1 Paulus, tus timthawj, tsis tau raug neeg xa lossis los ntawm neeg, tabsis los ntawm Yexus Khetos thiab Txiv Vajtswv Ntuj, tus uas tau tsa Yexus tawm ntawm cov tuag, 2 thiab cov kwvtij sawvdaws nrog kuv,

Xa rau cov pawgntseeg hauv Kalatias.

3 Vajhmoov thiab kev thajyeeb rau nej los ntawm peb Txiv Vajtswv Ntuj thiab tus Tswv Yexus Khetos, 4 tus uas tau muab tuskheej theej peb tej kev txhaum kom peb raug cawm tawm ntawm tiam phem tamsis no, raws li peb Txiv Vajtswv Ntuj tus dejsiab. 5 Tshwjchim rau Nws mus ibtxhiab ibtxhis. Amees.

6 Kuv xav tsis thoob tias nej thim ceev npaud tawm ntawm tus uas tau hu nej saum Khetos vajhmoov mus rau lwm txojmoo zoo. 7 Tseeb tiag tsis muaj dua lwm txoj, tshwj tias muaj cov neeg nrhiav teebmeem rau nej thiab xav kom nej nrauj Khetos txojmoo zoo. 8 Yog peb lossis cov timtswv saum ntuj tshajtawm lwm txojmoo zoo uas tsis yog txoj peb tau tshajtawm rau nej, cia nws raug tsawm! 9 Ibyam li kuv twb hais rau nej lawm thiab kuv rovqab hais dua: Yog leejtwg tshajtawm txojmoo zoo txawv txoj uas nej tau txais lawm, cia nws raug tsawm!

10 Nimno kuv ho yuav chawj neeg lossis Vajtswv Ntuj? Lossis kuv tseem nrhiav kom ua haum neeg siab? Yog kuv tseem ua kom haum neeg, ces kuv tsis tau ua Khetos tus tubtxib.

11 Kuv qhia nej paub, cov kwvtij, tias txojmoo zoo uas kuv tau tshajtawm rau nej ntawd tsis yog neeg tug. 12 Rauqhov kuv tsis tau txais los ntawm neeg lossis raug neeg cob, tabsis los ntawm Yexus Khetos kev nthuav.

13 Nej tau hnov txog kuv lub koob hauv kevcai Yudais thaud, tias kuv tau tawmtsam Vajtswv Ntuj pawgntseeg hnyav heev thiab tau rhuav pawgntseeg. 14 Kuv kuj tau peem deb tshaj lwm tus Yixayees uas muaj hnubnyoog li kuv saum kevcai Yudais thiab tau ua tus mobsiab rau tej kabke uas tej yawgkoob tau coj los. 15 Tabsis thaum Vajtswv Ntuj, tus uas tau xaiv kuv hauv kuv niam lub plab thiab tau hu kuv saum Nws vajhmoov, tau raug siab 16 nthuav Nws tus Tub rau kuv kom kuv mus tshajtawm Nws rau pejkum neeg, tamsis ntawd kuv tsis tau sablaj rau nqaijtawv thiab rojntsha 17 lossis nce mus cuag cov xub ua timthawj pem Yeluxalees, tabsis kuv tau tawm mus rau Alanpias thiab tau rovlos rau Damaxes.

18 Tomqab ntawd peb xyoos, kuv thiaj tau nce mus saib Kefas hauv Yeluxalees thiab tau nrog nws nyob kaum-tsib hnub. 19 Kuv tsis tau paub lwm tus timthawj, tshwj unpaus, uas yog tus Tswv tus kwv. 20 Qhov kuv sau rau nej no, kuv hais ntawm Vajtswv Ntuj lub xubntiag tias kuv tsis dag. 21 Tomqab ntawd kuv tau los rau cheebtsam Xilias thiab Kilikias. 22 Kuv tsis tau raug paub hauv tej pawgntseeg hauv Yudas, cov uas nyob hauv Khetos. 23 Tsuas yog lawv tau hnov txog kuv xwb tias, “Tus uas tau tsimtxom peb thaud nimno ho tshajtawm txojkev ntseeg uas nws tau rhuav.” 24 Lawv kuj tau qhuas Vajtswv Ntuj saum kuv.

