajtswv Ntuj, tus uas tau muab txojkev tomsiab no rau Titus lub siab. 17 Vim nws tau txais kev txhawbzog, nws tau majnroos thiab tuajyeem tuaj cuag nej. 18 Peb kuj tau xa tus kwvtij uas txhua pawgntseeg tau qhuas rau saum txojmoo zoo nrog nws uake. 19 Tsis li ntawd xwb, tabsis cov pawgntseeg tau tsa tes xaiv nws ua ib tug kwvluag nrog peb thaum peb nqa qhov vajhmoov mus tiam cov dawbhuv kom tus Tswv tau tshwjchim thiab mus qhia peb txojkev kubsiab. 20 Peb yuavtsum xyuamxim kom txhob muaj leejtwg thuam peb txog peb kev tuav cov nyiajtxiag siabdawb ntau no. 21 Rauqhov peb pom uantej tias, nws tsis yog kom zoo rau ntawm tus Tswv xubntiag xwb tabsis rau ntawm neeg thiab.

22 Uake nrog nkawv, peb tau xa peb ib tug kwvtij uas tau raug ceem los ntawm ntau yam tias nws yeej yog neeg tomsiab, thiab nimno nws yuav tomsiab tshaj vim nws ruajsiab heev rau nej. 23 Hais txog Titus, nws yog tus koomtes thiab koom haujlwm nrog kuv rau saum nej. Hos peb cov kwvtij ntawd, lawv yog cov sawvcev tej pawgntseeg thiab yog tshwjchim rau Khetos. 24 Yog li ntawd, nthuav nej txojkev hlub thiab peb kev khav txog nej rau lawv thiab rau tej pawgntseeg pom.

1 Ntsig txog kev tiam cov dawbhuv, kuv yeej muaj laijthawj txaus sau rau nej. 2 Rauqhov kuv twb paub nej txojkev kubsiab uas kuv tau khav txog nej rau cov Makedonias tias cov Akheyas twb npaj tsaib no lawm. Nej txojkev mobsiab tau txhib coobleej. 3 Kuv tau xa cov kwvtij tuaj kom peb txojkev khav txog nej feem ntawd txhob raug rhuav thiab kom nej npaj txhij raws li kuv tau hais. 4 Tsis li, yog cov Makedonias nrog kuv tuaj txog thiab pom nej npaj tsis txhij, ces peb yov txajmuag rau txojkev ruajsiab no thiab tias kuv tsis hais nej. 5 Yog li ntawd, kuv tau xav tias kuv cheemtsum nquahu cov kwvtij kom lawv uantej tuaj ntawm nej thiab npaj nej tej koobhmoov uas nej twb coglus uantej ntawd. Ces qhov no yuav txhij raws li txoj koobhmoov es tsis yog kev yuam.

6 Qhov no, tus tseb sib yuav sau tsawg, thiab tus tseb tuab ntws yuav sau ntaus. 7 Cia nyias nqa raws nyias lub siab, txhob nqa nrog kev txhovsiab lossis kev raug yuam. Rauqhov Vajtswv Ntuj hlub tus muab luagntxhi. 8 Vajtswv Ntuj muaj peevxwm ua txhua yam vajhmoov huam rau nej, kom nej yuav muaj txhua yam txaus siv thiab huamvam rau tej haujlwm zoo mus li, 9 raws li nws twb raug sau tseg tias:

12 Vim tias txoj haujlwm muab khoom fij no tsis yog mus daws cov ntseeg kev txomnyem xwb, tabsis tshaj ntawd, lawv dhau mus ua kev nco Vajtswv Ntuj txiajntsig ntau heev. 13 Los ntawm nej txojkev raug ceem saum txoj haujlwm no, neeg yuav tsav tshwjchim rau Vajtswv Ntuj txog nej kev ntseeg Khetos txojmoo zoo thiab nej txojkev koomxeeb ntawm lub siab dawbpaug mus nrog lawv thiab nrog sawvdaws. 14 Ces hauv lawv kev thov Vajtswv rau nej, lawv yuav nco ntsoov txog nej, vim Vajtswv Ntuj vajhmoov ntauntau rau lawv tau tawm los ntawm nej. 15 Uatsaug rau Vajtswv Ntuj saum Nws tej khoom pub uas piav tsis tau.

