1 Yakaunpaus, Vajtswv Ntuj thiab Tswv Yexus Khetos tus tubtxib,

Xa rau kaum-ob xeem uas tau ri mus nyob rau pejkum tebchaws.

Nyobzoo.

2 Kuv cov kwvtij, xam ua kev zoosiab tagnrho thaum nej poob rau tej kev simsiab ntau yam. 3 Nej paub tias kev ceem nej txojkev ntseeg ua rau nej siabntev. 4 Cia kev siabntev ua haujlwm tiav, xwv nej yuav dhau ua cov paubtab thiab zoo txhua fab, tsis tshuav ibyam dabtsi. 5 Tabsis yog nej leejtwg tuncua tswvyim, cia nws taij Vajtswv Ntuj, tus uas pub txhua yam npluamias thiab tsis thuam leejtwg, ces Vajtswv Ntuj yuav muab rau nws. 6 Taij los ntawm kev ntseeg, txhob ua xyemxyav, rauqhov tus uas ua xyemxyav zoo li cov dej hiavtxwv uas raug cua ntsawj, ntas mus ntas los. 7 Nws txhob xav tias nws yuav tau txais dabtsi ntawm tus Tswv. 8 Tus neeg uas ua ob siab sawv tsis ruaj rau nws txhua txojkev.

9 Cia tus kwvtij txomnyem khav hauv nws txojkev tau zoo 10 thiab tus muaj txiag khav hauv nws txojkev txomnyem vim tias nws samsim yuav dua mus li lub paj nroj. 11 Rauqhov lub hnub tau tawm tuaj kub thiab ziab tsob nroj; lub paj tau poob thiab nws lub ntsejmuag zoo nkauj tau puastsuaj. Tus neeg muaj txiag lub neej yuav suajkaum ibyam li ntawd.

12 Tau koobhmoov yog tus neeg uas tiv dhau kev simsiab, vim tias tomqab raug ceem dhau, nws yuav txais lub mom yeebkoob txojsia uas Vajtswv Ntuj tau coglus rau cov hlub Nws.

13 Txhob cia tus raug simsiab hais tias, “Vajtswv Ntuj sim kuv siab.” Vim tias Vajtswv Ntuj tsis raug simsiab los ntawm kev phem thiab Nws tsis sim leejtwg siab. 14 Tabsis txhua leej raug simsiab thiab raug ntxias los ntawm nws txojkev ntshaw; 15 tomqab kev ntshaw xeeb rau hauv hlwb lawm ces nws yuav xya kev txhaum, thiab thaum kev txhaum loj tiav ces nws yuav xya kev tuag.

16 Txhob raug ntxias mus plaskev, cov kwvtij uas kuv hlub. 17 Txhua yam zoo thiab tsimtxiaj kawgnkaus yog los saum ntuj, saum leej Txiv ntawm qhov kaj los, tus uas tsis hloov ib qhov lossis txav li tus duabntxoo. 18 Raws li Nws tus dejsiab, Nws tau muab peb yug los ntawm txojlus tseeb, kom peb yog cov thawj qoob hauv tej Nws tsim.

19 Cov kwvtij uas kuv hlub, paub qhov no: Cia txhua leej maj mloog tabsis txhob maj hais thiab txhob maj chim, 20 vim tias neeg txojkev chim yeej tsis ua rau Vajtswv Ntuj txojkev ncajncees tiav. 21 Yog li ntawd, tso txhua yam ceb thiab tej kev phem tseg, tabsis, los ntawm lub siabmos siabmuag, txais txojlus uas tau cog rau hauv nej vim nws muaj hwjchim cawm nej txojsia.

22 Ua cov coj txojlus; txhob ua cov uas hnov thiab ho rovdag nej tuskheej. 23 Vim tias tus uas hnov txojlus tabsis tsis coj, ces nws zoo li tus uas saib nws lub ntsejmuag ib muag hauv daim iav. 24 Thaum nws saib tuskheej tag, nws tau tawm mus thiab ibpliag nws tau hnovqab tias nws zoo li cas. 25 Tabsis tus tau saib tuskheej hauv txoj kevcai zoo kawgnkaus, txoj uas muab kev twjlij, thiab tsis tau txav tawm, mas nws tsis yog tus neeg hnov tag es tsis nco, tabsis nws yog tus neeg nqis tes ua. Nws yuav tau koobhmoov los ntawm nws tes haujlwm.

