Tej Haujlwm
Tej Haujlwm
Taw Qhia
Lukas tus sau phau Lukas thiab Cov Tubtxib Tej Haujlwm. Hauv no, nws tau teev txog kev tshajtawm txojmoo zoo hauv Yeluxalees mus thoob plaws tej tebchaws uas Fajtim Loo tswj thiab tuaj xaus rau hauv lub tuamceeb Loo. Lub ntsiab lus nyob ntawm Ctu 1:8: Yeluxalees, thoob plaws Yudas thiab Xamalias thiab mus txog rau ntiajteb kawg. Cov thwjtim tau qhia nrog lub siab tawvqhawv thiab tsis muaj dabtsi txwv tau lawv (Ctu 4:31; 28:31).

1
Yexus Raug Coj Mus Saum Ntuj
1 Hauv thawj phau ntawv, Theaufilaus, kuv tau sau txog txhua yam uas Yexus tau chiv ua haujlwm thiab qhuabqhia, 2 mus txog rau hnub uas Nws tau raug coj mus saum ntuj, tomqab Nws tau tawmlus los ntawm tus Ntsujplig Dawbhuv rau cov timthawj uas Nws tau xaiv. 3 Tomqab Nws tau raug kev txomnyem, Nws tuskheej tau tshwm rau lawv pom nrog ntau qhov timkhawv tias Nws muajsia zees. Plaub caug hnub, Nws tau tshwm rau lawv pom thiab tau qhia lawv ntau yam ntsig txog Vajtswv Ntuj lub tswvkuj. 4 Thaum nrog lawv noj mov, Nws tau qhia lawv tias, “Txhob tawm hauv Yeluxalees tabsis tos tus uas Leej Txiv tau coglus txog, uas nej tau hnov ntawm kuv. 5 Vim tias Yauhas tau muab neeg raus hauv dej, tabsis nej yuav raug raus hauv tus Ntsujplig Dawbhuv tsis ntev hnub tomntej no.”
6 Ces thaum lawv tau tuaj uake dua, lawv tau nug Nws tias, “Tus Tswv, koj puas rovtsa Yixayees lub tswvkuj sijhawm no?”
7 Tabsis Nws tau teb rau lawv tias, “Nws tsis yog rau nej paub lub sijhawm lossis lub caij uas Leej Txiv tau teem hauv Nws lub tswjchim, 8 tabsis nej yuav txais hwjchim thaum tus Ntsujplig Dawbhuv los rau saum nej thiab nej yuav ua kuv cov timkhawv hauv Yeluxalees, thiab thoob plaws Yudas thiab Xamalias, thiab mus txog rau ntiajteb kawg.”
9 Thaum Nws tau samsim hais tej no thiab lawv tseem saib ntsoov Nws, Yexus tau raug nqa mus thiab ib tauv huab tau nqa Nws ntawm lawv qhovmuag mus. 10 Sijhawm lawv saib ntsoov saum ntuj, thaum Nws tau mus ntawd, nimno ob tug txivneej hnav tsoos dawb tau los sawv rau ntawm lawv 11 thiab tau hais tias, “Cov neeg Kalilais, vim li cas nej sawv ntsia saum ntuj? Tus Yexus, uas tau raug coj ntawm nej mus saum ntuj no, yuav rovlos ib yam nkaus li nej tau pom Nws mus saum ntuj thiab.”
Xaiv Mathias Los Hloov Yudas
12 Ces lawv tau tig ntawm lub roob txiv ntooroj rovlos rau Yeluxalees, uas deb li ib ncua kev Xanpataus. 13 Thaum los txog, lawv tau nce mus rau saum chav uas lawv nyob. Cov ntawd kuj tau muaj Petus, Yauhas, unpaus, Anres, Filiv, Thaumas, Npathaulaumais, Mathais, Alafais tus tub unpaus, Ximoos tus kubsiab, thiab unpaus tus tub Yudas. 14 Lawv tau kubsiab lug koomxeeb rau kev thov Vajtswv nrog rau cov pojniam,a Malis uas yog Yexus niam, thiab Nws cov kwv.
15 Ntu ntawd, Petus tau sawv hauv plawv tsoom kwvtij (pab neeg uas sau npe rau qhov chaw ntawd muaj kwvlam li ib puas neesnkaum leej) thiab nws tau hais tias, 16 “Cov kwvtij, Vajlugkub cheemtsum raug ua kom tiav qhov uas tus Ntsujplig Dawbhuv tau hais nram ntej los ntawm Daviv ntsig txog Yudas, tus uas tau coj kev rau cov tuaj ntes Yexus. 17 Nws tau raug suav ua ib tug nrog peb thiab nws tau txais ib feem ntawm txoj haujlwm no.”
18 “Nws tau muas ib daim av los ntawm tus nqizog tsis ncajncees; thiab thaum nws ntog taubhau nkaug nris, nws lub plab tau tawg thiab plabhnyuv tau tawm. 19 Txhua leej hauv Yeluxalees tau paub txog qhov no, thiab daim av ntawd lus Alamej tau hu ua ‘Akedamas,’ uas txhais tias ‘Av Ntshav.’ 20 Rauqhov twb sau tseg hauv phau ntawv Nkauj tias:

‘Cia nws lub quatsev tsheej ua mojsab,
thiab txhob cia neeg cogtsev hauv ntxiv;’

thiab tias:

‘Cia lwm tus tuav nws lub meejmom.’”

21 “Yog li ntawd, nws cheemtsum rau ib tug ntawm cov txivneej uas tau tuaj nrog peb uake puag thaud los, txij li tus Tswv Yexus tau tuaj los txog thaum Nws tau ncaim ntawm peb lawm, 22 chiv kiag thaum Yauhas muab neeg rausdej los txog ntua hnub uas tus Tswv raug coj ntawm peb lawm, los ua ib tug timkhawv txog Nws kev sawv rovlos nrog peb.”
23 Ces lawv tau taw ob tug: Yauxej, tus uas hu ua Npaxanpas thiab kuj tau raug hu ua Yuxatus, thiab Mathias. 24 Thaum thov Vajtswv, lawv tau hais tias, “Tus Tswv, koj paub txhua lub siab, qhia tus uas koj tau xaiv ntawm ob tug no 25 los tuav lub meejmom ncignum thiab timthawj, uas Yudas tau tsotseg thiab tau tawm mus rau nws lub chaw lawm.” 26 Lawv tau muab txwv los pov rau nkawv, thiab lub txwv tau poob rau Mathias; ces nws tau raug suav ua ib tug timthawj nrog lawv kaum-ib leeg.
2
Tus Ntsujplig Dawbhuv Los
1 Thaum txwm nkaus rau hnub Peetekos, lawv sawvdaws tau nyob uake rau qhov qub chaw. 2 Ces tamsis ntawd ib lub suab tau tshwm saum ntuj los, nroo ntws li ib nthwv cua dub, thiab tau los puvnkaus lub tsev uas lawv tau nyob ntawd. 3 Lawv tau pom nws tawg rhe ua tej nplaim lus zoo li nplaim taws rau saum lawv thiab tau mus txawb rau saum lawv ibleeg ib nplaim. 4 Ces lawv sawvdaws tau puvnpo tus Ntsujplig Dawbhuv thiab lawv tau pib hais lus txawv tebchaws raws nraim li tus Ntsujplig tau muab rau lawv hais.
5 Thaum ntawd, hauv Yeluxalees tau muaj cov Yudais, cov hwm Vajtswv Ntuj, uas tau tawm ntawm txhua haivneeg hauv qab ntuj tuaj. 6 Thaum lub suab no tau tshwmsim, tej neeg coobcoob ntawd tau sibsau uake thiab tau xav tsis tawm vim nyias tau hnov nyias cov lus. 7 Lawv tau rag ntws, xav tsis thoob thiab hais tias, “Saib mas, tsis yog tagnrho cov hais lus no yog neeg Kalilais lod? 8 Ua li cas peb nyias ho hnov lawv hais nyias lus tim lub tebchaws uas peb tau yug? 9 Cov neeg Pathias, Medias, Elas; cov nyob rau Mexaupautamias; neeg Yudas, Kapadokias, Pootus, Axias, 10 Felinkias, Phafilias, Iziv, thiab cheebtsam Linpias uas Kulenes kav; cov nyob tim Loo tuaj, 11 tej neeg Yudais lossis cov kiavxeem; neeg tim Povtxwv Keletes thiab Alanpias. Peb hnov lawv hais txog Vajtswv Ntuj tej txujci ua peb tej lus.” 12 Lawv tagnrho tau rag ntws thiab xav tsis tawm, mas lawv ibleeg tau nug ibleeg tias, “Qhov no yog dabtsi?”
13 Tabsis lwm leej ho tau thuam tias, “Lawv tau qaug cawv xwb!”
Petus Qhuabqhia Txog Yexus Kev Sawv Rovlos
14 Ces Petus tau sawv nrog pab kaum-ib leeg, tsa nws lub suab thiab hais rau lawv tias, “Neeg Yudais thiab tagnrho zejtsoom Yeluxalees, cia kuv qhia rau nej paub qhov no thiab cia nej cuab pobntseg mloog kuv tej lus. 15 Cov no tsis qaug cawv li nej kwvyees ntawd, vim nws nyuam qhuav yog peb teev sawvntxov xwb. 16 Tabsis qhov no yog txojlus los ntawm tus cevlus Yauees tias:

17 ‘Nws yuav muaj li no thaum kawg,’ Vajtswv Ntuj hais,
‘kuv yuav nchuav kuv tus Ntsujplig rau nqaijtawv txhua nrho.
Nej tej tub thiab tej ntxhais yuav cevlus,
nej tej hluas yuav pom zeemmuag,
thiab nej tej laus yuav ua npausuav pom.
18 Rau saum kuv tej tubtxib thiab ntxhais txib sijhawm ntawd
kuv yuav nchuav kuv tus Ntsujplig mas lawv yuav cevlus.
19 Kuv yuav muab tej txujci nthuav rau saum nruab ntug,
tej cim rau hauv ntiajteb,
ntshav, hluavtaws thiab pa taws ncho.
20 Lub hnub yuav hloov mus ua tsausntuj
thiab lub hli yuav hloov ua ntshav,
uantej tus Tswv hnub tseemceeb thiab ci tsa iab ntawd los txog.
21 Ces txhua tus uas hu txog tus Tswv lub npe yuav dim.’”

22 “Zejtsoom Yixayees, mloog tej lus no: Yexus neeg Naxalev yeej yog ib tug txivneej uas Vajtswv Ntuj tau nias homthawj los ntawm tej hwjchim, tej txujci thiab tej cim uas Vajtswv Ntuj tau ua tawm ntawm Nws nruab nrab nej ibyam li nej tau paub ntawd. 23 Nws tau raug ntes mus rau tej neeg tsis cojcai, raws li Vajtswv Ntuj lub homphiaj thiab tswvyim, thiab nej tau muab Nws ntsia rau saum ntoo thiab muab tua. 24 Tabsis tomqab Nws tau rhuav tshem txojkev tuag tus taug, Vajtswv Ntuj tau tsa Nws sawv vim tias kev tuag tsis tau muaj peevxwm tuav Nws. 25 Rauqhov Daviv tau hais txog Nws tias:

‘Kuv tau pom ntsoov tus Tswv ntawm kuv hauvntej,
rauqhov Nws nyob ntawm kuv sab xis kom kuv txhob ntshai.
26 Vim li no, kuv lub siab txaussiab hlo thiab kuv tus nplaig qhuas,
kuv lub cev tseem yuav ntaus zes saum kev ciasiab,
27 rauqhov koj yuav tsis tso kuv txojsia rau tub tuag teb,
lossis cia koj tus neeg dawbhuv pom kev lwj.
28 Koj tau qhia tej kev muajsia rau kuv paub,
thiab koj yuav ntim kev zoo siab phwjyaws rau kuv ntawm koj xubntiag.’”

29 “Tsoom kwvtij, peb muaj cuabkav hais khovkho rau nej ntsig txog txiv Daviv tias, nws tau tuag thiab tau raug faus. Nws lub ntxa haj tseem nyob nrog peb los txog niajhnub no. 30 Tabsis vim nws yeej yog tus cevlus thiab nws twb paub tias, Vajtswv Ntuj tau coglus rau nws twvntxhias tias nws ib tug xeebntxwv yuav zaum saum nws lub zwmtxwv. 31 Thiab vim nws twb pom uantej lawm, nws thiaj tau hais txog Khetos kev sawv rovlos tias, Nws yuav tsis raug tso rau tub tuag teb thiab Nws lub cev yuav tsis pom kev lwj. 32 Vajtswv Ntuj tau tsa tus Yexus no sawv, thiab peb tagnrho yog Nws timkhawv. 33 Yog li ntawd, vim Nws tau raug tsa rau ntawm Vajtswv Ntuj sab xis thiab tau txais txojlus cogtseg txog tus Ntsujplig Dawbhuv ntawm Leej Txiv, Nws tau nchuav qhov uas nej sawvdaws pom thiab hnov no. 34 Rauqhov Daviv tsis tau nce rau saum ntuj, tabsis nws tau hais li no:

‘Tus Tswv tau hais rau kuv tus Tswv tias,
“Zaum ntawm kuv sab xis,
35 mus txog thaum kuv muab koj cov yeebncuab
ua rooj tiagtaw rau koj.”’”

36 “Yog li ntawd, cia tsevneeg Yixayees tagnrho paub meej tias, Vajtswv Ntuj tau tsa Yexus, tus uas nej tau muab ntsia saum khaublig ntawd, ua tus Tswv thiab Khetos.”
Peb Txhiab Leej Los Ntseeg
37 Thaum hnov li no, lawv lub siab tau raug hlais thiab lawv tau hais rau Petus thiab lwm tus timthawj tias, “Peb yov ua li cas, cov kwvtij?”
38 Petus tau teb lawv tias, “Thimxav, thiab cia nej txhua leej rausdej rau ntawm Yexus Khetos lub npe mus txais kev zam nej tej kev txhaum, ces nej yuav txais qhov khoom pub ntawm tus Ntsujplig Dawbhuv. 39 Vim tias txojlus cogtseg yog rau nej thiab rau nej tej menyuam, thiab rau txhua tus nyob deb, rau coob leej npaum li tus Tswv, peb tus Vajtswv Ntuj, yuav hu.”
40 Thiab los ntawm ntau lolus ntxiv, nws kuj tau ua timkhawv ntsees thiab tau nquahu lawv tias, “Cawm nej tuskheej kom dim ntawm tiam neeg nkhaus no.”
41 Li ntawd, cov uas tau txais nws txojlus kuj tau rausdej thiab peb txheeb txojsia tau raug ntxiv npe nrog cov ntseeg hnub ntawd. 42 Ces lawv tau kubsiab lug rau cov timthawj kev qhuabqhia thiab rau kev koomxeeb, rau kev noj movci thiab kev thov Vajtswv.
43 Kev hwm Vajtswv Ntuj tau txawm rau saum txhua leej vim ntau qhov txujci thiab ntau lub cim kuj tau tshwm los ntawm cov timthawj. 44 Tagnrho cov ntseeg tau nyob uake rau ib qhov chaw thiab xam txhua yam ua sawvdaws tug. 45 Lawv tau muab lawv tej teejtug thiab liajia muag thiab muab faib rau cov uas tau muaj kev cheemtsum. 46 Txhua hnub lawv tau thoojsiab tuaj hauv lub tuamtsev, ntais movci ib lub tsev rau ib lub tsev, nojhaus uake los ntawm lub siab xyivfab thiab tiajtus, 47 qhuas Vajtswv Ntuj thiab txais vajhmoov tabmeeg zejtsoom tagnrho. Ces tus Tswv tau ntxiv cov tau raug cawm rau lawv txhua hnub qhov ntawd.
3
Petus thiab Yauhas Kho Tus Txivneej Tuag Ceg
1 Petus thiab Yauhas nkawv tau nce mus pem lub tuamtsev lub sijhawm thov Vajtswv cuaj teev. 2 Ib tug txivneej, uas tau qhuav ceg puag hauv nws niam plab los, tau raug kwv txhua hnub tuaj rau ntawm lub roojvag tuamtsev uas hu ua “Zoo Nkauj” kom nws thov khawv ntawm tej neeg nkag mus hauv tuamtsev. 3 Thaum nws pom Petus thiab Yauhas nkawv samsim mus hauv tuamtsev, nws tau thov khawv ntawm nkawv. 4 Petus tau saib nws, nrog Yauhas, thiab tau hais rau nws tias, “Saib tuaj rau ntawm wb.” 5 Ces nws tau saib nkawv, npajsiab txais dabtsi ntawm nkawv.
6 Petus tau hais rau nws tias, “Nyiaj thiab kub tsis muaj ntawm kuv, tabsis qhov kuv muaj no, kuv muab rau koj: Ntawm Yexus Khetos neeg Naxalev lub npe, sawv thiab muskev.” 7 Cev tes mus tuav kiag nws sab tes xis, Petus tau tsa nws sawv. Tamsis ntawd nws ob txhais taw thiab dabtaws tau muaj zog tuaj, 8 thiab nws tau sawv tsees, tau taugkev thiab tau nrog nkawv mus hauv tuamtsev, ibke muskev, ibke dhia, ibke qhuas Vajtswv Ntuj. 9 Ces tagnrho zejtsoom tau pom nws muskev thiab qhuas Vajtswv Ntuj. 10 Vim lawv tau zeem tseeb tias nws yeej yog tus txivneej thov khawv ntawm lub roojvag tuamtsev Zoo Nkauj, lawv tau ntshai heev thiab xav tsis thoob rau yam uas tau tshwmsim rau nws ntawd.
Petus Qhuabqhia Ntawm Xalumoos Lub Samthiaj
11 Thaum nws tseem tuav rawv Petus thiab Yauhas nkawv, tagnrho zejtsoom tau sau nthwv los rau ntawm nkawv ntawm cov ncej zeb uas hu ua Xalumoos lub samthiaj thiab lawv tau xav tsis thoob. 12 Thaum pom zejtsoom li no, Petus tau teb lawv tias, “Ibtsoom Yixayees, cas nej xav tsis thoob txog qhov no lossis saib wb li wb tuskheej muaj hwjchim lossis kev dawbhuv es thiaj tau ua rau nws muskev nad? 13 ‘Anplahas tus Vajtswv, Ixaj tus Vajtswv, thiab Yakhauj tus Vajtswv, peb tej yawgkoob tus Vajtswv’ tau qhuas Nws tus Tubtxib Yexus uas nej tau ntes thiab tsis tau lees ntawm Philaj xubntiag, txawm Philaj tau txiavtxim muab Nws tso. 14 Nej tau tsis lees tus dawbhuv thiab ncajncees ntawd thiab tau taij kom tso tus tuaneeg rau nej. 15 Lub hauvpaus txojsia, uas nej tau tua ntawd, Vajtswv Ntuj tau tsa sawv ntawm cov tuag. Peb ua timkhawv txog Nws. 16 Saum txojkev ntseeg ntawm Nws lub npe, tus txivneej uas nej pom thiab paub no tau zoo khovkho. Nws yog Yexus lub npe thiab txojkev ntseeg hauv Nws uas tau muab kev zoo mob rau tus neeg no tim ntsej tim muag ntawm nej sawvdaws.”
17 “Cov kwvtij, nimno kuv paub tias nej tau ua raws kev tsis totaub ibyam li nej cov thawjcoj. 18 Tabsis los ntawm qhov ntawd, Vajtswv Ntuj tau ua tiav tej uas cov cevlus tau tshajtawm uantej txog Nws tus Khetos txojkev tuag. 19 Yog li ntawd, thimxav thiab tig rovlos kom nej tej kev txhaum yuav raug so dulug, 20 es lub caij kajsiab yuav tawm ntawm tus Tswv lub xubntiag los rau nej thiab Nws yuav xa Yexus, tus uas twb raug tsa ua Khetos, los rau nej. 21 Yexus Khetos cheemtsum raug txais mus rau saum ntuj mus txog lub caij uas txhua yam raug ua dua tshiab, raws li Vajtswv Ntuj tau hais tawm ntawm cov cevlus dawbhuv thaum ub. 22 Mauxes tuskheej tau hais tias, ‘Tus Tswv, nej tus Vajtswv Ntuj, yuav tsa ib tug cevlus li kuv tawm hauv nej cov kwvtij, nej yuavtsum mloog txhua yam uas Nws hais rau nej. 23 Txhua leej, uas tsis mloog tus cevlus ntawd, yuav raug txiav tawm hauv haivneeg.’”
24 “Thiab tagnrho cov cevlus txij li Xamuyees los tomqab no puavleej tau hais thiab tau tshajtawm txog lub sijhawm no. 25 Nej yog menyuam ntawm cov cevlus thiab ntawm tus txhooj uas Vajtswv Ntuj tau cogtseg rau nej tej yawgkoob, hais ntsees rau Anplahas tias, ‘thiab hauv koj lub noob, txhua tsevneeg hauv ntiajteb yuav tau koobhmoov.’ 26 Tomqab tsa Nws tus Tubtxib sawv hauv cov tuag los, Vajtswv Ntuj tau xub xa Nws los ua koobhmoov rau nej, uas yog los tig nej ib tug zujzus tawm ntawm nej tej kev vuabtsuab.”
4
Petus thiab Yauhas Raug Ntes
1 Thaum nkawv samsim hais tej no rau zejtsoom, cov povthawj, tus thawj tub ceevxwm ntawm lub tuamtsev, thiab cov Xadukais tau tuaj txog. 2 Lawv tau xeebtxob vim nkawv tau qhia zejtsoom thiab tshajtawm txog Yexus kev sawv rovlos. 3 Lawv tau ntes nkawv thiab muab nkawv kaw hauv tsev lojcuj mus txog rau tagkis, rauqhov nws twb tsausntuj lawm. 4 Coob leej uas tau hnov txojlus ntawd tau ntseeg thiab lawv tagnrho tau nce txog li tsib txheeb leej.
5 Ces hnub tomqab, cov thawjcoj, cov txwjlaug thiab cov xibfwb qhia Kevcai hauv Yeluxalees tau tuaj txoos uake, 6 nrog rau Anas tus povthawj hlob, Kaiyafas, Yauhas, Alexadaws, thiab lwm tus hauv tus povthawj hlob tsevneeg. 7 Thaum coj nkawv los sawv hauv plawv, lawv tau nug tias, “Los ntawm leejtwg lub npe lossis lub hwjchim twg es neb tau ua qhov no?”
8 Ces Petus tau puvnpo tus Ntsujplig Dawbhuv thiab tau hais rau lawv tias, “Cov thawjcoj zejtsoom thiab cov txwjlaug! 9 Yog hnub no nej nug wb txog tes haujlwm zoo rau tus neeg qhuav ceg lossis vim dabtsi es nws ho tau zoo lawm, 10 cia nej thiab zejtsoom Yixayees txhua nrho paub tias, los ntawm Yexus Khetos neeg Naxalev lub npe, tus uas nej tau muab ntsia saum khaublig tabsis Vajtswv Ntuj tau tsa sawv ntawd cov tuag; los ntawm lub npe no tus txivneej ntawd twb sawv zoo cev hlo rau ntawm nej xubntiag. 11 Tus Yexus Khetos no yog

‘Lub pobzeb uas nej cov ua tsev tsis tau lees,
lub uas tau dhau ua lub niamzeb teem kaum.’

12 Kev cawmdim tsis muaj los ntawm lwm tus, vim tias tsis muaj dua lwm lub npe tau raug muab rau neeg hauv qab ntuj uas peb yuav dim tau.”
13 Thaum lawv pom Petus thiab Yauhas nkawv txojkev siabtawv thiab lawv tau txais raug tias nkawv yog menyuam neeg thiab tsis tau kawm ntawv, lawv tau xav tsis thoob tabsis lawv tau paub tias nkawv txeev tau nrog Yexus. 14 Thaum pom tus txivneej uas tau zoo lawm sawv ntawm nkawv ib sab, lawv tsis tau muaj dabtsi hais ntxiv. 15 Tomqab hu nkawv tawm ntawm lub rooj Xuhenris mus sab nraud, lawv tau sib tuavxam 16 tias, “Peb yuav ua li cas rau ob tug txivneej no? Vim tias zejtsoom Yeluxalees thoob plaws tau paub thiab pom lub cim uas nkawv tau ua no thiab peb tsis muaj peevxwm yuav npog qhov no. 17 Tabsis kom zaj no txhob nthuav tawm rau zejtsoom ntxiv, cia peb tso tomtxwv rau nkawv kom txhob hais lub npe no rau leejtwg ntxiv.”
18 Thaum hu nkawv los, lawv tau txwv nkawv kom txhob hais lossis qhia txog lub npe Yexus no kiag li. 19 Tabsis Petus thiab Yauhas nkawv tau teb rau lawv tias, “Nej txiavtxim seb nws puas ncajncees rau ntawm Vajtswv Ntuj xubntiag kom wb mloog nej tshaj li mloog Vajtswv Ntuj? 20 Rauqhov wb ua tsis tau kom txhob hais tej uas wb tau pom thiab tau hnov.”
21 Thaum lawv tau tso tomtxwv rau nkawv dua, lawv tau tso nkawv tawm. Lawv tsis tau pomqab yuav cheem nkawv li cas vim zejtsoom thiab vim sawvdaws tau qhuas Vajtswv Ntuj rau qhov xwmtxheej ntawd. 22 Tus txivneej uas tau zoo los ntawm lub cim ntawd twb muaj plaub-caug tawm xyoo lawm.
Pawgntseeg Koomxeeb Thov Vajtswv Rau Txojmoo Zoo
23 Tomqab raug tso lawm, nkawv tau mus cuag nkawv tej neeg thiab tau tshabxo txog tej uas cov povthawj hlob thiab cov txwjlaug tau hais rau nkawv. 24 Ces cov uas tau hnov ntawd tau thoojsiab qw rau Vajtswv Ntuj tias, “Tus Tswv, koj yog tus tsim lub ntuj, ntiajteb, dej hiavtxwv thiab txhua yam hauv tej ntawd. 25 Peb txiv Daviv, koj tus tubtxib, lub ncauj tau hais los ntawm tus Ntsujplig Dawbhuv tias:

‘Vim li cas pejkum neeg tau tsiv heev
thiab zejtsoom tau tuavhauv los nkim?
26 Tej vajntxwv hauv ntiajteb tau sawv
thiab tej thawjcoj tau sibtxoos uake
tawmtsam tus Tswv thiab Nws tus Khetos.’”