1 Tomqab kaum-plaub xyoos, kuv tau nce rovqab mus Yeluxalees nrog Npananpas thiab nrog Titus. 2 Kuv tau nce mus raws li nws raug nthuav rau kuv. Kuv kuj tau muab txojmoo zoo uas kuv tau tshajtawm rau pejkum neeg qhia rau lawv, rau cov uas ntxim yog thawjcoj twjywm, tsam kuv khiav lossis dhia dawbdo xwb. 3 Txawm Titus, tus neeg Kilis nrog kuv ntawd, kuj tsis tau raug yuam txiav tawv. 4 Thaum ntawd tau muaj cov kwvtij cuav uas tau ua txuj tuaj rau ib cag soj peb txojkev ywjpheej uas peb tau txais hauv Khetos Yexus, kom lawv tau quab peb ua qhev; 5 tabsis peb tsis tau muab ib lub sij los mloog lawv li, kom qhov tseeb ntawm txojmoo zoo yuav nyob los txog nej.

6 Cov neeg saib tuskheej tseemceeb ntawd zoo li cas? Lawv txawm zoo li cas los nws tsis txawv rau kuv. Vajtswv Ntuj tsis xaiv neeg ntsejmuag. Lawv tsis ntxiv dabtsi rau kuv. 7 Tabsis thaum lawv pom tias txojmoo zoo rau cov tsis txiavtawv tau raug muab cob rau kuv ibyam li cov txiavtawv rau Petus, 8 rauqhov tus uas ua haujlwm hauv Petus, tus timthawj rau cov txiavtawv, kuj tau ua haujlwm hauv kuv mus rau pejkum neeg. 9 unpaus, Kefas thiab Yauhas, cov uas yog ncej zeb, tau muab kev koomxeeb rau kuv thiab Npananpas, thaum lawv tau pom qhov vajhmoov uas tau raug muab rau kuv, kom wb mus rau pejkum neeg thiab lawv mus rau cov txiavtawv. 10 Lawv tsuas tau hais kom wb nco ntsoov cov pluag, uas yog tes haujlwm kuv tau txeev kubsiab ua.

11 Thaum Kefas tau tuaj rau Atiaukias, kuv tau sawv tawmtsam nws tim ntsejmuag tias, nws yog tus raug tsawm. 12 Vim tias uantej cov neeg ntawm unpaus tuaj txog, nws tau noj nrog pejkum neeg. Thaum lawv tuaj txog, nws tau thim thiab cais tuskheej tawm vim nws tau ntshai cov txiavtawv. 13 Lwm tus Yudais tau coj xyuam plhu ntsuav nrog nws, txog rau qhov uas Npananpas tau nrog lawv coj txojkev xyuam plhu ntawd. 14 Thaum kuv pom tias lawv tsis tau uaneej raws qhov tseeb ntawm txojmoo zoo, kuv tau hais rau Kefas ntawm sawvdaws xubntiag tias, “Koj yog Yudais, tabsis koj coj xwm li pejkum neeg, tsis coj li Yudais, koj ho yuam pejkum neeg kom kiavxeem ua Yudais lod?”

15 “Peb lub keeb yog Yudais thiab tsis yog neeg txhaum li pejkum neeg, 16 tabsis peb paub tias, neeg tsis raug xam ncajncees los ntawm haujlwm saum Kevcai, tsuas los ntawm kev ntseeg Khetos xwb. Peb twb ntseeg Yexus Khetos kom peb raug xam ncajncees los ntawm kev ntseeg Yexus Khetos es tsis los ntawm haujlwm saum Kevcai. Rauqhov neeg nqaijtawv tagnrho yuav tsis raug xam ncajncees los ntawm haujlwm saum Kevcai.”

