1 Paulus, Vajtswv Ntuj tus tubtxib, Yexus Khetos tus timthawj raws txojkev ntseeg ntawm cov tau raug Vajtswv Ntuj xaiv thiab txojkev paub qhov tseeb ntawm kev hwm Vajtswv, 2 mus rau txojkev ciasiab rau txojsia ibtxhis, uas Vajtswv Ntuj, tus tsis dag, tau coglus uantej sijhawm raug tsim; 3 thiab Vajtswv Ntuj, thaum txog Nws lub sijhawm, tau nthuav Nws txojlus rau neeg pom saum lus qhuabqhia, uas Vajtswv Ntuj, peb tus Cawmseej, tau tsosiab rau kuv thiab tawmlus ntsees kom kuv qhia.

4 Xa rau Titus, tus tseem tub raws li txojkev ntseeg sawvdaws koom.

Vajhmoov thiab kev thajyeeb ntawm Txiv Vajtswv Ntuj thiab Yexus Khetos, peb tus Cawmseej rau koj.

5 Vim qhov vajhmoov no, kuv tau tso koj tseg hauv Keletes, kom koj kho tej haujlwm uas tsis tau tiav thiab tsa cov txwjlaug rau tej nroog ibyam li kuv tau taw rau koj. 6 Tus txwjlaug yog tus thuam tsis tau, tus txivneej rau ib tug pojniam, muaj tej menyuam ntseeg, tsis raug nkaug tias lawv yog neeg tsis xyuamxim lossis camthawj. 7 Rauqhov tus saibxyuas pawgntseeg cheemtsum yog tus thuam tsis tau. Ibyam li tus saib Vajtswv Ntuj vajtse, nws yuavtsum txhob coj raws nws siab, txhob chim sai, txhob quav cawv, txhob tsiv tsaim, txhob nrhiav kev tsam rau tuskheej, 8 tabsis nyiam qhua, nyiam kev zoo, txawj xav, ncajncees, dawbhuv, tswj tuskheej, 9 thiab tomsiab rau txojlus saum kev ntseeg raws li nws tau raug cob lawm, kom nws muaj peevxwm txhawb thiab txhwj tej neeg tawmtsam los ntawm tej lus qhuabqhia zoo.

10 Vim coob tus yog neeg camthawj, neeg ncauj puam suab khawv, thiab neeg dag-ntxias, tshwjxeeb yog cov txiavtawv. 11 Peb cheemtsum yuav txwv lawv, rauqhov lawv ua rau tej tsevneeg puastsuaj tagnrho thiab qhia tej uas tsis cheemtsum, xws li lawv ua txuj qhia kom tau nyiaj. 12 Ib tug hauv lawv cov cevlus tau hais txog lawv li no: “Cov Keletes ibtxwm dag, nyaum li tsiaj, plab loj, thiab tubnkeeg.”a 13 Qhov timkhawv no tseeb. Vim qhov laijthawj no, txhwj lawv tunrho kom lawv peemtsheej ua ib cov neeg zoo sab kev ntseeg 14 thiab txhob tuav rawv cov Yudais tej dabneeg lossis cov neeg uas tig tawm ntawm qhov tseeb. 15 Txhua yam yeej huv rau cov neeg huv, tabsis rau cov neeg tsuas thiab tsis ntseeg mas txhua yam qias. Lawv lub hlwb thiab kev totaub puavleej qias. 16 Lawv lees ua cov paub Vajtswv Ntuj, tabsis lawv tes haujlwm qhia tias lawv tsis lees Nws. Lawv yog cov ntxim ntxub, tawvncauj, thiab ceem tsis tau rau txhua txoj haujlwm zoo.

1 Tabsis rau koj, qhia tej uas thooj txojkev cobqhia zoo. 2 Cov txivneej laus yuavtsum ua cov feeb meej, txaus hwm, txawj xav, coj zoo saum kev ntseeg, kev hlub thiab kev siabntev.

3 Ibyam li ntawd, cov pojniam laus yuavtsum muaj coojpwm txaus hwm, txhob nkaug neeg, txhob qaug cawv ntau, thiab qhia tej kev zoo, 4 kom lawv txawj ntuas cov pojniam hluas ua cov hlub lawv tej txiv, hlub lawv tej menyuam, 5 txawj xav, dawbhuv, tu vajtse zoo, siv tau, nyob qab tswjhwm ntawm lawv tej txiv kom Vajtswv Ntuj txojlus txhob raug txobthuam.

