Mathais
Txojmoo zoo raws li
Mathais
Taw Qhia
Mathais, Tswv Yexus tus thwjtim, tau sau phau moo zoo no rau cov Yudas. Mathais tau sau txog Yexus kev yug, kev qhuabqhia, kev khomob, kev zamtxim, kev theejtxhoj, kev sawv hauv cov tuag rovlos, thiab kev cob tswjchim rau cov thwjtim (timthawj) mus qhia txojmoo zoo thoob ntiajteb. Nws tau ua timkhawv tias, Yexus tau tshwmsim los ua Vajntxwv (Mexiyas, Khetos) raws nraim li Vajtswv Ntuj tau hais tseg nramntej los ntawm Nws cov cevlus.
Tswv Yexus tau qhuabqhia txog Vajtswv Ntuj lub tswvkuj, uas yog qhov Vajtswv Ntuj los ua Vajntxwv hauv ntiajteb ibyam li saum ntuj (Mat 6:10). Vajtswv Ntuj kev tswj tsis thooj li neeg: Neeg tej vajntxwv tswj raws li lawv qhovmuag pom, tabsis Vajtswv Ntuj tshawb neeg lub siab (Luk 17:20-21); lawv siv tswjchim rau saum lawv tej pejxeem, tabsis Vajtswv Ntuj siv kev hlub, muab tuskheej los tiam thiab theej neeg (Mat 20:20-28).

1
Yexus Keebkwm
Luk 3:23-38; Luv 4:18-22; 1 Xwm 3:10-17
1 Phau ntawv ntsig txog keebtiv ntawm Yexus Khetos,a Daviv tus Tub, Anplahas tus Tub:
2 Anplahas tau yug Ixaj,
Ixaj tau yug Yakhauj,
Yakhauj tau yug Yudas thiab nws cov kwvtij,
3 Yudas tau yug Peles thiab
Xelas los ntawm Thamaj,
Peles tau yug Heloos,
Heloos tau yug Las,
4 Las tau yug Aminadas,
Aminadas tau yug Nasoos,
Nasoos tau yug Xalemoos,
5 Xalemoos tau yug Npau-am los ntawm Lahaj,
Npau-am tau yug Aunpes los ntawm Luv,
Aunpes tau yug Yexais,
6 Yexais tau yug Vajntxwv Daviv.

Daviv tau yug Xalumoos los ntawm Uliyas tus pojniam,
7 Xalumoos tau yug Lehaunpau-as,
Lehaunpau-as tau yug Anpiyas,
Anpiyas tau yug Axas,
8 Axas tau yug Yehausafaj,
Yehausafaj tau yug Yehaulas,
Yehaulas tau yug Uxiyas,
9 Uxiyas tau yug Yauthas,
Yauthas tau yug Aqhaj,
Aqhaj tau yug Qhexekias,
10 Qhexekias tau yug Manaxes,
Manaxes tau yug Amoos,
Amoos tau yug Yauxiyas,
11 Yauxiyas tau yug Yehauyakheesb
thiab nws cov kwvtij sijhawm
lawv raug ntes mus Npanpiloos.

12 Tomqab raug ntes mus Npanpiloos,
Yehauyakhees tau yug Seathiyees,
Seathiyees tau yug Xelunpanpees,
13 Xelunpanpees tau yug Anpius,
Anpius tau yug Eliakees,
Eliakees tau yug Axaus,
14 Axaus tau yug Xadaus,
Xadaus tau yug Akhis,
Akhis tau yug Elius,
15 Elius tau yug Eliaxas,
Eliaxas tau yug Mathaj,
Mathaj tau yug Yakhauj,
16 Yakhauj tau yug Yauxej
uas yog Malis tus txiv;
Malis tau yug Yexus,
tus raug hu ua Khetos.

17 Yog li ntawd, tagnrho cov tiam neeg txij Anplahas los rau Daviv yog kaum-plaub tiam, thiab txij Daviv los rau thaum lawv raug ntes mus Npanpiloos yog kaum-plaub tiam, thiab txij thaum lawv raug ntes mus Npanpiloos los rau Khetos yog kaum-plaub tiam.
Yexus Yug
18 Kev yug Yexus Khetos tau muaj li no: Tomqab Nws niam Malis tau raug qhaib rau Yauxej, tabsis uantej nkawv tau los uake, Malis tau xeebtub los ntawm tus Ntsujplig Dawbhuv. 19 Vim nws tus txiv yog neeg ncajncees thiab tsis xav rhuav Malis, Yauxej tau npaj tso nws tseg twjywm.
20 Tabsis thaum nws tseem xav tej no, tus Tswv ib tug timtswv tau tshwm rau nws nruab npausuav tias, “Yauxej, Daviv tus tub, txhob ntshai mus coj koj tus pojniam Malis los, vim tus raug xeeb hauv nws yog los ntawm tus Ntsujplig Dawbhuv. 21 Nws yuav yug ib tug tub, thiab koj yuav hu Nws lub npe ua Yexus, rauqhov Nws yuav cawm Nws haivneeg dim ntawm lawv tej kev txhaum.”
22 Txhua yam no tau tshwmsim kom tus Tswv lolus ntawm tus cevlus tiav, nqe hais tias,

23 “Saib, ib tug nkaujxwb yuav xeebtub hauv plab
thiab nws yuav yug ib tug tub,
thiab nws lub npe yuav raug hu ua Emanuees,”

uas txhais tias, “Vajtswv Ntuj nrog peb nyob.”
24 Thaum Yauxej sawv nruab dabntub los, nws tau ua raws li tus Tswv tus timtswv tau tawmlus, thiab nws tau coj nws tus pojniam los; 25 tabsis nws tsis tau nce txaj nrog Malis pw mus txog thaum nws tau yug tus metub. Thiab nws tau hu Nws lub npe ua Yexus.
2
Cov Tub Txawg Tuaj Nrhiav
1 Thaum Yexus yug hauv Npelehees, hauv Yudas, lub caij Helauj tau ua vajntxwv ntawd, cov tub txawgc sab hnubtuaj tau tuaj txog hauv Yeluxalees 2 thiab tau nug tias, “Tus uas tau yug los ua vajntxwv rau cov Yudais nyob qhovtwg? Rauqhov peb tau pom nws lub hnubqub sab hnubtuaj thiab peb tau tuaj pehawm nws.”
3 Hnov li ntawd, Vajntxwv Helauj nrog txhua leej hauv Yeluxalees tau poobsiab. 4 Helauj tau sau tagnrho cov povthawj hlob thiab cov xibfwb qhia Kevcai rau zejtsoom tuaj uake, thiab nws tau nug lawv ntxaws tias, “Khetos yuav yug qhovtwg?” 5 Ces lawv tau teb nws tias, “Hauv Npelehees, hauv Yudas, rauqhov tus cevlus twb sau li no:

6 ‘Thiab koj, Npelehees, tebchaws Yudas,
tsis lam me dua tej thawj Yudas,
rauqhov ib tug thawj yuav tawm hauv koj los;
Nws yuav coj kuv haivneeg Yixayees.’”

7 Ces thaum Helauj tau hu cov tub txawg los ntsiagto, nws tau nug lawv tseebtseeb txog lub sijhawm uas lub hnubqub tau tshwm. 8 Nws tau xa lawv mus rau Npelehees thiab hais tias, “Mus thiab nrhiav tus menyuam no tiagtiag. Thaum nrhiav pom lawm, nej tshabxo los rau kuv kom kuv ho mus pehawm nws thiab.”
9 Tomqab hnov vajntxwv tej lus lawm, lawv tau taugkev mus. Lub hnubqub uas lawv tau pom tim hnubtuaj ntawd tau coj lawv mus txog thiab tau los nres ncaj qhov chaw uas tus menyuam tau nyob. 10 Thaum pom lub hnubqub, lawv tau zoo siab tshajplaws li. 11 Nkag mus rau hauv tsev, lawv tau pom tus menyuam nrog Nws niam Malis, thiab lawv tau qhaucev thiab tau pe Nws. Qhib hlo lawv tej nas nyiaj, lawv tau muab khoom pub Nws, xws li kub, tshuaj tswqab, thiab roj mules. 12 Vim lawv tau raug ceebtoom nruab npausuav kom txhob mus rau ntawm Helauj, lawv thiaj tau taug lwm txojkev rovqab mus rau lawv tebchaws.
Khiav Mus Iziv
13 Tomqab lawv rovqab lawm, tus Tswv tus timtswv tau tshwm rau Yauxej nruab npausuav tias, “Sawv, coj tus menyuam thiab Nws niam, es khiav mus rau Iziv thiab nyob nrad txog thaum kuv qhia koj dua, vim Helauj samsim nrhiav tus menyuam, yuav tua Nws.”
14 Ces sawv tsees, Yauxej tau coj tus menyuam thiab Nws niam hmontuj thiab lawv tau rhais chaw mus rau Iziv. 15 Nws tau nyob nrad txog hnub Helauj tuag kom tus Tswv lolus tiav raws li tus cevlus tau hais tias, “Kuv tau hu kuv tus tub tawm nram Iziv los.”
16 Thaum Helauj pom tias nws tau raug cov tub txawg dag, nws tau chim heev. Nws tau txib neeg thiab nws tau tua txhua tus menyuam txij ob xyoos rovlos hauv Npelehees thiab thoob plaws cheebtsam ntawd, raws li lub caijnyoog uas nws tau nug cov tub txawg meej. 17 Ces tus cevlus Yelemis lolus tau tiav, nqe hais tias,

18 “Lub suab tau nrov hauv Lamas,
lub suab quaj thiab nyiav loj,
Laxees quaj nws tej menyuam,
nws tsis txais lus nplig siab,
vim lawv tsis muajsia tag lawm.”
Los Rau Naxalev
19 Tomqab Helauj tau tuag lawm, tus Tswv tus timtswv tau tshwm rau Yauxej nruab npausuav hauv Iziv 20 hais tias, “Sawv, coj tus menyuam thiab Nws niam, thiab mus rau tebchaws Yixayees, vim cov uas tau nrhiav Nws txojsia twb tuag lawm.”
21 Ces Yauxej tau sawv, coj tus menyuam thiab Nws niam, thiab tau los rau hauv tebchaws Yixayees. 22 Tabsis thaum hnov tias Akhelaus tau ua vajntxwv kav Yudas hloov nws txiv Helauj, Yauxej tau ntshai mus hauv lub xeev ntawd. Tomqab nws tau txais lus ceebtoom nruab npausuav, Yauxej tau mus rau cheebtsam Kalilais. 23 Thaum los txog, nws tau ua tsev hauv lub nroog hu ua Naxalev kom lolus ntawm cov cevlus tau tiav tias, “Nws yuav raug hu ua neeg Naxalev.”
3
Yauhas Npatitaus Npaj Txojkev
Mak 1:3-8; Luk 3:2-17
1 Nyob rau lub sijhawm ntawd, Yauhas tus rausdej tau los thiab tau qhuabqhia hauv mojsab qhua Yudas 2 hais tias, “Thimxav, rauqhov lub tswvkuj saum ntuj twb los ze lawm.” 3 Vim tus no yog tus uas tus cevlus Yaxayas lolus tau hais txog:

“Ib lub suab qw tom mojsab qhua tias,
‘Npaj tus Tswv txojkev,
ncaws Nws tej kev kom ncaj.’”

4 Tus Yauhas no tau hnav tsoos plaub ntxhuav thiab sia ib txojsiv tawv ntawm nws duav, hos nws tej zaubmov yog kooj thiab zib muv. 5 Ces zejtsoom hauv Yeluxalees thiab thoob plaws Yudas thiab tej cheebtsam ze tus dej Yuladees tau tuaj cuag nws, 6 thiab nws tau muab lawv rausdej hauv tus dej Yuladees thaum lawv lees lawv tej kev txhaum.
7 Tabsis thaum pom coob tus Falixais thiab Xadukais tuaj rausdej ntawm nws, Yauhas tau hais rau lawv tias, “Cov niag nab xya! Leejtwg tau ceebtoom rau nej kom khiav tawm ntawm txojkev chim uas samsim los? 8 Yog li ntawd, txi txiv kom phim kev thimxav 9 thiab txhob xav hauv tuskheej tias, ‘Peb muaj txiv Anplahas.’ Rauqhov kuv hais rau nej tias, Vajtswv Ntuj muaj peevxwm muab tej pobzeb no tsa ua Anplahas tej menyuam. 10 Rab taus twb rhais rau ntawm txhua tsob ntoo lub hauvpaus lawm, ces tsob uas tsis txi txiv zoo yuav raug ntov thiab muab pov rau hauv cubtawg.”
11 “Kuv muab nej raus hauv dej mus rau kev thimxav, tabsis tus uas los tomqab kuv muaj zog dua kuv thiab kuv tsis phim daws Nws txoj hlua khau. Nws yuav muab nej raus hauv tus Ntsujplig Dawbhuv thiab hluavtaws. 12 Rab ntxuam nyob ntawm Nws sab tes xis thiab Nws yuav ntxuaj lub tshav nplej thiab yuav coj Nws cov qoob mus rau hauv txhab, tabsis cov npluag Nws yuav muab hlawv hauv lub cubtawg.”
Yexus Tuaj Rausdej
Mak 1:9-11; Luk 3:21-22; Yhs 1:31-34
13 Thaum Yexus tau tawm pem Kalilais tuaj rau ntawm tus dej Yuladees kom Yauhas muab Nws rausdej, 14 mas Yauhas tau cheem Nws tias, “Kuv muaj kev cheemtsum kom koj muab kuv rausdej, cas koj ho tuaj ntawm kuv?”
15 Tabsis Yexus tau teb thiab hais rau nws tias, “Tso li no, rauqhov nws tsimnyog rau peb ua kom tiav kev ncajncees tagnrho.” Ces Yauhas tau tso Nws rausdej.
16 Rausdej tagnrho, Yexus tau tawm plaws hauv dej los. Nruab ntug tau qhib plho thiab Nws tau pom Vajtswv Ntuj tus Ntsujplig nqis li tus nquab dawb los rau saum Nws. 17 Ces muaj ib lub suab tau hais saum ntuj tuaj tias, “Tus no yog kuv tus Tub uas kuv hlub; kuv raug siab rau Nws.”
4
Yexus Txojkev Raug Simsiab
Mak 1:12-13; Luk 4:1-13
1 Ces tus Ntsujplig tau coj Yexus mus tom mojsab qhua kom raug ntxwgnyoog simsiab. 2 Tomqab tau yoo mov plaubcaug hnub thiab plaubcaug hmo, Yexus tau tshaib. 3 Tus simsiab tau los ze thiab hais rau Nws tias, “Yog koj yog Vajtswv Ntuj tus Tub, hais kom tej pobzeb no dhau ua mov.”
4 Tabsis Yexus tau teb tias, “Twb sau tseg tias, ‘Neeg yuav muajsia tsis vim mov xwb, tabsis vim txhua lolus uas tawm ntawm Vajtswv Ntuj lub ncauj los.’”
5 Ces ntxwgnyoog tau coj Nws mus hauv lub nroog dawbhuv thiab muab Nws sawv saum lub tuamtsev qhov siab tshaj, 6 thiab nws tau hais tias, “Yog koj yog Vajtswv Ntuj tus Tub, pov tuskheej rau hauv. Rauqhov twb sau tseg tias,

‘Nws yuav tawmlus rau Nws cov timtswv txog koj,
thiab lawv yuav xyab tes txais koj,
es koj yuav tsis tsoo koj txhais kotaw saum pobzeb.’”

7 Yexus tau hais rau nws tias, “Twb sau tseg dua tias, ‘Txhob sim tus Tswv, koj tus Vajtswv Ntuj.’”
8 Ntxwgnyoog tau rov coj Yexus mus saum ib lub roob siab thiab tau nthuav txhua lub tswvkuj hauv lub cejntug thiab lawv tej tshwjchim rau Nws pom, 9 thiab tau hais rau Nws tias, “Txhua yam no kuv yuav muab rau koj, yog koj pe kuv.”
10 Ces Yexus tau hais rau nws tias, “Khiav mus, Xatas. Rauqhov twb sau tseg tias, ‘Koj yuavtsum pe tus Tswv, koj tus Vajtswv Ntuj thiab tiam Nws xwb.’”
11 Ces ntxwgnyoog tau tso Yexus tseg thiab cov timtswv tau los thiab tau tu Nws.
Yexus Chiv Qhuabqhia
12 Tomqab Yexus hnov tias Yauhas tau raug ntes lawm, Nws tau rhais chaw mus rau Kalilais. 13 Nws tau tso Naxalev tseg thiab mus nyob hauv Kapenaus, ntawm ntug hiavtxwv cheebtsam Xenpuloos thiab Nathalis 14 kom tus cevlus Yaxayas lolus tiav, nqe hais tias,

15 “Av Xenpuloos thiab av Nathalis,
txojkev mus nram hiavtxwv ntawm ntug dej Yuladees,
pejkum neeg lub xeev Kalilais.
16 Haivneeg uas zaum hauv qhov tsausntuj
tau pom txojkev kajnrig;
thiab cov zaum ntawm kev tuag lub chaw thiab tus duab ntxoo,
kev kaj tau sawv rau lawv.”

17 Txij ntawd los Yexus tau chiv qhuabqhia thiab hais tias, “Thimxav, rauqhov lub tswvkuj saum ntuj twb los ze lawm.”
Yexus Hu Thawj Cov Thwjtim
Mak 1:16-20; Luk 5:2-11; Yhs 1:35-42
18 Sijhawm taugkev ntawm ntug Hiavtxwv Kalilais, Yexus tau pom ob tug kwvtij, Ximoos tus uas tau raug hu ua Petus thiab nws tus kwv Anres. Nkawv tau samsim pov moo rau hauv hiavtxwv, vim tias nkawv txeev yog neeg nrhiav ntses. 19 Ces Nws tau hais rau nkawv tias, “Los raws kuv, thiab kuv yuav tsa neb ua cov nrhiav neeg.” 20 Ces tso plhuav nkawv tej moo tamsis, nkawv tau caum Nws.
21 Tawm qhov ntawd mus tom ntej, Nws tau pom dua ob tug kwvtij, Xenpedais ob tug tub, unpaus thiab Yauhas, uas samsim daws moo hauv nkoj nrog nkawv txiv Xenpedais. Nws tau hu nkawv. 22 Ces tso plhuav nkawv txiv thiab lub nkoj tseg, nkawv tau caum Nws tamsis.
Yexus Kho Tej Mob
23 Yexus tau ncig mus thoob plaws Kalilais, qhia hauv lawv tej txoos sablaj, tshajtawm txojmoo zoo txog lub tswvkuj, thiab kho txhua tus mob thiab txhua tus nkeeg hauv Nws haivneeg. 24 Nws lub moo tau nrov mus thoob plaws tebchaws Xilias. Ces lawv tau coj tagnrho tej neeg uas muaj ntau yam mobnkeeg, tej ntoog mob, tej neeg raug dab, tej mob chualeeg, thiab tej tuag testaw tuaj cuag Nws thiab Nws tau kho lawv. 25 Mas ntau pab neeg hauv Kalilais, Dekapolis,a Yeluxalees, Yudas thiab ntawm dej Yuladees sab tid tau caum Nws.
5
Cov Tau Koobhmoov
Luk 6:20-23
1 Thaum pom tej pab neeg coobcoob, Yexus tau nce mus saum roob; thiab tomqab zaum lawm, Nws cov thwjtim tau los cuag Nws. 2 Ces Nws tau tsa ncauj thiab qhia lawv hais tias:
3 “Tau koobhmoov yog cov pluag sab ntsujplig,
rauqhov lub tswvkuj saum ntuj yog lawv tug.
4 Tau koobhmoov yog cov quajntsuag,
rauqhov lawv yuav raug nplig siab.
5 Tau koobhmoov yog cov cojtus,
rauqhov lawv yuav saws lub ntiajteb.
6 Tau koobhmoov yog cov tshaib thiab nqhis kev ncajncees,
rauqhov lawv yuav tsau npo.
7 Tau koobhmoov yog cov muaj kev tabncuab,
rauqhov lawv yuav raug tabncuab.
8 Tau koobhmoov yog cov siab dawb,
rauqhov lawv yuav pom Vajtswv Ntuj.
9 Tau koobhmoov yog cov tsim kev thajyeeb,
rauqhov lawv yuav raug hu ua Vajtswv Ntuj cov tub.
10 Tau koobhmoov yog cov raug tsimtxom vim kev ncajncees,
rauqhov lub tswvkuj saum ntuj yog lawv tug.
11 Tau koobhmoov yog nej thaum luag thuam, tsimtxom, thiab hais txhua lolus phem tsis tseeb nkaug nej vim kuv. 12 Zoo siab thiab txaussiab, rauqhov nej tej nqizog muaj ntau saum ntuj. Cov cevlus thaud tau raug tsimtxom uantej nej yam nkaus li no.”
Ntsev thiab Qhov Kaj
13 “Nej yog ntiajteb ntsev. Yog ntsev tsuag lawm, nws yov rov qab ntsev li cas? Nws tsis zoo rau dabtsi lawm, tshwj muab pov rau neeg tsuj xwb.
14 Nej yog lub cejntug qhov kaj. Lub nroog saum roob yuav tsis muaj dabtsi npog tau; 15 thiab leejtwg tsis taws lub teeb es ho muab thoob khwb, tabsis tsuas muab txawb saum tus ncej teeb kom nws ci rau txhua leej hauv tsev. 16 Ibyam li no, cia nej qhov kaj ci rau ntawm tej neeg xubntiag, kom lawv yov pom nej tej haujlwm zoo thiab yov qhuas nej Txiv saum ntuj.”
Kevcai Tiav
17 “Txhob xav tias kuv tau los rhuav Kevcai lossis cov cevlus; kuv tsis tau los rhuav tabsis los ua kom tiav. 18 Kuv hais tseeb rau nej, mus txog thaum lub ntuj thiab ntiajteb puastsuaj, tsis muaj ib tug ntawv lossis ib nyuag teev ntawm Kevcai yuav poob uantej txhua lo tiav. 19 Yog li ntawd, tus uas txo ib nqe meme ntawm tej Kevcai no thiab qhia lwm tus li ntawd yuav raug hu ua tus me tshajplaws hauv lub tswvkuj saum ntuj; tabsis tus uas ceev thiab qhia tej Kevcai no rau lwm tus yuav raug hu ua tus loj hauv lub tswvkuj saum ntuj. 20 Rauqhov kuv hais rau nej tias, tshwj nej kev ncajncees zoo tshaj cov xibfwb qhia Kevcai thiab cov Falixais, nej yeej yuav tsis tau nkag mus hauv lub tswvkuj saum ntuj.”
Kev Tua Neeg
Luk 12:58-59
21 “Nej tau hnov nqe lus qhia rau tej laus thaud tias, ‘Txhob tua neeg, thiab leejtwg tua neeg, tus ntawd yuav raug kev teemtxim.’ 22 Tabsis kuv hais rau nej tias, txhua tus uas chim rau nws tus kwvtij yuav raug kev teemtxim, thiab tus uas hais rau nws tus kwvtij tias ‘niag ruam’ yuav raug lub rooj Xuhenrisb teemtxim, thiab tus uas hais rau nws tus kwvtij tias ‘niag vwm’ yuav raug xa rau ntujtawg.”
23 “Yog li ntawd, yog koj nqa koj qhov khoom pub mus fij rau saum thaj thiab koj nco dheev tias koj ib tug kwvtij muaj dabtsi tawmtsam koj, 24 ces tso koj qhov khoom pub ze rau ntawm lub thaj thiab mus raugzoo nrog koj tus kwvtij tso, koj mam tuaj muab koj qhov khoom pub fij.”
25 “Majnroos tig zoo rau tus nrhiav plaub rau koj thaum koj tseem nrog nws taugkev, tsam nws yov muab koj cob rau tus txiavtxim thiab tus txiavtxim yov muab koj cob rau tus ceevxwm, ces koj yuav mag kaw hauv tsev lojcuj. 26 Kuv hais tseeb rau koj tias, koj yuav tsis tawm qhov ntawd mus txog thaum koj them lub txiaj npib kawg.”
Kev Deev Luag Poj
27 “Nej tau hnov nqe lus qhia tias, ‘Txhob deev luag poj luag txiv.’ 28 Tabsis kuv hais rau nej tias, txhua tus uas saib ib tug pojniam nrog txojkev ntshaw twb deev luag poj hauv nws lub siab lawm. 29 Ces yog koj lub qhovmuag sab xis dawm koj ntog, muab nws dawj povtseg. Rauqhov koj ib sab liamsim zoo dua li koj lub cev huvsi raug pov rau hauv ntujtawg. 30 Thiab yog koj sab tes xis ua rau koj ntog, muab nws txiav mus povtseg. Rauqhov koj ib ceg liamsim zoo dua li koj lub cev huvsi poob rau hauv ntujtawg.”
Kev Sibnrauj
31 “Muaj lus qhia tias, ‘Yog leejtwg nrauj nws pojniam, cia nws muab daim ntawv nrauj rau tus pojniam.’ 32 Tabsis kuv hais rau nej tias, tshwj tej kev vuabtsuab, tus uas nrauj nws tus pojniam ua rau tus pojniam ntawd deev hluas; thiab tus uas yuav tus pojnrauj kuj deev luag poj.”
Kev Twv
33 “Nej kuj tau hnov nqe lus qhia rau tej laus tias, ‘Txhob tso koj tej lus cogtseg twjywm, thiab koj yuavtsum muab rau tus Tswv raws li koj tej lus cogtseg.’ 34 Tabsis kuv hais rau nej tias, txhob twv hlo li; tsis hais rau lub ntuj vim nws yog Vajtswv Ntuj lub zwmtxwv; 35 tsis hais rau lub ntiajteb vim nws yog Vajtswv Ntuj lub rooj tiagtaw; tsis hais rau Yeluxalees vim nws yog tus vajntxwv loj lub nroog; 36 tsis hais koj yuav twv rau koj lub taubhau vim koj tsis muaj peevxwm ua kom ib txoj plaubhau dawb lossis dub. 37 Tabsis cia nej lolus tseeb ua tseeb, cuav ua cuav; hos lolus tshaj li ob lo no yog tawm ntawm ntxwgnyoog los.”
Qhovmuag Pauj Qhovmuag
38 “Nej tau hnov nqe lus qhia tias, ‘Qhovmuag pauj qhovmuag, hniav pauj hniav.’ 39 Tabsis kuv hais rau nej tias, txhob sawv pauj tus neeg phem. Tabsis leejtwg ntaus koj sab plhu xis, tig sab tod rau nws thiab; 40 hos rau tus xyuamphaj txeeb koj lub tsho tab, cev koj lub tsholoj rau thiab;* 41 hos rau tus uas quab koj mus ib ncua kev, nrog nws mus ob ncua. 42 Muab rau tus thov koj thiab txhob khiav tus xav qiv ntawm koj.”
Hlub Yeebncuab
43 “Nej tau hnov nqe lus qhia tias, ‘Hlub koj tus txheebze thiab ntxub koj tus yeebncuab.’ 44 Tabsis kuv hais rau nej, hlub nej cov yeebncuab thiab thov Vajtswv pab rau cov tsimtxom nej, 45 kom nej yuav dhau ua nej Txiv saum ntuj cov tub, vim tias Nws ua Nws lub hnub sawv tuaj rau cov neeg phem thiab zoo, thiab Nws tso nag los rau cov ncajncees thiab tsis ncajncees. 46 Rauqhov yog nej hlub cov uas hlub nej, nej tau nqizog dabtsi? Cov neeg sau se tsis ua li ntawd thiab lod? 47 Thiab yog nej tostxais nej tsoom kwvtij xwb, nej ua dabtsi zoo tshaj? Tej pejkum neeg tsis ua li ntawd thiab lod? 48 Yog li ntawd, nej yuavtsum ua cov zoo kawgnkaus yam li nej Txiv saum ntuj yog tus zoo kawgnkaus.”
6
Pab Cov Txomnyem
1 “Ceev nej kev ncajncees rau ntawm ntiag, txhob ua rau ntawm neeg xubntiag kom lawv pom; thiab yog nej ua li, nej yuav tsis tau nqizog ntawm nej Txiv saum ntuj.”
2 “Yog li ntawd, thaum koj ua kev tabncuab, txhob tshuab xyu ua koj ntej li cov neeg xyuam plhu ua hauv lub txoos sablaj thiab tom tej kev nqaim, kom lawv raug neeg qhuas. Tseeb tiag kuv hais rau nej, lawv tau txais lawv nqizog lawm. 3 Tabsis thaum koj ua kev tabncuab, txhob cia koj sab tes laug paub tias sab tes xis ua dabtsi, 4 kom koj kev tabncuab nyob rau lub chaw nraim, es koj Txiv tus uas pom hauv lub chaw nraim yuav muab nqizog rau koj.”
Kev Thov Vajtswv
Luk 11:2-4
5 “Thiab thaum nej thov Vajtswv, txhob ua li cov xyuam plhu, rauqhov lawv nyiam sawv thov Vajtswv hauv tej txoos sablaj thiab tom tej kev tshuam kom neeg pom lawv. Tseeb tiag kuv hais rau nej, lawv tau txais lawv nqizog lawm. 6 Tabsis thaum koj thov Vajtswv, mus rau hauv chav nraim thiab kaw qhovrooj rau, koj mam thov koj Txiv hauv lub chaw nraim. Ces koj Txiv tus uas pom hauv lub chaw nraim yuav muab nqizog rau koj.
7 Thaum nej thov Vajtswv, txhob hais rov hais rais li pejkum neeg, rauqhov lawv xav tias lawv hais lus ntau tus uas lawv thov thiaj hnov. 8 Yog li ntawd, txhob coj xws li lawv; rauqhov nej Txiv paub tej uas nej cheemtsum uantej nej taij ntawm Nws.”
9 “Yog li ntawd, nej thov Vajtswv li no:

‘Peb Txiv saum ntuj,
cia koj lub npe dawbhuv,
10 cia koj lub tswvkuj los,
cia koj tus dejsiab peemtsheej
hauv ntiajteb yam li nyob saum ntuj.
11 Muab zaubmov cawmsiav rau peb hnub no;
12 thiab zam peb tej nujnqi rau peb
ibyam li peb twb zam rau cov tshuav peb nqi;
13 thiab txhob coj peb mus rau kev simsiab,
tabsis cawm peb tawm ntawm tus phem.’”

14 “Rauqhov yog nej zam neeg tej kev txhaum rau lawv, nej Txiv saum ntuj yuav zam rau nej ibyam thiab; 15 tabsis yog nej tsis zam rau neeg, nej Txiv yuav tsis zam nej tej kev txhaum thiab.”
Kev Yoo Mov
16 “Thiab thaum nej yoo mov, txhob ua li cov xyuam plhu es ua ntsejmuag ntshaus ntsho, rauqhov lawv nthuav lawv ntsejmuag kom neeg pom tias lawv yoo mov. Tseeb tiag kuv hais rau nej, lawv tau txais lawv nqizog lawm. 17 Tabsis thaum koj yoo mov, pleev tshuaj rau taubhau thiab ntxuav muag, 18 kom neeg txhob pom tias koj yoo mov tabsis ua hauv lub chaw nraim rau koj Txiv. Ces koj Txiv tus uas pom hauv lub chaw nraim yuav muab nqizog rau koj.”
Khaws Nyiajtxiag Rau Saum Ntuj
Luk 11:34-36
19 “Txhob khaws nej tej nyiajtxiag rau tuskheej hauv ntiajteb, qhov chaw uas ntsaum thiab xeb yuav noj thiab tubsab yuav khawb thiab nyiag. 20 Tabsis khaws nej tej nyiajtxiag rau nej saum ntuj, qhov chaw uas ntsaum thiab xeb tsis noj thiab tubsab tsis khawb lossis nyiag. 21 Rauqhov koj tej nyiajtxiag nyob qhovtwg, koj lub siab nyob qhov ntawd thiab.”
22 “Lub qhovmuag yog lub teeb rau lub cev. Ces yog koj lub qhovmuag pom tseeb, tagnrho koj lub cev yuav kaj; 23 tabsis yog koj lub qhovmuag dig, tagnrho koj lub cev yuav tsaus. Yog li ntawd, yog qhov kaj hauv koj tsaus, qhov tsaus yuav tsaus npaum li cas!”
24 “Tsis muaj leejtwg muaj peevxwm tiam tau ob tug tswv; rauqhov nws yuav ntxub ib tug thiab hlub ib tug, lossis yuav txhawb ib tug thiab txo ib tug. Nej tsis muaj peevxwm tiam Vajtswv Ntuj thiab kev npluanuj.”
Txhob Txhawj
Luk 12:22-31
25 “Vim qhov no, kuv hais rau nej: Txhob txhawj txog nej txojsia tias yuav noj dabtsi lossis yuav haus dabtsi, lossis txhawj txog lub cev tias yuav muab dabtsi npua. Tsis yog txojsia tsimtxiaj tshaj pluas noj thiab lub cev tsimtxiaj tshaj tsoos hnav lod? 26 Saib tej noog saum nruab ntug tias lawv tsis tseb noob, tsis sau qoob, thiab tsis ntim qoob rau hauv txhab, los nej Txiv saum ntuj niaj hnub yug lawv. Nej tsis tsimtxiaj tshaj tej ntawd lod? 27 Nej leejtwg txhawj es ho muaj peevxwm txuas ib nyuag chim rau nws lub hnubnyoog?”
28 “Thiab txhawj txog tsoos hnav dabtsi? Kawm ntawm tej paj daj tom nras seb lawv tawg li cas: Lawv tsis khwv thiab tsis ua ntos. 29 Kuv hais rau nej tias, thaum Xalumoos tau hnav nws tej meejmom huvsi, nws twb tsis hnav zoo npaum ib lub paj ntawd. 30 Yog lub paj nroj tom nras, uas nyob hnub no thiab tagkis raug pov hauv cubtawg, tau hnav tsoos li no, Vajtswv Ntuj yuav tsis muab tsoos zoo tshaj rau nej lod? Cas nej kev ntseeg me ua luaj? 31 Yog li ntawd, txhob txhawj tias, peb yuav noj dabtsi? Yuav haus dabtsi? Lossis yuav npua dabtsi? 32 Vim tias tagnrho pejkum neeg nrhiav tej no thiab nej Txiv saum ntuj paub tias nej nrhiav txhua yam no. 33 Tabsis xub nrhiav Vajtswv Ntuj lub tswvkuj thiab Nws txojkev ncajncees, ces txhua yam no yuav raug muab ntxiv rau nej. 34 Yog li ntawd, txhob txhawj rau tagkis, vim tias tagkis yuav txhawj txog tagkis. Teebmeem hnub twg muaj txaus rau hnub ntawd.”
7
Kev Txiavtxim Rau Lwm Tus
Luk 6:41-42
1 “Txhob txiavtxim, kom nej tsis raug txiavtxim. 2 Rauqhov nej txiavtxim li cas, nej yuav raug txiavtxim li ntawd; thiab nej muab lub ntim twg luj, lub ntawd yuav raug muab luj rau nej.”
3 “Vim li cas koj pom qhov hmoov ntoo hauv koj tus kwvtij lub qhovmuag, tabsis yav ntoo hauv koj lub qhovmuag koj ho tsis ras txog? 4 Lossis ua cas koj hais rau koj tus kwvtij tias, ‘Cia kuv tshem qhov hmoov ntoo hauv koj qhovmuag,’ tabsis nimno ho muaj ib yav ntoo nyob hauv koj lub qhovmuag? 5 Cov niag xyuam plhu, xub lauj yav ntoo hauv koj qhovmuag tso, es thaum koj pomkev lawm, koj mam mus tshem qhov hmoov ntoo hauv koj tus kwvtij lub qhovmuag.”
6 “Txhob muab yam dawbhuv rau tej dev thiab txhob pov nej tej povhaum rau ntawm tej npua xubntiag, tsam lawv yov muab tsuj hauv kotaw thiab ho tig rovlos muab nej dua.”
Taij, Nrhiav, Khob
Luk 11:9-13
7 “Taij mas nej yuav tau txais, nrhiav mas nej yuav ntsib, khob mas qhovrooj yuav qhib rau nej. 8 Rauqhov txhua tus uas taij tau txais, txhua tus uas nrhiav tau ntsib, thiab qhovrooj tau qhib rau tus khob.”
9 “Lossis nej cov txivneej, yog nws tus tub taij movci, nws tsis lam muab pobzeb rau sav? 10 Lossis taij ntses, nws tsis lam muab nab rau pod? 11 Yog li ntawd, yog nej cov neeg phem paub muab khoom zoo rau nej tej menyuam, nej Txiv saum ntuj haj yam yuav muab tej zoo tshaj rau cov taij Nws. 12 Yog li ntawd, rau txhua txhia yam, nej xav kom tej neeg ua rau nej li cas, nej yuavtsum ua rau lawv li ntawd; rauqhov Kevcai thiab cov cevlus qhia txog qhov no.”
Roojvag Nqaim thiab Dav
13 “Nkag mus hauv lub roojvag nqaim. Rauqhov lub roojvag dav thiab txoj kev dav yog txoj coj mus rau kev puastsuaj, mas coob tus taug txojkev ntawd. 14 Lub roojvag nqaim thiab txojkev ti yog txoj coj mus rau txojsia, thiab tsawg leej mus pom txojkev ntawd.”
Cov Cevlus Tseeb thiab Cuav
15 “Ceevfaj cov cevlus cuav. Lawv hnav yaj tej tsoos los rau ntawm nej, tabsis lawv sab hauv yog hma nojnyoos. 16 Nej yuav paub lawv los ntawm lawv cov txiv. Luag tsis lam de ib ntwg txivhmab ntawm tsob pos tshauv lossis txiv ncuavpias ntawm ntoo pos los sav? 17 Li no, txhua tsob ntoo zoo txi cov txiv zoo tabsis tsob ntoo lwj yuav txi cov txiv phem. 18 Tsob ntoo zoo tsis muaj peevxwm txi cov txiv phem thiab tsob ntoo lwj tsis txi cov txiv zoo. 19 Txhua tsob ntoo uas tsis txi txiv zoo yuav raug ntov thiab muab pov rau hauv lub cubtawg. 20 Raws nraim li no, nej yuav paub lawv los ntawm lawv tej txiv.”
21 “Tsis yog txhua tus uas hu kuv tias, ‘Tus Tswv, tus Tswv,’ yuav nkag rau hauv lub tswvkuj saum ntuj, tsuas yog tus uas ua kuv Txiv saum ntuj tus dejsiab xwb. 22 Coob leej yuav hais rau kuv hnub ntawd tias, ‘Tus Tswv, tus Tswv, peb tsis tau cevlus ntsees saum koj lub npe, ntiab dab los ntawm koj lub npe, thiab ua txujci ntau yam los ntawm koj lub npe lod?’ 23 Ces thaum ntawd kuv yuav hais tib lo rau lawv li no tias, ‘Kuv tsis paub nej ib zaug li; khiav tawm ntawm kuv, cov niag neeg tsis cojcai!’”
Tus Ruam thiab Ntse Ua Tsev
Luk 6:47-49
24 “Yog li ntawd, txhua tus uas hnov kuv tej lus no thiab muab los coj yuav zoo li tus txivneej ntse, uas tau ua nws lub tsev rau saum zeb: 25 Nag tau poob ntaus, dej tau nyab thiab cua tau ntsawj thiab nplawm lub tsev ntawd, tabsis nws tsis vau vim nws tau cog rau saum zeb. 26 Hos tus uas hnov kuv tej lus no thiab tsis ua li yuav zoo li tus txivneej ruam, uas tau ua nws lub tsev rau saum xuabzeb: 27 Nag tau poob ntaus, dej tau nyab, thiab cua tau ntsawj thiab ntaus lub tsev ntawd; mas lub tsev tau vau thiab nws kev puasntsoog tau loj heev.”
28 Thaum Yexus xaus Nws tej lus no, pab neeg ntawd tau xav tsis thoob txog Nws zaj lus qhia,  29 rauqhov Nws tau qhia lawv yam tus muaj tswjchim thiab tsis yam li lawv tej xibfwb qhia Kevcai.
8
Kho Tus Mob Ruas
Mak 1:40-44; Luk 5:12-14
1 Ces thaum Nws nqis saum roob los, ntau pab neeg tau caum Nws. 2 Nimno ib tug mob ruas tau los qhaucev rau Nws thiab hais tias, “Tus Tswv, yog koj txaus siab, koj muaj peevxwm kho kuv kom huv.”
3 Cev tes mus tuav nws, Yexus tau hais tias, “Kuv txaussiab, zoo huvsi.” Ces tamsis ntawd nws tus ruas tau huv tibsi. 4 Yexus tau hais rau nws tias, “Txhob qhia rau leejtwg, tabsis mus qhia tuskheej rau ib tug povthawj thiab muab khoom pub mus fij li Mauxes tau teev tseg ua timkhawv txog tej no.”
Tus Thawj Tubrog Kev Ntseeg
Luk 7:1-10
5 Thaum Yexus nkag mus hauv Kapenaus, ib tug thawj tubrog pawgpua tau tuaj cuag Nws thiab tau thov Nws pab 6 tias, “Tus Tswv, kuv tus tubtxib pw tom tsev, testaw txhavc nrees thiab raug kev txomnyem txaus txhawj heev.”
7 Yexus tau hais rau nws tias, “Kuv yuav mus kho nws.”
8 Ces tus thawj tubrog pawgpua tau teb tias, “Tus Tswv, kuv tsis tsimnyog rau koj nkag mus hauvqab kuv lub ruv, tabsis hais ib lo xwb, ces kuv tus tubtxib yuav zoo. 9 Rauqhov kuv kuj yog tus neeg nyob qab tswjchim thiab muaj tubrog hauvqab kuv. Kuv hais rau tus no tias, ‘Mus,’ mas nws yeej mus, thiab hais rau tus tod tias, ‘Los,’ mas nws yeej los; thiab kuv hais rau kuv ib tug qhev tias, ‘Ua qhov no,’ mas nws yeej ua.”
10 Thaum hnov li no, Yexus tau xav tsis thoob thiab tau hais rau tej neeg caum Nws tias, “Kuv hais tseeb rau nej, kuv tsis tau ntsib ib tug txojkev ntseeg loj li no hauv Yixayees. 11 Thiab kuv hais rau nej tias, neeg coobcoob sab hnubtuaj thiab sab hnubpoob yuav tuaj thiab yuav zaum saum tsum nrog Anplahas, Ixaj thiab Yakhauj hauv lub tswvkuj saum ntuj, 12 tabsis tej tub hauv lub tswvkuj yuav raug muab pov rau qhov tsausntuj. Qhov ntawd yuav muaj kev quajntsuag thiab kev tom hniav qev.”
13 Ces Yexus tau hais rau tus thawj tubrog pawgpua tias, “Mus, cia nws tshwmsim rau koj li koj ntseeg.” Mas nws tus tubtxib tau zoo lub sijhawm ntawd.
Yexus Kho Petus Niam Tais
Mak 1:29-34; Luk 4:38-41
14 Thaum Yexus mus hauv Petus tsev, Nws tau pom Petus niam tais pw saum txaj thiab ua npaws ntxiag. 15 Ces Yexus tau tuav nws txhais tes thiab tus npaws tau tso nws tseg, mas nws tau sawv los tiam Yexus.
16 Thaum yav tsausntuj luag tau coj coob tus neeg raug dab tuaj cuag Nws thiab Nws tau hais lus ntiab tej dab thiab Nws tau kho txhua tus muaj mob, 17 kom tiav Yaxayas tus cevlus lolus uas hais tias:

“Nws tau sau peb tej mob
thiab Nws tau ris peb tej nkeeg.”
Tus Nqi Caum Yexus
Luk 9:57-60
18 Tabsis thaum Yexus pom pab neeg coobcoob nrog Nws, Nws tau hu cov thwjtim kom mus rau sab hiavtxwv tim ub. 19 Ces ib tug xibfwb qhia Kevcai tau los cuag Nws thiab hais tias, “Xibfwb, koj mus qhovtwg los kuv yuav caum koj.”
20 Yexus tau hais rau nws tias, “Hma muaj qhov thiab tej noog saum nruab ntug muaj zes, tabsis Neeg Leej Tub tsis muaj hauv ncoo rau Nws pw.”
21 Thiab Nws ib tug thwjtim tau hais rau Nws tias, “Tus Tswv, cia kuv xub mus faus kuv txiv tso.”
22 Tabsis Yexus tau teb nws tias, “Caum kuv mus thiab cia cov tuag mam faus lawv tej tuag.”
Yexus Txhwj Cua
Mat 14:22-33; Mak 4:36-41; Luk 8:22-25
23 Thaum Nws nce rau hauv nkoj, Nws cov thwjtim kuj tau caum Nws. 24 Mas nimno cua daj cua dub tau nplawm hiavtxwv qeeg nkaws, txog qhov tej dej ntas tau ntaus lub nkoj yuav tog. Tabsis Yexus tau tsaugzog lawm. 25 Lawv tau los cuag Nws thiab tau tsa Nws tias, “Tus Tswv, cawm peb os. Peb yuav puastsuaj laud!”
26 Mas Nws tau teb lawv tias, “Ua cas nej taiscaus thiab kev ntseeg me ua luaj?” Ces Nws tau txhwj cua thiab hiavtxwv, mas hiavtxwv tau thajyeeb ntsiagto. 27 Cov txivneej ntawd tau xav tsis thoob thiab hais tias, “Nws yog neeg dabtsi, rauqhov cua thiab hiavtxwv kuj mloog Nws?”
Kho Ob Tug Neeg Raug Dab
Mak 5:1-20; Luk 8:26-39
28 Thaum Nws mus txog rau cheebtsam Nkadalas, ob tug neeg raug dab tau tawm tom tojntxas los ntsib Nws. Nkawv tau nyaum heev txog qhov uas neeg yeej tsis tau muaj peevxwm taug txojkev ntawd. 29 Ces nkawv tau qw hais tias, “Muaj dabtsi ntawm peb thiab koj, Vajtswv Ntuj tus Tub? Cas koj tuaj ntawm no uantej lub caij tsimtxom peb?”
30 Nimno ib pab npua coobcoob tau samsim nrhiav noj ib nyuag ncua kev deb ntawd. 31 Ces cov dab tau taij Nws tias, “Yog koj ntiab peb, thov tso peb mus rau pab npua.”
32 Ces Nws tau hais rau lawv tias, “Mus!” Mas lawv tau tawm mus rau pab npua thiab pab npua tau khiav nroo ntws mus rau hauv hiavtxwv thiab tau poob dej tuag. 33 Thaum cov zov npua khiav mus txog hauv nroog, lawv tau tshajtawm txhua yam thiab qhia txog tej uas tau tshwmsim rau ob tug raug dab. 34 Ces tagnrho tej neeg hauv nroog tau tawm tuaj ntsib Yexus; thiab thaum lawv pom Nws, lawv tau taij kom Nws nqis tawm ntawm lawv lub tebchaws.
9
Kho Tus Tuag Testaw
Mak 2:1-12; Luk 5:17-26
1 Thaum nce rovqab rau hauv nkoj, Yexus tau hla los rau hauv Nws lub nroog. 2 Nimno lawv tau nqa ib tug neeg tuag testaw uas pw saum lav tuaj cuag Nws. Pom lawv txojkev ntseeg li ntawd, Yexus tau hais rau tus tuag testaw tias, “Ruaj siab nrees, menyuam. Koj tej kev txhaum raug zam lawm.”
3 Ibtxhia xibfwb qhia Kevcai tau hais hauv lawv nruab siab tias, “Nws tuammom Vajtswv Ntuj sas.”
4 Vim Yexus paub lawv tej kev xav, Nws tau hais tias, “Vim li cas nej thiaj xav phem hauv nej siab? 5 Dabtsi yog qhov yoojyim hais dua: ‘Koj tej kev txhaum raug zam’ lossis tias, ‘Sawv thiab muskev?’ 6 Tabsis kom nej yuav paub tias Neeg Leej Tub muaj tswjchim los zam txim hauv ntiajteb,” ces Nws tau hais rau tus tuag testaw tias, “Sawv, nqa koj lub lav, thiab taugkev mus tom koj lub tsev.” 7 Ces sawv tsees, nws tau mus tsev. 8 Pom li no, tej neeg coobcoob ntawd tau ntshai thiab tau qhuas Vajtswv Ntuj tus uas tau muab tswjchim li no rau neeg.
Hu Mathais
Mak 2:13-17; Luk 5:27-32
9 Tomqab tawm qhov ntawd mus, Yexus tau pom ib tug txivneej zaum ntawm lub rooj se, uas hu ua Mathais, thiab Nws tau hais rau nws tias, “Caum kuv qab.” Ces sawv tsees, nws tau caum Yexus.
10 Thaum Yexus zaum rau ntawm tsum mov hauv tsev, coob tus neeg sau se thiab neeg txhaum tau tuaj zaum rau saum lub tsum mov nrog Nws thiab Nws cov thwjtim. 11 Pom li no, cov Falixais tau hais rau Nws cov thwjtim tias, “Vim li cas nej tus xibfwb noj mov nrog tej neeg sau se thiab neeg txhaum?”
12 Hnov li ntawd, Yexus tau teb tias, “Cov neeg zoo neej tsis muaj kev cheemtsum mus cuag kws khomob tabsis cov neeg mob muaj. 13 Mus kawm qhov no seb yog li cas: ‘Kuv xav tau kev tabncuab tsis yog tus tsiaj fij.’ Vim tias kuv tsis tau los hu cov ncajncees tabsis cov txhaum.”
Hais Txog Kev Yoo Mov
Mak 2:18-22; Luk 5:33-39
14 Thaum Yauhas cov thwjtim tuaj cuag Yexus, lawv tau nug tias, “Vim li cas peb thiab cov Falixais txeev yoo mov tabsis koj cov thwjtim tsis yoo mov li?”
15 Yexus tau teb lawv tias, “Tus nraug vauv tej phoojywg tsis muaj peevxwm quajntsuag thaum tus nraug vauv tseem nrog lawv nyob, tabsis lub caij yuav los txog thaum tus nraug vauv yuav raug coj ntawm lawv mus. Thaum ntawd lawv yuav yoo mov.”
16 “Leejtwg tsis xaws daim ntaub tshiab rau lub qub tsholoj, rauqhov nws yuav txoom thiab rub lub tsholoj, mas qhov ntuag ntawd hajyam yuav ntuag loj. 17 Thiab leejtwg tsis hliv cawv tshiab rau tej hnab tawv qub, tsis li mas tej hnab tawv qub yuav ntuag, cov cawv yuav si thiab tej hnab tawv yuav piam. Tabsis nws yuav hliv cawv tshiab rau lub hnab tawv tshiab kom ob qho yuav tsis nkim tibsi.”
Tus Ntxhais Tuag thiab Tus Pojniam Mob
Mak 5:21-43; Luk 8:40-56
18 Sijhawm Yexus samsim hais tej no rau lawv, ib tug thawjcoj tau tuaj pe Nws thiab hais tias, “Kuv tus ntxhais nyuam qhuav tuag, tabsis yog koj mus thiab tsa tes rau saum nws, mas nws yuav muajsia.” 19 Ces Yexus thiab Nws cov thwjtim tau sawv raws nws mus.
20 Nimno ib tug pojniam, uas lub cev tau ntas kaum-ob xyoos tsis tu, tau txiv tomqab tuaj thiab tau tuav kiag Yexus lub tw tsholoj, 21 rauqhov nws tau hais rau tuskheej tias, “Yog kuv tuav Nws lub tsholoj xwb, kuv yuav dim.”
22 Yexus tau tig loo thiab thaum pom nws, Yexus tau hais tias, “Ruaj siab, mentxhais, koj kev ntseeg twb cawm koj dim lawm.” Mas tus pojniam ntawd tau dim lub sijhawm ntawd.
23 Thaum Yexus los txog ntawm tus thawjcoj lub tsev thiab pom cov tshuab raj thiab tej neeg coobcoob ua vigvoog, 24 Nws tau hais tias, “Tawm mus, vim tus ntxhais tsis tau tuag tabsis nws tsaugzog xwb.” Ces lawv tau luag Nws. 25 Tomqab ntiab tej neeg coobcoob tawm lawm, Yexus tau nkag mus tuav nkaus tus ntxhais txhais tes, thiab tus ntxhais tau ciaj rovlos. 26 Ces zaj no tau nrov mus thoob plaws cheebtsam ntawd.
Kho Tus Digmuag thiab Hais Tsis Taus Lus
27 Sijhawm Yexus tawm qhov ntawd mus, ob tug digmuag tau caum Nws thiab qw hais tias, “Tabncuab wb os, Daviv tus Tub.”
28 Tomqab nkag rau hauv ib lub tsev lawd, ob tug digmuag tau los cuag Nws. Yexus tau hais rau nkawv tias, “Neb ntseeg tias kuv muaj peevxwm ua qhov no lod?”
Nkawv tau teb Nws tias, “Yog, tus Tswv.”
29 Ces Nws tau tuav nkawv qhovmuag thiab hais tias, “Cia nws tshwmsim rau neb raws li neb kev ntseeg.” 30 Nkawv qhovmuag tau pomkev. Yexus tau ceebtoom nrujnruj rau nkawv tias, “Saib tib zoo, txhob pub leejtwg paub.” 31 Tabsis thaum nkawv tawm mus, nkawv tau tshajtawm txog Nws thoob plaws lub tebchaws ntawd.
32 Tomqab nkawv tawm lawm, lawv tau coj ib tug txivneej ruam raug dab tuaj rau Nws. 33 Thaum tus dab raug ntiab tawm, tus ruam tau hais lus. Tej neeg coobcoob ntawd tau xav tsis thoob thiab lawv tau hais tias, “Tsis tau pom dabtsi tshwmsim li no hauv Yixayees.”
34 Tabsis cov Falixais tau hais tias, “Nws ntiab dab los ntawm tus thawj dab lub npe.”
Cov Ua Haujlwm Tsawg
Mak 6:6
35 Yexus tau ncig mus rau tej nroog thiab tej zos txhua nrho, qhuabqhia hauv lawv tej txoos sablaj thiab tshajtawm txojmoo zoo txog lub tswvkuj thiab kho txhua tus mob thiab txhua tus nkeeg. 36 Thaum Nws pom tej neeg coobcoob, Nws tau mobsiab lawv vim tias lawv tau ntxhov hauv hnyo thiab qaugzog zis yam li tej yaj tsis muaj tswv. 37 Ces Nws tau hais rau Nws cov thwjtim tias, “Thaj qoob siav ntau heev, tabsis cov ua haujlwm muaj tsawg. 38 Yog li ntawd, taij tus tswv qoob kom nws txib cov ua haujlwm mus rau hauv nws thaj qoob.”
10
Yexus Xa Pab Kaum-Ob Leeg
Mak 6:7-13,16-19; Luk 9:1-6; 10:4-12
1 Ces thaum hu Nws kaum-ob tug thwjtim los, Yexus tau muab tswjchim yeej tej ntsujplig qias rau lawv, kom lawv mus ntiab tej ntsujplig qias thiab kho txhua hom mob thiab txhua hom nkeeg.
2 Kaum-ob tug timthawj tej npe yog li no: Thawj tug yog Ximoos tus raug hu ua Petus thiab nws tus kwv Anres, unpaus uas yog Xenpedais tus tub thiab nws tus kwv Yauhas, 3 Filiv thiab Npathaulaumais, Thaumas thiab Mathais tus sau se, unpaus uas yog Alafais tus tub thiab Thadeus, 4 Ximoos tus neeg Kananais thiab Yudas Ikhalaus, tus tau ntxeevsiab rau Yexus.
5 Yexus tau xa kaum-ob tug no mus thiab tau tawmcai rau lawv tias, “Nej txhob taug txojkev mus rau pejkum neeg thiab txhob nkag mus hauv cov Xamalis ib lub nroog li; 6 tabsis mus rau cov yaj ploj hauv tsevneeg Yixayees. 7 Thaum nej mus ntawd, tshajtawm tias, ‘Lub tswvkuj saum ntuj twb los ze lawm.’ 8 Kho tej mob, tsa tej tuag, ntxuav tej mob ruas kom huv, thiab ntiab tej dab tawm. Nej tau dawb los, ces muab dawbdawb. 9 Txhob sia kub, nyiaj, lossis tooj dag rau ntawm nej txojsiv; 10 txhob nqa hnab thooj, ob lub tsho, khau khiab, lossis cwj rig; rauqhov tus uas ua haujlwm yeej tsimnyog tau nws cov zaubmov.”
11 “Yog nej nkag mus hauv ib lub nroog lossis zos, nug seb leejtwg tsimnyog thiab nyob qhov ntawd mus txog thaum nej tawm. 12 Thaum nej nkag mus hauv ib lub tsev, hais kev thajyeeb rau yim ntawd. 13 Mas yog tsevneeg tsimnyog, cia nej kev thajyeeb los rau yim ntawd; tabsis yog nws tsis tsimnyog, cia nej kev thajyeeb tig rovlos rau nej. 14 Yog leejtwg tsis txais nej lossis mloog nej tej lus, thaum nej tawm ntawm lub tsev lossis lub nroog ntawd mus, nchos tej hmoov av ntawm nej kotaw. 15 Kuv hais tseeb rau nej tias, nws yuav nyiaj taus hauv tebchaws Xaudoos thiab Nkaumaulas dua li hauv lub nroog ntawd rau hnub txiavtxim.”
16 “Nimno kuv xa nej yam li tej yaj mus hauv pab hma. Yog li ntawd, ua cov ntse li nab thiab dawbhuv li nquab. 17 Ceev tuskheej tawm ntawm tej neeg, rauqhov lawv yuav muab nej ntes mus rau lub rooj Xuhenris thiab lawv yuav nplawm nej hauv lawv tej txoos sablaj. 18 Lawv yuav coj nej mus rau cov kavxeev thiab tej vajntxwv, mus ua timkhawv txog kuv rau lawv thiab rau pejkum neeg. 19 Tabsis thaum lawv ntes nej, txhob txhawj tias nej yuav hais li cas lossis yuav hais dabtsi, rauqhov yam uas nej yuav hais lub sijhawm ntawd yuav raug muab rau nej, 20 vim tias nej tsis yog cov hais, tabsis nej Txiv tus Ntsujplig yog tus hais hauv nej.”
21 “Mas kwvtij yuav ntes kwvtij mus rau kev tuag thiab txiv yuav ntes tub, menyuam yuav sawv tawmtsam niamtxiv thiab muab lawv tua. 22 Nej yuav raug sawvdaws ntxub vim kuv lub npe, tabsis tus tiv mus txog qhov kawg yuav dim. 23 Thaum lawv tsimtxom nej hauv lub nroog no, khiav mus rau lub nroog tod. Kuv hais tseeb rau nej tias, Neeg Leej Tub yuav los uantej nej ncig txhua tej nroog hauv Yixayees.”
24 “Tus thwjtim tsis loj dua tus xibfwb thiab tus qhev tsis loj dua nws tus tswv. 25 Tus thwjtim zoo txaus yog nws zoo li nws tus xibfwb thiab tus qhev zoo li nws tus tswv. Yog lawv tau hu tus tswv tsev ua Npexenpus, lawv yuav tuammom cov neeg hauv nws lub tsev heev npaum cas!”
26 “Yog li ntawd, txhob ntshai lawv. Rauqhov tsis muaj ib yam raug vov lawm uas yuav tsis muab qhib, thiab tsis muaj ib yam raug zais lawm uas yuav tsis muab nthuav rau neeg paub. 27 Tej uas kuv qhia rau nej hauv qhov tsausntuj muab hais tawm rau qhov pomkev, thiab tej lus ntxhi nej pobntseg hnov muab tshajtawm saum ruv tsev. 28 Txhob ntshai cov tua tau lub cev tabsis tsis muaj peevxwm tua nej tuskheej;a ntshai tus muaj peevxwm ua kom tuskheej thiab lub cev liamsim hauv ntujtawg heev dua. 29 Tsis yog ob tug noog tsev nyuam qhuav muag ib npib liab lod? Tabsis ib tug noog tsev yuav tsis poob rau pem teb uas nej Txiv tsis paub. 30 Thiab nej txhua txoj plaubhau saum taubhau los raug suav tibsi lawm. 31 Yog li ntawd, txhob ntshai. Nej tsimtxiaj dua tej noog tsev ntawd npaum li cas!”
32 “Yog li ntawd, leejtwg lees kuv ntawm neeg xubntiag, kuv yuav lees nws ntawm kuv Txiv saum ntuj lub xubntiag thiab; 33 tabsis leejtwg tsis lees kuv ntawm neeg xubntiag, kuv kuj yuav tsis lees nws ntawm kuv Txiv saum ntuj lub xubntiag ibyam.”
34 “Txhob xav tias kuv coj kev thajyeeb los rau ntiajteb; kuv tsis tau coj kev thajyeeb tabsis coj ntaj. 35 Kuv tau los cais
‘Tus tub tawm ntawm nws txiv,
tus ntxhais tawm ntawm nws niam,
tus nyab tawm ntawm nws niam pog.
36 Tabsis tus tub cov yeebncuab yuav dhau ua nws tsevneeg.’”
37 “Tus uas hlub nws niam lossis nws txiv tshaj kuv tsis tsimnyog ua kuv tug, thiab tus uas hlub nws tus tub lossis nws tus ntxhais dua kuv tsis tsimnyog ua kuv tug; 38 thiab tus tsis kwv nws tus khaublig thiab caum kuv qab nws tsis tsimnyog ua kuv tug. 39 Tus uas nrhiav tau nws txojsia haj yuav plam txojsia ntawd, thiab tus uas plam nws txojsia vim kuv haj yuav nrhiav tau txojsia ntawd.”
40 “Tus uas txais nej kuj txais kuv, thiab tus uas txais kuv kuj txais tus uas tau xa kuv los. 41 Tus uas txais tus cevlus los ntawm tus cevlus lub npe kuj txais tus cevlus ntawd lub nqizog, thiab tus uas txais tus neeg ncajncees los ntawm tus ncajncees lub npe kuj yuav txais tus ncajncees lub nqizog. 42 Tus muab ib khob dej txiag rau tej menyuam neeg los ntawm kuv tus thwjtim lub npe xwb, los kuv hais tseeb rau nej tias, nws yeej yuav tsis plam nws lub nqizog li.”
11
Yexus thiab Yauhas Npatitaus
Luk 7:18-35
1 Tomqab Yexus tawmcai rau Nws cov thwjtim kaum-ob leeg tag, Nws tau nqis qhov ntawd mus qhuabqhia thiab tshajtawm rau hauv lawv tej nroog.
2 Nimno thaum Yauhas hnov hauv tsev lojcuj txog Khetos tej haujlwm, nws tau xa lus rau Yexus los ntawm nws cov thwjtim 3 tias, “Koj puas yog tus uas yuav los ntawd lossis peb yuav tos dua lwm tus?”
4 Yexus tau teb thiab hais rau lawv tias, “Nej mus, ces tshabxo rau Yauhas txog tej uas nej hnov thiab pom: 5 Cov digmuag pomkev thiab cov tuag testaw muskev, cov mob ruas tau huv, cov lagntseg hnov lus, cov tuag raug tsa sawv thiab cov pluag hnov txojmoo zoo. 6 Tau koobhmoov yog tus uas tsis dawm kuv ntog.”
7 Thaum lawv tawm mus lawd, Yexus tau pib hais txog Yauhas rau pab neeg coobcoob tias, “Nej tau tawm mus saib dabtsi tom mojsab qhua? Tus tauj raug cua ntsawj lod? 8 Tabsis nej tau tawm mus pom dabtsi? Ib tug txivneej hnav tsoos ntauglees lod? Nimno cov neeg hnav tsoos ntauglees nyob hauv tej vajntxwv tej loog. 9 Tabsis nej tau tawm mus pom dabtsi? Tus cevlus lod? Yog, kuv hais rau nej tias, ib tug loj dua tus cevlus. 10 Nws yog tus uas twb sau tseg txog tias:

‘Saib mas, kuv xa kuv tus tubtxib uantej koj,
nws yuav kho koj txojkev ntawm koj hauv ntej.’”

11 “Kuv hais tseeb rau nej tias, tsis tau muaj ib tug neeg yug ntawm pojniam uas loj dua Yauhas Npatitaus, tabsis tus uas me dua hauv lub tswvkuj saum ntuj tseem loj dua Yauhas. 12 Txij thaum Yauhas Npatitaus los txog tamsis no, lub tswvkuj saum ntuj raug kev nruj kev tsiv thiab tej neeg nrujtsiv tau muab nws khi. 13 Rauqhov txhua tus cevlus thiab Kevcai tau cevlus los txog rau Yauhas. 14 Thiab yog nej kam txais, nws yog Eliyas tus samsim los. 15 Cia tus uas muaj pobntseg hnov.”
16 “Kuv yuav muab tiam neeg no piv rau dabtsi ne? Nws zoo li tej menyuam nram kiab uas samsim hu rau lwm tus 17 tias:

‘Peb tshuab raj lomzem rau nej,
los nej tsis seev cev,
thiab peb hu nkauj ntsuag,
los nej tsis quaj.’”

18 “Rauqhov Yauhas tau los, nws tsis noj thiab tsis haus, mas lawv hais tias, ‘Nws muaj dab.’ 19 Neeg Leej Tub tau los, Nws noj thiab haus, mas lawv hais tias, ‘Saib mas, niag neeg noj tsau haus qaug, neeg sau se thiab neeg txhaum li phoojywg.’ Tabsis tswvyim yuav raug xam ua tus ncaj los ntawm nws tej haujlwm.”
Tsawm Tej Nroog Tsis Thimxav
Luk 10:13-15
20 Ces Yexus tau tsawm tej nroog uas Nws tau nthuav Nws tej hwjchim feem ntau rau, vim lawv tsis tau thimxav. 21 “Vijnpog rau koj, Khaulaxis! Vijnpog rau koj, Npexaidas! Rauqhov yog tej hwjchim uas tau ua hauv nej ntawd tau raug ua rau hauv Tiles thiab Xidoos,b lawv kuj yov thimxav mus npua hnabtsaj thiab muab tshauv nphoo taubhau ntev lawm. 22 Kuv hais meej rau nej tias, hnub txiavtxim mas hauv Tiles thiab Xidoos yuav tiv taus dua hauv nej. 23 Thiab rau koj, Kapenaus! Koj tsis lam tsa tuskheej nto ntuj pod? Koj yuav raug txo mus ti tub tuag teb. Rauqhov yog tej hwjchim uas tau ua hauv koj ntawd raug ua hauv Xaudoos, nws yov nyob los txog hnub no. 24 Kuv hais meej rau koj tias, hnub txiavtxim mas av Xaudoos yuav tiv taus dua hauv koj.”
Chaw So Rau Cov Qaugzog
Luk 10:21-22
25 Lub sijhawm ntawd, Yexus tau teb Leej Txiv tias, “Kuv qhuas koj, Txiv, tus Tswv lub ntuj thiab lub teb, rauqhov koj tau muab tej no zais ntawm tej neeg muaj tswvyim thiab kev totaub, tabsis koj tau muab nthuav rau tej menyuam yau. 26 Yog mas Txiv, rauqhov nws raug koj siab ua li no.”
27 “Kuv Txiv tau muab txhua yam rau kuv, thiab tsis muaj ib tug twg paub Leej Tub tshwj Leej Txiv, thiab tsis muaj leejtwg paub Leej Txiv tshwj Leej Tub thiab tus uas Leej Tub xav muab nthuav tshwjxeeb rau.”
28 “Los cuag kuv, tagnrho nej cov qaugzog zis thiab ris nra hnyav. Kuv yuav cia nej so. 29 Ris kuv tus quab thiab kawm ntawm kuv, rauqhov kuv coj tus thiab coj tog hauv nruab siab, thiab nej yuav tau so nej tuskheej, 30 vim kuv tus quab yoojyim thiab kuv lub nra sibsib.”
12
Tus Tswv Hnub Xanpataus
Mak 2:23-28; 3:1-6; Luk 6:1-11
1 Lub caij ntawd, Yexus sij tau taugkev hnub Xanpataus phua hauv tej teb. Ces Nws cov thwjtim tau tshaib thiab lawv tau pib de tej nplejc los noj. 2 Pom li ntawd, cov Falixais tau hais rau Nws tias, “Saib mas, koj cov thwjtim ua tej uas tsis raugcai ua hnub Xanpataus.”
3 Ces Nws tau teb lawv tias, “Nej tsis tau nyeem txog zaj uas Daviv tau ua thaum nws thiab cov uas nrog nws ntawd tau tshaib, 4 es nws tau mus hauv Vajtswv Ntuj lub tsev thiab tau noj cov movci raug fij uas yeej tsis raugcai rau nws thiab cov uas nrog nws ntawd noj, tshwj rau cov povthawj xwb lod? 5 Lossis nej tsis tau nyeem hauv Kevcai tias hnub Xanpataus cov povthawj hauv tuamtsev tau txhaum txojcai Xanpataus, tabsis lawv tsis raug xam tias muaj txim lod? 6 Kuv hais rau nej tias tus loj dua lub tuamtsev nyob ntawm no. 7 Thiab yog nej paub nqe ‘Kuv xav tau kev tabncuab tsis yog tus tsiaj fij’ txhais li cas, nej yov tsis nkaug cov tsis muaj txim. 8 Rauqhov Neeg Leej Tub yog tus tswv hnub Xanpataus.”
9 Nqis qhov ntawd mus, Yexus tau los hauv lawv ib lub txoos sablaj. 10 Nimno ib tug txivneej hauv lub txoos tau muaj sab tes qhuav, ces lawv tau nug Nws tias, “Puas raugcai kho mob hnub Xanpataus?” kom lawv yov muab Nws ua luam nqis hav.
11 Ces Nws tau hais rau lawv tias, “Nej leejtwg yuav ua tus uas muaj ib tug yaj, thiab yog tus yaj ntawd poob rau ib lub qhov hnub Xanpataus, nws yuav tsis mus muab thiab nqa tawm? 12 Yog li ntawd, neeg tsimtxiaj tshaj tus yaj. Vim qhov no, nws raugcai ua zoo rau hnub Xanpataus.”
13 Ces Yexus tau hais rau tus txivneej tias, “Xyab koj txhais tes.” Nws tau xyab hlo thiab nws txhais tes tau zoo li txhais tod. 14 Cov Falixais tau tawm mus thiab tau npaj tswvyim tawmtsam Nws, kom lawv yov ua rau Nws puastsuaj.
Vajtswv Ntuj Tus Tubtxib
15 Thaum Yexus paub li ntawd, Nws tau tawm qhov ntawd mus. Tej neeg coobcoob tau caum Nws thiab Nws tau kho lawv txhua tus 16 thiab Nws tau txhwj lawv kom lawv txhob qhia txog Nws, 17 kom tiav li tus cevlus Yaxayas lolus uas hais tias:

18 “Saib mas, kuv tus tubtxib uas kuv xaiv,
tus kuv hlub thiab kuv tuskheej raugsiab rau;
kuv yuav muab kuv tus Ntsujplig rau Nws
thiab Nws yuav tshajtawm kev txiavtxim rau pejkum neeg.
19 Nws yuav tsis cav thiab tsis qw,
tsis muaj leejtwg yuav hnov Nws lub suab ntawm tej kev.
20 Tus tauj lov Nws tsis muab txiav,
thiab tus teebxeeb tuag plig Nws yuav tsis tua,
mus txog thaum Nws siv kev ncajncees ntaus yeej,
21 thiab pejkum neeg yuav ciasiab rau Nws lub npe.”
Yexus thiab Npexenpus
Mak 3:23-27; Luk 11:17-22
22 Ces lawv tau coj ib tug txivneej raug dab, uas digmuag thiab ruam, tuaj cuag Yexus, mas Yexus tau kho nws zoo. Tus ruam ntawd tau hais lus thiab tau pomkev. 23 Tagnrho tej neeg coobcoob ntawd tau xav tsis thoob thiab lawv tau hais tias, “Nws tsis lam yog Daviv tus Tub pod?”
24 Tabsis cov Falixais tau hnov thiab hais tias, “Nws tsis ntiab dab, tshwj los ntawm tus thawj dab Npexenpus.”
25 Yexus tau paub lawv tej kev xav thiab Nws tau hais rau lawv tias, “Txhua lub tswvkuj uas tawg yeej dhau ua mojsab, thiab txhua lub nroog lossis lub cuabyig uas tawg yuav tsis sawv ntseg. 26 Mas yog Xatas ntiab Xatas, ces nws tawg lawm. Yog li ntawd, nws lub tswvkuj yuav ua li cas sawv ntseg? 27 Nimno yog kuv ntiab tej dab ntawm Npexenpus lub npe, nej tej tub ho ntiab los ntawm leejtwg? Vim qhov no, lawv yuav ua cov txiavtxim rau nej. 28 Tabsis yog kuv ntiab tej dab los ntawm Vajtswv Ntuj tus Ntsujplig, ces Vajtswv Ntuj lub tswvkuj tau los txog nej lawm.”
29 “Leejtwg yuav ua li cas muaj peevxwm mus hauv ib tug neeg muaj zog lub tsev thiab nyiag nws lub cuabtam, yog nws tsis xub muab tus neeg muaj zog ntawd khi tso? Ces tomqab ntawd nws mam mus tshawb tsev.”
30 “Tus uas tsis nrog kuv yog tus tawmtsam kuv, thiab tus uas tsis txoos rau ntawm kuv yuav tawg risua. 31 Yog li no, kuv hais rau nej tias, txhua txojkev txhaum thiab kev tuammom yuav raug zam rau neeg, tabsis kev tuammom tus Ntsujplig Dawbhuv yuav tsis raug zam. 32 Leejtwg hais lus tawmtsam Neeg Leej Tub, lo ntawd yuav raug zam rau nws; tabsis tus hais lus tawmtsam tus Ntsujplig Dawbhuv, lo ntawd yuav tsis raug zam rau nws tiam no lossis tiam yuav los.”
33 “Cog tsob ntoo zoo ces nws cov txiv zoo, hos cog tsob ntoo lwj ces nws cov txiv lwj, rauqhov luag paub tsob ntoo los ntawm cov txiv. 34 Cov niag nab xya, nej yeej yog tsav phem, es nej yov ua cas muaj peevxwm hais lus zoo? Rauqhov lub ncauj hais tawm tej uas puvnkaus hauv lub siab. 35 Tus neeg zoo nqa yam zoo tawm hauv lub txhab ntim khoom zoo, thiab tus neeg phem nqa yam phem tawm hauv lub txhab ntim khoom phem. 36 Kuv hais rau nej tias, hnub txiavtxim txhua leej yuav tau los teb lawv txhua lolus tsis xyuamxim uas lawv tau hais. 37 Vim tias koj yuav raug xam dawbhuv los ntawm koj tej lus lossis koj yuav raug teemtxim los ntawm koj tej lus.”
Yaunas Lub Cim
Luk 11:24-32
38 Ces qee tus xibfwb qhia Kevcai thiab Falixais tau teb thiab hais tias, “Xibfwb, peb xav pom ib lub cim ntawm koj.”
39 Yexus tau teb lawv tias, “Tiam neeg phem thiab ua plees ua yi no nrhiav ib lub cim tabsis lub cim twg los yuav tsis muab, tshwj tus cevlus Yaunas lub cim xwb. 40 Yaunas tau nyob hauv ntses lub plab peb hnub peb hmos li cas, Neeg Leej Tub yuav nyob hauv nruab av peb hnub peb hmos li ntawd. 41 Cov txivneej hauv Nineves yuav sawv nrog tiam no ntawm rooj txiavtxim thiab nkaug tiam no, rauqhov lawv tau thimxav los ntawm Yaunas zaj lus qhuabqhia. Thiab nimno tus loj dua Yaunas nyob ntawd no. 42 Tus pojvaj nram qab teb yuav raug tsa sawv nrog tiam no ntawm rooj txiavtxim, vim nws tau tawm puag ntuj kawg tuaj mloog Xalumoos lub tswvyim. Thiab nimno tus loj dua Xalumoos nyob ntawd no.”
43 “Thaum tus ntsujplig qias tawm hauv ib tug neeg, nws mus nrhiav qhov chaw so thoob plaws tej chaw seem, mas nws nrhiav tsis tau ib qho li. 44 Ces nws hais tias, ‘Kuv yuav rovmus rau lub tsev uas kuv tau tawm los.’ Thiab thaum los txog, nws pom lub tsev khoom, cheb dudais thiab tu dulug. 45 Ces nws tawm mus thiab coj xya tus ntsujplig uas nyaum dua nws nrog nws uake thiab lawv nkag los txumchaw rau hauv tsev. Yav kawg ntawm tus neeg no yuav phem dua yav nram ntej. Nws yuav zoo li ntawd rau tiam neeg phem no ntag.”
Yexus Niam thiab Cov Kwv
Mak 3:31-35; Luk 8:19-21
46 Lub tsamthawj Yexus samsim hais lus rau pab neeg ntawd, Nws niam thiab cov kwv tau tuaj sawv sab nraud thiab nrhiav kev ntsib Nws. 47 Ib tug neeg tau hais rau Nws tias, “Saib mas, koj niam thiab koj cov kwv tau tuaj sawv sab nraud thiab nrhiav kev los nrog koj tham.”
48 Tabsis Yexus tau teb thiab hais rau nws tias, “Leejtwg yog kuv niam thiab leejtwg yog kuv cov kwv?” 49 Taw tes rau Nws cov thwjtim, Yexus tau hais tias, “Saib mas, kuv niam thiab kuv cov kwv. 50 Rauqhov leejtwg ua kuv Txiv saum ntuj tus dejsiab, nws yog kuv kwv, kuv muam thiab kuv niam.”
13
Zaj Luspiv Txog Tus Tseb Noob
Mak 4:1-20; Luk 8:4-15
1 Hnub ntawd, thaum Yexus tawm hauv tsev mus, Nws tau mus zaum ntawm ntug hiavtxwv. 2 Ces ntau pab neeg tau sibsau rau ntawm Nws. Nws tau nce mus zaum hauv ib lub nkoj thiab tagnrho pab neeg ntawd tau sawv tim ntug. 3 Nws tau qhia ntau zaj luspiv tias: “Saib mas, ib tug tub qoob mus tseb noob. 4 Thaum nws samsim tseb noob, ib lub tau poob rau saum kev thiab tej noog saum nruab ntug tau muab noj lawm. 5 Qee lub tau poob rau qhov av tsawg saum zeb, thiab lawv tau nthaw kaus tamsis. Vim lawv tsis muaj av tob, 6 hnub tau tuaj ziab thiab lawv raug tshav kub; thiab vim lawv tsis muaj cag, lawv tau tuag. 7 Qee lub tau poob rau qhov av muaj pos, thiab tej pos tau loj hlob thiab tau laum lawv tuag. 8 Qee lub tau poob rau saum qhov av zoo thiab lawv tau txi, tej lub ib puas, tej lub raucaum thiab tej lub pebcaug npaug. 9 Cia tus uas muaj pobntseg hnov.”
10 Nws cov thwjtim tau los thiab hais rau Nws tias, “Vim li cas koj hais luspiv rau lawv?”
11 Nws tau teb thiab hais rau lawv tias, “Vim tias, qhov mixatawlis ntawm lub tswvkuj saum ntuj tau muab rau nej, tabsis nws tsis tau muab rau lawv. 12 Rauqhov rau tus muaj, mas luag yuav muab ntxiv kom nws muaj puvnpo; tabsis rau tus tsis muaj, yam nws muaj haj yuav raug muab rho ntawm nws. 13 Vim li no, kuv thiaj hais luspiv rau lawv:

‘Rauqhov saib ntsoov lawv yuav tsis pom
thiab mloog ntsoov lawv yuav tsis hnov thiab tsis totaub.’

