1 Paulus, Yexus Khetos tus timthawj raws Vajtswv Ntuj tus dejsiab, thiab tus kwv Timautes.

2 Xa rau cov Kaulauxais dawbhuv thiab cov kwvtij ntseeg hauv Khetos. Vajhmoov thiab kev thajyeeb ntawm Txiv Vajtswv Ntuj rau nej.

3 Peb ua tsaug nraim rau Vajtswv Ntuj, Leej Txiv ntawm peb tus Tswv Yexus Khetos txog nej, thaum peb thov Vajtswv rau nej, 4 vim peb tau hnov txog nej txojkev ntseeg hauv Khetos Yexus thiab nej txojkev hlub uas nej tau muab rau cov dawbhuv tagnrho, 5 tawm ntawm txojkev ciasiab uas twb muab khaws cia rau nej saum ntuj thiab nej tau hnov saum txojlus tseeb, xws li txojmoo zoo, 6 uas tau tuaj txog nej. Txojmoo zoo tabtom txi txiv thiab hlob thoobplaws lub cejntug ibyam nkaus li hauv nej txij li thaum nej tau hnov thiab tau paub tseeb txog Vajtswv Ntuj vajhmoov. 7 Nej tau kawm ntawm Ephafas, tus kwvluag uas peb hlub. Nws yog Khetos tus ncignum ncajncees rau nej, 8 thiab nws tau ntos rau peb txog nej txojkev hlub hauv tus Ntsujplig.

9 Vim li no, txij hnub peb tau hnov, peb tau thov thiab taij Vajtswv rau nej tsis tsotseg, kom nej yuav paub Vajtswv Ntuj tus dejsiab puvnpo rau txhua lub tswvyim thiab kev totaub sab ntsujplig. 10 Peb thov Vajtswv kom nej uaneej tsimnyog tus Tswv thiab haum tus Tswv tus dejsiab rau txhua txojkev: Txi txiv rau txhua tes haujlwm zoo, lojhlob rau kev paub Vajtswv Ntuj, 11 muaj peevxwm saum hwjchim txhua nrho kom nej muaj kev tiv thiab kev siabntev rau txhua yam, raws li Nws lub zog loj saum Nws tus tshwjchim; thiab kom los ntawm kev zoo siab, 12 nej yuav ua tsaug rau Leej Txiv, tus uas tau muab peevxwm rau nej mus saws cov dawbhuv li nyiaj qabnas hauv qhov kaj. 13 Nws tau cawm peb tawm ntawm txojkev tsausntuj lub tswjchim thiab muab peb los sawv hauv Nws tus Tub uas Nws hlub lub tswvkuj. 14 Hauv Nws tus Tub peb tau txais kev theejtxhoj, kev zamtxim.

21 Thaud nej yeej yog qhua thiab yeebncuab rau Vajtswv Ntuj ntawm nej tej kev xav thiab tej haujlwm qias. 22 Tabsis nimno Nws tau rovtxuas rau nej los ntawm Khetos lub cev ntawm nqaijtawv thiab kev tuag, thiab tau tsa nej ua cov dawbhuv, thuam tsis tau, thiab tib tsis tau rau ntawm Nws xubntiag, 23 yog nej, cov uas twb raug tsa thiab tau cog khovkho, nyob rau saum kev ntseeg thiab tsis txav tawm ntawm txojkev ciasiab saum txojmoo zoo, uas nej tau hnov, txoj uas tau raug tshajtawm rau txhua tsav hauv qab ntuj, thiab kuv, Paulus, tau dhau ua tus tiam.

24 Nimno kuv zoo siab rau txojkev raug tsimtxom this nej, thiab kuv muab Khetos tej kev raug tsimtxom uas seem ntawd ntim rau kuv lub cev theej Nws lub cev, uas yog pawgntseeg. 25 Kuv tau dhau ua tus tiam pawgntseeg, raws li Vajtswv Ntuj kev saib vajtse uas tau raug muab rau kuv kom mus tshajtawm Vajtswv Ntuj txojlus txhua nrho rau nej. 26 Txojlus ntawd yog ntsig txog qhov mixatawlis uas twb raug zais ntau tiam los thiab ntau txheej los lawm tabsis nimno raug nthuav rau Nws cov dawbhuv. 27 Vajtswv Ntuj tau xaiv cov ntawd mus qhia rau pejkum neeg paub tias dabtsi yog tus tshwjchim npluamias ntawm qhov mixatawlis no, uas yog Khetos hauv nej, txojkev ciasiab nrog tshwjchim.

