1 Qhov uas yeej nyob thaum chivkeeb los, qhov uas peb twb hnov, qhov uas peb twb pom ntawm peb qhovmuag, qhov uas peb tau saib thiab peb txhais tes tau tuav ntsig txog txojlus muajsia-- 2 thiab txojsia tau tshwm los; peb twb pom, tau ua timkhawv, thiab tau tshajtawm rau nej, txog txojsia ibtxhis uas tau nyob ntawm Leej Txiv xubntiag thiab tau tshwm rau peb-- 3 qhov uas peb twb pom thiab twb hnov ntawd, peb tau tshajtawm rau nej kom nej yov muaj kev koomxeeb nrog peb. Peb txojkev koomxeeb yog nrog Leej Txiv thiab Nws tus Tub, Yexus Khetos. 4 Peb sau tej no rau nej kom peb txojkev zoo siab yuav tiav.

5 Qhov no yog txojlus uas peb twb hnov ntawm Nws thiab peb tau tshajtawm rau nej tias, Vajtswv Ntuj yog qhov kaj thiab qhov tsaus tsis nyob hauv Nws li. 6 Yog peb hais tias, peb muaj kev koomxeeb nrog Nws tabsis ho uaneej hauv qhov tsaus, peb dag tuskheej thiab tsis coj qhov tseeb. 7 Yog peb uaneej hauv qhov kaj ibyam li Nws nyob hauv qhov kaj, peb ibleeg muaj kev koomxeeb nrog ibleeg thiab Nws tus Tub Yexus cov ntshav ntxuav peb tawm ntawm kev txhaum tagnrho.

8 Yog peb hais tias, peb tsis muaj kev txhaum, peb tuskheej plaskev lawm thiab qhov tseeb tsis nyob hauv peb. 9 Yog peb lees peb tej kev txhaum, Nws yeej txaus ntseeg thiab ncajncees, Nws yuav zam peb tej kev txhaum thiab ntxuav peb ntawm tej kev qias tagnrho. 10 Yog peb hais tias, peb tsis tau ua txhaum, ces peb muab Nws ua tus dag, thiab Nws txojlus tsis nyob hauv peb.

1 Kuv cov menyuam, kuv sau tej no rau nej kom nej txhob ua txhaum. Thiab yog leejtwg ua txhaum, peb muaj ib tug txivlus rau ntawm Leej Txiv, xws li Yexus Khetos, tus ncajncees. 2 Nws yog tus theej peb tej kev txhaum, tsis yog peb tej xwb tabsis tagnrho lub cejntug li tibsi.

3 Hauv qhov no peb thiaj paub tias, peb twb paub Nws: Yog peb ceev Nws tej lus tawmcai. 4 Tus uas hais tias, “Kuv tau paub Nws,” tabsis tsis ceev Nws tej lus tawmcai, ces tus ntawd yog tus dag thiab qhov tseeb tsis nyob hauv nws. 5 Yog leejtwg ceev Nws txojlus, Vajtswv Ntuj txojkev hlub twb tiav rau hauv tus ntawd lawm tiag. Hauv qhov no peb thiaj paub tias peb nyob hauv Nws: 6 Leejtwg uas hais tias nws zwm hauv Yexus kuj tsimnyog yov uaneej ibyam li Yexus tau ua.

7 Cov kuv hlub, kuv tsis sau ib nqe lus tawmcai tshiab rau nej, tabsis nqe lus tawmcai qub uas nej tau muaj thaum chivkeeb los xwb. Nqe lus tawmcai qub yog txojlus uas nej tau hnov. 8 Kuv sau dua nqe lus tawmcai tshiab rau nej, uas yog qhov tseeb hauv Nws thiab hauv peb, tias kev tsausntuj samsim dhau mus tabsis qhov kaj tseeb twb ci lawm.

9 Tus uas hais tias nws nyob hauv qhov kaj tabsis ntxub nws tus kwvtij tseem nyob hauv qhov tsaus qees. 10 Tus uas hlub nws tus kwvtij zwm hauv qhov kaj thiab nws tsis muaj qhov dawm ntog hauv nws. 11 Tabsis tus uas ntxub nws tus kwvtij nyob hauv qhov tsaus, uaneej hauv qhov tsaus, thiab tsis paub mus qhovtwg, rauqhov qhov tsaus twb npog nws ob lub qhovmuag lawm.