1 Kuv, Paulus, nquahu nej los ntawm kev cojtus thiab kev siab mosmuag hauv Khetos. Thaum nyob tim ntsejmuag ntawm nej, kuv "muag luav," tabsis thaum nyob deb, kuv "tawv nkuav." 2 Kuv thov kom thaum kuv tuaj, kuv txhob tau ua tawv nkuav, li kuv xav tseg, rau qee leej uas xav tias peb ua neej raws nqaijtawv. 3 Rauqhov txawm peb taugkev sab nqaijtawv, peb tsis ua tsovrog nqaijtawv. 4 Peb tej cuabyeej tsovrog tsis yog nqaijtawv tabsis yog Vajtswv Ntuj lub hwjchim mus tsoo tej yeej, thaum peb txo tej lus cav 5 thiab txhua zaj lus khav uas raug tsa los tawmtsam kev paub Vajtswv Ntuj, thiab ntes txhua txojkev xav ntawd los mloog Khetos. 6 Thiab peb tuav txhua txojkev tawvncauj txhijvog mus teemtxim, tomqab nej txojkev mlooglus tiav.

7 Nej saib raws lub ntsejmuag. Yog leejtwg ruajsiab tias nws tuskheej yog Khetos li, cia nws rovqab xam rau saum tuskheej tias peb kuj yog Khetos tug ibyam li nws. 8 Txawm kuv khav mentsis txog peb lub tswjchim uas tus Tswv tau muab ua kev txhawb nej, tsis ua kev txo nej, los kuv tsis txajmuag. 9 Kuv tsis ntxim yog tus uas nej ntshai vim tej ntawv kuv sau. 10 Rauqhov ibtxhia hais tias, “Nws tej ntawv hnyav thiab muaj ceem kawg, tabsis thaum txog ntawd, nws lub cev kuj dogdig thiab nws txojlus tsis muaj kuab.” 11 Cia cov ntawd xam qhov no tias, peb tau hais hauv ntawv li cas thaum nyob deb, peb yuav ua haujlwm nkaus li ntawd thaum nyob ze.

12 Peb tsis tawv rau qhov muab tuskheej mus piv lossis lo nrog cov neeg uas tsa tuskheej. Cov uas muab tuskheej luj saum tuskheej thiab muab tuskheej piv rau tuskheej ntawd tsis totaub. 13 Peb yuav tsis khav dhau nrim, tabsis tsuas khav raws kabke saum lub ntim, lub uas Vajtswv Ntuj tau muab rau peb, es peb ho ncav debdeb tuaj txog nej. 14 Ntshe peb yov hla nrim, yog peb tsis tau ncav cuag nej, tabsis peb tau tuaj debdeb txog ntua nej nrog Khetos txojmoo zoo. 15 Peb kuj hla nrim yog peb khav rau saum lwm tus txojkev khwv. Tabsis peb muaj kev ciasiab tias, thaum nej txojkev ntseeg huam tuaj, peb tej kev ua haujlwm kuj yuav nthuav loj hauv nej, 16 kom peb yuav tshajtawm rau tej cheebtsam dhau ntaw nej mus. Peb yov tsis khav txog tej haujlwm tiav hauv lwm tus ntiagtug. 17 Tabsis, “Cia tus neeg khav ntawd khav hauv tus Tswv.” 18 Rauqhov tus uas qhuas tuskheej rau lwm tus tsis tau raug txais, tsuas yog tus uas raug tus Tswv qhuas xwb.

1 Nej tsimnyog tiv kuv txojkev ruam mentsis, li nej samsim tiv ntag, 2 vim kuv khib nej hauv Vajtswv Ntuj txojkev khib! Rauqhov kuv tau qhaib nej rau ib tug txiv, xws li Khetos, kom kuv yov cob nej li ib tug nkaujxwb dawbhuv rau Nws. 3 Tabsis kuv ntshai tias, ibyam li tus nab tau ntxias Evas los ntawm nws tej kev ntse, nej tej kev xav yov haub nej tawm ntawm txojkev ua ibsiab thiab kev ceev tuskheej dawbhuv rau Khetos. 4 Rauqhov yog leejtwg tuaj tshajtawm lwm tus Yexus uas tsis yog tus peb tau tshajtawm, lossis tus ntsujplig txawv tus Ntsujplig nej tau txais, lossis txojmoo zoo uas txawv txoj nej tau txais, nej twb yuav ua zoo tiv. 5 Kuv xav tias kuv tsis qis dua cov timthawj ntonpe ntawd. 6 Txawm kuv tsis tau kawm txog kev hais lus, los kuv tsis ruam sab kev paub. Peb kuj tau nthuav txhua yam saum txhua fab rau nej.