27 “Rauqhov qhov tseeb, Helauj, Pootius Philaj nrog rau pejkum neeg thiab zejtsoom Yixayees tau sibtxoos hauv lub nroog no los tawmtsam koj tus tubtxib dawbhuv, Yexus, tus uas koj tau muab roj pleev. 28 Lawv tau ua tej uas koj txhais tes thiab tus dejsiab tau teem tseg uantej kom tshwmsim. 29 Thiab nimno, tus Tswv, saib lawv tej kev tomtxwv, es muab kev ruajsiab txhua fab rau koj cov tubtxib mus qhia koj txojlus. 30 Koj tsa koj txhais tes los kho mob, ua tej cim thiab nchuav txujci tshwm los ntawm Yexus, koj tus tubtxib dawbhuv, lub npe.”
31 Tomqab lawv thov Vajtswv tag, lub chaw uas lawv tau sibtxoos uake ntawd tau co qeegtxoog; lawv txhua tus tau puvnpo tus Ntsujplig Dawbhuv thiab tau qhia Vajtswv Ntuj txojlus nrog kev ruajsiab.
Pawgntseeg Koomsiab thiab Koom Neej
32 Tagnrho cov ntseeg tau koom ua ib lub siab thiab ib txojkev xav, es tsis tau muaj ibleeg twg hais tias nws tej teejtug yeej yog nws li kheej tabsis txhua yam tau dhau ua sawvdaws tug. 33 Mas cov timthawj tau ua timkhawv, nrog hwjchim loj, txog tus Tswv Yexus kev sawv rovlos thiab vajhmoov ntau heev tau los rau saum lawv txhua tus. 34 Nruab nrab lawv, leejtwg tsis tau muaj kev cheemtsum vim tias cov uas tau muaj av thiab tsev tau muab tej ntawd muag, nqa cov nyiaj ntawd 35 tuaj tso rau ntawm cov timthawj kotaw. Cov timthawj ho tau muab rau cov uas muaj kev cheemtsum.
36 Hos Yauxej, tus uas cov timthawj tau hu ua Npananpas (uas txhais tias tus tub txhawbzog), ib tug neeg Levis yug tim Xaipas, 37 tau muaj ib daim liaj. Tomqab muag tas, nws tau nqa cov nyiajtxiag ntawd tuaj tso rau ntawm cov timthawj kotaw.
5
Ananias thiab Xafilas Dag
1 Ib tug txivneej npe hu ua Ananias nrog nws tus pojniam Xafilas tau muag ib daim av. 2 Nws tuskheej tau qee ib qhov tawm ntawm tus nqi av, nrog nws tus pojniam kev paub, thiab tau nqa feem ntawd tuaj tso rau ntawm cov timthawj kotaw.
3 Petus tau hais rau nws tias, “Ananias, vim li cas Xatas tau tswj koj lub siab kom koj tau dag tus Ntsujplig Dawbhuv thiab tau qee ib feem tawm ntawm tus nqi av? 4 Daim av tsis tau nyob ntawm koj tes, thiab thaum muag tag cov nyiaj tsis tau nyob rau koj lub tswjchim lod? Vim li cas tes haujlwm no tau txawm hauv koj lub siab? Koj tsis tau dag neeg tabsis Vajtswv Ntuj ntag.”
5 Thaum hnov tej lus no, Ananias tau vau hlo thiab tusiav nrho. Txhua tus uas tau hnov ntawd tau ntshai heev. 6 Ces cov hluas tau sawv, muab nws qhwv thiab nqa nws mus faus.
7 Sijhawm tau dhau mus li peb teev, ces nws tus pojniam tau tuaj txog thiab tseem tsis tau paub txog qhov xwmtxheej no. 8 Petus tau nug nws tias, “Qhia kuv seb neb tau muag daim av npaum ntawd nyiaj lod?”
Nws tau teb tias, “Yog, npaum li ntawd.”
9 Ces Petus tau hais rau nws tias, “Vim li cas neb tau koomsiab los sim tus Tswv tus Ntsujplig? Nimno, tej kotaw uas tau mus faus koj tus txiv samsim los txog ntawm qhovrooj. Lawv yuav nqa koj mus thiab.”
10 Nws tau vau hlo tamsis ntawd rau ntawm Petus kotaw thiab tau tusiav. Thaum los hauv tsev, cov hluas tau pom nws tuag rau ntawd, ces lawv tau nqa nws mus faus nrog nws tus txiv. 11 Mas tagnrho pawgntseeg thiab txhua leej uas tau hnov tej xwm no tau ntshai heev.
Pawgntseeg Huamvam
12 Ntau lub cim thiab txujci tau tshwm nruab nrab zejtsoom los ntawm cov timthawj txhais tes thiab sawvdaws tau thoojsiab uake rau ntawm Xalumoos lub samthiaj. 13 Tsis muaj ib tug sab nraud muaj cuabkav los koom nrog lawv, tabsis zejtsoom tau saib lawv rau lub samxeeb. 14 Cov ntseeg tus Tswv tau huamvam coob, qas pojniam thiab txivneej tibsi. 15 Vim li ntawd, tej neeg mob tau raug nqa saum lav thiab saum txaj tuaj rau ntawm tej kev kom thaum Petus los, nws tus duab ho tau roos lawv. 16 Neeg coobcoob ntawm tej nroog ibncig Yeluxalees tau sibsau thiab nqa lawv tej neeg mob thiab tej neeg raug ntsujplig qias tsimtxom tuaj, mas txhua tus puavleej tau zoo.
Cov Timthawj Raug Nomtswv Ntes thiab Raug Timtswv Tso
17 Tus povthawj hlob thiab txhua tus nrog nws, xws li pab Xadukais, tau puvnpo kev khib 18 thiab lawv tau ntes cov timthawj thiab muab lawv kaw rau hauv tsev lojcuj. 19 Tabsis tus Tswv tus timtswv tau qhib tej qhovrooj tsev lojcuj hmontuj, thiab thaum coj lawv tawm, nws tau hais rau lawv tias, 20 “Mus, sawv hauv tuamtsev thiab qhia zejtsoom sawvdaws txog tej lus muajsia no.”
21 Vim lawv tau hnov li ntawd, thaum kajntug lawv tau mus rau hauv tuamtsev thiab tau qhuabqhia.
Tomqab tus povthawj hlob thiab cov neeg nrog nws tau tuaj txog, lawv tau hu lub rooj Xuhenris, uas yeej yog tagnrho cov thawjcoj ntawm haivneeg Yixayees. Lawv kuj tau xa neeg mus coj cov timthawj hauv tsev lojcuj 22 tabsis cov tubtxib tau nrhiav tsis pom lawv hauv tsev lojcuj. Ces lawv tau rovlos tshabxo 23 tias, “Peb pom tej qhovrooj tsev lojcuj kaw ntomnti thiab cov tub ceevxwm tseem sawv rau ntawm tej qhovrooj, tabsis peb qhib mus sab hauv mas peb tsis pom leejtwg li.” 24 Hnov dheev li no, tus thawj tub ceevxwm ntawm lub tuamtsev thiab cov povthawj hlob tau xav tsis tawm tias dabtsi tau tshwmsim rau lawv.
25 Ces ib tug neeg tau los tshabxo rau lawv tias, “Saib mas, cov txivneej uas nej tau muab kaw rau hauv tsev lojcuj ntawd samsim sawv hauv loog tuamtsev thiab qhuabqhia zejtsoom.” 26 Tus thawj ceevxwm thiab cov tub ceevxwm nrog nws tau tawm mus coj lawv los, tsis quabyuam lawv dabtsi, vim lawv tau ntshai tsam zejtsoom muab pobzeb ntaus lawv.
27 Thaum coj lawv los txog, lawv tau los sawv hauv plawv lub rooj Xuhenris. Tus povthawj hlob tau nug lawv 28 tias, “Peb tau txwv nej nrujnruj kom txhob qhia txog lub npe no, tabsis nej twb muab nej zaj lus qhuabqhia no tshajtawm thoob Yeluxalees thiab nej npaj muab tus txivneej no cov ntshav nog rau peb.”
29 Tabsis Petus thiab cov timthawj tau teb tias, “Peb cheemtsum mloog Vajtswv Ntuj tshaj li mloog neeg. 30 Peb tej yawgkoob tus Vajtswv Ntuj tau tsa Yexus sawv rovlos, tus uas nej tau ntes thiab muab ntsia rau saum khaublig. 31 Vajtswv Ntuj tau tsa tus no ua tus Thawj thiab tus Cawmseej rau ntawm Nws sab xis kom muab kev thimxav thiab kev zamtxim rau Yixayees. 32 Peb yog cov timkhawv rau tej lus no, thiab dua ib tug timkhawv yog tus Ntsujplig Dawbhuv, tus uas Vajtswv Ntuj tau muab rau cov uas ntseeg Nws.”
33 Thaum hnov tej lus no, lawv tau mobsiab heev thiab tau xav muab lawv dov kiag. 34 Tabsis ib tug Falixais hauv lub rooj Xuhenris, npe hu ua Nkamaliyees, ib tug xibfwb qhia Kevcai ntomeej rau ntawm zejtsoom, tau sawv los hais kom muab cov txivneej tawm rau sab nraud mentsis. 35 Ces nws tau hais rau lawv tias, “Ibtsoom Yixayees, ceevfaj tias nej samsim yuav ua dabtsi rau cov txivneej no. 36 Rauqhov ib ntus dhau los Theudas tau sawv thiab hu tuskheej ua ib tug tseemceeb thiab plaub puas leej tau qaug nrog nws. Nws tau raug tua thiab cov ntseeg nws puavleej tau tawg tag. Lawv tsis tau peemtsheej dabtsi. 37 Tomqab tus no, Yudas neeg Kalilais kuj tau sawv lub sijhawm sau npe pejxeem ntawd thiab nws tau coj zejtsoom yuamkev raws nws qab. Tus ntawd los kuj tau liamsim thiab tagnrho cov uas tau ntseeg nws puavleej tau tawg tag. 38 Kuv hais rau nej txog tej tamsis no, txav deb ntawm cov txivneej no thiab tso lawv tseg. Rauqhov yog lub homphiaj no lossis tes haujlwm no tawm ntawm neeg, ces nws yuav raug puastsuaj, 39 tabsis yog nws tawm ntawm Vajtswv Ntuj los, nej tsis muaj peevxwm rhuav lawv thiab nej yuav dhau ua Vajtswv Ntuj yeebncuab.” Ces lawv tau ntseeg nws.
40 Tomqab hu cov timthawj los, lawv tau muab lawv nplawm, tso tomtxwv rau lawv kom txhob qhia txog lub npe Yexus, thiab muab lawv tso.
41 Yog li ntawd, thaum lawv tau tawm ntawm lub rooj Xuhenris mus, lawv tau zoosiab tias lawv tau raug xam ua cov tsimnyog txais kev txajmuag rau Yexus lub npe. 42 Txhua hnub, lawv tsis tau so kev qhuabqhia thiab tshajtawm txojmoo zoo tias Yexus yog Khetos rau ntawm tuamtsev thiab hauv tej vajtse.
6
Kev Tsa Xya Tus Ncignum
1 Lub sijhawm no cov thwjtim tau vam coob heev; cov hais lus Kilis tau yws cov hais lus Henplais tias, lawv tau hla lawv tej pojntsuam saum kev faib mov leej hnub. 2 Pab kaum-ob leeg tau hu cov thwjtim tagnrho uake thiab tau hais tias, “Nws tsis zoo rau peb tso Vajtswv Ntuj txojlus tseg los tu roojtog. 3 Tabsis cov kwvtij, nrhiav xya tus txivneej nruab nrab nej uas muaj timkhawv zoo, puvnpo tus Ntsujplig thiab tswvyim. Peb yuav tsa lawv ua cov saib txoj haujlwm no. 4 Peb yuav xyeejzias sijhawm rau kev thov Vajtswv thiab kev tu Nws txojlus.”
5 Txhua leej ntawd tau raug siab rau zaj no thiab lawv tau xaiv Xatefanaus, ib tug puvnpo kev ntseeg thiab tus Ntsujplig Dawbhuv, Filiv, Pakhaulus, Nikanaus, Timoos, Pamenas thiab Nikaulus, tus tau kiavxeem los coj kevcai Yudais uas tau nyob pem Atiaukias tuaj. 6 Cov no tau los sawv rau ntawm cov timthawj xubntiag, ces cov timthawj tau thov Vajtswv thiab tsa tes rau lawv.
7 Vajtswv Ntuj txojlus tau nthuav dav thiab cov thwjtim tau huamvam ceev heev hauv Yeluxalees. Ib pab povthawj coobcoob kuj tau los coj txojkev ntseeg.
Xatefanaus Raug Ntes
8 Xatefanaus tau puvnpo vajhmoov thiab hwjchim. Nws tau ua txujci thiab tej cim loj nruab nrab zejtsoom. 9 Qee leej hauv lub txoos sablaj hu ua Ywjpheej, xws li cov nyob Kulenes, Alexanrias, Kilikias thiab Axias tuaj, tau sawv nrog Xatefanaus sibcav. 10 Lawv tsis tau muaj peevxwm kovyeej tej uas nws tau hais los saum tswvyim thiab tus Ntsujplig.
11 Ces lawv tau haub ibtxhia txivneej tias, “Peb tau hnov nws hais tej lus tuammom Mauxes thiab Vajtswv Ntuj.”
12 Lawv kuj tau do zejtsoom, cov txwjlaug, thiab cov xibfwb qhia Kevcai. Thaum lawv tau tuaj uake, lawv tau ntes Xatefanaus thiab coj nws mus rau lub rooj Xuhenris. 13 Lawv kuj tau tsa timkhawv cuav los hais tias, “Tus txivneej no tau hais tsis tseg tej lus tawmtsam qhov chaw dawbhuv no thiab Kevcai, 14 rauqhov peb twb hnov nws hais tias tus Yexus neeg Naxalev yuav rhuav lub chaw no thiab yuav hloov tej kabke uas Mauxes tau muab rau peb ntawd.”
15 Ces cov uas tau zaum hauv lub rooj Xuhenris tau saib ntsoov nws thiab tau pom nws lub ntsejmuag zoo li ib tug timtswv lub.
7
Xatefanaus Txheem Txojmoo Zoo
1 Tus povthawj hlob tau nug tias, “Tej no muaj tiag lod?”
2 Xatefanaus tau teb tias, “Ib tsoom niamtxiv thiab cov kwvtij, mloog tso. Vajtswv Ntuj tus muaj tshwjchim tau tshwm rau peb txiv Anplahas thaum nws tau tseem nyob Mexaupautamias, uantej nws tau los nyob hauv Halas, 3 thiab Nws tau hais rau nws tias, ‘Tawm ntawm koj tebchaws thiab koj tej txheebze, thiab mus rau lub tebchaws uas kuv yuav qhia rau koj.’”
4 “Ces nws tau tawm hauv Khadeas thiab tau los nyob hauv Halas. Tomqab nws txiv tau tuag lawm, nws tau ncaim ntawd thiab los nyob hauv lub tebchaws uas peb samsim nyob nimno. 5 Tabsis Vajtswv Ntuj tsis tau muab lub tebchaws no ua nyiaj qabnas rau nws, tsis hais ib nyuag thaj dav li xibtaws, tabsis Nws tau coglus yuav muab ua nws tug thiab rau ‘nws lub noob tomqab nws,’ txawm sijhawm nws tsis tau muaj menyuam. 6 Vajtswv Ntuj kuj tau hais li no tias, ‘Koj cajces yuav dhau ua qhua rau lwm tebchaws thiab luag yuav muab lawv ua qhev thiab yuav ua phem rau lawv plaub puas xyoo. 7 Tabsis kuv yuav txiavtxim rau haivneeg uas muab lawv ua qhev,’ Vajtswv Ntuj tau hais, ‘thiab tomqab tej xwmtxheej no, lawv yuav tawm los thiab yuav pehawm kuv ntawm qhov chaw no.’ 8 Vajtswv Ntuj tau muab tus txhooj txiavtawv rau nws. Li no, nws tau yug Ixaj thiab tau muab nws txiavtawv hnub yim. Ixaj tau yug Yakhauj thiab Yakhauj tau yug kaum-ob tug yawgkoob.”
9 “Vim lawv tau khib Yauxej, cov yawgkoob tau muag nws mus rau Iziv. Tabsis Vajtswv Ntuj tau nrog nws nyob 10 thiab tau tso nws tawm ntawm nws txhua txojkev txomnyem thiab tau muab vajhmoov thiab tswvyim rau nws ntawm Falaus, vajntxwv Iziv, lub xubntiag. Mas Falaus tau tsa nws ua tus kav Iziv thiab tagnrho vajntxwv lub cuabyig.”
11 “Kev tshaib tau los thoob plaws Iziv thiab Kanaas thiab tau coj kev txomnyem loj heev los, mas peb tej yawgkoob tau nrhiav tsis tau zaubmov. 12 Thaum Yakhauj tau hnov tias qoob tau muaj nram Iziv, nws tau xa peb tej yawgkoob mus thawj pwg. 13 Zaum ob Yauxej tau qhia tuskheej rau nws cov kwvtij thiab tau qhia nws tsevneeg rau Falaus paub. 14 Yauxej tau xa lawv rovqab thiab tau hu nws txiv Yakhauj thiab nws tsoom kwvtij tagnrho xyacaum-tsib leeg nqis mus. 15 Yakhauj tau nqis mus rau Iziv thiab tau tuag nram nrog peb tej yawgkoob. 16 Lawv tau raug coj rovlos faus hauv Sekhees, hauv lub qhov ntxa uas Anplahas tau muab nyiaj muas ntawm Hemaus cov tub hauv Sekhees.”
17 “Thaum ze rau lub sijhawm uas Vajtswv Ntuj tau coglus tseg rau Anplahas, haivneeg tau loj thiab huamvam hauv Iziv 18 mus txog thaum ‘ib tug vajntxwv tshiab uas tsis tau paub Yauxej tau sawv los kav Iziv.’ 19 Tus no tau xav ntse tawmtsam peb cajces thiab tau ua phem rau peb tej yawgkoob. Nws tau muab lawv tej menyuam mos povtseg kom txhob muajsia.”
20 “Mauxes tau yug rau lub sijhawm ntawd thiab Vajtswv Ntuj tau pom nws ntxim hlub heev. Mauxes tau raug tu peb lub hlis hauv nws txiv lub tsev. 21 Tomqab lawv tau muab nws tawm hauv tsev, Falaus tus ntxhais tau khaws nws los tu ua nws tub. 22 Mauxes tau kawm tagnrho neeg Iziv tej tswvyim, thiab nws tau dhau ua ib tug muaj peevxwm saum nws tej ncaujlus thiab haujlwm.”
23 “Thaum nws tau nto plaubcaug xyoo, nws tau txiavtxim nruab siab mus saib nws cov kwvtij, xws li zejtsoom Yixayees. 24 Thaum pom ib tug raug kev tsis ncajncees, nws tau pauj thiab ua kev ncajncees pub rau tus raug ntaus; nws tau tua tus Iziv. 25 Nws tau xav tias nws cov kwvtij yov totaub tias Vajtswv Ntuj tau muab kev cawmdim rau lawv los ntawm nws txhais tes, tabsis lawv tsis tau totaub li. 26 Hnub tomqab nws tau pom ob tug sibntaus thiab tau kho nkawv saum kev thajyeeb tias, ‘Ob yawg, neb yog kwvtij, vim li cas neb ib tug ho ua tsis ncaj rau ib tug?’”
27 “Tabsis tus uas tau ua tsis ncaj rau nws tus kwvtij tau thawb Mauxes thiab hais tias, ‘Leejtwg tau tsa koj ua tus thawj thiab tus txiavtxim rau peb? 28 Tsis yog koj xav tua kuv li koj tau tua tus Iziv naghmo lod?’ 29 Ces Mauxes tau khiav vim lolus ntawd thiab tau dhau mus ua qhua hauv tebchaws Midias, qhov uas nws tau yug ob tug tub.”
30 “Tomqab puv plaubcaug xyoo, ‘Ib tug timtswv tau tshwm rau nws pom hauv cov nplaim taws ntawm tauv pos saum roob Xinais tom mojsab qhua.’ 31 Thaum pom, Mauxes tau xav tsis thoob txog qhov zeemmuag ntawd. Sijhawm nws tau mus saib ze, tus Tswv lub suab tau hais tias, 32 ‘Kuv yog koj tej yawgkoob tus Vajtswv Ntuj, yog Anplahas tus Vajtswv, Yakhauj tus Vajtswv thiab Ixaj tus Vajtswv.’ Ces Mauxes tau ntshee hnyo thiab tsis tau muaj cuabkav qhib qhovmuag saib.”
33 “Tus Tswv tau hais rau nws tias, ‘Hle koj txhais khau ntawm kotaw, rauqhov thaj chaw uas koj tsuj no yog av dawbhuv. 34 Saib, kuv tau pom meej txog txojkev phem uas tau raug kuv haivneeg hauv Iziv, thiab kuv tau hnov lawv lub suab nroo, mas kuv tau nqis los tso lawv. Los ntawm no, es kuv yuav xa koj mus rau Iziv.’”
35 Tus Mauxes no yeej yog tus uas lawv tau tsis lees thiab tau hais rau tias, ‘Leejtwg tau tsa koj ua tus thawj thiab tus txiavtxim rau peb?’ Vajtswv Ntuj tau xa tus no los ua tus thawj thiab tus txhiv peb haivneeg nrog tus timtswv txhais tes, tus uas tau tshwm rau nws ntawm tauv pos. 36 Nws tau coj lawv tawm thiab nws tau ua ntau yam txujci thiab cim hauv tebchaws Iziv, ntawm Hiavtxwv Liab, thiab tom mojsab qhua plaubcaug xyoo.”
37 “Tus Mauxes ntawd yog tus tau hais rau zejtsoom Yixayees tias, ‘Vajtswv Ntuj yuav tsa ib tug cevlus li kuv tawm hauv nej tsoom kwvtij rau nej.’ 38 Nws yog tus uas tau nyob hauv pawg neeg tom mojsab qhua nrog tus timtswv, uas tau hais lus rau nws thiab rau peb tej yawgkoob saum roob Xinais. Nws tau txais thiab tau muab txojlus muajsia rau peb.”
39 “Tib tug no yog tus uas peb tej yawgkoob tsis tau xav ntseeg, tabsis lawv tau muab thawb thiab lawv tej siab tau tig tawm ntawm nws mus rau nram Iziv. 40 Lawv tau hais rau Aloos tias, ‘Puab tej vajtswv uas yuav mus uantej peb, rauqhov tus Mauxes uas tau coj peb tawm nram tebchaws Iziv ntawd, peb tsis paub xyov dabtsi tau tshwmsim rau nws lawm.’ 41 Ces lub sijhawm ntawd lawv tau puab ib tug menyuam nyuj thiab tau coj khoom fij mus rau tus mlom ntawd thiab lawv tau txaussiab rau tej uas lawv txhais tes tau tsim. 42 Tabsis Vajtswv Ntuj tau tig tawm ntawm lawv thiab tau tso lawv mus teev tej tubrog saum nruab ntug ibyam li twb sau tseg hauv cov cevlus phau ntawv tias:

‘Nej tsis tau nqa tsiaj thiab khoom fij rau kuv
sijhawm plaubcaug xyoo tom mojsab qhua sas, tsevneeg Yixayees?
43 Nej tau tig mus rau Maulej lub tsev ntaub
thiab rau lub hnubqub ntawm nej tus vajtswv Lefas,
mus rau tej duab uas nej tau puab los pehawm.
Ces kuv yuav ntiab nej mus dhau plaws Npanpiloos.’”

44 “Lub tsev ntaub timkhawv tau nyob nrog peb tej yawgkoob tom mojsab qhua ibyam li tus uas tau nrog Mauxes sibtham tau tawmcai kom tsa raws nraim li tus qauv uas Mauxes twb pom lawm. 45 Lub tsev ntawd kuj yog lub uas peb tej yawgkoob thiab Yausuas tau coj los, thaum lawv tau txais lub tebchaws ntawm pejkum neeg uas Vajtswv Ntuj tau caum tawm ntawm peb tej yawgkoob xubntiag. Lub tsev ntaub tau nyob los txog rau thaum Daviv, 46 tus uas tau txais vajhmoov ntawm Vajtswv Ntuj xubntiag thiab tau taij kom cia nws nrhiav ib lub tsev so rau tus Vajtswv saum Yakhauj tsevneeg. 47 Xalumoos thiaj tau tsa lub tuamtsev rau Vajtswv Ntuj.”
48 “Tabsis tus Loj Kawgnkaus tsis nyob hauv tej tsev uas neeg txhais tes tau ua, li tus cevlus tau hais tias:

49 ‘Lub ntuj yog kuv lub zwmtxwv,
thiab ntiajteb yog lub rooj tiag kuv ob txhais kotaw.
Nej yuav ua li cas tsa ib lub tsev rau kuv,’ tus Tswv hais,
‘lossis ua lub chaw rau kuv so?’
50 ‘Tsis yog kuv txhais tes tau ua txhua yam no lod?’”