15 Txhob hlub lub cejntug thiab tej uas nyob hauv lub cejntug. Yog leejtwg hlub lub cejntug, Leej Txiv txojkev hlub tsis nyob hauv nws. 16 Rauqhov txhua yam hauv lub cejntug--kev vum sab nqaijtawv, kev ntshaw ntawm lub qhovmuag, txojkev khav hauv lub neej--tsis tawm ntawm Leej Txiv los, tabsis tej ntawd yog lub cejntug tug. 17 Lub cejntug thiab nws txojkev ntshaw samsim dua mus tabsis leejtwg uas ua Vajtswv Ntuj tus dejsiab zwm hauv Nws mus ibtxhis.

18 Cov menyuam, nimno yog lub sijhawm kawg. Ibyam li nej twb hnov tias, tus khetos cuav samsim los, thiab nimno coob tus khetos cuav tau tshwmsim lawm. Tawm ntawm qhov no peb paub tias nimno yog lub sijhawm kawg. 19 Lawv tau tawm ntawm peb mus tabsis lawv tsis tau nyob hauv peb. Rauqhov yog lawv tau nyob hauv peb, lawv twb yov zwm uake nrog peb. Tabsis qhov lawv tawm ntawd tau nthuav meej tias lawv txhua tus tsis tau nyob hauv peb.

20 Nej kuj tau txais roj pleev los ntawm tus Dawbhuv thiab paub txhua yam. 21 Kuv tsis sau rau nej vim nej tsis paub qhov tseeb tabsis vim nej paub qhov tseeb, thiab txhua tus dag tsis yog tawm hauv qhov tseeb los. 22 Leejtwg yog tus dag? Tus uas tsis lees tias Yexus yog Khetos, tus ntawd yog tus khetos cuav. Nws tsis lees Leej Txiv thiab Leej Tub. 23 Txhua tus uas tsis lees Leej Tub kuj tsis txais Leej Txiv. Leejtwg uas lees Leej Tub kuj txais Leej Txiv.

24 Cia qhov uas nej tau hnov thaum chiv ntawd zwm rau hauv nej. Yog qhov uas nej tau hnov thaum chiv ntawd zwm hauv nej, ces nej thiaj zwm rau hauv Leej Tub thiab hauv Leej Txiv. 25 Qhov uas Nws tau coglus rau peb ntawd yog txojsia ibtxhis.

26 Kuv sau tej no rau nej ntsig txog cov uas coj nej plaskev. 27 Yog qhov roj pleev uas nej tau txais ntawd zwm hauv nej, ces nej tsis muaj kev cheemtsum kom leejtwg qhia nej. Tabsis ibyam li Nws qhov roj pleev ntawd qhia nej ntsig txog txhua yam, thiab qhov roj pleev ntawd yog tus tseeb thiab tsis yog tus cuav. Zwm hauv Nws ibyam li Nws tau qhia nej.

28 Thiab nimno, cov menyuam, zwm hauv Nws kom thaum Nws tshwm plaws los, peb yuav ruajsiab thiab tsis txajmuag rau ntawm Nws sijhawm Nws los. 29 Yog nej paub tias Nws ncajncees, nej kuj paub tias txhua tus uas ua kev ncajncees twb yug tawm ntawm Nws.

1 Saib, Leej Txiv twb muab txojkev hlub loj npaum li cas rau peb, kom peb yov raug hu ua Vajtswv Ntuj menyuam, thiab peb yog tiag! Vim qhov no, lub cejntug tsis paub peb, rauqhov nws tsis tau paub Vajtswv Ntuj. 2 Cov uas kuv hlub, nimno peb yog Vajtswv Ntuj menyuam, thiab qhov uas peb yuav zoo li cas ntawd tseem tsis tau raug nthuav tawm. Tabsis peb paub tias, thaum Nws tshwm plaws los, peb yuav zoo nkaus li Nws, rauqhov peb yuav pom Nws zoo nkaus li Nws tuskheej ntag. 3 Txhua tus uas muaj txojkev ciasiab no yuav ntxuav tuskheej dawbhuv ibyam li Nws yog tus dawbhuv.

