1 Paulus, Yexus Khetos tus timthawj los ntawm Vajtswv Ntuj tus dejsiab, raws li txojlus cogtseg txog txojsia hauv Khetos Yexus,

2 Xa rau Timautes, tus tub uas kuv hlub.

Vajhmoov, kev tabncuab thiab kev thajyeeb ntawm Txiv Vajtswv Ntuj thiab peb tus Tswv Yexus Khetos rau koj.

3 Kuv muaj lus uatsaug rau Vajtswv Ntuj, tus uas kuv tiam puag nruabthiab los nrog txojkev totaub tuskheej meej; thiab kuv tsis tsotseg kev nco txog koj hauv kuv tej kev thov Vajtswv, nruab hnub thiab hmontuj. 4 Thaum nco txog koj tej kuamuag, kuv xav pom koj kom kuv muaj kev zoo siab puvnpo. 5 Tej tsam kuv xam txog koj txojkev ntseeg tsis xyuam plhu, uas tau xub txawm hauv koj tais Lauis thiab hauv koj niam Eunike, thiab nimno kuv twb ntseeg tias nws txawm hauv koj thiab. 6 Vim qhov laijthawj no, kuv rovqab ntos rau koj kom koj zestaws rau Vajtswv Ntuj qhov koobhmoov uas nyob hauv koj thaum kuv tau tsates rau koj ntawd. 7 Rauqhov Vajtswv Ntuj tsis tau muab tus Ntsujplig taisncaus rau peb tabsis tus muaj hwjchim, kev hlub thiab kev tswj tuskheej.

8 Yog li ntawd, txhob txajmuag rau qhov timkhawv txog peb tus Tswv lossis txajmuag rau kuv, tus uas raug kaw this Nws thiab raug tsimtxom this txojmoo zoo raws li Vajtswv Ntuj lub hwjchim. 9 Nws tau cawm peb thiab hu peb rau kev dawbhuv, tsis yog raws peb tej haujlwm tabsis raws Nws lub homphiaj thiab vajhmoov. Qhov vajhmoov no tau raug muab rau peb hauv Khetos Yexus ibtxhis los, 10 tabsis nimno ho raug muab nthuav rau qhovmuag pom lub tsamthawj peb tus Cawmseej Yexus Khetos tshwm los, thaum Nws tau rhuav kev tuag thiab tau tsom teeb rau txojsia thiab kev tsis txawj tuag los ntawm txojmoo zoo. 11 Rau qhov no, kuv tau raug tsa ua tus tshajtawm, tus timthawj, thiab tus xibfwb. 12 Vim tej laijthawj no, kuv tsis txajmuag tiv kev txomnyem, rauqhov kuv paub tus uas kuv tau ntseeg, thiab kuv ruajsiab tias Nws muaj hwjchim ceev kuv txojkev ruajsiab mus txog hnub ntawd.

13 Tej uas koj tau hnov ntawm kuv, tuav ua tus qauv kev qhuabqhia zoo saum kev ntseeg thiab kev hlub hauv Khetos Yexus. 14 Ceev qhov khoom zoo uas tau raug tso hauv koj los ntawm tus Ntsujplig Dawbhuv, tus uas nyob hauv peb.

15 Koj paub tias tagnrho cov nyob hauv Axias tau tig tawm ntawm kuv, uas kuj muaj Finkeslus thiab Hemonkes. 16 Thov tus Tswv muab kev tabncuab rau Onexifaulus tsevneeg vim nws txeev tau muab kev lajsiab rau kuv thiab tsis tau txajmuag rau kuv txoj saw. 17 Thaum nws tau tuaj txog Loo, nws tau majnroos nrhiav kom ntsib kuv. 18 Thov tus Tswv muab cibfim rau nws los ntsib kev tabncuab ntawm tus Tswv rau hnub ntawd. Koj paub zoo lawm txog nws kev tiam kuv hauv Efexaus.