14 “Mas Yaxayas nqe cevlus twb tiav rau lawv:

‘Hnov ntsoov, nej hnov tabsis tsis totaub,
thiab saib ntsoov, nej pom tabsis tsis paub.
15 Vim tias haivneeg no lub siab tau raug ua kom tawv,
lawv pobntseg raug ua kom txhob hnov tseeb,
thiab lawv tej qhovmuag raug kaw;
tsam lawv yov pom ntawm qhovmuag
thiab yov hnov ntawm pobntseg,
thiab lub siab yov totaub,
ces lawv yov tig los thiab kuv yuav kho lawv zoo mob.’”

16 “Tabsis nej tej qhovmuag tau koobhmoov vim lawv pom, thiab nej tej pobntseg tau koobhmoov vim lawv hnov. 17 Rauqhov kuv hais rau nej tseeb tias, coob tus cevlus thiab neeg ncajncees tau ntshaw kom pom tej uas nej pom tabsis lawv tsis tau pom, thiab kom hnov tej uas nej hnov tabsis lawv tsis tau hnov.”
18 “Yog li ntawd, mloog zaj luspiv txog tus tseb noob. 19 Txhua tus uas hnov txojlus txog lub tswvkuj thiab tsis totaub, ces tus phem los thiab txeeb txojlus uas raug tseb rau hauv nws lub siab lawm. Nws yog lub noob tseb rau saum kev. 20 Hos lub tseb rau saum pobzeb ntawd, nws yog tus uas hnov dheev txojlus thiab txais txojlus nrog kev zoosiab, 21 tabsis nws tsis muaj cag hauv tuskheej, mas txojlus nyob ib vuag xwb. Thaum kev txomnyem thiab kev tsimtxom tshwmsim vim txojlus, ces nws poob tamsis. 22 Hos lub tseb rau ntawm cov pos ntawd, nws yog tus uas hnov txojlus tabsis kev txhawjxeeb hauv lub neej thiab kev dag ntawm kev npluanuj los laum txojlus thiab nws tsis txi txiv. 23 Tabsis lub tseb rau qhov av zoo ntawd, nws yog tus hnov txojlus thiab totaub, ces nws txi txiv tiag. Ib lub txi ib puas, ib lub txi raucaum, thiab ib lub txi pebcaug npaug.”
Zaj Luspiv Txog Nyom
24 Nws tau qhia dua ib zaj luspiv tias, “Lub tswvkuj saum ntuj zoo li ib tug txivneej uas tau tseb noob qoob zoo rau hauv nws daim teb. 25 Tabsis thaum neeg tsaugzog lawm, nws tus yeebncuab tau tuaj thiab tau tseb nyom xyaw nws cov qoob thiab tau khiav lawm. 26 Tomqab nws nthaw kaus tuaj, nws tau txhawv, tabsis cov nyom tau tshwm tuaj thiab.”
27 “Ces tus tswvteb cov tubtxib tau los thiab hais rau nws tias, ‘Tus tswv, koj tsis tau tseb noob qoob zoo rau hauv teb xwb lod? Yog li ntawd, ho muaj nyom qhovtwg los?’”
28 “Nws teb lawv tias, ‘Tus yeebncuab tau ua qhov no.’”
“Mas nws cov tubtxib nug nws tias, ‘Yog li ntawd, koj puas xav kom thaum peb mus, peb ho dob cov nyom?’”
29 “Tabsis nws hais tias, ‘Txhob ua li, tsam thaum nej dob cov nyom ntawd nej ho rho cov qoob nrog thiab. 30 Cia ob cov no hlob uake mus txog caij sau qoob. Lub caij sau qoob ntawd kuv yuav hais rau cov hlais qoob tias, ‘Xub hlais cov nyom thiab muab pav ua tej pob mus hlawv, tabsis sau cov qoob mus rau hauv kuv lub txhab.’”
Zaj Luspiv Txog Lub Noob Zaub thiab Poov Xab
Mak 4:30-32; Luk 13:18-21
31 Nws tau teeb dua ib zaj luspiv rau lawv tias, “Lub tswvkuj saum ntuj zoo li lub noob zaub ntsuab uas ib tug txivneej tau muab mus cog rau hauv nws daim teb. 32 Nws yog lub noob me dua lwm lub huvsi, tabsis thaum nws nthaw kaus tuaj, nws tau loj dua tej zaub hauv vaj thiab tau dhau ua ib tsob ntoo. Ces tej noog saum ntuj tau los thiab tau ua zes rau saum nws tej ceg.”
33 Nws tau hais dua ib zaj luspiv rau lawv: “Lub tswvkuj saum ntuj zoo li poov xab, uas ib tug pojniam tau muab tov rau peb thoob hmoov mog mus txog thaum nws qab thoob plaws.”
34 Yexus tau hais tej no ua luspiv rau tej neeg coobcoob, thiab dhau ntawm tej luspiv no Nws tsis tau qhia lawv dabtsi, 35 kom tus cevlus lolus tiav, nqe hais tias:

“Kuv yuav qhib kuv lub qhovncauj hais luspiv,
kuv yuav hais tej twb raug zais thaum tsim lub cejntug los.”
Txhais Zaj Luspiv Txog Nyom
36 Ces thaum Nws ncaim tej neeg coobcoob ntawd, Nws tau los rau hauv tsev. Nws cov thwjtim tau los cuag Nws thiab hais tias, “Txhais zaj luspiv txog cov nyom hauv teb rau peb.”
37 Teb ntsees rau lawv, Nws tau hais tias, “Tus tseb noob qoob yog Neeg Leej Tub. 38 Daim teb yog lub cejntug, hos tej noob qoob zoo yog cov menyuam hauv lub tswvkuj thiab tej nyom yog cov menyuam ntawm tus phem. 39 Tus yeebncuab uas tseb noob nyom yog ntxwgnyoog. Lub caij sau qoob yog lub sijhawm kawg, thiab cov sau qoob yog cov timtswv.”
40 “Yog li ntawd, yam nkaus li tej nyom raug sau thiab muab pov rau hauv lub cubtawg, thaum kawg tiam no yuav zoo li ntawd thiab. 41 Neeg Leej Tub yuav xa Nws cov timtswv thiab lawv yuav sau tagnrho tej kev dawm ntog thiab tej neeg tsis cojcai tawm hauv Nws lub tswvkuj, 42 thiab muab pov rau hauv lub cubtawg. Hauv qhov ntawd yuav muaj kev quaj thiab tom hniav qev. 43 Ces cov neeg ncajncees yuav ci ntsa iab yam li lub hnub hauv lawv Txiv lub tswvkuj. Cia tus uas muaj pobntseg hnov.”
Zaj Luspiv Txog Nyiajtxiag Raug Zais thiab Povhaum
44 “Lub tswvkuj saum ntuj piv li cov nyiajtxiag raug zais hauv daim teb, uas ib tug txivneej tau pom thiab tau muab zais dua. Ces nws tau tawm mus nrog kev zoo siab thiab nws tau muag txhua yam uas nws muaj thiab tau mus yuav daim teb ntawd.”
45 “Ntxiv ntawd, lub tswvkuj saum ntuj piv li ib tug tubluam uas nrhiav tej povhaum. 46 Thaum nws pom ib lub povhaum muajnqis heev, nws tau mus thiab muag txhua yam uas nws muaj thiab nws tau mus yuav lus povhaum ntawd.”
Zaj Luspiv Txog Lub Moo
47 “Ntxiv ntawd, lub tswvkuj saum ntuj piv li lub moo uas raug muab pov rau hauv hiavtxwv thiab nws tau mag txhua hom ntses uake, 48 thiab thaum puv lawm, nws raug muab rub rau tim nqhuab. Luag tau zaum tsaws thiab tau xaiv cov zoo rau hauv thoob, tabsis cov liam luag muab povtseg. 49 Thaum kawg tiam no yuav zoo li ntawd. Cov timtswv yuav tawm mus thiab muab cov neeg phem cais tawm ntawm cov ncajncees, 50 thiab cov phem yuav raug muab pov rau hauv lub cubtawg. Hauv qhov ntawd yuav muaj kev quaj thiab tom hniav qev.”
51 “Nej twb khaws tau tej no lawm lod?”
Lawv tau teb Nws tias, “Khaws tau lawm.”
52 Yexus tau hais rau lawv tias, “Yog li no, txhua tus tub txawg uas raug cob txog lub tswvkuj saum ntuj mas zoo li tus tswvtsev, uas thau tej nyiaj qub thiab tshiab tawm hauv nws lub nas nyiaj los.”
Tus Cevlus Tsis Raug Hwm
Mak 6:1-6
53 Tomqab Yexus tau xaus tej luspiv no, Nws tau tawm qhov ntawd. 54 Nws tau los hauv Nws lub qub tebchaws thiab tau qhuabqhia hauv lawv lub txoos sablaj. Lawv tau xav tsis thoob thiab hais tias, “Lub tswvyim thiab tej hwjchim no Nws tau qhovtwg los? 55 Nws tsis yog yawg kws ntoo tus tub lod? Nws niam tsis hu ua Malis thiab Nws cov kwv tsis yog unpaus, Yauxej, Ximoos thiab Yudas lod? 56 Thiab Nws cov muam tagnrho tsis nrog peb nyob lod? Tej no Nws tau txais qhovtwg los?” 57 Lawv tau ntog saum Nws. Ces Yexus tau hais rau lawv tias, “Tus cevlus tsis raug hwm, tshwjxeeb hauv nws lub tebchaws thiab nws lub tsev.” 58 Ces Nws tsis tau ua hwjchim ntau qhov ntawd vim lawv kev tsis ntseeg.
14
Yauhas Npatitaus Raug Tua
Mak 6:14-29
1 Sijhawm ntawd Helauj, tus kav ib-feem-plaub, tau hnov txog Yexus lub moo, 2 ces nws tau hais rau nws cov tubtxib tias, “Tus no yog Yauhas Npatitaus. Nws raug tsa sawv ntawm cov tuag lawm ntag! Vim li ntawd tej hwjchim no thiaj tshwm hauv nws.”
3 Rauqhov Helauj tau ntes Yauhas, muab nws khi thiab muab kaw vim Helaudias, uas yog nws tus kwv Filiv tus pojniam. 4 Yauhas tau txhwj nws tias, “Nws tsis raugcai rau koj yuav nws.” 5 Txawm nws xav muab Yauhas tua, nws tau ntshai zejtsoom vim lawv tau hwm nws li tus cevlus.
6 Thaum txog Helauj hnub yug, Helaudias tus ntxhais tau seevcev hauv lawv xubntiag thiab tau ua rau Helauj raugsiab heev. 7 Helauj tau coglus twvntxhias tias nws xav tau dabtsi los Helauj yuav muab. 8 Tabsis vim nws twb raug nws niam cob lawm, tus ntxhais tau hais tias “Muab Yauhas Npatitaus lub taubhau rau saum phaj los rau kuv ntawm no.”
9 Ces txawm vajntxwv tau ntxhov siab los, vim nws kev twv thiab vim tej qhua saum tsum mov, nws tau tawmlus kom muab. 10 Nws tau xa tubrog mus txiav Yauhas taubhau hauv tsev lojcuj. 11 Luag tau nqa nws lub taubhau saum lub phaj los rau tus ntxhais thiab nws tau nqa mus rau nws niam. 12 Ces Yauhas cov thwjtim tau tuaj thiab nqa nws lub cev mus faus. Tomqab ntawd lawv tau tuaj tshabxo rau Yexus.
Yug Tsib Txhiab Leej
Mak 6:32-44; Luk 9:10-17; Yhs 6:1-13
13 Hnov li no, Yexus tau tawm qhov ntawd ibleeg hauv nkoj mus rau ib qhov yajsab. Tej neeg coobcoob tau hnov li ntawd thiab lawv tau tawm hauv tej nroog, taug ntug dej tuaj caum Nws. 14 Thaum tawm hauv nkoj los, Nws tau pom pab neeg coobcoob mas Nws tau tabncuab lawv thiab tau kho lawv tej mob.
15 Yav yuav tsaus ntuj,a Nws cov thwjtim tau los rau ntawm Nws thiab hais tias, “Qhov no yog yajsab thiab nws lig lawm, tso tej neeg coobcoob mus kom lawv ho mus hauv tej zos thiab muas zaubmov rau lawv noj.”
16 Tabsis Yexus tau teb lawv tias, “Lawv tsis cheemtsum mus; nej muab rau lawv noj.”
17 Lawv tau hais rau Nws tias, “Peb tsis muaj dabtsi ntawm no, tshuav tsib lub movci thiab ob tug ntses xwb.”
18 Ces Nws tau hais tias, “Nqa los rau kuv ntawm no.” 19 Nws tau tawmlus kom lawv zaum rau saum cov nyom, thiab tomqab txais tsib lub movci thiab ob tug ntses lawd, Nws tau tsa muag ntsia saum ntuj, ua tsaug, muab ntais thiab cev cov movci rau cov thwjtim. Cov thwjtim tau muab rau tej neeg coobcoob. 20 Tagnrho sawvdaws tau noj thiab tau tsau, thiab lawv tau khaws cov seem puv kaum-ob lub pobtawb. 21 Mas cov txivneej uas tau noj ntawd tau muaj kwvyees li tsib txhiab leej, tsis xam tej pojniam thiab menyuam.
Yexus Taugkev Saum Dej
Mak 6:45-51; Yhs 6:15-21
22 Tamsis ntawd Yexus tau nthe cov thwjtim kom nce rau hauv nkoj thiab ua Nws ntej mus rau sab tid, tseg Nws tso tej neeg mus. 23 Thaum xa tej neeg dua toj lawm, Nws tau nce mus thov Vajtswv sau roob. Nimno yav tsausntuj Nws tau nyob ibleeg saud.
24 Lub nkoj tau mus ntau lub tshav ncaws pob deb ntawm ntug thiab raug nplaim dej xyob muslos vim nws raug cua dub nplawm. 25 Thaum dhau plaub teev, Yexus tau taugkev saum hiavtxwv thiab tau los rau ntawm lawv. 26 Ces thaum cov thwjtim pom Nws taugkev saum hiavtxwv, lawv tau ntshai thiab hais tias, “Nws yog ib tug dab!” Lawv tau quaj vim kev ntshai.
27 Tamsis ntawd Yexus tau hais rau lawv tias, “Ruaj siab, nws yog kuv. Txhob ntshai.”
28 Petus tau teb Nws thiab hais tias, “Tus Tswv, yog koj tiag no, tsocai rau kuv tuaj cuag koj saum dej.”
29 Yexus tau teb tias, “Tuaj mas.”
Ces tomqab Petus nqis saum lub nkoj, nws tau taugkev saum dej thiab tau mus rau ntawm Yexus. 30 Tabsis thaum pom cua dub ntsawj heev, nws tau ntshai thiab nws tau pib tog. Ces nws tau qw tias, “Tus Tswv, cawm kuv os!” 31 Tamsis ntawd Yexus tau cev tes tuaj tuav nkaus nws thiab tau hais tias, “Kev ntseeg me ua luaj! Vim li cas koj ua xyemxyav?”
32 Nkawv tau nce rau hauv nkoj thiab cua tau tus. 33 Ces cov hauv nkoj tau pe Nws thiab hais tias, “Tseeb tiag, koj yog Vajtswv Ntuj tus Tub.”
34 Hla dhau dej, Yexus tau los txog tim ntug ntawm Nkenexales. 35 Thaum paub Nws lawm, tej txivneej tid tau xa xov mus thoob plaws cheebtsam ntawd thiab luag tau coj tagnrho tej neeg muaj mob tuaj cuag Nws. 36 Lawv tau thov Nws kom cia lawv tuav Nws lub tw tsholoj, mas txhua tus uas tau tuav kuj tau zoo mob huvsi.
15
Kev Huv thiab Tsis Huv
Mak 7:1-23
1 Thaum cov Falixais thiab cov xibfwb qhia Kevcai pem Yeluxalees tuaj rau ntawm Yexus, lawv tau hais tias, 2 “Vim li cas koj cov thwjtim tau rhuav peb tej laus li kabke? Rauqhov lawv tsis ntxuav tes uantej lawv noj mov.”
3 Yexus tau teb thiab hais rau lawv tias, “Vim li cas nej rhuav Vajtswv Ntuj txojcai los ntawm nej tej kabke? 4 Rauqhov Vajtswv Ntuj tau hais tias, ‘Hwm nej niam thiab nej txiv,’ thiab tias ‘Yuavtsum cia tus uas cem nws niam thiab nws txiv tuag mus.’ 5 Tabsis nej hais tias, ‘Leejtwg hais rau nws niam lossis txiv tias, “Qhov khoom pub uas koj ciasiab rau ntawd, kuv twb muab rau Vajtswv Ntuj lawm,” 6 ces nws yeej tseem hwm nws niam nws txiv.’ Nej tau txo Vajtswv Ntuj txojlus los ntawm nej kabke. 7 Cov niag xyuam plhu, Yaxayas tau cevlus ntsig txog nej tias,

8 ‘Haivneeg no hwm kuv ntawm ncauj,
tabsis lawv lub siab ncaim kuv mus deb;
9 lawv hawm kuv qhuavqhuav thiab
muab neeg tej lus qhia ua tej kevcai.’”