4 Txhua tus uas ua kev txhaum kuj tsis coj cai, thiab kev txhaum yog kev hla cai. 5 Peb paub tias Nws tau tshwmsim los kom Nws yuav ris kev txhaum, tabsis kev txhaum tsis nyob hauv Nws. 6 Txhua tus uas zwm hauv Nws tsis ua txhaum ntxiv. Hos txhua tus uas tseem ua txhaum tsis tau pom Nws thiab tsis tau paub Nws.

7 Cov menyuam, txhob cia leejtwg coj nej plaskev. Tus uas ua kev ncajncees yog tus ncajncees, ibyam li Nws yog tus ncajncees. 8 Tus uas ua kev txhaum yog tawm ntawm ntxwgnyoog los, rauqhov ntxwgnyoog txeev tau ua txhaum thaum chivkeeb los. Vajtswv Ntuj tus Tub tau tshwmsim los rau qhov no, kom Nws yuav rhuav ntxwgnyoog tes haujlwm. 9 Txhua tus uas twb yug los ntawm Vajtswv Ntuj tsis ua kev txhaum ntxiv, rauqhov Nws lub noob zwm hauv tus ntawd; thiab nws tsis muaj peevxwm ua txhaum, vim nws twb yug los ntawm Vajtswv Ntuj. 10 Qhov no nthuav Vajtswv Ntuj cov menyuam thiab ntxwgnyoog cov menyuam rau qhovmuag pom: Txhua tus uas tsis ua kev ncajncees tsis yog tawm ntawm Vajtswv Ntuj los, thiab tus uas tsis hlub nws tus kwvtij kuj ibyam.

11 Rauqhov qhov no yog zaj lus uas nej tau hnov thaum chiv: Kom peb ibleeg hlub ibleeg. 12 Txhob zoo li Kaees, tus uas tau tawm ntawm ntxwgnyoog los thiab tau tua nws tus kwv. Vim qhov dabtsi nws tau tua nws tus kwv? Vim nws tej haujlwm phem tabsis nws tus kwv tej haujlwm ncajncees. 13 Txhob ceeb, cov kwvtij, yog lub cejntug ntxub nej. 14 Peb paub tias peb twb hla dhau kev tuag mus rau txojsia, vim peb hlub peb cov kwvtij. Tus uas tsis hlub tseem nyob hauv kev tuag. 15 Txhua tus uas ntxub nws tus kwvtij yog neeg tuaneeg, thiab nej paub tias txhua tus neeg tuaneeg tsis muaj txojsia ibtxhis hauv Nws.

16 Los ntawm qhov no peb paub kev hlub, tias Yexus Khetos tau muab Nws tuskheej theej peb. Ces peb tsimnyog muab tuskheej mus theej peb tej kwvtij. 17 Yog leejtwg muaj lub neej zoo hauv lub cejntug thiab pom nws tus kwvtij muaj kev cheemtsum, tabsis nws ho kaw nws lub siabntsws rau tus kwvtij ntawd, Vajtswv Ntuj txojkev hlub yuav ua li cas nyob hauv nws? 18 Cov menyuam, txhob hlub ntawm lolus lossis ntawm lub ncauj, tabsis hlub nrog tes haujlwm thiab qhov tseeb.

19 Los ntawm qhov no peb paub tias peb nyob hauv qhov tseeb thiab peb yuav ruajsiab hauv siab rau ntawm Nws xubntiag: 20 Thaum peb lub siab nkaug peb, Vajtswv Ntuj loj dua peb lub siab thiab Nws paub txhua yam. 21 Cov uas kuv hlub, yog peb lub siab tsis nkaug peb, peb muaj kev ruajsiab rau ntawm Vajtswv Ntuj. 22 Ces peb taij dabtsi, peb yuav txais yam ntawd, rauqhov peb ceev Nws tej lus tawmcai thiab ua tej uas raug Nws siab. 23 Tej no yog Nws cov lus tawmcai: Kom peb ntseeg Nws tus Tub Yexus Khetos lub npe thiab ibleeg hlub ibleeg, raws nraim li Nws tau tawmcai rau peb. 24 Tus uas ceev Nws tej lus tawmcai kuj nyob hauv Nws thiab Nws nyob hauv tus ntawd. Los ntawm qhov no peb paub tias Nws nyob hauv peb: Los ntawm tus Ntsujplig uas Nws tau muab rau peb.

