Henplais
Henplais
Taw Qhia
Thaum ntxov, cov ntseeg tau xav tias Paulus yeej yog tus sau tsab ntawv no, tiamsis nimno sawvdaws tsis paub tus sau. Ntau leej tau xav tias ntshe tus sau yov yog Npananpas. Tsab ntawv no tau raug sau kwvlam li 64-68, thaum cov Yixayees ntseeg tau pib tso Tswv Yexus tseg. Tus sau tau nquahu kom cov Yixayees ntseeg tuav rawv txujkev ntseeg tus Tswv Yexus, txhob thim rovqab mus coj kevcai Yudais. Tshaj ntawd, nws tau ua timkhawv tias Tswv Yexus yog Vajtswv Ntuj tus Tub thiab tus povthawj ibtxhis; Nws yog noobneej tus Cawmseej.

1
Tus Tub Loj Dua Cov Timtswv
1 Txheej thaud, Vajtswv Ntuj tau hais ua ntau fab ntau feem rau peb tej yawgkoob los ntawm cov cevlus 2 tabsis txheej kawg no Nws tau hais rau peb los ntawm Nws tus Tub, uas Vajtswv Ntuj tau tsa los saws txhua tsav thiab tau siv los tsim lub cejntug ibtxwm. 3 Nws yog Vajtswv Ntuj tsav thiab qhov cici ntawm Vajtswv Ntuj tus tshwjchim, thiab Nws ceev txhua yam los ntawm Nws lolus muaj hwjchim. Tomqab Nws tau muab tuskheej ntxuav kev txhaum tag lawm, Nws tau zaum rau ntawm tus muaj hwjchim loj kawgnkaus sab xis, 4 thiab tau dhau ua tus zoo tshaj cov timtswv vim Nws tau txais lub npe uas nto koobmeej dua lawv tej huvsi.
5 Vajtswv Ntuj tau hais rau cov timtswv tus twg tias:

“Koj yog kuv tus Tub,
hnub no kuv tau dhau ua koj txiv?”

Thiab tau hais tias:

“Kuv yuav ua Nws txiv,
thiab Nws yuav ua kuv tus tub?”

6 Dua li ntawd, thaum Nws coj Nws thawj tus Tub los hauv ntiajteb, Nws hais tias:

“Cia Vajtswv Ntuj cov timtswv tagnrho pe Nws.”

7 Rau cov timtswv Nws hais tias:

“Nws tsim cua rau Nws cov timtswv
thiab nplaim taws rau Nws cov tubtxib.”

8 Tabsis rau tus Tub, Nws hais tias:

“Koj lub zwmtxwv, Aus Vajtswv Ntuj, yuav nyob ib tiam rau ib tiam,
thiab koj tus cwj ncajncees yog tus cwj rau koj lub tswvkuj.
9 Koj tau nyiam kev ncajncees thiab tau ntxub kev txhaum cai,
vim li no, Vajtswv Ntuj koj tus Tswv tau muab cov roj ntxim siab
pleev koj ntau dua koj cov kwvluag.”

10 Thiab tias:

“Thaum chivkeeb, tus Tswv, koj tau tsim lub ntiajteb,
thiab lub ntuj yog koj txhais tes ua.
11 Lawv yuav puastsuaj tabsis koj yuav nyob mus li,
yam cev tsoos lawv tagnrho yuav nphob.
12 Yam txoj phuam koj yuav muab lawv tais tseg;
yam cev tsoos lawv yuav raug hloov.
Tabsis koj yuav nyob zoo li qub
thiab koj lub hnubnyoog yuav tsis kawg.”

13 Rau tus timtswv twg es Nws tau hais tias:

“Zaum ntawm kuv sab xis,
txog thaum kuv muab koj cov yeebncuab ua koj lub rooj tiagtaw”?