10 Yexus tau hu pab neeg coobcoob thiab hais rau lawv tias, “Mloog thiab totaub! 11 Tsis yog yam uas nkag ntawm ncauj mus hauv plab ua rau neeg qias, tabsis yog yam uas tawm hauv lub ncauj tuaj ua rau neeg qias.”
12 Ces thaum cov thwjtim los cuag Nws, lawv tau nug Nws tias, “Koj puas paub tias cov Falixais tau ntog saum koj thaum lawv hnov koj txojlus?” 13 Yexus tau teb tias, “Txhua tsob ntoo uas kuv Txiv saum ntuj tsis tau cog yuav raug rho cag. 14 Puam chawj lawv! Lawv yog cov digmuag coj cov digmuag kev. Yog tus digmuag coj ib tug digmuag, nkawv ob leeg yuav poob qhov.”
15 Petus tau teb thiab hais rau Nws tias, “Txhais zaj luspiv no rau peb.”
16 Nws tau teb tias, “Nej tseem tsis totaub thiab? 17 Nej tsis totaub tias txhua yam nkag ntawm ncauj mus rau hauv plab thiab dhau mus ua xubtsuag lod? 18 Tabsis tej uas tawm hauv lub ncauj los kuj yog tawm hauv lub siab tuaj, thiab nws ua rau neeg qias. 19 Vim tias kev xav phem, kev tuaneeg, kev deev luag poj luag txiv, kev vuabtsuab, kev tubsab, tej lus povthawj cuav, thiab tej lus tuammom puavleej tawm hauv lub siab tuaj. 20 Tej no yog tej uas ua rau neeg qias, tabsis noj mov tsis ntxuav tes tsis ua rau neeg qias.”
Tus Pojniam Kanaas Kev Ntseeg
Mak 7:24-30
21 Thaum tawm qhov ntawd lawm, Yexus tau nce mus rau cheebtsam Tiles thiab Xidoos. 22 Ces ib tug pojniam Kanaas tau tawm hauv lawv lub tebchaws ntawd tuaj thiab tau quaj hais tias, “Tabncuab kuv os, tus Tswv, Daviv tus Tub! Kuv tus ntxhais raug dab hnyav heev li.”
23 Tabsis Nws tsis tau teb tus pojniam ntawd ib los li. Ces thaum Nws cov thwjtim los, lawv tau taij Nws tias, “Ntiab tus pojniam no mus rauqhov nws sij qw caum peb.”
24 Nws tau teb lawv thiab hais tias, “Kuv tsis tau raug xa rau leejtwg, tshwj cov yaj ploj hauv tsevneeg Yixayees.”
25 Tus pojniam ntawd tau los qhaucev pe Nws thiab hais tias, “Tus Tswv, thov pab kuv.”
26 Yexus tau teb tias, “Nws tsis zoo muab menyuam cov mov pov rau tej dev noj.”
27 Tus pojniam tau teb tias, “Yog tiag tus Tswv. Txawm li ntawd los, tej dev kuj tau noj tej tsig mov uas poob saum lawv tus tswv lub rooj thiab.”
28 Ces Yexus thiaj tau teb thiab hais rau tus pojniam ntawd tias, “Tus pojniam e, koj txojkev ntseeg loj heev. Cia nws tshwmsim rau koj li koj ntshaw.” Ces tus pojniam ntawd tus ntxhais tau zoo hlo lub sijhawm ntawd.
Yug Plaub Txhiab Leej
Mak 7:31-37; 8:1-10
29 Tomqab nqis ntawm lub tebchaws ntawd los, Yexus tau los rau ntawm ntug Hiavtxwv Kalilais. Thaum nce mus saum ib lub roob, Nws tau zaum saud. 30 Tej neeg coobcoob tau tuaj cuag Nws thiab lawv tau coj tej neeg qhuav ceg, digmuag, cegtawv, ruam piav, thiab muaj lwm hom mob tuaj. Lawv tau muab tej mob ntawd tso rau ntawm Nws kotaw thiab Nws tau kho lawv zoo. 31 Mas tej neeg tau xav tsis thoob thaum lawv pom tej ruam piav hais lus, tej cegtawv zoo, tej qhuav ceg taugkev thiab tej digmuag pomkev. Ces lawv tau qhuas Yixayees tus Vajtswv.
32 Yexus tau hu cov thwjtim los cuag Nws thiab hais tias, “Kuv hlub tshua tej neeg no rauqhov lawv tau nyob nrog kuv peb hnub lawm, thiab lawv tsis tau muaj dabtsi los noj. Kuv tsis xav tso lawv mus nyiaj ntshaib ntsuav, tsam lawv qaug dujde rau tom kev.”
33 Cov thwjtim tau teb Nws tias, “Peb yov muab movci qhovtwg ntawm yajsab no los yug lawv?”
34 Yexus tau nug lawv tias, “Nej muaj pestsawg lub movci?”
Lawv tau teb tias, “Xya lub thiab tus puav ntses.”
35 Tomqab txhib tej neeg mus zaum rau pem teb, 36 Yexus tau muab xya lub movci thiab cov ntses los, uatsaug, ntais thiab cev rau cov thwjtim. Ces cov thwjtim tau muab cev rau tej neeg coobcoob ntawd. 37 Txhua leej tau noj thiab tau tsau, hos cov seem tau ntim puv xya lub pobtawb. 38 Cov uas noj ntawd tau muaj plaub txheeb tus txivneej, tsis xam cov pojniam thiab menyuam. 39 Thaum tso lawv mus lawm, Nws tau nce rau hauv nkoj thiab tau mus rau ciam teb Mankadas.
16
Nrhiav Lub Cim Saum Ntuj
Mak 8:11-21
1 Cov Falixais thiab Xadukais tau tuaj rau ntawm Nws, tau sim Nws thiab tau taij Nws ua ib lub cim saum ntuj rau lawv saib.
2 Nws tau teb lawv hais tias, “Tsaus ntuj los, nej hais tias, ‘Huab cua zoo vim qab ntug liab.’ 3 Thiab thaum kajntug, nej hais tias, ‘Hnub no huab cua tsis zoo vim muaj huab es qab ntug liab.’ Nej paub txhais tej xwmtxheej saum nruab ntug, tabsis ua cas nej ho tsis muaj peevxwm txhais tej cim saum lub caijnyoog? 4 Tiam neeg phem thiab ua plees ua yi taij ib lub cim, tabsis nws yov tsis txais lub cim twg, tshwj Yaunas lub.” Ces Nws tau tso lawv rau ntawd thiab tau tawm mus lawm.
Falixais thiab Xadukais Tej Keeb
5 Thaum hla mus rau sab dej tid, cov thwjtim tsis tau nco nqa movci. 6 Ces Yexus tau hais rau lawv tias, “Saib tib zoo thiab ceev tuskheej tawn ntawm cov Falixais thiab Xadukais tej keeb.”
7 Lawv txawm tau xav hauv lawv nruab siab tias, “Nws hais li vim peb tsis nco nqa movci.”
8 Paub lawv txojkev xav li ntawd, Yexus tau hais tias, “Nej yov xav hauv siab tias, ‘Vim peb tsis nco nqa movci’ ua tus tsi? Cas nej kev ntseeg me ua luaj? 9 Nej tsis totaub thiab tsis nco tias tsib lub movci tau yug tsib txhiab leej, es nej tau khaws puv pestsawg lub pobtawb? 10 Thiab xya lub movci tau yug plaub txhiab leej es nej tau khaws puv pestsawg lub pobtawb? 11 Cas nej tsis totaub tias, kuv tsis tau hais txog movci? Tabsis kuv hais nej kom ceev tuskheej tawm ntawm cov Falixais thiab Xadukais tej keeb.” 12 Ces lawv tau totaub tias Nws tsis tau hais kom lawv ceevfaj txog keeb movci tabsis cov Falixais thiab Xadukais kev cobqhia.
Petus Lees Yexus Ua Khetos
Mak 8:27-29; Luk 9:18-20
13 Thaum los txog rau cheebtsam Xixaliyas Filipis, Yexus tau nug Nws cov thwjtim tias, “Tej neeg hais tias Neeg Leej Tub yog leejtwg?”
14 Lawv tau teb tias, “Ibtxhia hais tias koj yog Yauhas Npatitaus, dua ibtxhia hais tias koj yog Eliyas, thiab lwm cov hais tias koj yog Yelemis lossis ib tug cevlus.”
15 Nws tau nug lawv tias, “Nej ho hais tias kuv yog leejtwg?”
16 Ximoos Petus tau teb thiab hais tias, “Koj yog Khetos, Vajtswv Ntuj tus muajsia tus Tub.”
17 Yexus tau teb thiab hais rau nws tias, “Koj tau koobhmoov, Ximoos Yaunas tus tub, vim tias nqaijtawv thiab rojntsha tsis tau nthuav qhov no rau koj, tabsis kuv Txiv saum ntuj. 18 Thiab kuv hais rau koj tias, koj yog Petus, thiab saum lub pobzeb no kuv yuav tsa kuv pawgntseeg, thiab tej roojvag mus tub tuag teb yuav kov tsis yeej nws. 19 Kuv yuav muab tej yuamsij ntawm lub tswvkuj saum ntuj rau koj; thiab yam dabtsi uas koj muab khi hauv ntiajteb yuav raug khi saum ntuj, thiab yam dabtsi uas koj muab daws hauv ntiajteb yuav raug daws saum ntuj.” 20 Ces Nws tau xovlus rau cov thwjtim kom lawv txhob hais rau leejtwg tias Nws yog Khetos.
Yexus Qhia Txog Nws Kev Tuag
Mak 8:31-38; Luk 9:22-27
21 Ces txij thaum ntawd los Yexus tau pib nthuav rau Nws cov thwjtim tias, Nws cheemtsum mus hauv Yeluxalees, mus raug kev txomnyem ntau los ntawm cov txwjlaug, cov povthawj hlob, thiab cov xibfwb qhia Kevcai, mus raug tua, thiab hnub peb Nws yuav raug tsa sawv los.
22 Petus tau coj Yexus mus rau ib cag thiab tau txhwj Nws tias, “Cia Vajtswv Ntuj tabncuab koj, tus Tswv. Qhov no yuav tsis muaj rau koj kiag li.”
23 Tabsis Nws tau tig rau Petus thiab hais tias, “Khiav rau tom kuv qab, Xatas! Koj yog tus dawm kuv kev, rauqhov koj tsis xav txog Vajtswv Ntuj tej haujlwm tabsis neeg tej xwb.”
24 Ces Yexus tau hais rau Nws cov thwjtim tias, “Yog leejtwg xav caum kuv, cia nws txhob lees yuav tuskheej, cia nws kwv nws tus khaublig, thiab cia nws caum kuv qab. 25 Rauqhov tus uas cawm nws txojsia yuav plam txojsia ntawd, tabsis tus uas tso nws txojsia vim kuv yuav ntsib txojsia ntawd. 26 Vim tias neeg yuav tsam tus dabtsi yog nws huas tau lub cejntug tagnrho tabsis ho plam nws txojsia? Lossis neeg yov muab dabtsi mus txhiv nws txojsia? 27 Neeg Leej Tub yuav los nrog Nws Txiv tus tshwjchim thiab nrog Nws cov timtswv, thiab thaum ntawd Nws yuav them rau txhua leej raws li nyias tes haujlwm. 28 Kuv hais tseeb rau nej tias, ibtxhia uas sawv ntawm no yuav tsis saj kev tuag uantej lawv pom Neeg Leej Tub los nrog Nws lub tswvkuj.”
17
Yexus Plhis Plho
Mak 9:2-13; Luk 9:28-36
1 Rau hnub tomqab ntawd, Yexus tau yaum Petus, unpaus thiab nws tus kwv Yauhas, thiab Nws tau coj lawv nkaus xwb nce mus saum ib lub roob siab. 2 Mas Nws tau plhis plho ntawm lawv xubntiag. Nws lub ntsejmuag tau ci yam lub hnub thiab Nws cev tsoos tau ntsa vus li nplaim teeb. 3 Nimno Mauxes thiab Eliyas tau tshwm los nrog Yexus tham rau lawv pom.
4 Petus tau hais rau Yexus tias, “Tus Tswv, nws zoo rau peb nyob ntawm no. Yog koj xav li thiab, kuv yuav ua peb lub tsev ntaub rau ntawm no: Ib lub rau koj, ib lub rau Mauxes thiab ib lub rau Eliyas.”
5 Sijhawm nws samsim hais lus ntawd, ib tauv huab cici tau los roos lawv, thiab ib lub suab tau hais tawm hauv tauv huab tias, “Tus no yog kuv tus Tub uas kuv hlub, kuv raug siab rau Nws. Mloog Nws lus.”
6 Thaum hnov li ntawd, cov thwjtim tau khwb ntsejmuag rau pem teb thiab tau ntshai heev. 7 Yexus tau los thiab tuav lawv. Nws tau hais tias, “Sawv, txhob ntshai.” 8 Ces thaum lawv qhib lawv tej qhovmuag, lawv tau pom Yexus xwb, tsis pom leejtwg lawm.
9 Sijhawm lawv nqis saum roob los, Yexus tau xovlus rau lawv tias, “Txhob qhia qhov nej pom rau leejtwg mus txog thaum Neeg Leej Tub raug tsa hauv cov tuag rovlos.”
10 Ces cov thwjtim tau nug Nws tias, “Yog li ntawd, ua cas cov xibfwb qhia Kevcai ho hais tias Eliyas cheemtsum los uantej no?”
11 Yexus tau teb tias, “Eliyas los uantej tiag thiab txhua yam mam raug tsa tsheej. 12 Tabsis kuv hais tseeb rau nej tias, Eliyas tau los lawm thiab lawv tsis tau paub nws, mas lawv tau ua txhua yam phem uas lawv tau xav tawm rau nws. Neeg Leej Tub kuj yuav raug txomnyem ntawm lawv tes ibyam nkaus.” 13 Ces cov thwjtim tau totaub tias Nws tau hais rau lawv txog Yauhas Npatitaus.
Kho Tus Menyuam Raug Dab
Mak 9:14-29; Luk 9:37-42
14 Thaum lawv los rau ntawm pab neeg coobcoob, ib tug txivneej tau los cuag Nws. Tomqab txhoscaug rau ntawm Nws xubntiag, 15 nws tau hais tias, “Tus Tswv, thov tabncuab kuv tus tub, vim tias nws tau chualeeg thiab txomnyem kawg li. Nws txeev tau ntog rau hauv qhovcub thiab hauv dej. 16 Kuv tau coj nws tuaj rau koj cov thwjtim tabsis lawv tsis tau muaj peevxwm kho nws.”
17 Yexus tau teb tias, “Tiam neeg tsis ntseeg thiab tsis puv, kuv yuav nrog nej nyob tav twg? Kuv yuav tiv nej txog thaum twg? Nqa nws los rau kuv ntawm no.” 18 Yexus tau txwv tus dab thiab nws tau tawm ntawm tus metub, ces nws tau zoo txij lub txoovteev ntawd los.
19 Sijhawm cov thwjtim los cuag Yexus twjywm, lawv tau nug tias, “Vim li cas peb tsis tau muaj peevxwm ntiab tus dab ntawd?”
20 Nws tau teb tias, “Vim nej kev ntseeg me. Rauqhov kuv hais tseeb rau nej tias, yog nej muaj kev ntseeg luaj li lub noob zaub, nej yuav hais rau lub roob no tias ‘Txav ntawm ko,’ los nws yuav raug muab txav thiab nej yuav muaj peevxwm ua txhua yam.”
Hais Txog Nws Kev Tuag Zaum Ob
22 Thaum lawv uake rovlos rau Kalilais, Yexus tau hais rau lawv tias, “Neeg Leej Tub samsim yuav raug ntes mus rau neeg txhaum tes, 23 lawv yuav tua Nws, thiab hnub peb Nws yuav raug tsa sawv rovlos.” Mas cov thwjtim tau ntxhovsiab heev.
Them Se Tuamtsev
24 Sijhawm lawv los txog hauv Kapenaus, cov sau ob txiaj se rau tuamtsev tau tuaj rau ntawm Petus thiab nug tias, “Nej tus xibfwb tsis them ob txiaj se no lod?”
25 Nws tau teb tias, “Them hos.”
Thaum Petus nkag los hauv tsev, Yexus twb npaj nug uantej tias, “Ximoos, koj pom li cas? Tej vajntxwv hauv ntiajteb sau se liajteb lossis se taubhau ntawm leejtwg? Ntawm lawv tej menyuam lossis ntawm tej qhua?”
26 Petus tau teb tias, “Ntawm tej qhua.”
Yexus tau hais rau nws tias, “Ces tej tub raug zam lawm. 27 Tabsis kom peb txhob dawm lawv ntog, mus pov tus nuv rau hauv hiavtxwv. Thawj tus ntses uas koj tau ntawd, rua nws lub qhovncauj, mas koj yuav pom ib lub nyiaj. Nqa lub nyiaj ntawd los them lawv rau koj thiab kuv.”
18
Tus Loj Hauv Lub Tswvkuj
Mak 9:33-37; Luk 9:46-48
1 Lub txoovteev ntawd, cov thwjtim tau los cuag Yexus thiab hais tias, “Ua li, leejtwg yog tus loj dua hauv lub tswvkuj saum ntuj?”
2 Thaum hu ib tug menyuam los thiab muab nws sawv hauv nruab nrab lawv, 3 Nws tau hais tias, “Tseeb tiag kuv hais rau nej, yog nej tsis tig rovqab thiab dhau mus zoo li tej menyuam, nej yuav tsis nkag mus hauv lub tswvkuj saum ntuj. 4 Yog li ntawd, tus uas txo tuskheej qis li tus menyuam no yog tus loj tshaj hauv lub tswvkuj saum ntuj.”
5 “Thiab tus uas txais ib tug menyuam li no ntawm kuv lub npe kuj txais kuv. 6 Yog leejtwg dawm ib tug menyuam me uas ntseeg kuv no ntog, mas qhov zoo dua ces yog muab ib txhibzeb khi rau nws lub cajdab thiab muab txhib zeb pov rau hauv qabthu hiavtxwv.”
7 “Kev vijnpog rau lub cejntug tawm ntawm tej kev dawm ntog los. Tej kev dawm ntog cheemtsum muaj, tabsis kev vijnpog raug rau tus neeg uas cia tej kev dawm ntog tawm ntawm nws los. 8 Yog koj txhais tes lossis txhais taw ua qhov dawm koj, muab nws txiav thiab muab povtseg. Nws zoo rau koj nkag mus txais txojsia cegtawv pluav lossis tu tes lugrug dua li uas koj muaj ob txhais tes lossis ob txhais taw tabsis tuskheej raug pov mus rau hauv lub cubtawg ibtxhis. 9 Thiab yog koj lub qhovmuag ua qhov dawm koj, muab nws dawj povtseg. Nws zoo rau koj nkag mus txais txojsia nrog ib lub qhovmuag dua li muaj ob lub tabsis ho raug pov mus rau hauv ntujtawg.”
Luspiv Txog Tus Yaj Plaskev
Luk 15:4-7
10 Saib tibzoo, txhob xav phem rau cov meme no ib tug twg. Rauqhov kuv hais tseeb rau nej tias, lawv cov timtswv saum ntuj pom nraim kuv Txiv saum ntuj lub ntsejmuag.”
12 “Nej xav tias dabtsi zoo? Yog ib tug txivneej muaj ib puas tus yaj thiab ib tug tau ncaim cov lawm, nws puas yuav tso cuajcaum-cuaj tug rau saum tej roob thiab taugkev mus nrhiav tus plaskev ntawd? 13 Thiab yog nws ho nrhiav tau, kuv hais tseeb rau nej tias, nws yuav zoo siab rau tus ntawd dua li rau cuajcaum-cuaj tug uas twb tsis plaskev. 14 Yam nkaus li no, nws tsis yog nej Txiv saum ntuj tus dejsiab kom cov meme no ib tug twg puastsuaj.”
Tus Kwvtij Plaskev
15 “Thiab yog koj ib tug kwvtij ua txhaum rau koj, mus qhia nws, nruab nrab koj thiab nws xwb. Yog nws mloog koj hais, koj tsam koj tus kwvtij ntawd. 16 Tabsis yog nws tsis mloog, coj ib lossis ob tug nrog koj, kom txhua lolus raug tsa los ntawm ob lossis peb tug timkhawv. 17 Thiab yog nws tsis mloog nkawv, hais rau pawgntseeg. Yog nws tseem tsis mloog pawgntseeg, cia nws ua pejkum neeg lossis neeg sau se rau koj.”
18 “Tseeb tiag kuv hais rau nej, yam dabtsi uas nej muab khi hauv ntiajteb yuav raug khi saum ntuj, thiab yam dabtsi uas nej muab daws hauv ntiajteb yuav raug daws saum ntuj. 19 Kuv rov hais tseeb rau nej tias, yog nej ob leeg koom thov rau ib yam haujlwm dabtsi hauv ntiajteb, kuv Txiv saum ntuj yuav ua qhov ntawd rau nkawv. 20 Vim tias ob lossis peb leeg sibtxoos qhovtwg ntawm kuv lub npe, kuv yuav nyob hauv nruab nrab lawv qhov ntawd.”
Luspiv Txog Tus Qhev Tsis Tabncuab
21 Thaum ntawd, Petus tau los cuag Yexus thiab nug tias, “Tus Tswv, kuv yuav zam rau tus kwvtij uas tau ua txhaum rau kuv txog pestsawg zaus? Txog xya zaus lod?”
22 Yexus tau teb nws tias, “Kuv hais rau koj, tsis yog xya zaus, tabsis yog xya zaus xyacaum.”
23 “Vim li no, lub tswvkuj saum ntuj thiaj zoo nkaus li neeg ib tug vajntxwv, uas tau npaj los taug nws cov tubtxib zajlus. 24 Thaum nws chiv los taug tej zajlus ntawd, luag tau coj ib tug tubtxib uas tshuav nqi txog kaum txheeb hub nyiajb los rau nws. 25 Vim nws tsis muaj peevxwm them, tus tswv tau quab kom nws muag nws tuskheej, nws pojniam, nws menyuam thiab txhua yam nws muaj, es nqa tuaj them.”
26 “Ces tus tubtxib ntawd tau qhau cev thiab pe nws hais tias, ‘Thov ua siabntev rau kuv, kuv yuav them txhua yam rau koj.’ 27 Tabsis vim tus tswv tabncuab tus tubtxib, nws tau zam thiab tau muab tej nujnqis xuam hlo rau nws.”
28 “Thaum tus tubtxib ntawd tawm los mus, nws tau ntsib ib tug kwvluag uas tshuav nws nqi ib puas denalis.c Nws tau muab nws tus kwvluag pav kiag, muab zawm cajpas, thiab hais rau nws tias, ‘Them tagnrho los, saib koj tshuav kuv dabtsi?’”
29 “Ces tus kwvluag ntawd tau qhau cev thiab thov nws tias, ‘Thov ua siabntev rau kuv, kuv mam them rau koj.’”
30 “Tabsis nws tsis tau yib. Nws tseem tau coj nws mus pov rau hauv tsev lojcuj, kom txog thaum nws them tej nujnqi tag. 31 Yog li ntawd, thaum tsoom kwvluag pom tej xwmtxheej no, lawv tau mobsiab heev thiab tau mus piav tej xwmtxheej no huvsi rau lawv tus tswv.”
32 “Thaum hu nws tuaj txog, tus tswv tau hais rau nws tias, ‘Niag tubtxib phem, kuv tau zam tej nujnqi ntawd huvsi rau koj vim koj tau thov kuv. 33 Tsis cheemtsum rau koj tabncuab koj tus kwvluag ibyam li kuv tau tabncuab koj lod?’ 34 Nws tus tswv tau chim thiab tau muab nws ntes rau cov kawneeg, kom muab kaw mus txog thaum nws them tagnrho tej nujnqi uas nws tshuav.”
35 “Kuv Txiv saum ntuj yuav ua ibyam li no rau nej, yog nej nyias tsis zam hauv nruab siab rau nyias tus kwvtij.”
19
Kev Sibnrauj
Mak 10:1-12
1 Tomqab Yexus xaus tej lus no, Nws tau nqis ntawm Kalilais thiab tau mus rau ciamteb Yudas ntawm ntug dej Yuladees sab tid. 2 Tej neeg coobcoob tau caum Nws thiab Nws tau kho lawv zoo mob qhov ntawd.
3 Cov Falixais tau tuaj sim Yexus thiab hais tias, “Puas raugcai rau ib tug txivneej muab nws tus pojniam nrauj vim ib yam dabtsi li?”
4 Ces Yexus tau teb thiab hais tias, “Nej tsis tau nyeem tias tus Tsim tau tsim nkawv ua pojniam thiab txivneej thaum chivkeeb lod?” 5 Nws tau hais ntxiv tias, “‘Vim qhov no, tus txivneej yuav tso nws niam thiab nws txiv tseg, thiab nkawv ob leeg yuav dhau ua ib phob nqaij.’ 6 Li ntawd, nkawv tsis yog ob phob tabsis ib phob nqaij xwb. Ces qhov uas Vajtswv Ntuj tau muab nog uake, txhob cia neeg muab faib.”
7 Lawv tau hais rau Nws tias, “Yog li ntawd, ua cas Mauxes tau tsocai kom muab daim ntawv nrauj rau tus pojniam thiab muab nws tso?”
8 Yexus tau teb lawv tias, “Mauxes tau tsocai rau nej nrauj nej tej pojniam vim nej lub siab tawv. Tabsis thaum chivkeeb nws tsis tau tshwmsim li ntawd. 9 Kuv hais rau nej tias, tus uas nrauj nws tus pojniam, tshwj kev vuabtsuab, thiab yuav lwm tus kuj txhaum kev deev luag poj.”
10 Nws cov thwjtim tau hais rau Nws tias, “Yog tus txivneej uas muaj pojniam zoo li no, ces tsis yuav pojniam zoo dua.”
11 Nws tau teb tias, “Tsis yog txhua leej coj taus txojlus no, tsuas yog rau cov uas twb raug muab rau xwb. 12 Rauqhov ibtxhia yog neeg sam vim lawv tau yug hauv niam plab los li ntawd, tabsis ibtxhia yog neeg sam vim lawv tau sam tuskheej rau lub tswvkuj saum ntuj. Tus uas muaj peevxwm ceev tuskheej, cia nws ceev.”
Menyuam thiab Yexus
Mak 10:13-16; Luk 18:15-17
13 Thaum neeg coj tej menyuam los rau Yexus kom Nws tsa tes thiab thov Vajtswv rau lawv, cov thwjtim tau txwv cov menyuam ntawd.
14 Tabsis Yexus tau hais tias, “Tso cov menyuam los thiab txhob cuamtshuam qhov lawv los cuag kuv, vim tias lub tswvkuj saum ntuj yog rau cov zoo li no.” 15 Ces tomqab tsa tes rau lawv tag, Nws tau ncaim qhov ntawd mus.
Tus Npluanuj thiab Lub Tswvkuj
Mak 10:17-30; Luk 18:18-30
16 Sijhawm ntawd ib tug txivneej ho tau tuaj cuag Yexus thiab nug tias, “Xibfwb, kuv yuav ua txojkev zoo twg kuv thiaj yuav tau txojsia ibtxhis?”
17 Yexus tau teb rau nws tias, “Vim li cas koj ho nug kuv txog kev zoo? Tus zoo ntawd muaj tib tug xwb. Tabsis yog koj xav nkag mus rau txojsia ibtxhis, ceev tej Kevcai.”
18 Nws tau nug tias, “Nqe twg?”
Yexus tau hais tias, “Txhob tua neeg, txhob deev luag poj, txhob tubsab, txhob ua timkhawv cuav, 19 hwm koj niam koj txiv, thiab hlub tus ntawm koj togtsev yam li tuskheej.”
20 Tus hluas tau hais rau Yexus tias, “Kuv tau ua txhua yam no lawm. Kuv tseem tshuav dabtsi?”
21 Yexus tau hais rau nws tias, “Yog koj xav ua tus zoo kawgnkaus, mus muab koj tej teejtug muag thiab muab pub cov pluag, kom koj yuav muaj txhab nyiaj saum ntuj, thiab los caum kuv.”
22 Thaum hnov txojlus no, tus hluas tau tawm mus ntshaus ntsho, vim tias nws tau muaj teejtug ntiajteb ntau heev.
23 Ces Yexus tau hais rau Nws cov thwjtim tias, “Tseeb tiag kuv hais rau nej tias, tus npluanuj yuav nkag mus rau lub tswvkuj saum ntuj nyuaj heev. 24 Thiab kuv rov hais rau nej tias, tus ntxhuav yuav chaws dhau lub qhov koob yoojyim dua li tus npluanuj yuav nkag mus rau Vajtswv Ntuj lub tswvkuj.”
25 Thaum hnov li no, cov thwjtim tau xav tsis thoob li thiab lawv tau nug tias, “Ces leejtwg thiaj muaj peevxwm dim?”
26 Yexus tau saib lawv thiab hais rau lawv tias, “Neeg mas tsis muaj peevxwm ua qhov no, tabsis Vajtswv Ntuj muaj peevxwm ua txhua yam.”
27 Thaum ntawd Petus tau teb thiab hais rau Nws tias, “Nimno peb tau tso txhua yam thiab tau caum koj. Peb ho yuav zoo li cas?”
28 Ces Yexus tau teb rau lawv tias, “Kuv hais tseeb rau nej tias, nej cov uas caum kuv, thaum Neeg Leej Tub zaum saum Nws lub zwmtxwv ntomeej hauv lub ntuj tshiab teb tshiab, nej kuj yuav zaum saum kaum-ob lub zwmtxwv txiavtxim rau kaum-ob xeem Yixayees. 29 Thiab txhua tus uas tau tso vajtse, kwvtij, nkaujmuam, txiv, niam, menyuam, lossis liajteb vim kuv lub npe yuav tau txais ib puas npaug thiab yuav tau saws txojsia ibtxhis. 30 Tabsis cov thawj coob leej yuav dhau ua tw thiab cov tw yuav dhau ua thawj.”
20
Luspiv Txog Cov Tubzog Tu Vaj Txivhmab
1 “Rauqhov lub tswvkuj saum ntuj zoo li ib tug tuam lospav, uas tau tawm thaum kajntug txoog mus ntiav tubzog mus tu nws lub vaj txivhmab. 2 Tomqab nws nrog cov tubzog khom nqizog leej hnub ua ib txiaj denalis,a nws tau xa lawv mus rau hauv nws lub vaj txivhmab.
3 Thaum tav tshais, nws tau pom lwm pab sawv tom kiab tsis muaj haujlwm, 4 mas nws tau hais rau lawv tias, ‘Nej kuj mus tu kuv lub vaj txivhmab es tsimnyog tus nqizog li cas kuv yuav muab rau nej.’ 5 Ces lawv tau tawm mus ua.”
“Nws kuj tau tawm mus thaum tavsu dua thiab thaum hnub qaij, thiab nws tau ua ibyam li ntawd rau lwm pab neeg. 6 Uantej thaum hnub poob, nws kuj tau tawm mus pom dua ib pab sawv yujyeev, mas nws tau hais rau lawv tias, ‘Cas nej tuaj sawv taghnub tsis ua haujlwm?’”
7 “Lawv tau teb nws tias, ‘Rauqhov tsis muaj leejtwg ntiav peb.’”
“Nws tau hais rau lawv tias, ‘Nej kuj mus hauv kuv lub vaj txivhmab!’”
8 “Thaum tsausntuj los txog, tus tswv vaj txivhmab tau hais rau nws tus neeg saib lub vaj tias, ‘Hu cov tubzog los thiab muab nqizog rau lawv, xub muab rau cov tuaj tomqab.’”
9 “Ces cov uas tuaj thaum hnub poob tau txais ib leeg ib txiaj denalis. 10 Thaum cov xub tuaj los, lawv tau xav tias lawv yuav tau txais ntau dua, tabsis lawv kuj tau txais ib leeg ib txiaj denalis. 11 Thaum txais lawm, lawv tau yws tus tuam lospav 12 tias, ‘Cov uas tuaj tomqab no ua haujlwm ib teev xwb, koj tau muab sibnpaug li peb cov uas tau tiv kev khwv thiab tiv tshav ib hnub.’”
13 “Ces nws tau teb thiab hais rau lawv ib tug tias, ‘Npawg, kuv tsis tau ua tsis ncaj rau koj. Koj tsis tau nrog kuv khom nqizog ua ib txiaj denalis lod? 14 Khaws koj lub txiaj es mus. Kuv xav muab rau tus tuaj tom kawg yam li muab rau koj, 15 es nws tsis raugcai rau kuv siv kuv tej nyiaj li kuv siab xav lod? Lossis yog koj lub qhovmuag qaujles vim kuv yog tus zoo?’”
16 “Cov tw yuav dhau ua cov thawj thiab cov thawj yuav dhau ua cov tw li no.”
Yexus Qhia Txog Nws Kev Tuag Zaum Peb
Mak 10:32-34; Luk 18:31-33
17 Thaum Yexus samsim nce mus pem Yeluxalees, Nws tau coj kaum-ob tug thwjtim nkaus xwb mus rau ntawm txojkev thiab tau hais rau lawv tias, 18 “Nimno, peb samsim nce mus Yeluxalees, mas Neeg Leej Tub yuav raug ntes rau cov povthawj hlob thiab cov xibfwb qhia Kevcai. Lawv yuav txiavtxim rau Nws tuag, 19 thiab lawv yuav muab Nws cob rau pejkum neeg kom Nws raug thuam, raug nplawm thiab raug ntsia saum khaublig. Hnub peb, Nws yuav raug tsa sawv.”
Leej Niam Lolus Thov
Mak 10:35-45
20 Tomqab ntawd, niam Xenpedais nrog nws ob tug tub tau tuaj cuag Yexus, pe thiab taij dabtsi ntawm Nws. 21 Yexus tau nug nws tias, “Koj xav tau dabtsi?”
Nws tau teb tias, “Hais kom kuv ob tug tub no yov zaum ntawm koj sab xis thiab sab laug hauv koj lub tswvkuj.”
22 Yexus tau teb thiab hais rau nkawv tias, “Neb tsis paub neb taij dabtsi. Neb puas muaj peevxwm haus lub khob uas kuv samsim yuav haus?”
Nkawv tau teb tias, “Wb muaj peevxwm.”
23 Nws tau hais rau nkawv tias, “Kuv lub khob ntawd neb yuav haus. Tabsis lub chaw ntawm kuv sab xis thiab sab laug tsis yog kuv ua tus muab, tabsis yog rau cov uas kuv Txiv twb npaj tseg lawm.”
24 Thaum hnov txog qhov no, lawv kaum leej tau chim rau ob kwvtij ntawd. 25 Tabsis Yexus tau hu lawv los thiab tau hais tias, “Nej paub tias pejkum neeg cov thawj kav lawv thiab cov hlob tswj lawv. 26 Hauv nej nws yuav tsis zoo li ntawd. Hauv nej, tus uas xav ua tus hlob yuav ua tus tiam nej, 27 thiab tus uas xav ua tus thawj yuav ua nej tus tubtxib, 28 ibyam li Neeg Leej Tub tsis tau los kom raug tiam, tabsis kom Nws yov tiam thiab yov muab Nws txojsia ua khoom theej coob leej.”
Ob Tug Digmuag Pomkev
Mak 10:46-52; Luk 18:35-43
29 Thaum tawm hauv Yelikaus mus, ib pab neeg coobcoob tau caum Yexus. 30 Muaj ob tug digmuag zaum ntawm ntug kev, thiab thaum hnov tias Yexus dua kev tuaj, nkawv tau qw tias, “Tabncuab wb os, tus Tswv, Daviv tus Tub!”
31 Tej neeg tau txwv nkawv kom ntsiag, tabsis nkawv hajyam tau qw nrovnrov tias, “Tabncuab wb os, tus Tswv, Daviv tus Tub.”
32 Nres kiag, Yexus tau hu nkawv los thiab tau nug nkawv tias, “Neb xav kom kuv ua dabtsi rau neb?”
33 Nkawv tau teb Nws tias, “Tus Tswv, kom kho wb tej qhovmuag.”
34 Ces los ntawm kev tabncuab, Yexus tau tuav nkawv qhovmuag thiab tamsis ntawd nkawv tau pomkev thiab tau caum Yexus.
21
Nkag Nroog Muajyeej Ntxiag
Mak 11:1-10; Luk 19:29-38; Yhs 12:12-15
1 Thaum lawv tau tuaj ze Yeluxalees, Nws tau mus hauv Npefankes saum roob txiv ntooroj. Ces Yexus tau xa ob tug thwjtim uantej 2 thiab hais rau nkawv tias, “Mus rau lub zos tom neb hauv ntej, thiab neb yuav pom ib tug maum neesluav khi nrog nws tus menyuam neesluav. Muab nkawv daws thiab coj los rau kuv. 3 Yog leejtwg nug neb dabtsi, teb tias ‘Nkawv tus Tswv cheemtsum tau.’” Nws tau xa nkawv mus tamsis ntawd.
4 Qhov no tau tshwmsim kom tiav li tus cevlus lolus uas hais tias:

5 “Hais rau tus nkauj Xioos tias,
Saib mas, koj tus vajntxwv samsim los cuag koj,
txo hwjchim thiab caij tus neesluav,
thiab zaum saum menyuam neesluav.”