1 Cov uas kuv hlub, txhob ntseeg txhua tus ntsujplig tabsis sojntsuam tej ntsujplig seb puas yog tawm ntawm Vajtswv Ntuj los, rauqhov ntau tus ntsujplig cevlus cuav tau tawm los rau hauv lub cejntug lawm. 2 Los ntawm qhov no nej yuav paub Vajtswv Ntuj tus Ntsujplig: Txhua tus Ntsujplig uas lees tias Yexus Khetos tau tshwmsim los ua nqaijtawv yog tawm ntawm Vajtswv Ntuj los; 3 thiab txhua tus ntsujplig uas tsis lees Yexus tsis yog tawm ntawm Vajtswv Ntuj los, tus ntawd yog tus ntsujplig ntawm tus khetos cuav, uas nej twb hnov tias yuav los, thiab nimno nws nyob hauv lub cejntug lawm.

4 Nej yog tawm ntawm Vajtswv Ntuj los, cov menyuam, thiab nej twb kovyeej lawv lawm, rauqhov tus uas nyob hauv nej loj dua tus uas nyob hauv lub cejntug. 5 Lawv yog cov tawm hauv lub cejntug los, vim li no, lawv hais txog tej hauv lub cejntug thiab lub cejntug mloog lawv. 6 Peb yog cov tawm ntawm Vajtswv Ntuj los, tus uas paub Vajtswv Ntuj thiaj mloog peb, hos tus uas tsis yog tawm ntawm Vajtswv Ntuj los yuav tsis mloog peb. Ntawm qhov no peb paub tus ntsujplig tseeb thiab tus ntsujplig plaskev.

11 Cov uas kuv hlub, yog Vajtswv Ntuj tau hlub peb li no, peb ibleeg tsimnyog hlub ibleeg. 12 Leejtwg tsis tau pom Vajtswv Ntuj. Yog peb ibleeg hlub ibleeg, Vajtswv Ntuj nyob hauv peb thiab Nws txojkev hlub twb tiav hauv peb lawm.

13 Los ntawm qhov no peb paub tias peb nyob hauv Nws thiab Nws nyob hauv peb: Nws twb muab Nws tus Ntsujplig rau peb. 14 Peb twb pom thiab niajhnub ua timkhawv tias, Leej Txiv tau xa Nws tus Tub los ua tus Cawmseej rau lub cejntug. 15 Yog leejtwg lees tias Yexus yog Vajtswv Ntuj tus Tub, Vajtswv Ntuj nyob hauv tus ntawd thiab nws nyob hauv Vajtswv Ntuj. 16 Yog li ntawd, peb twb paub thiab twb ruajsiab rau txojkev hlub uas Vajtswv Ntuj muaj rau peb.

Vajtswv Ntuj yog kev hlub. Tus uas nyob hauv kev hlub kuj nyob hauv Vajtswv Ntuj thiab Vajtswv Ntuj nyob hauv nws. 17 Los ntawm qhov no, kev hlub raug ua tiav hauv peb: Peb muaj kev ruajsiab rau hnub txiavtxim, rauqhov Nws zoo li cas, peb kuj zoo nkaus li ntawd hauv lub cejntug no. 18 Kev ntshai tsis nyob hauv kev hlub. Tabsis kev hlub zoo kawg nkaus ntiab kev ntshai tawm, rauqhov kev ntshai tuav rawv lus nkaug. Tus uas tseem ntshai tsis tau peemtsheej ua tus zoo kawgnkaus hauv kev hlub.

19 Peb hlub rauqhov Nws tau xub hlub peb. 20 Yog leejtwg hais tias, “Kuv hlub Vajtswv Ntuj,” tabsis ntxub nws kwvtij, tus ntawd yog tus dag. Rauqhov yog nws tsis hlub nws tus kwvtij uas nws twb pom, nws tsis muaj peevxwm hlub Vajtswv Ntuj tus uas nws twb tsis pom. 21 Qhov no yog nqe lus tawmcai uas peb tau txais ntawm Nws: Tus uas hlub Vajtswv Ntuj hlub nws tus kwvtij thiab.