17 “Yog tias peb nrhiav kev raug xam ncajncees hauv Khetos, peb ho pom tuskheej ua neeg txhaum, es Khetos puas yog tus tsa kev txhaum? Tsis lam yog li! 18 Yog kuv rovqab tsa tej uas kuv tau rhuav lawm, ces kuv ua timkhawv tias kuv yog neeg txhaum. 19 Vim los ntawm Kevcai, kuv tau tuag rau Kevcai kom kuv muajsia rau ntawm Vajtswv Ntuj. Kuv twb raug ntsia saum khaublig nrog Khetos lawm, 20 ces kuv tsis muajsia ntxiv lawm, tabsis Khetos muajsia hauv kuv. Txojsia, uas kuv muaj ntawm nqaijtawv nimno, kuv muaj los ntawm kev ntseeg hauv Vajtswv Ntuj tus Tub uas tau hlub kuv thiab tau muab tuskheej theej kuv. 21 Kuv tsis muab Vajtswv Ntuj vajhmoov xyeeb tseg, rauqhov yog kev ncajncees tawm ntawm Kevcai los, ces Khetos tau tuag dawbdo.”

1 Cov Kalatias ruam! Leejtwg tau xyav nej? Yexus Khetos tau raug muab nraj rau nej tej qhovmuag li tau raug ntsia saum khaublig. 2 Kuv tsuas xav kawm ib yam ntawm nej: Nej tau txais Vajtswv Ntsujplig los ntawm haujlwm saum Kevcai lossis los ntawm kev ntseeg? 3 Cas nej ruam ualuaj! Nej tau chiv ntawm Vajtswv Ntsujplig, tabsis nimno nej yuav ua kom tiav ntawm nqaijtawv lod? 4 Nej tau ntseeg qhuavqhuav lod? Tej ntawd tsuas nkim xwb? 5 Yog li ntawd, Vajtswv Ntuj muab Vajtswv Ntsujplig rau nej thiab ua hwjchim tshwm hauv nej los ntawm haujlwm saum Kevcai lossis ntawm nej kev ntseeg txojmoo zoo?

6 Ibyam li Anplahas, “Nws tau ntseeg Vajtswv Ntuj, thiab qhov ntawd tau raug xam ua kev ncajncees rau nws.” 7 Nej paub tias cov uas yug ntawm kev ntseeg yog Anplahas tej tub. 8 Thiab Vajlugkub twb xub pom uantej tias, los ntawm kev ntseeg pejkum neeg yuav raug xam ncajncees. Vajtswv Ntuj tau tshajtawm txojmoo zoo uantej rau Anplahas tias, “Txhua haivneeg yuav tau koobhmoov hauv koj.” 9 Yog li ntawd, los ntawm kev ntseeg lawv tau koobhmoov nrog Anplahas, tus ntseeg.

10 Rauqhov tawm ntawm haujlwm saum Kevcai, sawvdaws puavleej nyob hauv qab lolus tsawm. Vim nws twb sau tseg tias, “Raug tsawm yog txhua tus uas tsis niajhnub ceev txhua yam uas twb raug sau rau hauv phau Kevcai kom ua.” 11 Timkhawv tseeb yog li no tias, tsis muaj ib tug yuav raug xam ncajncees rau ntawm Vajtswv Ntuj los ntawm Kevcai, vim tias, “Tus ncajncees yuav muajsia los ntawm kev ntseeg.” 12 Kevcai tsis yog tawm ntawm kev ntseeg los, tabsis “Tus uas coj tej ntawd yuav muajsia los ntawm tej ntawd.” 13 Khetos tau txhiv peb tawm ntawm Kevcai lolus tsawm vim Nws tau raug tsawm this peb, rauqhov nws twb sau tseg tias, “Raug tsawm yog txhua tus uas dai saum ntoo,” 14 kom txoj koobhmoov ntawm Anplahas yuav dhau los rau pejkum neeg hauv Khetos Yexus, thiab kom peb txais txojlus cogtseg txog Vajtswv Ntsujplig los ntawm kev ntseeg.

