Malakaus — Hmong Bible Resource Center

Malakaus

Tshooj:

Txojmoo zoo raws li

Malakaus

Taw Qhia

Tus sau yog Malakaus, Npananpas tus npawg, uas tau nrog Npananpas thiab Paulus nkawv mus tshajtawm txojmoo zoo tim Xaipas (Ctu 12:12; 15:38-40). Nws kuj tau raugzoo nrog Petus (1 Pet 5:13), thiab keebkwm tau hais tseg tias Petus tau hais tej lus hauv Malakaus Txojmoo Zoo no ntag. Malakaus tau sau rau pejkum neeg, tshwjxeeb rau neeg Loo, kwvlam li xyoo 50.

Malakaus tau nthuav Yexus ua Vajtswv Ntuj tus tubtxib raws li Yaxayas tau sau tseg (Yax 49-57; Mak 10:45). Vim li ntawd, nws tau teev tus Tswv Yexus tes haujlwm ntau tshaj li Nws tej lus qhuabqhia.

Yauhas Npaj Kev

Mat 3:1-11; Luk 3:2-16

1 Chivkeeb ntawm txojmoo zoo ntsig txog Yexus Khetos, Vajtswv Ntuj tus Tub. 2 Raws li twb sau tseg hauv tus cevlus Yaxayas phau ntawv tias:

“Saib mas, kuv xa kuv tus tubtxib ua koj ntej,

nws yuav npaj koj txojkev.”

3 “Ib lub suab qw tom mojsab qhua tias,

‘Npaj tus Tswv txojkev,

ua Nws tej kev taug kom ncaj.’”

4 Yauhas Npatitaus tau tshwm tom mojsab qhua, rausdej thiab tshajtawm txojkev rausdej txog kev thimxav mus rau kev zamtxim. 5 Ces tagnrho cov nyob cheebtsam Yudas thiab txhua leej hauv Yeluxalees tau tawm tuaj cuag nws. Tomqab lawv lees lawv tej kev txhaum, nws tau muab lawv rausdej hauv tus dej Yuladees. 6 Yauhas tau hnav tsoos plaub ntxhuav thiab sia txojsiv tawv ntawm duav; thiab nws tau noj kooj thiab zibmuv. 7 Nws tau tshajtawm tias, “Tus muaj zog dua kuv samsim raws kuv qab los, thiab kuv tsis tsimnyog khoov mus daws txoj hlua ntawm Nws txhais khau. 8 Kuv muab nej raus hauv dej tabsis Nws yuav muab nej raus hauv tus Ntsujplig Dawbhuv.”

Yexus Rausdej thiab Raug Sim

Mat 3:13-17; 4:1-11; Luk 3:21-22; 4:1-13

9 Lub sijhawm ntawd Yexus tau tawm pem Naxalev hauv Kalilais tuaj thiab Nws tau raug rausdej hauv tus dej Yuladees los ntawm Yauhas. 10 Tamsis thaum Nws tawm hauv dej los, Yexus tau pom nruab ntug dua rhe thiab tus Ntsujplig tau nqis los rau saum Nws li tus nquab. 11 Thiab ib lub suab tau hais saum ntuj tuaj tias, “Koj yog kuv tus Tub uas kuv hlub; kuv raugsiab rau koj.”

12 Tamsis ntawd tus Ntsujplig tau xa Nws mus rau tom mojsab qhua 13 thiab Nws tau nyob tom mojsab qhua plaubcaug hnub thiab tau raug Xatas simsiab. Nws tau nyob nrog tej tsiaj qus thiab cov timtswv tau los tiam Nws.

Hu Thawj Pab Thwjtim

Mat 4:18-22; Luk 5:2-11; Yhs 1:35-42

14 Tomqab Yauhas raug ntes, Yexus tau mus rau Kalilais thiab tau tshajtawm Vajtswv Ntuj txojmoo zoo 15 thiab hais tias, “Lub caijnyoog twb los txog thiab Vajtswv Ntuj lub tswvkuj twb los ze lawm. Thimxav thiab ntseeg hauv txojmoo zoo.”

16 Thaum taugkev ntawm ntug Hiavtxwv Kalilais, Nws tau pom Ximoos thiab nws tus kwv Anres samsim pov moo rau hauv hiavtxwv, vim nkawv yog neeg nrhiav ntses. 17 Yexus tau hais rau nkawv tias, “Caum kuv qab es kuv yuav tsa neb ua cov nrhiav neeg.” 18 Ces nkawv tau tso plhuav lub moo tamsis thiab tau caum Nws.

19 Mus tomntej mentis, Nws tau pom unpaus, Xenpedais tus tub, thiab nws tus kwv Yauhas thiab nkawv samsim ntxiv moo hauv nkoj. 20 Ces tamsis ntawd Nws tau hu nkawv. Thiab tso plhuav nkawv txiv Xenpedais rau hauv nkoj nrog cov tubzog, nkawv tau los raws Nws.

Yexus Ntiab Dab

Luk 4:31-37

21 Lawv tau mus hauv Kapenaus, thiab hnub Xanpataus ntawd Nws tau mus hauv lub txoos sablaj thiab tau qhuabqhia. 22 Tej neeg tau xav tsis thoob txog Nws tej lus qhia rauqhov Nws tau qhia lawv yam li tus muaj tswjchim, tsis thooj li cov xibfwb qhia Kevcai. 23 Tamsis ntawd, muaj ib tug txivneej raug ntsujplig qias tau qw hauv lub txoos sablaj 24 hais tias, “Muaj dabtsi nruab nrab koj thiab peb, Yexus Naxalev? Koj tuaj rhuav peb lod? Kuv paub koj yog leejtwg, Vajtswv Ntuj tus Tub Dawbhuv.”

25 Ces Yexus tau txhwj nws tias, “Ntsiag kiag thiab tawm plaws hauv tus txivneej ko!” 26 Tus ntsujplig qias tau ua tus txivneej huam ib tshaj thiab tau qw nrovnrov, ces nws tau tawm plaws lawm.

27 Txhua leej tau xav tsis thoob thiab lawv tau sibtham tias, “Qhov no yog dabtsi? Ib txojkev qhia tshiab nrog tswjchim! Nws tau tawmlus rau tej ntsujplig qias thiab lawv kuj mloog Nws hais!” 28 Nws lub moo tau ncha tamsis ntawd mus txhua qhov thoob plaws hauv Kalilais.

Yexus Kho Ntau Leej

Mat 8:14-17; Luk 4:38-41

29 Thaum tawm kiag hauv lub txoos sablaj, Yexus nrog rau unpaus thiab Yauhas lawv tau nkag mus hauv Ximoos thiab Anres nkawv tsev. 30 Ximoos niam tais tau pw ua npaws ntxiag thiab tamsis ntawd lawv tau qhia rau Yexus txog nws. 31 Los rau ntawm nws, Yexus tau tuav nws tes thiab tsa nws sawv. Nws tus npaws tau tso nws tseg thiab nws tau los tiam lawv.

32 Yav tsausntuj, tomqab hnub poob, lawv tau coj txhua tus muaj mob thiab raug dab tuaj cuag Yexus. 33 Tagnrho lub nroog ntawd tau tuaj txoos ntawm qhovrooj. 34 Mas Yexus tau kho coob leej uas muaj ntau hom mobnkeeg thiab tau ntiab ntau tus dab. Nws tsis tau tso tej dab hais lus vim lawv twb paub Nws lawm.

Yexus Thov Vajtswv Tibleeg

Luk 4:42-43

35 Thaum sawv ntxov, tsausntuj nti, Yexus tau sawv thiab tawm mus rau ib qhov yajsab thiab tau thov Vajtswv ntawd. 36 Ximoos thiab nws cov kwvluag tau nrhiav Nws, 37 thiab thaum nrhiav tau Nws, lawv tau hais tias, “Sawvdaws samsim nrhiav koj.”

38 Yexus tau teb lawv tias, “Cia peb mus rau lwm qhov, rau tej zos muaj kiab, kom kuv tau tshajtawm ntawd thiab, vim kuv tau los rau qhov no.” 39 Ces Nws tau tawm mus qhuabqhia hauv lawv tej txoos sablaj thoob plaws Kalilais thiab mus ntiab tej dab.

Kho Tus Mob Ruas

Mat 8:2-4; Luk 5:12-14

40 Ib tug mob ruas tau los cuag Nws, txhoscaug ntua taij Nws thiab hais tias, “Yog koj tuajyeem, koj muaj peevxwm ntxuav kuv kom huv.”

41 Vim Nws tau tabncuab tus mob ruas heev, Yexus tau cev Nws txhais tes mus tuav nws thiab hais tias, “Kuv tuajyeem. Zoo huvsi.” 42 Tamsis ntawd tus kab mob ruas tau tawm ntawm nws thiab nws tau huv kiag.

43 Yexus tau xovlus rau nws thiab tau xa nws tawm 44 hais tias, “Ceevfaj txhob hais dabtsi rau leejtwg, tabsis mus qhia tuskheej rau ib tug povthawj thiab nqa khoom fij raws li Mauxes tau teev tseg mus ua timkhawv rau tej kev huv no.” 45 Tabsis thaum nws tawm mus, nws tau pib tshajtawm thiab nthuav zaj no rau ntau qhov chaw, txog qhov uas Yexus tsis muaj peevxwm tshwm mus hauv nroog. Ces Nws tau nyob rau nraum nroog, tom tej yajsab, thiab tej neeg tau tawm txhua qhov tuaj cuag Nws.

🔝

Kho Tus Tuag Testaw

Mat 9:2-8; Luk 5:18-26

1 Hnub puav tomqab, Yexus tau rovlos hauv Kapenaus thiab tej neeg tau hnov tias Nws nyob hauv tsev. 2 Mas neeg coobcoob tau sau nthwv tuaj, txog qhov uas tsis seem chaw rau ntawm qhovrooj sab nraud, thiab Nws tau qhia txojlus rau lawv. 3 Lawv tau tuaj thiab coj ib tug neeg qhuav testaw tuaj rau Yexus; plaub leeg tau nqa nws. 4 Lawv tsis tau muaj peevxwm coj nws los rau Yexus vim tej neeg coobcoob; lawv tau yaws lub ruv ncaj qhov chaw Yexus nyob, thiab tomqab lawv dawj tau lub qhov, lawv tau muab lub lav uas tus neeg qhuav testaw pw ntawd dauv los. 5 Thaum pom lawv txojkev ntseeg, Yexus tau hais rau tus qhuav testaw tias, “Metub, koj tej kev txhaum raug zam rau koj lawm.”

6 Ces ibtxhia xibfwb qhia Kevcai uas zaum ntawd tau xav hauv nruab siab tias, 7 “Vim li cas Nws yuav hais lus li? Nws tuammom ntag. Leejtwg yuav muaj peevxwm zamtxim, tshwj Vajtswv Ntuj tibleeg xwb sad?”

8 Vim Yexus tau paub tamsis ntawd los ntawm Nws tus ntsujplig tias lawv xav li ntawd hauv tuskheej, Nws tau hais tias, “Vim li cas nej xav tej no hauv nej siab? 9 Dabtsi yuav yoojyim dua: Yov hais rau tus qhuav testaw tias, ‘Koj tej kev txhaum raug zam rau koj’ lossis hais tias, ‘Sawv, nqa koj lub lav thiab taugkev mus’? 10 Tabsis kom nej paub tias Neeg Leej Tub muaj tswjchim zamtxim hauv ntiajteb,” Yexus tau hais rau tus qhuav testaw tias, 11 “Kuv hais rau koj: Sawv, nqa koj lub lav thiab mus rau tom koj tsev.” 12 Tamsis ntawd, nws tau sawv, nqa nws lub lav thiab tawm ntawm sawvdaws xubntiag mus, txog qhov uas lawv sawvdaws xav tsis thoob thiab qhuas Vajtswv Ntuj hais tias, “Peb tsis tau pom dua li no ib zaug li!”

Hu Levis

Mat 9:9-13; Luk 5:27-32

13 Nws tau tawm rovmus rau tom ntug hiavtxwv. Tagnrho tej neeg coobcoob tau tuaj cuag Nws, ces Nws tau qhia lawv. 14 Nws tau ncig mus pom Alafais tus tub Levis zaum ntawm lub rooj sau se. Yexus tau hais rau nws tias, “Caum kuv qab.” Ces sawv tsees, Levis tau caum Nws.

15 Thaum Yexus tseem zaum noj mov hauv Levis lub tsev, cov sau se thiab neeg txhaum ntau leej tau tuaj txoos nrog Yexus thiab Nws cov thwjtim, rauqhov lawv coob leej kuj tau caum Nws. 16 Sijhawm cov xibfwb qhia Kevcai hauv pab Falixais pom tias, Nws nrog tej neeg txhaum thiab cov sau se noj uake, lawv tau nug Nws cov thwjtim tias, “Vim li cas Nws ho noj mov nrog cov sau se thiab tej neeg txhaum?”

17 Hnov li ntawd, Yexus tau teb lawv tias, “Cov neeg nyob zoo tsis muaj kev cheemtsum tau kws khomob, tabsis cov neeg mob muaj. Kuv tsis tau los hu cov neeg ncajncees tabsis cov neeg txhaum.”

Hais Txog Kev Yoo Mov

Mat 9:14-17; Luk 5:33-38

18 Yauhas cov thwjtim thiab cov Falixais tau samsim yoo mov. Lawv tau tuaj nug Yexus tias, “Vim li cas Yauhas cov thwjtim thiab cov Falixais cov thwjtim samsim yoo mov, tabsis koj cov thwjtim ho tsis yoo mov?”

19 Yexus tau teb lawv tias, “Tus nraug vauv cov phoojywg yov muaj peevxwm yoo mov li cas thaum tus nraug vauv tseem nrog lawv nyob? Lub tsamthawj uas lawv tseem muaj tus nraug vauv, lawv tsis muaj peevxwm yoo mov, 20 tabsis lub sijhawm yuav los, thaum tus nraug vauv ncaim lawv lawm, ces hnub ntawd lawv yuav yoo mov.”

21 “Tsis muaj leejtwg muab daim ntaub tshiab xaws rau lub qub tsholoj uas tau ntuag. Yog nws ua li, daim ntaub tshiab yuav rub daim qub, thiab qhov ntuag ntawd haj yuav ntuag loj tshaj. 22 Thiab tsis muaj leejtwg muab cawv tshiab ntim rau lub hnab tawv qub. Yog nws ua li, cov cawv tshiab yuav rub lub hnab tawv qub ntuag, ces cov cawv thiab lub hnab yuav piam huvsi; tabsis nws muab cov cawv tshiab ntim rau tej hnab tawv tshiab.”

Yexus Yog Tus Tswv Hnub Xanpataus

Mat 12:1-14; Luk 6:1-11

23 Hnub Xanpataus, Yexus tau taugkev hla ib daim qoob thiab Nws cov thwjtim tau pib zaws tej qoob ntawm kev. 24 Ces cov Falixais tau hais rau Nws tias, “Saib, vim li cas lawv ua qhov uas tsis raugcai ua hnub Xanpataus?”

25 Yexus tau teb lawv tias, “Nej tsis tau nyeem tias Daviv tau ua dabtsi thaum nws muaj kev cheemtsum, qhov uas nws thiab cov nrog nws tau tshaib? 26 Nws tau mus rau hauv Vajtswv Ntuj lub tuamtsev, mus rau ntawm tus povthawj hlob Anpiathas, thiab tau noj cov movci raug fij uas tsis raugcai noj, tshwj rau cov povthawj. Nws kuj tau muab rau cov nrog nws tibsi.”

27 Ces Nws tau hais rau lawv tias, “Hnub Xanpataus tau tshwmsim rau neeg, thiab neeg tsis tau tshwmsim rau hnub Xanpataus. 28 Li ntawd, Neeg Leej Tub yog tus Tswv hnub Xanpataus.”

🔝

Yexus Kho Mob Hnub Xanpataus

1 Yexus tau rovmus hauv lub txoos sablaj thiab ib tug txivneej, uas muaj txhais tes qhuav, tau nyob hauv. 2 Luag tau soj Nws seb Nws puas kho tus ntawd hnub Xanpataus, kom lawv yuav muab Nws ua luam nqis hav. 3 Yexus tau hais rau tus txivneej uas muaj txhais tes qhuav tias, “Sawv los rau hauv plawv.”

4 Nws tau nug lawv tias, “Hnub Xanpataus raugcai ua zoo lossis ua phem, cawm lossis txov txojsia?” Tabsis lawv tau nyob ntsiagto.