26 Yog leejtwg xam tias nws yog neeg teev Vajtswv Ntuj zoo tabsis tsis xauv nws tus nplaig, nws tsuas rovdag nws lub siab xwb; nws txojkev teev Vajtswv Ntuj tsis muaj txiajntsig dabtsi. 27 Txojkev teev Vajtswv Ntuj dawbhuv thiab tsis muaj chaw hais rau ntawm Txiv Vajtswv Ntuj xubntiag yog li no: Ncig mus pab tej menyuam ntsuag thiab pojntsuam uas raug txomnyem, thiab ceev tuskheej kom txhob tsuas lub cejntug.

1 Kuv cov kwvtij, txhob muaj kev ntseeg ntawm peb tus Tswv Yexus Khetos, tus muaj tshwjchim, nrog kev xaiv ntsejmuag. 2 Yog ib tug txivneej coj nplhaib kub thiab hnav dudais tuaj hauv nej lub txoos sablaj thiab ho muaj ib tug hnav khaub hlab hnyo tuaj. 3 Yog nej pom tus hnav tsoos dudais thiab hais rau nws tias, “Zaum lub chaw zoo,” tabsis ho hais rau tus pluag tias, “Sawv rau ntawd” lossis “Zaum kuv lub rooj tiagtaw,” 4 tsis yog nej xaiv ntsejmuag nruab nrab nej thiab dhau ua cov txiavtxim raws tej kev xav phem lod?

5 Mloog kuv hais, cov kwvtij uas kuv hlub. Tsis yog Vajtswv Ntuj tau xaiv cov pluag hauv lub cejntug los ua cov npluanuj sab kev ntseeg thiab ua cov saws lub tswvkuj uas Nws tau coglus rau cov hlub Nws lod? 6 Tabsis nej ho tsis hwm tus pluag! Cov npluanuj tsis yog cov muaj peevxwm tsimtxom nej thiab cov cab nej mus hauv tsev txiavtxim lod? 7 Lawv tsis yog cov thuam lub npe zoo uas nej ris lod?

8 Yog nej coj txoj kevcai meejtswv raws li Vajlugkub tias, “Hlub koj tus kwvtij zejzog yam tuskheej,” ces nej ua zoo lawm. 9 Tabsis yog nej xaiv ntsejmuag, nej tau ua txhaum thiab raug kevcai rhuav ua cov neeg txhaum cai. 10 Rauqhov tus uas coj tagnrho kevcai tabsis ho dawm ib nqe, nws twb yog tus txhaum txhua nqe huvsi. 11 Vim tus uas tau hais tias, “Txhob deev luag poj luag txiv,” kuj tau hais tias, “Txhob tuaneeg.” Txawm koj tsis deev luag poj luag txiv tabsis ho tuaneeg, ces koj yog tus txhaum Kevcai.

12 Hais lus thiab coj nkaus li nej samsim yuav raug txiavtxim raws kevcai twjlij. 13 Vim kev txiavtxim, tsis tabncuab, yuav muab rau tus tsis coj kev tabncuab; kev tabncuab yuav khav ntxhias saum rooj txiavtxim.

14 Kuv cov kwvtij, yuav muaj txiajntsig dabtsi rau tus hais tias nws muaj kev ntseeg tabsis tsis muaj haujlwm zoo? Kev ntseeg tsis muaj hwjchim cawm nws pod? 15 Yog muaj ib tug kwvtij lossis muam uaneej tsis muaj tsoos hnav thiab tuncua pluas noj pluas haus, 16 es nws hais rau nkawv nruab nrab nej tias, “Rovmus kajsiab lug, hnav sov so thiab noj tsau npo,” tabsis tsis muab dabtsi rau nkawv txojkev cheemtsum ntawm lub cev, qhov ntawd muaj txiajntsig dabtsi? 17 Kev ntseeg los tibyam thiab, yog tsis muaj haujlwm zoo ces nws twb tuag lawm.