6 Ibyam li ntawd, nquahu cov tub hluas kom txawj xav. 7 Saum txhua yam, cia koj tuskheej dhau ua tus qauv los ntawm tej haujlwm zoo. Saum kev qhuabqhia, qhia raws kev ncaj, raws li tsimnyog, 8 thiab raws tej lus zoo uas thuam tsis tau, kom tus tawmtsam koj yuav txajmuag thiab tsis muaj dabtsi hais phem txog peb.

9 Nquahu cov tubtxib kom nyob qab tswjhwm ntawm cov tswv saum txhua yam, ua cov raugsiab, txhob hais lus tawmtsam, 10 txhob qee tus tswv tug, tabsis muab haujlwm zoo los ua lawv povthawj tias lawv yog cov txaus ntseeg, kom lawv yuav nthuav Vajtswv Ntuj, peb tus Cawmseej, txojlus qhia saum txhua yam.

11 Vim Vajtswv Ntuj vajhmoov tau tshwm ua kev cawmdim rau txhua tus neeg, 12 mas nws qhia ntsees rau peb kom peb tso kev tsis hwm Vajtswv thiab tej kev ntshaw teejtug hauv lub cejntug tseg, tabsis kom peb uaneej txawj xav, ncajncees, thiab hwm Vajtswv hauv tiam no, 13 sijhawm peb tseem tos txoj koobhmoov kev ciasiab thiab tos hnub uas Vajtswv Ntuj tus loj kawgnkaus thiab peb tus Cawmseej, Yexus Khetos, lub tshwjchim yuav tshwm rau neeg pom. 14 Yexus Khetos tau muab tuskheej theej peb, kom Nws yuav txhiv peb tawm ntawm txhua yam kev tsis cojcai thiab ntxuav peb los ua ib haivneeg rau Nws tuskheej, haiv uas kubsiab lug ua haujlwm zoo.

15 Qhia txog tej no. Nquahu thiab txhwj sawvdaws tagnrho koj lub tswjchim. Txhob cia leejtwg saib koj qaij.

1 Ceebtoom rau lawv kom nyob qab tswjhwm ntawm cov thawj thiab cov muaj tswjchim, mloog nomtswv, ua neeg npaj ntshis mus ua txhua tes haujlwm zoo, 2 txhob txobthuam leejtwg, txhob nrog luag sibntaus, siabmos siabmuag, thiab nthuav kev cojtus nraim rau txhua tus neeg.

3 Rauqhov thaud peb kuj tau ua neeg tsis totaub, tsis mloog nomtswv, plaskev, ua qhev rau kev ntshaw thiab kev lomzem, coj kev phem thiab kev cibnyeej, ntxim ntxub thiab ibleeg ntxub ibleeg:

8 Zaj lus no txaus ntseeg. Kuv kuj xav kom koj qhia ruaj nrees txog tej no, kom cov uas twb ntseeg Vajtswv Ntuj lawm yuav tabmeeg zias rhawv tej haujlwm zoo. Tej no yog tej zoo thiab muaj nqis rau neeg.

9 Tabsis txav tawm ntawm tej kev sibxaub ruam ntsuav thiab neeg cajces thiab ntawm kev sibcav thiab kev sibceg txog Kevcai. Tej ntawd tsis muaj txiajntsig thiab tsis muaj qabhau. 10 Txhwj tus neeg cais pabpawg ib zaug thiab ntuas nws zaum ob, 11 vim koj twb paub tias hom neeg ntawd kheev ntxeev lus thiab ua txhaum. Nws yuav lob txim rau tuskheej.

12 Thaum kuv xa Atemas lossis Tikhikus tuaj txog, majnroos los cuag kuv rau Nikaupolis, rauqhov kuv twb txiavsiab so ntawd lub caij ntuj no. 13 Xa tus txiv lus Xenas thiab Apaulaus tawm mus saisai kom nkawv txhob raug tabkaum dabtsi. 14 Cob peb cov neeg mus rhawv tej haujlwm zoo kom lawv muaj nojhaus thiab txhob ua neeg testaw lugrug.

15 Txhua leej nrog kuv xa kev nojqab nyobzoo rau koj. Hais kev nojqab nyobzoo rau cov uas hlub peb saum kev ntseeg.

Vajhmoov nrog nej sawvdaws.