28 Peb tshajtawm Khetos, nquahu txhua tus neeg thiab qhia txhua leej los ntawm txhua lub tswvyim, kom peb coj tau txhua leej neeg zoo tiavlog hauv Khetos. 29 Rau qhov no, kuv tau pluav tagzog raws li Nws lub zog uas ua haujlwm nrog hwjchim hauv kuv.

1 Kuv xav kom nej paub tias kuv pluav npaum li cas rau nej thiab cov nyob hauv Laudikeas thiab cov uas twb tsis tau pom dua kuv lub ntsejmuag sab nqaijtawv. 2 Kuv lub homphiaj yog kom lawv raug txhawb hauv nruab siab thiab lawv koomxeeb hauv kev hlub, es lawv thiaj txais txojkev totaub npluamias ntawd puvnpo thiab txojkev paub Vajtswv Ntuj qhov mixatawlis, xws li Khetos, 3 tus uas tej niag txhab tswvyim thiab kev paub tagnrho raug zais rau hauv. 4 Kuv hais li no kom nej leejtwg txhob raug ntxias mus yuamkev los ntawm tej lus plhaub tseeb. 5 Txawm kuv tsis nrog nej ntawm sab nqaijtawv, kuv nrog nej nyob sab ntsujplig. Kuv zoo siab thaum pom nej tuav rawv pausntsis thiab nyob ruajkhov ntawd txojkev ntseeg Khetos.

6 Yog li ntawd, ibyam li nej tau txais Yexus Khetos ua tus Tswv, uaneej hauv Nws li ntawd, 7 rhau cag thiab ncau ceg hauv Nws, khov zujzus hauv kev ntseeg li nej twb raug cob lawm, thiab huam loj zujzus saum kev nco txiajntsig.

8 Qhib muag saib, tsam nej qee tus raug ntxias los ntawm kev txawjntse thiab tej lus dag qhuav, uas txawm rau saum neeg tej kabke thiab tej ncej zeb hauv lub cejntug, tabsis tsis txawm rau saum Khetos.

9 Rauqhov hauv Khetos mas Vajtswv Ntuj tuskheej txawm puvnpo ntawm nqaijtawv, 10 thiab nej kuj nyob puvnpo hauv Nws. Nws yog lub taubhau rau txhua tus nomtswv thiab tswjchim. 11 Hauv Nws, nej kuj tau txiavtawv, tsis yog xuas tes txiav daim tawv nqaij, tabsis kev txiavtawv hauv Khetos, 12 xws li tau raug faus nrog Nws hauv kev rausdej thiab tau raug tsa sawv nrog Nws los ntawm kev ntseeg hauv Vajtswv Ntuj lub zog, thaum Vajtswv Ntuj tau tsa Khetos sawv rovlos ntawm cov tuag.

13 Nej twb tuag hauv kev txhaum thiab hauv kev tsis txiavtawv ntawm nej sab nqaijtawv, tabsis Vajtswv Ntuj tau txuas siav rau nej nrog Khetos, thaum Nws tau xuam peb tej kev txhaum tagnrho. 14 Nws tau dua daim ntawv teev nujnqi uas nias thiab nkaug peb rau saum tej kevcai, thiab Nws twb muab qhov ntawd ntsia rau saum khaublig. 15 Thiab tomqab txo tej nomtswv thiab tswjchim, Nws tau muab lawv rhuav tabmeeg lug, thiab tau kovyeej lawv hauv Khetos.

16 Yog li ntawd, txhob cia leejtwg txiavtxim rau nej vim kev noj thiab kev haus, kev ua koobtsheej, kev caiv hli xiab, lossis kev caiv hnub Xanpataus. 17 Tej ntawd tsuas yog duab ntxoo ntawm tej uas yuav los, tiamsis tus tseem yog Khetos. 18 Txhob cia leejtwg, cov uas nrhiav kev txo hwjchim dag thiab kev pehawm cov timtswv, txeeb nej qhov yeebkoob. Tej neeg li ntawd nyiam piav txog tej uas nws tau pom lawm thiab khav txog tej tsis muaj qabhau saum nws lub hlwb sab nqaijtawv. 19 Nws tsis txuas rau lub taubhau, lub uas txhawb tej qijtxha, txheem thiab tuav lub cev tagnrho uake, thiab yug lub cev kom lojhlob li Vajtswv Ntuj tsim.