14 Tsis yog tagnrho cov ntsujplig uas khiav haujlwm ntawd tau raug xa los tiam cov yuav los saws kev cawmdim lod?
2
Ceebtoom Kom Mlooglus
1 Vim li no, peb cheemtsum tuav tej uas peb tau hnov rau ntawm xubntiag ruaj tshaj, tsam peb lam txav deb zujzus. 2 Rauqhov yog txojlus uas tej timtswv hais twb sawv ruajkhov, es txhua tus uas hla thiab tsis mloog tau raug txim raws qhov tsimnyog, 3 peb yuav ua cas khiavdim yog peb lasmees txojkev cawmdim tseemceeb no? Lawv, cov uas tau xub hnov tus Tswv qhia, tau piav tseebtseeb rau peb lawm. 4 Tsis yog Vajtswv Ntuj tau nrog ua timkhawv los ntawm ntau lub cim, txujci, thiab hwjchim xwb, tabsis Nws tau muab koobhmoov ntawm tus Ntsujplig Dawbhuv rau coob leej raws li Nws lub siab thiab, puas yog?
Yexus Tshwmsim Los Ua Neeg
5 Nim no Vajtswv Ntuj tsis tau muab lub ntiajteb tomntej uas peb hais txog ntawd rau cov timtswv, 6 tabsis Nws tau ua timkhawv ntsees rau ib qho tias:

“Noobneej yog dabtsi es koj ho nco txog nws,
thiab neeg leej tub yog leejtwg es koj ho txhawj txog nws?
7 Koj tau muab Nws txo qis dua tej timtswv ib pliag,
koj ho tau muab tshwjchim thiab meejmom rau ntoo,
8 swb zog txhua yam rau ntawm Nws kotaw.”

Vim tias thaum txhua yam raug muab rau Nws tswj, ces Vajtswv Ntuj tsis tau tseg ib yam uas tsis tau muab li. Txawm niajhnub no peb tsis tau pom txhua yam nyob hauv Nws kev tswjhwm, 9 peb tau pom Yexus, tus tau raug muab txo qis dua cov timtswv ib pliag los ntawm kev tuag txomnyem ntsuav, thiab tau txais tshwjchim thiab meejmom ntoo, kom los ntawm Vajtswv Ntuj vajhmoov, Nws tau saj kev tuag hloov txhua tus.
10 Nws yeej tsimnyog rau Vajtswv Ntuj, tus uas tau tsim txhua tsav thiab tuav txhua yam muaj nyob, yuav tso tus uas coj coob leej tub mus txais tshwjchim thiab rhawv lawv kev cawmdim ntawd dhau ua tus zoo kawgnkaus los ntawm kev tuag. 11 Tus ntxuav dawbhuv thiab cov raug ntxuav dawbhuv puavleej muaj tib leeg Txiv. Vim li no, Yexus thiaj tsis txajmuag hu lawv ua kwvtij 12 thiab hais tias:

“Kuv tshajtawm koj lub npe rau kuv cov kwvtij,
kuv seev suab qhuas koj hauv plawv lub txoos.”

13 Thiab rov hais tias:

“Kuv yuav tso siab plhuav rau Nws.”

Thiab tias:

“Saib mas, kuv thiab cov menyuam uas Vajtswv Ntuj muab rau kuv.”