6 Ob tug thwjtim tau mus thiab tau ua raws nraim li Yexus tau tawmlus rau nkawv. 7 Nkawv tau coj tus maum thiab tus menyuam neesluav los. Nkawv tau muab tsholoj pua thiab Yexus tau zaum rau saud. 8 Ces tej neeg coobcoob tau hle lawv tej tsholoj los pua pem teb hauv txojkev thiab coob leej tau txiav tej ceg ntoo thiab muab pua saum txojkev. 9 Tej neeg coobcoob uantej thiab uaqab Nws ntawd tau qw nrovnrov tias:

“Hausanasb rau Daviv tus Tub!”
“Qhuas tus uas samsim los ntawm tus Tswv lub Npe!”
“Hausanas saum tej qhov siab kawgnkaus!”

10 Ces thaum Nws nkag los hauv Yeluxalees, tagnrho lub nroog tau ceeb thiab nug tias, “Nws yog leejtwg?”
11 Tabsis tej neeg tau hais tias, “Nws yog Yexus, tus cevlus pem Naxalev hauv Kalilais.”
Yexus Hauv Tuamtsev
Mak 11:15-18; Luk 19:45-47
12 Yexus tau los rau hauv lub loog tuamtsev thiab tau ntiab tagnrho tej neeg muag khoom thiab yuav khoom hauv tuamtsev. Nws tau muab cov neeg pauv nyiaj tej rooj thiab cov neeg muag nquab tej tog ntxeev. 13 Nws tau hais rau lawv tias, “Twb sau tseg tias, ‘Kuv lub tsev yuav raug hu ua lub tsev thov Vajtswv,’ tabsis nej muab ua tubsab lub chaw nkaum.”
14 Cov neeg digmuag thiab qhuav ceg tau tuaj cuag Yexus hauv lub tuamtsev, mas Nws tau kho lawv zoo. 15 Thaum cov povthawj hlob thiab cov xibfwb qhia Kevcai pom tej txujci uas Nws tau ua thiab tej menyuam qw nrovnrov hauv lub tuamtsev tias, “Hausanas rau Daviv tus Tub,” lawv tau chim heev.
16 Ces lawv tau hais rau Yexus tias, “Koj puas hnov tej neeg no hais?”
Tabsis Yexus tau teb lawv tias, “Hnov kawg. Nej tsis tau nyeem nqe tias,

‘Koj tau npaj lus qhuas rau ntawm tej hluas
thiab menyuam mos lub qhovncauj’?”

17 Ces Nws tau ncaim lawv mus rau tom lub nroog Npethanis thiab tau pw tod.
Tsob Ncuavpias Qhuav
Mak 11:12-14,20-24
18 Hnub tomqab thaum sawvntxov, sijhawm taugkev mus hauv nroog, Yexus tau tshaib. 19 Thaum pom ib tsob txiv ncuavpias ntawm ntug kev, Nws tau mus ntawm tsob txiv thiab nrhiav tsis tau dabtsi, tsuas pom nplooj xwb. Nws tau hais rau tsob txiv ntawd tias, “Yov tsis muaj leejtwg tau noj koj cov txiv mus ntxiv lawm!” Ces tsob txiv ncuavpias tau qhuav tamsis ntawd.
20 Cov thwjtim pom li ntawd, lawv tau xav tsis thoob thiab hais tias, “Cas tsob txiv ncuavpias cia li qhuav tamsis li no?”
21 Yexus tau teb lawv tias, “Tseeb tiag kuv hais rau nej, yog nej muaj kev ntseeg thiab tsis ua xyemxyav, tsis yog nej yuav ua rau tsob txiv ncuavpias xwb, tabsis nej yov hais rau lub roob no tias, ‘Rho cag hlo thiab pov tuskheej rau hauv hiavtxwv,’ los nws yuav tshwmsim. 22 Thiab yam dabtsi nej taij hauv kev thov Vajtswv, yog nej ntseeg, ces nej yuav tau txais.”
Nug Txog Yexus Lub Tswjchim
Mak 11:27-33; Luk 20:1-8
23 Sijhawm uas Yexus tuaj qhuabqhia hauv lub loog tuamtsev, cov povthawj hlob thiab cov txwjlaug ntawm haivneeg tau tuaj rau ntawm Nws thiab tau nug tias, “Koj ua tej no los ntawm lub tswjchim dabtsi? Thiab leejtwg muab lub tswjchim no rau koj?”
24 Yexus tau teb thiab hais rau lawv tias, “Kuv yuav nug nej txog ib txojlus thiab yog nej teb kuv, ces kuv yuav qhia rau nej tias kuv ua tej no los ntawm lub tswjchim twg. 25 Yauhas txojkev rausdej tau tawm qhovtwg los? Tawm saum ntuj lossis ntawm neeg los?”
Ces lawv tau sibtham nruab nrab lawv tias, “Yog peb hais tias, ‘Tawm saum ntuj los,’ Nws yov nug peb tias, ‘Yog li ntawd, vim li cas nej tsis tau ntseeg nws?’ 26 Tabsis yog peb hais tias, ‘Tawm ntawm neeg los,’ peb ntshai tej neeg coobcoob no, vim lawv sawvdaws tuav rawv Yauhas ua tus cevlus.”
27 Ces lawv tau teb Yexus tias, “Peb tsis paub.”
Nws thiaj tau hais rau lawv tias, “Kuv los kuj yuav tsis hais rau nej tias, kuv ua tej no los ntawm lub tswjchim twg.”
Luspiv Txog Ob Tug Tub
28 “Nej xav tias qhovtwg zoo? Ib tug txivneej muaj ob tug tub. Thaum mus txog tus hlob, nws tau hais tias, ‘Tub, mus tu lub vaj txivhmab hnub no!’”
29 “Nws tau teb tias, ‘Kuv tsis xav mus,’ tabsis tomqab ntawd nws tau tusiab rau tuskheej thiab tau mus lawm.”
30 “Ces leej txiv tau mus hais rau tus yau ibyam thiab. Tus yau tau teb tias, ‘Kuv mam mus, tus tswv,’ tabsis nws tsis tau mus.”
31 “Ntawm ob tug tub no leejtwg ua nws txiv tus dejsiab?”
Lawv tau teb tias, “Tus hlob.”
Yexus tau hais rau lawv tias, “Tseeb tiag kuv hais rau nej tias, cov sau se thiab cov niam ntiav xub ua nej ntej mus hauv Vajtswv Ntuj lub tswvkuj lawm. 32 Rauqhov Yauhas tau los rau nej saum txojkev ncajncees thiab nej tsis tau ntseeg nws, tabsis cov sau se thiab cov niam ntiav tau ntseeg nws. Txawm nej tau pom li ntawd, nej tsis tau tusiab rau tuskheej es ho ntseeg nws.”
Luspiv Txog Cov Ntiav Vaj Txivhmab
Mak 12:1-12; Luk 20:9-19
33 “Mloog dua ib zaj luspiv: Ib tug txivneej, tus tuam lospav, tau cog ib lub vaj txivhmab, tau xov lajkab ncig, tau khawb lub qhov tsuam txivhmab rau hauv, tau ua lub tsev tsomfaj rau, thiab tau muab lub vaj txivhmab ntiav rau cov tubqoob thiab nws tau ncaim lawm. 34 Thaum txog lub caij txivhmab siav, nws tau xa nws cov tubtxib tuaj nqa cov txivhmab hauv lub vaj ntawm cov tubqoob.”
35 “Cov tubqoob tau ntes nws tej tubtxib, tau ntaus ib tug, tau tua ib tug, thiab tau muab zeb ntaus ib tug tuag. 36 Nws kuj tau xa dua ib pab tubtxib tuaj, coob dua thawj pab, los cov tubqoob kuj tau ua phem rau lawv ibyam li ntawd. 37 Thaum kawg nws tau xa nws tus tub tuaj rau ntawm lawv thiab nws tau hais tias, ‘Lawv yuav hwm kuv tus tub.’”
38 “Tabsis thaum pom tus tub, lawv tau sibtham tias, ‘Tus no yog tus saws koobhmoov. Los, cia peb muab nws tua thiab txeeb nws li nyiaj qabnas.’ 39 Ces lawv tau ntes nws, tau thawb nws tawm rua lub vaj txivhmab sab nraud, thiab tau tua nws.”
40 “Yog li ntawd, tus tswv lub vaj txivhmab tau tuaj. Nws yov ua li cas rau cov tubqoob no?”
41 Lawv tau teb Yexus tias, “Nws yuav ua kom cov neeg liam ntawd puastsuaj thiab nws yuav muab lub vaj txivhmab ntiav rau lwm tus, cov uas yuav them txivhmab rau nws raws caijnyoog.”
42 Ces Yexus tau hais rau lawv tias, “Nej tsis tau nyeem hauv vajlugkub tias:

‘Lub pobzeb, uas cov kws tsev tau muab povtseg,
tau dhau ua lub zeb teem kaum.
Qhov no tshwmsim los ntawm tus Tswv,
thiab yog qhov xav tsis thoob ntawm peb qhovmuag’?”

43 “Vim qhov no, kuv hais rau nej tias, Vajtswv Ntuj lub tswvkuj yuav raug muab tshem ntawm nej thiab yuav muab rau ib haivneeg tu tej txiv hauv lub vaj. 44 Thiab tus uas dawm saum lub pobzeb no yuav ntsoog ntxaws, thiab lub pobzeb no poob raug tus twg, lub pobzeb yuav muab nws quj ua hmoov.”
45 Thaum hnov zaj luspiv no, cov povthawj hlob thiab cov Falixais tau totaub tias Yexus tau hais txog lawv. 46 Ces lawv tau pib nrhiav ntes Nws, tabsis lawv tau ntshai tej neeg coobcoob vim tej neeg ntawd tau tuav Nws ruaj ua tus cevlus.
22
Luspiv Txog Rooj Tshoob
Luk 14:16-24
1 Yexus tau teb lawv ua luspiv dua tias: 2 “Rau neeg mas lub tswvkuj saum ntuj zoo li ib tug vajntxwv, uas tau npaj ib roojtshoob rau nws tus tub. 3 Nws tau xa nws tej tubtxib mus hu cov qhua uas twb raug caw tuaj koom roojtshoob, tabsis lawv tsis tau xav tuaj.”
4 “Nws tau xa dua ib pwg tubtxib hais tias, ‘Hais rau cov twb raug caw li no: Nimno, kuv rooj mov twb tiav, tej heev nyuj thiab menyuam nyuj rog twb raug txhoov tag thiab txhua yam twb txhij lawm. Tuaj koom roojtshoob.’”
5 “Tabsis cov neeg lasmees ntawd nyias tau mus nyias: Ib tug tau mus tom nws teb, dua ib tug tau mus ua luam, 6 hos dua lwm leej ces thaum hu cov tubtxib los, lawv tau ua phem rau cov tubtxib thiab tau muab lawv tua. 7 Ces vajntxwv tau chim heev. Nws tau xa nws tej tubrog mus muab cov neeg tuaneeg ntawd ua kom puastsuaj thiab tau muab lawv lub nroog hlawv.”
8 “Ces nws tau hais rau nws cov tubtxib tias, ‘Roojtshoob twb tiav lawm, tabsis cov twb raug caw puavleej tsis tau tsimnyog. 9 Yog li ntawd, mus tom tej kev tshuam seb ntsib leejtwg, ces caw lawv tuaj noj roojtshoob.’ 10 Thaum cov tubtxib tau tawm mus, lawv tau caw txhua tus uas lawv pom: Tej neeg phem thiab neeg zoo txhua nrho. Thiab neeg tau tuaj zaum puvnkaus hauv tsev tshoob.”
11 “Lub sijhawm vajntxwv tau nkag los saib tej neeg zaum saum rooj, nws tau pom ib tug neeg tsis tau hnav tsoos rau roojtshoob. 12 Mas nws tau hais rau tus ntawd tias, ‘Phoojywg, ua li cas koj tau tuaj hauv no, tabsis koj tsis tau hnav tsoos rau roojtshoob?’ Tus ntawd tau teb tsis taus ib los li.”
13 “Ces vajntxwv tau hais rau nws cov ncignum tias, ‘Muab nws testaw pav, thiab muab nws pov rau qhov tsausntuj sab nraud. Qhov ntawd yuav muaj kev quaj thiab kev tom hniav qev.’”
14 “Rauqhov muaj coob leej raug hu, tabsis tsawg leej thiaj raug xaiv.”
Kev Them Se Rau Fajtim
Mak 12:13-17; Luk 20:20-26
15 Thaum cov Falixais tawm mus, lawv tau tuavhauv kom lawv yov cuab ntxiab mag Yexus los ntawm lus. 16 Lawv tau xa lawv cov thwjtim nrog Helauj cov neeg tuaj rau ntawm Yexus thiab nug tias, “Xibfwb, koj yog ib tug tseem xibfwb thiab qhia tseeb txog Vajtswv Ntuj txojkev thiab koj tsis xaiv leejtwg ntsejmuag, rauqhov koj tsis saib meejmom li. 17 Yog li ntawd, koj hais qhovtwg zoo rau peb: Puas tsimnyog them se taubhau rau Fajtim lossis tsis them?”
18 Tabsis vim Yexus tau paub lawv txojkev phem, Nws tau teb tias, “Cas nej sim kuv, cov niag xyuam plhu? 19 Muab lub txiaj them se taubhau rau kuv saib seb.” Lawv tau cev lub txiaj denalis rau Nws. 20 Nws tau nug lawv tias, “Leejtwg lub ntsejmuag thiab tej lus?”
21 Lawv tau teb Nws tias, “Fajtim li.”
Ces Nws tau hais rau lawv tias, “Yog li ntawd, muab Fajtim tug rau Fajtim thiab Vajtswv Ntuj tug rau Vajtswv Ntuj.” 22 Hnov li no, lawv tau xav tsis thoob. Lawv tau tso Nws tseg thiab tau tawm mus.
Cov Tuag Kev Sawv Rovlos
Mak 12:18-27; Luk 20:27-40
23 Tib hnub ntawd, cov Xadukais, uas hais tias tsis muaj kev sawv ntawm cov tuag rovlos, tau tuaj rau ntawm Yexus thiab nug Nws 24 tias, “Xibfwb, Mauxes tau hais tias, ‘Yog leejtwg tuag tsis tau muaj menyuam, ces nws tus kwv yuavtsum yuav nws tus pojniam thiab yug menyuam rau tus tijlaug npe.’ 25 Nimno, nruab nrab peb tau muaj xya tus kwvtij. Tus hlob tau yuav pojniam thiab tau tuag thaum tsis muaj menyuam, thiab tau tseg nws tus pojniam rau tus kwv. 26 Qhov no tau tshwm rau tus ob, tus peb thiab mus txog rau tus xya. 27 Thaum kawg, tus pojniam tau tuag lawm thiab. 28 Yog li ntawd, thaum cov tuag sawv rovlos, tus pojniam no yuav yog leejtwg tug, ntawm xya leej ntawd? Vim lawv puavleej tau yuav nws.”
29 Yexus tau teb thiab hais rau lawv tias, “Nej plaskev vim nej tsis paub vajlugkub thiab Vajtswv Ntuj lub hwjchim. 30 Rauqhov thaum cov tuag sawv rovlos, lawv tsis yuav pojniam lossis yuav txiv, tabsis lawv yuav zoo li cov timtswv saum ntuj. 31 Ntsig txog cov tuag kev sawv rovlos ntawd, nej tsis tau nyeem lolus Vajtswv Ntuj tau hais rau nej tias, 32 ‘Kuv yog Anplahas tus Vajtswv, Ixaj tus Vajtswv thiab Yakhauj tus Vajtswv’ lod? Nws tsis yog cov tuag tus Vajtswv tabsis yog cov muajsia tus.”
33 Thaum tej neeg coobcoob hnov li ntawd, lawv tau xav tsis thoob txog Nws zaj lus qhia.
Nqe Kevcai Loj Tshajplaws
Mak 12:28-31
34 Thaum cov Falixais hnov tias Nws tau xauv cov Xadukais tej qhovncauj, lawv tau sibsau uake 35 thiab lawv ib tug xibfwb qhia Kevcai tau sim Yexus tias, 36 “Xibfwb, nqe kevcai twg loj dua tej kevcai tibsi?”
37 Yexus tau teb tias, “Hlub tus Tswv, koj tus Vajtswv Ntuj, kawg koj lub siab, kawg koj tuskheej, thiab kawg koj txojkev xav. 38 Nqe no yog nqe loj dua thiab yog thawj nqe Kevcai. 39 Nqe ob kuj zoo li thiab: ‘Hlub tus ntawm koj togtsev yam li tuskheej.’ 40 Txhua nqe hauv Kevcai thiab tej cevlus puavleej khi rau ntawm ob nqe Kevcai no.”
Khetos Yog Leejtwg Tub?
Mak 12:35-37; Luk 20:41-44
41 Thaum cov Falixais sibsau uake, Yexus tau nug lawv 42 tias, “Ntsig txog Khetos, nej xav tias qhovtwg yog? Nws yog leejtwg tus tub?”
Lawv tau teb tias, “Daviv tus Tub.”
43 Nws tau hais rau lawv tias, “Yog li ntawd, ua cas Daviv ho hu Nws ua tus Tswv hauv ntsujplig li no:

44 ‘Nws tau hais rau kuv tus Tswv tias,
“Zaum ntawm kuv sab xis,
mus txog thaum kuv muab koj cov yeebncuab
rau koj tsuj?”’”