5 Tomqab saib lawv nciglees nrog kev npautaws thiab txhawj txog lawv lub siab tawv, Nws tau hais rau tus txivneej tias, “Xyab koj txhais tes.” Nws tau xyab tes thiab nws txhais tes tau zoo li qub. 6 Tawm plaws mus, cov Falixais tau tuavhauv nrog Helauj pab neeg los tawmtsam Yexus, seb lawv yuav txov Nws li cas.

Neeg Coobcoob Caum Yexus

Mat 12:15-16; Luk 6:17-19

7 Yexus tau rhais chaw mus rau tom hiavtxwv nrog Nws cov thwjtim, thiab ib pab neeg coobcoob tau caum Nws. Lawv tau tawm hauv Kalilais, Yudas, 8 Yeluxalees, Idumias, ntawm tus dej Yuladees sab tid, thiab cheemtsam Tiles thiab Xidoos tuaj cuag Yexus, vim lawv tau hnov txog tej uas Nws tau ua. 9 Yexus tau hais rau Nws cov thwjtim kom npaj ib lub nkoj me rau Nws vim pab neeg, xwv lawv txhob txiv Nws. 10 Rauqhov Nws tau kho coob leej, mas tej neeg muaj mobnkeeg tau sibtxiv los tuav Nws. 11 Thiab thaum twg tej ntsujplig qias pom Nws, lawv tau qhaucev rau ntawm Nws thiab tau qw tias, “Koj yog Vajtswv Ntuj tus Tub.” 12 Nws tau txhwj lawv heev, kom lawv txhob nthuav Nws tawm.

Tsa Cov Timthawj

Mat 10:2-4; Luk 6:14-16; Ctu 1:13

13 Nws tau nce rau saum roob thiab tau hu cov uas Nws xav tau; ces lawv tau los cuag Nws. 14 Nws tau tsa kaum-ob leeg, uas Nws kuj tau hu ua timthawj, kom lawv yuav nyob nrog Nws thiab kom Nws tau xa lawv mus tshajtawm, 15 thiab kom lawv txais tswjchim mus ntiab tej dab. 16 Nws tau tsa lawv kaum-ob leeg: Ximoos (tus Nws tau tis npe ua Petus), 17 Xenpedais tus tub unpaus thiab unpaus tus kwv Yauhas (nkawv tau raug tis npe ua Npau-anekes, uas txhais tias Tub Xob), 18 Anres, Filiv, Npathaulaumais, Mathais, Thaumas, Alafais tus tub unpaus, Thadeus, Ximoos tus kub siab rau nws haivneeg, 19 thiab Yudas Ikhalaus, tus tau ntxeevsiab rau Yexus.

Yexus thiab Npexenpus

Mat 12:25-29,46-50; Luk 8:19-21; 11:17-22

20 Ces Yexus tau los hauv ib lub tsev thiab pab neeg coobcoob tau rovqab tuaj, txog qhov uas lawv tsis muaj peevxwm noj mov li. 21 Thaum hnov li ntawd, Yexus cov txheebze tau tuaj coj Nws, rauqhov lawv tau hais tias, “Nws tau tsis meej pem lawm.”

22 Thiab cov xibfwb qhia Kevcai uas tau nqis pem Yeluxalees tuaj kuj tau hais tias, “Nws muaj Npexenpus,” thiab tias, “Nws tau ntiab tej dab los ntawm tus thawj dab.”

23 Ces tomqab hu lawv los cuag Nws, Yexus tau hais ib zaj luspiv rau lawv tias, “Xatas yov ua li cas muaj peevxwm ntiab Xatas? 24 Yog ib lub tswvkuj tawg, lub tswvkuj ntawd tsis muaj peevxwm sawv ntseg. 25 Yog ib tsevneeg tawg, lub tsevneeg tsis muaj peevxwm sawv ntseg. 26 Mas yog Xatas sawv tawmtsam tuskheej thiab tawg, nws tsis muaj peevxwm sawv ntseg, tsuas muaj yuav xaus xwb. 27 Leejtwg tsis muaj peevxwm mus hauv tus neeg muaj zog lub tsev thiab txeeb nws lub cuabtam, yog nws tsis xwb muab tus neeg muaj zog ntawd khi tso, es mam txeeb nws lub cuabtam. 28 Tseeb tiag kuv hais rau nej tias, txhua yam kev txhaum thiab tej lus tuammom, uas lawv hais, yuav raug zam rau lawv; 29 tabsis tus uas tuammom tus Ntsujplig Dawbhuv yuav tsis txais kev zam mus ibtxhis; tus ntawd muaj txim mus ibtxhis.”

30 Nws tau hais li vim lawv tau hais tias, “Nws muaj ib tug ntsujplig qias.”

31 Yexus niam thiab Nws cov kwv tau tuaj. Thaum sawv sab nraud, lawv tau xa neeg los cuag Nws thiab hu Nws. 32 Pab neeg coobcoob tau zaum ncig Nws. Lawv tau hais rau Nws tias, “Saib, koj niam, koj cov kwv thiab koj cov muam tabtom nrhiav koj sab nraud.”

33 Yexus tau teb lawv tias, “Leejtwg yog kuv niam thiab kuv cov kwv?”

34 Saib nciglees cov uas zaum ncig Nws ntawd, Yexus tau hais tias, “Saib, kuv niam thiab kuv cov kwv. 35 Rauqhov leejtwg ua Vajtswv Ntuj tus dejsiab, tus ntawd yog kuv tus kwv, kuv tus muam thiab kuv niam.”

🔝

Luspiv Txog Tus Tseb Noob

Mat 13:1-15,18-23; Luk 8:4-15

1 Nws tau chiv qhia dua tom ntug hiavtxwv. Ib pab neeg coobcoob tau tuaj ntsauv Nws, mas Nws tau nce mus zaum hauv ib lub nkoj hauv hiavtxwv, thiab tagnrho tej neeg tau nyob saum nqhuab ntawm ntug hiavtxwv. 2 Nws tau qhia lawv ua luspiv ntau zaj thiab tau hais rau lawv ua lus qhuabqhia tias:

3 “Mloog od! Nimno ib tug tseb noob tau tawm mus tseb noob. 4 Thaum nws samsim tseb noob ntawd, ib lub noob tau poob rau saum kev thiab tej noog tau los khaws noj lawm. 5 Hos dua ib lub tau poob rau saum tej pobzeb, qhov tsis muaj av ntau, ces nws tau nthaw kaus tamsis. Tabsis vim qhov ntawd tsis muaj av ntau, 6 thaum lub noob nthaw kaus tawm tuaj, lub hnub tau kub thiab nws tau qhuav, vim nws tsis muaj cag. 7 Hos dua ib lub tau poob rau ntawd cov pos, mas tej pos tau hlav thiab tau muab nws zawm, ces nws txi tsis taus txiv. 8 Ibtxhia tau poob rau qhov av zoo, mas lawv tau hlob, tau huam thiab tau txhawv: Ib lub txi txiv pebcaug npaug, ib lub raucaum npaug thiab ib lub ibpuas npaug.”

9 Ces Nws tau hais tias, “Yog leejtwg muaj pobntseg mloog, cia nws mloog!”

10 Sijhawm Yexus nyob ibleeg, cov nrog Nws thiab cov thwjtim kaum-ob leeg tau nug Nws txog zaj luspiv. 11 Yexus tau teb lawv tias, “Qhov mixatawlis ntawm Vajtswv Ntuj lub tswvkuj twb muab rau nej, tabsis rau lawv cov nraud txhua yam yog luspiv, 12 kom:

‘Saib ntsoov lawv yov saib, tabsis tsis paub,

thiab mloog ntsoov lawv yov mloog, tabsis tsis totaub,

tsam lawv yov tig rovlos

thiab lawv tej kev txhaum ho raug zam.’”

13 Thiab Nws tau hais rau lawv tias, “Nej tsis totaub zaj luspiv no, es nej yov ua li cas paub txhua zaj luspiv? 14 Tus tseb noob tseb txojlus. 15 Cov neeg no yog cov noob uas poob rau saum kev: Txojlus raug tseb thiab thaum lawv tau hnov ntawd, Xatas tau los kiag thiab nqa txojlus uas twb raug tseb rau hauv lawv. 16 Hos cov neeg no yog cov noob uas raug tseb rau saum zeb: Thaum lawv hnov txojlus, lawv zoo siab hlo txais txojlus tamsis. 17 Tabsis lawv tsis muaj cag hauv tuskheej, lawv nyob ib ntus, ces thaum teebmeem thiab kev tsimtxom tau tshwm tuaj vim txojlus, lawv txawm ntog kiag. 18 Ibtxhia neeg yog cov noob uas poob rau ntawd cov pos: Lawv yog cov hnov txojlus, 19 tabsis tej kev txhawj hauv lub neej, tej kev dag saum kev npluanuj, thiab tej kev ntshaw teejtug tau taugkev los thiab tau zawm txojlus, ces lawv tsis txi txiv. 20 Tej neeg nram no yog cov noob uas tseb rau qhov av zoo: Lawv tau hnov txojlus, tau txais thiab tau txi txiv; ib lub pebcaug npaug, ib lub raucaum npaug thiab ib lub ib puas npaug.”

Lub Teeb Txawb Saum Ncej

21 Ces Nws tau hais rau lawv tias, “Lub teeb tsis lam los kom raug txawb rau hauv qab lub kawm lossis hauv qab lub txaj sad? Tsis yog nws los kom raug txawb saum tus ncej teeb lod? 22 Rauqhov nws tsis yog yam raug zais, tabsis yog yam qhib rau neeg pomkev. Nws tsis tau tshwm kom raug zais tabsis nws tau los kom raug nthuav tawm. 23 Yog leejtwg muaj pobntseg mloog, cia nws mloog.”

24 Thiab Nws kuj tau hais rau lawv tias, “Ceevfaj seb nej hnov dabtsi. Lub ntim, uas nej muab luj rau luag, yuav raug muab luj rau nej, thiab muab tsub ntxiv rau nej. 25 Rauqhov tus uas muaj, luag yuav muab ntxiv rau nws; tabsis tus uas tsis muaj, yam uas nws muaj haj yuav muab tshem ntawm nws.”

Luspiv Txog Lub Noob

26 Thiab Nws tau hais tias, “Vajtswv Ntuj lub tswvkuj zoo ibyam li no: Nws zoo li tus txivneej pov lub noob rau hauv av. 27 Hmontuj nws pw thiab nruab hnub nws sawv. Lub noob yov nthaw kaus thiab hlob, nws tsis paub li cas. 28 Daim av tuskheej ua rau nws txi txiv: Xub yees kav, ces ua plhaub, thiab mam ua lub txhuv rau hauv. 29 Thaum cov qoob siav, ces tus tswv xa liag mus hlais kiag, vim lub caij sau qoob twb los txog.”

Luspiv Txog Lub Noob Zaub

30 Nws tau hais tias, “Peb yov muab Vajtswv Ntuj lub tswvkuj piv li cas lossis yov teeb ua luspiv li cas? 31 Nws zoo ibyam li lub noob zaub, uas thaum raug tseb rau saum av mas nws yog lub me dua tej noob hauv teb; 32 tabsis thaum nws hlob, nws peemtsheej loj dua tej zaub thiab tau hlav ceg lojloj, txog qhov uas tej noog saum ntuj muaj peevxwm los ua zes rau saud.”

33 Thiab Nws tau hais txojlus ua luspiv ntau yam rau lawv raws li lawv muaj peevxwm mloog. 34 Dhau tej luspiv lawd, Nws tsis tau hais dabtsi rau lawv. Tabsis lub sijhawm Nws nyob nrog cov thwjtim nkaus xwb, Nws tau txhais txhua yam.

Yexus Txhwj Cua

Mat 8:18,23-27; Luk 8:22-25

35 Yav tsausntuj hnub ntawd, Nws tau hais rau lawv tias, “Cia peb hla mus rau sab tid.” 36 Ces tso plhuav pab neeg coobcoob tseg, lawv tau coj Nws tuskheej li ntawd rau hauv nkoj. Muaj dua ntau lub nkoj nrog Nws thiab. 37 Ces ib nthwv cua daj cua dub tau tshwm tuaj thiab nplawm dej ntas los hauv lub nkoj, txog qhov uas dej twb nkag ntau rau hauv nkoj lawm. 38 Yexus tau nyob hauv nkoj lub plab, tsaugzog saum lub hauv ncoo. Ces lawv tau tsa Nws hais tias, “Xibfwb aw, nws tsis txob koj tias peb samsim yuav puastsuaj lod?”

39 Sawv tsees los, Nws tau txhwj tej cua daj cua dub thiab tau hais rau hiavtxwv tias, “Ua twjywm! Ntsiag mas.” Ces nthwv cua tau tu thiab tau tus kiag.

40 Yexus tau hais rau lawv tias, “Cas nej taiscaus ua luaj? Nej tsis muaj kev ntseeg li?”

41 Lawv tau ntshai heev kawg thiab tau sibtham tias, “Nws yog neeg dabtsi, vim cua daj cua dub thiab hiavtxwv kuj mloog Nws lus?”

🔝

Kho Tus Txivneej Raug Dab

Mat 8:28-34; Luk 8:26-39

1 Ces lawv tau mus rau ntawm hiavtxwv sab tid, mus rau cheebtsam Nkelaxees.a 2 Thaum Yexus tawm hauv nkoj los, tamsis ntawd ib tug txivneej raug ntsujplig qias tau tawm tom tojntxas los ntsib Nws. 3 Tus txivneej no tau nyob hauv tojntxas thiab leejtwg tsis tau muaj peevxwm muab saw hlau los khi nws. 4 Vim nws txeev tau mag kaujtoog cuab thiab saw hlau khi, tabsis nws tau muab tej saw hlau rub tu pes nrho thiab muab tej kaujtoog dam pes daws. Leejtwg tsis muaj peevxwm xauv nws li. 5 Txhua hnub txhua hmo nws tau qw tom tojntxas thiab pem tej roob thiab tau muab pobzeb ntaus tuskheej.

6 Thaum pom Yexus ib ncua kev deb, nws tau khiav los txhoscaug rau ntawm Nws 7 thiab tau quaj tias, “Muaj dabtsi nruab nrab kuv thiab koj, Yexus Vajtswv Ntuj tus loj tshajplaws tus Tub e? Kuv thov koj lees rau Vajtswv Ntuj tias, koj yov tsis tsimtxom kuv.” 8 Vim Yexus tau hais rau nws tias, “Ntsujplig qias, tawm ntawm tus txivneej ko.”

9 Yexus tau nug nws tias, “Koj lub npe hu li cas?”

Nws tau teb tias, “Kuv lub npe hu ua Lwj Txheeb, vim peb muaj coobcoob.” 10 Mas nws tau taij Yexus heev kom txhob xa lawv tawm cheebtsam ntawd.

11 Ntawm sab roob ntawd tau muaj ib pab npua coobcoob noj zaub. 12 Ces lawv tau taij Nws tias, “Xa peb mus rau pab npua, kom peb mus hauv lawv.” 13 Yexus tau xa lawv. Thaum cov ntsujplig qias tau tawm plaws, lawv tau mus rau hauv pab npua. Ces pab npua tau rag ntws mus poob tsag rau hauv hiavtxwv, kwvyees li ob txhiab tus, thiab lawv tau poob hiavtxwv tuag.

14 Cov neeg zov npua tau khiav mus tshabxo rau hauv nroog thiab rau tom tej teb. Tej neeg tau tuaj xyuas seb qhov xwm ntawd yog li cas. 15 Lawv tau tuaj rau ntawm Yexus thiab tau pom tus neeg raug tus dab Lwj Txheeb ntawd tau zaum tsaws, hnav tsoos tsho thiab feeb meej, mas lawv tau ntshai heev. 16 Cov neeg uas pom tej no tau piav rau lawv tias xwmtxheej tau tshwm rau tus raug dab thiab cov npua li cas. 17 Ces lawv tau pib taij Yexus kom tawm hauv lawv tebchaws mus.

18 Thaum Yexus nce rau hauv nkoj, tus neeg raug dab tau thov Yexus kom cia nws mus thiab. 19 Yexus tsis tau tso nws thiab tau hais rau nws tias, “Mus tsev, mus cuag koj tej txheebze thiab tshajtawm rau lawv txog tej uas tus Tswv twb ua rau koj thiab tau tabncuab koj lawm.” 20 Ces nws tau tawm mus thiab tau pib tshajtawm hauv Dekapolisb txog tej uas Yexus tau ua rau nws thiab tagnrho sawvdaws tau xav tsis thoob.