7 Txojkev txhaum uas kuv tau ua yog qhov kuv txo tuskheej kom nej raug tsa, vim kuv tau tshajtawm tias txojmoo zoo yog Vajtswv Ntuj khoom pub dawb rau nej lod? 8 Kuv tau kaus lwm pawgntseeg vim kuv tau txais nqizog ntawm lawv los rau kev tiam nej. 9 Thiab thaum kuv tuaj cuag nej es kuv tsis muaj siv, kuv tsis tau ua nra rau leejtwg, vim cov kwvtij uas tau tawm Makedonias tuaj ntawd tau txhab rau kuv kev tuncua. Kuv tau ceev tuskheej thiab tseem yuav ceev kom txhob ua nra rau nej. 10 Khetos txojkev tseeb nyob hauv kuv, kom txojkev khav no tsis thaiv kuv mus rau cheebtsam Akheyas. 11 Vim dabtsi? Vim tias kuv tsis hlub nej lod? Vajtswv Ntuj paub.

12 Qhov kuv ua no, kuv tseem yuav ua ntxiv kom kuv yuav txiav txoj hauvkev rau cov neeg uas nrhiav kev kom lawv muaj lub cibfim khav tau ibyam li peb. 13 Rauqhov cov neeg ntawd yog timthawj cuav, neeg ua haujlwm dag, thiab lam looj phlu ua Khetos cov timthawj. 14 Txhob xav tsis thoob, vim Xatas tau looj phlu ua tus timtswv kajnrig. 15 Yog li ntawd, nws tsis yog teebmeem loj, txawm Xatas cov ncignum ho looj plhu ua li cov ncignum kev ncajncees. Lawv kev xaus yuav thooj li lawv tej haujlwm.

16 Kuv hais dua, txhob cia leejtwg xam kuv ua tus ruam. Yog nej ua li, ces nej ho txais kuv li tus ruam, tso kuv ho khav dabtsi mentshis. 17 Qhov kuv hais, kuv tsis hais raws tus Tswv, tabsis kuv hais raws li kev ruam, li hauv kev ruajsiab rau txojkev khav no. 18 Vim neeg coobleej khav raws nqaijtawv, kuv kuj yuav khav li ntawd. 19 Nej yog cov ntse, ces nej ua tiag tiv tej neeg ruam! 20 Rauqhov nej tau tiv tus uas quab nej ua qhev, tus uas noj nej, tus uas siv nej tug, tus uas qhuas tuskheej, thiab tus uas ntaus nej lub plhu. 21 Kuv lees txajmuag ntsuav tias peb twb tsis muaj zog ua li ntawd.

Yam dabtsi uas luag khav ntxhias, kuv hais raws kev ruam, kuv kuj khav ntxhias thiab! 22 Lawv yog neeg Henplais lod? Kuv yog thiab! Lawv yog neeg Yixayees lod? Kuv yog thiab! Lawv yog Anplahas li cajces lod? Kuv yog thiab! 23 Lawv yog Khetos cov ncignum lod? (Hais nkaus li tus tsis muaj hlwb), kuv tseem tshaj lawv! Kuv tau khwv dua, tau raug kaw ntau zaus dua, tau raug nplawm hnyav dua, thiab tau saj kev tuag tsis tseg. 24 Kuv tau raug cov Yudais nplawm tsib zaug, ib zaug pebcaug-cauj plawm, 25 tau raug qws peb zaug, raug zeb ntaus ib zaug, tau poob nkoj peb zaug, es tau nyob hauv hiavtxwv ib hnub ib hmos. 26 Tau taugkev tsis so thiab ntsib kev phomsij hauv dej, kev phomsij ntawm tubsab, kev phomsij ntawm kuv haivneeg, kev phomsij ntawm pejkum neeg; kev phomsij hauv nroog, kev phomsij tom mojsab, kev phomsij hauv hiavtxwv, kev phomsij ntawm cov kwvtij cuav. 27 Kuv tau khwv thiab pluav, ntau zaus tsis tau tsaugzog. Kuv tau tshaib thiab tau nqhis, raug kev nyiaj tshaib ntau zaus. Kuv tau tiv no thiab tsis tau muaj tsoos hnav. 28 Dhau tej no lawm, kuv tseem tshuav tes haujlwm niajhnub saib xyuas cov pawgntseeg. 29 Leejtwg tsaugmuas es kuv ho tsis tsaugmuas nrog? Leejtwg ntog es kuv ho tsis kubsiab?

