1 Paulus, tus raug hu los ua Yexus Khetos tus timthawj raws Vajtswv Ntuj tus dejsiab, thiab tus kwv Xauthenes,

2 Xa rau Vajtswv Ntuj pawgntseeg uas nyob hauv Kaulithaus, cov twb raug ntxuav dawbhuv hauv Khetos Yexus thiab tau raug hu ua cov dawbhuv, nrog rau txhua leej nyob txhua qhov uas hu txog peb tus Tswv Yexus Khetos lub npe ua lawv tus Tswv thiab peb tus Tswv.

3 Vajhmoov thiab kev thajyeeb ntawm peb Txiv Vajtswv Ntuj thiab Tswv Yexus Khetos rau nej.

4 Kuv ua kuv tus Vajtswv Ntuj tsaug rau nej nraim txog Vajtswv Ntuj qhov vajhmoov uas tau raug muab rau nej hauv Khetos Yexus, 5 vim nej tau npluanuj txhua fab hauv Nws, saum txhua txojkev hais lus thiab txhua txojkev paub, 6 raws nraim li Khetos qhov timkhawv uas tau peemtsheej hauv nej. 7 Yog li ntawd, nej tsis tuncua ib yam koobhmoov ntsujplig dabtsi sijhawm nej tseem tos kev nthuav peb tus Tswv Yexus Khetos, 8 tus uas yuav ceev nej mus txog thaum kawg, kom nej raug thuam tsis tau hauv peb tus Tswv Yexus Khetos hnub. 9 Vajtswv Ntuj ncajncees; los ntawm Nws nej tau raug hu los rau txojkev koomxeeb nrog Nws tus Tub Yexus Khetos, peb tus Tswv.

10 Kuv nquahu nej, cov kwvtij, los ntawm peb tus Tswv Yexus Khetos lub npe, kom nej sawvdaws hais haum rau ib qhov thiab txhob muaj tej kev sibtawg hauv nej, thiab kom nej yov koom tib txojkev xav thiab tib lub homphiaj. 11 Rauqhov kuv cov kwvtij, kuv tau paub meej txog nej los ntawm Khaules tsevneeg tias muaj kev sibcav hauv nej. 12 Kuv hais li no, rauqhov nej nyias hais nyias tias, “Kuv yog Paulus li,” lossis “Kuv yog Apaulaus li,” lossis “Kuv yog Kefas li,” lossis “Kuv yog Khetos li.”

13 Es Khetos raug faib lod? Paulus tsis tau raug ntsia saum khaublig this nej lossis nej tau rausdej hauv Paulus lub npe sad? 14 Kuv ua Vajtswv Ntuj tsaug tias kuv tsis tau muab nej leejtwg rausdej, tshwj Khixapus thiab Nkaius, 15 kom nej leejtwg hais tsis tau tias nej tau rausdej hauv kuv lub npe. 16 Kuv kuj tau muab Xatefanas tsevneeg rausdej lawm, tabsis dhau ntawd kuv tsis paub xyov kuv puas tau muab lwm tus rausdej. 17 Vim Khetos tsis tau xa kuv tuaj muab neeg rausdej tabsis tuaj tshajtawm txojmoo zoo, tsis los ntawm tej lus ntse ntsuav kom Khetos tus khaublig raug rhuav.

18 Rauqhov zaj lus txog tus khaublig yog kev ruam rau cov yuav puastsuaj, tabsis nws yog Vajtswv Ntuj lub hwjchim rau peb cov raug cawm. 19 Vim nws twb raug sau tias:

20 Tus muaj tswvyim nyob qhovtwg? Tus tubtxawg nyob qhovtwg? Tus neeg txawj sibcav tiam no nyob qhovtwg? Vajtswv Ntuj tsis tau muab lub cejntug txojkev txawjntse ntxeev ua kev ruam lod? 21 Vim saum Vajtswv Ntuj kev txawjntse lub cejntug tsis tau paub Vajtswv Ntuj los ntawm kev txawjntse, Nws tau raug siab cawm cov ntseeg los ntawm kev tshajtawm txojkev ruam. 22 Txawm cov Yudais taij tej cim thiab cov Kilis nrhiav kev txawjntse, 23 tabsis peb tshajtawm Khetos, tus twb raug ntsia saum khaublig, uas yog kev dawm ntog rau cov Yudais thiab kev ruam rau pejkum neeg. 24 Rau cov raug hu, tsis hais neeg Yudais lossis Kilis, Khetos yog Vajtswv Ntuj lub hwjchim thiab Vajtswv Ntuj kev txawjntse, 25 rauqhov Vajtswv Ntuj txojkev ruam tseem ntse dua neeg txojkev ntse thiab Vajtswv Ntuj kev tsaugmuas khov dua neeg lub zog nchav.

26 Yog li ntawd, saib nej kev raug hu, cov kwvtij, vim nej coob leej tsis yog neeg txawjntse sab nqaijtawv, coob tus tsis yog neeg muaj hwjchim, thiab coob tus tsis tau yug rau tsevneeg nto npe. 27 Vajtswv Ntuj tau xaiv cov ruam hauv lub cejntug kom Nws yov txo cov neeg txawjntse; thiab Vajtswv Ntuj tau xaiv cov neeg tsaugmuas hauv lub cejntug kom Nws yov txo cov neeg muaj zog, 28 thiab Vajtswv Ntuj tau xaiv tej menyuam neeg thiab tej tsis tuav meejmom hauv lub cejntug, tej uas tsis tsheejhaj, kom Nws yov rhuav cov tsheejhaj 29 thiab kom tagnrho nqaijtawv yov khav tsis tau rau ntawm Vajtswv Ntuj xubntiag. 30 Vimchij qhov no, nej thiaj nyob hauv Khetos Yexus, tus uas tau tshwmsim ua peb kev txawjntse tawm ntawm Vajtswv Ntuj, xws li yog peb kev ncajncees, kev dawbhuv thiab kev txhiv; 31 kom raws li nws twb raug sau tseg tias, “Tus khav, cia nws khav hauv tus Tswv.”

1 Cov kwvtij, thaum kuv tuaj ntawm nej, xws li thaum kuv tau tshajtawm Vajtswv Ntuj qhov mixatawlis rau nej, kuv tsis tau tuaj li tus txawjlus lossis txawjntse. 2 Rauqhov kuv tau txiavsiab ua tus tsis paub dabtsi, tshwj Yexus Khetos, tus twb raug ntsia saum khaublig. 3 Kuv tau tuaj li tus muaj kev tsaugmuas, kev ntshai, thiab kev tshee nruab nrab nej. 4 Kuv kev hais lus thiab kev tshajtawm tsis yog tej lus ntse ntsuav thiab txaus ntseeg tabsis yog tej lus nthuav ntawm tus Ntsujplig thiab hwjchim, 5 kom nej kev ntseeg txhob txawm rau saum neeg kev txawjntse tabsis rau saum Vajtswv Ntuj lub hwjchim.

6 Peb ho tham kev txawjntse nrog tej neeg paubtab, tabsis tsis yog kev txawjntse tiam no lossis hauv cov kav tiam no, xws li cov samsim puastsuaj; 7 tabsis peb tham txog Vajtswv Ntuj kev txawjntse raug zais hauv mixatawlis, uas Vajtswv Ntuj tau npaj uantej txhua tiam los ua peb lub tshwjchim. 8 Tsis muaj ib tug thawj hauv tiam no tau paub txog nws li. Vim tias yog lawv tau paub lawm, lawv yeej tsis tau muab tus Tswv saum tshwjchim ntsia saum khaublig. 9 Tabsis kom raws li nws twb raug sau tseg tias:

10 Tabsis Vajtswv Ntuj tau muab nthuav rau peb pom los ntawm tus Ntsujplig; vim tus Ntsujplig tshawb txhua yam, txawm tej uas nyob tobtob hauv Vajtswv Ntuj tuskheej. 11 Rauqhov leejtwg paub txog neeg thiab tej nyob hauv neeg, tshwj neeg tus ntsujplig uas nyob hauv nws. Ibyam li ntawd, tsis muaj leejtwg paub tej nyob hauv Vajtswv Ntuj, tshwj Vajtswv Ntsujplig. 12 Peb tsis tau txais tus ntsujplig hauv lub cejntug, tabsis tus Ntsujplig tawm ntawm Vajtswv Ntuj, kom peb paub tej vajhmoov uas raug nchuav ntawm Vajtswv Ntuj los rau peb. 13 Peb tham txog tej lus uas tsis yog neeg txawjntse qhia tabsis yog tus Ntsujplig qhia; peb muab tej lus ntawm tus Ntsujplig txhais rau cov neeg sab ntsujplig. 14 Tus neeg sab nqaijtawv tsis txais tej uas yog Vajtswv Ntsujplig li, rauqhov tej ntawd yog kev ruam rau nws thiab nws tsis muaj peevxwm paub txog, vim tej ntawd tsuas raug tshawb tau hauv sab ntsujplig. 15 Tabsis tus neeg sab ntsujplig ntsuas tau txhua yam, txawm li ntawd los, tsis muaj leejtwg ntsuas tau nws:

1 Tabsis cov kwvtij, kuv tsis muaj peevxwm nrog nej tham li cov sab ntsujplig, tsuas li cov sab nqaijtawv, li cov menyuam yaus hauv Khetos xwb. 2 Kuv tsuas muab mis rau nej haus, muab tsis tau zaubmov, rauqhov nej tsis muaj peevxwm. Txawm nimno los nej tsis muaj peevxwm qees, 3 vim nej tseem yog neeg sab nqaijtawv! Thaum tseem muaj kev sibkhib thiab kev sibcav nruab nrab nej, nej tsis yog nqaijtawv thiab uaneej raws neeg xwb lod? 4 Rauqhov thaum nej ib tug hais tias, “Kuv nrog Paulus” thiab dua ib tug hais tias, “Kuv nrog Apaulaus,” nej tsis ua li neeg lod?