18 Tabsis qee leej yov hais tias, “Koj muaj kev ntseeg tabsis kuv muaj haujlwm zoo.”

Nthuav rau kuv pom koj txojkev ntseeg uas tsis muaj haujlwm zoo, es kuv yuav nthuav kuv txojkev ntseeg saum haujlwm zoo. 19 Koj ntseeg tias muaj tib tug Vajtswv Ntuj xwb; ntseeg li los zoo, tabsis tej dab kuj ntseeg li thiab lawv tshee laim dais.

20 Koj puas xav paub, tus neeg tsis muaj hlwb, tias dhau ntawm haujlwm zoo ces kev ntseeg tsis muaj qabhau? 21 Tsis yog peb txiv Anplahas raug xam ncajncees los ntawm haujlwm zoo thaum nws muab nws tus tub Ixaj fij saum lub thaj lod? 22 Koj pom tias Anplahas txojkev ntseeg tau ua haujlwm nrog nws tej haujlwm zoo, thiab los ntawm tej haujlwm zoo kev ntseeg thiaj tiav. 23 Vajlugkub nqe hais tias, “Anplahas tau ntseeg Vajtswv Ntuj mas qhov ntawd tau raug xam ua kev ncajncees rau nws,” tau tiav thiab Anplahas tau raug hu ua Vajtswv Ntuj phoojywg. 24 Nej pom tias neeg raug xam ncajncees los ntawm haujlwm zoo, es tsis yog los ntawm kev ntseeg xwb.

25 Ib yam li ntawd, tsis yog tus niam ntiav Lahaj tau raug xam ncajncees los ntawm haujlwm zoo thaum nws txais ob tug sojntsuam tebchaws thiab muab nkawv xa tawm dua lwm txojkev lod? 26 Ib yam li thaum tsis muaj ntsujplig es lub cev tuag, tsis muaj haujlwm zoo ces kev ntseeg tuag.

1 Txhob ua xibfwb coobcoob, kuv cov kwvtij, vim nej paub tias peb yuav txais kev txiavtxim hnyav dua. 2 Rauqhov peb puavleej dawm ntau yam ntog. Yog leejtwg tsis yuamkev saum ncauj lus, tus ntawd yog neeg zoo kawgnkaus thiab muaj peevxwm tswj tagnrho nws lub cev.

3 Yog peb sam xauv rau nees qhov ncauj kom lawv mloog peb, ces peb tswj tau tagnrho lawv lub cev. 4 Saib ntxiv rau tej nkoj lojloj uas tos cua hlob ntsawj ntawd; tus tsav siv tus duav meme tswj lub nkoj mus rau qhov uas nws xav mus. 5 Tus nplaig los zoo li, nws nyuag meme tabsis khav txog tej yam loj. Saib lub tximtaws meme kub mus kis plas zoov lojloj. 6 Tus nplaig yog hluavtaws. Tus nplaig yog lub cejntug txojkev qias nruab nrab peb tej testaw, nws tsuas tagnrho peb lub cev, thiab zes taws rau peb lub log uaneej. Nws raug zes taws los ntawm ntujtawg.

7 Vim tias txhua yam tsiaj—tsis hais tsiaj tuaj tis, tsiaj luag cev lossis tsiaj nruab deg—puavleej raug cob tau kom seej thiab neeg tau cob dua lawm. 8 Tabsis tsis muaj ib tug neeg cob tau tus nplaig uas phem kawgnkaus thiab muaj tus taug kev tuag.

9 Peb siv tus nplaig qhuas peb tus Tswv thiab Leej Txiv, thiab ho tsawm tej neeg uas twb raug tsim raws Vajtswv Ntuj tus yamntxwv. 10 Lus qhuas thiab lus tsawm tawm ntawm tib lub qhovncauj. Kuv cov kwvtij, tsis tsimnyog tshwmsim li ntawd. 11 Tsis lam muaj ib lub qhov dej uas txhawv dej qab thiab dej iab pod? 12 Cov kwvtij, tsob ntoo ncuavpias tsis lam txi txiv ntooroj thiab tsob txivhmab tsis lam txi txiv ncuavpias sav? Thiab dej daw tsis lam hloov ua dej qab sav?