30 Yog kuv cheemtsum yuav khav, ces kuv yuav khav txog kuv kev tsaugmuas. 31 Vajtswv Ntuj thiab Leej Txiv ntawm Tswv Yexus, tus raug qhuas mus ibtxhis, paub tias kuv tsis dag. 32 Hauv Damaxes, Vajntxwv Aletas tus kavxeev tau kaw lub nroog kom zejtsoom Damaxes ntes kuv, 33 tabsis kuv tau raug muab dauv hauv pobtawb ntawm qhovrai ntsayeej thiab tau khiavdim ntawm nws ob txhais tes.

1 Kuv cheemtsum khav txog tuskheej! Nws tsis yog yam kuv yuav nqa tau nrog kuv, tabsis kuv yuav mus rau tej zeemmuag thiab tej uas tus Tswv tau nthuav rau kuv. 2 Kuv paub ib tug txivneej hauv Khetos kaum-plaub xyoos dhau los--xyov hauv lub cev no lossis tawm haua lub cev lawm, kuv kuj tsis paub tabsis Vajtswv Ntuj paub--uas raug coj nce mus txog rau lub ntuj ceebtsheej thij peb. 3 Kuv paub tus txivneej no--xyov hauv lub cev no lossis tawm hauv lub cev lawm, kuv tsis paub tabsis Vajtswv Ntuj paub-- 4 tias nws raug coj nce mus rau paladis thiab nws tau hnov tej uas tsis muaj lus piav tau, tej uas tsis raug cai rau neeg tham txog. 5 Kuv yuav khav txog tej neeg li no, tabsis kuv yuav tsis khav txog tuskheej, tshwj kuv tej kev tsaugmuas. 6 Rauqhov yog kuv xav khav, los kuv yuav tsis ua neeg ruam, vim tias kuv hais lus tseeb: Kuv tswj tuskheej kom leejtwg txhob xam kuv zoo tshaj li uas nws pom kuv thiab hnov ntawm kuv, 7 thiab tej raug nthuav rau kuv uas zoo tshaj plaws. Yog li ntawd, tseev kom kuv txhob tsa tuskheej siabsiab, kuv mag ib tug pos sab nqaijtawv, li Xatas tus timtswv, kom nws tsimtxom kuv thiab kuv txhob tsa tuskheej. 8 Hais txog qhov no, kuv tau hu txog tus Tswv peb zaug kom Nws muab tshem ntawm kuv, 9 mas Nws tau hais rau kuv tias, “Kuv li vajhmoov txaus rau koj, rauqhov kuv lub hwjchim raug ua tiav hauv kev tsaugmuas.” Yog li ntawd, kuv yuav txaussiab hlo khav hauv kuv tej kev tsaugmuas kom Khetos lub hwjchim yuav txawm ruaj saum kuv. 10 Kuv txaussiab raug kev tsaugmuas, kev raug ntaus, kev tuncua, kev tsimtxom, thiab teebmeem this Khetos. Rauqhov thaum kev tsaugmuas, ces kuv muaj zog.

11 Kuv twb dhau ua tus ruam, vim nej twb cab kuv ntag. Kuv tsimnyog raug nej txheem, txawm kuv tsis muaj nqis dabtsi, los kuv tsis tau poob qis dua cov timthawj ntonpe. 12 Lub cim ntawm tus timthawj--xws li tej cim, tej txujci txawvtxawv thiab tej hwjchim--tau raug ua hauv nej ntev loo. 13 Es vim dabtsi lossis nej ho swb lwm pawgntseeg li cas? Tshwj tias kuv tsis tau ua nra hnyav rau nej xwb! Zam txojkev tsis ncaj no rau kuv os!

14 Nimno kuv npaj txhij tuaj cuag nej zaum peb, thiab kuv yuav tsis ua nra rau nej, rauqhov kuv tsis ntshaw nej tug tabsis nej tuskheej. Rauqhov nws tsis tsimnyog rau tej menyuam ntim nyiaj qabnas tseg rau tej niamtxiv, tsuas yog rau tej niamtxiv ntim tseg rau tej menyuam. 15 Kuv txaussiab hlo pheev txhua yam thiab duarhe tuskheej this nej txojsia. Yog kuv hlub nej heev tshaj, nej ho yuav hlub kuv tsawg tshaj lod? 16 Puam chawj mas, kuv yuav tsis ua nra rau nej, tiamsis kuv twb ntxias tau nej saum kev ntse lawm! 17 Kuv tsis tau xa neeg tuaj muab nej dabtsi lossis ntaim nej los ntawm ib tug twg pod? 18 Kuv tau nquahu Titus thiab tau xa ib tug kwvtij nrog nws tuaj. Titus tsis tau ntaim nej dabtsi pod? Peb tsis tau uaneej hauv tib tug Ntsujplig thiab taug tib txojkev lod?