5 Ces Apaulaus yog leejtwg? Thiab Paulus ho yog leejtwg? Nkawv yog ob tug ncignum, uas vim nkawv nej tau ntseeg; nkawv nyias ua haujlwm raws nraim li tus Tswv tau muab rau nkawv. 6 Kuv tau cog thiab Apaulaus tau ywg, tabsis Vajtswv Ntuj tau ua kom hlob. 7 Yog li no, tus cog tsis yog leejtwg, tus ywg tsis yog leejtwg, tabsis Vajtswv Ntuj yog tus ua kom hlob. 8 Tus cog thiab tus ywg yog tib tug, nyias yuav txais nyias lub nqizog raws li nyias lub txiv zoo, 9 rauqhov peb puavleej yog cov koom haujlwm rau Vajtswv, tabsis nej yog Vajtswv Ntuj daim teb, Vajtswv Ntuj lub tsev ntxoovnyos.

10 Los ntawm Vajtswv Ntuj vajhmoov uas tau raug muab rau kuv, kuv twb tsa lub plag tsev li tus kws ua tsev, thiab lwm tus tau txhim rau; tabsis nyias yuavtsum xyuamxim seb nws ua li cas. 11 Rauqhov tsis muaj leejtwg muaj peevxwm tsa dua lwm lub plag tsev dhau lub twb raug tsa lawm, uas yog Yexus Khetos. 12 Tabsis yog leejtwg muab kub, nyiaj, qe zeb, ntoo, nqeeb lossis quavnyab los tsa rau saum lub plag tsev, 13 nws tes haujlwm yuav raug nthuav tawm vim hnub ntawd yuav nthuav nws tawm. Nws yuav raug nthuav hauv hluavtaws, thiab hluavtaws yuav hlawv txhua leej tes haujlwm. 14 Yog leejtwg tes haujlwm tsis kubhnyiab, nws yuav tau nqizog. 15 Yog leejtwg tes haujlwm raug kubhnyiab tag, nws yuav poob peev, tabsis nws tuskheej yuav dim ibyam li tus dim hauv hluavtaws los.

16 Nej tsis paub tias nej yog Vajtswv Ntuj lub tuamtsev thiab Vajtswv tus Ntsujplig nyob hauv nej lod? 17 Yog leejtwg rhuav Vajtswv Ntuj lub tuamtsev, Vajtswv Ntuj yuav rhuav tus ntawd, rauqhov Vajtswv Ntuj lub tuamtsev dawbhuv. Nej kuj yog lub tuamtsev ntawd.

18 Txhob dag nej tuskheej! Yog leejtwg xav ua tus ntse nruab nrab nej hauv tiam no, cia nws ua tus ruam kom nws yuav dhau ua tus ntse. 19 Rauqhov kev ntse hauv lub cejntug no yog kev ruam rau ntawm Vajtswv Ntuj, vim nws twb raug sau tseg tias, “Nws yog tus ntes cov neeg ntse hauv lawv tej tswvyim.” 20 Thiab twb hais dua tias, “Tus Tswv paub tias cov neeg ntse tej kev xav tsis tsheejhaj.”

21 Yog li ntawd, cia peb txhob khav txog neeg! Vim tias txhua yam yog nej tug, 22 tsis hais Paulus, Apaulaus, Kefas, lub cejntug, txojsia, kev tuag, tej muaj nyob, thiab tej tseem yuav los. Txhua yam yog nej tug, 23 nej ho yog Khetos tug, thiab Khetos yog Vajtswv Ntuj tug.

1 Yog li ntawd, cia neeg xav txog peb ibyam li peb yog Khetos cov tubtxib thiab yog cov saibxyuas Vajtswv Ntuj tej mixatawlis. 2 Tshaj li ntawd, luag yuav taug cov saibxyuas luag khoom tias leejtwg yog tus ncajncees. 3 Tabsis rau kuv, nws yog ib qhov meme tias kuv yov raug nej lossis tiam neeg no txiavtxim. Kuv twb tsis txiavtxim rau tuskheej. 4 Rauqhov kuv kev totaub tuskheej tsis muaj dabtsi, tabsis kuv tuskheej tsis tau raug xam ncajncees hauv qhov no. Tus Tswv yog tus txiavtxim rau kuv. 5 Yog li ntawd, txhob txiavtxim rau dabtsi uantej sijhawm, tos mus txog thaum tus Tswv los. Nws yuav kabteeb rau tej uas nraim hauv qhov tsausntuj thiab yuav nthuav tej kev xav hauv siab. Ces thaum ntawd Vajtswv Ntuj yuav muab nyias lolus qhuas rau nyias.

6 Tabsis tej no, cov kwvtij, yog kuv muab kuv thiab Apaulaus los ua qauv rau nej kom nej xyaum lolus, “Txhob mus dhau qhov uas tau raug sau tseg.” Nej thiaj tsis qhuas ibleeg tshaj ibleeg, es mus txo lwm tus. 7 Rauqhov leejtwg txiavtxim tias koj txawv? Koj muaj dabtsi uas tsis yog koj tau txais los? Thiab yog koj tau txais lawm, ua cas koj ho khav yam li tsis yog koj tau txais los?

8 Nimno nej twb muaj txaus lawm! Nimno nej twb npluanuj lawm thiab twb dhau ua vajntxwv, tseg peb! Kuv ntshaw kom nej tau ua vajntxwv kom peb ho tau ua vajntxwv nrog nej thiab. 9 Vim kuv saib mas, Vajtswv Ntuj tau muab peb cov timthawj nthuav li tej neeg uas yuav raug tua thaum kawg. Peb tuskheej tshwm ua yeebyam rau lub cejntug, rau timtswv thiab neeg. 10 Peb yog cov ruam vim Khetos, tabsis nej yog cov ntse hauv Khetos; peb yog cov tsaugmuas tabsis nej yog cov muaj zog; peb yog cov poob npe tabsis nej yog cov nto npe. 11 Los txog rau sijhawm no peb tseem tshaib thiab nqhis, hnav khaub, raug ntaus, tsis muaj chaw nkaum, 12 khwv thiab ua haujlwm nrog peb txhais tes. Thaum raug lus tsawm, peb foom koobhmoov; thaum raug luag tsimtxom, peb uatiag nyiaj; 13 thaum raug liam, peb nplig siab. Peb tau dhau zoo li lub cejntug tej khoom liam, li sawvdaws tej khoom povtseg los txog yijceeb no.

14 Kuv sau tej no tsis yog rhuav nej tabsis yog ntuas nej li tej menyuam uas kuv hlub. 15 Rauqhov txawm nej muaj qas txhiab tus xibfwb hauv Khetos los nej tsis muaj coob leej txiv; vim hauv Yexus Khetos kuv tau dhau ua nej txiv saum txojmoo zoo. 16 Yog li ntawd, kuv nquahu nej: Ua cov yoog kuv. 17 Vim li no, kuv thiaj tau xa Timautes tuaj cuag nej. Nws yog kuv tus tub hlub thiab ncajncees hauv tus Tswv. Nws yuav qhia nej nco txog kuv tej kev coj hauv Khetos Yexus, ibyam li kuv qhia txhua qhov huv txhua pawgntseeg.

18 Qee leej tau khav yam li kuv yuav tsis tuaj cuag nej. 19 Tabsis kuv yuav tuaj cuag nej saisai, yog tus Tswv raug siab, thiab kuv yuav paub tias cov neeg khav ntawd hais dabtsi thiab muaj hwjchim npaum cas. 20 Vim tias Vajtswv Ntuj lub tswvkuj tsis yog lus tham tabsis yog hwjchim. 21 Nej xav tau dabtsi? Kuv tuaj nrog tus nplawm lossis nrog tus ntsujplig kev hlub thiab kev mosmuag?

1 Xovxwm tau ncha tias muaj kev vuabtsuab hauv nej, thiab txojkev vuabtsuab no twb tsis muaj hauv pejkum neeg: Xws li, ib tug txivneej yuav nws txiv tus pojniam. 2 Es nej twb tseem khav thiab! Twb ntxim nej quaj tusiab thiab muab tus uas tau ua qhov no rho tawm hauv nej sad? 3 Rauqhov txawm kuv nrug deb ntawm lub cev los kuv tus ntsujplig nyob ze; kuv twb txiavtxim rau tus uas tau ua txhaum no ibyam li kuv nrog nej nyob. 4 Thaum nej tuaj txoos uake ntawm tus Tswv Yexus lub npe thiab ntawm peb tus Tswv Yexus lub hwjchim, kuv tus ntsujplig kuj nrog nej nyob, 5 muab tus neeg no rau Xatas tsimtxom kom nws sab nqaijtawv tuag, tabsis kom nws tus ntsujplig yuav dim rau hnub peb tus Tswv los.

6 Nej txojkev khav tsis zoo! Nej tsis paub tias ib qhov keeb meme ua rau tsu mov qab thoob plaws lod? 7 Ntxuav qhov keeb qub kom nej dhau ua tsu mov tshiab, ibyam li nej yeej yog cov mov tsis muaj keeb. Vim tias Khetos, peb tus yaj hladhau, twb raug tua fij lawm. 8 Yog li ntawd, cia peb ceev lub koobtsheej tsis xyaw keeb, xws li tsis xyaw kev qias thiab vuabtsuab qub, tabsis ua mov tsis xyaw keeb, uas muaj kev pheejxeeb thiab kev tseeb.

9 Kuv tau sau rau nej hauv kuv tsab ntawv kom txhob koom nrog cov neeg vuabtsuab. 10 Qhov ntawd tsis yog tag nrho tej neeg vuabtsuab hauv lub cejntug lossis tej neeg vumloj, tubsab, lossis pe mlom! Yog li tiag mas nej pujsis yuavtsum tawm hauv lub cejntug. 11 Tabsis nimno kuv sau rau nej kom txhob koom nrog tus hu tuskheej ua kwvtij ntseeg tabsis ho yog tus neeg vuabtsuab, vumloj, pe mlom, tsiv tsaim, quav cawv, lossis ua tubsab. Ntsig txog tus zoo li no, txhob noj nrog nws!

12 Vim tus dabtsi kuv lam txiavtxim rau cov sab nraud? Nej tsis txiavtxim rau cov sab hauv lod? 13 Vajtswv Ntuj yuav txiavtxim rau cov sab nraud. Muab tus neeg phem rho tawm hauv nej!

