1 Tus Txwjlaug,

Xa rau tus phauj uas raug xaiv thiab nws cov menyuam, cov uas kuv hlub hauv qhov tseeb, thiab tsis yog kuv xwb tabsis tagnrho cov paub qhov tseeb, 2 vim qhov tseeb ntawd nyob hauv peb thiab yuav nrog peb nyob mus ibtxhis.

3 Vajhmoov, kev tabncuab, thiab kev thajyeeb ntawm Txiv Vajtswv Ntuj thiab ntawm Yexus Khetos, Txiv Vajtswv tus Tub, yuav nrog peb nyob hauv qhov tseeb thiab kev hlub.

4 Kuv zoo siab heev tias kuv twb ntsib koj ibtxhia menyuam uas tau uaneej hauv qhov tseeb, raws tej lus tawmcai uas peb tau txais ntawm Leej Txiv. 5 Thiab nimno, phauj, kuv tsis sau ib nqe lus tawmcai tshiab tabsis nqe uas peb twb muaj thaum chiv los lawm. Kuv taij koj kom peb ibleeg hlub ibleeg. 6 Qhov no yog kev hlub: Kom peb uaneej raws tus Tswv tej lus tawmcai. Nws nqe kevcai yog li no, raws li nej tau hnov thaum chiv los, tias kom nej uaneej hauv kev hlub.

7 Vim coob tus neeg plaskev tau los hauv lub cejntug, xws li cov uas tsis lees tias Yexus Khetos tau los ua nqaijtawv. Tus neeg li ntawd yog tus plaskev thiab tus khetos cuav. 8 Saib tuskheej kom nej txhob plam qhov uas peb tau khwv ntawd tabsis kom nej tau txais nqizog npluamias. 9 Txhua tus uas khiav tawm thiab tsis zwm hauv Khetos txojkev qhuabqhia kuj tsis muaj Vajtswv Ntuj; leejtwg zwm hauv txojkev qhuabqhia, tus ntawd thiaj muaj Leej Txiv thiab Leej Tub. 10 Yog leejtwg tuaj cuag nej thiab tsis coj txojkev qhuabqhia no, txhob txais nws los tsev thiab txhob hais kev nyobzoo rau nws, 11 rauqhov tus uas hais kev nyobzoo rau nws kuj koom nrog nws tej haujlwm phem.

12 Kuv muaj ntau yam yuav sau, tabsis kuv tsis xav siv kuamem dub thiab daim ntawv. Kuv ciasiab tias kuv yuav dhau kev tuaj cuag nej thiab yuav tau sibtham tim ncauj tim lus, kom peb txojkev zoo siab yuav phwjyaws.

13 Koj tus vivncaus uas raug xaiv cov menyuam kuj xa kev nojqab nyobzoo rau koj.