14 Yog li ntawd, vim cov menyuam puavleej koom tib cov rojntsha thiab nqaijtawv uas Nws tuskheej kuj tau muaj feem, xwv los ntawm kev tuag Nws yov txov tau tus tswj kev tuag, xws li ntxwgnyoog, 15 thiab Nws yov tso tau cov uas nyob hauv kev ua qhev rau kev ntshai tuag tag lub neej. 16 Rauqhov tseeb tiag Nws tsis tau los npo cov timtswv tabsis Nws tau los npo Anplahas cajces. 17 Vim li no, Nws yuavtsum zoo li cov kwvtij txhua fab xwv Nws yuav peemtsheej ua tus povthawj hlob tabncuab thiab ncajncees rau txhua yam ntawm Vajtswv Ntuj xubntiag es Nws yuav theej tau zejtsoom tej kev txhaum. 18 Vim Nws tau raug txomnyem thiab tau raug sim li no, Nws muaj peevxwm pab cov samsim raug sim.
3
Yexus Loj Dua Mauxes
1 Vim li no, cov kwvtij dawbhuv, cov kwvluag rau tes haujlwm saum ntuj, xav tibzoo txog Yexus, peb tus timthawj thiab povthawj hlob saum kev ntseeg. 2 Nws ncajncees rau tus tsa Nws ibyam li Mauxes tau ncajncees rau Vajtswv Ntuj lub tsev. 3 Tabsis tus Yexus no yeej tsimnyog nto koobmeej dua Mauxes, ibyam li tus tsa tsev nto meej dua lub tsev; 4 rauqhov txhua lub tsev raug tsa los ntawm ib tug neeg, tabsis tus tsa txhua yam yog Vajtswv Ntuj. 5 Nimno qhov uas “Mauxes tau ncajncees rau Vajtswv Ntuj lub tsev tagnrho li tus tubtxib” ua timkhawv txog tej uas Vajtswv Ntuj yuav qhia tomqab; 6 tabsis Yexus Khetos tau ncajncees rau Vajtswv Ntuj lub tsev li tus Tub. Peb yog lub tsev ntawd, yog tias peb tuav rawv txojkev ruajsiab thiab kev ciasiab uas peb khav ntxhias.
Ceebtoom Kom Txhob Thim
7 Yog li ntawd, ibyam li tus Ntsujplig Dawbhuv hais tias:

“Hnub no yog nej hnov Nws lub suab,
8 txhob ua siab tawv yam lub sijhawm tawvncauj,
li thaum raug kev simsiab tom mojsab qhua,
9 uas nej tej yawgkoob tau raug kev sim.
Lawv tau pom kuv tej haujlwm
10 plaub-caug xyoo.
Li ntawd, kuv tau chim rau tiam neeg ntawd,
mas kuv tau hais tias, ‘Lawv lub siab sij plaskev
thiab lawv tsis tau paub kuv tej kev,’
11 Ibyam li thaud, kuv tau coglus nrog kev chim tias,
‘Lawv yuav tsis tau nkag mus hauv kuv lub chaw so.’”

12 Ceevfaj, cov kwvtij, tsam nej qee tus muaj lub siab phem tsis ntseeg es ho thim tawm ntawm Vajtswv Ntuj tus muajsia, 13 tabsis sibtxhawb txhua hnub uas tseem hu ua “Hnub no,” xwv nej qee tus lub siab yuav tsis raug kev txhaum dag kom tawv. 14 Peb twb dhau los ua cov muaj feem nrog Khetos, yog peb tuav rawv txojkev ruajsiab thaum pib mus txog thaum xaus 15 sijhawm uas hais tias:

“Hnub no yog nej hnov Nws lub suab,
txhob ua siab tawv yam lub sijhawm tawvncauj.”

16 Rauqhov leejtwg yog cov tau hnov es tseem tau tawvncauj? Tsis yog tagnrho cov uas tau tawm hauv Iziv nrog Mauxes lod? 17 Tus Tswv tau chim rau leejtwg plaub-caug xyoo? Tsis yog lawv cov uas tau ua txhaum es lawv tej cev ntajntsug tau qaug rau tom mojsab qhua lod? 18 Nws tau coglus rau leejtwg tias lawv yuav tsis tau nkag mus hauv Nws lub chaw so, tshwjxeeb rau cov uas tsis tau mlooglus puas yog? 19 Nimno peb pom tias lawv tsis tau nkag mus vim kev tsis ntseeg.
4
Kev So Rau Vajtswv Cov Neeg
1 Yog li ntawd, cia peb muaj kev ntshai cheem lolus cogtseg kom sawvdaws nkag mus hauv Nws lub chaw so tseem qhib, tsam nej ib tug twg twb yov poob. 2 Rauqhov peb tau hnov txojmoo zoo ibyam li lawv thiab, tabsis txoj lus qhia tsis tau muaj qabhau dabtsi rau lawv vim lawv tsis tau koom kev ntseeg nrog cov mlooglus. 3 Rauqhov peb cov ntseeg yuav tau nkag mus hauv lub chaw so raws li Nws tau hais tias:

“Ibyam li thaud, kuv tau coglus nrog kev chim tias,
‘Lawv yuav tsis tau nkag mus hauv kuv lub chaw so.’”