1 Thaum muaj kev covnyom nrog lwm tus, nej leejtwg muaj plhus mus nrhiav kev txiavtxim ntawm tej neeg tsis ncaj thiab ho tsis mus rau ntawm cov dawbhuv? 2 Lossis nej tsis paub tias cov dawbhuv yuav txiavtxim rau lub cejntug? Thiab yog nej yuav txiavtxim rau lub cejntug, nej kuj txiavtxim taus rau tej yam meme pod? 3 Nej tsis paub tias peb yuav txiavtxim rau cov timtswv lod? Es tej meme hauv lub neej no ne? 4 Yog li ntawd, thaum nej muaj tej plaubntug hauv lub neej no, nej ho tsa cov neeg sab nraud, uas muaj lub neej raug thuam hauv pawgntseeg, tuaj hais? 5 Kuv hais kom nej txajmuag! Nruab nrab nej txawm tsis muaj ib tug neeg ntse, uas muaj peevxwm txiavtxim rau ob tug kwvtij li? 6 Tabsis kwvtij ho kom kwvtij thiab tseem coj mus rau cov tsis ntseeg?

7 Qhov tseeb ces nej twb swb lawm vim nej muaj kev plaubntug nruab nrab nej. Ua li cas tsis cia txojkev tsis ncaj raug nej xwb? Ua li cas tsis cia nej raug luag dag? 8 Tabsis nej ho ua tsis ncaj thiab dag rau yus cov kwvtij thiab!

9 Lossis nej tsis paub tias cov tsis ncajncees yuav tsis saws Vajtswv Ntuj lub tswvkuj lod? Txhob plaskev. Neeg vuabtsuab, neeg pe mlom, neeg deev luag txijnkawm, tej txivneej cia lwm tus txivneej nce, tej txivneej nce txivneej, 10 neeg tubsab, neeg vumloj, neeg quav cawv, neeg tsiv tsaim, lossis neeg huab luag tug puavleej yuav tsis saws Vajtswv Ntuj lub tswvkuj. 11 Nram ntej nej ibtxhia tau ua li ntawd, tabsis nej tau raug ntxuav, tau raug ntxuav dawbhuv, tau raug xam ncajncees hauv tus Tswv Yexus Khetos lub npe thiab los ntawm peb Vajtswv Ntuj tus Ntsujplig.

12 Txhua yam raug cai rau kuv ua tabsis tsis yog txhua yam muaj nqis. Txhua yam raug cai rau kuv ua tabsis kuv tsis raug dabtsi kav. 13 Khoom noj yog ntim rau lub plab thiab lub plab yog ntim khoom noj, tabsis Vajtswv Ntuj yuav muab lub plab thiab khoom noj rhuav tibsi. Lub cev tsis yog rau kev vuabtsuab, tabsis yog rau tus Tswv, thiab tus Tswv yog rau lub cev. 14 Los ntawm Nws lub hwjchim, Vajtswv Ntuj tau tsa tus Tswv sawv  thiab Nws kuj yuav tsa peb sawv ibyam. 15 Nej tsis paub tias nej tej cev yog Khetos li testaw lod? Ces kuv yuav muab Khetos li testaw mus ua tus niamntiav testaw? Tsis lam yog li! 16 Lossis nej tsis paub tias tus uas koom niamntiav twb nrog niamntiav ua ib lub cev lod? Rauqhov twb hais tseg tias, “Ob leeg yuav dhau ua ib lub cev.” 17 Tabsis tus koom nrog tus Tswv yuav ua ib tug nrog Nws ntawm ntsujplig.

18 Khiav ntawm kev vuabtsuab! Txhua txojkev txhaum uas neeg ua nyob lub cev sab nraud, tabsis tus uas ua kev vuabtsuab ua txhaum rau nws lub cev. 19 Lossis nej tsis paub tias nej lub cev yog tus Ntsujplig Dawbhuv, uas nej tau txais ntawm Vajtswv Ntuj, lub tuamtsev, es nej tsis yog nej tug lawm lod? 20 Rauqhov nej raug muas kim heev. Qhuas Vajtswv Ntuj los ntawm nej lub cev!

1 Ntsig txog tej uas nej tau sau tuaj: “Nws zoo dua rau ib tug txivneej yog nws tsis chwv pojniam.” 2 Tabsis vim kev vuabtsuab ntau heev, cia txhua tus txivneej nyias muaj nyias pojniam thiab txhua tus pojniam nyias muaj nyias tus txiv. 3 Cia tus txiv muab kev txijnkawm rau nws tus pojniam thiab, ibyam li ntawd, cia tus pojniam muab kev txijnkawm rau nws tus txiv. 4 Tus niam tsis muaj tswjchim rau saum nws lub cev, tsuas yog tus txiv xwb; thiab ibyam li ntawd, tus txiv tsis muaj tswjchim rau saum nws lub cev, tsuas yog nws tus pojniam. 5 Ibleeg txhob nyiag ibleeg tug, tshwj sijhawm ob leeg hais haum kom neb yov thov Vajtswv Ntuj xwb; tomqab ntawd neb yuav los uake dua, kom Xatas txhob ntxias neb vim neb tuncua kev tswj tuskheej. 6 Kuv hais li no raws kev sibzam, tsis hais raws kev tawmcai. 7 Txawm kuv xav kom txhua tus txivneej dhau ua tus zoo li kuv, los nyias txais nyias koobhmoov ntawm Vajtswv Ntuj: Ib tug txais li no, ib tug txais li tod.

8 Tabsis kuv hais rau cov tsis muaj txijnkawm thiab cov tsuag txijnkawm, nws zoo rau lawv dua yog lawv nyob yam li kuv. 9 Tabsis yog lawv tswj tsis tau tuskheej, cia lawv yuav txijnkawm, vim tias kev yuav txijnkawm zoo tshaj li kev raug hlawv nruab nrog.

10 Kuv nquahu rau cov muaj txijnkawm, tsis yog kuv tabsis yog tus Tswv, tias: Tus pojniam txhob khiav nws tus txiv, 11 thiab yog nws khiav, nyob li tus tsis muaj txiv lossis cia nws rov haumxeeb rau nws tus txiv. Thiab tus txiv, txhob nrauj nws tus pojniam.

12 Hos rau lwm tus, kuv hais rau nej (tsis yog tus Tswv hais) li no tias: Yog cov kwvtij leejtwg muaj tus pojniam tsis ntseeg thiab nws tus pojniam yeem nrog nws nyob uake, ces txhob muab tus pojniam nrauj. 13 Thiab cov pojniam leejtwg muaj tus txiv tsis ntseeg thiab nws tus txiv yeem nrog nws nyob uake, ces txhob muab tus txiv nrauj. 14 Rauqhov tus txiv tsis ntseeg tau raug ntxuav dawbhuv hauv tus pojniam thiab tus pojniam tsis ntseeg tau raug ntxuav dawbhuv hauv tus kwvtij ntseeg. Tsis li ces neb tej menyuam yuav qias, tabsis li nimno mas lawv dawbhuv.

15 Tabsis yog tus tsis ntseeg yuav tawm, tso nws tawm. Tus kwvtij lossis tus muam ntseeg yuav tsis raug ua qhev rau tej kev txijnkawm li no, vim tias Vajtswv Ntuj twb hu peb los rau kev thajyeeb. 16 Rauqhov tus pojniam, koj puas paub tias tej zaum koj yuav cawm koj tus txiv? Lossis tus txiv, koj puas paub tias tej zaum koj yuav cawm koj tus pojniam?

17 Tshwj tus uas tus Tswv tau muab lub neej tshiab rau nws, cia nyias uaneej ibyam li thaum Vajtswv Ntuj tau hu nyias ntawd. Kuv kuj tau tawmcai li no rau txhua pawgntseeg. 18 Yog leejtwg tau raug hu thaum nws twb txiavtawv lawm, cia nws txhob txuas tawv rau; yog leejtwg tau raug hu tsis txiavtawv, cia nws txhob txiavtawv. 19 Kev txiavtawv tsis tseemceeb thiab kev tsis txiavtawv tsis tseemceeb, tabsis qhov tseemceeb yog kev ceev Vajtswv Ntuj tej kevcai. 20 Cia nyias nyob nyias li thaum nws tau raug hu. 21 Yog koj tau raug hu thaum yog qhev, txhob cia qhov ntawd ntxhov koj lub siab, tabsis yog koj muaj peevxwm dhau ua tus ywjpheej, tso tuskheej ywjpheej zoo dua. 22 Rauqhov nyob ntawm tus Tswv, mas tus tau raug hu thaum tseem tau ua qhev kuj yog neeg ywjpheej rau tus Tswv thiab tus tau raug hu thaum ywjpheej kuj yog Khetos li qhev. 23 Nej tau raug muas kim heev. Txhob dhau ua neeg qhev. 24 Cov kwvtij, cia nyias nyob rau Vajtswv Ntuj li qhov thaum nyias tau raug hu.

25 Ntsig txog cov nkaujxwb, kuv tsis muaj lus tawmcai ntawm tus Tswv, tabsis kuv muab tswvyim li ib tug uas twb raug tus Tswv tabncuab mus ua tus txaus ntseeg. 26 Yog li ntawd, kuv xav tias nws zoo dua rau ib tug txivneej nyob tuskheej li ntawd vim qhov teebmeem niajhnub no. 27 Yog koj raug qhaib rau ib tug pojniam, txhob nrhiav kev ywjpheej; yog koj raug ib tug pojniam tso ywjpheej lawm, txhob nrhiav lwm tus pojniam. 28 Tabsis yog koj yuav pojniam, koj tsis tau ua txhaum dabtsi; thiab yog tus nkaujxwb yuav txiv, nws tsis tau ua txhaum dabtsi. Txawm li ntawd, cov muaj txijnkawm yuav raug teebmeem ntawm nqaijtawv, mas kuv tsis xav cia nej raug.

29 Kuv txhais li no, cov kwvtij, sijhawm twb raug txiav luv lawm. Txij no mus, kom cov muaj pojniam nyob li tej tsis muaj; 30 cov quaj nyob li tej tsis quaj; cov zoo siab nyob li tej tsis zoo siab; cov muaj teejtug nyob li tej tsis muaj dabtsi; 31 thiab cov siv lub cejntug nyob li tej tsis tau siv dua; vim tias lub cejntug no samsim dua zujzus mus.