13 Nej leejtwg yog tus muaj tswvyim thiab kev totaub? Cia nws nthuav tawm los ntawm lub neej zoo, los ntawm nws tej haujlwm zoo nrog lub siab mosmuag hauv tswvyim. 14 Tabsis yog nej muaj kev sibkhib iabqhi thiab kev ntshaw ua tus hlob hauv siab, txhob khav txog lossis zais qhov tseeb ntawd. 15 Lub tswvyim li no tsis yog tawm saum ntuj los, tabsis yog tswvyim ntiajteb, tswvyim noobneej, thiab tswvyim dab. 16 Rauqhov kev sibkhib thiab kev ntshaw ua tus hlob txawm rau qhovtwg, qhov ntawd tsuas muaj kev kubntxhov thiab txhua yam haujlwm phem.

17 Tabsis lub tswvyim saum ntuj yog kev dawbhuv ntaus thawj, nrog kev thajyeeb, kev siabmos siabmuag, kev mloog lus, kev tabncuab puvnpo, tej txiv saum kev zoo, kev tsis xaiv ntsejmuag, thiab kev tsis xyuam plhu. 18 Cov neeg tsim kev thajyeeb yuav tau sau kev ncajncees thajyeeb lug.

1 Kev tsovrog thiab kev sibcav hauv nej tawm qhovtwg los? Tsis yog tawm ntawm nej tej kev ntshaw lomzem uas sibntaus hauv nej nruab nrog lod? 2 Nej ntshaw tabsis nej tsis muaj, ces nej tuaneeg. Nej sibkhib vim nej tsis muaj peevxwm tau, ces nej sibcav thiab ua tsovrog. Nej tsis muaj rauqhov nej tsis taij. 3 Nej taij thiab tsis tau txais, rauqhov nej taij nrog kev xav phem, xwv nej tau muab siv rau kev lomzem.

4 Cov neeg deev luag poj luag txiv! Nej tsis paub tias kev phoojywg nrog lub cejntug yog kev yeebncuab rau Vajtswv Ntuj lod? Yog li ntawd, yog leejtwg xav ua lub cejntug tus phoojywg, nws sawv ua Vajtswv Ntuj tus yeebncuab ntag. 5 Lossis nej xav tias Vajlugkub lam hais xwb tias, “Nws ntshaw thiab khib tus ntsujplig uas tau nyob hauv peb”? 6 Tabsis Nws tseem tsub vajhmoov ntxiv qees! Vim Nws hais tias:

7 Yog li ntawd, muab tuskheej rau Vajtswv Ntuj tswj, thiab sawv tawmtsam ntxwgnyoog, es nws yuav khiav tawm ntawm nej. 8 Txav ze Vajtswv Ntuj es Nws yuav txav ze nej. Ntxuav nej tej tes, cov neeg txhaum! Thiab ntxuav nej lub siab kom dawbhuv, cov neeg ob siab! 9 Quaj ntsuag, nyiav, thiab los kuamuag! Cia nej txojkev luag hloov ua kev nyiav thiab cia nej txojkev zoo siab hloov ua kev tusiab. 10 Txo hwjchim rau ntawm tus Tswv xubntiag es Nws yuav tsa nej.

11 Txhob thuam lwm tus, cov kwvtij. Tus uas thuam nws tus kwvtij thiab txiavtxim rau nws tus kwvtij yog thuam Vajtswv Ntuj txoj kevcai thiab txiavtxim rau Nws txoj kevcai. Yog koj txiavtxim rau kevcai, koj tsis yog tus coj kevcai tabsis yog tus txiavtxim. 12 Muaj tib tug rhawv kevcai thiab tus txiavtxim. Nws muaj hwjchim cawm thiab cia puastsuaj. Tabsis koj yog leejtwg, koj ho txiavtxim rau koj tus kwvtij?

13 Los, nej cov uas hais tias, “Hnub no lossis tagkis peb yuav mus rau lub nroog no lossis lub tod, peb yuav ua haujlwm ib xyoos ntawd, ua lagluam, thiab nrhiav nyiajtxiag.” 14 Nej leejtwg los tsis paub dabtsi yov tshwm tagkis, nej txojsia yuav ua li cas, rauqhov nej yog cov huab tshwm los ibpliag ces twb ploj lawm. 15 Qhov zoo ntshe nej hais tias, “Yog haum tus Tswv siab, peb yuav uaneej thiab ua yam no lossis yam tod.” 16 Tabsis nimno nej ho khav txog nej tej kev khavtheeb. Txhua yam kev khav li no yog kev phem. 17 Yog li ntawd, tus twb paub mus ua txojkev zoo tabsis ho tsis ua, qhov ntawd yog nws kev txhaum.