20 Yog nej tau tuag nrog Khetos rau tej ncej zeb hauv lub cejntug, vim li cas nej tseem tso tuskheej rau lawv tswj ibyam li nej tseem uaneej hauv lub cejntug tias: 21 "Txhob tuav! Txhob saj! Txhob kov!"? 22 Tej kevcai no, thaum muab los siv, mas lawv yuav puas zujzus, vim lawv txawm rau saum neeg tej kabke thiab lus qhuabqhia. 23 Tej zaj lus li no, saib nraum daim plhaub kuj ntse ntsuav, txaus hwm, ntxim txo hwjchim thiab tswj taus lub cev, tabsis lawv tsis tsimtxiaj dabtsi rau kev tswj lub qhov vum ntawm nqaijtawv.

1 Yog li ntawd, yog nej tau sawv nrog Khetos, ces nrhiav tej nyob sab saud, qhov chaws uas Khetos zaum ntawm Vajtswv Ntuj sab xis. 2 Xav txog tej sab saud, txhob xav txog tej hauv ntiajteb. 3 Rauqhov nej tau tuag thiab nej txojsia twb raug ceev nrog Khetos rau hauv Vajtswv Ntuj lawm. 4 Thaum Khetos tus uas yog nej txojsia tshwm los, thaum ntawd nej yuav tshwm nrog Nws hauv tshwjchim thiab.

5 Yog li ntawd, tua tej uas yog testaw rau lub ntiajteb, xws li kev vuabtsuab, kev qias, kev ntshaw vwm ntsuav, kev phem, thiab kev xav tau luag tug. Tej no yog kev pe mlom. 6 Vim tej no Vajtswv Ntuj txojkev chim thiaj yuav los raug tej neeg tawvncauj. 7 Yav tag los nej kuj tau uaneej nrog tej ntawd thiab thaud nej tau nrhiav tej ntawd, 8 tabsis nimno nej yuavtsum tso tagnrho tej uas zoo li ntawd: Kev chim, kev npautaws, kev phem, kev xyav moo, kev hais lus dev ntawm nej lub ncauj. 9 Ibleeg txhob dag ibleeg, vim nej tau hle tus qub neeg nrog nws tej kev coj tawm hauv nej lawm 10 thiab tau hnav tus neeg tshiab, uas raug tsim tshiab rau kev paub, raws li tus tsim lub hwvxyeej. 11 Hauv Khetos tsis muaj leejtwg yog Kilis lossis Yudais, cov txiavtawv lossis cov tsis txiavtawv, neeg txawv tebchaws, neeg Xakuthes, qhev lossis ywjpheej; tabsis sawvdaws yog Khetos tug thiab Nws nyob hauv sawvdaws.

12 Yog li ntawd, ibyam li nej yog cov raug Vajtswv Ntuj xaiv, neeg dawbhuv thiab raug hlub, hnav kev hmovtshua saum kev tabncuab, kev siabdawb, kev txo hwjchim, kev coj tus, kev siabntev. 13 Ibleeg uv ibleeg thiab yog leejtwg tshuav nej nqi dabtsi, muab xuam rau nws. Ibyam li tus Tswv tau xuam rau nej, nej muab xuam nkaus li ntawd. 14 Ntxiv rau tej no, hnav kev hlub, uas vas sawvdaws ua kwvtij zoo kawgnkaus.

15 Thiab cia Khetos txojkev thajyeeb tswj nej tej siab, vim nej tau raug hu los ua ib lub cev hauv kev thajyeeb. Dhau ua cov neeg nco txiajntsig. 16 Cia Khetos txojlus nyob hauv nej npluamias; qhuabqhia los ntawm txhua lub tswvyim; ibleeg tawm tswvyim pab ibleeg; hu nkauj vajlugkub, nkauj ntseeg, thiab nkauj sab ntsujplig los ntawm vajhmoov hauv nej lub siab rau Vajtswv Ntuj. 17 Txhua yam uas nej ua, saum lus lossis saum haujlwm, ua txhua yam hauv tus Tswv Yexus lub npe, ua tsaug ntshis rau Vajtswv Ntuj los ntawm Tswv Yexus.