32 Kuv xav kom nej ua neeg tsis txhawj. Tus tsis muaj txijnkawm tsuas txhawj txog tus Tswv tug: Yuav ua li cas thiaj raug tus Tswv siab. 33 Tabsis tus muaj txijnkawm txhawj txog tej hauv lub cejntug: Yuav ua li cas thiaj raug tus pojniam siab, 34 ces nws twb raug faib lawm. Tus pojniam tsis muaj txiv thiab tus nkaujxwb tsuas txhawj txog tus Tswv tug kom nws ua tus dawbhuv ntawm lub cev thiab ntsujplig tibsi. Tabsis tus pojniam muaj txiv txhawj txog tej hauv lub cejntug: Yuav ua li cas thiaj raug tus txiv siab. 35 Kuv hais li no kom zoo rau nej tuskheej, tsis yog kuv muab nej samxauv, tabsis kom nej tau kev zoo thiab kev teev tus Tswv, tsis muaj dabtsi tabkaum.

36 Tabsis yog leejtwg xav tias qhov no tsis zoo rau tus nkaujxwb uas nws qhaib, yog tus ntxhais nto hnub nyoog lawm thiab nws yuavtsum ua li no, cia nws ua li nws npaj. Nws tsis ua txhaum. Cia nkawv sibyuav. 37 Tabsis tus uas twb ruajsiab hauv nws lub siab, tsis muaj dabtsi yuam tabsis nws muaj tswjchim rau saum nws tus dejsiab, thiab twb txiavsiab cia nws tus hluas nkauj ua nkaujxwb mus li, los nws kuj ua zoo. 38 Yog li ntawd, tus uas yuav tus nkaujxwb yeej ua zoo lawm, tabsis tus uas tsis yuav nws tus nkaujxwb ua zoo tshaj.

39 Tus pojniam raug khi saum kevcai sijhawm nws tus txiv muajsia, tabsis yog nws tus txiv tuag, nws muaj kev ywjpheej yuav dua lwm tus txiv uas nws ntshaw, tsuav yog tus ntseeg hauv tus Tswv xwb. 40 Tabsis nws yuav kajsiab dua yog nws ua pojntsuam nyob, raws li kuv paub, thiab kuv xav tias kuv muaj Vajtswv Ntuj tus Ntsujplig.

1 Ntsig txog nqaij fij rau mlom, peb twb paub tias “Peb txhua leej muaj kev paub.” Kev paub khav txiv tabsis kev hlub txhawbzog ntxiv. 2 Yog leejtwg xav tias nws paub ib yam dabtsi, nws tseem tsis tau paub li nws cheemtsum paub. 3 Tabsis yog leejtwg hlub Vajtswv Ntuj, nws kuj raug Vajtswv Ntuj paub.

4 Yog li ntawd, ntsig txog kev noj nqaij fij rau mlom, peb twb paub tias “Mlom tsis yog dabtsi hauv lub cejntug no” thiab tias “Tsis muaj lwm tus vajtswv, tsuas muaj tib tug Vajtswv Ntuj xwb.” 5 Txawm neeg tau hais txog tej vajtswv saum ntuj thiab hauv ntiajteb no yam li uas muaj ntau tus “vajtswv” thiab ntau tus “tswv,” 6 tabsis rau peb mas tsuas muaj tib tug Vajtswv Ntuj, Leej Txiv, tus uas txhua yam tau tshwmsim los thiab peb muajsia hauv Nws; thiab tib tug Tswv, Yexus Khetos, tus uas txhua yam muaj nyob vim Nws thiab peb muajsia vim Nws.

7 Tabsis tsis yog txhua leej muaj txojkev paub no. Ibtxhia tseem muaj kev koomxeeb nrog mlom los txog niajhnub no, xws li lawv tseem noj tej nqaij fij rau mlom thiab lawv txojkev totaub tuskheej ntawd tsaugmuas thiab raug tov lawm. 8 Zaubmov yuav tsis ntxiv dabtsi rau peb ntawm Vajtswv Ntuj: Txawm peb tsis noj los peb tsis phem tshaj, peb ho noj los tsis zoo tshaj.

9 Tabsis ceevfaj tsam nej lub tswjchim no yuav dhau ua qhov dawm ntog rau cov tsaugmuas. 10 Rauqhov yog leejtwg pom koj, tus muaj kev paub, noj haus hauv tsev teev mlom, nws txojkev totaub tuskheej tsaugmuas ntawd puas yuav raug txhawb ntxiv mus noj tau tej nqaij fij rau mlom? 11 Vim koj txojkev paub, tus kwvtij tsaugmuas uas Khetos tau tuag txhiv ntawd thiaj poob rau kev puastsuaj. 12 Ces thaum nej ua txhaum rau cov kwvtij thiab rhuav lawv tej kev totaub tuskheej tsaugmuas ntawd, nej kuj ua txhaum rau Khetos. 13 Yog li ntawd, yog zaubmov ua rau kuv tus kwvtij ntog, ces kuv yuav tsis noj nqaij kiag mus ibtxhis kom kuv txhob ua rau ib tug kwvtij twg ntog.

1 Kuv tsis yog neeg ywjpheej lod? Kuv tsis yog ib tug timthawj lod? Kuv tsis tau pom Yexus peb tus Tswv lod? Nej tsis yog kuv tes haujlwm hauv tus Tswv lod? 2 Rau luag tej kuv tsis yog timthawj, los kuv kuj yog timthawj rau nej! Rauqhov nej yog kuv qhov yeebkoob timthawj hauv tus Tswv.

3 Qhov no yog kuv zaj lus txheem tuskheej rau cov neeg txiavtxim rau kuv: 4 Peb tsis muaj tswjchim noj thiab haus lod? 5 Peb tsis muaj tswjchim coj tus pojniam ntseeg nrog peb ibyam li lwm cov timthawj, li tus Tswv cov kwv thiab li Kefas lod? 6 Lossis tsuas yog Npananpas thiab kuv thiaj tsis muaj tswjchim kom txhob khwv noj?

7 Leejtwg ua tubrog es ho tseem yug tuskheej? Thaum ib tug neeg cog lub vaj txivhmab, nws puas noj cov txiv hmab hauv lub vaj? Lossis leejtwg zov pab yaj es ho tsis haus pab yaj cov mis? 8 Puas yog kuv hais tej no raws li neeg lossis Kevcai hais txog tej no thiab? 9 Hauv Mauxes Kevcai twb sau tias, “Txhob xauv nyuj qhov ncauj thaum nws luam qoob hauv tshav.” Tsis lam yog Vajtswv Ntuj txhawj txog tej nyuj pod? 10 Lossis yog Nws hais rau peb? Qhov no tau raug sau rau peb kom tus uas laij teb yov laij nrog kev ciasiab thiab tus uas ntaus qoob yov ntaus nrog kev ciasiab tias nws yuav tau ib feem qoob. 11 Yog peb cog tej noob sab ntsujplig rau saum nej, puas tsimnyog rau peb sau tej qoob sab nqaijtawv ntawm nej mad? 12 Yog lwm cov muaj tswjchim txais ib feem ntawm nej, peb tsis muaj tswjchim tshaj lod?

Txawm li ntawd los peb tsis siv lub tswjchim no tabsis peb nyiaj txhua yam kom peb txhob muab dabtsi los tabkaum Khetos txojmoo zoo. 13 Nej tsis paub tias cov povthawj uas ua haujlwm hauv lub tuamtsev noj tej zaubmov fij rau Vajtswv Ntuj hauv lub tuamtsev thiab cov uas tu lub thaj kuj txais lawv feem ntawm lub thaj lod? 14 Ibyam li ntawd, tus Tswv tau tawmcai rau cov tshajtawm txojmoo zoo kom uaneej los ntawm txojmoo zoo.

15 Txawm li ntawd los kuv tsis tau siv lub cai no ib zaug. Kuv tsis tau sau tej no kom nej ua li no rau kuv, rauqhov nws zoo rau kuv tuag dua li leejtwg yuav rhuav kuv txojkev khav. 16 Rauqhov yog kuv qhia txojmoo zoo, kuv tsis muaj dabtsi khav. Kuv qhia vim txojmoo zoo ua rau kuv nyob tsis tswm. Cia vijnpog raug rau kuv yog kuv tsis qhia txojmoo zoo. 17 Rauqhov yog kuv tuajyeem ua, kuv yuav txais nqizog. Yog kuv ho tsis tuajyeem los, Khetos twb tsosiab kev saib vajtse rau kuv lawm. 18 Yog li ntawd, kuv tus nqizog yog dabtsi? Yog qhov no tias, thaum kuv tshajtawm txojmoo zoo, kuv tsis tsub nqi ntxiv rau txojmoo zoo thiab tsis xam kuv lub tswjchim saum txojmoo zoo.

19 Txawm kuv yog neeg ywjpheej rau ntawm txhua leej, kuv tau muab tuskheej los tiam kom kuv yuav tsam ntau tshaj. 20 Rau cov Yudais kuv tau dhau ua neeg Yudais kom kuv yuav tsam cov Yudais; rau cov nyob qab Kevcai (txawm kuv tuskheej tsis nyob qab Kevcai), kuv tau dhau ua neeg nyob qab Kevcai kom kuv yuav tsam cov nyob qab Kevcai. 21 Rau cov tsis muaj Kevcai, kuv tau dhau ua neeg tsis muaj Kevcai (txawm kuv ua neeg tsis muaj Kevcai rau ntawm Vajtswv Ntuj, kuv tseem ua neeg raws Kevcai hauv Khetos), kom kuv yuav tsam cov tsis muaj Kevcai. 22 Rau cov tsaugmuas, kuv tau dhau ua neeg tsaugmuas kom kuv yuav tsam cov tsaugmuas. Kuv twb dhau ua txhua yam rau txhua leej, kom kuv yov cawm tau ibtxhia. 23 Kuv ua txhua yam this txojmoo zoo kom kuv yov dhau ua tus koomxeeb nrog nws.

24 Nej tsis paub tias tagnrho cov khiav hauv lub tshav sibtw ntawd puavleej khiav tabsis ib leeg thiaj tau qhov yeebkoob lod? Yam nkaus li ntawd, khiav kom nej tau txais qhov yeebkoob. 25 Txhua leej uas sibtw puavleej tswj tuskheej. Lawv tswj tuskheej li ntawd kom lawv txais lub mom yeebkoob txawj piam, tabsis peb tswj tuskheej kom peb txais lub mom yeebkoob tsis txawj piam. 26 Kuv kuj khiav yam nkaus li no, tsis yam li khiav tsis paub lub homphiaj. Kuv ntaus nrig li no, kuv tsis lam ntau cua qhuav; 27 tabsis kuv yuam kuv lub cev thiab quab nws, ntshai tsam kuv, tus tshajtawm rau luag tej, haj yog tus raug ceem tsis txaus.