15 Cov kwvtij, kuv hais raws noobneej. Leejtwg tsis muaj peevxwm ntxiv lossis rhuav tej lus hauv tus txhooj saws nyiaj qabnas uas tau raug tsa nramntej. 16 Tej lus cogtseg yog rau Anplahas thiab rau nws lub noob. Nws tsis hais tias, “rau koj tej noob” yam li rau coob tus tabsis yog rau ib tug xwb: “Rau koj lub noob,” uas yog Khetos. 17 Kuv hais li no: Kevcai, uas tau tshwmsim plaub puas pebcaug xyoo tomqab, tsis rhuav tus txhooj saws nyiaj qabnas uas Vajtswv Ntuj tau tsa thiab tsis txo tej lus cogtseg ntawd. 18 Rauqhov yog nyiaj qabnas raug faib raws Kevcai, ces tus txhooj saws nyiaj qabnas tsis tseemceeb dabtsi. Tabsis Vajtswv Ntuj tau nchuav vajhmoov rau Anplahas los ntawm kev coglus.

19 Yog li ntawd Kevcai zoo dabtsi? Vim kev txhaum, Kevcai thiaj tau raug muab ntxiv mus txog thaum lub noob los, lub uas twb coglus txog ntawd. Thiab Kevcai tau raug muab los ntawm cov timtswv rau tus neeg nruab nrab txhais tes. 20 Muaj tus neeg nruab nrab rau ob tog; tiamsis Vajtswv Ntuj yog ib tog.

21 Yog li ntawd ces, Kevcai kuj cuamtshuam Vajtswv Ntuj tej lus cogtseg? Tsis lam yog li! Rauqhov yog ib txoj kevcai uas tau raug muab los ntawd muab taus txojsia rau neeg, ces kev ncajncees kuj tshwm los ntawm Kevcai tiag. 22 Tabsis Vajlugkub tau xauv txhua yam hauv qab kev txhaum, kom txojlus cogtseg tawm ntawm kev ntseeg, xws li Yexus Khetos, yuav raug muab rau cov ntseeg.

23 Uantej kev ntseeg los txog, peb tau raug Kevcai ceev, raug kaw mus txog thaum kev ntseeg tshwm los. 24 Yog li ntawd, Kevcai yog tus zov peb, li tus zov menyuam, mus rau Khetos, kom peb raug xam ncajncees saum kev ntseeg. 25 Thaum kev ntseeg los txog, ces peb tsis nyob qab tswjhwm ntawm tus zov menyuam.

26 Nej tagnrho yog Vajtswv Ntuj menyuam los ntawm kev ntseeg hauv Khetos Yexus, 27 rauqhov nej tau rausdej rau hauv Khetos, ces nej tau hnav Khetos. 28 Tsis muaj Yudais lossis Kilis, qhev lossis ywjpheej, txivneej lossis pojniam, rauqhov nej sawvdaws yog tib tug hauv Khetos Yexus. 29 Ces yog nej yog Khetos tug, nej kuj yog Anplahas lub noob thiab cov saws nyiaj qabnas raws li txojlus cogtseg.

1 Kuv hais li no: Lub sijhawm thaum tus saws nyiaj qabnas tseem yau, nws tsis txawv tus qhev, txawm nws yog tus tswv txhua yam; 2 tabsis nws nyob qab tswjhwm ntawm cov zov nws thiab cov saibxyuas lub tsev mus txog rau lub caij uas nws txiv tau teem tseg. 3 Ibyam li ntawd, thaum peb tseem yau, peb tau raug ua qhev hauv qab tej ncej zeb tuav lub cejntug. 4 Tabsis thaum lub caijnyoog los txog, Vajtswv Ntuj tau xa Nws tus Tub los yug hauv ib tug pojniam hauv qab Kevcai, 5 kom Nws txhiv cov nyob hauv qab Kevcai thiab kom peb yuav raug saws ua menyuam. 6 Thiab vim nej yog cov tub, Vajtswv Ntuj tau xa Nws tus Tub tus Ntsujplig los rau hauv peb lub siab. Tus Ntsujplig ntawd hu nrovnrov tias, “Anpas, Txiv.” 7 Yog li no, koj tsis yog qhev ntxiv lawm tabsis yog tus tub; thiab vim koj yog tus tub, koj twb raug Vajtswv Ntuj tsa ua tus saws nyiaj qabnas.