51 “Cov niag neeg tawvncauj, cov neeg tsis txiavtawv nruab siab thiab tsis mloog lus! Nej ibtxwm sawv tawmtsam tus Ntsujplig Dawbhuv! Nej tej yawgkoob tau ua li cas, nej kuj ua li ntawd. 52 Cov cevlus tus twg uas nej tej yawgkoob tsis tau tsimtxom? Lawv tau tua cov cevlus uas tau tshajtawm nram ntej txog tus ncajncees uas yuav los. Nimno nej yog cov ntxeevsiab rau tus ncajncees thiab yog cov tua Nws. 53 Nej tau txais Kevcai uas yog kabke timtswv tabsis nej tuskheej tsis tau coj.”
Xatefanaus Raug Muab Zeb Ntaus
54 Thaum lawv tau hnov tej no, lawv tau npau ceev thiab tau zom hniav zaig rau Xatefanaus. 55 Thaum puvnpo tus Ntsujplig Dawbhuv, nws tau saib rau saum ntuj thiab tau pom Vajtswv Ntuj tus tshwjchim thiab Yexus sawv ntawm Vajtswv Ntuj sab xis. 56 Ces nws tau hais tias, “Saib! Kuv pom lub ntuj qhib plho thiab Neeg Leej Tub sawv ntawm Vajtswv Ntuj sab xis.”
57 Ces lawv tau qw ib suab, pos lawv tej pobntseg thiab thoojtxhij sau nthwv los rau ntawm nws. 58 Lawv tau coj nws tawm hauv nroog mus rau sab nraud thiab tau muab pobzeb ntaus nws. Cov timkhawv tawmtsam nws tau muab lawv tej tsholoj hle rau ntawm ib tug hluas uas hu ua Xaulus kotaw.
59 Thaum lawv tau tabtom muab pobzeb ntaus nws ntawd, Xatefanaus tau hu tias, “Tswv Yexus, txais kuv tus ntsujplig.” 60 Txhoscaug ntua rau pem teb, nws tau qw ib suab tias, “Tus Tswv, txhob tsub lub txim no rau lawv os.” Hais li no tag, ces nws tau tuag.
8
1 Mas Xaulus kuj tau pomzoo nrog txojkev tua nws.
Pawgntseeg Yeluxalees Raug Tsimtxom
Hnub ntawd kev tsimtxom loj tau tshwmsim rau pawgntseeg hauv Yeluxalees. Txhua leej tau khiav mus rau qhov txhia chaw hauv Yudas thiab Xamalias, tseg cov timthawj nkaus xwb. 2 Ib pab txivneej uas hwm Vajtswv Ntuj tau muab Xatefanaus faus thiab lawv tau ua ib ntees loj los nyiav nws. 3 Hos Xaulus tau rhuav tshem pawgntseeg, mus ib lub tsev rau ib lub tsev, cab qas pojniam thiab txivneej thiab muab lawv kaw hauv tsev lojcuj.
Filiv Nyob Xamalias
4 Yog li ntawd, thaum lawv tau tawg mus ntawd, lawv tau tshajtawm txojmoo zoo. 5 Filiv tau nqis mus rau hauv nroog Xamalias thiab tau tshajtawm Khetos rau lawv. 6 Tej neeg coobcoob tau thoojsiab txais Filiv tej lus thaum lawv tau hnov thiab pom tej cim uas nws tau ua. 7 Ntau tus ntsujplig qias tau qw nrovnrov thiab tau tawm ntawm tej neeg, thiab ntau tus neeg tuag duav thiab qhuav ceg tau zoo. 8 Mas kev zoosiab loj tau tshwmsim hauv lub nroog ntawd.
Ximoos Yawm Yeessiv
9 Ib tug txivneej hauv lub nroog, npe hu ua Ximoos, tau ua yeessiv nram ntej thiab tau ua rau haivneeg Xamalias xav tsis thoob. Nws kuj tau hu tuskheej ua ib tug nto npe. 10 Txij tus loj rau tus yau, sawvdaws tau poog nws thiab tau hais tias, “Nws yog Vajtswv Ntuj lub hwjchim loj.” 11 Lawv tau poog nws los ntev vim nws tau yeessiv rau lawv xav tsis thoob. 12 Thaum lawv ntseeg tias Filiv tau qhia txojmoo zoo txog Vajtswv Ntuj lub tswvkuj thiab Yexus Khetos lub npe, tej txivneej thiab pojniam tau rausdej. 13 Tus Ximoos no tuskheej kuj tau ntseeg, rausdej thiab nyob nrog nraim Filiv. Thaum pom tej cim thiab hwjchim loj uas tshwmsim ntawd, nws kuj tau xav tsis thoob.
14 Thaum cov timthawj hauv Yeluxalees hnov tias Xamalias twb txais Vajtswv Ntuj txojlus lawm, lawv tau xa Petus thiab Yauhas mus cuag lawv. 15 Thaum nqis tuaj txog, nkawv tau thov Vajtswv Ntuj rau lawv kom lawv txais tus Ntsujplig Dawbhuv, 16 vim tias Nws twb tsis tau nqis los rau saum lawv ib tug li; lawv tsuas tau rausdej hauv tus Tswv Yexus lub npe lawm xwb. 17 Thaum ob tug timthawj tau tsa tes rau lawv, ces lawv tau txais tus Ntsujplig Dawbhuv.
18 Thaum Ximoos tau pom tias tus Ntsujplig tau raug muab rau lawv los ntawm cov timthawj kev tsa tes, nws tau nqa nyiajtxiag tuaj rau nkawv 19 thiab tau hais tias, “Muab lub tswjchim no rau kuv thiab, kom kuv tsa tes rau leejtwg, tus ntawd yuav txais tus Ntsujplig Dawbhuv.”
20 Tabsis Petus tau hais rau nws tias, “Cia koj cov nyiajtxiag nrog koj puastsuaj, vim koj tau xav tias koj yuav muab nyiaj muas Vajtswv Ntuj qhov khoom pub. 21 Koj tsis muaj feem rau zaj no, rauqhov koj lub siab tsis ncaj rau ntawm Vajtswv Ntuj lub xubntiag. 22 Yog li ntawd, thimxav tawm ntawm koj txojkev qias no thiab thov Vajtswv rau tus Tswv, seb yam koj xav hauv siab puas yov raug zam rau koj, 23 vim kuv pom koj tseem nyob hauv kev iab thiab raug kev tsis ncajncees khi.”
24 Ximoos tau teb tias, “Neb thov Vajtswv rau tus Tswv pab kuv kom tej neb tau hais ntawd txhob los rau saum kuv.”
25 Yog li ntawd, tomqab ua timkhawv ntxaws thiab qhia tus Tswv txojlus tag, nkawv tau rovqab mus Yeluxalees, thiab tau tshajtawm txojmoo zoo rau cov Xamalis ntau lub zos.
Filiv Tshajtawm Rau Tus Ethiaupias Sam
26 Tus Tswv tus timtswv tau hais rau Filiv tias, “Sawv thiab mus rau nram qab teb, ntawm txojkev nqis pem Yeluxalees mus rau Nkaxas, txoj ntawm mojsab qhua.” 27 Nws tau sawv tsees mus. Nimno ib tug txivneej Ethiaupias sam, tus nom saib xyuas tagnrho Pojvaj Kadake hauv Ethiaupias lub txhab nyiaj, twb tuaj pehawm Vajtswv Ntuj hauv Yeluxalees 28 thiab nws tau samsim taugkev rovqab. Nws tau zaum saum nws lub tsheb nees nyeem tus cevlus Yaxayas. 29 Tus Ntsujplig tau hais rau Filiv tias, “Mus ze thiab npuab lub tsheb nees no.”
30 Thaum khiav mus ntawd, Filiv tau hnov nws nyeem tus cevlus Yaxayas thiab nws tau nug tias, “Koj puas totaub tej uas koj nyeem?”
31 Nws tau teb tias, “Kuv yuav muaj peevxwm totaub li cas yog tsis muaj leejtwg tawkev rau kuv?” Ces nws tau caw Filiv nce los zaum nrog nws.
32 Nqe Vajlugkub uas nws tau nyeem ntawd yog qhov no:

“Nws tau raug coj mus tua li tus yaj,
thiab yam tus menyuam yaj nyob ntsiagto ntawm tus txiav nws cov plaub,
Nws tsis tau qhib Nws lub ncauj li.
33 Vim Nws kev txo hwjchim Nws tau raug txiavtxim;
leejtwg yuav qhia txog Nws cajces?
Vim Nws txojsia tau raug muab tshem hauv daim av.”

34 Tus sam tau hais rau Filiv tias, “Kuv nug koj, tus cevlus hais txog leejtwg li no? Txog nws tuskheej lossis lwm tus?” 35 Ces Filiv tau qhib qhovncauj thiab tshajtawm txog Yexus, chiv kiag ntawm Vajlugkub nqe no.
36 Thaum taugkev ntawm txojkev, nkawv tau los txog ib qhov chaw muaj dej. Tus sam tau hais tias, “Saib, muaj dej ntawm no! Puas muaj dabtsi khuam kuv rau kev rausdej?” 38 Nws tau hu kom lub tsheb nees nres, ces nkawv obleeg tau nqis mus rau hauv dej, Filiv thiab tus sam. Filiv tau muab nws rausdej. 39 Thaum nkawv tawm hauv dej los, tus Tswv tus Ntsujplig tau coj Filiv mus thiab yawg sam tsis tau pom nws ntxiv lawm. Nws tau taugkev mus tsev zoo siab hlo. 40 Tabsis Filiv tau tshwm rau hauv Axautus. Sijhawm dua kev mus ntawd, nws tau tshajtawm txojmoo zoo rau txhua lub nroog mus txog thaum nws tau los txog Xixaliyas.
9
Xaulus Raug Hu
Ctu 22:3-16; 26:9-18
1 Hos Xaulus tseem tau ua pa nrog kev tomtxwv thiab kev tuaneeg mus tawmtsam tus Tswv cov thwjtim. Thaum mus cuag tus povthawj hlob, 2 nws tau thov ntawv ntawm nws mus rau tej txoos sablaj hauv Damaxes, kom yog nws tau pom leejtwg coj Txojkev, tsis hais txivneej thiab pojniam, ces nws yov muab khi thiab coj los rau Yeluxalees. 3 Sijhawm nws tau taugkev tuaj ze rau Damaxes, tamsis ntawd ib lub teeb tau ci saum ntuj tuaj rau ibncig nws. 4 Nws tau ntog kiag rau pem teb thiab tau hnov ib lub suab hais rau nws tias, “Xaulus, Xaulus, ua cas koj tsimtxom kuv?”
5 Nws tau teb tias, “Koj yog leejtwg, tus Tswv?”
Tus Tswv tau teb tias, “Kuv yog Yexus tus uas koj tsimtxom. 6 Tabsis sawv thiab mus hauv nroog. Koj yuav raug qhia tias koj cheemtsum ua dabtsi.”
7 Cov neeg uas tau nrog nws taugkev uake ntawd tau nres nroos, tsis paub hais lus, vim lawv tau hnov lub suab tabsis tsis tau pom leejtwg. 8 Lawv tau tsa Xaulus hauv pem teb, tabsis thaum nws tau qhib nws ob lub qhovmuag, nws tsis tau pomkev. Lawv tau tuav nws tes thiab coj nws mus rau Damaxes. 9 Peb hnub nws tsis tau pomkev thiab tsis tau noj lossis haus dabtsi.
10 Ib tug thwjtim npe hu ua Ananias tau nyob hauv Damaxes thiab tus Tswv tau hais rau nws hauv zeemmuag tias, “Ananias!”
Nws tau teb tias, “Kuv nyob ntawm no, tus Tswv.”
11 Ces tus Tswv tau hais rau nws tias, “Sawv thiab mus rau ntawm txojkev nom hu ua Ncaj thiab nrhiav yawg Xaulus pem Talaxus hauv Yudas lub tsev. Vim tias nws samsim thov Vajtswv 12 thiab pom hauv zeemmuag txog ib tug txivneej npe hu ua Ananias tuaj thiab tsa tes rau saum nws kom nws pomkev.”
13 Ananias tau teb tias, “Tus Tswv, kuv tau hnov ntawm coob leej txog tus txivneej no tias nws tau ua ntau yam phem rau koj cov dawbhuv hauv Yeluxalees; 14 thiab nws tau txais cov povthawj hlob lub tswjchim tuaj ntes txhua tus uas hu txog koj lub npe.”
15 Tus Tswv tau hais rau nws tias, “Mus, rauqhov nws yog rab cuabyeej raug xaiv rau kuv los ris kuv lub npe mus rau pejkum neeg thiab tej vajntxwv thiab zejtsoom Yixayees. 16 Rauqhov kuv yuav nthuav rau nws pom tias nws cheemtsum yuav tuag rau kuv lub npe li cas.”
17 Ces Ananias tau tawm mus thiab tau mus rau hauv tsev. Thaum tsa tes rau nws, Ananias tau hais tias, “Tus kwv Xaulus, tus Tswv Yexus, uas tau tshwm rau koj tom txojkev uas koj tau tuaj ntawd, tau xa kuv tuaj cuag koj, kom koj rovqab pomkev thiab txais tus Ntsujplig Dawbhuv.” 18 Thiab tamsis ntawd, ib qhov zoo li daim nplai ntses tau poob ntawm nws qhovmuag thiab nws tau rovqab pomkev. Nws tau sawv thiab tau rausdej. 19 Tomqab noj mov tag, nws tau muaj zog.
Xaulus Pib Qhia Txog Yexus
Nws tau nyob nrog cov thwjtim hauv Damaxes ib ntus. 20 Kiag thaum ntawd, nws tau tshajtawm Yexus hauv tej txoos sablaj tias, “Nws yog Vajtswv Ntuj tus Tub.” 21 Txhua tus uas tau hnov ntawd tau xav tsis thoob thiab hais tias, “Nws tsis yog tus uas tau rhuav tshem cov hu txog lub npe no hauv Yeluxalees lod? Nws tau tuaj ntawm no yog tuaj ntes lawv mus rau cov povthawj hlob sad?” 22 Xaulus tau hajyam muaj peevxwm thiab tau ua rau cov Yudais hauv Damaxes twskev thaum nws tau muab Vajlugkub sibteeb uake tias Yexus yog tus Khetos.
23 Sijhawm dhau ntau hnub, ces cov Yudais tau tuavhauv tua nws, 24 tabsis lawv lub homphiaj twb raug qhia rau Xaulus paub lawm. Lawv tau zov tej roojvag nruab hnub thiab hmontuj kom lawv tua tau nws. 25 Tabsis cov thwjtim tau coj nws tawm hmontuj thiab tau muab nws dauv hauv pobtawb tawm ntawm ntsa yeej rau sab nraud.
26 Los txog Yeluxalees, nws tau sim mus npuab cov thwjtim, tabsis lawv puavleej tau ntshai nws, tsis ntseeg tias nws tau dhau ua ib tug thwjtim. 27 Tabsis Npananpas tau txais nws thiab coj nws mus cuag cov timthawj thiab tau qhia lawv meej tias nws tau pom tus Tswv tom kev thiab tus Tswv tau hais rau nws li cas thiab nws tau tshajtawm tawvqhawv txog Yexus lub npe hauv Damaxes li cas. 28 Ces nws tau nrog lawv taugkev muslos hauv Yeluxalees thiab tau tshajtawm tawvqhawv txog tus Tswv lub npe. 29 Nws kuj tau tham thiab sibcav nrog cov hais lus Kilis, mas lawv tau nqistes yuav tua nws. 30 Thaum cov kwvtij tau paub qhov no, lawv tau coj nws mus nram Xixaliyas thiab tau xa nws tawm mus Talaxus.
31 Yog li ntawd, pawgntseeg thoob plaws Yudas, Kalilais thiab Xamalias tau muaj kev thajyeeb. Pawgntseeg tau raug tsa khovkho thiab tau nyob hauv kev hwm tus Tswv thiab kev txhawbzog los ntawm tus Ntsujplig Dawbhuv.
Aneas thiab Duakas
32 Nimno Petus tau dhau kev mus rau txhua qhov thiab kuj tau nqis tuaj cuag cov dawbhuv uas tau nyob hauv Lidas. 33 Nws tau ntsib ib tug txivneej ntawd hu ua Aneas, uas tau pw saum txaj tau yim lub xyoos vim nws yeej yog neeg tuag testaw. 34 Ces Petus tau hais rau nws tias, “Aneas, Yexus Khetos kho koj zoo. Sawv, thiab tu koj tuskheej.” Nws tau sawv tsees tamsis ntawd. 35 Txhua tus uas tau nyob hauv Lidas thiab Saloos puavleej tau pom nws thiab lawv tau tig los cuag tus Tswv.
36 Ib tug thwjtim npe hu ua Tanpithas, uas txhais tias Duakas, ‘muaslwj,’ tau nyob hauv Yaupes. Nws yeej yog ib tug uas tau ua haujlwm zoo thiab puvnpo kev tabncuab. 37 Sijhawm ntawd nws tau mob thiab tau tuag. Lawv tau muab nws ntxuav thiab muab tso rau hauv tsev txheej saud. 38 Yaupes kuj tau nyob ze ntawm Lidas. Thaum cov thwjtim tau hnov tias Petus nyob hauv Lidas, lawv tau xa ob tug txivneej mus cuag nws thiab nquahu nws tias, “Tuaj ntawm peb, tsis txhob laug.”
39 Petus tau sawv thiab nrog lawv mus. Thaum tuaj txog, nws tau raug coj mus txheej saud. Txhua tus pojntsuam uas tau sawv nrog nws ntawd tau quaj thiab nthuav tej tsho tab thiab tsholoj uas Duakas tau ua thaum nws tseem muajsia nrog lawv.
40 Tomqab Petus tau ntiab lawv tawm sab nraud, nws tau txhoscaug thov Vajtswv. Tig mus rau ntawm tus tuag lub cev, nws tau hais tias, “Tanpithas, sawv.” Tanpithas tau qhib qhovmuag, thiab thaum pom Petus, nws tau sawv los zaum. 41 Ces Petus tau cev tes mus tsa nws sawv. Thaum hu cov dawbhuv thiab cov pojntsuam los, Petus tau cob nws muajsia zees rau lawv. 42 Neeg tau paub zaj no thoobplaws Yaupes thiab coob leej tau ntseeg tus Tswv. 43 Petus tau so ib ntus hauv Yaupes nrog yawg Ximoos, tus ziab tawv tsiaj.
10
Vajtswv Ntuj Hu Kaunelius
1 Nimno, hauv Xixaliyas tau muaj ib tug txivneej npe hu ua Kaunelius, uas tau ua ib tug thawj tubrog pawgpua hauv pawg tubrog Italis. 2 Nws yeej yog ib tug uas tau teev thiab hwm Vajtswv Ntuj nrog rau txhua leej hauv nws lub tsev; nws tau tabncuab zejtsoom heev thiab niajhnub thov Vajtswv. 3 Kwvyees li thaum cuaj teev tav su, nws tau pom Vajtswv Ntuj ib tug timtswv hauv zeemmuag, tus uas tau los rau ntawm nws thiab tau hu nws tias, “Kaunelius.”
4 Saib ntsoov tus timtswv, nws tau ntshai heev thiab tau teb tias, “Yog dabtsi, tus Tswv?”
Ces tus timtswv tau hais rau nws tias, “Koj tej lus thov thiab koj tej kev tabncuab tau nce mus ua qhov chaw nco rau ntawm Vajtswv Ntuj. 5 Nimno, xa tus puav txivneej mus rau hauv Yaupes thiab caum Ximoos, tus uas hu ua Petus. 6 Nws samsim so hauv ib tug Ximoos, tus ziab tawv tsiaj, uas muaj lub tsev nyob ntawm ntug hiavtxwv.”
7 Tomqab hais lus rau nws tag, tus timtswv tau tawm lawm. Nws tau hu ob tug tubtxib saib vajtse thiab ib tug tubrog, uas tau hwm Vajtswv Ntuj zoo thiab tau zov rawv nws, los cuag nws. 8 Thaum piav txhua yam rau lawv tag lawd, nws tau xa lawv mus rau Yaupes.
Petus Txais Zeemmuag
Ctu 11:5-14
9 Tagkis, lub tsamthawj cov neeg taugkev ntawd tuaj txog ze lawm, Petus tau nce mus thov Vajtswv Ntuj rau saum qaum tsev, sijhawm li rau teev. 10 Petus tau tshaib thiab xav noj mov. Sijhawm luag samsim tau npaj zaubmov rau nws, nws tau tshee li tawm ntawm cev 11 thiab tau pom ntuj qhib plho thiab ib qhov, zoo li ib daim ntaub khi plaub ceg, tau dauv los rau pem teb. 12 Txhua yam tsiaj plaub testaw, tej nabqa nkag pem teb thiab tej noog saum nruab ntug tau nyob rau hauv. 13 Ib lub suab tau hais rau nws tias, “Sawv, Petus, muab tua noj.”
14 Petus tau teb tias, “Tsis lam ua li, tus Tswv, rauqhov kuv ibtxwm tsis tau noj ib nyuag yam qias thiab tsis huv.”
15 Lub suab tau hais dua zaum ob tias, “Tej uas Vajtswv Ntuj tau ntxuav lawm, koj txhob hu ua qias.”
16 Nws tau tshwmsim li no peb zaug thiab qhov ntawd tau raug nqa mus saum ntuj lawm.
17 Lub tsamthawj Petus tuskheej tau samsim xav tsis thoob tias qhov nws tau pom ntawd txhais li cas, cov txivneej uas Kaunelius tau xa tuaj ntawd tau tuaj txog ntawm Ximoos lub tsev thiab tau sawv ntawm roojvag. 18 Lawv tau hu nrovnrov thiab nug tias, “Ximoos, tus hu ua Petus, puas nyob ntawm no?”
19 Lub sijhawm no Petus tau samsim xav txog qhov nws tau pom ntawd, tus Ntsujplig tau hais rau nws tias, “Saib, peb tug txivneej samsim nrhiav koj. 20 Sawv tsees, nqis nroos, thiab nrog lawv mus txhob ua xyemxyav rau dabtsi, vim kuv twb xa lawv tuaj ntag.”
21 Thaum nqis los, Petus tau hais rau cov txivneej tias, “Nimno, kuv yog tus nej nrhiav. Vimchij tus dabtsi es nej ho tuaj ntawm no?”
22 Ces lawv tau teb tias, “Kaunelius tus thawj tubrog pawgpua, ib tug ncajncees thiab hwm Vajtswv Ntuj thiab tagnrho haivneeg Yudais kuj tau ua timkhawv txog nws, tau raug ib tug timtswv dawbhuv qhia kom tuaj caum koj mus rau hauv nws tsev thiab kom nws mloog tej lus los ntawm koj.” 23 Ces nws tau caw lawv los hauv tsev thiab tau txais lawv ua nws cov qhua.
Petus Qhuabqhia Rau Kaunelius Tsevneeg
Tagkis, nws tau sawv thiab nrog lawv mus thiab qee tus kwvtij hauv Yaupes kuj tau nrog nws mus. 24 Hnub tomqab, nws tau los hauv Xixaliyas. Kaunelius tau tos ntsoov lawv thiab nws tau hu nws tej txheebze thiab cov zoo phoojywg tuaj uake. 25 Thaum Petus tau samsim mus hauv tsev, Kaunelius tau tuaj ntsib nws thiab tau qhaucev hlo rau ntawm nws kotaw thiab pe. 26 Tabsis Petus tau tsa nws thiab hais tias, “Sawv! Kuv tuskheej yog neeg thiab.”
27 Tomqab nkawv tau sibtham mentsis, nws tau mus hauv tsev thiab pom neeg coobcoob tuaj txoos uake. 28 Ces Petus tau hais rau lawv tias, “Nej paub tias nws tsis raugcai rau ib tug neeg Yudais mus koom lossis mus ze lwm haivneeg. Tabsis Vajtswv Ntuj tau nthuav rau kuv tias kom txhob hu ib tug neeg ua tus qias lossis tsis huv. 29 Vim li ntawd, kuv thiaj tau nrog cov uas nej tau xa tuaj ntawd tuaj, tsis tau yig. Ces kuv ho nug saib vimchij dabtsi nej ho tau caum kuv tuaj?”
30 Kaunelius tau hais tias, “Plaub hnub dhau los rau lub sijhawm no, thaum cuaj teev, kuv samsim thov Vajtswv Ntuj hauv kuv lub tsev. Nimno, ib tug txivneej hnav tsoos dawbdawb tau los sawv ntawm kuv xubntiag 31 thiab hais tias, ‘Kaunelius e, koj tej lus thov thiab tej kev tabncuab tau mus ua qhov chaw nco rau ntawm Vajtswv Ntuj xubntiag. 32 Yog li ntawd, xa neeg mus rau Yaupes thiab caum Ximoos, tus hu ua Petus. Nws samsim so hauv Ximoos, tus ziab tawv tsiaj, lub tsev ntawm ntug hiavtxwv.’ 33 Ces tamsis ntawd kuv tau xa neeg tuaj cuag koj. Thiab koj tau ua zoo thiab tau tuaj txog lawm. Yog li ntawd, nimno peb txhua leej tau tuaj rau ntawm Vajtswv Ntuj xubntiag, tuaj mloog txhua yam uas tus Tswv tau tawmlus rau koj lawm.”
34 Petus tau qhib qhovncauj hais tias, “Tseeb tiag, kuv txais raug tias Vajtswv Ntuj tsis xaiv ntsejmuag, 35 tabsis tus uas hwm Nws thiab ua kev ncajncees hauv txhua haivneeg yeej raug Nws txais. 36 Txojlus uas Nws tau xa rau zejtsoom Yixayees thiab txojmoo zoo kev thajyeeb tau raug tshajtawm los ntawm Yexus Khetos, tus uas yog sawvdaws tus Tswv. 37 Nej puavleej tau paub txog qhov xwmtxheej uas tau tshwm thoob plaws Yudas, chiv los ntawm txojkev rausdej uas Yauhas tau qhia pem Kalilais, 38 los txog thaum Yexus Naxalev, tus uas Vajtswv Ntuj tau muab roj pleev los ntawm tus Ntsujplig Dawbhuv thiab ntawm hwjchim. Nws tau tawm mus ua haujlwm zoo thiab kho txhua tus neeg qaugzog vim ntxwgnyoog, ruaqhov Vajtswv Ntuj tau nyob nrog Nws.”
39 “Thiab peb yog cov timkhawv rau txhua yam uas Nws tau ua rau txhua qhov hauv cov Yudais thiab Yeluxalees. Tus Yexus no lawv kuj tau muab tua thaum lawv tau muab ntsia saum khaublig, 40 tabsis Vajtswv Ntuj tau tsa Nws sawv rovlos hnub peb thiab tau muab Nws los rau neeg pom, 41 tsis rau zejtsoom tagnrho, tabsis rau cov uas Vajtswv Ntuj tau xub xaiv los ua timkhawv, xws li peb, cov uas tau nrog Nws noj uake thiab haus uake tomqab Nws raug tsa sawv ntawm cov tuag. 42 Nws tau tawmlus rau peb mus qhuabqhia rau zejtsoom thiab ua timkhawv ntsees tias, Nws yog tus uas Vajtswv Ntuj tau tsa ua tus txiavtxim rau cov ciaj thiab cov tuag. 43 Tagnrho cov cevlus tau ua timkhawv txog tus Yexus no tias, txhua tus uas ntseeg Nws yuav txais kev zamtxim los ntawm Nws lub npe.”
44 Thaum Petus samsim tau hais tej lus no, tus Ntsujplig Dawbhuv tau nqis los rau saum txhua tus uas tau hnov txojlus. 45 Cov ntseeg txiavtawv uas tau nrog Petus tuaj ntawd tau xav tsis thoob tias qhov khoom pub ntawm tus Ntsujplig Dawbhuv tau raug nchuav rau pejkum neeg lawm, 46 rauqhov lawv tau hnov cov neeg ntawd hais lus txawv tebchaws thiab tsav koobmeej rau Vajtswv Ntuj.
Ces Petus tau teb tias, 47 “Leejtwg puas yuav muaj peevxwm cheem kom txhob cia cov no rausdej, vim lawv tau txais tus Ntsujplig Dawbhuv ibyam li peb?” 48 Li ntawd, nws thiaj tau tawmlus kom muab lawv rausdej rau hauv Yexus Khetos lub npe. Thaum ntawd, lawv tau thov nws kom so nrog lawv hnub puav.
11
Petus Hais Nws Zajlus Hauv Yeluxalees
1 Cov timthawj thiab cov kwvtij uas nyob thoob Yudas tau hnov tias pejkum neeg tau txais Vajtswv Ntuj txojlus lawm thiab. 2 Tabsis thaum Petus nce mus rau Yeluxalees, cov txiavtawv nruab nrab lawv tau txiavtxim rau nws 3 tias, “Koj tau mus hauv tej neeg uas tsis txiavtawv thiab tau koom noj nrog lawv.”
4 Petus tau pib piav rau lawv raws txheejtxheem tias, 5 “Kuv tau nyob hauv nroog Yaupes. Thaum samsim thov Vajtswv, kuv tau tawm ntawm kuv lub cev thiab tau pom ib qhov zeemmuag. Ib pob dabtsi, zoo nkaus li daim ntaub loj khi plaub ceg kaum, tau dauv saum ntuj los, thiab nws tau los txog rau ntawm kuv. 6 Kuv saib rau hauv qhov ntawd mas kuv tau pom tej tsiaj plaub testaw saum av, tej tsiaj hav zoo, tej nabqa nkag thiab tej noog saum nruab ntug. 7 Kuv tau hnov ib lub suab hais rau kuv tias, ‘Sawv tsees, Petus, muab tua noj.’”
8 “Tabsis kuv tau hais tias, ‘Tsis lam ua li, tus Tswv, rauqhov tej qias thiab tsis huv ibtxwm tsis tau nkag hauv kuv lub qhovncauj li.’”
9 “Ces lub suab tau teb zaum ob saum ntuj tuaj tias, ‘Yam uas Vajtswv Ntuj tau muab ntxuav huv lawm, koj txhob hu ua qias.’ 10 Qhov no tau tshwmsim peb zaug, ces txhua yam ntawd tau raug nqa rovmus saum ntuj lawm.”
11 “Ces tamsis ntawd peb tug txivneej tau tuaj nres rau ntawm lub tsev uas kuv tau nyob ntawd. Lawv tau raug xa pem Xixaliyas tuaj cuag kuv. 12 Ces tus Ntsujplig tau hais kom kuv nrog lawv mus tsis txhob ua xyemxyav. Rau tug kwvtij no tau nrog kuv mus thiab peb tau mus rau hauv tus txivneej ntawd lub tsev. 13 Ces nws tau tshabxo rau peb tias nws tau pom ib tug timtswv los sawv hauv nws lub tsev li cas thiab tau hais rau nws tias, ‘Xa neeg mus rau Yaupes thiab caum Ximoos tus hu ua Petus. 14 Nws yuav qhia tej lus rau koj, tej lus uas koj thiab koj tsevneeg yuav dim.’”
15 “Sijhawm kuv pib qhia, tus Ntsujplig Dawbhuv tau nqis los rau saum lawv ibyam nkaus li thaum chiv Nws tau los rau saum peb. 16 Ces kuv tau nco txog tus Tswv lolus uas Nws tau hais tias, ‘Yauhas tau muab neeg raus hauv dej, tabsis nej yuav raug raus hauv tus Ntsujplig Dawbhuv.’ 17 Yog li ntawd, yog Vajtswv Ntuj tau muab khoom pub rau lawv sibtxig li rau peb cov uas tau ntseeg tus Tswv Yexus Khetos, kuv yog leejtwg es ho yuav muaj hwjchim cheem Vajtswv Ntuj?”
18 Thaum hnov tej no tag, lawv tau ntsiag thiab tau qhuas Vajtswv Ntuj tias, “Ces Vajtswv Ntuj tau muab kev thimxav mus rau txojsia rau pejkum neeg lawm thiab.”
Pawgntseeg Atiaukias
19 Yog li ntawd, cov uas tau tawg tawm vim txojkev tsimtxom los ntawm qhov xwmtxheej rau Xatefanaus ntawd tau mus txog Faunikes, Xaipas thiab Atiaukias, tabsis lawv tsis tau qhia txojlus rau leejtwg, tshwj cov Yudais xwb. 20 Tabsis qee tus txivneej Xaipas thiab Kulenes, cov uas tau tuaj rau Atiaukias, tau qhia rau cov Kilis thiab tshajtawm txog tus Tswv Yexus. 21 Mas tus Tswv txhais tes tau nyob nrog lawv thiab ib pab neeg tau ntseeg thiab tig los cuag tus Tswv.
22 Zaj xov ntsig txog lawv tau nrov mus rau pawgntseeg uas nyob hauv Yeluxalees tej pobntseg thiab lawv tau xa Npananpas tuaj rau Atiaukias. 23 Thaum nws tuaj txog thiab pom Vajtswv Ntuj vajhmoov, Npananpas tau zoo siab thiab tau txhawb lawv txhua leej kom nyob ruajsiab nrees ntawm tus Tswv, 24 vim tias nws yeej yog ib tug neeg zoo, puvnpo tus Ntsujplig Dawbhuv thiab txaus ntseeg. Tej neeg coobcoob tau raug ntxiv rau tus Tswv qhov ntawd.
25 Npananpas tau tawm mus nrhiav Xaulus pem Talaxus, 26 thiab tomqab nrhiav ntsib lawm, nws tau coj Xaulus los rau Atiaukias. Nkawv tau uake coj pawgntseeg ib lub xyoo thiab tau qhia pab neeg ntawd. Nkawv tau xub hu cov thwjtim hauv Atiaukias ua Khixatias.
27 Lub sijhawm no ib cov cevlus tau nqis pem Yeluxalees tuaj rau Atiaukias. 28 Ib tug npe hu ua Ankanpus hauv lawv tau sawv thiab muab cim los ntawm tus Ntsujplig Dawbhuv tias kev tshaib loj yuav muaj thoob plaws tej tebchaws neeg nyob (uas tau tshwmsim thaum Khaudias ua Fajtim). 29 Cov thwjtim ntawd tau txiavtxim xa kev pab, nyias muab raws li nyias muaj, mus rau cov kwvtij uas nyob hauv Yudas. 30 Lawv tau ua qhov haujlwm no thaum lawv tau muab rau Npananpas thiab Xaulus nkawv nqa mus rau cov txwjlaug.
12
Helauj Tua unpaus & Ntes Petus
1 Lub sijhawm ntawd, Vajntxwv Helauj tau nqistes ua phem rau qee leej hauv pawgntseeg. 2 Nws kuj tau muab ntaj tua unpaus, Yauhas tus tijlaug. 3 Thaum pom tias qhovno tau raug cov Yudais siab, nws kuj tau muab Petus ntes nruab nrab lub koobtsheej noj ncuav tsis xyaw keeb. 4 Nws tau muab Petus kaw hauv tsev lojcuj, tso plaub txheej tubrog ceev nws, thiab npajsiab yuav coj nws los rau zejtsoom tomqab lub koobtsheej hladhau.
5 Yog li ntawd, Petus kuj tau raug ceev hauv tsev lojcuj, tabsis pawgntseeg kuj tau kubsiab lug thov Vajtswv rau nws.
6 Ces thaum Helauj yuav coj nws los txiavtxim, hmo ntawd Petus tau pw nruab nrab ob tug tubrog thiab tau raug xauv rau ntawm ob txoj saw hlau. Dua li, cov tubrog kuj sawv ntawm tej qhovrooj mus hauv lub tsev lojcuj. 7 Tabsis tus Tswv tus timtswv tau los sawv ntawd thiab qhov kaj tau ci rau hauv chav tsev ntawd. Tus timtswv tau khob Petus sab tav thiab tsa nws tias, “Sawv ceev nrooj.” Thiab tej saw hlau tau pluam plhuav ntawm nws ob txhais tes.
8 Tus timtswv kuj tau hais rau nws tias, “Sia siv thiab khi koj ob txhais khau.” Petus tau ua raws nraim li. Tus timtswv tau hais ntxiv tias, “Muab koj lub tsholoj hnav thiab caum kuv.” 9 Petus tau tawm thiab caum tus timtswv tabsis nws twb tsis paub tias qhov uas tau tshwmsim nrog tus timtswv ntawd yog qhov tseeb; nws tau xav tias nws tau pom ib qhov zeemmuag. 10 Nkawv tau los dhau cov tubrog thawj txheej thiab txheej ob, ces nkawv tau los txog ntawm lub roojvag hlau uas mus rau hauv nroog. Lub roojvag txawm tau qhib plho ntawm tuskheej. Thaum tawm rau sab nraud, nkawv tau taug ib txojkev thiab tus timtswv tau ncaim kiag nws.
11 Ces Petus tau ras dheev tias, “Nimno kuv paub tseeb tias tus Tswv tau xa Nws tus timtswv thiab tau tso kuv tawm ntawm Helauj txhais tes thiab txhua yam uas zejtsoom Yudais tau npajsiab tseg.”
12 Thaum totaub li no lawm, nws tau los rau ntawm Malis lub tsev, tus uas yog Yauhas Malakaus niam. Sawvdaws tau sibsau thiab tau thov Vajtswv hauv tsev. 13 Sijhawm nws tau samsim khob lub qhovrooj ntawm roojvag, ib tug ntxhais txib hu ua Lauda tau los mloog saib yog leejtwg. 14 Thaum paub Petus lub suab, nws tsis tau qhib lub roojvag vim kev zoo siab, tabsis nws tau khiav rovlos tshajtawm tias, “Petus sawv ntawm roojvag.”
15 Lawv tau hais rau nws tias, “Vwm pod!” Tabsis nws tau cam qees tias nws muaj li tiag. Ces lawv tau hais tias, “Nws yog Petus tus timtswv.”
16 Petus tau nyob nraud khob tsis tseg. Thaum qhib roojvag, lawv tau pom nws thiab tau xav tsis thoob. 17 Tomqab piav tes kom lawv ua twjywm, nws tau hais rau lawv tias tus Tswv tau tso nws tawm hauv tsev lojcuj li cas thiab tau hais ntxiv tias, “Tshajtawm tej no rau unpaus thiab cov kwvtij.” Ces nws tau ncaim thiab mus rau lwm qhov lawm.
18 Thaum kajntug, cov tubrog tau muaj kev kubntxhov tsis me txog qhov uas tau tshwmsim rau Petus. 19 Thaum Helauj tau nrhiav tsis pom nws, nws tau hu cov ceev tsev lojcuj los nug thiab tau muab lawv coj mus tua.
Helauj Tuag
Helauj tau nqis ntawm Yudas thiab taugkev mus rau Xixaliyas. 20 Helauj tau chim heev rau cov neeg Tiles thiab Xidoos. Tabsis tomqab lawv tau haub Nplaxatus, tus saib vajntxwv lub paig, lawv tau uake tuaj cuag vajntxwv thiab tau thov kev thajyeeb nrog nws vim nws lub tebchaws yug lawv zaubmov.
21 Txog hnub teem tseg, Helauj tau hnav tsoos vaj thiab zaum saum rooj txiavtxim. Thaum nws hais lus rau lawv, 22 cov neeg mloog ntawd tau qw tias, “Lub suab no yog vajtswv lub! Nws tsis yog suab neeg.” 23 Tamsis ntawd tus Tswv tus timtswv tau ntaus nws vim nws tsis tau muab tshwjchim rau Vajtswv Ntuj. Nws tau raug kas noj thiab tau tuag.
24 Ces Vajtswv Ntuj txojlus tau lojhlob thiab huamvam.
25 Npananpas thiab Xaulus tau rovlos rau Yeluxalees. Tomqab ua tiav tes haujlwm tu cov ntseeg, nkawv tau coj Yauhas Malakaus nrog nkawv mus.
13
Npananpas thiab Xaulus Raug Xa Tawm
1 Nimno, pawgntseeg Atiaukias tau muaj cov cevlus thiab xibfwb no: Npananpas, Ximoos tus uas hu ua Dub, Lukius uas yog neeg Kulenes, Manaees uas tau lojhlob uake nrog Helauj, tus kav ib feem plaub, thiab Xaulus. 2 Sijhawm lawv tau pehawm tus Tswv thiab yoo mov, tus Ntsujplig Dawbhuv tau hais tias, “Muab Npananpas thiab Xaulus cais rau kuv tes haujlwm uas kuv twb xub hu nkawv lawm.” 3 Ces tomqab yoo mov thiab thov Vajtswv, lawv tau tsa tes rau nkawv thiab xa nkawv tawm.
Txojmoo Zoo Txog Xaipas
4 Ces thaum nkawv tau raug tus Ntsujplig Dawbhuv xa tawm lawm, nkawv tau nqis mus rau Xelukias, thiab tau caij nkoj tawm ntawd mus rau Xaipas. 5 Sijhawm nyob hauv Xalamis, nkawv tau tshajtawm Vajtswv Ntuj txojlus hauv cov Yudais tej txoos sablaj. Nkawv tau muaj Yauhas ua tubtxib thiab.
6 Nkawv tau phua plhawv lub koog povtxwv mus txog rau Pafaus thiab nkawv tau ntsib ib tug neeg Yudais yeessiv thiab cevlus cuav uas npe hu ua Npa-Yexus. 7 Nws tau nyob nrog tus kavxeev Xawnkius Paulus, ib tug neeg totaub. Yawg Xawnkius Paulus tau caw Npananpas thiab Xaulus nkawv vim nws tau nrhiav mloog Vajtswv Ntuj txojlus. 8 Tabsis tus yeessiv Elumas (nws lub npe txhais li no) tau tawmtsam nkawv thiab tau nrhiav kev tig tus kavxeev tawm ntawm txojkev ntseeg. 9 Ces Xaulus, tus hu ua Paulus, tau puvnpo tus Ntsujplig Dawbhuv. Saib ntsoov yawg Elumas, 10 Paulus tau hais tias, “Niag neeg puvnpo kev dag thiab kev ntxeev, ntxwgnyoog tus tub thiab tus yeebncuab rau txhua txojkev ncajncees! Koj tsis nyob twjywm tabsis pheej ntxeev tus Tswv tej kev ncaj lod? 11 Tamsis no tus Tswv txhais tes tawmtsam koj mas koj yuav digmuag, tsis pom lub hnub mus ib ntus.”
Tamsis ntawd ib qhov huab dub tau plooj nws qhovmuag. Nws tau maub dub thiab nrhiav neeg cab tes. 12 Ces thaum tus kavxeev pom qhov xwmtxheej ntawd, nws tau ntseeg thiab tau xav tsis thoob txog tus Tswv zaj lus qhia.
Txojmoo Zoo Txog Atiaukias Hauv Pixidias
13 Thaum nce nkoj ntawm Pafaus, Paulus thiab cov nrog nws tau mus rau Pawnkes hauv Phafilias. Yauhas tau ncaim nkawv thiab tig rovmus Yeluxalees. 14 Dhau ntawm Pawnkes, nkawv tau los txog Atiaukias hauv Pixidias. Hnub Xanpataus, nkawv tau mus rau hauv lub txoos sablaj thiab mus zaum. 15 Tomqab nyeem Kevcai thiab cov cevlus tag, cov thawj hauv txoos sablaj tau xa neeg los hais rau nkawv tias, “Cov kwvtij, yog neb leejtwg muaj lus txhawbzog dabtsi rau zejtsoom, ces hais.”
16 Paulus tau sawv thiab tsa tes, ces nws tau hais tias, “Ib tsoom Yixayees thiab cov hwm Vajtswv Ntuj, mloog tibzoo. 17 Tus Vajtswv Ntuj ntawm haivneeg Yixayees no tau xaiv peb tej yawgkoob thiab tau tsa haivneeg sijhawm lawv tau ua qhua hauv Iziv. Los ntawm txhais npab muaj hwjchim, Nws tau coj lawv tawm lub tebchaws ntawd. 18 Ncua plaubcaug xyoo tom mojsab qhua, Nws tau ua siabntev rau lawv 19 thiab tomqab tau muab xya haivneeg hauv tebchaws Kanaas ua puastsuaj, Nws tau muab lub tebchaws ntawd rau lawv ua nyiaj qabnas.”
20 “Li plaub puas tsibcaug xyoo, Nws tau muab cov txiavtxim rau lawv los txog rau tus cevlus Xamuyees. 21 Thaum ntawd lawv tau taij ib tug vajntxwv thiab Vajtswv Ntuj tau muab Xaules, Kis tus tub, xeem Npeyamees, rau lawv plaubcaug xyoo. 22 Tomqab muab nws txo lawm, Vajtswv Ntuj tau tsa Daviv ua vajntxwv rau lawv. Nws tau hais txog Daviv thiab tau ua timkhawv tias, ‘Kuv tau pom Yexais tus tub Daviv, tus neeg caum kuv lub siab. Nws yuav ua txhua yam raws kuv tus dejsiab.’”
23 “Tawm hauv Daviv cajces raws li kev coglus, Vajtswv Ntuj tau coj Yexus los ua tus Cawmseej rau Yixayees. 24 Uantej Nws los, Yauhas tau tshajtawm txog kev rausdej mus txais kev thimxav rau zejtsoom Yixayees. 25 Sijhawm Yauhas tau yuav xaus nws tes haujlwm, nws tau hais tias, ‘Nej xav tias kuv yog leejtwg? Kuv tsis yog Nws, tabsis tus los tomqab kuv ntawd, Nws txhais khau ntawm kotaw kuv tub tsis tsimnyog daws.’”
26 “Cov kwvtij, Anplahas cajces thiab nej cov uas hwm Vajtswv Ntuj, txojlus ntsig txog txojkev cawmdim no tau raug xa rau peb. 27 Zejtsoom Yeluxalees thiab lawv cov thawjcoj tsis tau zeem paub tus Yexus no. Txawm lawv tau niaj zaus nyeem cov cevlus tej lus hnub Xanpataus, lawv tau ua tiav tej lus ntawd thaum lawv tau txiavtxim rau Nws; 28 thiab txawm lawv tau nrhiav tsis muaj ib yam kev txhaum txaus tua, lawv tau taij kom Philaj muab Nws tua povtseg. 29 Thaum lawv tau ua txhua yam ntsig txog Nws raws li twb sau tseg lawm, lawv tau txo Nws saum tus khaublig thiab muab tso rau hauv qhov ntxa. 30 Tabsis Vajtswv Ntuj tau tsa Nws sawv hauv cov tuag 31 thiab Nws tau tshwm ntau hnub rau cov nrog Nws nce Kalilais tuaj rau Yeluxalees. Nimno cov neeg ntawd yog Nws cov timkhawv rau zejtsoom.”
32 “Mas peb tshajtawm txojmoo zoo rau nej txog txojlus cogtseg rau peb tej yawgkoob, 33 tias Vajtswv Ntuj twb ua tej ntawd tiav rau peb, cov uas yog lawv menyuam, thaum Nws tau tsa Yexus sawv rovlos raws nraim li twb sau tseg rau hauv Nkauj tshooj ob tias:

‘Koj yog kuv tus Tub,
Hnub no kuv tau dhau ua koj txiv.’”

34 “Thiab tias Vajtswv Ntuj tau tsa Nws sawv hauv cov tuag thiab tsis lam tso Nws lwj raws li Nws twb hais tias:

‘Kuv yuav muab Daviv tej lus dawbhuv thiab txaus ntseeg rau nej.’”

35 “Yog li ntawd, Nws tau hais rau lwm nqe tias:

‘Koj yuav tsi tso koj tus neeg dawbhuv pom kev lwj.’”

36 “Rauqhov tomqab nws tau tu Vajtswv Ntuj tus dejsiab hauv nws tiam tag, Daviv tau tsaugzog thiab raug faus nrog nws tej yawgkoob. Nws tau pom kev lwj. 37 Tabsis tus uas Vajtswv Ntuj tau tsa sawv ntawd tsis tau pom kev lwj.”
38 “Yog li ntawd, cov kwvtij, cia nej paub tias kev zamtxim raug tshajtawm rau nej los ntawm tus Yexus no. Nej tsis muaj peevxwm raug xam dawbhuv saum txhua yam los ntawm Mauxes Kevcai, 39 tabsis tus uas ntseeg tus Yexus no yuav raug xam dawbhuv. 40 Yog li ntawd, ceevfaj kom txojlus hauv cov cevlus txhob los raug rau nej:

41 ‘Ceevfaj, cov neeg tuammom,
xav tsis tawm ces liamsim.
Rauqhov kuv yuav ua ib teg haujlwm hauv nej lub caij,
tes haujlwm uas nej yuav tsis ntseeg txawm ib tug qhia rau nej.’”

42 Thaum nkawv tau tawm mus, lawv tau nquahu kom nkawv qhia tej lus no dua lwm lub Xanpataus. 43 Tomqab lub txoos sablaj, coob leej Yudais thiab cov kiavxeem uas tau hwm Vajtswv tau caum Paulus thiab Npananpas. Nkawv tau hais rau lawv kom ntseeg thiab nyob rau hauv Vajtswv Ntuj vajhmoov.
44 Hnub Xanpataus los txog, yuav luag tag txhua leej hauv lub nroog tau sau nthwv tuaj mloog tus Tswv txojlus. 45 Thaum cov Yudais pom tej neeg coobcoob, lawv tau puvnpo kev khib, mas lawv tau tawmtsam Paulus tej lus thiab tau txobthuam nws.
46 Tabsis Paulus thiab Npananpas nkawv tau hais lus khovkho tias, “Peb cheemtsum xub qhia Vajtswv Ntuj txojlus rau nej. Vim nej tsis tau txais txojlus thiab nej tuskheej tau txiavtxim ua cov tsis tsimnyog txojsia ibtxhis, nimno wb tig mus rau pejkum neeg. 47 Rauqhov tus Tswv tau tawmlus rau peb li no:

‘Kuv tau tsa koj ua qhov kaj rau pejkum neeg,
kom koj dhau ua kev cawmdim mus txog ntiajteb kawg.’”