1 Rauqhov kuv tsis xav kom nej tsis paub, cov kwvtij, tias peb tej yawgkoob txhua leej puavleej tau nyob hauv qab tauv huab thiab tau taugkev hauv hiavtxwv. 2 Lawv txhua tus tau rausdej hauv tauv huab thiab hauv hiavtxwv rau ntawm Mauxes. 3 Lawv txhua leej tau noj cov mov sab ntsujplig 4 thiab lawv txhua leej tau haus cov dej sab ntsujplig, rauqhov lawv tau haus cov dej ntawm lub pobzeb sab ntsujplig uas raws lawv, thiab lub pobzeb ntawd yog Khetos. 5 Tabsis Vajtswv Ntuj tsis tau raugsiab rau lawv feem coob, rauqhov lawv tau tuag rau tom mojsab qhua.

6 Tej ntawd tau tshwmsim ua qauv rau peb kom peb txhob ntshaw kev phem li lawv tau ntshaw. 7 Txhob ua neeg pe mlom li lawv ibtxhia, raws li nws twb raug sau tseg tias, “Zejtsoom tau zaum noj thiab haus thiab tau sawv uasi.” 8 Cia peb txhob ua kev vuabtsuab li lawv ibtxhia tau ua es tib hnub xwb lawv tau tuag neesnkaum-peb txheeb leej. 9 Thiab cia peb txhob sim Khetos li lawv ibtxhia tau sim thiab lawv tau raug puastsuaj los ntawm nab. 10 Txhob yws li lawv ibtxhia tau yws, es lawv tau piamsij los ntawm tug timtswv kev puasntsoog.

11 Tej no tau taugkev nrog lawv ua qauv thiab tau raug sau ua lus ntuas peb, cov uas nyob rau tiam kawg. 12 Yog li ntawd, cia tus neeg sawv ntsug ceevfaj tsam nws ntog. 13 Nej twb tsis raug kev simsiab tshaj tej uas neeg raug. Vajtswv Ntuj ncajncees. Nws yuav tsis tso nej raug simsiab tshaj qhov uas nej muaj peevxwm tiv thiab Nws yuav tsim kev tawm rau tus raug simsiab kom nws muaj peevxwm ris taus.

14 Vim li no, cov kuv hlub, khiav tawm ntawm kev pe mlom. 15 Kuv hais rau nej li cov muaj tswvyim: Txiavtxim rau tuskheej saum tej kuv hais. 16 Lub khob koobhmoov uas peb muab ua tsaug ntawd tsis yog kev koomxeeb nrog Khetos cov ntshav lod? Thiab lub movci uas peb ntais ntawd tsis yog kev koom nrog Khetos lub cev lod? 17 Vim tias muaj tib lub movci xwb! Peb coobcoob tabsis yog ib lub cev vim peb sawvdaws tau koom tib lub movci.

18 Saib haivneeg Yixayees ntawm nqaijtawv. Lawv cov noj tej khoom fij ntawd tsis yog cov uas koom saum tib lub thaj lod? 19 Yog li ntawd, kuv hais dabtsi? Kuv hais tias, qhov nqaij fij rau mlom yog dabtsi, thiab tus mlom yog dabtsi? 20 Kuv hais tias tej ntawd yog khoom fij rau tej dab es tsis yog khoom fij rau Vajtswv Ntuj. Kuv tsis xav kom nej dhau ua cov koom nrog tej dab. 21 Nej tsis muaj peevxwm haus tus Tswv lub khob thiab tej dab lub khob, thiab nej tsis muaj peevxwm koom tus Tswv lub rooj thiab saum tej dab lub rooj. 22 Lossis peb yuav ua kom tus Tswv khib? Peb tsis yog cov muaj zog tshaj Nws pod?

23 Txhua yam raug cai rau kuv ua tabsis tsis yog txhua yam muaj nqis. Txhua yam raug cai rau kuv ua tabsis tsis yog txhua yam yuav tsa lwm tus sawv. 24 Txhob cia ib tug twg nrhiav qhov zoo rau tuskheej, tabsis cia yus nrhiav qhov zoo rau lwm tus.

25 Noj txhua yam nqaij uas muag tom khw, txhob nug txog kev totaub tuskheej 26 vim tias lub ntiajteb thiab txhua yam hauv yog tus Tswv li.

27 Yog ib tug tsis ntseeg caw koj thiab koj xav mus, noj txhua yam saum rooj, txhob nug txug kev totaub tuskheej. 28 Tabsis yog ib tug hais rau koj tias, “Qhov no yog nqaij fij rau mlom.” Ces txhob noj vim tus qhia rau koj ntawd thiab vim kev totaub tuskheej. 29 Kuv tsis hais txog koj kev totaub tuskheej, tabsis lwm tus li. Tej zaum koj yuav nug tias, “Vim li cas lwm tus kev totaub tuskheej ho yuav txiavtxim rau kuv kev ywjpheej? 30 Yog kuv koom nrog kev uatsaug, cas kuv ho raug txobthuam rau qhov uas kuv twb ua Vajtswv Ntuj tsaug lawm?”

31 Yog li ntawd, noj dabtsi, haus dabtsi, lossis ua dabtsi, ua txhua yam rau Vajtswv tau tshwjchim. 32 Txhob ua zeb dawm cov Yudais, cov Kilis, lossis Vajtswv Ntuj pawgntseeg, 33 ibyam li kuv tau ua txhua yam kom raug siab rau txhua leej, tsis nrhiav yam muaj txiajntsig rau tuskheej tabsis rau sawvdaws, kom lawv raug cawm.

1 Ua cov caum kuv ibyam li kuv ua tus caum Khetos.

2 Kuv qhuas nej tias nej tau nco kuv saum txhua yam thiab nej tau tuav tej kabke raws li kuv tau muab rau nej.

3 Tabsis kuv xav kom nej paub tias txhua tus txivneej lub taubhau yog Khetos, thiab txhua tus pojniam lub taubhau yog nws tus txiv, thiab Khetos lub taubhau yog Vajtswv Ntuj. 4 Thaum txhua tus txivneej thov Vajtswv lossis cevlus this Vajtswv, yog nws muab dabtsi npog taubhau, nws kuj rhuav nws lub taubhau. 5 Tabsis thaum txhua tus pojniam thov Vajtswv lossis cevlus this Vajtswv thiab tsis npog nws lub taubhau, ces nws ho rhuav nws lub taubhau, vim tias qhov no kuj yog nkaus li nws twb chais taubhau lawm. 6 Vim tias yog tus pojniam tsis npog taubhau, ces cia nws muab plaubhau txiav dodus; tabsis yog qhov plaubhau dodus lossis chais taubhau ntawd yog kev txajmuag rau nws, ces cia nws npog nws lub taubhau. 7 Hos tus txivneej yuavtsum txhob muab dabtsi npog taubhau vim nws yog Vajtswv Ntuj lub hwvxyeej thiab lub tshwjchim, tabsis tus pojniam yog nws tus txiv lub tshwjchim. 8 Vim tias txivneej tsis tau tawm ntawm pojniam los, tabsis pojniam tau tawm ntawm txivneej los. 9 Txivneej tsis tau raug tsim los ntawm pojniam tabsis tus pojniam tau raug tsim los ntawm txivneej. 10 Vim qhov no thiab vim cov timtswv, tus pojniam tsimnyog muaj tswjchim rau saum taubhau.

11 Txawm li los, hauv tus Tswv mas pojniam tsis raug cais ntawm txivneej thiab txivneej tsis raug cais ntawm pojniam. 12 Rauqhov, ibyam li tus pojniam tau tawm ntawm txivneej los, tus txivneej kuj tau tawm ntawm tus pojniam thiab; tabsis txhua yam tawm ntawm Vajtswv Ntuj los.

13 Txiavtxim rau nej tuskheej: Puas tsimnyog rau ib tug pojniam tsis npog taubhau mus thov Vajtswv? 14 Kev xeebtxawm tsis qhia nej tias yog tus txivneej tseg plaubhau ntev, ces nws tsis hwm tuskheej, 15 tabsis yog tus pojniam tseg plaubhau ntev, ces nws ceev tshwjchim rau tuskheej lod? Rauqhov plaubhau ntev raug muab ua tsoos rau pojniam. 16 Yog leejtwg xav sibcav los, peb thiab Vajtswv Ntuj tej pawgntseeg tsis muaj dua lwm txoj kevcai.

17 Tabsis kuv tsis qhuas nej rau nqe no, rauqhov nej tsis tuaj txoos uake rau seem zoo tabsis rau seem phem. 18 Qhov ib, kuv hnov tias thaum nej tuaj uake hauv pawgntseeg, nej tau muaj kev sibtawg hauv nej. Kuv ntseeg qhov no mentsis thiab. 19 Tswvyim sibtxawv cheemtsum muaj hauv nej, kom cov uas raug ceem lawm yov tshwm rau nej pom. 20 Tabsis thaum nej tuaj uake, nej tsis noj tus Tswv rooj mov ibyam. 21 Rauqhov sijhawm noj mov ntawd, nyias thau nyias pob mov los: Ib tug twb qaug tabsis ib tug ho tseem tshaib. 22 Nej tsis muaj tsev mus noj mus haus lod? Lossis yog nej tuammom Vajtswv Ntuj pawgntseeg thiab rhuav cov txomnyem? Kuv yuav hais li cas rau nej, yuav qhuas nej lod? Kuv tsis qhuas nej rau qhov no!

23 Kuv twb muab rau nej qhov uas kuv tau txais ntawm tus Tswv tias, hmo Nws tau raug ntes ntawd, tus Tswv Yexus tau muab lub movci 24 thiab, tomqab ua Vajtswv tsaug tag, Nws tau muab ntais thiab tau hais tias, “Qhov no yog kuv lub cev uas raug muab rau nej. Ua li no nco txog kuv.” 25 Tomqab noj hmo tag, Nws kuj tau ua ibyam li rau lub khob thiab hais tias, “Lub khob no yog tus txhooj tshiab saum kuv cov ntshav. Ua li no, txhua zaus nej haus, rau kev nco txog kuv.” 26 Vim tias txhua zaus nej noj lub movci thiab haus lub khob, nej tshajtawm tus Tswv txojkev tuag mus txog thaum Nws los.