Tus Ntxhais Tuag thiab Tus Pojniam Mob

Mat 9:18-26; Luk 8:41-56

21 Tomqab Yexus hla hiavtxwv hauv nkoj rovlos rau sab tim no, thaum Nws tseem nyob ntawm ntug hiavtxwv, ib pab neeg coobcoob tau tuaj txoos rau ntawm Nws. 22 Ib tug ntawm cov thawj hauv lub txoos sablaj, npe hu ua Yailus, tau tuaj cuag Yexus. Thaum pom Yexus, nws tau qhaucev rau ntawm Nws kotaw 23 thiab tau thov Nws heev tias, “Kuv tus ntxhais tabtom yuav tuag, tabsis yog koj mus thiab tsa tes rau saum nws, ces nws yuav dim thiab muajsia.” 24 Yexus tau nrog nws mus. Pab neeg coobcoob kuj tau caum thiab txiv Yexus.

25 Muaj ib tug pojniam, uas twb coj khaubncaws kaum-ob xyoos 26 thiab raug kev txomnyem ntau los ntawm tej kws khomob, vim nws tau siv tagnrho nws tej nyiajtxiag ntiav lawv tabsis nws kuj tsis tau kev pab; nws tus mob haj tseem tau hnyav zujzus. 27 Thaum nws hnov txog Yexus, nws tau tuaj rau hauv pab neeg coobcoob tomqab thiab tau tuav Yexus lub tsholoj. 28 Rauqhov nws tau hais rau tuskheej tias, “Tsuav kuv tuav tau Nws lub tw tsholoj, ces kuv yuav dim.” 29 Ces tamsis ntawd nws cov ntshav tau qhuav thiab nws tau paub hauv tuskheej tias nws twb zoo tus mob phem ntawd lawm.

30 Yexus tuskheej tau paub tamsis ntawd tias hwjchim tau tawm ntawm Nws lawm. Nws tau tig los nug pab neeg coobcoob tias, “Leejtwg tau tuav kuv lub tw tsholoj?”

31 Nws cov thwjtim tau hais rau Nws tias, “Koj pom pab neeg coobcoob uas txiv koj, ua cas koj nug tias, ‘Leejtwg tau tuav kuv?’” 32 Tabsis Yexus tau xam nciglees kom pom tus uas tau ua li no.

33 Tus pojniam tau ntshai ntshee hnyo vim nws paub tias dabtsi tau tshwmsim rau tuskheej. Nws tau los txhoscaug rau ntawm Yexus thiab tau qhia qhov tseeb tagnrho rau Nws. 34 Yexus tau teb nws tias, “Mentxhais, koj kev ntseeg twb cawm koj dim lawm. Mus kajsiab lug thiab zoo hlo ntawm koj txojkev tsimtxom.”

35 Sijhawm Yexus samsim hais lus ntawd, neeg tau tawm tom tus thawj txoos sablaj tsev tuaj txog thiab hais tias, “Koj tus ntxhais tau tuag lawm. Koj tseem tabkaum xibfwb ua dabtsi?”

36 Yexus tau hnov lolus ntawd, ces Nws tau hais rau tus thawj txoos sablaj tias, “Txhob ntshai, ntseeg xwb.”

37 Yexus tsis tau tso leejtwg raws Nws, tshwj Petus, unpaus thiab nws tus kwv Yauhas. 38 Nws tau los rau ntawm tus thawj txoos sablaj lub tsev thiab tau pom tej neeg ua vigvoog, quaj thiab nyiav nroo ntws. 39 Thaum nkag los, Nws tau hais rau lawv tias, “Vim li cas nej ua vigvoog thiab quaj? Tus menyuam no tsis tau tuag, tsuas tsaugzog xwb.” 40 Ces lawv tau luag Nws.

Tomqab muab sawvdaws ntiab tawm tag, Nws tau coj tus menyuam leej niam, leej txiv thiab cov nrog Nws, thiab Nws tau mus rau hauv lub chaw uas tus menyuam nyob. 41 Tuav nkaus tus menyuam txhais tes, Yexus tau hais rau nws tias, “Thalitas khus,” uas yog txhais tias, “Tus mentxhais, kuv hais rau koj: Sawv.” 42 Tamsis ntawd tus ntxhais tau sawv thiab tau muskev (vim nws twb muaj kaum-ob xyoos lawm), mas lawv tau xav tsis thoob kiag li. 43 Yexus tau xovlus rau lawv heev kom txhob pub leejtwg paub qhov no, thiab Nws tau hais kom muab mov rau tus ntxhais noj.

🔝

Tus Cevlus Tsis Raug Hwm Hauv Zos

Mat 13:54-58

1 Yexus tau tawm qhov ntawd thiab los rau hauv Nws lub zos. Nws cov thwjtim tau caum Nws. 2 Txog hnub Xanpataus, Nws tau pib qhia hauv lub txoos sablaj, thiab coob leej uas tau hnov ntawd tau xav tsis thoob thiab tau hais tias, “Tej kev txawj no thiab lub tswvyim uas raug muab rau Nws tau tawm qhovtwg los? Thiab tej txujci ntawm Nws ob txhais tes no peemtsheej los li cas? 3 Nws tsis yog tus kws ntoo thiab Malis tus tub lod? Nws cov kwv tsis yog unpaus, Yauxej, Yudas thiab Ximoos lod? Thiab Nws cov muam tsis yog cov nrog peb nyob ntawm no lod?” Ces lawv tau ntog saum Nws.

4 Yexus tau hais rau lawv tias, “Tus cevlus yeej tsis raug hwm, tshwjxeeb hauv nws lub zos, nruab nrab nws cov txheebze thiab hauv nws lub tsev.” 5 Mas Yexus tsis tau muaj peevxwm ua ib lub hwjchim dabtsi ntawd, tshwj qhov Nws tau kho qee tus mob los ntawm kev tsa tes rau saum lawv. 6 Nws kuj tau xav tsis thoob txog lawv txojkev tsis ntseeg.

Yexus Xa Pab Kaum-Ob Leeg

Mat 10:1,9-14; Luk 9:1,3-5

Yexus tau ncig mus qhia rau tej zejzog ibncig ntawd. 7 Nws tau hu pab kaum-ob leeg los uake thiab tau pib xa lawv mus tshajtawm, ob leeg uake, thiab tau muab tswjchim ntiab tej ntsujplig qias rau lawv.

8 Nws tau tawmlus rau lawv tias: “Txhob nqa dabtsi taugkev. Tshwj tus cwj nrig, txhob nqa mov, hnab thoom, lossis lub txiaj toog ntawm txojsiv. 9 Rau khau, tabsis txhob nqa ob lub tsho.” 10 Nws kuj tau hais rau lawv tias, “Yog nej nkag rau lub tsev twg, nyob twjywm qhov ntawd mus txog thaum nej tawm. 11 Thiab yog qhov chaw twg tsis txais nej lossis tsis mloog nej, thaum nej taugkev tawm mus, nchos cov hmoov av hauv nej xibtaws ua timkhawv tawmtsam lawv.”

12 Thaum lawv tawm mus, lawv tau tshajtawm kom neeg thimxav, 13 thiab lawv tau ntiab ntau tus dab, thiab lawv tau muab roj pleev coob tus neeg mob thiab tau kho lawv zoo.

Yauhas Raug Txiav Taubhau

Mat 14:1-12; Luk 9:7-9

14 Vajntxwv Helauj tau hnov vim Yexus lub npe tau ncha rau neeg paub. Qee leej tau hais tias, “Yauhas Npatitaus tau sawv hauv cov tuag rovlos thiab vim li ntawd tej hwjchim thiaj tau tshwm hauv nws.”

15 Tabsis ibtxhia tau hais tias, “Nws yog Eliyas.”

Dua ibtxhia ho tau hais tias, “Nws yog ib tug cevlus zoo li tej cevlus.”

16 Tabsis thaum hnov txog Yexus, Helauj tau hais tias, “Yauhas tus kuv tau txiav taubhau ntawd tau raug tsa sawv lawm.”

17 Helauj tuskheej tau xa neeg mus ntes Yauhas thiab tau muab nws kaw hauv tsev lojcuj vim Helaudias, uas yog nws tus kwv Filiv tus pojniam, rauqhov Helauj tau yuav nws ua pojniam. 18 Yauhas tau hais rau Helauj tias, “Nws tsis raugcai rau koj yuav koj tus kwv tus pojniam.” 19 Helaudias tau cibnyeej rau Yauhas thiab tau xav muab nws tua. Nws tsis tau muaj peevxwm tua, 20 rauqhov Helauj tau ntshai Yauhas vim nws twb paub tias Yauhas yog neeg ncajncees thiab dawbhuv, ces nws thiaj tau tivthaiv Yauhas. Zaum twg nws tau hnov Yauhas hais lus, Helauj tau ntxhovsiab tabsis nws tau xav mloog nws thiab.

21 Txog rau hnub zoo, hnub nws yug, Helauj tau ua ib pluag mov rau nws tsoom nomtswv, tej thawj tubrog thiab tej hauneeg hauv Kalilais. 22 Thaum Helaudias tus ntxhais nkag los seevcev, nws tau ua rau Helauj thiab tej qhua zaum saum rooj raugsiab, vajntxwv tau hais rau nws tus ntxhais tias, “Taij kuv txog yam koj ntshaw, ces kuv yuav muab rau koj.” 23 Thiab nws tau twvntxhias rau nws tus ntxhais tias, “Dabtsi uas koj taij kuv, kuv yuav muab rau koj, txawm yog ib nrab ntawm kuv lub tswvkuj los tau.”

24 Ces tus ntxhais tau tawm mus nug nws niam tias, “Kuv yov taij dabtsi?”

Nws niam tau hais tias, “Yauhas Npatitaus lub taubhau!”

25 Tamsis ntawd nws tau los rau ntawm vajntxwv, nws tau taij tias, “Kuv xav kom koj muab Yauhas Npatitaus lub taubhau rau saum phaj los rau kuv tamsis no.”

26 Vajntxwv tau ntshaus kiag. Vim nws kev twv thiab tej qhua saum rooj, thiab vim nws tsis xav rhuav nws tus ntxhais, 27 vajntxwv tau xa tus tuaneeg mus thiab tau tawmcai rau lawv nqa Yauhas lub taubhau los. Thaum tawm mus, nws tau txiav Yauhas lub taubhau hauv tsev lojcuj 28 thiab tau nqa nws lub taubhau saum phaj los rau tus ntxhais. Tus ntxhais tau nqa mus rau nws niam. 29 Thaum hnov lawm, Yauhas cov thwjtim tau tuaj nqa nws lub cev thiab tau muab nws faus hauv qhov ntxa.

Yug Tsib Txheeb Leej

Mat 14:13-21; Mak 8:2-9; Luk 9:10-17; Yhs 6:5-13

30 Cov timthawj tau sibsau los rau ntawm Yexus thiab tau tshabxo rau Nws txog txhua yam uas lawv tau ua thiab tej uas lawv tau qhia. 31 Ces Nws tau hais rau lawv tias, “Los, nej nkaus xwb nrog kuv mus rau ib qhov yajsab thiab so mentsis.” Rauqhov tej neeg tau pheej tuaj thiab pheej mus, mas lawv tsis tau muaj zoo sijhawm noj mov.

32 Lawv nkaus xwb tau tawm thiab caij nkoj mus rau ib qhov yajsab. 33 Tabsis coob leej tau pom lawv mus thiab tau zeem paub lawv; ces tej neeg tau khiav tawm hauv txhua lub nroog tuaj thiab tau tuaj txog qhov chaw ntawd uantej.

34 Thaum tawm rau tim ntug, Yexus tau pom tej neeg coob coob ntawd thiab Nws tau tabncuab lawv rauqhov lawv zoo li cov yaj tsis muaj tswv, ces Nws tau qhia lawv txog ntau yam. 35 Thaum sijhawm lig lawm, cov thwjtim tau los cuag Nws thiab tau hais rau Nws tias, “Qhov chaw no yog yajsab thiab twb lig lawm. 36 Xa lawv mus kom thaum lawv mus rau tej liajteb ibncig thiab tej zejzog, lawv yov muas tau dabtsi noj.”

37 Yexus tau teb thiab hais rau lawv tias, “Nej muab rau lawv noj.”

Lawv tau teb Nws tias, “Cia peb mus thiab muab ob puas denalis muas movci, es muab rau lawv noj lod?”

38 Nws tau nug lawv tias, “Nej muaj movci npaum cas? Mus xyuas saib!”

Thaum paub lawm, lawv tau hais rau Nws tias, “Tsib lub thiab ob tug ntses.”

39 Ces Nws tau tawmlus kom tej neeg tagnrho zaum ua tej pab rau saum cov nyom ntsuab. 40 Mas lawv tau zaum ua tsheej pab, tej pab tsibcaug leej, tej pab ib puas leej. 41 Thaum txais tsib lub movci thiab ob tug ntses, Yexus tau saib rau saum ntuj thiab ua tsaug. Nws tau muab cov movci ntais thiab muab rau Nws cov thwjtim kom lawv muab mus rau ua tsum rau tej neeg. Nws tau muab ob tug ntses faib rau sawvdaws txhua nrho. 42 Txhua leej tau noj thiab tau tsau. 43 Cov movci thiab ntses seem, lawv tau khaws ntim puv nkaus kaum-ob lub pobtawb. 44 Cov tau noj tej movci ntawd muaj tsib txhiab tus txivneej.

Yexus Taugkev Saum Dej

Mat 14:22-36; Yhs 6:15-21

45 Ces tamsis ntawd Yexus tau yuam Nws cov thwjtim nce rau hauv nkoj thiab uantej mus rau sab tim Npexaidas, es Nws mam tso cov neeg mus. 46 Tomqab Nws xa lawv nce nkoj, Yexus tau mus thov Vajtswv rau saum roob.

47 Yav lig hmo ntawd, lub nkoj tau nyob hauv plawv hiavtxwv thiab Yexus ibleeg thiaj tseem nyob tim nqhuab. 48 Txog lub caij zov nyoog thij plaub hmo ntawd, Yexus pom lawv qaugzog zis rau kev nquam nkoj vim ib nthwv cua dub tau nplawm lawv. Ces Nws tau los rau ntawm lawv, taugkev saum dej hiavtxwv. Nws tau los rau ntawm lawv ib sab. 49 Tabsis thaum lawv pom Nws taugkev saum hiavtxwv, lawv tau xav tias Nws yog dabc thiab lawv tau qw. 50 Lawv tagnrho tau pom Nws thiab tau ntshai heev.

Tamsis ntawd Yexus tau nrog lawv tham thiab tau hais rau lawv tias, “Ruaj siab mas! Nws yog kuv, txhob ntshai!” 51 Nws tau nce rau hauv nkoj nrog lawv thiab nthwv cua tau tu. Lawv tuskheej tau xav tsis thoob kiag li, 52 vim lawv tsis tau totaub txog cov movci; lawv tej siab twb raug kaw lawm.

53 Tomqab lawv hla hiavtxwv rau tim ntug, lawv tau los rau ntawm Nkenexales. Lawv tau khi nkoj ntawd. 54 Sijhawm lawv samsim tawm hauv nkoj, Yexus tau raug zeem paub tamsis ntawd. 55 Tej neeg txhua nrho cheebtsam ntawd tau khiav tuaj thiab tau pib nqa tej mob saum lav tuaj rau qhov chaw uas lawv tau hnov tias Yexus nyob. 56 Txhua qhov chaw uas Yexus tau mus, tsis hais hauv zos, hauv nroog, tom liaj, lossis hauv kiab, tej neeg mob tau zaum tos; thiab lawv tau taij Nws kom Nws tso lawv tuav Nws tus tw tsholoj. Pestsawg leej uas tau tuav Nws kuj tau zoo mob tibsi.

🔝

Kev Huv Thiab Kev Qias

Mat 15:1-20

1 Cov Falixais tau sibsau tuaj rau ntawm Nws thiab ibtxhia xibfwb qhia Kevcai tau tawm pem Yeluxalees tuaj. 2 Lawv tau pom Yexus cov thwjtim ibtxhia xuas tes tsis huv noj movci, uas yog lawv tsis tau ntxuav tes, 3 vim cov Falixais thiab txhua tus Yudais tsis noj mov yog lawv tsis xyuamxim ntsees ntxuav tes uantej. Lawv tau ceev tej laus tej kabke li no. 4 Thiab thaum kav kiab los, lawv tsis noj mov yog lawv tsis raus dej uantej. Tau muaj ntau yam uas lawv tau txais los coj, xws li kev ntxuav khob, tshob thiab laujkaub tooj. 5 Cov Falixais thiab cov xibfwb qhia Kevcai tau nug Yexus tias, “Vim li cas koj cov thwjtim tsis uaneej raws li tej laus li kabke, es lawv tau xuas tes tsis huv noj mov?”