19 Nws zoo li tej qub lus, uas peb sij daws peb zaj xwb. Tabsis peb hais lus hauv Khetos ntawm Vajtswv Ntuj xubntiag. Cov kuv hlub, peb ua txhua yam rau nej kev lojhlob. 20 Rauqhov kuv ntshai tsam thaum kuv tuaj txog, kuv yuav ntsib nej tsis thooj li kuv xav thiab nej yuav ntsib kuv tsis thooj li nej xav: Tsam muaj kev sibceg, kev sibkhib, kev npautaws, kev twmxeeb, kev nkawg xaiv, kev xyav moo, kev khavtheeb, thiab kev kubntxov. 21 Tsam thaum kuv tuaj, kuv tus Vajtswv yuav txo kuv rau ntawm nej xubntiag, es kuv yuav quajntsuag rau cov uas tau xub ua txhaum tabsis tsis tau thimxav tawm ntawm tej kev qias, kev vuabtsuab, thiab kev liam uas lawv tau ua.

1 Kuv yuav tuaj cuag nej zaum peb no, mas: “Txhua zaj lus yuavtsum sawv rau saum ob lossis peb tug povthawj lub ncauj.” 2 Kuv twb hais thaum kuv tuaj zaum ob lawm, thiab kuv hais uantej, thaum tseem nyob deb tias: Yog kuv rovtuaj, kuv yuav tsis zam rau cov tau ua txhaum nramntej thiab lwm cov tibsi, 3 vim nej nrhiav puavpheej tias Khetos hais lus tawm hauv kuv. Nws tsis tsaugmuas nrog nej sibhais tabsis Nws muaj hwjchim hauv nej. 4 Rauqhov txawm Nws raug ntsia saum khaublig los ntawm kev tsaugmuas, Nws tau muajsia los ntawm Vajtswv Ntuj lub hwjchim. Ib yam li ntawd, txawm peb tsaugmuas hauv Nws, peb yuav muajsia nrog Nws, los ntawm Vajtswv Ntuj lub hwjchim, tuaj rau ntawm nej.

5 Sojntsuam tuskheej seb nej puas nyob saum kev ntseeg; ceem tuskheej! Lossis nej tuskheej tsis paub tias Yexus Khetos nyob hauv nej? Tsis li mas nej yog cov uas tau poob kev ceem lawm. 6 Kuv ciasiab tias nej yuav paub tseeb tias peb tsis yog cov uas ceem tsis tiav. 7 Peb thov tibzoo rau Vajtswv Ntuj kom nej ib tug twg txhob ua dabtsi phem. Tsis yog kom peb raug pom ua cov uas tau raug ceem zoo lawm, tabsis kom nej ua qhov zoo, txawm peb ho dhau ua li cov uas raug ceem tsis tiav. 8 Rauqhov peb tsis muaj peevxwm ua dabtsi tawmtsam qhov tseeb, tsuas this qhov tseeb xwb. 9 Peb zoo siab thaum peb tsaugmuas es nej dhau ua cov muaj peevxwm. Peb kuj thov tibzoo txog qhov no tias kom nej txojkev zoo tiav. 10 Vim li no, kuv thiaj sau tej no thaum tseem nyob deb, kom thaum kuv tuaj txog, kuv txhob tau siv tswjchim hnyav, xws li lub tswjchim uas tus Tswv tau muab rau kuv ua kev txhawb nej, tsis ua kev txo nej.

11 Thaum kawg no, cov kwvtij, zoo siab. Ua kev zoo kom tiav, sibtxhawb zog, xav sibthooj, nyob thajyeeb lug. Tus Vajtswv Ntuj kev hlub thiab kev thajyeeb yuav nyob nrog nej. 12 Ibleeg hais kev nojqab nyobzoo rau ibleeg saum kev sibqawg dawbhuv. 13 Cov dawbhuv sawvdaws xa kev nyobzoo rau nej.

14 Vajhmoov ntawm tus Tswv Yexus Khetos thiab kev hlub ntawm Vajtswv Ntuj, thiab kev koomxeeb ntawm tus Ntsujplig Dawbhuv nyob nrog nej sawvdaws.