27 Yog li ntawd, leejtwg noj tus Tswv lub movci lossis haus lub khob dogdig, tus ntawd muaj txim rau tus Tswv lub cev thiab cov ntshav. 28 Cia txhua leej sojntsuam tuskheej, thiab cia nws noj lub movci thiab haus lub khob raws nraim li no. 29 Tus uas noj lub movci thiab haus lub khob kuj noj thiab haus kev txiavtxim rau tuskheej, yog nws saib tsis taus tus Tswv lub cev. 30 Vim li no, nej coob leej tau muaj mob thiab muaj nkeeg; thiab ibtxhia tau tuag lawm. 31 Yog peb tshawb tuskheej lawm, ces peb yuav tsis raug txiavtxim. 32 Tabsis thaum peb txais kev txiavtxim ntawm tus Tswv, peb tuskheej kuj raug cob kom peb thiaj tsis raug txiavtxim nrog lub cejntug.

33 Yog li ntawd, kuv cov kwvtij, thaum nej tuaj uake, ibleeg tos ibleeg es mam noj uake. 34 Yog leejtwg tshaib, cia nws noj hauv nws tsev kom thaum nej tuaj uake, nej txhob raug kev txiavtxim.

Tshuav ntau yam, tabsis thaum kuv tuaj kuv mam muab teeb tibzoo.

1 Tabsis hais txog tej ntawm sab ntsujplig, cov kwvtij, kuv tsis xav kom nej tsis paub. 2 Nej twb paub tias yav tag los thaum nej yog neeg txawv tebchaws, nej tau raug coj thiab tau plaskev mus rau tej mlom ruam. 3 Kuv tau qhia rau nej paub tias tsis muaj leejtwg hais ntawm Vajtswv Ntuj tus Ntsujplig tias “Yexus yog tus raug tsawm.” Thiab tsis muaj leejtwg lees tias, “Yexus yog tus Tswv,” tshwj los ntawm tus Ntsujplig Dawbhuv.

4 Koobhmoov ntsujplig sibtxawv tabsis muaj tib tug Ntsujplig. 5 Thiab tej haujlwm muaj sibtxawv tabsis muaj tib tug Tswv. 6 Thiab nyias muaj nyias lub zog ua haujlwm tabsis nws tawm ntawm tib tug Vajtswv Ntuj, tus uas ua txhua yam hauv txhua leej.

7 Tus Ntsujplig tau tshwm rau nyias txawv nyias kom zoo rau sawvdaws. 8 Tus Ntsujplig tau muab txojlus nrog tswvyim rau ib tug, tabsis tib tug Ntsujplig ntawd ho muab txojlus kev paub rau lwm tus. 9 Tib tug Ntsujplig tau muab kev ntseeg rau ib tug thiab tib tug Ntsujplig ho muab koobhmoov khomob rau lwm tus. 10 Rau ib tug ho yog txoj haujlwm nrog hwjchim, rau ib tug ho yog kev cevlus, rau ib tug ho yog kev cais tej ntsujplig, rau ib tug ho yog hais lus txawv tebchaws, rau ib tug ho yog kev txhais tej lus txawv tebchaws ntawd. 11 Tib tug Ntsujplig ua txhua yam haujlwm hauv txhua leej, faib rau txhua leej raws li Nws npaj homphiaj.

12 Rauqhov ibyam lub cev yog tib lub tabsis nws muaj ntau txhais testaw, thiab tagnrho tej testaw ntawd yog lub cev. Khetos kuj zoo li ntawd. 13 Los ntawm tib tug Ntsujplig, peb sawvdaws raug rausdej los ua tib lub cev—tsis hais neeg Yudais, neeg Kilis, neeg qhev, lossis neeg ywjpheej—peb tau haus ntawm tib tug Ntsujplig.

14 Vim lub cev tsis yog ib txhais testaw, tabsis ntau ntxhais. 15 Yog txhais taw yov hais tias, “Kuv tsis yog tes, ces kuv tsis muaj feem rau lub cev,” los tsis vim qhov no es nws txawm tsis muaj feem rau lub cev. 16 Thiab yog lub pobntseg yov hais tias, “Kuv tsis yog qhovmuag, ces kuv tsis muaj feem rau lub cev,” los tsis vim qhov no es nws txawm tsis muaj feem rau lub cev. 17 Yog lub cev tagnrho yog qhovmuag, nws yov hnov li cas? Thiab yog lub cev tagnrho yog pobntseg, nws yov hnia li cas? 18 Tabsis nimno Vajtswv Ntuj tau muab tej testaw, ib txhais zujzus, los txuas rau lub cev raws nraim li Nws tau npaj tseg. 19 Yog sawvdaws tagnrho yog ib txhais xwb, lub cev ho nyob qhovtwg? 20 Li nimno, muaj ntau txhais testaw, tabsis tib lub cev xwb.

21 Lub qhovmuag tsis muaj peevxwm hais rau txhais tes tias, “Kuv tsis cheemtsum muaj koj,” lossis lub taubhau tsis muaj peevxwm hais rau ob txhais kotaw tias, “Kuv tsis cheemtsum muaj neb.” 22 Tabsis tej testaw tsaugmuas ntawm lub cev hajyam tseemceeb, 23 thiab tej testaw tsis tsimtxiaj ntawm lub cev, peb hajyam muab tsoos tsimtxiaj los vov, thiab tej uas peb txajmuag rau tau npua daim tsoos ntxim siab dua ntais. 24 Tabsis tej testaw ntxim siab ntawm peb lub cev ho tsis muaj kev cheemtsum dabtsi. Txawm li los, Vajtswv Ntuj tau muab lub cev sibtxuas li no thiab muab meejmom npluamias rau tus poob tsim, 25 kom txhob muaj kev sibtawg hauv lub cev tabsis kom txhua txhais yov txhawj txog lwm txhais ibyam li tuskheej. 26 Thiab yog ib txhais mob, txhua txhais nrog mob; thiab yog ib txhais raug qhuas, sawvdaws puavleej zoo siab.

27 Nej yog Khetos lub cev thiab ibleeg yog ib txhais ntawm lub cev. 28 Thiab Vajtswv Ntuj tau muab lawv teeb rau hauv pawgntseeg: Thawj pab yog cov timthawj, thij ob yog cov cevlus, thij peb yog cov xibfwb, dhau ntawd kuj yog cov ua txujci, tomqab ntawd kuj yog cov txais koobhmoov khomob, cov muaj peevxwm pab, cov saibxyuas, thiab cov hais lwm haivneeg tej lus. 29 Txhua leej tsis yog cov timthawj, txhua leej tsis yog cov cevlus, txhua leej tsis yog cov xibfwb, txhua leej tsis yog cov ua txujci, 30 txhua leej tsis muaj koobhmoov khomob, txhua leej tsis tau hais lwm haivneeg lus, txhua leej tsis txawj txhais lwm haivneeg lus. 31 Tabsis kubsiab lug nrhiav tej koobhmoov uas loj dua.

Thiab kuv tseem yuav qhia txojkev zoo tshajplaws rau nej.

1 Txawm kuv hais tau txhua haivneeg lus thiab cov timtswv lus tabsis kuv tsis muaj kev hlub, ces kuv twb dhau ua lub nruas tooj lossis daim hlau taug ntsej xwb. 2 Thiab txawm kuv txais kev cevlus thiab totaub txhua qhov mixatawlis thiab txhua yam kev paub, thiab txawm kuv muaj kev ntseeg loj uas nphau taus roob, tabsis kuv tsis muaj kev hlub, ces kuv tsis muaj nqis dabtsi. 3 Txawm kuv muab tagnrho kuv lub cuabtam mus yug tej neeg txomnyem thiab muab kuv lub cev hlawv kom kuv khav taus, tabsis kuv tsis muaj kev hlub, ces kuv tsis tsam dabtsi.

4 Kev hlub ua siabntev, kev hlub ua siabdawb; kev hlub tsis ntshaw luag tug, kev hlub tsis cam thawj, kev hlub tsis khav theeb, 5 kev hlub tsis rhuav luag, kev hlub tsis nrhiav rau tuskheej, kev hlub tsis twv luag, kev hlub tsis cim ntsoov kev phem, 6 kev hlub tsis zoo siab rau kev tsis ncajncees, tabsis zoo siab nrog qhov tseeb. 7 Kev hlub roos txhua yam, ntseeg txhua yam, ciasiab rau txhua yam, thiab nyiaj taus txhua yam.

8 Kev hlub tsis piam ib zaug li. Txawm kev cevlus los yuav raug txiav, kev hais lwm haivneeg lus los yuav ntsiag, thiab kev paub los yuav raug txiav. 9 Rauqhov peb paub ib feem thiab cevlus ib feem, 10 tabsis thaum qhov zoo kawgnkaus los txog, ces qhov feem ntawd yuav ploj mus. 11 Thaum kuv tseem yog menyuam, kuv tau tham lus li menyuam, tau xav li menyuam thiab tau muaj tswvyim li menyuam. Tabsis thaum kuv tsheej txivneej yawg lawm, kuv tau txiav tej xeebceem menyuam tawm. 12 Rauqhov nimno kuv pom zemzuag li hauv daim iav xwb, tabsis tomqab ntawd kuv yuav pom tim ntsej tim muag. Nimno kuv tsuas paub ib feem, tomqab ntawd kuv yuav paub tiavlog ibyam li Vajtswv Ntuj twb paub kuv lawm.

13 Nimno kev ntseeg, kev ciasiab thiab kev hlub yuav nyob mus, tabsis qhov loj tshaj yog kev hlub.

1 Caum kev hlub! Kubsiab nrhiav koobhmoov sab ntsujplig, tshwjxeeb kom nej paub cevlus heev dua. 2 Rauqhov tus hais lus txawv-txawv tsis hais rau neeg tabsis rau Vajtswv Ntuj, vim tias tsis muaj leejtwg totaub, tsuas yog nws hais tej mixatawlis sab ntsujplig. 3 Hos tus cevlus, nws hais lolus tsa neeg sawv ntseg, lus txhawbzog, thiab lus npligsiab. 4 Tus hais lus txawv-txawv tsa tuskheej, tabsis tus cevlus tsa pawgntseeg. 5 Kuv xav kom nej txawj hais lus txawv tabsis kom nej txawj cevlus tshaj. Tus cevlus loj dua tus hais lus txawv, tshwj tias nws ho txhais lus kom pawgntseeg txais kev lojhlob.