1 Yog li ntawd, kuv tus tub, tuaj zog hov hauv vajhmoov hauv Khetos Yexus. 2 Tej uas koj tau hnov ntawm kuv nruab nrab coob tus timkhawv ntawd, muab cob tej neeg uas txaus ntseeg, cov uas yuav qhia tau lwm tus thiab. 3 Ris tej kev tsimtxom ibyam li Yexus Khetos ib tug tubrog zoo. 4 Ib tug tubrog tsis tabkaum tuskheej rau tej haujlwm hauv lub neej kom nws tus thawj yuav raugsiab rau nws. 5 Ibyam li ntawd, leejtwg nrog luag sibtw khiav, nws yuav tsis txais yeebkoob tshwj nws khiav raws kevcai. 6 Tus tubqoob cheemtsum txais cov thawj qoob. 7 Xav txog qhov kuv hais no, rauqhov tus Tswv yuav muab kev totaub txhua yam rau koj.

8 Nco ntsoov Yexus Khetos, Daviv lub noob, tus uas tau raug tsa sawv ntawm cov tuag raws li kuv txojmoo zoo, 9 uas kuv raug tiv kev txomnyem this, mus txog qhov kuv raug khi li neeg phem; tabsis Vajtswv Ntuj txojlus twb tsis raug khi. 10 Vim li no, kuv tau tiv txhua yam this cov raug xaiv kom lawv yov ntsib kev cawmdim hauv Khetos Yexus nrog tshwjchim mus ibtxhis. 11 Lolus no txaus ntseeg:

14 Nco ntsoov tej no. Ua timkhawv ntsees rau lawv ntawm Vajtswv Ntuj xubntiag kom lawv txhob sibcav txog tej lus. Qhov ntawd tsis muaj qabhau, nws tsuas rhuav cov mloog xwb. 15 Majnroos muab tuskheej mus sawv rau ntawm Vajtswv Ntuj li tus raug ceem, li tus tubtxib tsis txajmuag, thiab li tus qhia txojlus tseeb ncajnraim. 16 Txhob sawv nrog cov neeg tham tej lus qhuav kev ntiajteb, rauqhov saum tej no lawv yuav dhau ua neeg tsis hwm Vajtswv Ntuj. 17 Lawv zaj yuav lwj zujzus li lub qhov txhab. Nruab nrab cov neeg ntawd kuj muaj Himenais thiab Filetus, 18 uas tau plam qhov tseeb. Nkawv tau qhia tias kev sawv rovlos ntawm cov tuag twb tshwmsim lawm thiab nkawv tau rhuav ibtxhia txojkev ntseeg. 19 Txawm li ntawd los, Vajtswv Ntuj lub plag tsev twb sawv khovkho thiab muaj lub homthawj no nias rau:

20 Hauv ib lub tsev loj mas tsis yog muaj tej cuabyeej nyiaj thiab kub xwb, tabsis tej cuabyeej ntoo thiab thawvcib huvsi; ibtxhia siv rau kev raug hwm thiab ibtxhia rau kev tsis raug hwm. 21 Yog li ntawd, yog leejtwg ntxuav tuskheej dawbhuv tawm ntawm tej no, nws yuav dhau ua rab cuabyeej raug hwm, dawbhuv, zoo rau tus tswv siv, thiab raug npaj rau tej haujlwm zoo.

22 Khiav tawm ntawm tej kev ntshaw saum kev hluas! Caum kev ncajncees, kev ntseeg, kev hlub, thiab kev thajyeeb nrog cov uas hu tus Tswv ntawm lub siab dawbpaug. 23 Txav tawm ntawm tej kev sibxaub tsis muaj qabhau thiab tsis muaj kws, rauqhov koj paub tias tej ntawd yuav dhau ua kev sibtawmtsam. 24 Tus Tswv tus tubtxib cheemtsum txhob nrog luag sibtawmtsam tabsis ua neeg coj tus rau txhua leej, muaj peevxwm qhia, thiab tiv kev phem. 25 Rub siabntev qhia cov neeg tawmtsam mus txog thaum Vajtswv Ntuj muab kev thimxav rau lawv los paub qhov tseeb 26 thiab lawv feeb meej txog ntxwgnyoog lub vojhlua uas lawv tau raug khi mus ua nws tus dejsiab.