48 Tej pejkum neeg uas tau hnov ntawd tau zoo siab thiab tau qhuas tus Tswv txojlus. Pestsawg leej uas twb raug xaiv tseg rau txojsia ibtxhis lawd kuj tau ntseeg.
49 Tus Tswv txojlus tau raug coj mus thoob tebchaws. 50 Cov Yudais tau haub tej pojniam muaj meej uas tau hwm Vajtswv Ntuj thiab tej thawjcoj hauv nroog, mas lawv tau sawv tsimtxom Paulus thiab Npananpas thiab tau ntiab nkawv tawm hauv lawv cejciam. 51 Ces nkawv tau nchos tej pluaplav ntawm kotaw rau lawv thiab nkawv tau mus rau Ikaunius, 52 tabsis cov thwjtim tau puvnpo kev zoo siab thiab tus Ntsujplig Dawbhuv.
14
Txojmoo Zoo Txog Ikaunius
1 Hauv Ikaunius, nkawv tau mus hauv cov Yudais tej txoos sablaj li ibtxwm thiab tau qhuabqhia li no, ces coob leej Yudais thiab Kilis tau ntseeg. 2 Tabsis cov Yudais uas tsis tau ntseeg tau do pejkum neeg siabntsws thiab lawv tau ua phem tawmtsam cov kwvtij. 3 Yog li ntawd, nkawv tau siv sijhawm ntev hais khovkho txog tus Tswv. Thiab tus Tswv tau ua timkhawv txog Nws txojlus vajhmoov los ntawm tej cim thiab txujci uas tau tshwmsim ntawm nkawv txhais tes. 4 Tej neeg hauv nroog tau sibfaib, ibtxhia nrog cov Yudais thiab ibtxhia nrog ob tug timthawj. 5 Tej pejkum neeg thiab cov Yudais, nrog rau lawv cov thawjcoj, tau txiavsiab ua phem thiab muab pobzeb ntaus nkawv. 6 Thaum paub li no lawm, nkawv kuj tau khiav mus rau tej nroog hauv Likaunias, xws li mus rau Lixathas, Dawnpe, thiab cheebtsam ntawd; 7 thiab nkawv tau tshajtawm txojmoo zoo.
Txojmoo Zoo Txog Lixathas & Dawnpe
8 Zaum nruab nrab cov neeg Lixathas tau muaj ib tug txivneej, uas ob txhais ceg tsis muaj zog thiab tsis tau taugkev dua vim nws tau tuag ceg hauv nws niam plab los. 9 Nws tau hnov Paulus qhuabqhia. Thaum saib thiab pom tias nws muaj kev ntseeg cawm taus tuskheej, 10 Paulus tau hais rau nws nrovnrov tias, “Sawv tsees ntawm koj ob txhais kotaw saib!” Nws tau sawv tsees thiab tau taugkev.
11 Ces thaum pom qhov Paulus tau ua no, tej neeg coobcoob ntawd tau tsa suab ua lus Likaunias tias, “Tej vajtswv tau hloov ua neeg thiab tau nqis los cuag peb lawm!”
12 Thiab lawv tau hu Npananpas ua Xus thiab Paulus ua Hawmes, vim nws yog tus qhuabqhia. 13 Tus povthawj rau Xus uas nyob ntawm ncaujke mus hauv lub nroog, nrog tej neeg coobcoob, tau coj tej heev nyuj thiab paj ntoos tuaj rau ntawm roojvag thiab lawv tau xav muab fij rau nkawv.
14 Thaum ob tug timthawj, Npananpas thiab Paulus, tau hnov li no, nkawv tau muab nkawv tej tsoos dua thiab tau khiav tawm mus rau ntawm pab neeg. Nkawv tau qw 15 tias, “Cov kwvtij, nej ua dabtsi li no? Wb kuj yog neeg muaj siabntsws yam nkaus li nej. Wb tshajtawm txojmoo zoo rau nej kom tig tawm ntawm tej tsis muaj qabhau no mus rau tus Vajtswv Ntuj muajsia, tus uas tau tsim lub ntuj, lub teb, hiavtxwv thiab txhua yam uas muaj nyob hauv tej ntawd. 16 Ntau txheej dhau los, Nws tau tso txhua haivneeg taug lawv tej kabke. 17 Txawm li los, Vajtswv Ntuj tsis tau muab tej timkhawv txog tuskheej povtseg: Nws tau ua zoo los ntawd qhov Nws tau pub nag saum ntuj rau nej, qoobloo raws caijnyoog, zaubmov noj tsaunpo thiab kev zoo siab rau hauv nej lub siab.” 18 Hais li no tag, nkawv tau cheem tej neeg coobcoob nyuaj ntsuav kom txhob tua tsiaj fij rau nkawv.
19 Cov Yudais tau tawm Atiaukias thiab Ikaunius tuaj. Tomqab haub tej neeg thiab muab pobzeb ntaus Paulus, lawv tau luag nws tawm hauv nroog mus rau sab nraud vim lawv xav tias nws twb tuag lawm. 20 Thaum cov thwjtim tau tuaj sawv vij nws, Paulus tau sawv los thiab tau mus rau hauv nroog. Ces hnub tomqab, nws tau tawm mus rau Dawnpe nrog Npananpas.
Tsa Txwjlaug & Rovlos Rau Atiaukias
21 Tomqab nkawv tau tshajtawm txojmoo zoo hauv lub nroog ntawd thiab tau cob ntau tus thwjtim, nkawv tau rovlos rau Lixathas, Ikaunius, thiab Atiaukias. 22 Nkauv tau txhawb cov thwjtim tej siabntsws, nquahu ntsees kom lawv nyob hauv txojkev ntseeg tias, “Peb cheemtsum raug tej kev txomnyem ntau yam thaum peb mus rau hauv Vajtswv Ntuj lub tswvkuj.” 23 Nkawv kuj tau tsa cov txwjlaug rau lawv hauv txhua pawgntseeg. Thaum thov Vajtswv thiab yoo mov, nkawv tau muab lawv cob rau tus Tswv uas lawv tau ntseeg ntawd. 24 Nkawv tau phua plhawv Pixidias los rau Phafilias. 25 Tomqab qhia txojlus hauv Pawnkes, nkawv tau nqis mus rau Atalias.
26 Nkawv tau nce nkoj ntawd mus rau Atiaukias, lub nroog uas nkawv tau raug cob rau Vajtswv Ntuj vajhmoov mus ua txoj haujlwm uas nkawv tau ua tiav ntawd. 27 Thaum los txog thiab sau pawgntseeg uake, nkawv tau tshabxo txog tej uas Vajtswv Ntuj tau ua los ntawm nkawv thiab tias Nws tau qhib qhovrooj kev ntseeg rau pejkum neeg li cas. 28 Nkawv tau nyob ntev loo nrog cov thwjtim rau ntawd.
15
Rooj Sablaj Nyob Yeluxalees
1 Ibtxhia txivneej tau nqis pem Yudas tuaj thiab tau qhia cov kwvtij tias, “Yog nej tsis txiavtawv raws li Mauxes kabke, nej yeej yuav tsis dim.” 2 Vim Paulus thiab Npananpas nkawv tau muaj kev sibcav thiab sibnug nrog lawv ntau, lawv tau teem rau Paulus, Npananpas thiab qee leej hauv lawv nce mus cuag cov timthawj thiab cov txwjlaug hauv Yeluxalees ntsig txog nqe lus no. 3 Yog li ntawd, pawgntseeg tau xa nkawv tawm. Nkawv tau los rau Faunikes thiab Xamalias, qhia pausntsis txog pejkum neeg kev los ntseeg thiab ua rau txhua tus kwvtij zoo siab heev. 4 Thaum nkawv tau los txog hauv Yeluxalees, pawgntseeg, cov timthawj, thiab cov txwjlaug tau tostxais nkawv; thiab nkawv tau tshabxo txog tej uas Vajtswv Ntuj tau ua los ntawm nkawv.
5 Tabsis qee tus ntawm pab Falixais, cov uas tau ntseeg, tau sawv thiab hais tias, “Nws cheemtsum tawmlus kom lawv txiavtawv thiab ceev Mauxes Kevcai.”
6 Cov timthawj thiab cov txwjlaug tau tuaj txoos uake taug zaj no. 7 Tomqab muaj kev nug ntau lawm, Petus tau sawv thiab hais rau lawv tias, “Cov kwvtij, nej paub tias thaum chiv Vajtswv Ntuj tau xaiv pejkum neeg nruab nrab nej los hnov thiab ntseeg txojmoo zoo tawm ntawm kuv lub ncauj. 8 Thiab Vajtswv Ntuj, tus paub txhua lub siab, tau ua timkhawv txog lawv los ntawm qhov Nws tau muab tus Ntsujplig Dawbhuv rau lawv ibyam li rau peb, 9 thiab los ntawm kev ntxuav lawv tej siab saum kev ntseeg. Nws tsis tau xaiv peb lossis lawv ntsejmuag. 10 Yog li ntawd, nej yuav sim Vajtswv Ntuj los ntawm qhov uas nej muab tus quab tso rau saum cov thwjtim ntawd cajdab lod? Tus quab ntawd peb tej yawgkoob thiab peb tuskheej tub tsis muaj peevxwm kwv. 11 Tabsis vim tus Tswv Yexus vajhmoov, peb tau ntseeg kom dim ibyam li cov ntawd thiab.”
12 Ces tagnrho pab neeg coobcoob tau ntsiag thiab lawv tau mloog Npananpas thiab Paulus nkawv nthuav tej cim thiab txujci uas Vajtswv Ntuj tau ua nruab nrab pejkum neeg los ntawm nkawv. 13 Tomqab nkawv tau xaus lus, unpaus tau teb tias, “Cov kwvtij, mloog kuv hais. 14 Ximoos tau nthuav tias Vajtswv Ntuj tau mus xyuas pejkum neeg thiab tau txais ib pab neeg tawm ntawm lawv los rau Nws lub npe. 15 Hos cov cevlus tej lus kuj hais ibyam li no, raws li twb sau tseg tias:

16 ‘Tomqab tej no kuv yuav rovlos
thiab yuav rovqab tsa Daviv lub tsev ntaub uas tau vau lawm.
Txhua yam uas twb raug rhuav lawm kuv yuav rovqab tsa
thiab kuv yuav rovqab tsa kom sawv.
17 Tej tibneeg seem yuav nrhiav tus Tswv li no,
thiab txhua haivneeg uas hu txog kuv lub npe,
tus Tswv, tus tsim txhua tsavyam
18 uas neeg tau paub thaum ub los, hais li.’”

19 “Yog li no, kuv txiavtxim tias txhob ua nyuaj rau tej pejkum neeg uas tau tig los cuag Vajtswv Ntuj, 20 tabsis sau ntawv rau lawv kom lawv txav deb ntawm tej zaubmov fij rau mlom, kev vuabtsuab, tej tsiaj raug zawm tuag, thiab ntshav. 21 Rauqhov Mauxes Kevcai twb raug tshajtawm hauv txhua lub nroog puag txheej thaud los thiab tseem niajhnub raug nyeem hauv tej tsev sablaj txhua hnub Xanpataus.”
Rooj Sablaj Tsab Ntawv Rau Pejkum Neeg
22 Ces qhov no tau raug siab rau cov timthawj, cov txwjlaug, thiab tagnrho pawgntseeg. Lawv tau xaiv qee tus txivneej hauv lawv kom raug xa mus rau Atiaukias nrog Paulus thiab Npananpas nkawv, xws li Yudas tus raug hu ua Npaxanpas thiab Xilas, ob tug thawjcoj ntawm cov kwvtij. 23 Lawv kuj tau sau ntawv rau nkawv nqa tias:

“Cov timthawj, cov txwjlaug thiab cov kwvtij.
Xa rau tagnrho cov kwvtij txawv tebchaws hauv Atiaukias, Xilias, thiab Kilikias.
Nyobzoo.
24 Raws li peb tau hnov, qee leej hauv peb tau tuaj ua teebmeem rau nej los ntawm lawv tej lus thiab tau ua rau nej ntxhovsiab. Peb tsis tau tsocai rau cov ntawd. 25 Peb tau xav ibyam thiab tau xaiv cov txivneej kom raug xa tuaj rau nej nrog Npananpas thiab Paulus. Nkawv yog peb ob tug kwvtij uas peb hlub 26 thiab nkawv tau muab nkawv txojsia pub rau peb tus Tswv Yexus Khetos lub npe. 27 Yog li ntawd, peb tau xa Yudas thiab Xilas tuaj, mas nkawv yuav tshabxo rau nej tib yam nkaus. 28 Vim tus Ntsujplig Dawbhuv thiab peb raug siab kom txhob nog nra rau nej tshaj tej uas tseemceeb no: 29 Txav deb ntawm tej nqaij fij rau mlom, ntshav, tej tsiaj zawm cajdab tuag, thiab kev vuabtsuab. Yog nej ceev tuskheej tawm ntawm tej no, nej yuav coj taus zoo.
Nyob khovkho.”