6 Ces Yexus tau hais rau lawv tias, “Yaxayas tau cevlus zoo ntsig txog nej cov neeg xyuam plhu, raws li twb sau tseg tias,

‘Haivneeg no hwm kuv ntawm dincauj,

tabsis lawv lub siab nrug deb ntawm kuv.

7 Lawv tau pe kuv qhuavqhuav,

vim lawv qhia neeg tej kevcai thiab tej lus qhuabqhia.’

8 Nej tau tso Vajtswv Ntuj tej kevcai tseg thiab tau coj neeg tej kabke.”

9 Nws tau hais rau lawv ntxiv tias, “Nej tau rhuav Vajtswv Ntuj tej kevcai tib zoo kom nej tau tsa nej tej kabke sawv. 10 Rauqhov Mauxes tau hais tias, ‘Hwm nej niam nej txiv,’ thiab tias, ‘Muab tus uas hais lus phem rau niamtxiv tua kom tuag.’ 11 Tabsis nej tau hais tias, ‘Yog tus txivneej twg hais rau nws niam lossis txiv tias, Konpas!’ (uas txhais tias, qhov khoom pub uas koj tos ntawm kuv ntawd kuv twb muab pub rau Vajtswv Ntuj lawm), 12 ces nej tau zam rau nws qhov uas nws tau coglus yuav ua rau nws niam lossis txiv ntawd. 13 Nej tau rhuav Vajtswv Ntuj txojlus los ntawm nej tej kabke uas nej tau txais ntawm tej laus los. Nej tau ua ntau yam li no.”

14 Ces tomqab Nws hu tej neeg coobcoob rovlos, Yexus tau hais rau lawv tias, “Nej sawvdaws mloog kuv thiab totaub. 15 Tsis muaj ib yam sab nraud uas nkag rau hauv neeg es ho ua rau neeg qias, tabsis tej uas tawm hauv neeg los thiaj ua rau neeg qias.”

17 Ces thaum Nws ncaim tej neeg coobcoob thiab mus rau hauv ib lub tsev, Nws cov thwjtim tau nug Nws txog nqe luspiv no. 18 Yexus tau hais rau lawv tias, “Nej yog cov tsis totaub qhov no thiab? Nej tsis muaj hlwb tias txhua yam sab nraud uas nkag mus hauv neeg tsis muaj peevxwm ua rau nws qias 19 vim tias nws tsis nkag mus hauv lub siab tabsis mus rau hauv plab thiab tawm mus ua xubtsuag.” (Li no, Yexus tau ntxuav txhua yam zaubmov huv).

20 Thiab Nws tau hais ntxiv tias, “Qhov tawm hauv neeg los, qhov ntawd ua rau neeg qias. 21 Rauqhov yam uas tawm hauv neeg lub siab yog tej kev xav phem: Kev vuabtsuab, kev tubsab, kev tuaneeg, 22 kev deev luag poj luag txiv, kev vumloj, kev phem, kev dag, kev liam ywjsiab, kev ua qhovmuag qaujles, kev xyav moo, kev muab hlob, thiab kev xav ruam ntsuav. 23 Txhua yam phem no tawm hauv nruab nrog los thiab ua rau neeg qias.”

Pojniam Xili-Faunikes

Mat 15:21-28

24 Yexus tau sawv thiab tawm qhov ntawd mus rau cheebtsam Tiles. Nws tau mus hauv ib lub tsev. Nws tsis tau xav kom leejtwg paub, tabsis Nws tsis tau muaj peevxwm zais cev. 25 Tabsis tamsis ntawd, ib tug pojniam, uas tau muaj ib tug txhais muaj tus ntsujplig qias, tau hnov txov Yexus. Nws tau tuaj txog thiab tau txhoscaug kiag ntawm Yexus kotaw. 26 Nws yog pojniam Kilis, cajces neeg Xilifaunikes. Thiab nws tau taij Yexus kom ntiab tus dab tawm hauv nws tus ntxhais.

27 Yexus tau hais rau nws tias, “Tso tej menyuam tsau uantej, rauqhov nws tsis zoo muab menyuam tej movci pov rau cov dev.”

28 Tabsis tus pojniam tau teb thiab hais rau Nws tias, “Tus Tswv, cov dev hauv qab rooj kuj tau noj menyuam tej tsig mov thiab.”

29 Ces Yexus tau teb tias, “Vim lolus no, mus! Tus dab twb tawm ntawm koj tus ntxhais lawm.”

30 Thaum mus rau hauv tsev, tus pojniam ntawd tau pom tus menyuam twb raug tso rau saum txaj thiab tus dab twb tawm lawm.

Kho Tus Nplaig Txhav thiab Lag Ntseg

Mat 15:29-31

31 Thaum tawm cheebtsam Tiles los, Yexus tau phua plhawv Xidoos mus rau hiavtxwv Kalilais, pem cov roob sab Dekapolis. 32 Lawv tau coj ib tug neeg lag ntseg thiab nplaig txhav tuaj cuag Nws thiab taij Nws kom tsa tes rau tus txivneej ntawd.

33 Tomqab txais tus txivneej no ntawm pab neeg coobcoob mus rau ib cag, Nws tau muab ntiv tes ntsaws nws ob lub qhov ntsej thiab tau nti qaubncaug los ntub nws tus nplaig. 34 Yexus tau tsa qhovmuag saib saum ntuj, tau nroo, thiab tau hais tias, “Efathas!” (uas txhais tias “Qhib hlo!”). 35 Tamsis ntawd nws ob lub qhov ntsej tau qhib thiab nws txoj hlab nplaig tau pluam plhuav, ces nws tau hais lus meej nplhias.

36 Yexus tau xovlus rau lawv kom txhob hais rau leej twg. Tabsis txawm Nws tau xovlus rau lawv npaum cas, lawv hajyam tshajtawm npaum li ntawd. 37 Lawv tau xav tsis thoob kiag li thiab hais tias, “Nws tau ua txhua yam zoo, tus lag ntseg tau hnov lus thiab tus nplaig txhav tau hais lus.”

🔝

Yug Plaub Txheeb Leej

Mat 15:32-39; 16:1-12; Mak 6:32-44

1 Lub sijhawm ntawd neeg tau tuaj coobcoob thiab lawv tsis muaj dabtsi noj. Yexus tau los cuag cov thwjtim thiab hais rau lawv tias, 2 “Kuv tabncuab pab neeg no tias lawv tau nyob nrog kuv peb hnub lawm thiab lawv tsis tau noj dabtsi li. 3 Thiab yog kuv tso lawv mus tsev tshaib ntsuav, lawv yuav qaugzog zis rau tom togkev. Dua li, ibtxhia tau taugkev deb tuaj rau ntawm no.”

4 Nws cov thwjtim tau teb Nws tias, “Leejtwg thiaj muaj peevxwm nrhiav movci ntawm tej yajsab no rau lawv noj tsau?”

5 Nws tau nug lawv tias, “Nej muaj movci npaum cas?”

Lawv tau teb tias, “Xya lub.”

6 Yexus tau tshabxo rau pab neeg coobcoob kom zaum rau pem teb. Thaum txais xya lub movci los, Nws tau muab los uatsaug. Nws tau ntais thiab muab rau Nws cov thwjtim kom muab rau rau sawvdaws noj. Lawv tau muab rau rau ntawm pab neeg coobcoob. 7 Lawv tau muaj tus puav ntses thiab. Tomqab ua tsaug tag, Nws tau hais kom lawv muab cov menyuam ntses mus rau tej neeg thiab. 8 Sawvdaws tau noj thiab tau tsau. Cov tsig seem lawv tau khaws puvnkaus xya lub pobtawb. 9 Cov neeg ntawd muaj li plaub txhiab leej. Ces Yexus tau tso lawv mus. 10 Tamsis ntawd Nws tau nce rau saum nkoj nrog Nws cov thwjtim thiab lawv tau mus rau cheebtsam Damanuthas.

Cov Falixais Nrhiav Cim Saum Ntuj

11 Cov Falixais tau tuaj thiab tau pib nrog Nws sibcav, vim lawv nrhiav ib lub cim saum ntuj thiab vim lawv xav sim Nws. 12 Tomqab nroo ib zag hauv Nws tus ntsujplig, Yexus tau hais tias, “Vim li cas tiam no nrhiav ib lub cim? Tseeb tiag, kuv hais rau nej tias lub cim yuav tsis raug muab rau tiam no.” 13 Tso lawv tseg thiab nce rau hauv nkoj, Nws tau mus rau sab tid.

Cov Falixais thiab Hemlauj Tej Keeb

14 Cov thwjtim tau hnovqab nqa movci. Lawv tau muaj tib lub hauv nkoj xwb. 15 Yexus tau xovlus rau lawv tias,“Qhib muag saib! Ceevfaj cov Falixais tej keeb thiab Helauj tej keeb.”

16 Lawv ibleeg tau tham rau ibleeg tias lawv tsis muaj movci.

17 Paub li ntawd, Nws tau hais rau lawv tias, “Nej sibtham dabtsi tias nej tsis muaj movci? Nej tsis cim thiab tsis totaub? Puas yog nej muaj lub siab tawv? 18 Muaj qhovmuag tabsis nej tsis pom thiab muaj pobntseg tabsis nej tsis hnov? Thiab nej tsis nco 19 thaum kuv ntais tsib lub movci rau tsib txhiab leej, nej tau khaws cov tsig seem puv pestsawg lub pobtawb?

Lawv tau teb tias, “Kaum-ob.”

20 “Thiab thaum kuv ntais xya lub movci rau plaub txhiab leej, nej tau khaws cov tsig seem puv pestsawg lub pobtawb?”

Lawv tau teb tias, “Xya.”

21 Nws tau hais rau lawv ntxiv tias, “Nej tseem tsis totaub?”

Kho Tus Digmuag Hauv Npexaidas

22 Lawv tau los txog Npexaidas. Neeg tau coj ib tug digmuag tuaj rau Yexus thiab lawv tau taij Nws kom Nws tuav tus neeg digmuag. 23 Tuav nkaus tus digmuag txhais tes, Yexus tau coj nws tawm rau tom ntug zos; thiab tomqab nti qaubncaug rau tus ntawd qhovmuag thiab muab tes tso rau saum nws, Yexus tau nug nws tias, “Koj puas pom dabtsi?”

24 Qhib qhovmuag, ces nws tau hais tias, “Kuv pom tej neeg, rauqhov lawv zoo li tej ntoo muskev.”

25 Yexus tau muab tes tso rau saum nws ob lub qhovmuag dua, ces nws tau pom tseeb; nws tau zoo thiab nws qhovmuag tau pom txhua yam deb tseeb. 26 Yexus tau xa nws rovmus tsev thiab hais rau nws tias, “Txhob mus hauv zos.”

Petus Hais Tias Yexus Yog Khetos

Mat 16:13-16; Luk 9:18-20

27 Yexus tau tawm qhov ntawd nrog Nws cov thwjtim mus rau lub zos Kaixas Filipis. Nws tau nug cov thwjtim ntawm kev tias, “Tej neeg hais tias kuv yog leejtwg?”

28 Lawv tau teb Nws tias, “Lawv tau hais tias koj yog Yauhas Npatitaus. Ibtxhia tau hais tias, Eliyas. Dua ibtxhia ho tau hais tias koj yog ib tug ntawm cov cevlus.”

29 Nws tau tig nug lawv, “Nej ne, nej hais tias kuv yog leejtwg?”

Teb ntua, Petus tau hais rau Nws tias, “Koj yog tus Khetos.”

30 Nws tau txwv lawv kom lawv txhob hais txog Nws rau leejtwg.

Yexus Qhia Txog Nws Kev Tuag

Mat 16:21-28; Luk 9:22-27

31 Ces Yexus tau pib qhia rau lawv tias Neeg Leej Tub cheemtsum yuav raug txomnyem ntau yam thiab Nws yuav raug cov txwjlaug, cov povthawj hlob, thiab cov xibfwb qhia Kevcai xam ua tus tsis tsimtxiaj; Nws yuav raug tua thiab tomqab peb hnub Nws yuav sawv rovlos. 32 Nws tau hais txog zaj no ruajsiab nrees, ces Petus tau coj Nws rau ibcag thiab cheem Nws.

33 Tabsis tig loo rovlos saib Nws cov thwjtim, Yexus tau cheem Petus tias, “Mus rau tom kuv qab, Xatas, rauqhov koj tsis xav txog Vajtswv Ntuj tej haujlwm tabsis txog neeg tej xwb.”

34 Yexus tau hu cov neeg coob coob los nrog Nws cov thwjtim thiab tau hais rau lawv tias, “Yog leejtwg xav caum kuv qab, cia nws txhob lees tuskheej. Cia nws kwv nws tus khaublig thiab caum kuv. 35 Rauqhov tus uas xav cawm nws txojsia yuav plam txojsia, tabsis tus uas plam nws txojsia vim kuv thiab txojmoo zoo yuav cawm nws txojsia. 36 Rauqhov nws muaj nqis dabtsi, yog neeg tsam lub cejntug tagnrho tabsis nws ho plam nws txojsia? 37 Rauqhov neeg yuav muab dabtsi mus pauv nws txojsia? 38 Yog leejtwg txajmuag rau kuv thiab kuv tej lus hauv tiam neeg txhaum thiab ua plees ua yi no, Neeg Leej Tub yuav txajmuag rau nws thaum Nws los hauv Nws Txiv tus tshwjchim thiab nrog cov timtswv dawbhuv.”

🔝

1 Thiab Nws tau hais rau lawv tias, “Tseeb tiag, kuv hais rau nej tias qee leej uas sawv ntawm no yuav tsis saj kev tuag mus txog thaum lawv pom Vajtswv Ntuj lub tswvkuj los nrog hwjchim.”

Yexus Plhis Plho

Mat 17:1-13; Luk 9:28-36

2 Ces rau hnub tomqab ntawd, Yexus tau yaum Petus, unpaus thiab Yauhas thiab tau coj lawv nkaus xwb mus saum ib lub roob siab. Nws tau plhis plho ntawm lawv xubntiag. 3 Nws tej tsoos tau ci ntsa iab thiab dawb tshajplaws, uas tej tshuaj hauv ntiajteb tsis muaj peevxwm ntxhua tau dawb li. 4 Eliyas thiab Mauxes tau tshwm rau lawv pom thiab nkawv tau nrog Yexus sibtham.

5 Petus tau teb rau Yexus tias, “Lanpis, nws zoo rau peb nyob ntawm no, thiab peb ua peb lub tsev ntaub: Ib lub rau koj, ib lub rau Mauxes thiab ib lub rau Eliyas.” 6 Rauqhov nws twb tsis paub yuav teb li cas vim lawv tau ntshai heev.

7 Ib tauv huab tau tshwm los roos lawv thiab ib lub suab tau hais hauv tauv huab rau lawv tias, “Tus no yog kuv tus Tub uas kuv hlub. Mloog Nws lus.”

8 Tib ntsais muag xwb, lawv tau saib nciglees tsis pom leejtwg nrog lawv lawm, tsuas pom Yexus nrog lawv xwb.

9 Thaum lawv nqis saum lub roob los, Yexus tau xovlus rau lawv kom lawv txhob qhia qhov lawv tau pom rau leejtwg paub mus txog thaum Neeg Leej Tub sawv hauv cov tuag rovlos. 10 Txojlus ntawd tau khuam rawv hauv lawv, thiab lawv tau sibtham tias, ‘Kev sawv hauv cov tuag rovlos yog dabtsi?”

11 Lawv tau nug Nws tias, “Vim li cas cov xibfwb qhia Kevcai tau hais tias, Eliyas cheemtsum los uantej?”

12 Yexus tau teb lawv tias, “Eliyas yuavtsum xub los thiab muab txhua yam kho. Thiab Vajlugkub tau sau li cas txog Neeg Leej Tub tias Nws yuav raug txomnyem ntau yam thiab raug saib tsis muaj nqis? 13 Tabsis kuv hais rau nej tias, Eliyas twb los lawm thiab lawv tau ua kiag rau nws li lawv xav ua, ibyam li Vajlugkub twb sau tseg txog Nws.”

Kho Tus Tub Raug Dab Ruam

Mat 17:14-19,22-23; Luk 9:37-45

14 Thaum lawv los txog ntawm cov thwjtim, lawv tau pom ib pab neeg coobcoob nyob ncig lawv thiab cov xibfwb qhia Kevcai tau sibcav nrog lawv. 15 Sijhawm pom kiag Yexus, pab neeg tagnrho tau xav tsis thoob thiab khiav los hais nojqab nyobzoo rau Nws.