18 Cov pojniam, tso nej tuskheej rau tus txiv tswj, kom phim rau hauv tus Tswv.

19 Cov uas yog tus txiv, hlub nej cov pojniam thiab txhob ua nruj rau lawv.

20 Cov menyuam, mloog nej niamtxiv rau txhua yam, vim qhov no raug tus Tswv siab.

21 Cov uas yog txiv, txhob ua rau nej cov menyuam tusiab es lawv thiaj tsis puassiab.

22 Cov tubtxib, mloog nej cov tswv sab nqaijtawv rau txhua yam, tsis yog rau lub qhovmuag pom kom raug neeg siab xwb, tabsis hwm nej tus tswv hauv nruab nrog. 23 Nej ua dabtsi, ua puag nruab nrog yam li ua rau tus Tswv Yexus, tsis yam li rau neeg, 24 paub ntsoov tias nej yuav txais nyiaj qabnas ntawm tus Tswv ua nqizog. Nej samsim tiam tus Tswv Khetos. 25 Rauqhov tus tsis ncaj yuav rovqab txais txojkev tsis ncaj uas nws tau ua, thiab Vajtswv Ntuj tsis muaj kev xaiv ntsejmuag.

1 Nej cov uas yog tswv, muab kev ncaj thiab vajhuam sibtxig rau nej tej tubtxib, vim nej paub tias nej kuj muaj ib tug Tswv saum ntuj.

2 Nquagplias rau kev thov Vajtswv, txhob nkees saum kev thov Vajtswv thiab kev ua tsaug. 3 Thov rau peb thiab kom Vajtswv Ntuj yuav qhib roog rau peb qhia txojlus ntsig txog Khetos li mixatawlis, uas kuv raug khi nrog rau, 4 kom kuv yuav nthuav rau neeg pom li kuv cheemtsum qhia. 5 Uaneej ntse ntsuav nrog tej neeg sab nraud thiab xyeej zias lub sijhawm ua ntag. 6 Cia nej lolus tov vajhmoov nraim, pleev ntsev ntshis, thiab paub tias nej cheemtsum yuav teb ib tug neeg li cas.

7 Tikhikus yuav qhia nej txhua yam txog kuv. Nws yog ib tug kwvtij uas peb hlub, tus ncignum ncajncees thiab peb tus kwvluag rau ntawm tus Tswv. 8 Kuv tau xa nws tuaj cuag nej rau qhov no: Kom nej paub txog peb thiab nws yuav txhawb nej tej siab. 9 Kuv tau xa nws nrog Oneximus, tus kwvtij uas peb hlub thiab ncajncees, uas yog nej ib tug. Nkawv yuav qhia nej txog tej xwm ntawm no.

10 Alitakhus, tus kwvluag hauv tsev lojcuj no, xa kev nojqab nyobzoo rau nej, thiab Malakaus uas yog Npananpas tus npawg. (Nej twb hnov xov txog nws lawm. Yog nws tuaj, ces tostxais nws). 11 Thiab Yausuas, tus uas hu ua Yuxatus, kuj xa kev nojqab nyobzoo. Cov no yog neeg txiavtawv. Lawv xwb thiaj tseem yog cov koom haujlwm rau Vajtswv Ntuj lub tswvkuj nrog kuv thiab lawv tau dhau ua kev txhawbzog rau kuv. 12 Ephafas, nej ib tug kwvtij ntawd, xa kev nojqab nyobzoo rau nej. Nws yog Yexus Khetos tus tubtxib uas peem nraim rau nej saum kev thov Vajtswv, kom nej tsheej ua cov zoo kawgnkaus thiab puvnpo Vajtswv Ntuj tus dejsiab rau txhua yam. 13 Kuv ua timkhawv taus tias, nws tau khwv heev this nej, cov nyob Laudikeas thiab cov nyob Hailapolis. 14 Lukas, tus kws khomob uas peb hlub, thiab Demas nkawv kuj xa kev nojqab nyobzoo rau nej.

15 Nej ho xa kev nojqab nyobzoo rau cov kwvtij hauv Laudikeas thiab rau Nifas nrog rau pawgntseeg hauv nws tsev. 16 Nej ua li no: Thaum tsab ntawv no raug nyeem rau nej tag, nej ho coj mus nyeem rau pawgntseeg Laudikeas, thiab kom nej tau nyeem tsab uas sau rau cov Laudikeas.

17 Thiab nej hais rau Akhipus tias, "Saib txoj haujlwm uas koj tau txais ntawm tus Tswv, ua kom nws tiav."

18 Kuv, Paulus, xuas tes sau cov lus nojqab nyobzoo no. Nco ntsoov kuv txoj saw hlau. Vajhmoov nrog nej os.