8 Yav nram ntej thaum nej tsis tau paub Vajtswv Ntuj, nej tau ua qhev rau cov uas ibtxwm xeebtxawm tsis yog vajtswv. 9 Nimno nej tau paub Vajtswv Ntuj, tabsis tshaj ntawd Vajtswv Ntuj tau lees paub nej, ua li cas nej ho tig rovqab mus rau tej ncej zeb uas tsaugmuas thiab pluag ntawd? Nej xav rovqab mus ua qhev rau tej ntawd dua lod? 10 Nej tseem saib hnub, hli, caijnyoog, thiab xyoo rau tuskheej. 11 Kuv ntshai tsam kuv tau nkim kuv txojkev khwv rau nej.

12 Kuv thov nej, cov kwvtij, dhau zoo li kuv, rauqhov kuv twb dhau zoo li nej. Txhob ua tsis ncaj rau kuv. 13 Nej paub tias, kuv tau qhia txojmoo zoo rau nej vim kev mobnkeeg sab nqaijtawv. 14 Kuv lub cev tau ua kev simsiab rau nej, tabsis nej tsis tau txobthuam lossis nti qaubncaug rau kuv. Nej tau txais kuv li Vajtswv Ntuj tus timtswv, lossis li Yexus Khetos tuskheej. 15 Yog li ntawd, nej txoj koobhmoov dua twg lawm? Kuv ua timkhawv taus txog nej tias, yog nej ua tau mas ntshe nej twb muab nej tej qhovmuag rau kuv lawm. 16 Yog li ntawd, kuv ho dhau ua nej tus yeebncuab vim kev hais lus tseeb lod?

17 Lawv tau kubsiab nej rau txojkev tsis zoo, tabsis lawv xav ntxias nej tawm ntawm peb thiab kom nej kubsiab rau lawv. 18 Kev kubsiab yog qhov zoo, yog nej ibtxwm kubsiab hauv kev zoo, tsis yog thaum kuv nyob nrog nej xwb. 19 Kuv cov menyuam, kuv yuav rovqab mobsiab nej mus txog thaum Khetos raug xeeb rau hauv nej. 20 Kuv ntshaw nrog nej nyob thiab hloov kuv lub suab, rauqhov kuv txhawj txog nej.

21 Qhia kuv seb, nej cov uas xav nyob hauv qab Kevcai, nej tsis hnov Kevcai lod? 22 Rauqhov nws twb raug sau tias, Anplahas tau muaj ob tug tub, ib tug tawm ntawm tus ntxhais qhev thiab ib tug tawm ntawm tus pojniam ywjpheej. 23 Tabsis tus tawm ntawm tus ntxhais qhev twb yug los raws nqaijtawv, tabsis tus tawm ntawm tus pojniam ywjpheej twb yug los raws kev coglus.

24 Ob qhov no yog lus piv, rauqhov ob tug pojniam ntawd zoo li ob tug txhooj: Ib tug tshwm saum roob Xinais mus rau kev ua qhev. Nws yog Hankas. 25 Hankas zoo li lub roob Xinais nram Alanpias; nws ntos txog lub nroog Yeluxalees nimno, rauqhov nws thiab nws tej menyuam poob ua qhev. 26 Tabsis lub nroog Yeluxalees sab saud yog lub ywjpheej, uas yog peb niam, 27 rauqhov nws twb sau tseg tias:

28 Ces nej, cov kwvtij, yog menyuam saum kev coglus raws li Ixaj. 29 Thaud, tus tub uas tau yug raws nqaijtawv tau tsimtxom tus tub sab ntsujplig, ibyam li tamsis no thiab. 30 Tabsis Vajlugkub hais li cas? “Ntiab tus ntxhais qhev thiab nws tus tub tawm mus, rauqhov tus ntxhais qhev tus tub yuav tsis saws nyiaj qabnas nrog tus tub ntawm tus pojniam ywjpheej.” 31 Vim li no, cov kwvtij, peb tsis yog menyuam ntawm tus ntxhais qhev tabsis ntawm tus pojniam ywjpheej.