16 Yexus tau nug lawv tias, “Nej nrog lawv sibcav dabtsi?”

17 Ib tug txivneej tau teb hauv pab neeg coobcoob tias, “Xibfwb, kuv tau coj kuv tus tub tuaj cuag koj vim nws raug tus dab tsis hais lus. 18 Thaum twg nws raug tus dab no, nws tau ntog rau pem teb, nws ua npuas ncauj, zom hniav qev, thiab txhav thoob ib ce. Kuv tau hais rau koj cov thwjtim kom ntiab tus dab no, tabsis lawv tsis tau muaj peevxwm.”

19 Yexus tau teb lawv tias, “Aus, tiam neeg tsis ntseeg, kuv yuav nyob nrog nej txog thaum twg? Kuv yuav ua siabntev txog thaum twg? Coj nws los rau kuv.”

20 Ces lawv tau coj tus tub los cuag Nws. Thaum tus dab pom dheev Yexus, nws tau ua rau tus tub huam kiag ib tshaj, vau hlo rau pem teb, dov lujlam thiab ua npuas ncauj nto plaws.

21 Yexus tau nug tus tub leej txiv tias, “Qhov no tau muaj rau nws ntev li cas lawm?”

Nws tau teb tias, “Txij thaum yau los lawm. 22 Thiab ntau zaus, nws tau muab tus tub pov rau hauv qhovcub thiab hauv dej kom nws puastsuaj. Yog koj muaj peevxwm dabtsi, thov pab peb thiab tabncuab peb lau.”

23 Yexus tau teb nws tias, “Yog koj muaj peevxwm? Txhua yam muaj peevxwm rau tus ntseeg.”

24 Tamsis ntawd tus tub leej txiv tau quaj dhi tias, “Kuv ntseeg. Thov pab kuv txojkev tsis ntseeg.”

25 Vim Yexus pom cov neeg coobcoob tau khiav los ntsauv, Nws tau txwv tus ntsujplig qias tias, “Tus ntsujplig lagntseg thiab tsis hais lus, kuv txwv koj, tawm ntawm nws thiab txhob nkag rau hauv nws ntxiv lawm.”

26 Tus dab tau qw thiab ua rau tus tub huam ib tshaj lojloj, ces nws tau tawm plaws. Tus tub ntawd tau zoo li tus tuag, thiab coob leej tau hais tias nws tau tuag lawm. 27 Tabsis Yexus tau tuav nkaus nws txhais tes thiab muab nws tsa. Nws tau sawv tsees.

28 Thaum nkag rau hauv tsev, Yexus cov thwjtim tau nug Nws twjywm tias, “Cas peb tsis tau muaj peevxwm ntiab tus dab ntawd?”

29 Yexus tau teb tias, “Leejtwg tsis muaj peevxwm ntiab hom dab no, tshwj los ntawm kev thov Vajtswv.”

30 Thaum lawv tawm qhov ntawd mus, lawv tau taugkev hauv Kalilais tabsis Yexus tsis tau xav kom leejtwg paub li, 31 rauqhov Nws tau qhia Nws cov thwjtim tias, “Neeg Leej Tub yuav raug ntes mus rau neeg txhais tes thiab lawv yuav tua Nws, tabsis peb hnub tomqab Nws tuag, Nws yuav sawv rovlos.” 32 Cov thwjtim tsis tau totaub lolus no, tabsis lawv kuj tau ntshai nug Nws.

Leejtwg Yog Tus Loj

Mat 18:1-5; Luk 9:46-50

33 Lawv tau los rau Kapenaus. Thaum nyob hauv tsev, Nws tau nug lawv tias, “Tom kev, nej tau sibcav txog dabtsi?” 34 Tabsis lawv tau nyob ntsiagto, vim tom kev lawv tau sibcav tias leejtwg loj dua.

35 Sijhawm zaum ntawd, Yexus tau hu pab kaum-ob leeg los thiab tau hais rau lawv tias, “Yog leejtwg xav ua tus thawj, nws yuavtsum ua tus tw thiab tus tiam sawvdaws.”

36 Yexus tau muab ib tug menyuam los sawv thiab puag hauv nruab nrab lawv thiab tau hais rau lawv tias, 37 “Leejtwg txais ib tug menyuam li tus no hauv kuv lub npe, nws txais kuv; thiab tsis yog nws txais kuv xwb, tabsis nws kuj txais tus uas tau xa kuv los.”

38 Yauhas tau hais rau Nws tias, “Xibfwb, peb tau pom ib tug ntiab dab hauv koj lub npe, mas peb tau cheem nws vim nws tsis tau caum peb.”

39 Ces Yexus tau teb tias, “Txhob cheem nws, rauqhov tsis muaj leejtwg ua hwjchim saum kuv lub npe es ho muaj peevxwm hais lus phem txog kuv. 40 Vim tias tus uas tsis tawmtsam peb kuj tuaj peb tog; 41 rauqhov leejtwg ce ib khob dej ntawm kuv lub npe rau nej vim nej yog Khetos cov thwjtim, kuv hais tseeb rau nej tias, nws yuav tsis plam nws lub nqizog.”

Tej Ua Rau Neeg Poob Kev Ntseeg

42 “Yog leejtwg dawm ib tug ntawm cov meme uas ntseeg kuv no ntog, mas zoo rau nws dua yog muab ib txhibzeb los khi rau nws cajdab thiab muab nws pov rau hauv hiavtxwv. 43 Yog koj txhais tes dawm koj ntog, muab nws txiav. Koj nkag mus rau txojsia tu tes nrho zoo tshaj li koj muaj ob txhais tes tabsis koj mus rau ntujtawg, qhov uas nplaim taws tsis kug li. 45 Yog koj txhais taw dawm koj ntog, muab nws txiav. Koj nkag mus rau txojsia tu taw nrho zoo tshaj li koj muaj ob txhais kotaw tabsis koj ho raug pov rau ntujtawg.a 47 Thiab yog koj lub qhovmuag ua rau koj ntog, muab nws dawj tawm. Koj nkag mus hauv Vajtswv Ntuj lub tswvkuj nrog ib lub qhovmuag zoo tshaj li koj muaj ob lub qhovmuag tabsis ho raug pov rau ntujtawg, 48 qhov chaw uas:

‘Lawv tus kas tsis tuag

thiab nplaim taws tsis kug.’”

49 “Rauqhov txhua tus yuav raug nplaim taws hlawv li muab ntsev las. 50 Ntsev yeej zoo, tabsis yog ntsev tsuag lawm, nej yuav muab nws las dabtsi? Muaj ntsev hauv tuskheej thiab ua neeg thajyeeb nrog lwm tus.”

🔝

Hais Txog Kev Sibnrauj

Mat 19:1-9

1 Yexus tau sawv thiab tawm qhov ntawd thiab tau mus rau tej roob hauv Yudas uas nyob ntawm dej Yuladees sab tid. Ib pab neeg coobcoob tau rovtuaj cuag Yexus, mas Nws tau qhia lawv li ibtxwm.

2 Thaum cov Falixais tau tuaj sim Nws, lawv tau nug Nws tias, “Puas tsimnyog rau ib tug txivneej nrauj nws tus pojniam?”

3 Nws tau teb rau lawv tias, “Mauxes tau tawmcai li cas rau nej?”

4 Lawv tau teb tias, “Mauxes tau tsocai kom sau daim ntawv nrauj thiab tso tus pojniam mus.”

5 Tabsis Yexus tau teb lawv tias, “Vim nej lub siab tawv, Mauxes thiaj tau sau txojcai no rau nej. 6 Tabsis txij thaum chiv txhua yam los, ‘Vajtswv Ntuj tau tsim lawv ua pojniam thiab txivneej. 7 Vim qhov no, tus txivneej thiaj yuav tso nws niam thiab txiv thiab mus lo nrog nws tus pojniam, 8 thiab nkawv obleeg yuav ua ib phob nqaij.’ Vim li ntawd, nkawv tsis ua obleeg tabsis ua ibleeg xwb. 9 Yog li, qhov uas Vajtswv Ntuj tau muab siblo, txhob cia neeg muab faib.”

10 Thaum mus rau hauv tsev, cov thwjtim tau rovqab nug Nws txog qhov no. 11 Ces Nws tau hais rau lawv tias, “Yog tus txivneej twg nrauj nws tus pojniam thiab yuav lwm tus, mas nws deev luag poj nrog tus pojniam ntawd. 12 Thiab yog tus pojniam uas nrauj nws tus txiv yuav lwm tus txiv, nws kuj deev hluas thiab.”

Foom Koobhmoov Rau Menyuam

Mat 19:13-15; Luk 18:15-17

13 Luag tau coj tej menyuam tuaj cuag Yexus kom Nws plhws lawv, tabsis cov thwjtim tau txwv lawv. 14 Thaum pom li ntawd, Yexus tau chim heev thiab tau hais rau lawv tias, “Tso cov menyuam los cuag kuv, txhob cheem lawv, rauqhov Vajtswv Ntuj lub tswvkuj yog rau cov zoo li lawv. 15 Tseeb tiag kuv hais rau nej, yog leejtwg tsis txais Vajtswv Ntuj lub tswvkuj li ib tug menyuam, nws yeej yuav tsis tau nkag mus hauv li.” 16 Ces thaum puag cov menyuam ntawd, Nws tau foom koobhmoov rau lawv thiab tsa tes rau saum lawv.

Tus Hluas Npluanuj

Mat 19:16-30; Luk 18:18-30

17 Sijhawj Nws tawm rau tom kev, ib tug txivneej tau khiav tuaj txhoscaug rau ntawm Nws thiab tau nug tias, “Xibfwb zoo, kuv yuav ua dabtsi kom kuv saws txojsia ibtxhis?”

18 Yexus tau teb nws tias, “Cas koj hu kuv ua tus zoo? Tsis muaj leejtwg zoo tshwj Vajtswv Ntuj tibleeg xwb. 19 Koj paub tej Kevcai tias, ‘Txhob tua neeg, txhob deev luag poj luag txiv, txhob ua tubsab, txhob ua timkhawv cuav, txhob huab luag tug, hwm koj niam thiab koj txiv.’”

20 Ces nws tau teb tias, ‘Xibfwb, kuv tau ceev tagnrho tej no thaum yau los lawm.”

21 Tig kiag mus saib nws, Yexus tau hlub nws thiab tau hais rau nws tias, “Koj tuncua ib qho hauv koj. Mus, muab tej uas koj muaj ntawd muag thiab muab mus pub rau cov pluag, ces koj yuav muaj txhab nyiaj saum ntuj; thiab los caum kuv.”

22 Hnov txojlus no, nws tau ncaim ntshaus ntsho thiab nyuajsiab, rauqhov nws muaj txiag heev.

23 Saib nciglees, Yexus tau hais rau Nws cov thwjtim tias, “Nyuaj npaum li cas rau cov neeg muaj txiag yuav mus hauv Vajtswv Ntuj lub tswvkuj!”

24 Cov thwjtim tau xav tsis thoob txog Nws tej lus. Tabsis Yexus tau teb rau lawv tias, “Cov menyuam, kev mus hauv Vajtswv Ntuj lub tswvkuj nyuaj npaum li cas! 25 Tus ntxhuav nkag dhau lub qhov koob yoojyim dua tus npluanuj mus hauv Vajtswv Ntuj lub tswvkuj.”

26 Lawv hajyam tau xav tsis tawm thiab sibtham tias, “Ces leejtwg thiaj muaj peevxwm dim?”

27 Saib rau lawv, Yexus tau hais tias, “Rau neeg mas tsis muaj peevxwm ua, tabsis rau Vajtswv Ntuj mas tsis nyuaj li, rauqhov Vajtswv Ntuj muaj hwjchim ua txhua yam.”

28 Petus tau pib hais rau Nws tias, “Saib, peb tau tso txhua yam los caum koj.”

29 Yexus tau hais tias, “Kuv hais tseeb rau nej, tsis muaj ib tug uas tau tso vajtse, kwvtij, muam, niam, txiv, menyuam, thiab liajteb vim kuv thiab vim txojmoo zoo 30 ces yuav tsis txais ib puas npaug vajtse, kwvtij, muam, niam, menyuam, liajteb, nrog kev tsimtxom hauv tiam no, thiab txojsia ibtxhis rau tiam yuav los. 31 Tabsis ntau tus thawj yuav dhau ua tw thiab cov tw yuav dhau ua thawj.”

Yexus Hais Txog Nws Kev Tuag Zaum Peb

Mat 20:17-19; Luk 18:31-33

32 Lawv tseem nyob ntawm kev, samsim nce mus pem Yeluxalees. Yexus tau mus ua lawv ntej thiab lawv cov ua qab tau xav tsis thoob thiab tau ntshai. Yexus tau coj lawv kaum-ob tug mus rau ib cag thiab tau qhia rau lawv txog tej uas yuav tshwmsim rau Nws 33 tias, “Nimno, peb mus rau pem Yeluxalees, mas Neeg Leej Tub yuav raug ntes mus rau cov povthawj hlob thiab cov xibfwb qhia Kevcai. Lawv yuav txiavtxim tua Nws thiab ntes Nws rau neeg txawv tebchaws. 34 Lawv yuav tuammom Nws, nti qaubncaug rau Nws, nplawm Nws thiab muab Nws tua; tabsis tomqab peb hnub, Nws yuav sawv rovlos.”

unpaus thiab Yauhas Thov Meejmom

Mat 20:20-28

35 unpaus thiab Yauhas, Xenpedais ob tug tub, tau los cuag Nws thiab hais rau Nws tias, “Xibfwb, wb xav kom yog wb thov koj dabtsi ces koj ua rau wb.”

36 Nws tau nug nkawv tias, “Neb xav kom kuv ua dabtsi rau neb?”

37 Nkawv tau teb tias, “Muab rau wb, kom wb ib tug zaum rau koj sab xis thiab ib tug rau koj sab laug hauv koj lub tshwjchim.”

38 Ces Yexus tau hais rau nkawv tias, “Neb tsis paub neb thov dabtsi. Neb puas muaj peevxwm haus lub khob uas kuv haus, lossis raus txojkev rausdej uas kuv raus ntawd?”

39 Nkawv tau teb tias, “Wb muaj peevxwm ua.”

Tabsis Yexus tau hais tias, “Lub khob uas kuv haus neb yuav haus, thiab neb yuav raug raus txojkev rausdej uas kuv raus, 40 tabsis qhov zaum rau kuv sab xis lossis kuv sab laug ntawd tsis yog kuv muab, tabsis yog rau cov uas twb raug npaj lawm xwb.”

41 Thaum kaum leej hnov li ntawd, lawv tau pib chim rau unpaus thiab Yauhas. 42 Ces Yexus tau hu lawv los thiab tau hais rau lawv tias, “Nej paub tias cov uas raug xam ua cov thawj ntawm pejkum neeg tswj lawv nrujnruj thiab cov nom loj kuj siv tswjchim rau saum lawv. 43 Tabsis rau nej mas tsis yog li ntawd. Tus uas xav dhau ua tus loj hauv nej yuav ua tus tiam nej; 44 thiab tus uas xav ua nej tus thawj yuav ua nej sawvdaws tus tubtxib. 45 Rauqhov Neeg Leej Tub tsis tau los kom Nws raug tiam, tabsis los tiam thiab muab Nws txojsia ua khoom txhiv coob leej.”

Yexus Kho Npatimeus Qhovmuag

Mat 20:29-34; Luk 18:35-43

46 Lawv tau los hauv Yelikaus. Thaum Yexus tabtom tau tawm hauv Yelikaus nrog Nws cov thwjtim thiab pab neeg coobcoob, Npatimeus (Timeus tus tub), ib tug digmuag thiab thov khawv, tau zaum ntawm ntug kev. 47 Thaum hnov tiav Nws yog Yexus Naxalev, Npatimeus tau qw thiab hu tias, “Daviv tus Tub Yexus, tabncuab kuv os!”

48 Coob leej tau txwv nws kom ntsiag, tabsis nws hajyam tau qw tias, “Daviv tus Tub, tabncuab kuv os.”

49 Yexus tau nres thiab hais tias, “Hu nws los.”

Lawv tau hu tus digmuag hais tias, “Zoo siab lau! Sawv, Nws samsim hu koj.” 50 Nws tau tso pluav nws lub tsholoj, sawv tsees thiab los rau ntawm Yexus.

51 Yexus tau nug nws tias, “Koj xav kom kuv ua dabtsi rau koj?”

Tus digmuag tau hais rau Nws tias, “Lanpis, kuv xav kom kuv pomkev.”

52 Ces Yexus tau hais rau nws tias, “Mus, koj txojkev ntseeg twb cawm koj lawm.” Tamsis ntawd, nws tau pomkev thiab tau pib caum Yexus ntawm kev ntawd.