30 Ces lawv tau raug tso nqis mus rau Atiaukias, thiab thaum sau sawvdaws uake, lawv tau muab tsab ntawv cob rau sawvdaws. 31 Mas tomqab nyeem tag, sawvdaws tau zoo siab los ntawm tej lus txhawbzog. 32 Ces Yudas thiab Xilas, vim nkawv kuj yog ob tug cevlus, tau txhawb cov kwvtij thiab cog lawv sawv khovkho los ntawm nkawv tej lus. 33 Tomqab nkawv nyob ib ntus, cov kwvtij tau tso nkawv thajyeeb lug mus cuag cov uas tau xa nkawv tuaj. 35 Hos Paulus thiab Npananpas tau nyob hauv Atiaukias, nrog rau ntau leej, qhuabqhia thiab tshajtawm tus Tswv txojlus.
Npananpas & Paulus Sibncaim
36 Ib ntus tomqab ntawd, Paulus tau hais rau Npananpas tias, “Cia wb rovmus saib cov kwvtij rau txhua lub nroog uas wb tau tshajtawm tus Tswv txojlus seb lawv nyob li cas.” 37 Npananpas tau xav coj Yauhas Malakaus nrog nkawv, 38 tabsis Paulus tau tsis pomzoo kom coj tus no vim nws tau thim ntawm nkawv pem Phafilias thiab tsis tau nrog nkawv mus ua haujlwm. 39 Kev tsis sibhaum tau tshwm txog qhov uas nkawv tau sibncaim: Npananpas tau coj Malakaus caij nkoj mus rau Xaipas. 40 Paulus tau xaiv Xilas, thiab tomqab cov kwvtij muab nkawv tso rau tus Tswv vajhmoov, nkawv tau tawm mus. 41 Nkawv tau mus rau Xilias thiab Kilikias thiab tau txhawb cov pawgntseeg kom khov.
16
Paulus & Xilas Coj Timautes
1 Nkawv tau mus txog hauv Dawnpe thiab Lixathas. Ib tug thwjtim npe hu ua Timautes tau nyob ntawd, uas nws niam yeej yog neeg Yudais thiab tus ntseeg, tabsis nws txiv yog neeg Kilis. 2 Cov kwvtij hauv Lixathas thiab Ikaunius tau ua timkhawv zoo txog nws. 3 Paulus tau xav coj tus no nrog nws tawm mus, ces Paulus tau muab nws txiavtawv vim cov Yudais uas tau nyob cheebtsam ntawd thiab vim txhua leej tau paub tias nws txiv yeej yog Kilis. 4 Thaum lawv tau taugkev mus rau hauv tej nroog, lawv tau muab tej kevcai ntseeg uas cov timthawj thiab cov txwjlaug hauv Yeluxalees twb txiavtxim ntawd rau lawv ceev. 5 Yog li ntawd, cov pawgntseeg tau ruajkhov saum kev ntseeg thiab tau huamvam coob txhua hnub.
Paulus & Xilas Mus Rau Kalatias
6 Ces lawv tau mus rau cheebtsam Felinkias thiab Kalatias vim tus Ntsujplig Dawbhuv tau cheem nkawv kev qhia txojlus hauv Axias. 7 Ces thaum lawv tau nqis los rau Mixias, lawv tau nrhiav kev mus rau Npithunias tabsis Yexus tus Ntsujplig tsis tau cia lawv mus. 8 Tawm hauv Mixias, lawv tau nqis los rau Tauas. 9 Paulus tau pom ib qhov zeemmuag hmontuj: Ib tug txivneej Makedonias tau sawv ntsug thiab tau hu rau nws tias, “Hla tuaj rau Makedonias thiab tuaj pab peb.” 10 Tomqab nws tau pom qhov zeemmuag ntawd, peb tau nrhiav kev tawm mus rau Makedonias tamsis vim peb xam tias Vajtswv Ntuj tau caw peb mus qhia txojmoo zoo rau lawv.
Txojmoo Zoo Txog Makedonias
11 Nce nkoj ntawm Tauas, peb tau ncajnraim mus rau Xamautakes, thiab hnub tomqab peb tau mus rau Neapolis 12 thiab tawm qhov ntawd mus rau Filipis, uas yeej yog Loo ib lub tuam nroog hauv Makedonias. Peb tau nyob hauv lub nroog no thiab tau so hnub puav. 13 Ces hnub Xanpataus, peb tau tawm roojvag sab nraud mus rau ntawm ntug dej qhov chaw uas peb tau xam ua chaw thov Vajtswv. Thaum zaum lawd, peb tau tham nrog cov pojniam uas tau tuaj sibsau rau ntawd. 14 Ces tus pojniam npe hu ua Lidias, ib tug tubluam ntaub tsamxem thiab tus hwm Vajtswv Ntuj nyob Thiyatilas tuaj, tau hnov tej lus ntawm Paulus thiab tus Tswv tau qhib nws lub siab los txais. 15 Tomqab nws thiab nws tsevneeg rausdej lawm, nws tau caw peb tias, “Yog nej twb txiavtxim tias kuv yog tus ntseeg tus Tswv lawm, ces los nyob rau hauv kuv tsev.” Mas nws tau hais yeej peb.
Paulus & Xilas Raug Kaw Hauv Filipis
16 Nimno thaum peb samsim tau mus rau ntawm qhov chaw thov Vajtswv, ib tug ntxhais txib uas tau raug tus ntsujplig nab tau ntsib peb. Los ntawm nws kev ua saub, nws tau ua rau nws cov tswv muaj haujlwm heev. 17 Nws tau caum Paulus thiab qw txog peb tias, “Cov txivneej no yog Vajtswv Ntuj tus Loj Kawgnkaus cov tubtxib; lawv samsim tshajtawm txojkev cawmdim rau nej.” 18 Nws tau ua li no ntau hnub. Ces Paulus tau xeebtxob, thiab nws tau tig mus hais rau tus ntsujplig ntawd tias, “Kuv tawmlus rau koj hauv Yexus Khetos lub npe: Tawm ntawm tus ntxhais no.” Ces nws tau tawm ntawm tus ntxhais lub sijhawm ntawd.
19 Thaum tus ntxhais txib cov tswv tau pom tias lawv kev ciasiab rau haujlwm twb plag lawm, lawv tau ntes Paulus thiab Xilas thiab tau cab nkawv hauv khw mus rau cov thawjcoj. 20 Thaum coj nkawv los rau cov thawj tubrog, lawv tau hais tias, “Ob tug neeg no ua kev kubntxhov rau peb lub nroog; nkawv yog neeg Yudais 21 thiab tshajtawm tej kabke uas tsis raugcai rau peb neeg Loo txais lossis coj.”
22 Tej neeg coobcoob tau sawv uake tawmtsam nkawv thiab cov thawj tubrog tau tawmlus kom muab nkawv tej tsholoj dua thiab muab nkawv nplawm. 23 Tomqab muab nkawv nplawm ntau nplawg lawm, lawv tau muab nkawv pov rau hauv tsev lojcuj thiab tau tawmcai rau tus ceev tsev lojcuj kom ceev nkawv zoozoo. 24 Vim nqe lus tawmcai no, tus ceev tsev lojcuj tau coj nkawv mus rau hauv plawv tsev lojcuj thiab nws tau xauv nkawv kotaw rau ntawm tog cav.
25 Thaum ib taghmo, Paulus thiab Xilas nkawv tau thov Vajtswv thiab hunkauj rau Vajtswv Ntuj; hos tej neeg raug txim tau mloog nkawv. 26 Ces tamsis ntawd av tau qeeg loj txog qhov lub plagtsev ntawm lub tsev lojcuj tau txav, tej qhovrooj tau qhib tagnrho thiab txhua txoj saw hlau tau pluam. 27 Tus ceev tsev lojcuj tau sawv, thiab thaum nws tau pom tias tej qhovrooj twb qhib lawm, nws tau thau ntaj thiab tau samsim yuav tua tuskheej vim nws tau xav tias tej neeg raug txim tau khiav tawm lawm. 28 Tabsis Paulus tau qw tias, “Txhob ua phem rau koj tuskheej, rauqhov peb txhua leej tseem nyob ntawm no.”
29 Thaum nrhiav tau lub teeb, nws tau majnroos mus hauv tsev lojcuj thiab tau ntshai ntshee hnyo. Nws tau qhaucev rau ntawm Paulus thiab Xilas 30 thiab coj nkawv tawm rau sab nraud. Nws tau nug tias, “Ob tug yawg hlob, kuv cheemtsum ua dabtsi es kuv thiaj dim?”
31 Ces nkawv tau teb tias, “Ntseeg tus Tswv Yexus, ces koj thiab koj tsevneeg yuav dim.” 32 Nkawv tau qhia tus Tswv txojlus rau nws thiab txhua leej hauv nws lub tsev. 33 Hmo ntawd, nws tau coj nkawv mus thiab tau ntxuav nkawv tej qhov txhab. Nws kuj tau rausdej tamsis ntawd nrog txhua leej hauv nws lub tsev. 34 Nws tau coj nkawv los rau hauv tsev thiab tau teeb rooj noj los tiam nkawv. Nws thiab nws tsevneeg tau zoo siab heev vim lawv twb ntseeg Vajtswv Ntuj lawm.
35 Thaum hnub tshiab tawm tuaj, cov thawj tubrog tau xa tub ceevxwm tuaj hais tias, “Tso ob tug neeg ntawd.” 36 Tus ceev tsev lojcuj tau tshab tej lus no rau Paulus tias, “Cov thawj tubrog tau xa neeg tuaj kom tso neb. Yog li ntawd, tawm thiab mus thajyeeb lug.”
37 Tabsis Paulus tau hais rau lawv tias, “Wb yog neeg Loo. Lawv tau nplawm wb tim ntsej tim muag zejtsoom uantej taug pausntsis thiab tau muab wb pov rau hauv tsev lojcuj. Es nimno lawv ho xa wb tawm, tsis pub leejtwg paub lod? Tsis ua li no! Tabsis cia lawv tuaj coj wb tawm.”
38 Cov tub ceevxwm tau tshab tej lus no rau cov thawj tubrog. Lawv tau ntshai heev thaum lawv tau hnov tias nkawv yeej yog neeg Loo. 39 Tomqab tuaj txog, lawv tau txhawbzog rau nkawv thiab tau coj nkawv tawm; lawv tau taij kom nkawv tawm hauv nroog. 40 Tawm hauv tsev lojcuj los, nkawv tau mus rau ntawm Lidias. Thaum pom cov kwvtij, nkawv tau txhawb lawv lub zog thiab mam tau tawm mus.
17
Txojmoo Zoo Txog Thexalaunikes
1 Tomqab dhau plaws Afipaulis thiab Apaulaunias, lawv tau mus rau Thexalaunikes, uas tau muaj cov Yudais ib lub txoos sablaj. 2 Raws li Paulus kabke, nws tau mus hauv lawv thiab nws tau qhuabqhia tawm hauv Vajlugkub peb lub Xanpataus siblaw, 3 muab nthuav thiab muab teeb tias Khetos tau cheemtsum mus tuag thiab sawv hauv cov tuag rovlos. Nws tau hais tias “Yexus tus uas kuv tshajtawm rau nej no yog Khetos.” 4 Ibtxhia Yudais tau ntseeg thiab tau raug xam nrog Paulus thiab Xilas nkawv; thiab ib pab neeg Kilis coobcoob uas hwm Vajtswv Ntuj, nrog rau cov pojniam nto npe ntau leej, kuj tau ntseeg.
5 Vim cov Yudais tau khib, lawv tau haub tej txivneej phem hauv khw uake. Thaum sibsau ua ib pab lawm, lawv tau tsim kev kubntxhov hauv nroog. Lawv tau tuaj txog ntawm Yaxoos tsev, nrhiav ntsees coj Paulus thiab Xilas mus rau zejtsoom. 6 Vim nrhiav tsis pom nkawv, lawv tau cab Yaxoos thiab qee leej kwvtij mus cuag cov kav nroog. Lawv tau qw tias, “Ob tug neeg tsim teebmeem rau ntiajteb tau tuaj rau ntawm no, 7 thiab yawg Yaxoos tau txais nkawv. Lawv sawvdaws tau sawv tawmtsam Fajtim tej kabke thiab tau tshajtawm tias muaj dua ib tug vajntxwv hu ua Yexus.” 8 Lawv tau tsim teebmeem rau tej neeg thiab cov kav nroog uas hnov tej xwm li no. 9 Tomqab txais cov nyiaj txhiv Yaxoos thiab lwm tus kwvtij lawm, cov kav nroog thiaj tau muab lawv tso.
Txojmoo Zoo Txog Npeleas
10 Li ntawd, cov kwvtij tau muab Paulus thiab Xilas nkawv xa tawm hmo ntawd mus rau Npeleas. Thaum los txog, nkawv tau mus hauv cov Yudais lub txoos sablaj. 11 Tabsis cov neeg ntawd zoo dua cov pem Thexalaunikes, vim tias lawv tau txais txojlus nrog kev kubsiab lug thiab niajhnub tshawb Vajlugkub seb tej no puas muaj li. 12 Yog li ntawd, lawv coob leej tau ntseeg, thiab tej pojniam Kilis ntomeej thiab tej txivneej coob tus tau ntseeg.
13 Thaum cov Yudais pem Thexalaunikes paub tias Paulus tau tshajtawm Vajtswv Ntuj txojlus hauv Npeleas, lawv tau tuaj tsim kev kubntxhov thiab haub tej neeg. 14 Tamsis ntawd, cov kwvtij tau xa Paulus mus rau tom hiavtxwv, tseg Xilas thiab Timautes nkawv nyob tomqab hauv nroog. 15 Cov coj Paulus tau coj nws mus txog Athees ces lawv tau ncaim nws. Lawv tau coj lus rau Xilas thiab Timautes kom nkawv mus cuag Paulus saisai.
Txojmoo Zoo Txog Athees
16 Sijhawm nws samsim tos nkawv nruab nrab tej neeg Athees, Paulus tau pom lub nroog ntawd puv tej mlom thiab nws tus ntsujplig tau nyob tsis tswm. 17 Yog li ntawd, nws tau sibtham nrog cov Yudais thiab cov hwm Vajtswv Ntuj hauv lub txoos sablaj thiab nrog tej neeg uas los ze nws txhua hnub hauv khw. 18 Mas ibtxhia tubtxawg tswvyim hauv cov Epikuleas thiab cov Xatauis tau tuaj sibcav nrog nws. Qee leej tau hais tias, “Tus yawg npaim ncauj no xav hais dabtsi?” Tabsis lwm tus tau teb tias, “Nws ntxim li yog tus cav txog tej dab txawv tebchaws,” vim tias nws tau tshajtawm txojmoo zoo txog Yexus thiab Nws kev sawv rovlos. 19 Ces lawv tau coj nws mus rau ntawm Alepankus thiab tau hais rau nws tias, “Peb puas muaj peevxwm paub txog zaj lus qhia tshiab uas koj sij hais ntawd? 20 Vim koj coj tej yam txawv tuaj rau peb hnov, ces peb xav paub tias tej uas koj xav qhia ntawd yog dabtsi.” 21 Nimno tagnrho tej neeg Athees thiab tej qhua uas tau tuaj rau hauv lub nroog ntawd tau laujzias sijhawm, tsis ua dabtsi li, tabsis tsuas tham thiab mloog saib yam dabtsi tshiab xwb.
22 Ces Paulus tau sawv hauv plawv Alepankus thiab hais tias, “Cov neeg Athees, kuv pom tias nej ua txhua yam li nej yog cov hwm vajtswv, 23 vim thaum kuv dhau kev tuaj thiab saib tej uas nej pe, kuv kuj tau pom ib lub thaj uas sau tias, ‘Rau tus vajtswv uas tsis paub npe.’ Yog li ntawd, tus uas nej pe tabsis nej tsis paub no yog tus kuv tshajtawm rau nej:
24 “Vajtswv Ntuj yog tus tsim lub cejntug thiab txhua yam hauv lub cejntug. Tus Tswv lub ntuj thiab lub teb no tsis nyob hauv tej tuamtsev uas neeg txhais tes tau ua 25 lossis kom neeg tsa tes los tiam Nws li Nws ntshaw dabtsi, vim Nws tuskheej muab txojsia, txoj pa thiab txhua yam rau sawvdaws. 26 Tawm ntawm ib tug neeg, Nws tau tsim txhua haivneeg los nyob thoob plaws lub ntiajteb thiab Nws tau teem caijnyoog thiab tau faib ciamteb rau lawv nyob uantej. 27 Nws tau ua li ntawd kom lawv yuav nrhiav Vajtswv Ntuj, seb lawv puas yov mus cuag Nws lossis mus ntsib Nws, vim Nws nyob tsis deb ntawm peb sawvdaws. 28 Rauqhov peb muajsia, musmus-loslos, thiab nyob hauv Nws ibyam li nej cov sau pajlug tau hais tias, ‘Vim peb yog Nws cajces.’”b
29 “Yog li ntawd, peb twb yog Vajtswv Ntuj cajces, peb tsis tsimnyog xam Vajtswv tuskheej zoo li ib thooj kub, nyiaj, lossis pobzeb uas yog lub hwvxyeej ntawm neeg kev nraj thiab txhais tes puab. 30 Yav tag los Vajtswv Ntuj tsis tau suav txim rau neeg kev tsis totaub, tabsis nimno Nws tau tshajtawm rau txhua leej nyob txhua qhov kom thimxav. 31 Rauqhov Nws tau teem ib hnub uas Nws yuav txiavtxim rau lub ntiajteb raws kev ncajncees los ntawm ib tug txivneej uas Nws tau tshwj tseg. Nws tau muab puavpheej txaus ntseeg rau sawvdaws thaum Nws tau tsa tus txivneej ntawd sawv rovlos.”
32 Thaum hnov txog qhov neeg tuag sawv rovlos, lawv tau luag nws tabsis ibtxhia tau hais tias, “Peb yuav mloog koj dua ntsig txog zaj no.” 33 Li no, Paulus tau tawm hauv lawv mus. 34 Tabsis cov txivneej uas tau npuab nws tau ntseeg. Nruab nrab cov ntawd kuj tau muaj Diaunixius, ib tug tswvcuab hauv Alepankus, tus pojniam npe hu ua Damalis thiab lwm leej uas tau nrog nkawv.
18
Txojmoo Zoo Txog Kaulithaus
1 Tomqab tej no, Paulus tau tawm hauv Athees thiab tau mus rau Kaulithaus. 2 Nws tau ntsib ib tug Yudais hu ua Akilas, uas tau yug tim Pootus thiab nyuam qhuav tau tawm tim Italis los, nrog nws tus pojniam Paxilas. Nkawv tau los vim Khaudias tau ntiab cov Yudais tagnrho tawm hauv Loo. Paulus tau mus ntsib nkawv 3 thiab tau nrog nkawv nyob ua haujlwm vim lawv tau txawj tibyam haujlwm, uas yog xaws tsev ntaub. 4 Txhua hnub Xanpataus nws tau sibcav nrog tej Yudais thiab Kilis hauv lub txoos sablaj kom lawv los ntseeg.
5 Thaum Xilas thiab Timautes tau nqis Makedonias los txog, Paulus tau muab tuskheej tagnrho rau txojlus thiab tau ua timkhawv ntsees rau cov Yudais tias, “Yexus yog tus Khetos.” 6 Tabsis vim lawv kev tawmtsam thiab kev tuammom, Paulus tau nchos nws lub tsholoj thiab tau hais rau lawv tias, “Nej cov ntshav nyob saum nej taubhau. Kuv tuskheej yog neeg dawbhuv ntawm qhov no. Txij no mus, kuv yuav mus rau pejkum neeg.”
7 Tomqab tawm qhov ntawd, nws tau nkag mus rau hauv ib tug txivneej hu ua Titus Yuxatus tsev. Nws yeej yog ib tug hwm Vajtswv Ntuj uas tau muaj lub tsev npuab nkaus lub txoos sablaj. 8 Khixapus, tus thawj txoos sablaj, tau ntseeg tus Tswv nrog rau nws tsevneeg huvsi, thiab coob leej neeg Kaulithaus uas tau hnov txojlus kuj tau ntseeg thiab tau rausdej.
9 Thaum tsausntuj, tus Tswv tau hais rau Paulus hauv zeemmuag tias, “Txhob ntshai, yijmeem qhia txhob tsotseg, 10 rauqhov kuv nyob nrog nraim koj. Leejtwg yuav tsis ntes koj lossis ua phem rau koj, vim kuv cov neeg coobcoob nyob hauv lub nroog no.” 11 Ces Paulus tau theem ib xyoos thiab rau hli los qhia Vajtswv Ntuj txojlus nruab nrab lawv.
12 Sijhawm Nkaliaus tau ua tus kavxeev hauv Akheyas, cov Yudais tau sawv ua ib nqag tawmtsam Paulus thiab tau coj nws mus rau hauv rooj txiavtxim. 13 Lawv tau hais tias, “Nws tsis raug Kevcai rau tus txivneej no mus haub neeg mus pehawm Vajtswv Ntuj.”
14 Thaum Paulus tau tabtom yuav qhib ncauj hais, Nkaliaus tau teb cov Yudais tias, “Yog ntsig txog tej kev tsis ncajncees lossis kev phem txhaum cai, kuv yuav ua siabntev rau nej cov Yudais zaj. 15 Tabsis yog rooj lus no yog ntsig txog nej cov lus, nej tej npe, thiab nej li kevcai, ces nej tuskheej mam saib. Kuv yuav tsis xav ua tus txiavtxim rau tej no.” 16 Nws tau muab lawv ntiab tawm ntawm lub rooj txiavtxim. 17 Ces lawv sawvdaws tau ntes Xauthenes, tus thawj hauv lub txoos sablaj, thiab tau muab nws ntaus ntawm rooj txiavtxim sab nraud, tabsis yawg Nkaliaus tsis tau txob dabtsi li.
Paxilas, Akilas & Apaulaus
18 Paulus tau nrog cov kwvtij nyob ib ntus, ces tomqab ntawd nws tau ncaim thiab nce nkoj mus rau Xilias nrog Paxilas thiab Akilas. Nws tau chais taubhau hauv Keekhias vim nws tau coglus saum kev thov Vajtswv li ntawd. 19 Lawv tau los txog hauv Efexaus thiab nws tau muab nkawv tsotseg ntawd. Tabsis nws tau mus hauv lub txoos sablaj thiab tau nrog cov Yudais sibcav. 20 Lawv tau taij nws kom nyob ib ntus ntev mentsis, tabsis nws tsis tau yib. 21 Thaum ncaim lawv nws kuj tau hais tias, “Kuv yuav rovtuaj ntawm nej yog Vajtswv Ntuj pomzoo.” Nws tau nce nkoj tawm ntawm Efexaus 22 thiab tau nqis los txog Xixaliyas. Tomqab nce mus tsham thiab hais kev nojqab nyob zoo rau pawgntseeg, nws tau nqis mus rau Atiaukias.
Paulus Kev Tshajtawm Ntsug Peb
23 Tomqab so ib ntus lawm, nws tau tawm tuaj rau cheebtsam Kalatias thiab Felinkias, mus ib qhov rau ib qhov thiab txhawb cov thwjtim sawvdaws.
24 Nimno ib tug Yudais hu ua Apaulaus, uas tau yug tim Alexanrias thiab yeej yog ib tug tubtxawg, tau tuaj txog rau Efexaus. Nws tau muaj peevxwm rau sab Vajlugkub. 25 Nws tau kawm txog tus Tswv txojkev thiab tau hais kubsiab lug tawm hauv tus ntsujplig thiab qhuabqhia meej txog Yexus, tabsis nws tsuas tau paub txog Yauhas txojkev rausdej xwb. 26 Nws tau pib qhia muaj peevxwm ntxiag hauv tsev sablaj. Tomqab hnov nws qhia tag, Paxilas thiab Akilas nkawv tau coj nws thiab piav Vajtswv Ntuj txojkev meejmeej rau nws.
27 Vim Apaulaus tau xav mus rau Akheyas, cov kwvtij tau txhawb nws thiab sau ntawv mus rau cov thwjtim kom txais nws. Thaum mus txog, nws tau muab kev pab ntau heev rau cov uas tau xub ntseeg los ntawm vajhmoov, 28 rauqhov nws tau lov cov Yudais tej lus tabmeeg lug thiab nthuav Vajlugkub ua timkhawv ntsees tias Yexus yog Khetos.
19
Paulus Nyob Efexaus
1 Lub sijhawm Apaulaus tau nyob hauv Kaulithaus, Paulus tau ncig pem phab qaum teb tuaj txog rau hauv Efexaus thiab los ntsib ib cov thwjtim ntawd. 2 Nws tau hais rau lawv tias, “Nej puas tau txais tus Ntsujplig Dawbhuv thaum nej ntseeg?”
Lawv tau teb nws tias, “Tsis tau! Peb tsis tau hnov tias muaj tus Ntsujplig Dawbhuv li.”
3 Nws tau nug tias, “Yog li ntawd, nej tau rausdej li cas?”
Lawv tau teb tias, “Rau Yauhas txojkev rausdej.”
4 Ces Paulus tau teb tias, “Yauhas tau muab neeg rausdej mus rau kev thimxav thiab tau qhia rau zejtsoom kom lawv ntseeg tus uas los tomqab nws. Qhov no yog ntsig txog Yexus.” 5 Thaum hnov li no, lawv tau rausdej rau tus Tswv Yexus lub npe 6 thiab sijhawm Paulus tau tsa tes rau saum lawv, tus Ntsujplig Dawbhuv tau nqis los rau lawv, mas lawv tau hais tej lus txawv tebchaws thiab tau cevlus. 7 Cov txivneej ntawd tagnrho tau muaj kaum-ob leeg.
8 Thaum mus rau hauv txoos sablaj, Paulus tau qhia muaj peevxwm ntxiag peb hlis, nrog lawv sibcav thiab haub lawv ntsig txog Vajtswv Ntuj lub tswvkuj. 9 Tabsis vim ibtxhia tau tawv heev thiab tsis tau ntseeg, lawv tau hais phem txog Txojkev tim ntsejmuag tej neeg coobcoob, ces Paulus tau thim ntawm lawv thiab coj cov thwjtim nrog nws. Nws tau niajhnub nrog luag sibcav hauv Tilanus lub tsev kawm ntawv. 10 Qhov no tau tshwmsim ob lub xyoos, txog qhov uas txhua tus nyob hauv Axias tau hnov tus Tswv txojlus, qas neeg Yudais thiab neeg Kilis tibsi.
11 Vajtswv Ntuj tau ua tej hwjchim, uas ibtxwm tsis tau tshwmsim dua, los ntawm Paulus txhais tes, 12 txog qhov tias tej phuam so hws thiab daim ntaub npua ua haujlwm ntawm nws lub cev, tau muab mus tso rau saum tej neeg mob, thiab lawv tej mobnkeeg tau zoo thiab tej ntsujplig phem tau tawm.
13 Qee tus neeg Yudais ntiab dab tau tuaj rau ntawd thiab tau tuav tus Tswv Yexus lub npe rau saum tej neeg uas tau raug ntsujplig vuabtsuab tias, “Kuv ntiab nej los ntawm tus Yexus uas Paulus tshajtawm.” 14 Yawg Xakevas, ib tug povthawj hlob ntawm cov Yudais, tau muaj xya tus tub uas tau ua li no. 15 Tus ntsujplig phem tau teb lawv tias, “Yexus los kuv paub thiab Paulus los kuv swm, tabsis nej yog leejtwg?” 16 Tus txivneej uas tau raug ntsujplig phem ntawd tau dhia tuaj rau lawv, tau kovyeej lawv tagnrho thiab muab lawv mos txog qhov uas lawv tau khiav tawm hauv tsev liabqab ploog thiab mob ntsaj qaws.
17 Tej neeg Yudais thiab Kilis uas tau nyob hauv Efexaus tau paub zaj no txhua nrho thiab lawv puavleej tau ntshai thiab tau saib taus tus Tswv Yexus lub npe. 18 Ces coob leej uas twb ntseeg lawd tau tuaj lees txim thiab nthuav lawv tej haujlwm. 19 Ibtxhia neeg yeessiv tau nqa lawv tej thooj ntawv tuaj thiab tau muab hlawv tim ntsejmuag sawvdaws. Thaum lawv tau muab tej nqi ntawv los sibntxiv, lawv tau pom tias tej nqi tau raug li tsibcaug txheeb nyiaj. 20 Li no, tus Tswv txojlus tau huamvam thiab tau ruajkhov nrog hwjchim.
21 Thaum tej no tiav tag lawm, Paulus tau npajsiab, los ntawm tus Ntsujplig, mus ncig Makedonias thiab Akheyas, ces mam ho mus rau Yeluxalees. Nws tau hais tias, “Tomqab kuv tau mus txog ped, kuv cheemtsum mus pom lub nroog Loo.” 22 Nws tau xa Timautes thiab Elatus, ob tug uas tau pab nws, mus uantej rau Makedonias, hos nws tau laug mentsis hauv Axias.
Kev Kubntxhov Nyob Efexaus
23 Lub sijhawm ntawd kev kubntxhov tau muaj tsis me ntsig txog Txojkev. 24 Rauqhov tau muaj ib tug kws ntaus nyiaj npe hu ua Demetius, uas tau muab nyiaj nchuav ua tej lub menyuam tuamtsev teev tus mlom Atemis. Nws txoj lagluam no tau ua rau tej kws nyiaj muaj tsam heev. 25 Thaum hu cov kws nyiaj thiab tej neeg uas tau ua haujlwm thooj li no tuaj txoos uake, nws tau hais rau lawv tias, “Cov yawg, nej paub tias peb lub neej zoo yog txoj lagluam no. 26 Nej tau pom thiab hnov tias, tsis yog hauv Efexaus xwb tabsis yuav luag thoob xeev Axias, yawg Paulus tau haub thiab ntxias neeg coobcoob tias tej mlom uas tes tau puab no tsis yog vajtswv. 27 Tsis tag tias peb txoj lagluam no yuav puas koob xwb, tabsis tus niam vajtswv Atemis lub tuamtsev yuav raug suav tsis muaj qabhau dabtsi, thiab tshaj ntawd, nws yuav poob nws lub hwjchim uas Axias thiab ntiajteb hwm.”
28 Thaum hnov li no, lawv tau chim heev thiab tau qw tias, “Neeg Efexaus tus vajtswv Atemis muaj hwjchim loj.” 29 Lub nroog tau muaj kev kubntxhov thiab lawv tau khiav nroo ntws ua ib pab mus rau ntawm lub chaw ua yeebyam; lawv tau ntes kiag Nkaius thiab Alitakhus, uas tau nyob Makedonias tuaj thiab yog Paulus ob tug kwvluag tim Makedonias. 30 Paulus tau xav mus rau hauv pab neeg ntawd, tabsis cov thwjtim tsis tau tso nws. 31 Qee tus thawjcoj hauv Axias, uas tau ua Paulus phoojywg, kuj tau xa neeg tuaj nquahu nws kom nws tuskheej txhob mus rau hauv lub chaw ua yeebyam.