45 “Ces yog Daviv tau hu Nws ua tus Tswv, Khetos yov ua li cas yog nws tus tub?” 46 Tsis muaj ib tug hauv lawv cov ntawd muaj peevxwm teb tau Yexus txojlus nug, thiab txij hnub ntawd, tsis muaj leejtwg nug Nws ntxiv lawm.
23
Xya Txojkev Vijnpog
Mak 12:38-39; Luk 13:34-35; 20:45-46
1 Ces Yexus tau hais rau tej neeg coobcoob thiab Nws cov thwjtim 2 tias, “Cov xibfwb qhia Kevcai thiab cov Falixais zaum Mauxes lub rooj. 3 Yog li ntawd, coj thiab ua txhua yam uas lawv qhia rau nej. Tabsis txhob ua raws li lawv ua, rauqhov lawv hais tau tabsis lawv ua tsis tau. 4 Lawv nog tej lub nra hnyavhnyav uas ris tsis sawv thiab muab tso rau neeg lub xubpwg, tabsis lawv tsis xav muab lawv tus ntiv tes nqa tej nra ntawd li.”
5 “Lawv ua txhua tes haujlwm rau neeg pom: Rauqhov lawv xaws tej hnab ntim vajlugkub lojloj thiab tej kab lws ntev ntev, 6 lawv nyiam zaum tej haurooj saum roojnoj thiab thawj leej rooj hauv txoos sablaj, 7 thiab kom neeg hwm lawv hauv tej kiabkhw thiab hu lawv ua xibfwb.”
8 “Tabsis txhob cia nej raug hu ua xibfwb. Rauqhov tsuas muaj tibleeg thiaj yog nej tus xibfwb xwb, hos nej sawvdaws puavleej yog kwvtij. 9 Txhob hu leejtwg ua “Txiv” hauv ntiajteb, vim tias nej sawvdaws muaj tibleeg Txiv nyob saum ntuj xwb. 10 Txhob cia nej raug hu ua cov xibfwb kev ntseeg, rauqhov ib tug thiaj yog nej tus xibfwb kev ntseeg xwb, xws li Khetos. 11 Hos tus loj dua nruab nrab nej yuavtsum yog tus tiam nej. 12 Tus uas tsa tuskheej siab yuav raug txo kom qis, thiab tus uas txo tuskheej qis yuav raug tsa kom siab.”
13 “Vijnpog rau nej, cov xibfwb qhia Kevcai thiab cov Falixais xyuam plhu! Nej kaw lub tswvkuj saum ntuj rau ntawm neeg xubntiag. Txawm nej tsis nkag mus los, nej tseem tsis zam kev rau cov uas yuav nkag mus rau hauv.”c
15 “Vijnpog rau nej, cov xibfwb qhia Kevcai thiab cov Falixais xyuam plhu! Nej hla hiavtxwv thiab tojroob hauvpes mus muab ib tug neeg kiavxeem, tabsis thaum nws peemtsheej lawm, nej ho ua rau nws ntxim mus rau ntujtawg tshaj nej ob npaug.”
16 “Vijnpog rau nej cov uas hu tuskheej ua cov coj neeg digmuag! Nej qhia tias, ‘Leejtwg twv rau lub tuamtsev, nws tsis tshuav nqi dabtsi; tabsis yog leejtwg twv rau cov kub hauv lub tuamtsev, nws tshuav nqi.’ 17 Cov niag ruam thiab digmuag! Dabtsi loj dua, cov kub lossis lub tuamtsev uas ua rau cov kub dawbhuv? 18 Thiab nej qhia tias, ‘Yog leejtwg twv rau lub thaj, nws tsis tshuav nqi dabtsi; tabsis yog leejtwg twv rau qhov khoom fij saum lub thaj, nws tshuav nqi.’ 19 Cov niag digmuag! Dabtsi loj dua, qhov khoom lossis lub thaj uas ua rau qhov khoom dawbhuv? 20 Yog li ntawd, tus uas twv rau lub thaj kuj twv rau lub thaj thiab txhua yam nyob rau saud. 21 Tus uas twv rau lub tuamtsev kuj twv rau tus uas nyob hauv lub tuamtsev. 22 Thiab tus uas twv rau saum ntuj kuj twv rau Vajtswv Ntuj lub zwmtxwv thiab rau tus uas zaum rau saud.”
23 “Vijnpog rau nej cov xibfwb qhia Kevcai thiab cov Falixais xyuam plhu! Nej muab ib feem kaum ntawm tej txujlom, pumhub thiab xyabtxob; tabsis nej ho muab tej uas tseemceeb dua saum Kevcai tso tseg, xws li kev txiavtxim ncajncees, kev tabncuab, thiab kev ntseeg. Nws cheemtsum rau nej ua tej no thiab txhob muab tej ntawd tso tseg. 24 Cov niag cojke digmuag! Nej nti tus nyuag tshajcum tawm, tabsis tej niag tus ntxhuav nej ho nqos pes lum.”
25 “Vijnpog rau nej cov xibfwb qhia Kevcai thiab cov Falixais xyuam plhu! Nej tau ntxuav lub khob thiab lub ntim sab nraud, tabsis sab hauv mas puvnpo kev vumloj thiab kev siab hlob. 26 Cov Falixais digmuag! Xub ntxuav lub khob sab hauv, ces sab nraud thiaj li yuav huv.”
27 “Vijnpog rau nej cov xibfwb qhia Kevcai thiab cov Falixais xyuam plhu! Nej zoo li tej ntxa raug vuam dawbpaug! Nej raug qhovmuag saib sab nraud, tabsis sab hauv puv nkaus tej txha neeg tuag thiab tej tsis huv. 28 Nej sab nraud tshwm rau neeg pom li cov neeg ncajncees, tabsis sab hauv nej puvnkaus kev xyuam plhu thiab kev tsis cojcai.”
29 “Vijnpog rau nej cov xibfwb qhia Kevcai thiab cov Falixais xyuam plhu! Nej txhim cov cevlus tej ntxa thiab vuam tej neeg ncajncees tej ntxa kom zoo nkauj, 30 thiab nej hais tias, ‘Yog peb tau nyob nrog peb tej yawgkoob, peb yov tsis ua cov koomtes rau cov cevlus tej ntshav.’ 31 Yog li no, nej ua timkhawv tawmtsam nej tias nej yog cov tua cov cevlus tej tub ntag. 32 Nej kavtsij ua kom nej tej yawgkoob tes haujlwm tiav.”
33 “Cov niag nab! Cov niag nab xya! Nej yov ua li cas khiav dhau txojkev txiavtxim mus rau ntujtawg? 34 Vim li no, saib mas, kuv samsim xa cov cevlus, cov muaj tswvyim thiab cov xibfwb qhia Kevcai los rau nej. Ntawm lawv cov ntawd, nej yuav tua ibtxhia, yuav ntsia ibtxhia rau saum khaublig, yuav nplawm ibtxhia hauv nej tej txoos sablaj, thiab yuav tsimtxom ibtxhia hauv ib lub nroog mus rau ib lub nroog. 35 Li no, tagnrho tej neeg ncajncees cov ntshav, uas twb nchuav rau saum av, yuav poob rau saum nej, txij li Anpees tus dawbhuv cov ntshav los txog rau Npalakhis tus tub Xakhaliyas cov ntshav, tus uas nej tau tua nruab nrab lub tuamtsev thiab lub thaj. 36 Tseeb tiag kuv hais rau nej, txhua yam ntawd twb los raug rau tiam neeg no lawm.”
37 “Yeluxalees os Yeluxalees, lub nroog uas tua cov cevlus thiab muab zeb ntaus cov raug xa los rau koj! Kuv tau xav qaws koj tej menyuam npaum li cas? Npaum li tus poj qaib xav qaws nws tej menyuam qaib rau hauv nws ob phab tis, tabsis koj tsis tau xav tso kev. 38 Saib lau, nej lub tsev yuav raug tso ua mojsab rau nej. 39 Kuv hais rau nej tias, nej yuav tsis pom kuv mus txog thaum nej hais rau kuv tias, ‘Qhuas tus uas los ntawm tus Tswv lub npe.’”
24
Tej Cim Thaum Kawg
Mak 13:1-37; Luk 21:5-36
1 Ces Yexus tau tawm ntawm lub tuamtsev thiab taugkev mus. Nws cov thwjtim tau los rau ntawm Nws thiab tau taw tes rau tej tsev ntxoovnyos ntawm lub tuamtsev. 2 Nws tau teb thiab hais rau lawv tias, “Nej pom tagnrho tej no lod? Tseeb tiag kuv hais rau nej tias, tej pobzeb no yuav tsis muaj ob lub sib tshooj uas yuav tsis raug muab rhuav.”
3 Thaum Yexus zaum saum roob txiv ntooroj, cov thwjtim nkaus xwb tau los cuag Nws thiab hais tias, “Qhia peb seb, thaum twg tej no yuav tshwmsim, thiab dabtsi yog lub cim txog koj kev rovlos thiab txog lub sijhawm kawg.”
4 Ces Yexus tau teb thiab hais rau lawv tias: “Ceevfaj, txhob cia leejtwg coj nej plaskev. 5 Rauqhov coob leej yuav los ntawm kuv lub npe thiab hais tias, ‘Kuv yog Khetos’ thiab ntau leej yuav plaskev.”
6 “Tabsis nej yuav hnov txog tsovrog thiab tej xovxwm tsovrog. Nej yuav pom tabsis txhob poob siab, rauqhov tej ntawd cheemtsum yuav muaj, tabsis nws tsis yog qhov kawg. 7 Rauqhov ib haivneeg yuav sawv tawmtsam ib haivneeg, ib lub tswvkuj yuav sawv tawmtsam ib lub tswvkuj, kev tshaib nqhis thiab av qeeg yuav muaj rau txhua qhov. 8 Tabsis txhua yam no tsuas yog kev chiv mobplab yug menyuam xwb.”
9 “Thaum ntawd, lawv yuav ntes nej mus rau kev txomnyem thiab lawv yuav tua nej, thiab nej yuav raug txhua haivneeg ntxub vim kuv lub npe. 10 Ces coob leej yuav dawm ntog, ibleeg ntxeevsiab rau ibleeg thiab ibleeg ntxub ibleeg. 11 Ntau tus cevlus cuav yuav sawv thiab yuav coj coob leej plaskev. 12 Vim kev tsis cojcai yuav huamvam, ntau leej txojkev hlub yuav txias. 13 Tabsis tus uas ua siab ntev mus txog qhov kawg yuav dim. 14 Thaum txojmoo zoo txog lub tswvkuj no raug tshajtawm mus thoob plaws ntiajteb, mus ua timkhawv rau pejkum neeg txhua nrho, ces qhov kawg los txog.”
15 “Yog li ntawd, thaum nej pom txojkev phem kev puasntsoog nyob saum lub chaw dawbhuv li tus cevlus Daniees lolus (cia tus nyeem totaub), 16 mas cia cov nyob hauv Yudas khiav mus rau saum roob, 17 cia tus nyob saum ruv tsev txhob nqis mus nqa dabtsi tawm hauv nws lub tsev, 18 thiab cia tus nyob tom teb txhob rovmus nqa nws lub tsholoj. 19 Kev vijnpog yuav raug cov pojniam xeebtub thiab muaj menyuam noj mis lub sijhawm ntawd.”
20 “Thov Vajtswv kom nej kev khiav txhob yog lub caij ntuj no lossis hnub Xanpataus, 21 rauqhov txojkev txomnyem yuav loj heev, uas tsis tau muaj dua thaum chivkeeb lub cejntug los txog rau nimno thiab yuav tsis muaj ib zaug ntxiv lawm. 22 Yog lub caijnyoog ntawd tsis raug txiav kom luv, txhua leej neeg yuav tsis dim; tabsis vim cov raug xaiv, lub caijnyoog ntawd yuav raug txiav kom luv.”
23 “Ces yog leejtwg hais rau nej: ‘Saib mas, Khetos nyob ntawm no,’ lossis ‘nyob tod,’ txhob ntseeg! 24 Rauqhov cov khetos cuav thiab cov cevlus cuav yuav sawv los thiab lawv yuav muab tej cim loj thiab txujci los ntxias cov raug xaiv kom plaskev, yog lawv muaj peevxwm ua tau. 25 Nimno kuv twb qhia nej lawm.”
26 “Yog li ntawd, yog lawv hais rau nej tias: ‘Saib mas, nws nyob tom mojsab qhua,’ txhob tawm mus! Lossis ‘Saib mas, nws nyob hauv nrog tsev,’ txhob ntseeg! 27 Rauqhov xob yuav laim tawm tim hnubtuaj thiab ci mus txog rau hnubpoob li cas, Neeg Leej Tub kev rovlos yuav zoo li ntawd: 28 Tsiaj tuag nyob qhov twg, dav noj nyug yuav sibsau rau qhov ntawd.”
29 “Lub sijhawm tomqab txojkev txomnyem ntawd kiag:”

“‘Lub hnub yuav tsaus ntais,
thiab lub hli yuav tsis muaj nws tus duab ci;
tej hnubqub yuav poob saum nruab ntug,
thiab tej hwjchim saum nruab ntug yuav qeeg.’”

30 “Thaum ntawd, Neeg Leej Tub lub cim yuav ci saum ntuj tuaj. Ces txhua xeem neeg hauv ntiajteb yuav raug hlaisa thiab yuav pom Neeg Leej Tub nqis pem ntuj saum cov huab los nrog hwjchim thiab tshwjchim loj. 31 Nws yuav xa Nws cov timtswv nrog ib lub suab raj nrovnrov, thiab lawv yuav sau cov uas Nws tau xaiv lawm tawm los ntawm plaub nthwv cua, ib ceg kaum ntuj mus rau ib ceg kaum ntuj.”
32 “Nej kawm zaj luspiv ntawm tsob txiv ncuavpias: Thaum nws tej ceg pib ua cos thiab tej nplooj hlav, nej paub tias nws yuav txog lub caij ntuj kub. 33 Ibyam li ntawd, thaum nej pom tej xwm no, nej paub tias hnub ntawd nyob ze ntawm tej qhovrooj. 34 Tseeb tiag kuv hais rau nej tias, tiam no yuav tsis dua mus uantej tej xwm no tshwmsim. 35 Lub ntuj thiab ntiajteb yuav dua mus, tabsis kuv txojlus no yeej yuav tsis dua mus.”
Tsis Paub Hnub Thiab Txoov Teev
Luk 12:42-46; 17:26-27
36 “Ntsig txog hnub ntawd thiab lub sijhawm ntawd, tsis muaj leejtwg paub, tsis hais cov timtswv saum ntuj lossis Leej Tub, tsuas yog Leej Txiv tibleeg xwb. 37 Rauqhov Naues lub sijhawm zoo li cas, thaum Neeg Leej Tub rovlos yuav zoo li ntawd. 38 Lub sijhawm uantej dej nyab, lawv tau nyob, noj, haus, yuav nyab, thiab qua ntxhais mus txog hnub Naues tau nkag rau hauv nkoj. 39 Lawv tsis tau paub mus txog thaum dej tau los nyab thiab kuav txhua tsav. Hnub Neeg Leej Tub rovlos yuav zoo ibyam li ntawd. 40 Thaum ntawd, ob tug txivneej yuav nyob tom teb, ib tug yuav raug coj thiab ib tug yuav raug tsotseg. 41 Ob tug pojniam zom ib lub zeb, ib tug yuav raug coj thiab ib tug yuav raug tsotseg.”
42 “Yog li ntawd, txhob tsaugzog, rauqhov nej tsis paub hnub twg nej tus Tswv yuav los. 43 Tabsis nej paub qhov no tias: Yog tus tswv tsev paub tias lub sijhawm twg tus tubsab yuav tuaj, nws yov tsis tsaugzog thiab tsis tso nws lub tsev raug tsoo. 44 Vim li no, nej kuj yuav yog cov npaj txhij, rauqhov nej tsis paub lub sijhawm twg Neeg Leej Tub yuav los.”
Tus Tubtxib Ncajncees
45 “Leejtwg yog tus tubtxib ncajncees thiab ntse, uas tus tswv tau tsa los saib nws lub cuabtam, kom nws muab mov rau sawvdaws noj raws caijnyoog? 46 Tau koobhmoov yog tus tubtxib uas thaum nws tus tswv los, tus tswv pom nws ua raws nraim li ntawd. 47 Tseeb tiag kuv hais rau nej tias, tus tswv yuav tsa tus ntawd saib tagnrho nws lub cuabtam. 48 Tabsis yog tus tubtxib ntawd ua neeg phem, nws yov hais hauv nws lub siab tias, ‘Kuv tus tswv qeeb lawm,’ 49 nws txawm pib muab tej kwvluag ntaus thiab nws noj thiab haus nrog cov quavcawv. 50 Mas tus tubtxib ntawd tus tswv yuav los hnub uas nws tsis npaj thiab lub sijhawm uas nws tsis paub, 51 thiab muab tus tubtxib ntawd txiav ua ob ya thiab muab nws tso nrog cov neeg xyuam plhu. Qhov ntawd yuav muaj kev quaj thiab kev zom hniav qev.”
25
Luspiv Txog Kaum Tus Nkaujxwb
1 “Ces lub tswvkuj saum ntuj yuav piv li kaum tus nkaujxwb, uas tau nqa lawv tej teeb tawm mus tos tus nraug vauv. 2 Nimno tsib tug yog cov ruam thiab tsib tug yog cov ntse. 3 Tsib tug ruam tau nqa lawv tej teeb tabsis tsis tau nqa roj nrog lawv. 4 Tabsis tsib tug ntse tau nqa roj hauv lamhwj nrog rau lawv tej teeb. 5 Vim tus nraug vauv tau laug sijhawm, tagnrho cov nkaujxwb tau nkees thiab tau tsaugzog.”
6 “Thaum ib taghmo, ib lub suab tau qw tias: ‘Saib lau, tus nraug vauv los txog lawm! Tawm mus ntsib nws!’”
7 “Ces tagnrho cov nkaujxwb tau tsim dheev thiab lawv nyias tau qhib nyias lub teeb. 8 Cov ruam tau hais rau cov ntse tias, ‘Muab nej ib cov roj rau peb, rauqhov peb cov teeb tabtom tuag.’”
9 “Tabsis cov ntse tau teb tias, ‘Txhob ua li, cov roj yeej tsis txaus rau peb thiab nej. Tawm mus nrhiav tej neeg muag roj thiab muas rau nej mas zoo tshaj.’”
10 “Sijhawm lawv tabtom mus muas roj, tus nraug vauv tau los txog. Cov uas npaj txhij tau nkag nrog nws mus rau hauv roojtshoob. Lub qhovrooj tau raug kaw.”
11 “Tomqab ntawd cov nkaujxwb ruam kuj tau los txog. Lawv tau hu tias, ‘Tus Tswv, qhib qhovrooj rau peb os.’”
12 “Tabsis nws tau teb thiab hais tias, ‘Tseeb tiag kuv hais rau nej, kuv tsis paub nej.’”
13 “Yog li ntawd, txhob tsaugzog, rauqhov nej tsis paub hnub thiab lub sijhawm ntawd.”
Luspiv Txog Tuam Lospav Faib Nyiaj
Luk 19:12-27
14 “Rauqhov lub tswvkuj zoo li ib tug txivneej uas tau tawm mus kev deb. Nws tau hu nws cov tubtxib los thiab tau muab nws lub cuabtam faib rau lawv. 15 Rau ib tug nws tau muab tsib hub nyiaj, rau ib tug nws muab ob hub nyiaj, thiab rau ib tug nws tau muab ib hub nyiaj, raws li lawv lub peevxwm. Ces nws tau tawm mus tamsis.”
16 “Tomqab tawm mus, tus uas tau txais tsib hub nyiaj tau muab cov nyiaj ntawd ua luam thiab tau tsam tsib hub ntxiv. 17 Ibyam li ntawd, tus uas tau ob hub nyiaj kuj tau ua luam tsam ob hub ntxiv. 18 Tabsis tus tau txais ib hub nyiaj, thaum nws tawm mus, nws tau khawb qhov thiab muab nws tus tswv hub nyiaj faus hauv av tseg.”
19 “Sijhawm ntev tau dhau mus, ces cov tubtxib ntawd tus tswv tau rovlos thiab tau taug lawv lub neej. 20 Thaum tus tau tsib hub nyiaj tuaj, nws tau nqa tsib hub ntxiv thiab. Nws tau hais tias, ‘Tus tswv, koj tau muab tsib hub rau kuv, tabsis koj saib, kuv tau tsam tsib hub ntxiv.’”
21 “Tus tswv tau teb nws tias, ‘Zoo ntau, tus tubtxib zoo thiab ncajncees. Koj tau ncajncees rau qhov tsawg, kuv yuav tsa koj saib ntau yam. Nkag los rau hauv koj tus tswv txojkev zoo siab.’”
22 “Thiab thaum tus tau ob hub nyiaj tuaj, nws tau hais tias, ‘Tus tswv, koj tau muab ob hub rau kuv, tabsis koj saib, kuv tau tsam ob hub ntxiv.’”
23 “Nws tus tswv tau teb tias, ‘Zoo ntau, tus tubtxib zoo thiab ncajncees. Koj tau ncajncees rau qhov tsawg, kuv yuav tsa koj saib ntau yam. Nkag los rau hauv koj tus tswv txojkev zoo siab.’”
24 “Tabsis thaum tus tau ib hub nyiaj tuaj txog, nws tau hais tias, ‘Tus tswv, kuv paub tias koj yog ib tug heev neeg. Koj hlais tej uas koj tsis tau cog thiab sau tej uas koj tsis tau tseb. 25 Ces vim kuv ntshai koj, thaum kuv mus, kuv tau muab hub nyiaj faus hauv av. Saib mas, koj cov nyiaj.’”
26 “Nws tus tswv tau teb thiab hais tias, ‘Niag tubtxib phem thiab tubnkeeg, koj twb paub meej tias kuv hlais tej uas kuv tsis tau cog thiab sau tej uas kuv tsis tseb sav? 27 Koj tsimnyog muab kuv tej nyiaj mus tso rau tus ualuam nyiaj, es thaum kuv rovlos kuv thiaj tau kuv cov nyiaj nrog paj.”
28 “Yog li ntawd, thau hub nyiaj no ntawm nws thiab muab rau tus uas muaj kaum hub.’ 29 Rauqhov rau tus uas muaj, luag yuav muab ntxiv; tabsis rau tus uas tsis muaj, txawm qhov nws muaj los, luag yuav muab rho ntawm nws. 30 Muab tus tubtxib tsis tsheejhaj no pov rau nraum zoov qhov tsausntuj. Qhov ntawd yuav muaj kev quaj thiab kev zom hniav qev.”
Cov Yaj thiab Cov Tshis
31 “Tabsis thaum Neeg Leej Tub los nrog Nws tus tshwjchim, thiab nrog Nws cov timtswv tagnrho, Nws yuav zaum saum Nws lub zwmtxwv ntomeej. 32 Txhua haivneeg yuav tuaj sibsau rau ntawm Nws xubntiag, thiab Nws yuav muab lawv cais, ibyam li tus tswv yaj muab cov yaj cais ntawm cov tshis. 33 Nws yuav muab cov yaj los sawv rau Nws sab xis, tabsis cov tshis rau sab laug.”
34 “Thaum ntawd Vajntxwv yuav hais rau cov ntawm Nws sab xis tias, ‘Los, nej cov uas raug kuv Txiv qhuas! Txais lub tswvkuj uas twb raug npaj rau nej thaum tsim lub cejntug ua nej tug. 35 Rauqhov thaum kuv tshaib, nej tau muab rau kuv noj; thaum kuv nqhis, nej tau muab rau kuv haus; thaum kuv ua qhua, nej tau hu kuv los so; 36 thaum kuv liab qab, nej tau muab tsoos rau kuv hnav; thaum kuv mob, nej tau xyuas kuv; thaum kuv nyob hauv tsev lojcuj, nej tau tuaj saib kuv.’”
37 “Thaum ntawd cov ncajncees yuav teb Nws tias, ‘Tus Tswv, thaum twg peb tau pom koj tshaib, es peb tau muab rau koj noj; lossis koj tau nqhis, es peb tau muab rau koj haus? 38 Thiab thaum twg peb tau pom koj ua qhua, es peb tau hu koj los so; lossis koj tau liab qab, es peb tau muab tsoos rau koj hnav? 39 Thiab thaum twg peb tau pom koj mob lossis nyob hauv tsev lojcuj, es peb tau tuaj xyuas koj?’”
40 “Ces Vajntxwv yuav teb thiab hais rau lawv tias, ‘Tseeb tiag kuv hais rau nej tias, thaum nej ua dabtsi rau tus me dua ntais ntawm kuv cov kwvtij no, nej tau ua rau kuv.’”
41 “Thaum ntawd Nws yuav hais rau cov nyob sab laug tias, ‘Nej cov raug tsawm, khiav ntawm kuv mus rau lub cubtawg ibtxhis, uas twb raug npaj rau ntxwgnyoog thiab nws cov timtswv. 42 Rauqhov thaum kuv tshaib, nej tsis tau muab rau kuv noj; thaum kuv nqhis, nej tsis tau muab rau kuv haus. 43 Thaum kuv ua qhua, nej tsis tau hu kuv los so; thaum kuv liab qab, nej tsis tau muab tsoos rau kuv hnav; thaum kuv mob thiab nyob hauv tsev lojcuj, nej tsis tau xyuas kuv.’”
44 “Ces lawv kuj yuav teb Nws tias, ‘Tus Tswv, thaum twg peb pom koj tshaib, nqhis, ua qhua, liab qab, mob, lossis nyob hauv tsev lojcuj, es peb tsis tau pab koj?’”
45 “Ces Nws yuav hais rau lawv tias, ‘Tseeb tiag kuv hais rau nej tias, thaum nej tsis ua dabtsi rau tus me dua ntais ntawm kuv cov kwvtij no, nej tsis tau ua rau kuv.’”
46 “Ces cov no yuav mus rau kev teemtxim ibtxhis, tabsis cov ncajncees yuav mus txais txojsia ibtxhis.”
26
Hais Txog Nws Kev Tuag Zaum Kawg
Mak 14:1-2; Luk 22:1-2
1 Tomqab xaus tej no tag, Yexus tau hais rau Nws cov thwjtim tias, 2 “Nej paub tias lub koobtsheej hladhau yuav los txog ob hnub saum no, ces Neeg Leej Tub yuav raug ntes mus ntsia saum khaublig.”
3 Sijhawm ntawd, cov povthawj hlob thiab cov txwjlaug ntawm haivneeg tau sibsau rau ntawm tus povthawj hlob uas hu ua Kaiyafas lub loog, 4 thiab lawv tau tawm tswvyim kom lawv cuab ntxiab ntes thiab tua Yexus. 5 Tabsis lawv tau hais tias, “Tsis yog hauv lub koobtsheej kom zejtsoom txhob kubntxhov.”
Raug Pleev Hauv Npethanis
Mak 14:3-9; Luk 7:37-38; Yhs 12:1-8
6 Lub sijhawm Yexus nyob hauv Npethanis, hauv Ximoos tus mob ruas lub tsev, 7 ib tug pojniam uas muaj ib hwj tshuaj tswqab kimkim tau tuaj rau ntawm Nws, thiab tau muab nchuav rau Nws taubhau thaum Nws zaum ntawm rooj mov.
8 Thaum pom li no, cov thwjtim tau npautaws thiab hais tias, “Cas yov muab nkim dabtsi li no? 9 Nws muaj peevxwm muab muag tau nyiaj ntau thiab muab pab cov pluag.”
10 Paub li ntawd, Yexus tau hais rau lawv tias, “Ua li cas nej ua teebmeem rau tus pojniam no? Rauqhov nws samsim ua ib teg haujlwm zoo rau kuv. 11 Nej yuav ibtxwm muaj cov pluag nrog nej, tabsis nej yuav tsis muaj kuv mus li. 12 Thaum nws nchuav tshuaj tsw qab rau kuv lub cev, nws tau npaj kuv lub cev mus faus. 13 Tseeb tiag kuv hais rau nej tias, txojmoo zoo raug tshajtawm mus txog qhovtwg thoob plaws lub cejntug, qhov uas tus pojniam no tau ua yuav raug hais ua chaw nco txog nws.”
Yudas Ikhalaus Ntxeevsiab
Mak 14:10-11; Luk 22:3-6
14 Ces ib tug hauv pab kaum-ob leeg, tus hu ua Yudas Ikhalaus, tau tawm mus cuag cov povthawj hlob. 15 Nws tau hais tias, “Nej tuajyeem muab dabtsi rau kuv, yog kuv ntes Yexus rau nej nas?” Lawv tau muab pebcaug lub npib nyiaj rau nws. 16 Ces txij hnub ntawd, nws tau nrhiav ib lub zoo sijhawm kom nws yuav ntes Yexus.
Pluas Mov Hladhau
Mak 14:12-25; Luk 22:7-13,17-20; 1 Klt 11:23-25
17 Txog rau thawj hnub hauv lub koobtsheej caiv keeb, cov thwjtim tau los cuag Yexus thiab hais tias, “Koj xav kom peb npaj pluas mov hladhau rau koj noj qhovtwg?”
18 Nws tau hais tias, “Mus rau ib tug txivneej hauv nroog thiab hais rau nws tias, ‘Xibfwb hais tias, kuv lub caij los ze lawm, kuv thiab kuv cov thwjtim yuav ua pluas mov hladhau rau ntawm koj.’” 19 Cov thwjtim tau ua li Yexus tau tawmlus rau lawv thiab lawv tau npaj pluas mov hladhau.
20 Thaum tsausntuj los, Yexus tau zaum noj hmo nrog Nws cov thwjtim. 21 Lub sijhawm lawv noj hmo, Nws tau hais tias, “Tseeb tiag kuv hais rau nej tias, nej ib tug yuav ntxeevsiab rau kuv.”
22 Lawv tau ntxhovsiab heev, thiab lawv nyias tau hais nyias rau Nws tias, “Tsis yog kuv pod, tus Tswv?”
23 Tabsis Nws tau teb lawv thiab hais tias, “Tus uas tau cev tes tuaj ntsw kuatxob hauv lub tais nrog kuv, nws yuav ntxeevsiab rau kuv. 24 Neeg Leej Tub yeej yuav mus raws li twb sau tseg lawm, tabsis vijnpog rau tus neeg uas tau ntxeevsiab rau Neeg Leej Tub. Kheev tus neeg ntawd txhob tau yug los mas zoo dua.”
25 Ces Yudas, tus ntxeevsiab, tau teb thiab hais tias, “Tsis lam yog kuv pod, Lanpis?”
Yexus tau hais tias, “Koj twb lees lawm.”
26 Sijhawm lawv noj hmo, Yexus tau muab ib lub movci los ua tsaug; Nws tau muab ntais thiab cev rau cov thwjtim. Ces Nws tau hais tias, “Txais noj. Qhov no yog kuv lub cev.”
27 Nws tau muab lub khob los ua tsaug; ces Nws tau muab cev rau lawv thiab hais tias, “Haus lub khob no, nej txhua tus, 28 rauqhov lub khob no yog kuv cov ntshav saum tus txhooj uas raug nchuav ua kev zamtxim rau coob leej. 29 Kuv hais rau nej tias, kuv yuav tsis haus cov kua txivhmab no mus txog thaum kuv haus dua tshiab nrog nej hauv kuv Txiv lub tswvkuj.”
30 Ces tomqab lawv hu ib zaj nkauj, lawv tau tawm mus rau saum roob txiv ntooroj.
Qhia Txog Petus Kev Tsis Lees
Mak 14:27-31; Luk 22:31-34
31 Thaum ntawd Yexus tau hais rau lawv tias, “Nej sawvdaws yuav ntog saum kuv hmo no, rauqhov twb sau tseg tias:

‘Kuv yuav ntaus tus tswv yaj,
thiab pab yaj yuav tawg rirws.’”