🔝

Yexus Caij Luav Mus Yeluxalees

Mat 21:1-9; Luk 19:29-38; Yhs 12:12-15

1 Thaum lawv tau los ze Yeluxalees, txog ntawm Npefankes thiab Npethanis, uantej txog lub roob txiv ntooroj, Yexus tau xa Nws cov thwjtim ob tug 2 thiab tau hais rau nkawv tias, “Mus rau lub zos tom neb hauv ntej, thiab thaum neb mus kiag hauv zos, neb yuav pom ib tug menyuam nees luav khi rau ntawd uas tsis tau muaj ib tug neeg caij dua. Daws nws thiab cab nws los. 3 Yog leejtwg nug neb tias, ‘Neb ua dabtsi li?’ Teb tias, ‘Nws tus tswv cheemtsum siv, thiab Nws yuav xa nws rovlos ntawm no saisai.’”

4 Nkawv tau mus thiab tau pom tus nees luav khi rau ntawm roojvag sab nraud ze ntawm txojkev, thiab nkawv tau daws nws. 5 Qee leej uas sawv ntawm txojkev ntawd tau nug nkawv tias, “Neb ua dabtsi, cas lam daws tus nees luav?” 6 Nkawv tau hais rau lawv raws nraim li Yexus tau hais, ces lawv tau tso nkawv tseg. 7 Nkawv tau coj tus nees luav los rau Yexus thiab nkawv tau muab nkawv ob lub tsholoj pua. Yexus tau caij tus nees luav. 8 Coob leej tau muab lawv tej tsholoj pua rau saum kev, dua lwm cov ho muab tej nplooj uas lawv tau txiav tom tej los pua. 9 Tej neeg uantej thiab uaqab tau qw tias:

“Hausanas!”

“Qhuas tus samsim los ntawm tus Tswv lub npe!”

10 “Qhuas peb txiv Daviv lub tswvkuj uas samsim los.

Hausanas hauv tej chaw siab tshajplaws!”

11 Yexus tau los hauv Yeluxalees thiab hauv lub tuamtsev. Tomqab ncig xyuas txhua yam, lub sijhawm kuj lig lawm, ces Nws tau mus rau Npethanis nrog pab kaum-ob leeg.

Yexus Tsawm Tsob Txiv Ncuavpias

Mat 21:18-22

12 Tagkis, thaum lawv tau tawm hauv Npethanis los, Yexus tau tshaib. 13 Vim Nws pom tsob txiv ncuavpias ib ncua deb tsawv uas muaj nplooj ntau, Nws tau mus saib seb Nws puas nrhiav tau dabtsi. Thaum Nws mus txog, Nws tsis tau pom dabtsi, nplooj xwb, vim tias nws tsis yog lub caij txi txiv ncuavpias. 14 Nws tau teb tsob txiv tias, “Tsis muaj leejtwg yuav noj koj cov txiv mus ntxiv lawm.” Cov thwjtim tau hnov Nws.

Yexus Ntxuav Lub Tuamtsev

Mat 21:12-16; Luk 19:45-47; Yhs 2:13-16

15 Ces lawv tau mus hauv Yeluxalees. Thaum mus hauv lub tuamtsev, Yexus tau pib ntiab cov muas thiab cov muag tsiaj ntawm tuamtsev. Nws tau muab cov neeg pauv nyiaj tej rooj thiab cov neeg muag nquab tej tog ntxeev; 16 thiab Nws tsis tau tso leejtwg nqa khoom phua lub tuamtsev. 17 Nws tau qhia lawv tias, “Tsis tau sau tseg tias, ‘Kuv lub tsev yuav raug hu ua lub tsev thov Vajtswv rau txhua haivneeg’ lod? Tabsis nej twb muab nws ua ‘lub tsev tubsab!”

18 Cov povthawj hlob thiab cov xibfwb qhia Kevcai tau hnov thiab lawv tau nrhiav kev muab Nws ua kom puastsuaj. Lawv tau ntshai Nws vim tej neeg tagnrho tau xav tsis thoob txog Nws zaj lus qhia. 19 Ces thaum tsausntuj, lawv tau tawm nroog mus rau sab nraud.

Tsob Txiv Ncuavpias Qhuav

Mat 21:19-22

20 Sawv ntxov hnub tomqab, thaum tau dhau kev tuaj, lawv tau pom tsob txiv ncuavpias twb qhuav hauv tus cag tuaj lawm. 21 Petus tau ras dheev thiab hais rau Yexus tias, “Lanpis, saib tsob txiv ncuavpias uas koj tau tsawm ntawd twb qhuav lawm.”

22 Yexus tau teb rau lawv tias, “Muaj kev ntseeg hauv Vajtswv Ntuj. 23 Kuv hais tseeb rau nej tias, yog leejtwg hais rau lub roob no, ‘Nqa tuskheej thiab dhia rau hauv hiavtxwv!’ Thiab nws tsis ua xyemxyav hauv siab tabsis ntseeg tias qhov nws hais ntawd yuav tshwmsim, ces qhov ntawd yuav dhau ua nws tug. 24 Vim qhov no, kuv hais rau nej, yam dabtsi uas nej thov thiab taij Vajtswv, ntseeg tias nej tau txais, ces nws yuav dhau ua nej tug. 25 Thaum nej samsim sawv thov Vajtswv, yog nej muaj ib qhov tawmtsam leejtwg, zamtxim, kom nej Txiv tus nyob saum ntuj yuav zam nej tej kev txhaum rau nej thiab.”

Ntsig Txog Yexus Lub Tswjchim

Mat 21:23-27; Luk 20:1-8

27 Lawv tau rovlos hauv Yeluxalees. Sijhawm Yexus tau tabtom ncig hauv lub tuamtsev, cov povthawj hlob, cov xibfwb qhia Kevcai, thiab cov txwjlaug tau tuaj rau ntawm Nws 28 thiab tau nug Nws tias, “Koj ua tej no los ntawm lub tswjchim twg? Lossis leejtwg tau muab tswjchim rau koj ua tej no?”

29 Tabsis Yexus tau teb lawv tias, “Kuv yuav nug nej ib zaj. Yog nej teb kuv, ces kuv yuav qhia rau nej tias kuv ua tej no los ntawm lub tswjchim twg. 30 Yauhas txojkev rausdej ntawd tau tawm saum ntuj los lossis ntawm neeg los? Teb kuv.”

31 Lawv tau sibtham tias, “Peb yuav hais li cas? Yog peb hais tias ‘Tawm saum ntuj los,’ Nws yuav nug tias, ‘Yog li ntawd, vim li cas nej tsis ntseeg?’ 32 Tabsis yog peb hais tias, ‘Tawm ntawm neeg?’” (Lawv tau ntshai tej neeg coobcoob, rauqhov sawvdaws tub yeej paub tseeb tas Yauhas yog ib tug cevlus.)

33 Thaum teb Yexus, lawv tau hais tias, “Peb tsis paub.”

Ces Yexus tau hais rau lawv tias, “Kuv yuav tsis teb nej thiab tias kuv ua tej no los ntawm lub tswjchim dabtsi.”

🔝

Luspiv Txog Cov Tu Vaj Txivhmab

Mat 21:33-46; Luk 20:9-19

1 Yexus tau pib hais luspiv rau lawv tias, “Ib tug txivneej tau tsim ib lub vaj txivhmab. Nws tau xov lajkab ncig; nws tau khawb ib lub qhov tsuam txivhmab, thiab tau tsa lub tsev tsomfaj zov. Nws tau muab ntiav rau ib cov tubqoob thiab tau tawm mus. 2 Txog caij sau qoob, nws tau xa ib tug tubtxib mus nqa nws feem txiv hauv lub vaj txivhmab ntawm cov tubqoob. 3 Lawv tau muab nws ntes, muab ntaus, thiab muab xa tawm tes dawb tes npliag. 4 Nws kuj tau xa dua lwm tus tubtxib mus. Lawv tau muab nws ntaus taubhau thiab muab rhuav txajmuag ntsuav. 5 Nws tau rovqab xa ib tug. Tus ntawd lawv tau muab tua. Nws tau xa dua coob tus, ibtxhia tau raug ntaus thiab ibtxhia tau raug tua.”

6 “Tshuav ib tug uas nws tau muaj: Tus tub uas nws hlub. Nws tau xa tus tub zaum kawg vim nws hais tias, ‘Lawv yuav hwm kuv tus tub.’”

7 “Tabsis cov tubqoob tau sibtham tias, ‘Tus no yog tus saws nyiaj qabnas. Los, cia peb muab nws tua kom nyiaj qabnas yuav dhau ua peb tug.’ 8 Lawv tau muab nws ntes thiab muab tua. Lawv kuj tau muab nws pov rau ntawm lub vaj txivhmab sab nraud.”

9 “Tus tswv lub vaj txivhmab yuav ua dabtsi? Nws yuav tuaj thiab rhuav cov tubqoob ntawd, thiab yuav muab lub vaj txivhmab ntiav rau lwm cov. 10 Nej tsis tau nyeem dua hauv Vajlugkub tias,

‘Lub pobzeb uas cov ua tsev xam tsis tsimtxiaj,

lub ntawd tau dhau los ua lub niam zeb.

11 Qhov no tau tshwm ntawm tus Tswv los,

thiab nws yog qhov txaus xav ntawm peb lub qhovmuag”?

12 Lawv tau nrhiav kev ntes Nws vim lawv tau paub tias Nws tau hais zaj luspiv no tawmtsam lawv. Tabsis lawv tau ntshai tej neeg coobcoob; lawv tau tso Nws tseg thiab tau tawm mus lawm.

Hais Txog Kev Them Se Rau Fajtim

Mat 22:15-22; Luk 20:20-26

13 Lawv tau xa qee tus Falixais thiab Helauj cov neeg tuaj rau ntawm Yexus, kom lawv tau ntes Nws saum lus. 14 Thaum lawv tuaj txog, lawv tau hais rau Nws tias, “Xibfwb, peb pom tias koj yog tus tseeb thiab koj tsis ntshai leejtwg li, rauqhov koj tsis saib ntsejmuag thiab koj qhia Vajtswv Ntuj txojkev saum qhov tseeb. Puas tsimnyog them se rau Fajtim lossis tsis them? 15 Peb yov muab lossis tsis muab?”

Vim Nws twb paub lawv kev xyuam plhu, Nws thiaj tau hais rau lawv tias, “Vim li cas nej sim kuv? Nqa lub nyiaj denalis rau kuv kom kuv pom.” 16 Ces lawv tau nqa los. Nws tau nug tias, “Leejtwg lub ntsejmuag thiab cov ntawv?”

Lawv tau teb Nws tias, “Fajtim li.”

17 Ces Yexus tau hais rau lawv tias, “Muab Fajtim tej rovqab rau Fajtim thiab muab Vajtswv Ntuj tej rovqab rau Vajtswv Ntuj.”

Mas lawv tau xav tsis thoob txog Yexus.

Hais Txog Cov Tuag Sawv Rovlos

Mat 22:23-33; Luk 20:27-38

18 Cov Xadukais tau tuaj cuag Yexus. Lawv yog cov uas hais tias tsis muaj kev sawv rovlos; thiab lawv tau nug Nws hais tias, 19 “Xibfwb, Mauxes tau sau rau peb tias, ‘Yog leejtwg tus kwvtij tuag, tso pojniam ua ntsuag, tabsis tsis tseg menyuam, ces cia nws tus kwv yuav nws tus pojniam kom tsa ib lub noob rau nws.’ 20 Muaj xya tus kwvtij. Tus hlob tau yuav pojniam thiab tau tuag tsis tseg noob. 21 Tus thij ob tau yuav tus pojniam ntawd thiab tau tuag tsis tseg noob; tus thij peb los kuj ibyam nkaus. 22 Thiab xya leej puavleej tsis tau tseg noob. Tomqab lawv tau tuag tag, tus pojniam kuj tau tuag thiab. 23 Hais txog kev sawv rovlos, thaum lawv tau sawv rovlos, tus pojniam no yuav yog leejtwg tug? Rauqhov lawv xya leej puavleej tau yuav nws ua pojniam.”

24 Yexus tau hais rau lawv tias, “Nej tau plaskev tsis vim qhov nyuag no! Tabsis nej twb tsis paub Vajlugkub thiab Vajtswv Ntuj lub hwjchim, puas yog? 25 Rauqhov thaum lawv sawv hauv cov tuag rovlos, lawv tsis yuav pojniam thiab tsis raug qua, tabsis lawv yuav zoo li cov timtswv saum ntuj. 26 Ntsig txog kev sawv ntawm cov tuag ntawd, nej tsis tau nyeem hauv Mauxes phau ntawv, ntawm tsob ntoo cig lamlug uas Vajtswv Ntuj tau hais rau nws tias, ‘Kuv yog Anplahas tus Vajtswv, Yakhauj tus Vajtswv thiab Ixaj tus Vajtswv’ lod? 27 Nws tsis yog tus Vajtswv rau cov tuag tabsis rau cov ciajsia. Nej plaskev deb heev.”

Hais Txog Thawj Nqe Kevcai

Mat 22:34-40

28 Ib tug xibfwb qhia Kevcai tau tuaj thiab tau hnov lawv cav nrog Yexus. Thaum pom Yexus teb lawv zoo, nws tau nug Yexus tias, “Nqe twg yog nqe ua thawj ntawm tej Kevcai?”

29 Yexus tau teb tias, “Nqe no ua thawj hlo: ‘Mloog os, Yixayees, tus Tswv peb tus Vajtswv Ntuj tibleeg thiaj yog tus Tswv. 30 Hlub tus Tswv, koj tus Vajtswv, tagnrho koj lub siab, tagnrho koj txojsia, tagnrho koj kev xav thiab tagnrho koj lub zog. 31 Nqe ob yog li no: Hlub tus neeg ntawm koj togtsev ib yam li koj tuskheej.’ Tsis muaj ib nqe kevcai twg loj dua ob nqe no.”

32 Tus xibfwb qhia Kevcai tau hais tias, “Zoo, xibfwb. Koj hais qhov tseeb tias Nws tibleeg thiaj yog tus Tswv xwb, dhau ntawm Nws tsis muaj dua lwm tus. 33 Thiab kev hlub Nws tagnrho siab, tagnrho kev totaub, tagnrho lub zog, thiab hlub tus neeg ntawm togtsev li tuskheej mas muaj txiajntsig tshaj tagnrho tej khoom hlawv thiab khoom fij.”

34 Thaum pom tias nws tau teb muaj tswvyim ntxiag, Yexus tau hais rau nws tias, “Koj nyob tsis deb ntawm Vajtswv Ntuj lub tswvkuj.” Tomqab ntawd, tsis tau muaj leejtwg kam nug Yexus ntxiv lawm.

Khetos Yog Leejtwg Tub?

Mat 22:41-46; 23:1-7; Luk 20:41-47

35 Yexus tau pib teb thiab qhia hauv lub tuamtsev tias: “Vim li cas cov xibfwb qhia Kevcai ho hais tias tus Khetos yog Daviv Tub? 36 Daviv tuskheej tau hais los ntawm tus Ntsujplig Dawbhuv tias:

‘Tus Tswv tau hais rau kuv tus Tswv tias,

“Zaum ntawm kuv sab xis

mus txog thaum kuv muab koj cov yeebncuab

tiag koj kotaw.”’

37 “Daviv tuskheej tau hu Nws ua ‘Tus Tswv,’ ces Nws ho yog Daviv tus Tub li cas?” Tej neeg coobcoob ntawd tau mloog Nws zoo siab hlo.

38 Thaum qhuabqhia ntawd Yexus kuj tau hais tias, “Ceevfaj cov xibfwb qhia Kevcai. Lawv nyiam hnav lub tsholoj suabteb mus ncig hauv kiab thiab txais tej lus nojqab nyobzoo hauv tej khw, 39 thiab zaum lub haurooj hauv txoos sablaj thiab thawj leej rooj hauv ntees noj ntees haus. 40 Lawv nqos pes hlo tej pojntsuam tej tsev thiab uatxuj thov Vajtswv ntevntev. Lawv yuav txais kev teemtxim hnyav dua ntais.”

Tus Pojntsuam Tso Nyiaj

Mat 24:1-51; Luk 21:5-36

41 Thaum Nws tau zaum tim ntsoov rau lub thawv tso nyiaj, Yexus tau saib seb tej neeg coobcoob tso nyiaj li cas rau hauv lub txhab nyiaj. Ntau tus npluanuj tau tso nyiaj ntau. 42 Ib tug pojntsuam pluag tau tuaj thiab tau tso ob lub txiaj toog uas raug nqi ib txiaj npib. 43 Hu kiag Nws cov thwjtim los, Yexus tau hais rau lawv tias, “Kuv hais tseeb rau nej tias, tus pojntsuam pluag no tau tso ntau dua txhua leej uas tau tso rau hauv lub txhab nyiaj, 44 rauqhov txhua leej tau muab tawm ntawm lawv cov nyiaj seem, tabsis nws tau muab tawm ntawm nws txojkev pluag, tagnrho qhov nws muaj thiab tagnrho nws lub neej.”