1 Los, nej cov muaj txiag. Quaj nroo laws txog nej tej kev txomnyem uas samsim los! 2 Nej kev npluanuj twb kug lawm, nej tej tsoos twb raug kab xwv lawm, 3 thiab nej tej nyiaj tej kub twb xeb lawm. Xeb yuav ua timkhawv tawmtsam nej thiab yuav tig noj nej lub cev li hluavtaws. Nej tau npaj kev npluanuj rau thaum kawg. 4 Saib lau, tej nqizog uas nej tau muab qee tawm ntawm tej tubzog, uas tau tu nej daim teb, samsim nkaug nej; thiab cov neeg sau qoob lub suab quaj tau nrov txog tus Tswv muaj hwjchim lub qhovntsej. 5 Nej tau noj seem noj so hauv ntiajteb thiab tau uaneej puagtes puagtaw. Nej tau txav tuskheej kawg nej siab rau hnub raug tua. 6 Nej tau nkaug thiab tau tua tus neeg ncajncees uas tsis tawmtsam nej.

7 Yog li ntawd, cov kwvtij, ua siabntev kom txog thaum tus Tswv los. Saib tus tubqoob tos ntsoov cov qoob saum daim av li cas thiab ua siabntev mus txog thaum nws txais nag tshiab thiab nag lig. 8 Nej kuj ibyam thiab, ua siabntev thiab tswj nej lub siab, rauqhov twb ze hnub tus Tswv los lawm. 9 Cov kwvtij, ibleeg txhob yws ibleeg kom nej txhob raug txiavtxim. Tus txiavtxim twb sawv ntawm qhovrooj lawm.

10 Cov kwvtij, muab cov cevlus uas qhia tus Tswv lub npe ntawd tej kev txomnyem thiab kev siabntev los ua qauv. 11 Li nej paub, peb foom koobhmoov rau cov uas tiv kev txomnyem. Nej tau hnov txog Yauj kev tiv txomnyem thiab nws tau pom tus Tswv tes haujlwm tiav, vim tias tus Tswv yog tus puvnpo kev mobsiab thiab tus tabncuab.

12 Uantej txhua yam, kuv cov kwvtij, txhob tsa tes twv rau lub ntuj, lub teb, lossis lwm yam. Tabsis qhov yog, hais tias “Yog”; qhov tsis yog, hais tias “Tsis yog,” kom nej txhob poob rau kev txiavtxim.

13 Yog nej leejtwg raug teebmeem, cia nws thov Vajtswv Ntuj. Yog leejtwg zoo siab, cia nws hunkauj. 14 Yog nej leejtwg muaj mob, cia nws hu cov txwjlaug hauv pawgntseeg thiab cia lawv thov Vajtswv rau nws thiab muab roj pleev nws los ntawm tus Tswv lub npe. 15 Kev thov Vajtswv raws kev ntseeg yuav cawm tus neeg mob thiab tus Tswv yuav tsa nws sawv; thiab yog nws tau ua txhaum lawm, nws txojkev txhaum yuav raug zam. 16 Yog li ntawd, nej ibleeg lees kev txhaum rau ibleeg thiab nej ibleeg thov Vajtswv Ntuj rau ibleeg kom nej yuav zoo mob. Tus neeg ncajncees lolus thov Vajtswv muaj zog thiab tau haujlwm heev.

17 Eliyas yeej yog neeg ibyam li peb, tabsis nws tau thov Vajtswv kom txhob muaj nag, ces nag tau tsis los rau ntiajteb peb xyoos thiab rau hli; 18 thiab nws tau thov Vajtswv dua es nruab ntug tau tso nag los thiab ntiajteb qoobloo tau hlob.

19 Kuv cov kwvtij, yog nej leejtwg plaskev tawm ntawm txojkev tseeb thiab lwm tus ho coj nws rovqab, 20 qhia rau nws paub tias, tus uas coj tus neeg txhaum tawm ntawm nws txojkev plaskev ntawd kuj yuav cawm nws txojsia tawm ntawm kev tuag thiab yuav npog tau ntau txojkev txhaum.