1 Cim qhov no cia: Nyob rau ntu kawg, ntau lub caijnyoog yuav nyuaj heev. 2 Neeg yuav dhau ua cov hlub tuskheej, nyiam nyiaj, khavtheeb, tsav hwjchim, tuammom, tsis mloog niamtxiv, moj txheej, tsis huv, 3 tsis muaj kev tabncuab, tsis yeem sibkho, nkawg xaiv, tsis tswj tuskheej, heev, tsis nyiam kev zoo, 4 ntxeevsiab, taubhau nkaug nkawv nkuav, khav ntawm ntug cub, nyiam kev lomzem tshaj li nyiam Vajtswv Ntuj, 5 thiab lawv muaj txojkev hwm Vajtswv Ntuj uas tsis lees Nws lub hwjchim. Tig tawm ntawm tej no.

6 Tej neeg uas coj xeebceem li no nyiam mus rau hauv luag vajtse thiab quab tej pojniam tsawg tswvyim uas muaj kev txhaum thiab kev ntshaw los tuaj lawv tog. 7 Tej pojniam ntawd kawm tsis tseg tabsis tsis muaj peevxwm totaub qhov tseeb. 8 Yam li Yanes thiab Yanpeles tau tawmtsam Mauxes. Hom neeg no tawmtsam qhov tseeb. Lawv yog cov neeg puas hlwb, neeg ceem tsis taus rau kev ntseeg. 9 Tabsis lawv yuav mus tsis deb ibyam li lawv txojkev ruam, rauqhov lawv txojkev ruam yuav tshwm tabmeeg sawvdaws.

10 Tabsis koj pib mus caum kuv txojkev qhuabqhia, kev coj, homphiaj, kev ntseeg, kev siabntev, kev hlub, kev uv, 11 kev raug tsimtxom, kev txomnyem, xws li tej xwmtxheej uas tau tshwmsim rau kuv hauv Atiaukias, Ikaunius, thiab Lixathas. Kuv tau raug kev tsimtxom tabsis tus Tswv tau cawm kuv tawm ntawm txhua yam. 12 Txhua leej uas xav coj lub neej hwm Vajtswv Ntuj hauv Khetos Yexus yuav raug tsimtxom. 13 Tabsis tej neeg phem thiab neeg dag yuav tawm ncaj nraim ntawm kev liam mus rau kev puastsuaj, plaskev deb zujzus. 14 Hos rau koj, nyob twjywm hauv tej uas koj tau kawm thiab tau ntseeg; rauqhov koj txawj los ntawm cov kws xibfwb uas tau qhia koj, 15 thiab koj tau paub Vajlugkub thaum yau los, tej uas tau ua rau koj ntse rau fab kev cawmdim ntawm kev ntseeg hauv Khetos Yexus. 16 Vajlugkub tagnrho yog Vajtswv Ntuj tus cua thiab nws muaj nqis rau kev qhuabqhia, kev ceem, kev qhuabntuas, thiab kev cob neeg mus rau kev ncajncees, 17 kom Vajtswv Ntuj tus neeg yuav txawj thiab txhij rau txhua tes haujlwm zoo.