🔝

Yexus Cevlus Txog Thaum Kawg

Mat 24:1-51; Luk 21:5-36

1 Thaum Yexus tawm hauv lub tuamtsev, Nws ib tug thwjtim tau hais rau Nws tias, “Xibfwb, saib tej niag niam zeb thiab tej niag tsev ntxoovnyos ntawd!”

2 Yexus tau hais rau nws tias, “Koj pom tej tsev lojloj ntawd? Tsis muaj ib lub pobzeb tshooj lwm lub ntawd uas yuav tsis poob.”

3 Thaum Yexus tau zaum ibleeg saum roob txiv ntooroj tim ntsoov rau lub tuamtsev, Petus, unpaus, Yauhas thiab Anres tau nug Nws tias, 4 “Qhia rau peb seb tej no yuav tshwmsim thaum twg, thiab dabtsi yuav yog lub cim rau thaum txhua txhia yam no yuav tiav?”

5 Yexus tau pib hais rau lawv tias, “Ceevfaj kom nej leejtwg txhob plaskev. 6 Coob leej yuav los ntawm kuv lub npe thiab hais tias, ‘Kuv yog Nws,’ thiab ntau leej yuav plaskev. 7 Thaum nej hnov txog tsovrog thiab tej moo tsovrog, txhob ceebsob. Tej no cheemtsum muaj tabsis nws tsis yog qhov kawg. 8 Rauqhov ib haivneeg yuav sawv tawmtsam ib haivneeg, ib lub tswvkuj yuav sawv tawmtsam ib lub tswvkuj, av yuav qeeg rau ntau qhov, kev tshaib yuav tshwmsim ntau. Tej no yog kev chiv mob plab yug menyuam.”

9 “Ceevfaj nej tuskheej. Lawv yuav ntes nej mus rau lub rooj Xuhenris thiab nej yuav raug nplawm hauv txoos sablaj. Vim kuv, nej yuav sawv ntawm tej kavxeev thiab tej vajntxwv thiab ua timkhawv rau lawv. 10 Tabsis txojmoo zoo cheemtsum xub raug tshajtawm rau txhua haivneeg tso. 11 Thaum lawv ntes nej mus ntawd, txhob txhawj tias nej yuav hais dabtsi, rauqhov yam uas nej yuav hais lub txoovteev ntawd yuav raug muab rau nej. Rauqhov nej tsis yog cov hais tabsis tus hais yog tus Ntsujplig Dawbhuv. 12 Kwvtij yuav ntes kwvtij mus rau kev tuag, txiv yuav ntes menyuam, menyuam yuav sawv tawmtsam niamtxiv thiab muab lawv tua. 13 Nej yuav raug sawvdaws ntxub vim kuv lub npe, tabsis tus uas nyiaj mus txog qhov kawg yuav dim.”

14 “Thaum nej pom txojkev phem kev puasntsoog nyob saum qhov chaw uas nws tsis cheemtsum (cia tus nyeem totaub,) ces cia cov neeg hauv Yudas khiav mus saum tej roob, 15 cia tus saum ruvtsev txhob nqis lossis mus nqa dabtsi hauv nws lub tsev, 16 thiab cia tus nram liaj txhob rovqab mus nqa nws lub tsholoj. 17 Tabsis kev vijnpog raug rau cov pojniam xeebtub thiab muaj menyuam noj mis lub sijhawm ntawd. 18 Thov Vajtswv kom txhob tshwmsim rau lub caij ntuj no, 19 rauqhov lub caij ntawd yuav muaj tej kev txomnyem uas tsis tau tshwmsim dua txij thaum chivkeeb uas Vajtswv Ntuj tau tsim ntiajteb los txog rau nimno thiab yuav tsis tshwmsim ntxiv. 20 Yog tus Tswv tsis tau txiav lub caijnyoog, tagnrho nqaijtawv yuav tsis dim; tabsis vim cov uas Nws tau xaiv lawm, Nws tau txiav lub caijnyoog.”

21 “Thiab thaum ntawd yog leejtwg hais rau nej tias, ‘Saib, Khetos nyob ntawd,’ lossis ‘nyob tod,’ txhob ntseeg. 22 Rauqhov cov khetos cuav thiab cov cevlus cuav yuav sawv thiab yuav muab tej cim thiab txujci los ntxias cov raug xaiv kom plaskev, yog lawv muaj peevxwm ua. 23 Tabsis ceevfaj nej tuskheej! Kuv twb hais txhua yam rau nej uantej lawm.”

24 “Tabsis lub sijhawm tomqab txojkev txomnyem ntawd,

‘Lub hnub yuav tsaus ntais

thiab lub hli yuav tsis xa nws tus duab ci,

25 thiab cov hnubqub yuav poob saum ntuj,

thiab tej hwjchim saum ntuj yuav co qeegtxoog.’”

26 “Ces neeg yuav pom Neeg Leej Tub los saum huab nrog hwjchim loj thiab tshwjchim, 27 thiab thaum ntawd Nws yuav xa cov timtswv thiab yuav sau cov raug xaiv tim qhov ntiajteb kawg mus txog pem qhov ntuj kawg los ntawm plaub nthwv cua.”

28 “Kawm zaj luspiv ntawm tsob txiv ncuavpias. Thaum nws cov ceg ua cos mosnyoos thiab tej nplooj hlav, nej paub tias ntuj kub twb los ze lawm. 29 Nej kuj zoo nkaus li, thaum nej pom tej xwmtxheej no, nej paub tias nws twb los ze ntawm qhovrooj lawm. 30 Kuv hais tseeb rau nej tias, tiam no yuav tsis dhau mus uantej txhua yam no tshwmsim. 31 Lub ntuj thiab ntiajteb yuav ploj mus tabsis kuv tej lus yuav tsis ploj li.”

Tsis Paub Sijhawm

32 “Hais txog hnub ntawd thiab lub txoovteev ntawd, tsis muaj leejtwg paub, tsis hais cov timtswv saum ntuj lossis Neeg Leej Tub, tsuas yog Leej Txiv tibleeg xwb. 33 Ceevfaj thiab rua muag pliav! Rauqhov nej tsis paub tias lub caijnyoog yog thaum twg. 34 Zoo li ib tug txivneej tso vajtse, mus txawv tebchaws thiab nws tau muab tswjchim rau cov tubtxib raws nyias txoj haujlwm. Nws tau tawmcai rau tus zov qhovrooj kom rua muag pliav.”

35 “Yog li ntawd, rua muag pliav! Rauqhov nej tsis paub thaum tus tswv tsev yuav los: Tsausntuj zuag, tag hmo, caij qaib qua lossis kaj ntug. 36 Txhob yog thaum nws los, es nws ntsib nej tsaugzog kus. 37 Qhov kuv hais rau nej, kuv hais rau txhua tus: Rua muag pliav.”

🔝

Yexus Raug Pleev Roj

Mat 26:2-16; Luk 22:1-6; Yhs 12:1-8

1 Lub koobtsheej hladhau thiab noj ncuav tsis xyaw keeb yuav los txog ob hnub tomntej, mas cov povthawj hlob thiab cov xibfwb qhia Kevcai tau nrhiav kev seb lawv yuav ntes Yexus twjywm mus tua li cas. 2 Rauqhov lawv tau hais tias, “Tsis txhob yog hauv lub koobtsheej, kom pejxeem thiaj tsis kubntxhov.”

3 Thaum Nws tau nyob hauv Ximoos tus mob ruas tsev hauv Npethanis thiab tau zaum ntawm rooj mov, ib tug pojniam tau tuaj. Nws tau tuav rawv ib hwj tshuaj tswqab tseem naludas kim heev, mas nws tau muab lub hwj lov ntho thiab muab hliv rau saum Yexus taubhau.

4 Ibtxhia tau chim hauv tuskheej tas, “Hwj tshuaj tswqab no tau muab nkim ua dabtsi? 5 Hwj tshuaj tswqab no muaj peevxwm muab muag tsis tsawg tshaj peb puas denalis thiab muab pub rau cov pluag.” Mas lawv tau yws nws.

6 Tabsis Yexus tau teb tias, “Tso nws ua. Vim li cas nej tsim teebmeem rau nws? Nws tau ua ib tes haujlwm zoo rau kuv. 7 Rauqhov nej yuav ibtxwm muaj cov pluag nrog nej thiab nej xav ua zoo rau lawv thaum twg los nej yeej muaj peevxwm; tabsis nej yuav tsis muaj kuv nraim. 8 Nws tau ua qhov nws muaj; nws tau muab tshuaj pleev kuv lub cev uantej mus faus. 9 Kuv hais tseeb rau nej tias, txojmoo zoo raug tshajtawm mus txog qhovtwg thoob plaws lub cejntug, qhov nws tau ua rau kuv yuav raug hais ua kev nco txog nws.”

10 Yudas Ikhalaus, ib tug ntawm pab kaum-ob leeg, tau tawm mus cuag cov povthawj hlob kom nws yov ntes Yexus rau lawv. 11 Thiab cov uas tau hnov txog qhov no tau zoo siab thiab tau coglus tias lawv yuav muab nyiaj rau nws. Ces nws tau pib nrhiav lub zoo sijhawm los ntes Yexus.

Pluas Mov Hladhau

Mat 26:17-30; Luk 22:7-23; 1 Klt 11:23-25

12 Thawj hnub hauv lub koobtsheej movci tsis xyaw keeb, thaum tus yaj hladhau raug tua fij, Yexus cov thwjtim tau hais rau Nws tias, “Koj xav kom peb mus npaj qhovtwg kom koj tau noj pluas mov hladhau?”

13 Nws tau xa Nws ob tug thwjtim thiab tau hais rau nkawv tias, “Mus rau hauv nroog thiab ib tug txivneej kwv ib hub dej yuav ntsib neb. Neb caum nws qab 14 thiab yog nws nkag mus qhovtwg, neb hais rau tus tswv tsev tias, ‘Xibfwb nug tias, qhovtwg yog kuv lub chaw txais qhua uas kuv yuav noj pluas mov hladhau nrog kuv cov thwjtim?’ 15 Ces nws yuav qhia neb rau chav loj sab saud uas twb raug npaj txhij huvsi lawm. Neb npaj rau peb qhov ntawd.”

16 Ob tug thwjtim tau tawm mus hauv nroog. Nkawv tau pom raws nraim li Nws tau hais rau nkawv thiab nkawv tau npaj pluas mov hladhau.

17 Thaum txog yav tsausntuj, Yexus tau los nrog pab kaum-ob leeg. 18 Thaum lawv tau zaum saum lub rooj mov, Yexus tau hais tias, “Kuv hais tseeb rau nej tias, nej ib tug uas samsim noj nrog kuv no yuav ntes kuv.”

19 Ces lawv tau pib ntsawvsiab thiab hais rau Nws ib tug zujzus tias, “Tsis yog kuv pod?”

20 Nws tau hais rau lawv tias, “Nws yog nej kaum-ob tug no ib tug, tus uas samsim ntsw kuatxob hauv lub tais nrog kuv. 21 Neeg Leej Tub yuav taugkev raws nraim li twb sau tseg txog Nws, tabsis kev vijnpog raug tus txivneej uas ntes Neeg Leej Tub. Nws zoo dua rau tus txivneej ntawd yog nws tsis tau yug los.”

22 Thaum lawv samsim noj mov, Yexus tau muab lub movci los uatsaug, muab ntais thiab muab cev rau lawv. Nws tau hais tias, “Txais, qhov no yog kuv lub cev.”

23 Nws kuj tau muab lub khob los uatsaug thiab muab rau lawv, thiab lawv tau haus txhua tus. 24 Mas Nws tau hais rau lawv tias, “Qhov no yog kuv cov ntshav saum tus txhooj uas raug nchuav rau coob leej. 25 Kuv hais tseeb rau nej tias, kuv yuav tsis haus kua txivhmab mus txog thaum kuv haus cov tshiab hauv Vajtswv Ntuj lub tswvkuj.”

26 Tomqab lawv hu ib zaj nkauj, lawv tau tawm mus rau tim roob txiv ntooroj.

Cov Thwjtim Yuav Tawg

Mat 26:31-35

27 Yexus tau hais rau lawv tias, “Nej txhua tus yuav dawm ntog, vim twb sau tseg tias,

‘Kuv yuav ntaus tus tswv yaj,

thiab pab yaj yuav tawg rirws.’”

28 “Tabsis tomqab kuv raug tsa sawv, kuv yuav mus uantej nej rau Kalilais.”

29 Petus tau hais rau Nws tias, “Txawm txhua leej yuav dawm ntog los kuv yuav tsis ntog.”

30 Yexus tau teb nws tias, “Tseeb tiag, kuv hais rau koj tias, hmo no uantej qaib qua zaum ob, koj yuav tsis lees kuv peb zaug.”

31 Tabsis Petus tau hais heev tshaj tias, “Txawm nws cheemtsum rau kuv tuag nrog koj, kuv yeej yuav tsis lam tsis lees koj.” Lawv txhua tus kuj tau hais ibyam nkaus li ntawd.

Hauv Nkexemanes

Mat 26:36-46; Luk 22:40-46

32 Lawv tau los txog qhov chaw uas hu ua Nkexemanes, ces Yexus tau hais Nws cov thwjtim tias, “Zaum ntawm no thaum kuv thov Vajtswv.” 33 Nws tau coj Petus, unpaus thiab Yauhas nrog Nws thiab Nws tau pib lwjsiab thiab txhovsiab heev. 34 Nws tau hais rau lawv tias, “Kuv siabntsws lwjtsus txog qhov tuag tau! Nyob ntawm no thiab rua muag tsus.”

35 Mus zoj rau tomntej, Nws tau ntog rau pem teb thiab Nws tau thov Vajtswv tias kheev lam ua tau, ces cia lub sijhawm dhau ntawm Nws mus 36 thiab Nws tau hais tias, “Anpas, Txiv, koj muaj peevxwm ua txhua yam. Tshem lub khob no ntawm kuv mus, tabsis txhob ua li kuv xav tau, ua li koj xav tau.”

37 Nws tau los pom lawv pw tsaugzog, thiab Nws tau hais rau Petus tias, “Ximoos, pw tsaugzog lod? Koj tsis muaj zog yuav rua muag pliav ibpliag li? 38 Rua muag pliav thiab thov Vajtswv kom nej txhob raug kev simsiab. Tus ntsujplig nquag plias tabsis lub cev tuag vias.”

39 Thaum Nws rovqab mus, Nws tau thov Vajtswv, hais nkaus txojlus qub. 40 Nws tau rovlos pom lawv pw tsaugzog, vim tias lawv tej qhovmuag kawnti thiab lawv twb tsis paub tias lawv teb Nws dabtsi.

41 Nws kuj tau rovlos zaum peb thiab hais rau lawv tias, “Pw tsaugzog mentsis thiab so! Txaus lawm laud! Sijhawm los txog, saib mas, Neeg Leej Tub samsim raug ntes mus rau cov neeg txhaum tes. 42 Sawv, cia peb mus. Tus uas ntxeevsiab rau kuv tuaj txog lawm.”

Yexus Raug Ntes

Mat 26:47-56; Luk 22:47-50; Yhs 18:3-11

43 Sijhawm Nws samsim hais lus ntawd, Yudas, ib tug ntawm pab kaum-ob leeg, tau tshwm plaws. Nrog nws uake kuj muaj cov neeg nqa ntaj nqa qws coobcoob, uas tuaj ntawm cov povthawj hlob, cov xibfwb qhia Kevcai thiab cov txwjlaug tuaj.

44 Tus ntxeevsiab rau Yexus tau muab lub cim rau lawv hais tias, “Kuv nwj tus twg ces yog tus ntawd. Ntes Nws kiag thiab coj Nws mus ceev nrooj.” 45 Thaum tuaj txog ntua, Yudas tau txav zog los rau ntawm Yexus thiab hais tias, “Lanpis,” thiab tau nwj Nws. 46 Lawv tau ntes thiab khi Yexus. 47 Ces ib tug ntawm cov uas sawv ntawd tau thau hlo ntaj thiab ibntag tus povthawj hlob tus tubtxib lub pobntseg tu nrho.