1 Txhua tus uas ntseeg tias Yexus yog Khetos twb yug los ntawm Vajtswv Ntuj, thiab txhua tus uas hlub Leej Txiv kuj hlub Nws tus menyuam. 2 Los ntawm qhov no peb paub tias peb hlub Vajtswv Ntuj cov menyuam: Yog peb hlub Vajtswv Ntuj thiab peb coj Nws tej lus tawmcai. 3 Rauqhov qhov no yog Vajtswv Ntuj kev hlub: Kom peb ceev Nws tej lus tawmcai. Thiab Nws tej lus tawmcai tsis hnyav. 4 Txhua tus uas twb yug los ntawm Vajtswv Ntuj tau kovyeej lub cejntug, thiab qhov no yog txojkev kovyeej uas tau kovyeej lub cejntug: Peb txojkev ntseeg. 5 Leejtwg yog tus kovyeej lub cejntug? Tsuas yog tus uas ntseeg tias Yexus yog Vajtswv Ntuj tus Tub.

6 Yexus Khetos yog tus uas los ntawm dej thiab ntshav, tsis yog los ntawm dej xwb, tabsis los ntawm dej thiab ntshav tibsi. Vajtswv Ntsujplig yog tus ua timkhawv, rauqhov Vajtswv Ntsujplig yog tus tseeb. 7 Rauqhov muaj peb tug ua timkhawv: 8 Vajtswv Ntsujplig, dej thiab ntshav. Thiab peb tug ua timkhawv tibyam. 9 Yog peb txais neeg qhov timkhawv, Vajtswv Ntuj qhov timkhawv haj loj dua rauqhov qhov no yog Vajtswv Ntuj qhov timkhawv, uas Nws twb muab timkhawv ntsig txog Nws tus Tub. 10 Tus uas ntseeg Vajtswv Ntuj tus Tub muaj qhov timkhawv no hauv nws tuskheej. Tus uas tsis ntseeg, Vajtswv Ntuj twb muab Nws ua tus dag, rauqhov nws tsis ntseeg qhov timkhawv uas Vajtswv Ntuj twb muab timkhawv ntsig txog Nws tus Tub. 11 Qhov timkhawv ntawd yog li no: Vajtswv Ntuj tau muab txojsia ibtxhis rau peb thiab txojsia no nyob hauv Nws tus Tub. 12 Tus uas muaj tus Tub kuj muaj txojsia; tus uas tsis muaj Vajtswv Ntuj tus Tub tsis muaj txojsia.

13 Kuv sau tej no rau nej cov uas ntseeg Vajtswv Ntuj tus Tub lub npe kom nej yov paub tias nej muaj txojsia ibtxhis. 14 Thiab qhov no yog txojkev ruajsiab uas peb muaj rau ntawm Nws: Yog peb taij dabtsi raws Nws tus dejsiab, Nws hnov peb. 15 Yog peb paub tias Nws hnov tej uas peb taij, peb kuj paub tias peb yuav txais tej uas peb tau taij ntawm Nws.

16 Yog leejtwg pom nws ib tug kwvtij tau ua txhaum, txojkev txhaum uas tsis coj mus rau kev tuag, thiab taij rau nws, ces Vajtswv Ntuj yuav muab txojsia rau nws. Kuv hais txog cov uas tau ua txojkev txhaum uas tsis coj mus rau kev tuag. Muaj txojkev txhaum uas coj mus rau kev tuag. Kuv tsis hais kom nws taij txog yam ntawd. 17 Txhua yam kev tsis ncajncees yog kev txhaum, thiab nws muaj kev txhaum uas tsis coj mus rau kev tuag.

18 Peb paub tias txhua leej uas twb yug los ntawm Vajtswv Ntuj tsis ua txhaum ntxiv; tus uas yug ntawm Vajtswv Ntuj ceev tuskheej cia thiab ntxwgnyoog yuav tsis ntes nws. 19 Peb paub tias peb yog tawm ntawm Vajtswv Ntuj los thiab lub cejntug tagnrho nyob qab tswjhwm ntawm ntxwgnyoog. 20 Peb paub tias Vajtswv Ntuj tus Tub tau los thiab tau muab kev totaub rau peb, kom peb paub tus tseeb. Peb nyob hauv tus tseeb yog nyob hauv Nws tus Tub Yexus Khetos. Nws yog tus Vajtswv Ntuj tseeb thiab txojsia ibtxhis.

21 Cov menyuam, ceev nej tuskheej tawm ntawm tej mlom.