32 Tagnrho pab neeg ntawd tau kubntxhov, ibtxhia qw li no, ibtxhia qw li tod. Feem coob twb tsis paub tias vim tus dabtsi es lawv ho tau tuaj rau ntawd. 33 Cov Yudais tau thawb Alexadaws tawm hauv pab neeg rau tomntej. Alexadaws tau co tes kom lawv ntsiag, rauqhov nws tau xav hais lus daws tuskheej rau pab neeg. 34 Tabsis thaum lawv tau paub tias nws yog neeg Yudais, tagnrho sawvdaws tau ib tsaug qw ob lub txoov teev tias, “Neeg Efexaus tus vajtswv Atemis muaj hwjchim loj.”
35 Tus teev ntawv hauv nroog tau co tes kom sawvdaws tswmseeb thiab tau hais tias, “Neeg Efexaus, neeg ntiajteb leejtwg tseem tsis paub tias lub nroog Efexaus tau ceev tus vajtswv Atemis ntomeej uas tau nqis saum ntuj los? 36 Vim tej lus tseeb no tsis muaj leejtwg tawmtsam tau, yog li ntawd, nej sawvdaws yuavtsum ntsiag thiab txhob ua li no ntxiv. 37 Rauqhov nej tau coj tej neeg no tuaj, tabsis lawv tsis tau nyiag lub tuamtsev lossis tuammom peb tus vajtswv. 38 Yog Demetius thiab cov kws nyiaj uas nrog nws uake ntawd muaj lus kom leejtwg, peb muaj tej rooj tu plaub thiab cov kavxeev ne, cia lawv hu tus ntawd mus rau ntawm cov ntawd. 39 Yog nej tshuav dabtsi ntxiv, qhov ntawd yuavtsum coj mus daws hauv rooj txiavtxim raws kevcai. 40 Rauqhov peb samsim yuav raug hu mus teb txojkev kubntxhov hnub no. Peb tsis muaj peevxwm nrhiav laijthawj dabtsi los teev txog qhov xwmtxheej no.
Tomqab hais tej lus no, nws tau tso lub koom txoos mus.
20
Paulus Mus Makedonias thiab Akheyas
1 Tomqab kev kubntxhov tau tus, Paulus tau xa neeg mus hu cov thwjtim tuaj. Nws tau txhawb lawv zog thiab muab lus sibncaim rau lawv, ces nws tau mus rau Makedonias. 2 Thaum mus rau cheebtsam ntawd thiab muab lus txhawb lawv ntau heev, nws tau mus rau tebchaws Kilis 3 thiab tau so peb hlis ntawd. Vim cov Yudais tau npaj kev tawmtsam Paulus sijhawm uas nws yov tau nce mus rau Xilias, nws tau txiavtxim rovlos rau Makedonias. 4 Cov uas tau nrog Paulus mus uake ntawd tau muaj Pilehus tus tub Xaupates uas tau yug pem Npeleas, Alitakhus thiab Xekudus pem Thexalaunikes, Nkaius pem Dawnpe, Timautes, Tikhikus thiab Taufimus tim Axias. 5 Lawv tau mus uantej thiab nyob tos peb hauv Tauas. 6 Peb tau caij nkoj tawm Filipis tomqab lub koobtsheej tsis xyaw keeb, thiab tsib hnub peb tau los txog rau ntawm lawv hauv Tauas, thiab peb tau nyob xya hnub ntawd.
Etikhus Ciaj Rovlos
7 Hnub ib hauv lub limtiam, thaum peb tau sibsau los ntais movci uake, Paulus tau tham nrog lawv mus txog rau taghmo, vim nws yuav ncaim tagkis. 8 Tej teeb tau cig lamlug ntawm txheej saud qhov uas peb tau nyob uake. 9 Ib tug hluas npe hu ua Etikhus tau zaum ntawm qhovrai thiab tau tsaugzog heev sijhawm Paulus tau tham ntevntev. Thaum tsaugzog ntawd, nws tau poob peb txheej tsev rau hauv. Lawv tau tsa nws thiab pom tias nws tau tuag lawm. 10 Thaum Paulus tau nqis los txog, Paulus tau qhaucev rau saum nws thiab qawm nws. Paulus tau hais tias, “Txhob ntshai, rauqhov nws tseem muaj txojsia.” 11 Paulus tau nce mus saud, ntais lub movci, thiab noj nrog sawvdaws mus txog kajntug, ces nws tau ncaim. 12 Lawv tau coj tus hluas muajsia zees mus tsev thiab tau txais kev npligsiab tsis txawj tag.
Paulus Ncaim Cov Txwjlaug Efexaus
13 Peb tau los rau saum nkoj uantej thiab tau caij nkoj los rau Axaus, qhov chaw uas peb yuav coj Paulus mus nce nkoj. Peb tau ua li no, rauqhov Paulus tau teem uantej kom nws tau taugkev los. 14 Tomqab nws tau ntsib peb hauv Axaus thiab nce nkoj, peb tau mus rau Mitilenes. 15 Tagkis peb tau caij nkoj tawm ntawd thiab tau los txog rau Khius, thiab hnub tomqab peb tau tshwm rau Xamaus. Hnub peb ces peb tau los txog Miletus. 16 Paulus tau txiavtxim hla plaws Efexaus, kom nws txhob tau laug sijhawm hauv Axias, vim nws tau maj mus rau Yeluxalees seb peb puas mus txog uantej hnub Peetekos.
17 Paulus tau xa neeg ntawm Miletus mus rau Efexaus, mus hu cov txwjlaug hauv pawgntseeg. 18 Thaum lawv tau tuaj txog ntawm nws, nws tau hais rau lawv tias, “Nej twb paub tias, kuv tau ua neej nrog nej li cas txij thawj hnub uas kuv tau tsuj Axias los txog nimno, 19 tiam tus Tswv nrog txhua txojkev txo hwjchim, nrog kuamuag thiab nrog tej kev simsiab uas tau raug kuv los ntawm cov Yudais tej kev tawmtsam. 20 Nej twb paub tias kuv tsis tau tsotseg ib yam dabtsi uas muaj txiajntsig rau nej, tabsis kuv tau tshajtawm txojmoo zoo thiab qhia nej tabmeeg sawvdaws thiab ib lub tsev rau ib lub tsev, 21 ua timkhawv ntsees rau neeg Yudais thiab Kilis txog kev thimxav mus rau ntawm Vajtswv Ntuj thiab txog kev ntseeg peb tus Tswv Yexus.”
22 “Nimno kuv twb raug Vajtswv Ntsujplig khi mus Yeluxalees thiab kuv twb tsis paub dabtsi yuav raug kuv ped, 23 tshwj qhov tus Ntsujplig Dawbhuv tau ua timkhawv ntsees rau kuv tias, txhua lub nroog kuv mus, saw hlau thiab kev txomnyem nyob tos kuv. 24 Tabsis kuv tsis ua lub neej no kom tsam ibyam dabtsi rau kuv tuskheej, tsuav kuv xaus txojkev sibtw no lossis ua tiav txoj haujlwm uas kuv tau txais ntawm tus Tswv Yexus, uas yog ua timkhawv ntsees txog Vajtswv Ntuj txojmoo zoo saum vajhmoov.”
25 “Ces nimno kuv paub tias, nej, cov uas kuv tau tuaj tshajtawm lub tswvkuj rau, yuav tsis pom kuv lub ntsejmuag ntxiv. 26 Yog li ntawd, hnub no kuv ua povthawj rau nej tias kuv dawbhuv ntawm nej sawvdaws cov ntshav, 27 rauqhov thaum kuv tshajtawm txojmoo zoo rau nej, kuv tau qhia Vajtswv Ntuj tus dejsiab tagnrho, tsis tau npog. 28 Ceev nej tuskheej thiab txhua tus menyuam yaj, uas Vajtswv Ntsujplig tau tsa nej ua cov saibxyuas, xws li Vajtswv Ntuj pawgntseeg, uas Nws tau txhiv los ntawm Yexus Khetos cov ntshav. 29 Kuv paub tias tomqab kuv ncaim, hma coob tus yuav los hauv nej thiab yuav tsis txuag cov menyuam yaj. 30 Thiab tej neeg nruab nrab nej yuav sawv los hais tej lus cuav kom coj cov thwjtim yuamkev raws lawv qab. 31 Yog li ntawd, txhob tsaugzog. Nco ntsoov tias peb lub xyoos, nruab hnub thiab hmontuj, kuv tsis tau tseg txojkev ntuas nej ibleeg zujzus nrog kuamuag.”
32 “Nimno, kuv tso nej rau ntawm Vajtswv Ntuj thiab ntawm txojlus saum Nws vajhmoov, uas muaj hwjchim tsa nej thiab muab nyiaj qabnas rau nej nrog cov raug ntxuav dawbhuv tagnrho. 33 Kuv tsis tau ntshaw leejtwg nyiaj, kub, lossis tsoos tsho. 34 Nej tuskheej paub tias kuv ob txhais tes no tau khwv los daws kuv tej kev cheemtsum thiab cov uas nyob nrog kuv. 35 Saum txhua yam, kuv tau qhia nej tias, peb cheemtsum khwv li no mus pab cov tsaugmuas thiab nco tus Tswv Yexus tej lus, rauqhov Nws tau hais tias, ‘Muab rau luag mas tau koobhmoov dua li txais ntawm luag.’”
36 Tomqab hais tej no, nws tau txhoscaug thiab thov Vajtswv nrog rau lawv sawvdaws. 37 Txhua leej tau quaj vau hlo rau ntawm Paulus cajdab thiab lawv tau nwj nws. 38 Lawv tau mobsiab tshaj rau lolus uas nws tau hais lawm tias, lawv yuav tsis pom nws lub ntsejmuag ntxiv lawm. Ces lawv tau xa nws mus rau tom lub nkoj.
21
Mus Rau Yeluxalees
1 Tomqab peb tau nce saum nkoj, dua rhe tuskheej tawm ntawm lawv, peb tau ncajnraim los rau Kaus. Hnub tomqab peb tau mus rau Laudes, thiab tawm ntawd peb tau mus rau Patalas. 2 Peb tau nrhiav pom ib lub nkoj uas yuav txiav mus rau Faunikes, ces peb tau nce mus caij. 3 Peb tau los pom Xaipas thiab tau caij nkoj hla nram qab lub koog povtxwv ntawd mus rau Xilias. Peb tau nqis los rau Tiles, rauqhov lub nkoj tau muaj khoom los thau ntawd. 4 Thaum peb tau ntsib cov thwjtim, peb tau nyob nrog lawv xya hnub ntawd. Lawv tau hais rau Paulus los ntawm tus Ntsujplig kom txhob mus rau Yeluxalees. 5 Tabsis thaum txog peb lub sijhawm, peb tau ncaim thiab taugkev los. Tagnrho cov thwjtim, lawv tej pojniam thiab menyuam tau xa peb tawm nroog, thiab thaum peb txhoscaug ntawm ntug suab puam, peb tau thov Vajtswv. 6 Thaum hais lus sibncaim tag, peb tau nce rau saum nkoj thiab lawv tau rovmus tsev.
7 Thaum peb taug taugkev pem Tiles, peb tau los txog Petaulemais thiab tau ntsib cov kwvtij ntawd thiab tau nrog lawv nyob ib hnub. 8 Tagkis peb tau tawm los rau Xixaliyas thiab mus hauv Filiv tus tshajtawm txojmoo zoo lub tsev. Nws yeej yog ib tug ntawm xya tus ncignum. Peb tau nrog nws nyob. 9 Nws kuj tau muaj plaub tug txhais nkaujxwb ua cov cevlus.
10 Peb tau nyob ntawd ntau hnub, ces ib tug cevlus Yudais npe hu ua Ankanpus tau nqis tuaj, 11 thiab thaum tuaj txog ntawm peb, nws tau muab Paulus txojsiv los pav nws ob txhais kotaw thiab tes. Nws tau hais tias, Vajtswv Ntsujplig hais li no, “Tus txivneej uas yog tus tswv txoj siv no yuav raug cov Yudais khi li no hauv Yeluxalees thiab yuav raug muab rau neeg txawv tebchaws txhais tes.”
12 Thaum peb tau hnov tej no, peb thiab cov neeg nyob ntawd tau nquahu kom Paulus txhob nce mus Yeluxalees. 13 Ces Paulus tau teb tias, “Nej quaj ua tus dabtsi thiab ua rau kuv lwjsiab li no? Rauqhov kuv npaj txhij tsis yog yov raug ntes xwb tabsis yov tuag rau tus Tswv Yexus lub npe hauv Yeluxalees.” 14 Thaum nws tsis ntseeg peb lawm, peb tau tsotseg thiab hais tias, “Cia tus Tswv tus dejsiab tiav.”
15 Dhau lub sijhawm ntawd, peb tau npaj thiab nce mus rau Yeluxalees. 16 Ib cov thwjtim hauv Xixaliyas tau nrog peb mus thiab coj peb mus txog ntawm Manaxoos tsev. Nws tau txais peb ua nws cov qhua. Nws tau yug nyob Xaipas thiab yeej yog ib tug thwjtim thaum chivkeeb.
Paulus Txog Yeluxalees
17 Thaum peb tau los txog hauv Yeluxalees, cov kwvtij tau txais peb zoo siab hlo. 18 Tagkis Paulus thiab peb tau mus xyuas unpaus thiab tagnrho cov txwjlaug tau tuaj rau ntawd. 19 Hais kev nojqab nyobzoo tag, Paulus tau qhia ib qhov zujzus txog tej uas Vajtswv Ntuj tau ua nruab nrab pejkum neeg los ntawm nws txoj haujlwm.
20 Hnov li no, lawv tau qhuas Vajtswv Ntuj thiab hais rau nws tias, “Kwvtij, koj pom cov Yudais uas twb ntseeg kuj muaj ntau txheeb leej thiab txhua leej tau ua cov mobsiab Kevcai. 21 Lawv tau hnov moo txog koj tias koj tau qhia cov Yudais uas nyob nrog pejkum neeg kom tso Mauxes, xws li hais kom lawv txhob muab tej menyuam txiavtawv lossis coj tej kabke. 22 Yog li ntawd, peb yuav ua li cas? Txhua leej yuav hnov tias koj twb los lawm. 23 Yog li mas, koj ua qhov no li peb hais. Plaub tug txivneej nrog peb ntawm no tau muaj kev coglus rau lawv tuskheej. 24 Coj lawv thiab nrog lawv ntxuav tuskheej dawbhuv. Them rau lawv kom lawv chais tau lawv lub taubhau. Txhua leej yuav paub tias tej lus moo txog koj ntawd tsis muaj tabsis koj uaneej raws kabke thiab koj tuskheej ceev Kevcai. 25 Ntsig txog cov ntseeg txawv tebchaws, peb twb sau ntawv rau lawv ntsig txog kev txiavtxim kom lawv ceev tuskheej tawm ntawm tej nqaij fij rau mlom, ntshav, tej tsiaj zawm cajdab, thiab kev vuabtsuab.”
26 Ces hnub tomqab, Paulus tau coj plaub tug txivneej thiab tau nrog lawv ntxuav tuskheej dawbhuv. Ces nws tau mus hauv lub tuamtsev, mus ceebtoom hnub xaus ntawm lawv kev ntxuav dawbhuv, hnub uas lawv nyias yuav nqa khoom fij tuaj theej nyias.
Paulus Raug Ntes
27 Thaum xya hnub ntawd twb yov xaus, cov Yudais tim Axias tau pom Paulus hauv tuamtsev, lawv tau do tagnrho tej neeg los ntes nws. 28 Lawv tau qw tias, “Kwvtij Yixayees, pab peb os. Tus txivneej no yog tus uas tau qhia rau txhua qhov tawmtsam peb haivneeg, Kevcai, thiab qhov chaw no. Nws tau coj cov Kilis tuaj hauv lub tuamtsev thiab tau ua rau qhov chaw dawbhuv no qias.” 29 Rauqhov lawv tau pom Taufimus pem Efexaus nrog Paulus hauv nroog, tus uas lawv tau xav tias Paulus tau coj tuaj hauv lub tuamtsev.
30 Tagnrho lub nroog tau nrov nroo ntws thiab sawvdaws tau sibsau uake. Lawv tau muab Paulus khi thiab cab nws tawm ntawm lub tuamtsev. Tej roojvag tau raug kaw tamsis. 31 Thaum lawv samsim nrhiav kev tua nws, xov tau nrov mus txog tus lwjtxheeb ntawm cov tubrog tias tagnrho lub nroog Yeluxalees tau kubntxhov. 32 Nws tau txhib tubrog thiab tej thawj tubrog pawgpua tuaj. Lawv tau khiav tuaj rau ntawm pab neeg coobcoob. Thaum pom yawg lwjtxheeb thiab cov tubrog, lawv tau tseg tsis ntaus Paulus.
33 Ces tus lwjtxheeb tau los ze thiab tuav nkaus Paulus, nws tau hu kom muab ob txoj saw hlau los xauv nws. Nws kuj tau nug tias Paulus yog leejtwg thiab tau ua dabtsi. 34 Ibtxhia qw li ub, ibtxhia qw li no hauv pab neeg. Vim kev kubntxhov, nws tsis tau muaj peevxwm paub meej, ces nws tau hais kom coj Paulus mus rau hauv lub yeej. 35 Thaum los txog ntawm cov qib ntaiv, cov tubrog tau muab Paulus kwv vim neeg tau sibtxiv hnyav heev. 36 Tagnrho zejtsoom tau caum qab thiab qw tias, “Tua nws!”
Paulus Txheem Txojmoo Zoo Rau Pab Neeg
Ctu 9:1-22; 26:9-18
37 Thaum nws tau samsim yov raug coj mus hauv lub yeej, Paulus tau hais rau tus lwjtxheeb tias, “Puas raugcai rau kuv hais dabtsi rau koj?”
Lwjtxheeb tau teb tias, “Koj paub lus Kilis lod? 38 Koj tsis yog tus neeg Iziv uas tau sawv tsis ntev ntawd thiab tau coj plaub txheeb tus txivneej tuaneeg mus rau tom mojsab qhua lod?”
39 Paulus tau teb tias, “Kuv yog neeg Yudais pem Talaxus hauv Kilikias, thiab yog ib tug pejxeem hauv lub nroog tsis dogdig. Kuv thov koj, pub cai rau kuv hais rau zejtsoom.”
40 Thaum txais kev tsocai ntawm tus lwjtxheeb, Paulus tau sawv ntawm cov qib ntaiv thiab co tes rau zejtsoom kom ntsiag. Thaum lawv ntsiag lawm, nws tau hais ua lus Henplais tias,
22
1 “Tsoom kwvtij thiab niamtxiv, nimno mloog kuv cov lus daws tuskheej rau nej.”
2 Thaum lawv tau hnov tias Paulus tau hais lus Henplais rau lawv, lawv tau hajyam nyob twjywm. Nws tau hais tias, 3 “Kuv yog neeg Yudais, uas tau yug nyob Talaxus hauv Kilikias, thiab tau tuaj lojhlob hauv lub nroog no. Kuv tau raug cob ntawm Nkamaliyees kotaw raws Kevcai ntawm peb tej yawgkoob thiab kuv tau ua tus mobsiab rau Vajtswv Ntuj ibyam li nej sawvdaws hnub no. 4 Kuv tau tsimtxom cov neeg caum Txojkev no kom tuag, khi qas pojniam thiab txivneej thiab muab pov rau hauv nkuaj. 5 Tus povthawj hlob thiab tagnrho lub rooj txwjlaug ua timkhawv taus rau kuv. Kuv tau txais ntau tsab ntawv ntawm lawv thiab kuv tau taugkev mus rau cov kwvtij hauv Damaxes, mus coj cov neeg raug khi ntawd los rau txim hauv Yeluxalees.”
6 “Sijhawm kuv taugkev mus ze rau Damaxes, kwvlam li hnub ntseg, tamsis ntawd ib tug duab ci saum ntuj tau ci tuaj rau ibncig kuv. 7 Kuv tau vau kiag rau pem teb thiab tau hnov ib lub suab hais rau kuv tias, ‘Xaulus, Xaulus, ua cas koj tsimtxom kuv?’”
8 “Kuv tau teb tias, ‘Koj yog leejtwg, tus Tswv?’”
“Nws tau hais rau kuv tias, ‘Kuv yog Yexus neeg Naxalev, tus uas koj tsimtxom.’ 9 Cov neeg nrog kuv ntawd tau pom tus duab ci tabsis tsis tau hnov tej lus uas tau hais rau kuv.”
10 “Kuv tau hais tias, ‘Kuv yuav ua dabtsi, tus Tswv?’”
“Tus Tswv tau hais rau kuv tias, ‘Sawv, mus hauv Damaxes. Koj yuav raug qhia txog txhua yam uas twb teem tseg rau koj ua lawm.’ 11 Kuv tau digmuag vim tus tshwjchim ntawm tus duab ci ntawd, ces cov neeg nrog kuv tau tuav kuv tes mus rau Damaxes.”
12 “Ib tug txivneej npe hu ua Ananias, uas yeej yog ib tug coj zoo raws Kevcai thiab tagnrho ib tsoom Yudais tau ua timkhawv zoo txog nws, 13 tau tuaj cuag kuv thiab muab kuv tsa zaum. Nws tau hais tias, ‘Kwv Xaulus, pomkev!’ Lub txoov teev ntawd kuv tau pom nws.”
14 “Ces nws tau hais tias, ‘Peb tej yawgkoob tus Vajtswv Ntuj tau tsa tes rau saum koj kom koj los paub Nws tus dejsiab thiab pom tus Ncajncees thiab hnov lub suab ntawm Nws qhovncauj. 15 Koj yuav ua Nws tus timkhawv mus rau neeg txog tej uas koj twb pom thiab tau hnov. 16 Nimno koj yuav tos dabtsi? Sawv, rausdej thiab ntxuav koj tej kev txhaum los ntawm kev hu Nws lub npe.’”
17 “Thaum kuv tau rovlos rau Yeluxalees thiab thov Vajtswv hauv lub tuamtsev, kuv tau tawm ntawm cev 18 thiab pom Yexus hais rau kuv tias, ‘Maj nroos thiab tawm hauv Yeluxalees saisai rauqhov lawv yuav tsis txais koj qhov timkhawv txog kuv.’”
19 “Kuv tau nug tias, ‘Tus Tswv, lawv paub tias kuv tau kaw thiab khi cov ntseeg koj hauv tej txoos sablaj 20 thiab thaum lawv tau nchuav koj tus timkhawv Xatefanaus cov ntshav, kuv tuskheej tau sawv ntawd nrog lawv pomzoo, thiab tau ceev cov tua nws tej tsholoj.’”
21 “Tabsis Nws tau hais rau kuv tias, ‘Mus, rauqhov kuv xa koj tawm mus ua timkhawv rau tej pejkum neeg uas nyob deb.’”
Paulus Yog Neeg Loo
22 Mloog nws los txog lolus no, lawv tau tsa lawv lub suab tias, “Tshem tus no hauv ntiajteb, rauqhov nws tsis tsimnyog muajsia ntxiv.”
23 Thaum lawv qw, dua rhe lawv tej tsholoj thiab pov hmoov av rau saum ntuj, 24 tus lwjtxheeb tau coj Paulus mus hauv lub yeej. Nws tau hais kom muab Paulus nplawm thiab nug kom paub qhov tseeb tias vim tus laijthawj dabtsi lawv ho tau qw npaum ntawd rau nws. 25 Sijhawm lawv muab txoj hlua los nthuav, Paulus tau hais rau tus thawj tubrog pawgpua uas tau sawv ntawd tias, “Ib tug neeg Loo uas tsis muaj txim puas tsimnyog nej ntaus?”
26 Hnov li ntawd, tus thawj tubrog pawgpua tau mus cuag tus lwjtxheeb thiab tshabxo rau nws tias, “Koj yuav ua li cas? Rauqhov tus neeg no yog pejxeem Loo.”
27 Tus lwjtxheeb tau los nug nws tias, “Qhia kuv, koj yog neeg Loo lod?”
Nws tau teb tias, “Yog.”
28 Lwjtxheeb tau teb tias, “Kuv tau them nqi ntau heev thiaj tau ua pejxeem.”
Tabsis Paulus tau hais tias, “Tabsis kuv twb yug ua pejxeem.”
29 Yog li ntawd, cov uas yuav nug nws tau txav tawm tamsis thiab tus lwjtxheeb tau ntshai heev thaum paub tias Paulus yeej yog neeg Loo thiab vim nws tau muab Paulus khi.
Sawv Ntawm Rooj Xuhenris
30 Tagkis tomqab, vim tus lwjtxheeb xav paub meej tias vim li cas Paulus tau raug cov Yudais muab ua luam nqis hav, tus lwjtxheeb tau tso Paulus thiab tau hu cov povthawj hlob thiab tagnrho lub rooj Xuhenris tuaj uake. Nws tau coj Paulus los sawv ntawm lawv xubntiag.
23
1 Saib ntsoov rau lub rooj Xuhenris, Paulus tau hais tias, “Cov kwvtij, raws txhua yam kev totaub tuskheej mas kuv twb ua pejxeem zoo rau Vajtswv Ntuj los txog rau hnub no.” 2 Ananias, tus povthawj hlob, tau tawmlus rau cov sawv ze nws kom ntaus nws lub qhovncauj. 3 Ces Paulus tau hais rau nws tias, “Vajtswv Ntuj yuav ntaus koj lub qhovncauj, niag ntxa dawb! Koj zaum txiavtxim rau kuv raws Kevcai tabsis koj tuskheej ho hla Kevcai thaum koj tawmcai ntaus kuv.”
4 Cov sawv ntawd tau hais tias, “Koj rhuav Vajtswv Ntuj tus povthawj hlob lod?”
5 Paulus tau teb tias, “Kuv tsis paub, cov kwvtij, tias nws yog tus povthawj hlob. Rauqhov twb sau tseg tias, ‘Koj yuavtsum txhob hais lus phem rau cov thawjcoj ntawm haivneeg.’”
6 Tabsis paub zoo tias nruab nrab lawv, ibtxhia yog Xadukais thiab ibtxhia yog Falixais, Paulus tau qw hauv rooj Xuhenris tias, “Cov kwvtij, kuv yog Falixais, ib tug tub ntawm cov Falixais, thiab kuv samsim raug txiavtxim rau txojkev ciasiab thiab kev sawv rovlos ntawm cov tuag.” 7 Nws lolus no tau dhau ua qhov teebmeem rau cov Falixais thiab Xadukais, ces lawv feem coob tau tawg. 8 Rauqhov cov Xadukais hais tias tsis muaj kev sawv rovlos, timtswv lossis ntsujplig, tabsis cov Falixais lees tej no.
9 Kev kubntxhov loj tau tshwmsim, ibtxhia xibfwb qhia Kevcai hauv cov Falixais tau sawv thiab cav heev tias, “Peb tsis pom kev txhaum dabtsi ntawm tus txivneej no. Yog ib tug ntsujplig lossis timtswv tau hais rau nws ne?” 10 Vim qhov teebmeem tau loj heev thiab vim tus lwjtxheeb tau ntshai tsam Paulus raug lawv muab dua, nws tau hu cov tubrog nqis mus muab nws thiab coj los rau hauv lub yeej.
11 Hmo tomqab, tus Tswv tau los sawv rau ntawm Paulus thiab hais rau nws tias, “Ruaj siab! Ibyam li koj tau ua timkhawv ntsees txog kuv hauv Yeluxalees, koj cheemtsum yuav ua timkhawv hauv Loo.”
Kev Tuavhauv Tua Paulus
12 Hnub tomqab cov Yudais tau tuavhauv thiab coglus rau tuskheej tias lawv yuav tsis noj thiab tsis haus mus txog thaum lawv tua tau Paulus. 13 Cov tuavhauv uake ntawd tau muaj li plaubcaug leej. 14 Ibtxhia tau mus cuag cov povthawj hlob thiab cov txwjlaug thiab hais tias, “Peb tau coglus rau tuskheej txhob saj dabtsi mus txog thaum peb tua tau Paulus. 15 Yog li ntawd, nej nrog lub rooj Xuhenris muab lus rau lwjtxheeb kom nws coj Paulus los rau nej es nej yuav taug kom paub tej pausntsis tseeb txog nws. Ces peb npaj mus ze nws thiab tua nws.”
16 Hnov txog qhov tos kev tua no, Paulus tus muam tus tub tau tuaj thiab nkag hauv lub yeej thiab tshabxo rau Paulus. 17 Ces Paulus tau hu ib tug thawj tubrog pawgpua los thiab hais rau nws tias, “Coj tus hluas no mus cuag lwjtxheeb rauqhov nws muaj dabtsi hais rau nws.”
18 Ces thaum tus thawj tubrog pawgpua coj nws mus rau lwjtxheeb, nws tau hais tias, “Paulus, tus neeg raug kaw ntawd, tau hu kuv thiab hais kuv kom coj tus hluas no rau koj. Nws muaj dabtsi yuav hais rau koj.”
19 Thaum lwjtxheeb tau cev tes mus tuav nws thiab coj nws mus rau ib cag, nws tau nug tias, “Koj muaj dabtsi uas yuav tshabxo rau kuv?”
20 Nws tau teb tias, “Cov Yudais tau tuavhauv tuaj thov koj tagkis kom koj coj Paulus mus rau lub rooj Xuhenris nug nws tseebtseeb. 21 Yog li ntawd koj txhob ntseeg lawv, rauqhov li plaubcaug tus txivneej yuav tos nws kev. Lawv tau coglus rau tuskheej, tsis noj tsis haus mus txog thaum lawv tua tau nws. Nimno lawv twb npaj txhij, tos ntsoov lus tsocai ntawm koj.”
22 Yog li ntawd, lwjtxheeb tau tso tus hluas tawm mus thiab hais tias, “Txhob hais tawn rau leejtwg tias koj tau hais tej no rau kuv.”
Paulus Raug Xa Mus Xixaliyas
23 Nws tau hu cov thawj tubrog pawgpua los thiab hais tias, “Npaj ob puas tus tubrog, xyacaum tus tubrog caij nees thiab ob puas tus tubrog nrog hmuv mus rau Xixaliyas hmo no thaum cuaj teev tsausntuj. 24 Muab ib tug nees xam xauv rau Paulus caij kom nws dim plaws mus txog tus kavxeev Feliv.”
25 Nws tau sau ib tsab ntawv li no:

26 “Khaudias Lixias,
Xa rau Yawg Hlob Kavxeev Feliv:
Nyobzoo.”
27 “Tus txivneej no tau raug cov Yudais ntes thiab tabtom yuav raug lawv tua. Kuv tau nrog tej tubrog mus txog thiab tau tso nws tawm thaum kuv tau taug paub tias nws yog neeg Loo. 28 Vim kuv tau xav paub qhov laijthawj uas lawv tau nkaug nws, kuv tau coj nws mus rau lawv lub rooj Xuhenris. 29 Kuv tau pom tias nws yog ntsig txog lawv tej kevcai. Tej lus nkaug ntawd tsis tau muaj ib yam uas nws tau tsimnyog tuag lossis raug khi. 30 Thaum kuv tau paub tias lawv tau muaj homphiaj tua nws, kuv thiaj tau xa nws tuaj rau koj thiab tshabxo rau cov nkaug nws kom tuaj hais nws zaj ntawm koj.”

31 Yog li ntawd, txais kiag txoj haujlwm no, cov tubrog tau coj Paulus hmontuj mus rau Atipataws. 32 Thaum kajntug los, lawv tau tso cov tubrog caij nees nrog Paulus mus, es lawv tau tig rovlos rau hauv lub yeej. 33 Lawv tau mus hauv Xixaliyas thiab muab tsab ntawv rau tus kavxeev thiab tau cob Paulus rau nws. 34 Tomqab tus kavxeev tau nyeem tsab ntawv, nws tau nug tias Paulus tau tawm lub xeev twg tuaj. Thaum nug tau tias Paulus tau tawm Kilikias tuaj, 35 nws tau hais tias, “Kuv yuav txiavtxim rau koj thaum cov nkaug koj tuaj txog.” Ces nws tau tawmlus kom muab Paulus kaw hauv Helauj lub vajloog.
24
Paulus Txheem Txojmoo Zoo Ntawm Feliv
1 Tsib hnub tomqab ntawd, tus povthawj hlob Ananias nrog ibtxhia txwjlaug thiab tus txivlus Tetulus tau nqis tuaj. Lawv tau hais tej lus nkaug Paulus rau tus kavxeev. 2 Tomqab hu Paulus los, Tetulus tau nkaug nws tias, “Peb tau txais kev thajyeeb ntev loo vim koj, thiab kev vammeej tau tshwmsim rau haivneeg no vim koj tej zoo tswvyim txog yav tom hauvntej. 3 Peb txais txhua yam nyob txhua qhov, yawg hlob Feliv, nrog kev nco txiajntsig. 4 Tabsis kom txhob laug koj lub sijhawm ntxiv, kuv nquahu koj ua siab ntev los mloog peb mentsis.”
5 “Vim peb tau pom tias tus txivneej no ua ib tug thabplaub thiab tsim teebmeem rau cov Yudais thoobplaws ntiajteb thiab ib tug thawj ntawm pab Naxalev. 6 Nws tau nrhiav kev qias los rau lub tuamtsev es peb thiaj tau ntes nws. 8 Yog koj nug nws, koj tuskheej yeej yuav paub ntsig txog txhua yam uas peb nkaug nws.”
9 Cov Yudais puavleej tau teb tias nws muaj li tej lus hais ntawd.
10 Thaum tus kavxeev tau co tes rau nws, Paulus tau teb tias, “Paub ntsoov tias koj tau ua tus txiavtxim rau haivneeg no ntau xyoo los lawm, kuv txaussiab hlo txheem kuv tuskheej rau ntawm koj. 11 Yog koj taug, koj yuav paub tau tias, kuv twb tsis tau nce tuaj pehawm hauv Yeluxalees txog kaum-ob hnub. 12 Cov nkaug kuv no tsis tau pom kuv nrog leejtwg sibcav hauv tuamtsev lossis haub tej neeg hauv tej txoos sablaj lossis ib qhov chaw twg hauv nroog, 13 thiab lawv tsis muaj peevxwm txheem tej uas lawv nkaug kuv nimno. 14 Tabsis kuv lees rau koj tias kuv yog ib tug ntawm Txojkev, qhov uas lawv hu ua ib pab. Kuv tiam peb tej yawgkoob tus Vajtswv Ntuj thiab ntseeg txhua yam raws li Kevcai thiab tej cevlus twb sau tseg, 15 muaj txojkev ciasiab rau ntawm Vajtswv Ntuj li cov txivneej no muaj, thiab ntseeg tias yuav muaj kev sawv rovlos ntawm cov ncajncees thiab cov tsis ncajncees. 16 Li no, kuv tuskheej thiaj tau peem ibtxwm kom kuv muaj kev totaub tugkheej rau ntawm Vajtswv Ntuj thiab ntawm neeg.”
17 “Ncaim ntau xyoo lawm, kuv nyuam qhuav tau nqa khoom fij thiab kev tabncuab rau kuv haivneeg tuaj txog. 18 Sijhawm lawv pom kuv ntawd, kuv tau samsim ntxuav tuskheej dawbhuv hauv lub tuamtsev, tsis nrog tej neeg thiab tsis ua kev kubntxhov. 19 Tabsis qee tus Yudais tim Axias yog cov uas cheemtsum tuaj thiab nkaug kuv rau ntawm koj xubntiag, yog lawv muaj ib yam dabtsi tawmtsam kuv, 20 lossis cia cov uas tuaj ntawm no hais seb lawv pom kev txhaum dabtsi thaum kuv sawv rau ntawm lub rooj Xuhenris. 21 Ntshe yog ib qhov nyuag uas kuv tau qw rau lawv tias, ‘Kuv sawv los raug nej txiavtxim hnub no yog ntsig txog kev sawv rovlos ntawm cov tuag.’”
22 Vim nws paub tseeb txog Txojkev, Feliv tau cheem lawv tias, “Thaum lwjtxheeb Lixias nqis tuaj, kuv yuav taug pausntsis rau nej.” 23 Nws tau tawmlus rau tus thawj tubrog pawgpua kom muab Paulus ceev xoobxoob, thiab txhob pub dabtsi tabkaum nws tej neeg tuaj tu nws.
24 Hnub puav tomqab, Feliv tau los nrog nws tus pojniam Nruxila, uas yeej yog neeg Yudais. Nws tau xa neeg mus hu Paulus los thiab tau mloog nws qhia ntsig txog kev ntseeg Yexus Khetos. 25 Paulus tau piav txog kev ncajncees, kev tswj tuskheej, thiab txojkev txiavtxim uas samsim los, ces Feliv tau ntshai thiab teb tias, “Nimno kuv muaj kev mus. Thaum kuv muaj zoo sijhawm, kuv yuav hu koj dua.” 26 Nws kuj tau ciasiab tias Paulus yuav muab nyiajtxiag xiab nws. Vim li no, nws txeev tau xa neeg mus coj Paulus los nrog nws sibtham. 27 Puv nkaus ob lub xyoos, ces Feliv tau txais Pokius Fexatus tuaj hloov nws. Vim nws tau xav tseg vajhmoov rau cov Yudais, Feliv tau tso Paulus kaw ntsees cia.
25
Txheem Txojmoo Zoo Ntawm Fexatus
1 Yog li ntawd, tomqab tuaj txog hauv xeev, Fexatus tau nce ntawm Xixaliyas tuaj rau Yeluxalees. 2 Cov povthawj hlob thiab cov Yudais tej thawjcoj tau tuaj ntsib nws thiab tau nquahu nws ntsig txog Paulus. 3 Lawv tau taij vajhmoov saum nws kom xa Paulus mus Yeluxalees, es lawv yuav toskev txov nws ntawm kev. 4 Yog li ntawd, Fexatus tau teb tias, “Paulus raug ceev hauv Xixaliyas, thiab kuv yuav rovmus nrad sai.” 5 Nws tau hais ntxiv tias, “Yog li ntawd, cia cov muaj peevxwm nruab nrab nej nrog kuv nqis mus thiab xyuam lub phaj nkaug nws, yog tus txivneej ntawd tau ua txhaum dabtsi.”
6 Tomqab laug sijhawm yim lossis kaum hnub nruab nrab lawv, nws tau nqis rau Xixaliyas. Hnub qab, nws tau zaum saum lub rooj txiavtxim thiab tau hu kom mus coj Paulus. 7 Thaum Paulus los, cov Yudais uas tau nqis pem Yeluxalees tuaj tau los sawv ncig nws thiab tau hais lus ntau thiab hnyav nkaug nws uas lawv tsis tau muaj peevxwm muab timkhawv.
8 Thaum Paulus tau hais lus daws tuskheej, nws tau hais tias, “Kuv tsis tau ua txhaum rau cov Yudais Kevcai, rau lub tuamtsev, lossis rau Fajtim.”
9 Vim Fexatus xav muab vajhmoov rau cov Yudais, nws tau nug Paulus tias, “Koj puas xav nce mus pem Yeluxalees, mus rau kuv txiavtxim txog tej no ped?”
10 Paulus tau teb tias, “Kuv tabtom sawv ntawm Fajtim lub rooj txiavtxim, qhov uas kuv cheemtsum raug txiavtxim. Raws li koj paub zoo, kuv tsis tau ua txhaum kevcai Yudais dabtsi. 11 Yog kuv tau ua txhaum thiab ua dabtsi tsimnyog tuag, kuv yeej tsis thov dim kev tuag. Tabsis yog tej lus uas lawv nkaug kuv tsis muaj, leejtwg tsis muaj peevxwm tso kuv rau lawv. Kuv hu txog Fajtim.”
12 Thaum ntawd Fexatus tau sablaj nrog cov tuavxam thiab teb tias, “Koj twb hu txog Fajtim, ces koj mus rau ntawm Fajtim.”
Fexatus Sablaj Rau Vajntxwv Akipas
13 Ib ncua sijhawm dhau mus, Vajntxwv Akipas thiab Npawnis tau nqis tuaj Xixaliyas, tuaj tostxais Fexatus. 14 Sijhawm nkawv nyob ntawd, Fexatus tau ntos txog tej lus nkaug Paulus rau vajntxwv tias, “Feliv tau tso ib tug txivneej raug kaw tseg. 15 Thaum kuv tau mus pem Yeluxalees, cov povthawj hlob thiab cov txwjlaug Yudais tau ntsib kuv txog nws thiab taij kev txiavtxim rau nws.”
16 “Kuv tau teb lawv tias, nws tsis yog Loo kevcai yuav tso leejtwg uantej yus hnov tus xyuam phaj tej lus nkaug thiab txais tus raug nkaug tej lus daws tuskheej timntsej timmuag rau ib qhov chaw. 17 Ces lawv tau uake tuaj rau ntawm no. Kuv tsis tau laug ib hnub li. Hnub tomqab, kuv tau zaum saum rooj txiavtxim thiab hu kom lawv coj tus txivneej los. 18 Cov nkaug nws tau sawv hais txog nws, mas kuv tsis tau pom ib qhov laijthawj uas phem. 19 Lawv tau muaj qee yam lus sibcav nrog nws txog txojkev teevtiam thiab txog Yexus, tus uas tau tuag lawm tabsis Paulus ho tau pom Nws muajsia zees ntawd. 20 Thaum kuv tau xav tsis tawm txog tej no, kuv tau nug seb nws puas xav mus rau Yeluxalees, mus txiavtxim rau tej no ped. 21 Paulus tau nquahu kom ceev nws mus rau Fajtim kev txiavtxim. Kuv tau hais kom muab nws ceev txog thaum kuv xa nws mus rau Fajtim.”
22 Akipas tau hais rau Fexatus tias, “Kuv tuskheej kuj tau xav hnov tus txivneej no.”
Fexatus tau teb tias, “Tagkis, koj yuav hnov nws.”
Txheem Txojmoo Zoo Rau Akipas
Ctu 9:3-8; 22:6-11
23 Hnub tomqab, Vajntxwv Akipas thiab Npawnis nkawv tau tuaj nrog txujci kev lomzem ntau thiab nkawv tau los rau hauv chav txais qhua nrog cov lwjtxheeb thiab tej neeg muaj tswjchim hauv nroog. Sijhawm Fexatus tau hu, Paulus tau raug coj los hauv. 24 Ces Fexatus tau hais tias, “Vajntxwv Akipas thiab tagnrho tej neeg sawvdaws, saib tus txivneej no! Cov Yudais tagnrho tau taij kuv ntsig txog nws hauv Yeluxalees thiab tau qw ntawm no tias tsis cheemtsum tseg nws muajsia ntxiv lawm. 25 Tabsis kuv tsis tau txais dabtsi tawmtsam nws uas tsimnyog muab tua. Nws tuskheej tau nquahu kom xa nws mus rau Fajtim lub rooj txiavtxim. 26 Kuj tsis muaj dabtsi tseeb yuav sau ntsig txog nws mus rau Yawg Hlob. Vim li no, kuv thiaj coj nws los rau nej thiab tshwjxeeb rau koj, Vajntxwv Akipas, kom txojkev taug pausntsis no dhau lawm, kuv yov muaj dabtsi sau. 27 Rauqhov nws tsis muaj laijthawj dabtsi rau kuv xa ib tug neeg raug kaw mus es ho tsis teev tej lus nkaug nws.”
26
1 Ces Akipas tau hais rau Paulus tias, “Tsocai rau koj hais txog tuskheej.”
Ces Paulus tau tsa tes thiab txheem tuskheej: 2 “Kuv xam tias kuv tau koobhmoov zoo, Vajntxwv Akipas, es hnub no kuv thiaj los daws tuskheej txog txhua yam uas cov Yudais tau nkaug kuv ntawm koj xubntiag, 3 tshwjxeeb qhov uas koj yog tus paub zoo txog cov Yudais tej kabke thiab tej kev sibcav txhua nrho. Vim li no, kuv thov koj ua siabntev mloog kuv.”
4 “Cov Yudais txeev tau paub txog kuv lub neej txij thaum hluas los, chiv ntsees thaum kuv tau yug los rau kuv haivneeg thiab xaus nkaus hauv Yeluxalees. 5 Lawv tau paub kuv thaum ntxov, yog lawv tuajyeem muab timkhawv, tias kuv tau coj lub neej Falixais, uas yog pab coj peb txojkev ntseeg nruj tshaj. 6 Thiab nimno kuv tau sawv ntawm rooj txiavtxim vim txojkev ciasiab saum Vajtswv Ntuj txojlus cogtseg rau peb tej yawgkoob. 7 Txojlus cogtseg uas peb kaum-ob xeem tau ciasiab tias yuav tiav es peb thiaj tiam Vajtswv Ntuj nruab hnub thiab hmontuj. Vim txojkev ciasiab no, Vajntxwv, kuv thiaj raug cov Yudais kom. 8 Vim dabtsi es nej txiavtxim tias qhov Vajtswv Ntuj tsa tej neeg tuag sawv rovlos ho tsis txaus ntseeg?”
9 “Kuv tuskheej tau pom tias kuv yuavtsum ua ntau yam los tawmtsam lub npe Yexus neeg Naxalev. 10 Kuv tau ua tej ntawd hauv Yeluxalees. Tomqab txais tswjchim ntawm cov povthawj hlob, kuv tau ntes ntau leej ntawm cov dawbhuv mus kaw; thiab thaum lawv tau raug tua, kuv tau pomzoo nrog. 11 Kuv txeev tau mus hauv txhua lub txoos sablaj, mus ua phem rau lawv thiab yuam lawv tuammom lub npe no. Los ntawm kev npautaws, kuv kuj tau tawmtsam lawv mus txog tej nroog lwm tebchaws.”
12 “Sijhawm taugkev mus rau Damaxes, nrog tswjchim thiab ntawv tsocai los ntawm cov povthawj hlob, 13 thaum tavsu, Vajntxwv, kuv tau pom ib qhov cici li lub hnub saum ntuj tuaj rau ntawm kuv thiab cov nrog kuv taugkev uake. 14 Thaum peb tau ntog tagnrho rau pem teb, kuv tau hnov ib lub suab hais rau kuv ua lus Henplais tias, ‘Xaulus Xaulus, vim li cas koj tsimtxom kuv? Nws nyuaj rau koj ncaws tus hlau ntsentse.’”
15 “Kuv tau nug tias, ‘Koj yog leejtwg, tus Tswv?’”
“Tus Tswv tau teb tias, ‘Kuv yog Yexus tus uas koj tabtom tsimtxom. 16 Tabsis sawv ntsug thiab sawv ntseg ntsos ntawm koj kotaw. Kuv tau tshwm rau koj pom vim qhov no: Los tsa koj ua tubtxib thiab ua timkhawv txog tej uas koj pom kuv thiab tej uas kuv yuav nthuav rau koj. 17 Kuv yuav cawm koj tawm ntawm koj haivneeg thiab pejkum neeg uas kuv xa koj mus rau ntawd, 18 mus qhib lawv tej qhovmuag kom lawv tig ntawm kev tsausntuj los rau qhov pomkev thiab tawm ntawm Xatas lub tswjchim los rau ntawm Vajtswv Ntuj, kom lawv txais kev zamtxim thiab nyiaj qabnas nrog cov raug ntxuav dawbhuv los ntawm kev ntseeg hauv kuv.’”
19 “Yog li ntawd, Vajntxwv Akipas, kuv tsis tau tawv qhov zeemmuag uas kuv tau pom saum ntuj 20 tabsis kuv tau xub tshajtawm rau cov neeg hauv Damaxes thiab Yeluxalees, rau tagnrho txhua qhov chaw hauv Yudas thiab rau pejkum neeg kom thimxav thiab tig los rau ntawm Vajtswv Ntuj, thiab kom ua tej haujlwm tsimnyog kev thimxav. 21 Vim tej no, cov Yudais tau koomsiab thiab nqistes ntes kuv ntawm tuamtsev. 22 Yog li ntawd, los ntawm Vajtswv Ntuj txojkev pab, kuv twb sawv ua timkhawv los txog hnub no rau tus hlob thiab tus yau, tsis hais ib yam dabtsi dhau tej uas cov cevlus thiab Mauxes tau hais tias yuav tshwmsim, 23 tias Khetos yov raug txomnyem thiab yov raug tsa ua thawj tug uas sawv rovlos ntawm cov tuag mus tshajtawm kev kaj rau Nws haivneeg thiab rau pejkum neeg.”
24 Thaum nws daws tuskheej li tej no, Fexatus tau qw tias, “Paulus, koj puas hlwb pod! Koj tej kev kawm ntau ntawd tau muab koj ntxeev ua neeg puas hlwb lawm ka.”
25 Tabsis Paulus tau teb tias, “Kuv tsis puas hlwb, yawg hlob Fexatus, tabsis kuv hais txog tej lus tseeb thiab lus ntse ntsuav. 26 Vajntxwv totaub txog tej no, thiab kuv hais tabmeeg lug rau nws, rauqhov kuv ntseeg tias tsis muaj ib yam uas vajntxwv txais tsis raug, thiab rauqhov qhov no tsis tau tshwmsim nraim nkoos tim kaum tsev. 27 Koj puas ntseeg cov cevlus, Vajntxwv Akipas? Kuv paub tias koj ntseeg.”
28 Akipas tau hais rau Paulus tias, “Ib pliag xwb, koj haub kuv ua Khixatias lod?”
29 Paulus tau teb tias, “Kuv thov Vajtswv Ntuj tias txawm ib pliag lossis caijnyoog ntev, tsis yog koj xwb tabsis tagnrho cov uas hnov kuv hnub no yuav dhau los zoo li kuv, tshwj txhob raug saw hlau khi.”
30 Vajntxwv tau sawv, ces tus kavxeev, Npawnis thiab cov uas zaum nrog lawv kuj sawv. 31 Thaum lawv tau tawm mus ntawd, lawv ibleeg tau hais rau ibleeg tias, “Tus txivneej no tsis tau ua dabtsi tsimnyog tuag lossis raug khi.” 32 Akipas tau hais rau Fexatus tias, “Tus txivneej no yov muab tso los tau, tshwj tias nws tau hu txog Fajtim lawm xwb.”
27
Paulus Caij Nkoj Mus Rau Loo
1 Thaum luag tau txiavtxim kom peb caij nkoj mus rau Italis, luag tau muab Paulus thiab lwm cov neeg raug kaw cob rau tus thawj tubrog pawgpua hu ua Yulius ntawm Fajtim cov tubrog. 2 Tomqab nce rau saum lub nkoj Anramutenus uas samsim yuav mus rau tej tshav nkoj tim Axias, peb tau raug coj mus. Alitakhus, neeg Thexalaunikes pem Makedonias, tau nrog peb uake.
3 Hnub qab, peb tau los txog Xidoos. Los ntawm nws kev hlub rau Paulus, Yulius tau xa Paulus mus rau nws tej phoojywg kom lawv ntim khoom siv taugkev rau nws. 4 Tomqab nce nkoj tawm qhov ntawd, peb tau nraim cua ntawm lub koog povtxwv Xaipas sab ped vim tej cua hlob tau nplawm lub taubhau nkoj. 5 Phua plhawv mus rau hiavtxwv tob ntawm ntug Kilikias thiab Phafilias, peb tau los txog Milas hauv Lukias. 6 Tus thawj tubrog pawgpua tau pom lub nkoj Alexanrias qhov ntawd, uas yuav mus rau Italis, nws tau muab peb nce mus hauv. 7 Tomqab lub nkoj tau mus qeebqeeb thiab nyuajnyuaj ntau hnub, peb thiaj tau los tshwm rau Kanidus. Vim cua hlob tsis tau tso peb mus ntxiv, ces peb tau nraim cua ntawm Keletes uas nyob ncaj Xalemaunes rau tid. 8 Peb tau mus nyuaj dhau lub koog povtxwv ntawd, ces peb tau los rau qhov chaw uas ibtxhia hu ua Ceebtsheej Zoo, uas tau nyob ze lub nroog Laxaias.
9 Vim caijnyoog twb nkim ntau rau ntawd thiab vim nws twb poob rau lub caij nkoj ntxeev, lub caij yoo mov twb dhau lawm thiab, Paulus tau ceebtoom 10 rau lawv tias, “Kwvtij, kuv pom tias fij nkoj no samsim yuav raug kev piamsij thiab kev puastsuaj hnyav, tsis yog rau tej khoom thiab lub nkoj xwb, tabsis rau peb txojsia huvsi.” 11 Tabsis tus thawj tubrog pawgpua tau ntseeg tus tsav thiab tus tswv nkoj dua li rau Paulus tej lus. 12 Vim nkoj tsis zoo nres ntawm Ceebtsheej Zoo rau lub caij ntuj no, feem coob tau pomzoo tawm qhov ntawd mus, seb lawv puas muaj peevxwm nqis rau nram Faunis, mus nres nkoj lub caij ntuj no rau ntawm ntug Keletes, uas saib ntsoov cov cua qabteb hnubpoob thiab cov cua qaumteb hnubpoob.
Nthwv Cua Daj Cua Dub
13 Vim cov cua qabteb ntsawj tsis hlob, lawv xav tias lawv yuav ua tau kom homphiaj tiav. Tomqab thau lub nkoj tawm, lawv tau tsav ze ntawm ntug Keletes. 14 Tsis ntev tomqab ntawd, ib nthwv cua khaubzig, uas hu ua “nthwv cua hnubtuaj qaumteb” tau los raug lub nkoj. 15 Thaum nthwv cua ntaus lub nkoj thiab peb tsis muaj peevxwm tig lub taubhau nkoj mus rau nthwv cua, peb tau puamchawj thiab tau raug cua pus mus. 16 Peb tau raug ntsawj mus ze ib lub koog povtxwv meme hu ua Kaudas, peb tau khwv heev peb thiaj muaj peevxwm ceev tau lub nkoj me. 17 Tomqab rub tau lub nkoj me hauv dej los, lawv tau muab hlua vas hauv qab los thiab muab khi rau lub nkoj loj. Thiab vim lawv tau ntshai tsam lawv yov mus khuam rau cov xuabzeb ntawm Xutis, lawv tau txo cov ntaub thiab tso lub nkoj nyob li ntawd. 18 Peb tau raug cua plawm loj heev, ces hnub tomqab lawv tau muab tej teejtug povtseg 19 thiab hnub peb, lawv tau muab tej cuabyeej hauv nkoj povtseg huvsi. 20 Ntau hnub, lub hnub thiab tej hnubqub tsis tshwm li, cua dub kuj tau nplawm tsis tu thiab, ces lawv tsis tau tshuav ib nyuag qhov kev ciasiab los cawm peb.
21 Sawvdaws tsis tau noj mov ntau hnub lawm, ces Paulus tau sawv rau hauv plawv thiab hais tias, “Cov kwvtij, yog nej mloog kuv tej lus cheem kom txhob tawm pem Keletes, ces nej yov tsis raug txojkev puastsuaj thiab piamsij no. 22 Tabsis nimno kuv nquahu nej kom ruaj siab, rauqhov peb cov ntawm no tsis muaj ib tug yuav plam nws txojsia, tshwj lub nkoj yuav puasntsoog xwb. 23 Ib tug timtswv ntawm Vajtswv Ntuj, tus uas kuv tiam thiab pub kuv muajsia nyob, tau tshwm rau kuv hmo no 24 thiab hais tias, ‘Txhob ntshai, Paulus, koj cheemtsum yuav mus sawv ntawm Fajtim xubntiag. Nimno, Vajtswv Ntuj twb nchuav vajhmoov rau koj thiab txhua tus uas nrog koj.’ 25 Ruaj siab, cov kwvtij, rauqhov kuv ntseeg Vajtswv Ntuj tias, xwmtxheej yuav tshwm raws li Nws twb hais rau kuv. 26 Peb cheemtsum yuav poob mus rau ib lub koog povtxwv me xwb.”
Nkoj Piam
27 Txog rau hmo kaum-plaub, peb tseem tau raug cua pus hauv hiavtxwv Anrias,c thiab thaum txog ib taghmo, cov nquam nkoj tau ntsuas pom tias lawv yuav txog ntug. 28 Thaum tso lub thauj hlau ntsuas, lawv pom tias hiavtxwv tau tob li neesnkaum daj; ib mentsis, lawv tau rov ntsuas dua thiab pom tias nws tau tob kaum-tsib dag. 29 Vim ntshai tsam peb mus tsoo pobzeb, lawv tau tso plaub lub thauj tog tom tw nkoj thiab thov ntuj kom pomkev. 30 Thaum cov nquam nkoj tau nrhiav kev khiav saum lub nkoj, lawv tau laug lub nkoj me rau hauv hiavtxwv, ua txuj li lawv tso dua ib lub thauj tog ntawm taubhau nkoj. 31 Paulus tau hais rau tus thawj tubrog pawgpua thiab rau cov tubrog tias, “Yog cov txivneej ntawd tsis nyob hauv nkoj, nej yuav tsis muaj peevxwm cawm nej tuskheej.” 32 Ces cov tubrog tau txiav cov hlua khi lub nkoj me thiab tso nws poob mus.
33 Thaum yuav kaj ntug, Paulus tau nquahu txhua leej kom noj mov tias, “Kaum-plaub hnub dhau los, nej tau laug thiab yoo tsis noj dabtsi. 34 Vim li no, kuv nquahu nej kom muab mov noj. Rauqhov nej yuavtsum noj rau kev cawm tuskheej. Nej ib txoj nyuag plaubhau los yuav tsis poob saum taubhau.” 35 Hais li no tag, nws tau muab ib lub movci thiab ua Vajtswv Ntuj tsaug tim ntsejmuag sawvdaws; nws tau muab ntais thiab pib noj. 36 Txhua leej tau zoo siab thiab lawv tau los muab mov noj. 37 Peb tagnrho txhua txojsia hauv nkoj muaj ob puas xyacaum-rau leej. 38 Tomqab noj mov tsau lawm, peb tau muab cov qoob pov rau hauv hiavtxwv kom lub nkoj sib.
39 Thaum pomkev lawm, lawv tau zeem tsis paub tebchaws, tabsis lawv tau pom ib ceg hiavtxwv uas muaj suabpuam, ces lawv tau xav tso lub nkoj mus rau ceg ntawd, yog lawv muaj peevxwm ua. 40 Ces lawv tau txiav plaub lub thauj tog rau hauv hiavtxwv, daws tej pob hlua ntawm cov duav nquam, thiab rub cov ntaub cug cua rau cua tshuab lub nkoj mus rau tim suab puam. 41 Tabsis thaum tso plhuav, lub nkoj tau los khuam rau ntawm ib lub roob xuabzeb hauv hiavtxwv. Lub taubhau nkoj tau khuam ruaj heev, tsis txav li; thiab tus tw nkoj tau tawg tag vim cov dej ntsawj.
42 Cov tubrog tau npaj tua cov neeg raug khi kom ib tug twg txhob ua luam dej khiav dim. 43 Tabsis tus thawj tubrog pawgpua tau xav cawm Paulus, nws tau txwv lawv kom txhob ua raws lawv lub homphiaj. Nws tau hu kom cov muaj peevxwm luam dej xub dhia thiab tawm mus rau tim ntug, 44 hos kom cov seem tuav tej txiag ntoo lossis tej yam uas tau pluam ntawm lub nkoj. Li no, sawvdaws tau dim los rau tim ntug.
28
Dim Los Rau Melitas
1 Thaum dim los lawm, ces peb tau paub tias lub povtxwv ntawd hu ua Malitas. 2 Cov neeg hauv povtxwv tau nthuav txojkev hlub neeg uas tsis tau pom dua rau peb, rauqhov lawv tau rauv ib lub cubtawg thiab tostxais peb vim tias nag tau los thiab nws tau no heev. 3 Paulus tau mus khaws ib tsuag taws thiab muab rau hauv lub cubtawg. Ib tug nab muaj taug tau tawm hauv cov taws ntaivntaiv los tom Paulus txhais tes. 4 Sijhawm cov neeg hauv povtxwv pom tus nab dai ncuv ntawm nws txhais tes, lawv tau sibtham tias, “Tus txivneej no yog ib tug tuaneeg. Txawm nws tau dim hauv hiavtxwv los, kev ncajncees tsis tau tso nws muajsia.” 5 Ces Paulus tau nchos tus nab rau hauv lub cubtawg thiab nws tsis tau raug mob dabtsi. 6 Tej neeg ntawd tau xav tias nws yuav o lossis vau kiag es tuag. Lawv tau tos ntev loo thiab tsis tau pom dabtsi tshwmsim rau Paulus, ces lawv tau hloov lus thiab hais tias nws yeej yog vajtswv.
7 Nyob ze ntawd yog yawg hlob npe hu ua Puplius, tus thawj hauv lub povtxwv ntawd, daim av. Nws yeej yog neeg txo hwjchim thiab tau muab kev txais qhua rau peb, peb hnub. 8 Puplius txiv tau pw saum txaj vim kev ua npaws thiab zawv plab. Thaum mus hauv nws, Paulus tau thov Vajtswv rau nws, cev tes mus rau saum nws thiab kho nws zoo. 9 Tomqab qhov xwmtxheej no, dua lwm cov uas muaj kev mobnkeeg hauv lub povtxwv tau tuaj thiab lawv tau zoo mob. 10 Lawv tau muab ntau yam tuaj hwm peb thiab thaum peb tau nce nkoj, lawv tau ntim tej uas peb tau cheemtsum rau peb.
Txog Loo
11 Tomqab peb hlis, peb tau nce rau hauv ib lub nkoj uas tau so ntuj no hauv lub povtxwv ntawd. Ntawm tus duab taubhau nkoj Alexanrias no tau muaj Xus Ob Tug Tub Ntxaib.a 12 Sijhawm los txog Xilakus, peb tau so ntawd peb hnub. 13 Thaum peb tau raug coj tawm ntawd, peb tau nqis los rau Lenkius. Hnub ib, cov cua qabteb tau nplawm tuaj, ces hnub ob peb tau los rau Putiaulis, 14 lub nroog uas peb tau ntsib cov kwvtij. Peb tau raug hu mus so xya hnub nrog lawv. Tomqab ntawd, peb tau tuaj txog Loo. 15 Thiab thaum cov kwvtij tau hnov tej xov txog peb, lawv tau tawm puag tim lub zos Apius thiab tim lub zos Peb Lub Tsev So tuaj ntsib peb. Thaum pom lawv, Paulus tau ua Vajtswv Ntuj tsaug thiab tau txais kev txhawbzog. 16 Ces peb tau mus hauv Loo, thiab Paulus tau raug tsocai mus nyob ib leeg nrog tus tubrog uas zov nws.
Paulus Tshajtawm Hauv Loo
17 Peb hnub tomqab, nws tau hu cov thawjcoj Yudais tuaj sibtham. Thaum lawv tuaj uake, nws tau hais rau lawv tias, “Kuv cov kwvtij, txawm kuv tsis tau ua dabtsi tawmtsam peb haivneeg thiab tej laus li kabke, kuv tau raug ntes hauv Yeluxalees thiab raug cob rau cov Loo txhais tes. 18 Neeg Loo tau taug kuv zaj thiab xav muab kuv tso vim kuv tsis tau ua txhaum ibyam uas tsimnyog tuag, 19 tabsis thaum cov Yudais tsis tau yib, kuv thiaj tau cheemtsum mus hu txog Fajtim xwb, tsis yog kuv ho tau muaj dabtsi nkaug kuv haivneeg. 20 Vim qhov laijthawj no, kuv thiaj tau hu rau nej, xav pom thiab nrog nej sibtham. Twb yog vim Yixayees txojkev ciasiab, kuv thiaj tau ris txoj saw hlau no.”
21 Lawv tau teb nws tias, “Peb tsis tau txais ntaubntawv tim Yudas ntsig txog koj thiab tsis tau muaj leejtwg ntawm cov kwvtij uas tau tuaj rau ntawm no tau tshabxo lossis tau hais dabtsi phem txog koj. 22 Tabsis peb xam tias peb tsimnyog yuav hnov ntawm koj tuskheej seb koj xav li cas, rauqhov sawvdaws paub tias, tej neeg txhua qhov tau hais lus tawmtsam txojkev ntseeg no.”
23 Lawv tau teem ib hnub nrog nws, thiab txog hnub ntawd cov tau tuaj ntsib nws rau ntawm nws chav txais qhua haj tseem tau coob tshaj. Thaum sawv ntxov mus txog tsausntuj, Paulus tau teeb Mauxes Kevcai thiab cov cevlus thiab ua timkhawv ntsees txog Vajtswv Ntuj lub tswvkuj, haub ntsees lawv ntsig txog Yexus. 24 Lawv ibtxhia kuj tau ntseeg tej lus ntawd, tabsis ibtxhia tsis tau ntseeg. 25 Lawv tau hais tsis sibhaum thiab tau pib tawm mus, tomqab Paulus hais ib lolus tias, “Tus Ntsujplig Dawbhuv tau hais zoo los ntawm tus cevlus Yaxayas rau nej tej yawgkoob 26 tias:

‘Mus thiab hais rau haivneeg tias,
“Mloog ntsoov, nej hnov thiab tsis totaub
thiab pom ntsoov, nej pom thiab tsis paub.
27 Rauqhov haivneeg no lub siab tau tawv,
lawv tej qhov ntsej tau lag,
thiab lawv tej qhovmuag tau qi nti.
Tsis li, tsam lawv yuav pom ntawm qhovmuag,
yuav hnov ntawm qhov ntsej,
lawv lub siab yuav totaub,
ces lawv yuav tiglos thiab kuv yuav kho lawv.”’

28 “Yog li ntawd, cia nej paub meej tias, Vajtswv Ntuj txojkev cawmdim no tau raug xa rau pejkum neeg, thiab lawv yuav hnov.”
30 Paulus tau nyob ob xyoos hauv nws lub tsev ntiav thiab tau txais txhua leej uas tau tuaj rau ntawm nws, 31 tshajtawm Vajtswv Ntuj lub tswvkuj thiab qhia tej uas ntsig txog tus Tswv Yexus Khetos ruajsiab nrees, tsis muaj dabtsi thaiv kev.