48 Yexus tau teb rau lawv tias, “Cas nej tau tuaj ntes kuv, nqa ntaj nqa qws, li ntes tubsab? 49 Ib hnub rau ib hnub kuv tau qhia ntawm tuamtsev, thiab nej tsis tau ntes kuv, tabsis kom Vajlugkub txhua nqe yuav tiav.” 50 Tso plhuav Yexus tseg, cov thwjtim tagnrho tau khiav mus.

51 Thiab ib tug hluas uas tau caum Yexus qab thiab npua ib daim ntaub mag xwb; lawv tau ntes nws thiab, 52 tabsis nws tau tso plhuav daim ntaub mag thiab khiav liab qab tsuas lawm.

Yexus Raug Txiavtxim Tuag

Mat 26:57-68; Luk 22:67-71; Yhs 18:12-13,19-24

53 Lawv tau coj Yexus mus rau tus povthawj hlob, mas tagnrho cov povthawj hlob, cov txwjlaug thiab cov xibfwb qhia Kevcai tau tuaj uake. 54 Petus tau caum Yexus qab debdeb mus rau ntawm tus povthawj hlob lub loog sab hauv, thiab nws tau zaum nrog cov tubtxib thiab ntetaws ntawm qhovcub.

55 Cov povthawj hlob thiab tagnrho lub rooj Xuhenris tau nrhiav tej timkhawv tawmtsam Yexus kom muab Nws tua, tabsis nrhiav tsis tau. 56 Txawm coob leej tau ua timkhawv cuav tawmtsam Nws, los lawv tej timkhawv tsis tau sibthooj.

57 Ibtxhia tau sawv los ua timkhawv cuav tawmtsam Nws 58 tias, “Peb tau hnov Nws hais tias, ‘Kuv yuav rhuav lub tuamtsev uas tes ua no thiab peb hnub kuv yuav tsa dua lub uas tsis yog tes ua.’” 59 Txawm nqe no los lawv qhov timkhawv tsis sibthooj.

60 Ces tus povthawj hlob tau sawv hauv nruab nrab lawv thiab tau nug Yexus tias, “Koj tsis teb ib lo li? Tej lawv tau nkaug koj no yog dabtsi?” 61 Tabsis Nws tau nyob ntsiagto thiab tsis tau teb ib lo li.

Tus povthawj hlob tau rovnug Nws hais tias, “Koj puas yog tus Khetos, tus Raug Qhuas tus Tub?”

62 Yexus tau teb tias, “Kuv yog. Thiab nej yuav pom Neeg Leej Tub zaum ntawm tus Muaj Hwjchim sab xis thiab nqis saum ntuj nrog huab los.”

63 Tus povthawj hlob tau dua rhe nws lub tsho tab thiab hais tias, “Peb cheemtsum muaj neeg timkhawv dabtsi thiab? 64 Nej tau hnov lolus tuammom. Nej pomzoo li cas?”

Tagnrho lawv tau txiavtxim rau Yexus mus tuag. 65 Lawv tau pib nti qaubncaug rau Nws; thiab lawv tau muab ntaub npog Nws ntsejmuag, tau ntaus Nws thiab tau hais rau Nws tias, “Twv saib!” Cov tubtxib tau xuas tawgncuav rau Nws.

Petus Tsis Lees Yexus

Mat 26:69-75; Luk 22:56-62; Yhs 18:16-18,25-27

66 Thaum Petus nyob hauv lub loog, tus povthawj hlob ib tug ntxhais txib tau tuaj. 67 Thaum pom thiab saib Petus ntetaws, nws tau hais tias, “Koj yog tus nrog Yexus neeg Naxalev sad.”

68 Nws tau tsis lees thiab tau hais tias, “Kuv tsis paub thiab tsis totaub koj hais dabtsi.” Ces Petus tau tawm rau ntawm qab khav thiab qaib tau qua thawj tsig.

69 Tus ntxhais txib uas tau pom nws ntawd tau pib hais dua rau cov sawv ntawd tias, “Nws yog lawv cov ntawd ib tug.” 70 Petus tau tsis lees dua.

Ibpliag tomqab ntawd, cov neeg uas tau sawv ntawd tau hais rau Petus tias, “Tseeb tiag, koj yog lawv cov ntawd ib tug, vim tias koj yog neeg Kalilais.”

71 Mas nws tau pib foom thiab twvntxhias tias, “Kuv tsis paub tus neeg uas nej hais no.” 72 Tamsis ntawd qaib tau qua zaum ob. Petus tau nco dheev lolus uas Yexus tau hais rau nws tias, “Uantej qaib qua zaum ob, koj yuav tsis lees kuv peb zaug.” Ces nws tau tawm mus quaj.

🔝

Philaj Taug Yexus Zaj

Mat 27:11-26; Luk 23:2-3,18-25; Yhs 18:29-40; 19:1-16

1 Thaum sawv ntxovntxov ntawd, cov povthawj hlob nrog rau cov txwjlaug, cov xibfwb qhia Kevcai thiab tagnrho cov hauv lub rooj Xuhenris tau sablaj. Lawv tau muab Yexus khi thiab coj mus cob rau Philaj.

2 Philaj tau nug Yexus tias, “Koj puas yog cov Yudais tus vajntxwv?”

Yexus tau teb nws tias, “Koj hais li.”

3 Cov povthawj hlob tau nkaug Nws ntau yam. 4 Philaj tau rovnug Nws hais tias, “Koj tsis teb dabtsi li? Koj pom lawv nkaug koj ntau npaum cas.”

5 Tabsis Yexus tsis tau teb ib lo li cas txog qhov uas Philaj tau xav tsis thoob.

6 Raws li kabke hauv lub koobtsheej, Philaj txeev tau tso ib tug neeg raug kaw uas lawv tau thov rovqab rau lawv. 7 Muaj ib tug hu ua Npa-anpas, uas tau raug kaw nrug cov ntxeev nomtswv thiab tau tua neeg thaum lawv ntxeevsiab ntawd. 8 Tej neeg coobcoob tau sawv thiab tau pib taij kom Philaj ua li rau lawv.

9 Philaj tau teb lawv tias, “Nej puas xav kom kuv tso cov Yudais tus vajntxwv rau nej?” 10 Rauqhov nws paub tias cov povthawj hlob tau ntes Nws tuaj vim kev khib xwb. 11 Tabsis cov povthawj hlob twb muab tej neeg coobcoob do kom nws tso Npa-anpas rau lawv coob dua.

12 Philaj tau rovqab teb lawv tias, “Yog li ntawd, kuv yuav ua li cas rau cov Yudais tus vajntxwv?”

13 Mas lawv tau qw rovqab tias, “Muab Nws ntsia saum khaublig.”

14 Philaj tau nug lawv tias, “Vim li cas? Nws tau ua txhaum dabtsi?”

Tabsis lawv tau qw tshaj tias, “Muab Nws ntsia saum khaublig!”

15 Vim Philaj xav ua kom haum tej neeg coobcoob ntawd, nws tau tso Npa-anpas rau lawv, thiab nws tau muab Yexus rau lawv nplawm thiab kom muab ntsia saum khaublig.

Yexus Raug Tuammom

Mat 27:27-31

16 Ces cov tubrog tau coj Yexus mus rau hauv lub vajloog, uas yog tus kavxeev lub tsev, thiab lawv tau hu tagnrho cov tubrog pawgtxheeb los uake. 17 Lawv tau muab ib lub tsho ntev tsamxem rau Yexus hnav thiab lawv tau muab xovpos los sibrig ua ib lub mom yeebkoob rau Nws. 18 Mas lawv tau pib txais Nws tias, “Nyobzoo, Vajntxwv Yudais!” 19 Lawv tau muab tauj los nplawm Nws taubhau, nti qaubncaug rau Nws, qhau hauvcaug hawm Nws. 20 Tomqab tuammom Nws tag, lawv tau hle lub tsho ntev tsamxem ntawm Nws thiab muab Nws lub tsholoj rau Nws hnav, ces lawv tau coj Nws tawm mus ntsia saum khaublig.

Yexus Raug Ntsia Saum Khaublig

Mat 27:33-44; Luk 23:33-43; Yhs 19:17-24

21 Lawv tau yuam ib tug neeg taugkev tom teb los, Ximoos pem Kulenes, uas yog Alexanres thiab Lufus txiv, kom kwv Yexus tus khaublig. 22 Lawv tau pus Nws los rau ntawm Khaulakhauthas, uas txhais tias “qhov pobtxha taubhau.” 23 Lawv tau muab cov cawv tov tshuaj mules rau Nws haus, tabsis Nws twb tsis txais. 24 Lawv tau muab Nws ntsia saum khaublig thiab muab Nws tej tsholoj faib thiab tau twvpov seb leejtwg khaws qhovtwg.

25 Sijhawm ntawd yog peb teev thaum lawv tau muab Nws ntsia saum khaublig. 26 Muaj ib nqe lus sau txog Nws tias:

Vajntxwv Yudais.

27 Lawv tau muab ob tug tubsab ntsia saum khaublig nrog Nws, ib tug sab xis thiab ib tug rau Nws sab laug. 29 Mas tej neeg dua kev tau tuammom Nws, co taubhau nto thiab hais tias, “Tus nyuag yuav rhuav lub tuamtsev thiab peb hnub yuav tsa dua tshiab, 30 cawm tuskheej thiab nqis saum khaublig los!”

31 Ibyam nkaus li ntawd, cov povthawj hlob kuj tau hnyos Nws nrog cov xibfwb qhia Kevcai. Lawv tau hais tias, “Nws tau cawm lwm tus, tabsis Nws tsis muaj peevxwm cawm tuskheej. 32 Cia Khetos, Yixayees tus Vajntxwv, nqis saum khaublig tamsis no, kom peb yuav pom thiab ntseeg.” Mas ob tug raug ntsia saum khaublig nrog Nws kuj tau thuam Nws thiab.

Yexus Tuag

Mat 27:45-56; Luk 23:44-49; Yhs 19:29-30

33 Thaum txog ntua rau teev, kev tsausntuj tau tshwmsim thoobplaws tebchaws mus txog rau cuaj teev. 34 Sijhawm cuaj teev, Yexus tau qw tias, “Elaui Elaui lema sanpathani?” Uas txhais tias, “Kuv tus Vajtswv, kuv tus Vajtswv, ua cas koj tso kuv tseg?”

35 Thaum cov sawv ntawd hnov, lawv tau hais tias, “Saib, Nws samsim hu Eliyas.”

36 Ib tug tau khiav mus muab ib lub xwbkuab raus cawv qaub, muab chob rau saum tus tauj, thiab cev mus rau Yexus haus. Tabsis lwm tus tau hais tias, “Tso tseg, cia peb saib seb Eliyas puas nqis los muab Nws txo.”

37 Yexus tau ua ib lub suab nrovnrov, thiab Nws tau tusiav nrho.

38 Daim ntaub hauv lub tuamtsev tau ntuag rhe ua ob daig saum hau ti nkaus hauv taw. 39 Pom Yexus tusiav li no, tus thawj tubrog pawgpua uas samsim sawv ntawm Yexus ib sab tau hais tias, “Tseeb tiag, tus txivneej no yog Vajtswv Ntuj tus Tub.”

40 Ib cov pojniam tau nyob debdeb pom. Nruab nrab lawv kuj yog Malis Madalees, Malis uas yog unpaus me thiab Yauxej nkawv niam, thiab Xalaumes. 41 Tej pojniam coobcoob no tau caum Yexus thaum Nws tseem nyob hauv Kalilais thiab lawv tau tu Nws thiab tau nrog Nws nce tuaj hauv Yeluxalees.

Yexus Raug Faus

Mat 27:57-61; Luk 23:50-56; Yhs 19:38-42

42 Nws twb yuav tsausntuj, vim nws yog hnub npaj, hnub uantej hnub Xanpataus. 43 Yauxej pem Alimathas tau tuaj. Nws tau ua ib tug hauv lub rooj Xuhenris yav taglos, thiab nws tuskheej tau tos Vajtswv Ntuj lub tswvkuj. Nws tau muaj peevxwm ntxhias mus rau ntawm Philaj thiab taij Yexus lub cev. 44 Philaj tau xav tsis thoob tias Yexus twb tuag lawm, mas nws tau hu tus thawj tubrog pawgpua los nug seb Yexus tau tuag hov ntev lawm. 45 Tomqab nws paub los ntawm tus thawj tubrog pawgpua, Philaj tau muab Yexus lub cev rau Yauxej. 46 Nws tau muas ntaub mag los. Tomqab txo Yexus los lawm, nws tau muab ntaub mag qhwv thiab tau muab Nws tso hauv ib lub qhov ntxa uas twb txaug rau hauv ib phab pobzeb. Nws kuj tau dov ib lub pobzeb los rau ntawm lub rooj ntxas. 47 Malis Madalees thiab Malis uas yog unpaus me thiab Yauxej nkawv niam tau pom qhov chaw Yexus raug zais.

🔝

Yexus Sawv Rovlos

Mat 28:1-8; Luk 24:1-10

1 Tomqab dhau Xanpataus, Malis Madalees, Malis unpaus me thiab Yauxej nkawv niam thiab Xalaumes tau muas tshuaj tswqab kom, thaum lawv tuaj, lawv tau muab pleev Yexus lub cev. 2 Sawv ntxov ntawm hnub ib hauv lub limtiam, lawv tau tuaj rau ntawm ntxa uantej lub hnub tawm. 3 Mas lawv tau sibtham tias, “Leejtwg yuav dov lub pobzeb tawm ntawm rooj ntxas rau peb ntawm ntxa?” 4 Lawv tau tsa muag saib thiab tau pom tias lub pobzeb lojloj ntawd twb raug dov tawm lawm.

5 Thaum mus hauv lub ntxa, lawv tau pom ib tug tub hluas zaum rau ntawm sab xis thiab hnav tsoos ntev dawbpaug, mas lawv tau xav tsis thoob. 6 Nws tau hais rau lawv tias, “Txhob xav tsis thoob. Nej nrhiav Yexus Naxalev, tus tau raug ntsia saum khaublig. Nws twb sawv lawm thiab tsis nyob ntawm no. Saib qhov chaw Nws tau raug tso. 7 Mus qhia Nws cov thwjtim thiab Petus tias Nws uantej nej mus rau Kalilais lawm. Nej yuav pom Nws ped ibyam li Nws tau hais rau nej lawm.”

8 Ces lawv tau khiav tawm plaws ntawm ntxa los, ibke ntshai ibke xav tsis thoob. Lawv tsis tau qhia rau ib tug twg li vim lawv tau ntshai heev.

Nqe Xaus Ntev

[[ 9 Thawj hnub hauv lub limtiam, tomqab Nws tau sawvlos, Yexus tau xub tshwm rau Malis Madalees, tus uas Nws tau ntiab xya tus dab tawm. 10 Ces nws tau mus tshajtawm rau cov neeg ibtxwm nrog Yexus uas tau samsim nyiav thiab quaj. 11 Thaum hnov tias Yexus muajsia thiab tshwm rau nws pom, lawv tsis tau ntseeg nws.

12 Tomqab tej no, Yexus tau tshwm ua lwm lub cev rau ob tug thwjtim uas tau tabtom taugkev mus tom teb. 13 Nkawv kuj tau rovlos tshajtawm rau sawvdaws, tabsis lawv kuj tsis tau ntseeg nkawv.

14 Ntxiv ntawd, Yexus tau tshwm rau kaum-ib leeg pom thaum lawv tau zaum saum rooj mov thiab Nws tau cem lawv rau lawv txojkev tsis ntseeg thiab lub siab tawv, vim lawv tsis tau ntseeg cov uas tau pom Nws sawv rovlos.

15 Nws tau hais rau lawv tias, “Mus thoob plaws lub cejntug thiab tshajtawm txojmoo zoo rau ntiajteb tagnrho. 16 Tus ntseeg thiab rausdej yuav dim, tabsis tus tsis ntseeg yuav raug txiavtxim. 17 Thiab tej cim no yuav raws cov ntseeg: Los ntawm kuv lub npe lawv yuav ntiab tej dab, lawv yuav hais tej lus tshiab, 18 lawv yuav tuav tej nab muaj taug ntawm tes, txawm haus tshuaj lom dabtsi los lawv yuav tsis raug mob, thiab lawv tsa tes rau tej neeg mob, los lawv yuav txais kev zoo."

19 Ces tomqab tus Tswv Yexus hais lus rau lawv tag, Nws tau raug coj mus saum ntuj thiab mus zaum rau ntawm Vajtswv Ntuj sab xis. 20 Thaum lawv cov ntawd tawm mus, lawv tau tshajtawm rau txhua qhov chaw. Tus Tswv tau ua haujlwm nrog lawv thiab tau txheem lawv txojlus los ntawm tej cim uas raws lawv ntawd.]]

🔝