32 “Tabsis tomqab kuv sawv rovlos, kuv yuav mus uantej nej rau pem Kalilais.”
33 Petus tau teb Nws tias, “Txawm tagnrho lawv yuav ntog saum koj, kuv yuav tsis ntog ib zaug li.”
34 Yexus tau hais rau nws tias, “Tseeb tiag kuv hais rau koj tias, hmo no uantej qaib qua, koj yuav tsis lees kuv peb zaug.”
35 Petus tau hais rau Nws tias, “Txawm kuv cheemtsum tuag nrog koj, los kuv yeej yuav tsis khiav ntawm koj.” Cov thwjtim tagnrho kuj tau hais ibyam nkaus.
Hauv Nkexemanes
Mak 14:32-42; Luk 22:40-46
36 Ces Yexus tau nrog lawv mus rau qhov chaw uas hu ua Nkexemanes. Nws tau hais rau cov thwjtim tias, “Zaum ntawm no, hos kuv yuav mus thov Vajtswv tod.” 37 Nws tau coj Petus thiab Xenpedais ob tug tub nrog Nws, thiab Nws tau pib ntxhovsiab thiab lwjsiab. 38 Ces Nws tau hais rau lawv tias, “Kuv tuskheej ntxhovsiab txog qhov kuv tuag taus. Txhob tsaugzog thiab nyob ntawm no nrog kuv.”
39 Mus zoj ib nyuag ncua kev tomntej, Nws tau vau kiag ntsejmuag uantej loo thiab thov Vajtswv tias, “Kuv Txiv, yog ua tau, cia lub khob no dhau ntawm kuv mus. Txhob ua li kuv xav tau, tabsis li koj tus dejsiab.”
40 Nws tau los rau ntawm cov thwjtim thiab pom lawv pw tsaugzog. Nws tau hais rau Petus tias, “Koj tsis muaj zog kom txhob tsaugzog ib nyuag txoovteev nrog kuv lod? 41 Txhob tsaugzog thiab thov Vajtswv, kom nej txhob nkag rau kev simsiab. Tus ntsujplig nquag plias tabsis lub cev tuag vias.”
42 Nws tau rovqab ncaim thiab tau thov Vajtswv tias, “Kuv Txiv, yog qhov no dhau tsis taus mus, tshwj kuv yuavtsum haus xwb, ces cia koj tus dejsiab tiav.”
43 Thaum Nws rovqab los, Nws tau pom lawv pw tsaugzog vim lawv tej qhovmuag kawnti. 44 Tso lawv tseg, Nws tau rovqab mus thiab tau thov Vajtswv zaum peb, hais txojlus qub.
45 Ces Nws tau rovqab los rau ntawm cov thwjtim thiab hais rau lawv tias, “Pw tsaugzog thiab so mentsis lod? Saib, lub sijhawm twb los txog thiab Neeg Leej Tub samsim raug ntes mus rau tej neeg txhaum tes. 46 Sawv, cia peb mus. Saib mas, tus ntxeevsiab rau kuv twb tuaj txog.”
Yexus Raug Ntes
Mak 14:43-50; Luk 22:47-53
47 Thaum Yexus samsim hais lus, saib mas, Yudas, ib tug hauv pab kaum-ob leeg ntawd, tau tuaj txog thiab ib pab neeg coobcoob tau nrog nws tuaj, ke nqa ntaj thiab nqa qws. Lawv tau tawm ntawm cov povthawj hlob thiab cov txwjlaug hauv haivneeg tuaj. 48 Tabsis tus uas ntxeevsiab rau Yexus tau muab ib lub cim rau lawv tias, “Kuv nwj tus twg, tus ntawd thiaj yog, ces nej yuavtsum ntes Nws kiag.” 49 Tamsis ntawd nws tau los rau ntawm Yexus thiab hais tias, “Nyob zoo Lanpis,” thiab nws tau nwj kiag Yexus.
50 Tabsis Yexus tau hais rau nws tias, “Kwvluag, koj tuaj ua qhov no!”
Ces thaum lawv los, lawv tau mos nto Yexus thiab muab Nws khi. 51 Nimno ib tug hauv cov nrog Yexus ntawd tau cev tes mus thau nws rab ntaj, thiab nws tau ibntag rau tus povthawj hlob tus tubtxib, txiav kiag nws ib daim nploojntseg.
52 Ces Yexus tau hais rau nws tias, “Muab koj rab ntaj rau qhov qub chaw, rauqhov txhua tus uas siv ntaj yuav tuag rau hniav ntaj. 53 Koj xav tias kuv tsis muaj peevxwm hu kuv Txiv, thiab Nws yuav xa tshaj kaum-ob roob timtswv tuaj ntawm no lod? 54 Yog li ntawd, tej Vajlugkub yuav tiav li cas, tej uas hais tias nws cheemtsum yuav tshwmsim li no?”
55 Lub sijhawm ntawd Yexus tau hais rau pab neeg coobcoob tias, “Nej tau nqa ntaj thiab qws tuaj ntes kuv li ib tug neeg ntxeev nomtswv lod? Ib hnub dhau ib hnub, kuv tau zaum qhuabqhia hauv lub loog tuamtsev thiab nej tsis tau ntes kuv. 56 Tabsis txhua yam no tau tshwmsim kom cov cevlus tej vajlugkub yuav tiav taus.” Ces tagnrho cov thwjtim tau tso Nws tseg thiab tau khiav mus.
Sawv Ntawm Kaiyafas Xubntiag
Mak 14:53-65; Yhs 18:12-13,19-24
57 Cov neeg ntes Yexus ntawd tau coj Nws mus rau tus povthawj hlob Kaiyafas, ntawm qhov chaw uas cov xibfwb qhia Kevcai thiab cov txwjlaug tau sibsau uake. 58 Tabsis Petus tau caum Nws qab, ib nyuag ntu kev deb, los txog rau ntawm tus povthawj hlob lub loog. Tomqab nkag los rau sab hauv, nws tau zaum nrog cov tubtxib saib qhov xwmtxheej no xaus.
59 Cov povthawj hlob thiab lub rooj Xuhenris tagnrho tau nrhiav povthawj cuav nkaug Yexus, kom lawv tau muab Nws tua. 60 Tabsis lawv tau nrhiav tsis muaj ntau tus povthawj cuav.
Tomqab ntawd ob tug tau tuaj 61 thiab hais tias, “Nws tau hais tias, ‘Kuv muaj peevxwm rhuav Vajtswv Ntuj lub tuamtsev thiab peb hnub kuv yuav tsa dua tshiab.’”
62 Ces tus povthawj hlob tau sawv thiab hais rau Yexus tias, “Koj tsis hais li cas txog tej uas nkawv tau ua timkhawv nkaug koj lod?” 63 Tabsis Yexus tau nyob ntsiagto.
Ces tus povthawj hlob tau hais rau Yexus tias, “Kuv muab koj tsates rau ntawm Vajtswv Ntuj tus muajsia, kom koj teb rau peb seb koj puas yog Khetos, Vajtswv Ntuj tus Tub.”
64 Yexus tau teb nws tias, “Koj tau hais lawm. Tabsis kuv hais rau nej tias, txij no mus nej yuav pom Neeg Leej Tub zaum ntawm tus Muaj Hwjchim sab xis, thiab nqis saum cov huab dawb saum ntuj los.”
65 Ces tus povthawj hlob tau dua nws lub tsholoj thiab hais tias, “Nws tau tuammom Vajtswv Ntuj. Peb cheemtsum muab timkhawv dabtsi ntxiv? Saib! Nimno nej tau hnov txojkev tuammom. 66 Nej xav li cas?”
Lawv tau teb thiab hais tias, “Nws tsimnyog tuag!”
67 Thaum ntawd lawv tau nti qaubncaug rau Nws lub ntsejmuag thiab tau tshum nrig rau Nws. Lawv tau tawgncuav rau Nws 68 thiab nug tias, “Khetos, cevlus rau peb seb, leejtwg yog tus ntaus koj?”
Petus Tsis Lees Paub Yexus
Mak 14:66-72; Luk 22:55-62; Yhs 18:16-18,25-27
69 Tabsis Petus tau zaum nraum lub loog. Ib tug ntxhais txib tau los rau ntawm nws thiab hais tias, “Koj yog ib tug nrog Yexus tus neeg Kalilais thiab.”
70 Petus tau tsis lees tim ntsejmuag txhua leej tias, “Kuv tsis paub koj hais dabtsi as.”
71 Tomqab nws tawm mus rau tom lub roojvag, dua ib tug ntxhais txib tau pom nws thiab hais rau cov nyob ntawd tias, “Tus no yog tus nrog Yexus neeg Naxalev.”
72 Ces nws tau twvntxhias thiab hais tias, “Kuv tsis paub tus neeg ntawd.”
73 Tomqab ntawd mentsis, cov uas sawv ntawd tau los rau ntawm Petus thiab hais rau nws tias, “Tseeb tiag, koj yog ib tug hauv lawv, thiab koj lub niag suab qhia tseeb txog koj.”
74 Thaum ntawd nws tau pib tsawm thiab twvntxhias tias, “Kuv tsis paub tus neeg ntawd.”
Tamsis ntawd, qaib tau qua. 75 Ces Petus tau ras dheev txog lolus uas Yexus tau hais tias, “Uantej qaib qua, koj yuav tsis lees paub kuv peb zaug.” Nws tau tawm sab nraud thiab quaj tusiab heev.
27
Kev Txiavtxim Tua Yexus
1 Thaum sawvntxov, tagnrho cov povthawj hlob thiab cov txwjlaug hauv haivneeg tau tuavhauv nkaug Yexus, seb yuav tua Nws li cas. 2 Thaum muab Nws pav lawm, lawv tau coj Nws thiab ntxeev Nws rau Philaj, tus kavxeev.
3 Thaum Yudas, tus ntxeevsiab, tau pom tias Yexus raug txiavtxim tuag, nws tau tusiab rau tuskheej thiab tau xa pebcaug lub npib nyiaj mus rau cov povthawj hlob thiab cov txwjlaug. 4 Nws tau hais tias, “Kuv tau ua txhaum vim kuv tau ntxeevsiab rau cov ntshav dawbhuv.”
Tabsis lawv tau teb tias, “Qhov ntawd ua li cas rau peb? Koj pomzoo es!”
5 Ces tomqab pov cov nyiaj rau ntawm lub tuamtsev, nws tau tawm qhov ntawd. Nws tau mus dai tuag.
6 Cov povthawj hlob tau khaws cov nyiaj thiab hais tias, “Tej no tsis raugcai muab tso rau hauv lub txhab nyiaj hauv tuamtsev, vim tej no yog nyiaj ntshav.” 7 Lawv tau sablaj thiab muab cov nyiaj mus muas tus yawg puab hub daim av ua toj ntxas faus pejkum neeg. 8 Yog li ntawd, daim av ntawd thiaj raug hu ua “Av Ntshav” los txog hnub no. 9 Ces tus cevlus Yelemis lolus tau tiav tias, “Lawv tau siv pebcaug lub nyiaj, uas yog tus nqe taubhau rau ib tug neeg Yixayees, 10 thiab lawv tau muas tus puab hub daim av, raws li kuv tus Tswv tau tawmlus rau kuv.”
Sawv Ntawm Philaj Xubntiag
Mak 15:2-15; Luk 23:2-3,18-25; Yhs 18:29--19:16
11 Ces Yexus tau mus sawv rau ntawm tus kavxeev lub xubntiag, thiab tus kavxeev tau nug Nws tias, “Koj puas yog cov Yudais tus Vajntxwv?”
Yexus tau hais tias, “Koj hais li.”
12 Lub sijhawm ntawd cov povthawj hlob thiab cov txwjlaug tau muab Nws ua luam nqis hav, tabsis Nws tsis tau teb ib lo li. 13 Ces Philaj tau hais rau Yexus tias, “Koj tsis hnov tej uas lawv nkaug koj lod?” 14 Yexus kuj tsis tau teb nws ib lo li, thiab tus kavxeev tau xav tsis thoob.
15 Raws li nws kabke hauv lub koobtsheej, tus kavxeev txeev tau tso ib tug neeg raug txim, tus uas tej neeg coobcoob tau thov. 16 Thaum ntawd lawv tau kaw ib tug neeg raug txim loj hu ua Yexus Npa-Anpas. 17 Ces lub sijhawm lawv tuaj txoos uake coobcoob, Philaj tau hais rau lawv tias, “Nej xav kom kuv tso tus twg rau nej, Npa-Anpas lossis Yexus tus uas hu ua Khetos?” 18 Rauqhov nws twb paub tias lawv tau ntes Yexus vim kev khib.
19 Thaum Philaj tabtom zaum saum lub rooj txiavtxim, nws tus pojniam tau xa neeg tuaj cuag nws thiab hais tias, “Txhob ua dabtsi rau tus neeg ncajncees no, rauqhov hnub no kuv tau ua npausuav phem heev txog Nws.”
20 Tabsis cov povthawj hlob thiab cov txwjlaug tau haub zejtsoom kom lawv thov Npa-Anpas, thiab kom lawv txov Yexus. 21 Tus kavxeev tau nug thiab hais rau lawv tias, “Nej xav kom kuv tso tus twg rau nej, ntawm ob tug no?”
Ces lawv tau qw tias, “Npa-Anpas!”
22 Philaj tau nug lawv tias, “Yog li ntawd, kuv yuav ua li cas rau Yexus, tus hu ua Khetos?”
Lawv txhua tus tau qw tias, “Muab Nws ntsia saum khaublig!”
23 Philaj tau hais tias, “Vim li cas? Nws tau ua txhaum dabtsi?”
Lawv hajyam tau qw nrovnrov tias “Muab Nws ntsia saum khaublig!”
24 Thaum Philaj pom tias nws ua tsis tsheej dabtsi, tabsis kev kubntxhov tseem loj zujzus, nws tau muab dej los thiab tau ntxuav nws ob txhais tes tim ntsejmuag tej neeg. Nws tau hais tias, “Kuv tsis txhaum rau tus no cov ntshav. Nej pomzoo”
25 Tagnrho tej neeg ntawd tau teb thiab hais tias, “Cia Nws cov ntshav raug peb thiab peb tej menyuam!”
26 Ces Philaj tau tso Npa-Anpas rau lawv; tabsis nws tau muab Yexus rau cov tubrog coj mus nplawm thiab kom muab ntsia saum khaublig.
Yexus Raug Thuam
Mak 15:16-20
27 Ces tus kavxeev cov tubrog tau coj Yexus mus rau hauv lub vajloog, thiab pab tubrog pawgtxheeb tau los vij Nws. 28 Lawv tau muab Nws cev tsoos hle thiab muab ib lub tsholoj tsamxem rau Nws npua. 29 Lawv tau muab hmabpos los thi ua ib lub mom yeebkoob thiab muab rau saum Nws taubhau, thiab lawv tau muab ib tug tauj rau hauv Nws sab tes xis. Lawv tau txhoscaug rau ntawm Nws xubntiag thiab tau hnyos Nws tias, “Nyob zoo, cov Yudais tus Vajntxwv.” 30 Lawv tau nti qaubncaug rau Nws thiab muab tus tauj los ntaus Nws taubhau. 31 Tomqab lawv hnyos Nws tag lawm, lawv tau muab lub tsholoj hle thiab muab Nws cev tsoos rau Nws hnav thiab lawv tau coj Nws mus ntsia saum khaublig.
Saum Khaublig
Mak 15:22-32; Luk 23:33-43; Yhs 19:17-24
32 Tabsis thaum lawv tawm tuaj mus, lawv tau ntsib ib tug neeg Kulenes npe hu ua Ximoos, mas lawv tau quab nws kom nws kwv Yexus tus khaublig. 33 Thaum tuaj txog lub chaw hu ua Khaulakhauthas, uas txhais tias, “Pobtxha Taubhau,” 34 lawv tau muab cov cawv xyaw kua iab rau Yexus haus; tabsis thaum saj mentsis Nws tsis tau kam haus. 35 Tomqab lawv muab Nws ntsia saum khaublig, lawv tau muab Nws cev tsoos dua sibfaib thiab muab twv pov. 36 Lawv kuj tau zaum ntawd zov Nws. 37 Lawv tau ntsia nqe lus nkaug Nws rau ntawm Nws taubhau saud, uas tau sau tias:

Tus no yog Yexus,
cov Yudais tus Vajntxwv.

38 Thaum ntawd lawv tau muab ob tug tubsab ntsia saum khaublig nrog Nws, ib tug rau sab xis thiab ib tug rau sab laug. 39 Ces tej neeg dua kev tau txobthuam Nws, co taubhau nto, 40 thiab hnyos tias, “Tus uas yuav rhuav lub tuamtsev thiab peb hnub yuav rovqab tsa dua,cawm tuskheej mas! Yog koj yog Vajtswv Ntuj tus Tub, ces nqis kiag saum tus khaublig los!”
41 Ibyam li ntawd, cov povthawj hlob, nrog rau cov xibfwb qhia Kevcai thiab cov txwjlaug, tau hnyos tias, 42 “Nws tau cawm lwm tus, tabsis Nws tsis muaj peevxwm cawm tuskheej! Nws yog Yixayees tus Vajntxwv diam, cia Nws nqis saum khaublig tamsis no, ces peb yuav ntseeg Nws! 43 Nws twb tso siab rau Vajtswv Ntuj, cia Vajtswv Ntuj cawm Nws tamsis no, yog Vajtswv Ntuj xav cawm Nws! Rauqhov Nws tau hais tias, ‘Kuv yog Vajtswv Ntuj tus Tub.’” 44 Tibyam li no, ob tug tubsab uas raug ntsia saum khaublig nrog Nws kuj tau thuam Nws.
Yexus Tuag
Mak 15:33-41; Luk 23:44-49; Yhs 19:29-30
45 Txij thaum tavsu mus txog rau thaum peb teev, tebchaws tau tsausnti. 46 Kwvyees li thaum cuaj teev, Yexus tau qw ib suab nrovnrov tias, “Elis, Elis, lemas sanpathanis?,” uas txhais tias, “Kuv tus Vajtswv, Kuv tus Vajtswv, ua cas koj tau tso kuv tseg?”
47 Qee leej uas sawv ntawd tau hais tias, “Nws hu Eliyas.”
48 Ces tamsis ntawd, lawv cov ntawd ib tug tau khiav ceev nrooj mus muab ib lub xwbkuab ntim cawv qaub, muab chob rau saum tus tauj, thiab muab cev mus rau Yexus. 49 Tabsis lwm tus ho tau hais tias, “Cia peb saib, seb Eliyas puas los cawm Nws mas!”
50 Yexus tau rovqab qw ib suab nrovnrov ces Nws tau tso Nws tus ntsujplig.
51 Sijhawm ntawd daim ntaub hauv lub tuamtsev tau ntuag rhe saum hau los rau hauv taw ua ob daig. Av kuj tau qeeg thiab tej pobzeb tau tawg faibhlo. 52 Tej qhov ntxa tau qhib thiab ntau tus neeg dawbhuv, uas twb tsaugzog lawm, tau sawv rovlos. 53 Thaum lawv tau tawm hauv qhov ntxa los, xws li tomqab Yexus tau sawv rovlos ntawd, lawv tau mus rau hauv lub nroog dawbhuv thiab tau tshwm rau ntau leej pom.
54 Ces thaum lawv pom av qeeg thiab tej xwmtxheej ntawd, tus thawj tubrog pawgpua thiab cov uas zov Yexus nrog nws ntawd tau ntshai heev, thiab nws tau hais tias, “Tseeb tiag tus no yog Vajtswv Ntuj tus Tub.”
55 Ib pab pojniam tau nyob ib ncua kev deb ntawd saib. Cov ntawd tau caum Yexus pem Kalilais tuaj thiab lawv tau pab Nws. 56 Nruab nrab pab pojniam no kuj muaj Malis Madalees, Malis uas yog unpaus thiab Yauxej niam, thiab Xenpedais ob tug tub niam.
Yexus Raug Faus
Mak 15:42-47; Luk 23:50-56; Yhs 19:38-42
57 Thaum yuav tsausntuj, ib tug neeg npluanuj pem Alimathas tau tuaj; nws npe hu ua Yauxej thiab nws tuskheej tau raug cob ua Yexus thwjtim. 58 Nws tau mus rau ntawm Philaj thiab tau thov Yexus lub cev, ces Philaj tau tsocai kom muab Yexus lub cev rau nws. 59 Thaum txais lub cev lawm, Yauxej tau muab ntaub mag tshiab qhwv lub cev 60 thiab tau muab tso rau nws lub ntxa tshiab uas nws tau txaug rau hauv ib phab pobzeb. Tomqab dov ib lub pobzeb lojloj los npog lub rooj ntxas tag, nws tau tawm mus lawm. 61 Malis Madalees thiab dua ib tug Malis tau nyob ntawd, zaum tsaws ntawm lub ntxa sab tid.
Tub Ceevxwm Zov Ntxa
62 Tagkis, uas yog tomqab hnub npaj pluas mov hladhau, cov povthawj hlob thiab cov Falixais tau tuaj txoos uake rau ntawm Philaj. 63 Lawv tau hais tias, “Yawg hlob, peb nco thaum Nws tseem muajsia, tus neeg dag ntawd tau hais tias, ‘Tomqab peb hnub kuv yuav sawv rovlos.’ 64 Yog li ntawd, tawmcai kom ceev lub ntxa mus txog rau hnub peb, tsam Nws cov thwjtim yov tuaj nyiag Nws lub cev thiab hais rau zejtsoom tias, ‘Nws tau sawv ntawm cov tuag rovlos.’ Ces thaum kawg txojkev dag yuav phem dua thawj zaug.”
65 Philaj tau hais rau lawv tias, “Nej muaj tub ceevxwm. Mus ceev raws li nej paub.” 66 Ces thaum tawm los lawm, lawv tau tso tub ceevxwm ceev lub ntxa thiab lawv tau nias cim rau lub pobzeb.
28
Yexus Sawv
Mak 16:1-8; Luk 24:1-10; Yhs 20:1-8
1 Tomqab hnub Xanpataus, thaum kajntug txoog hnub ib hauv lub limtiam, Malis Madalees tau nrog lwm tus Malis tuaj xyuas lub ntxa.
2 Nimno av tau qeeg loj heev, rauqhov tus Tswv tus timtswv tau nqis saum ntuj los; thiab thaum los ntawd, nws tau muab lub pobzeb dov tawm thiab tau zaum saum lub pobzeb. 3 Nws lub ntsejmuag ci li xoblaim thiab nws cev tsoos dawb cuag li daus. 4 Cov uas ceev lub ntxa tau ntshai tshee hnyo vim tus timtswv, thiab lawv tau dhau zoo li neeg tuag.
5 Tus timtswv tau hais rau ob tug pojniam tias, “Txhob ntshai. Rauqhov kuv paub tias neb samsim nrhiav Yexus, tus uas tau raug ntsia saum khaublig. 6 Nws tsis nyob qhov no lawm, rauqhov Nws tau sawv li Nws tau hais tseg. Los saib lub chaw uas Nws raug tso. 7 Ceev nrooj mus qhia rau Nws cov thwjtim tias, ‘Nws tau sawv ntawm cov tuag lawm,’ thiab nimno Nws samsim mus rau Kalilais uantej nej. Nej yuav ntsib Nws ped. Kuv qhia neb lawm nawb.”
8 Nkawv tau tawm ceev nrooj ntawm lub ntxa, ibke ntshai thiab ibke zoo siab. Nkawv tau khiav los tshabxo rau Nws cov thwjtim. 9 Ces nimno Yexus tau ntsib nkawv thiab hais tias, “Nyob zoo!” Nkawv tau los, tau tuav Nws kotaw thiab pe Nws. 10 Thaum ntawd, Yexus tau hais rau nkawv tias, “Txhob ntshai. Mus tshabxo rau kuv cov kwvtij kom lawv nce mus rau Kalilais thiab lawv yuav pom kuv ped.”
Tub Ceevxwm Raug Xiab
11 Thaum nkawv mus lawm, nimno cov tub ceevxwm qee leej tau mus rau hauv nroog thiab tau tshabxo rau cov povthawj hlob txog tej uas tau tshwmsim. 12 Thaum coj cov txwjlaug tuaj sablaj hab tawm tswvyim uake, lawv tau thau ib cov nyiaj ntau tsimnyog thiab tau muab rau cov tubrog. 13 Lawv tau hais tias, “Nej hais tias, ‘Nws cov thwjtim tau tuaj thaum tsausntuj thiab tau nyiag Nws sijhawm peb tsaugzog lawm.’ 14 Yog qhov no nrov mus txog tus kavxeev, peb mam hais kom nws ntseeg thiab kom nej txhob raug teebmeem.” 15 Ces cov uas tau txais nyiaj xiab kuj tau ua raws nraim li lawv tau raug cob ntawd; mas txojlus no raug nthuav mus rau cov Yudais los txog niaj hnub no.
Tawmlus Rau Cov Thwjtim
16 Nimno kaum-ib tug thwjtim tau mus rau pem Kalilais, rau saum lub roob uas Yexus tau qhia rau lawv. 17 Thaum pom dheev Nws, lawv tau pe Nws. Qee leej kuj tau ua xyemxyav. 18 Ces Yexus tau los thiab tau hais rau lawv tias, “Tagnrho tswjchim saum ntuj thiab hauv ntiajteb twb muab rau kuv lawm. 19 Yog li ntawd, mus thiab cob txhua haivneeg ua thwjtim, muab lawv rausdej rau lub Npe ntawm Leej Txiv, Leej Tub thiab tus Ntsujplig Dawbhuv; 20 thiab qhia lawv kom ceev txhua yam uas kuv tau tawmlus rau nej. Nimno, kuv yuav nrog nej nyob txhua txhia hnub mus txog thaum kawg tiam no.”