1 Ntawm Vajtswv Ntuj thiab ntawm Yexus Khetos, tus uas yuav los txiavtxim rau cov muajsia thiab cov tuag, lub xubntiag, thiab los ntawm kev ciabsiab saum Nws kev rovlos thiab Nws lub tswvkuj, kuv ceebtoom rau koj li no: 2 Tshajtawm txojlus, sawv khovkho thaum zoo sijhawm thiab phem sijhawm, nthuav txojlus, txhwj thiab txhawbzog los ntawm kev siabntev txhua fab thiab kev qhia txhua feem. 3 Rauqhov lub caij yuav los txog, thaum neeg yuav tsis mloog lus qhuabqhia zoo tabsis nyias yuav vuag rau nyias tuskheej tej kev qhuabqhia uas txob lawv qhovntsej. 4 Neeg yuav tig pobntseg tawm ntawm qhov tseeb mus rau tej uas neeg txua. 5 Tabsis rau koj, txhob qaug quav rau txhua yam, nyiaj tej kev phem, ua txoj haujlwm ntawm tus tshajtawm txojmoo zoo, khaws Vajtswv Ntuj tes haujlwm ua kom tiav.

6 Rauqhov kuv twb raug nchuav dulug lawm thiab kuv lub sijhawm tso haujlwm twb los txog. 7 Kuv twb pluav txaus nkaus, kuv twb los txog tus ciam kawg, thiab kuv tau ceev txojkev ntseeg cia. 8 Tsuas tshuav lub mom yeebkoob kev ncajncees uas raug khaws tseg rau kuv, lub uas tus Tswv, tus txiavtxim ncajncees, yuav muab rau kuv hnub ntawd. Tabsis tsis yog rau kuv xwb, hnub Nws tshwm rovlos, Nws yuav muab rau txhua tus uas twb quaj dhi tos qhov Nws rovlos.

9 Majnroos tuaj cuag kuv saisai, 10 rauqhov Demas tau tso kuv tseg vim nws hlub lub neej no thiab tau mus rau Thexalaunikes lawm. Kelexes tau mus rau Kalatias, Titus tau mus rau Dalematias. 11 Tshuav Lukas tibleeg nrog kuv nyob xwb. Thaum koj nrhiav tau Malakaus, coj nws nrog koj tuaj, rauqhov nws yog ib tug zoo siv rau kuv txoj haujlwm. 12 Tikhikus tau raug xa mus rau Efexaus. 13 Thaum koj tuaj, nqa lub tsho ntev uas kuv tau tso rau hauv Kalepus lub tsev hauv Tauas, thiab cov phau ntawv, tshwjxeeb cov tawv tsiaj.

14 Alexadaws, tus kws hlau ntawd, tau ua phem ntau rau kuv. Tus Tswv yuav them rau nws raws li nws tej haujlwm. 15 Ceev tuskheej tawm ntawm yawg no, rauqhov nws tau sawv tawmtsam peb tej lus heev.

16 Thaum kuv hais lus txheem tuskheej thawj zaug, tsis muaj leejtwg tuaj nrog kuv, tabsis sawvdaws tau tso kuv tseg. Thov kom qhov ntawd txhob raug xam rau lawv. 17 Txawm li ntawd los, tus Tswv tau sawv nraim ntawm kuv ib sab thiab tau ntxiv dagzog rau kuv, kom kev tshajtawm tau tiav hauv kuv thiab txhua haivneeg yuav hnov. Nws tau cawm kuv tawm ntawm tus tsov ntxhuav lub ncauj. 18 Tus Tswv yuav tso kuv dim ntawm txhua txojkev phem thiab yuav cawm kuv mus rau hauv Nws lub tswvkuj saum ntuj. Tshwjchim rau Nws mus ibtxhiab ibtxhis. Amees.

19 Kuv xa kev nojqab nyobzoo rau Paxilas thiab Akilas thiab rau Onexifaulus tsevneeg. 20 Elatus tau khuam rau Kaulithaus, tabsis kuv tau tso Taufimus tseg hauv Miletus vim nws tau mob. 21 Majnroos tuaj uantej lub caij ntuj no. Enpulus, Pudes, Linus, Khaudias thiab tagnrho cov kwvtij xa kev nojqab nyobzoo rau koj. 22 Tus Tswv nyob nrog koj tus ntsujplig. Vajhmoov nrog nej sawvdaws.