1 Khetos tau tso nej dim rau kev ywjpheej, yog li ntawd, sawv khovkho thiab txhob mus coj tus quab kev ua qhev. 2 Saib ntawm no, kuv, Paulus, qhia rau nej tias, yog nej txiavtawv, ces Khetos tsis muaj qabhau rau nej. 3 Kuv rovqab ua timkhawv txog txhua leej uas muab tuskheej txiavtawv tias, nws yog tus yuavtsum coj Kevcai tagnrho. 4 Nej cov uas ntshaw kev raug xam ncajncees saum Kevcai twb raug txiav tawm ntawm Khetos thiab twb poob ntawm vajhmoov lawm. 5 Rauqhov los ntawm Vajtswv Ntsujplig, peb samsim tos txojkev ciasiab saum kev ncajncees raws kev ntseeg. 6 Rauqhov hauv Khetos Yexus, kev txiavtawv thiab kev tsis txiavtawv tsis muaj hwjchim dabtsi, tabsis kev ntseeg nwskheej ua haujlwm tawm ntawm kev hlub.

7 Nej tau khiav zoozoo. Leejtwg tau txwv nej kom txhob ntseeg qhov tseeb? 8 Txojkev yaum ntawd tsis yog tawm ntawm tus uas tau hu nej. 9 “Ib qhov keeb yuav qab thoob tsus mov.” 10 Kuv ruajsiab rau nej hauv tus Tswv tias, nej yuav tsis xav lwm yam ntxiv lawm. Hos tus uas ua teebmeem rau nej ntawd yuav raug kev teemtxim. Txawm nws yov yog leejtwg los xij. 11 Cov kwvtij, yog kuv tseem tshajtawm txog kev txiavtawv, vim li cas kuv ho raug tsimtxom? Yog ua li, ces tus tswjtsiag ntawm tus khaublig twb raug rhuav lawm. 12 Kheev lam cov uas thab nej ntawd muab tuskheej sam kiag.

13 Nej tau raug hu los rau kev ywjpheej, cov kwvtij. Tsuav nej txhob siv kev ywjpheej mus nrhiav sab nqaijtawv, tabsis ibleeg tiam ibleeg los ntawm kev hlub. 14 Rauqhov txhua nqe kevcai xaus rau tib nqe no: “Hlub tus ntawm togtsev li koj tuskheej.” 15 Yog nej ibleeg ntxo thiab noj ibleeg, ceevfaj tsam nej ibleeg yuav ua rau ibleeg puastsuaj.

16 Ces kuv hais li no, uaneej nrog Vajtswv Ntsujplig thiab txhob ntim kev ntshaw nqaijtawv rau hauv tuskheej. 17 Rauqhov nqaijtawv ntshaw tej uas tawmtsam Vajtswv Ntsujplig, thiab Vajtswv Ntsujplig tawmtsam nqaijtawv. Tej no sib tawmtsam, kom nej txhob ua tej uas nej ntshaw. 18 Yog nej raug Vajtswv Ntsujplig coj, ces nej tsis nyob hauv qab Kevcai.

19 Tej haujlwm ntawm nqaijtawv tshwm meej rau qhovmuag pom, uas yog kev vuabtsuab, kev qias, kev ywjsiab, 20 kev pe mlom, kev quav yeeb, kev ntxub ntxaug, kev sibceg, kev khib, kev npautaws, kev cibnyeej, kev sibtawg, kev khav ntse, 21 kev ntshaw luag tug, kev quav cawv, kev lomsab thiab tej uas zoo li no. Kuv hais rau nej, ibyam kuv tau hais rau nej nramntej, tias tej neeg uas ua tej no yuav tsis saws Vajtswv Ntuj lub tswvkuj li.