6 Nimno cov kwvtij, yog kuv tuaj cuag nej es kuv hais lus txawv, nws yuav muaj nqis dabtsi rau nej? Tshwj tias kuv hais txog yam raug nthuav, kev paub, lus cevlus, lossis lus cobqhia. 7 Txawm tej cuabyeej tim suab, xws li lub raj nplaim lossis kitas, yog nws tsis nrov lub suab meej, leejtwg yov paub tias tus tshuab raj lossis tus ntaus kitas hais dabtsi? 8 Thiab yog lub xyu tsis nrov meej, leejtwg yov paub npaj ntausrog? 9 Nej los kuj zoo li ntawd. Hais txog kev hais lus txawv-txawv, yog nej tsis muab zaj uas neeg totaub es leejtwg yov paub tej lus nej hais? Rauqhov nej yuav hais lus rau saum cua xwb. 10 Muaj ntau hom lus hauv lub cejntug, tabsis tsis muaj ib hom twg uas tsis muaj ntsiab. 11 Yog li ntawd, yog kuv tsis paub lub ntsiab ntawm lolus, kuv kuj yog pejkum neeg rau tus hais lus ntawd thiab tus hais lus ntawd kuj yog pejkum neeg rau kuv. 12 Nej los kuj zoo li ntawd. Vim nej yog cov mobsiab rau tej koobhmoov ntsujplig, nrhiav kom nej puvnpo kev txhawb pawgntseeg.

13 Yog li ntawd, cia tus uas hais lus txawv-txawv thov Vajtswv kom nws yov txawj txhais. 14 Vim tias yog kuv thov Vajtswv ua lus txawv, ces kuv tus ntsujplig thov Vajtswv xwb, hos kuv lub hlwb tsis paub. 15 Ces nws muaj txiajntsig dabtsi? Kuv yuav thov Vajtswv los ntawm ntsujplig thiab thov Vajtswv los ntawm hlwb huvsi. Kuv yuav hunkauj los ntawm ntsujplig thiab hunkauj los ntawm hlwb ibyam nkaus. 16 Tsis li, es yog koj qhuas Vajtswv Ntuj los ntawm ntsujplig, tus tsis tau raug cob txog kev ntseeg uas nyob nrog koj ntawd yov ua li cas paub hais “Amees” nrog koj kev ua tsaug? Vim nws tsis paub qhov koj hais ne! 17 Qhov koj ua Vajtswv tsaug zoo lawm tabsis tus neeg nrog koj twb tsis raug tsa.

18 Kuv ua Vajtswv Ntuj tsaug uas kuv hais lus txawv-txawv ntau tshaj nej tagnrho, 19 tabsis hauv pawgntseeg kuv xav hais tsib lolus tawm hauv hlwb kom lwm tus yov raug cob tshaj li ib vam lolus txawv.

20 Cov kwvtij, txhob siv hlwb li tej menyuam! Tsuas ua menyuam rau kev phem xwb; dhau ua cov paubtab rau kev siv hlwb. 21 Nws twb raug sau tseg hauv Kevcai tias:

22 Tej lus txawv-txawv ntawd yog lub cim rau cov tsis ntseeg, tsis yog rau cov ntseeg. Hos kev cevlus yog rau cov ntseeg, tsis yog rau cov tsis ntseeg. 23 Ces yog pawgntseeg tagnrho tuaj uake thiab sawvdaws hais lus txawv, cov tsis tau raug cob txog kev ntseeg thiab cov tsis ntseeg uas nkag tuaj nrog nej ntawd yov tsis hais tias nej vwm lod? 24 Tabsis yog sawvdaws cevlus, ces tus tsis tau raug cob txog kev ntseeg lossis tus tsis ntseeg ntawd yov paub nws lub txim thiab totaub kev txiavtxim los ntawm sawvdaws. 25 Tej uas nraim nkoos hauv nws lub siab yuav raug nthuav tawm. Thaum nws tig ntiag los, nws yuav pe Vajtswv Ntuj thiab hais tias, “Vajtswv Ntuj nyob nruab nrab nej tiag lau.”

26 Ces ua li cas, cov kwvtij, yog thaum nej tuaj uake, ib tug muaj zaj nkauj, ib tug muaj lus qhuabqhia, ib tug muaj qhov Vajtswv Ntuj nthuav rau nws, ib tug muaj kev hais lus txawv, ib tug muaj peevxwm txhais lus txawv na? Cia txhua yam dhau ua kev txhawb pawgntseeg. 27 Yog leejtwg hais lus txawv, pub txij ob lossis peb leeg hais thiab ib tug hais tag ib tug mam hais, tiamsis cia muaj ib tug txhais. 28 Yog tsis muaj tus txhais, cia nws nyob ntsiagto hauv pawgntseeg. Nws yuav hais lus txawv, cia nws hais twjywm rau tuskheej thiab rau Vajtswv Ntuj xwb.

29 Cia ob lossis peb tug cevlus hais. Hos dua li cov, cia sawvdaws khaws mus luj. 30 Tabsis yog ib tug zaum ntawd samsim tau txais lus nthuav tshiab, cia thawj tug tswmseeb. 31 Rauqhov nej sawvdaws muaj peevxwm cevlus ib tug zujzus, kom sawvdaws tau kawm thiab raug txhawb. 32 Tej koobhmoov ntsujplig ntawm cov cevlus puavleej nyob qab tswjhwm ntawm cov cevlus. 33 Rauqhov tias Vajtswv Ntuj tsis yog tus Vajtswv kev kubntxhov tabsis yog tus Vajtswv kev thajyeeb, raws li hauv txhua pawgntseeg ntawm cov dawbhuv.

34 Cia cov pojniam nyob ntsiagto hauv pawgntseeg, vim tias nws tsis tsimnyog rau lawv hais lus, tabsis cia lawv nyob qab tswjhwm ibyam li Kevcai hais. 35 Yog lawv xav kawm dabtsi, cia lawv nug lawv cov txiv tom tsev, vim tias nws yog kev txajmuag rau pojniam hais lus hauv pawgntseeg.

36 Vajtswv Ntuj txojlus tawm uantej ntawm nej los lod? Lossis tuaj rau nej nkaus xwb lod? 37 Yog leejtwg xav tias nws yog tus cevlus lossis paub sab ntsujplig, cia nws lees paub tej kuv sau rau nej tias nws yog tus Tswv nqe lus tawmcai. 38 Hos yog leejtwg ua tus tsis paub, nws yuav tsis raug lees paub.

39 Yog li no, kuv cov kwvtij, kubsiab nrhiav kev cevlus thiab txhob txwv kev hais lus txawv, 40 tabsis cia txhua yam peemtsheej raws txheejtxheem zoo.

1 Kuv qhia rau nej paub, cov kwvtij, txog txojmoo zoo uas kuv tau tshajtawm rau nej; txoj uas nej tau txais thiab nej twb sawv khovkho rau saud. 2 Thiab vim txojmoo zoo nej thiaj dim, yog nej tuav ruajruaj txojlus kuv tau tshajtawm rau nej ntawd. Ntshe nej ho tau ntseeg qhuavqhuav xwb.

3 Rauqhov kuv tau muab rau nej cov thawj lus uas kuv tau txais los, tias Khetos tau tuag theej peb tej kev txhaum raws li Vajlugkub, 4 tias Nws tau raug faus, tias Nws tau raug tsa sawv hnub peb raws li Vajlugkub, 5 thiab tias Nws tau tshwm rau Kefas pom ces ho rau pab kaum-ob leeg. 6 Ib zaug tomqab ntawd Nws tau tshwm rau tshaj tsib puas leej kwvtij. Cov kwvtij no feem coob tseem muajsia nyob, txawm qee leej tau tsaugzog lawm. 7 Dhau ntawd, Nws tau tshwm rau unpaus thiab ho tau tshwm rau cov timthawj tagnrho. 8 Thaum kawg tej no, Nws tau tshwm rau kuv, li rau tus menyuam yug tsis raws caijnyoog.

9 Rauqhov kuv yog tus me dua cov timthawj huvsi thiab kuv tsis tsimnyog raug hu ua timthawj, vim kuv tau tsimtxom Vajtswv Ntuj pawgntseeg. 10 Tabsis vim Vajtswv Ntuj vajhmoov, kuv tau dhau los ua tus li kuv no. Nws vajhmoov tsis tau raug nkim hauv kuv, tabsis kuv tau khwv tshaj lawv tagnrho, tsis yog kuv tabsis yog Vajtswv Ntuj vajhmoov nrog kuv. 11 Yog li ntawd, txawm yog kuv lossis lawv, peb tau tshajtawm li no thiab nej tau ntseeg li no.

12 Yog Khetos raug tshajtawm tias Nws tau sawv rovlos ntawm cov tuag lawm, ua li cas nej ibtxhia ho hais tias tsis muaj kev sawv rovlos ntawm cov tuag? 13 Yog tsis muaj kev sawv rovlos ntawm cov tuag, ces Khetos kuj tsis tau sawv thiab? 14 Thiab yog Khetos tsis tau sawv, peb kev tshajtawm kuj yog nkim thiab nej kev ntseeg los kuj yog nkim. 15 Ces peb kuj yog cov hais lus dag txog Vajtswv Ntuj, rauqhov peb tau ua timkhawv txog Vajtswv Ntuj tias Nws tau tsa Khetos sawv. Khetos kuj tsis tau sawv thiab, yog cov tuag yuav tsis sawv. 16 Rauqhov yog cov tuag yuav tsis sawv, Khetos twb tsis tau sawv thiab! 17 Thiab yog Khetos twb tsis tau sawv, nej txoj kev ntseeg tsis muaj kuab thiab nej tseem nyob hauv nej tej kev txhaum, 18 thiab cov tuag rau Khetos lub npe puavleej tau raug puastsuaj. 19 Yog peb yog cov ciasiab hauv Khetos rau saum lub neej no xwb, peb yog cov uas txaus tabncuab tshaj tej neeg huvsi.