22 Tabsis lub txiv ntawm Vajtswv Ntsujplig yog kev hlub, kev zoo siab, kev thajyeeb, kev siabntev, kev siabdawb, kev coj zoo, kev ntseeg, 23 kev coj tus, kev tswj tuskheej. Tsis muaj kevcai txwv tej no. 24 Cov uas yog Yexus Khetos tug tau muab nqaijtawv ntsia saum khaublig nrog nws tej kev nyiam thiab kev ntshaw. 25 Yog peb muajsia los ntawm Vajtswv Ntsujplig, cia peb taugkev caum Vajtswv Ntsujplig thiab. 26 Cia peb txhob dhau ua cov khav ntawm ntug cub, ibleeg twv ntxhias rau ibleeg, thiab ibleeg ntshaw ibleeg tug.

1 Cov kwvtij, yog ib tug neeg mag kev txhaum dabtsi khi, nej cov uas nyob sab ntsujplig pab tso nws tawm los ntawm kev cojtus ntawm tus Ntsujplig, tabsis saib tuskheej tibzoo tsam koj tuskheej raug ntxias. 2 Nej ibleeg ris ibleeg lub nra, es nej thiaj ua tiav Khetos txoj kevcai. 3 Rauqhov yog leejtwg xam tuskheej ua neeg tseemceeb thaum nws tsis yog, nws tsuas dag tuskheej saum hlwb xwb. 4 Cia nej nyias sojntsuam nyias tes haujlwm thiab khav hauv nyias tuskheej xwb, txhob piv tuskheej rau lwm tus, 5 vim nyias yuav ris nyias lub nra.

6 Cia tus uas txais txojlus faib txhua yam zoo rau tus cob nws. 7 Txhob plaskev, Vajtswv Ntuj thiaj tsis raug hnyos. Neeg tseb lub noob dabtsi, nws kuj yuav sau yam ntawd. 8 Tus neeg uas tseb sab nqaijtawv yuav tau sau kev puasntsoog ntawm nqaijtawv rau tuskheej, tabsis tus neeg uas tseb sab ntsujplig yuav tau sau txojsia ibtxhis ntawm tus Ntsujplig. 9 Yog peb tsis nkees ua zoo, peb yuav tsis dhuav sau kev zoo thaum txog lub caij sau. 10 Yog li ntawd, thaum peb tseem muaj caij, cia peb ua zoo rau txhua leej, tshwjxeeb rau tsevneeg ntseeg.

11 Saib kuv xuas tes sau tej niag tus ntawv lojloj. 12 Leejtwg xav tau ntsejmuag saum nqaijtawv, lawv yuav yaum nej txiavtawv. Lawv tsuas ua li ntawd kom lawv txhob raug tsimtxom this Khetos tus khaublig. 13 Rauqhov cov uas txiavtawv twb ceev tsis tau Kevcai, mas lawv tsuas xav muab nej txiavtawv, kom lawv khav tau ntawm nej sab nqaijtawv. 14 Kuv tsis lam khav, tshwj rau saum peb tus Tswv Yexus Khetos tus khaublig. Los ntawm Khetos, lub cejntug raug ntsia saum khaublig rau kuv thiab kuv rau lub cejntug. 15 Rauqhov kev txiavtawv thiab tsis txiavtawv tsis tseemceeb dabtsi, tabsis qhov tseemceeb yog kev raug tsim dua tshiab. 16 Kev thajyeeb thiab kev tabncuab rau cov uas cogcag rau nqe lus no, thiab rau Vajtswv Ntuj haivneeg Yixayees.

17 Thaum kawg no, txhob cia leejtwg tsub kev khwv rau kuv, vim tias kuv ris Yexus tej cawspliav ntawm kuv lub cev.

18 Vajhmoov ntawm peb tus Tswv Yexus Khetos nyob nrog nej tus ntsujplig, cov kwvtij. Amees.