20 Tabsis nimno Khetos twb raug tsa sawv ntawm cov tuag ua thawj pwg ntawm tej neeg tuag. 21 Rauqhov kev tuag tau tshwmsim vim ib tug neeg, kev sawv rovlos ntawm cov tuag kuj tau tshwmsim vim ib tug neeg thiab. 22 Ibyam li txhua leej tau tuag hauv Adas li cas, txhua leej yuav muajsia hauv Khetos li ntawd. 23 Tabsis nyias muaj nyias sijhawm: Thawj pwg yog Khetos, tomqab ntawd cov ntseeg Khetos yuav sawv lub sijhawm Nws rovqab los. 24 Ces qhov kawg los txog, thaum Nws muab lub tswvkuj rau Txiv Vajtswv Ntuj thiab thaum Nws txo txhua tus nomtswv, txhua lub tswjchim thiab hwjchim. 25 Rauqhov Nws cheemtsum kav mus txog thaum Nws muab txhua tus yeebncuab tso hauv Nws kotaw. 26 Tus yeebncuab kawg yuav raug txo ntawd yog kev tuag. 27 “Rauqhov Nws tau muab txhua yam txo rau hauv Nws kotaw,” tabsis qhov hais tias “twb muab txhua yam rau tswj,” qhov ntawd kuj hais meej tias tshwj tus muab txhua yam rau Nws tswj. 28 Thaum Nws tuskheej tau tswj txhua yam, ces Leej Tub tuskheej kuj yuav nyob qab tswjhwm ntawm tus uas muab txhua yam rau Nws tswj, kom Vajtswv Ntuj yog txhua yam hauv txhua tsav.

29 Yog tsis muaj kev sawv rovlos, cov uas rausdej this cov tuag ho ua tus dabtsi? Yog cov tuag yuav tsis sawv li tiag, vim li cas lawv ho rausdej this cov tuag ? 30 Thiab peb ho raug kev phomsij txhua lub sijhawm ua dabtsi? 31 Tseeb tiag, cov kwvtij, kuv niaj hnub raug tua vim txojkev khav txog nej uas kuv muaj hauv Khetos Yexus, peb tus Tswv. 32 Yog raws kev noobneej es kuv tau nrog tsiaj nyaum sib ntsuas zog hauv nroog Efexaus, ces nws muaj nqis dabtsi rau kuv? Yog cov tuag yuav tsis sawv, ces:

35 Qee tus yuav nug tias, "Cov tuag yuav sawvlos li cas thiab lawv tawmlos nrog lub cev zoo li cas?" 36 Koj ruam los? Lub noob koj tseb tsis ciajsia yog nws tsis tuag. 37 Thaum koj tseb, koj tsis tseb lub cev uas yuav tshwm, tsuas yog lub nyuag noob qhuavqhuav li noob mog lossis lwm yam. 38 Tabsis Vajtswv Ntuj muab lub cev rau nws raws li Vajtswv Ntuj tau npaj tseg thiab rau tej noob ntawd raws li nyias lub cev. 39 Txhua hom nqaijtawv tsis zoo sibxws; tabsis neeg muaj ib hom nqaijtawv, tej nees luav muaj dua ib hom nqaijtawv, tej noog muaj dua ib hom nqaijtawv, thiab ntses muaj dua ib hom. 40 Lub cev rau tej saum nruab ntug yog ib yam, lub cev rau tej saum av yog dua lawm ib yam. Thiab lub tshwjchim rau tej saum nruab ntug yog ib yam, lub tshwjchim rau tej saum av yog dua ib yam, 41 lub tshwjchim ntawm lub hnub yog ib yam, lub tshwjchim rau lub hli yog dua ib yam, thiab lub tshwjchim rau tej hnub qub yog dua lawm ib yam. Tej hnub qub los nyias muaj tshwjchim txawv nyias.

42 Kev sawv rovlos ntawm cov tuag kuj zoo li ntawd: Thaum tseb yog lub cev plojtuag, thaum sawv yog lub cev ibtxhis; 43 thaum tseb yog lub cev tsis ntomeej, thaum sawv yog lub cev tshwjchim; thaum tseb yog lub cev tsaugmuas, thaum sawv yog lub cev hwjchim; 44 thaum tseb yog lub cev sab nqaijtawv, thaum sawv yog lub cev sab ntsujplig.

Yog muaj lub cev sab nqaijtawv ces kuj muaj lub cev sab ntsujplig thiab. 45 Vajlugkub sau tseg li no: “Thawj tus txivneej, Adas, tau tshwmsim ua ib leeg neeg ciajsia zees.” Tus Adas kawg tau tshwmsim ua ib tug uas muab txojsia sab ntsujplig. 46 Sab ntsujplig tsis tau tshwmsim uantej tabsis yog sab nqaijtawv; tomqab ntawd mam yog sab ntsujplig. 47 Thawj tus neeg tau tawm hauv av, hauv ntiajteb los, tabsis tus thij ob tawm saum ntuj los. 48 Tus neeg av zoo li cas, tej neeg av puavleej zoo li ntawd; tus neeg saum ntuj zoo li cas, tej neeg saum ntuj kuj zoo li ntawd. 49 Ibyam li peb ris lub hwvxyeej av, peb kuj yuav ris lub hwvxyeej saum ntuj thiab.

50 Thiab kuv hais li no, cov kwvtij, tias nqaijtawv thiab rojntsha tsis muaj peevxwm yuav saws Vajtswv Ntuj lub tswvkuj thiab lub cev txawj lwj tsis muaj peevxwm saws lub cev tsis txawj lwj. 51 Mloog, kuv qhia ib qhov mixatawlis rau nej: Tsis yog peb yuav pw txhua tus tabsis peb yuav plhis txhua tus 52 tib ntsais muag, ib pliag ntshis, thaum lub xyu kawg. Rauqhov lub xyu yuav nrov ces cov tuag yuav raug tsa los ua cov tsis txawj piam thiab peb yuav plhis. 53 Rauqhov nws cheemtsum rau lub cev txawj lwj no mus hnav lub cev tsis txawj lwj thiab tsav txawj tuag mus hnav tsav ibtxhis. 54 Tabsis thaum lub cev txawj lwj tau hnav lub cev tsis txawj lwj thiab tsav txawj tuag tau hnav cev tsis txawj tuag, ces nws yuav tshwm li lolus uas twb raug sau tseg tias:

58 Yog li ntawd, cov kwvtij uas kuv hlub, nyob ruaj khov, txhob txav, thiab xyeej zias txhua lub sijhawm rau tus Tswv tes haujlwm vim nej paub meej tias nej txojkev khwv yeej tsis nkim hauv tus Tswv.

1 Nimno hais txog kev sau txiaj mus pab cov dawbhuv ntawd, nej ua raws li kuv tau tawmlus rau tej pawgntseeg hauv Kalatias. 2 Txhua thawj hnub hauv lub limtiam, cia nej nyias tshwj nyias ib qho cia raws li nej kev khwv kom txhob tau sau thaum kuv tuaj. 3 Thaum kuv tuaj txog, kuv yuav xa cov neeg uas nej pomzoo nrog tej ntaub ntawv thiab nej tej khoom pub ntawd mus Yeluxalees. 4 Yog nws tsimnyog rau kuv mus thiab no los, lawv ho nrog kuv mus.

5 Kuv yuav tuaj ntawm nej tomqab kuv tau ncig Makedonias, vim kuv yuav mus ncig Makedonias. 6 Thiab kuv yuav so ntawm nej ib ntus, tejzaum nrog nej so dhau caij ntuj no, kom nej ho xa kuv mus ntxiv rau qhov chaw kuv yuav mus. 7 Kuv tsis xav tuaj pom nej li dua kev xwb. Kuv ciasiab yuav nrog nej txoos ib ntus, yog tus Tswv pomzoo. 8 Tabsis kuv yuav nyob ntawm Efexaus no kom txog Peetekos; 9 vim tias ib lub qhovrooj tau qhib loj thiab dav rau kuv, txawm muaj coob leej tawmtsam.

10 Yog Timautes tuaj txog, saib kom nws nyob tsosiab lug nrog nej vim nws ua tus Tswv haujlwm ibyam li kuv. 11 Yog li ntawd, leejtwg txhob saib nws qaij. Xa nws tawm nrog kev thajyeeb kom nws los txog kuv vim kuv tos ntsoov nws nrog cov kwvtij los.

12 Hais txog Apaulaus, peb tus kwvtij ntawd, kuv tau nquahu heev kom nws nrog cov kwvtij tuaj. Nws tsis muaj dejsiab tuaj nimno kiagli tabsis nws yov tuaj thaum nws muaj zoo caij.

13 Txhob tsaugzog, sawv ruajruaj hauv txojkev ntseeg! Coj li txivneej yawg, muaj zog hov! 14 Cia nej txhua tes haujlwm txawm saum kev hlub.

15 Nej paub Xatefanas tsevneeg tias lawv yog thawj tsev ntseeg hauv Akheyas thiab lawv tau muab tagnrho tuskheej rau kev tiam cov ntseeg. Kuv nquahu nej, cov kwvtij, 16 kom nej tso tuskheej rau kev tswjhwm ntawm tej neeg li ntawd thiab ntawm txhua leej uas koom haujlwm thiab khwv li ntawd. 17 Kuv zoo siab rau Xatefanas, Fautunatus thiab Akhaikus lawv kev tuaj rau ntawm no vim lawv tau muab kev zoo siab rau kuv hloov nej chaw. 18 Lawv tau ua rau kuv tus ntsujplig los siav yam li nej. Yog li ntawd, lees paub tej neeg li no.

19 Cov pawgntseeg hauv Axias xa kev nojqab nyobzoo rau nej. Akilas thiab Paxilas nkawv xa kev nojqab nyobzoo ntau heev rau nej hauv tus Tswv, nrog rau pawgntseeg hauv nkawv tsev. 20 Tagnrho cov kwvtij puavleej xa kev nojqab nyobzoo rau nej. Ib leeg hais kev nojqab nyobzoo rau ib leeg nrog kev sibqawg dawbhuv.

21 Kuv, Paulus, sau kev nojqab nyobzoo rau nej los ntawm kuv txhais tes.

22 Yog leejtwg tsis hlub tus Tswv, cia nws raug tsawm. Malanathas!

23 Tus Tswv Yexus li vajhmoov nrog nej.

24 Kuv txojkev hlub nrog nej txhua tus hauv Khetos Yexus.