Txawm Nws txhua tes haujlwm twb tiav puag thaum tsim lub cejntug no lawm, 4 raws li Nws tau hais lwm qhov txog hnub xya li no, “Thiab Vajtswv Ntuj tau so Nws txhua tes haujlwm rau hnub xya,” 5 tabsis Nws tau rov hais hauv no tias, “Lawv yuav tsis tau nkag mus hauv kuv lub chaw so.”
6 Yog li, Nws tseem tseg rau ibtxhia nkag mus so. Lawv cov uas tau hnov txojmoo zoo nramntej tsis tau nkag mus vim kev tsis ntseeg. 7 Nws teem dua ib hnub hu ua “Hnub no” los ntawm Daviv puag tomqab no ibyam li yav nramntej:

“Hnub no yog nej hnov Nws lub suab,
nej txhob ua siab tawv yam li cov tawvncauj.”

8 Rauqhov yog Yausuas tau muab chaw so rau lawv, Vajtswv Ntuj twb yuav tsis hais ntxiv txog ib hnub tomqab no. 9 Yog li mas tseem muaj ib hnub Xanpataus so rau Vajtswv Ntuj haivneeg. 10 Vim tias tus uas nkag mus rau Nws lub chaw so kuj so txhua tes haujlwm, ibyam li Vajtswv Ntuj tau so Nws tej haujlwm thiab. 11 Yog li ntawd, cia peb majnroos nkag mus rau lub chaw so ntawd kom txhob muaj ib tug twg poob rau kev tawvncauj li yav tag los.
12 Rauqhov Vajtswv Ntuj txojlus muajsia, ua haujlwm fabfo, ntse dua txhua rab ntaj ob-sab hniav, phua rhe neeg me siav thiab me pa, nruab txha thiab hlwb txha, thiab luj txhua lub tswvyim thiab txhua txojkev xav hauv siab. 13 Tsis muaj ib yam raug tsim yuav nraim dhau Nws lub xubntiag, tabsis txhua yam yeej nyob liabqab tsuas thiab cuab nplhuv rau ntawm Nws qhovmuag. Vajtswv Ntuj txojlus nthuav peb rau ntawm Vajtswv Ntuj xubntiag li ntawd.
Yexus Yog Tus Povthawj Hlob
14 Yog li ntawd, vim peb muaj tus povthawj hlob uas tau mus rau saum ntuj ceebtsheej, xws li Yexus, Vajtswv Ntuj tus Tub, cia peb tuav kev ntseeg kom ruaj. 15 Vim tias peb tus povthawj hlob tsis yog tus tsis muaj peevxwm koom nrog peb kev tsaugmuas, tabsis peb muaj tus uas twb raug sim txhua fab li peb los Nws tsis tau poob kev txhaum. 16 Yog li ntawd, cia peb ruajsiab nrees los rau ntawm lub zwmtxwv vajhmoov kom peb tau txais kev tabncuab thiab vajhmoov rau lub caij muaj kev cheemtsum.
5
1 Vim txhua tus povthawj hlob uas raug xaiv sawvcev neeg yeej raug tsa los ua tej haujlwm rau ntawm Vajtswv Ntuj, kom nws yov fij tej khoom pub thiab tej tsiaj fij theej kev txhaum. 2 Nws yog tus muaj peevxwm ua siabntev rau cov ruam thiab cov plaskev; vim nws tuskheej kuj muaj kev tsaugmuas, 3 nws thiaj yuavtsum coj tsiaj theej tuskheej ibyam li theej zejtsoom tej kev txhaum. 4 Nws tsis txais lub meejmom no rau tuskheej tabsis nws tau raug Vajtswv Ntuj hu ibyam li Aloos.
5 Tibyam li ntawd, Khetos tsis tau tsav tshwjchim rau tuskheej mus ua tus povthawj hlob, tsuas yog tus uas tau hais rau Nws tias:

“Koj yog kuv tus Tub,
hnub no kuv dhau ua koj txiv.”

6 Thiab tau hais nyob rau lwm qhov tias:

“Koj yog povthawj mus ibtxhis
raws Mekhitxedev tus nom.”

7 Thaum tseem nyob sab nqaijtawv, Yexus tau nqa tej lus taij thiab lus thov quajqaws kuamuag ntwsyaws mus cuag tus uas muaj peevxwm cawm Nws ntawm kev tuag, mas Vajtswv Ntuj tau hnov Nws kev hwm. 8 Txawm Nws yog tus Tub, Nws tau kawm Nws kev mlooglus txomnyem ntsuav; 9 thiab tomqab peemtsheej ua tus zoo tshajplaws lawm, Nws tau dhau ua tus muab kev cawmdim ibtxhis rau cov uas mloog Nws lus. 10 Vim Nws tau raug Vajtswv Ntuj hu, Nws tau dhau ua tus povthawj hlob raws li Mekhitxedev tus nom.
Ceebtoom Kom Txhob Tig Rovqab
Hen 10:26-31
11 Ntsig txog qhov no, nws yog ib zaj ntev thiab nyuaj heev rau peb piav, vim nej twb dhau ua cov nkees mloog. 12 Saib raws sijhawm mas nej twb ntxim ua xibfwb, tabsis nej ho tseem cheemtsum muaj lwm tus qhia tej hauvpaus tseeb ntawm Vajtswv Ntuj txojlus rau thiab nej tau dhau ua cov cheemtsum haus mis, noj tsis taus mov. 13 Txhua tus uas haus mis yog tus tsis tau muaj feem rau txojkev ncajncees, vim nws tseem mos. 14 Tabsis mov yog rau cov paubtab uas lawv tej siabntsws twb raug cob tiav rau sab kev ntsuam xyuas kev phem thiab kev zoo.
6
1 Yog li ntawd, cia peb tso lub hauvpaus lus txog Khetos tseg thiab mus rau theem kev paubtab, txhob rovqab mus ncaws qua tsev, xws li hais txog kev thimxav tawm ntawm tej haujlwm tuag, kev ntseeg Vajtswv Ntuj, 2 kev qhia txog kev rausdej, kev tsa tes rau lwm tus, kev sawv rovlos ntawm cov tuag, thiab kev txiavtxim ibtxhis. 3 Peb yuav ua li no yog Vajtswv Ntuj pomzoo.
4 Rauqhov tsis muaj lub hwjchim twg pab tau cov uas tau nyob qhov kaj, tau saj qhov khoom pub saum ntuj los, tau muaj feem nrog tus Ntsujplig Dawbhuv, 5 thiab tau saj Vajtswv Ntuj lolus zoo thiab tej hwjchim rau tiam tomntej, 6 tabsis tseem tau poob lawm, kom lawv muaj dua sijhawm rau kev thimxav. Lawv tau poob, vim lawv tuskheej tau muab Vajtswv Ntuj tus Tub ntsia saum khaublig thiab tau ua tubqaug Nws dua.
7 Vim tias daim teb, uas tau haus cov nag ibtxwm poob saum ntuj los thiab yug tej qoob hlob mos nyoos rau nws tus tswv, txais Vajtswv Ntuj tej lus qhuas. 8 Tabsis yog nws yug ntoo pos thiab hmab pos xwb ces daim teb ntawd tsis tsimtxiaj dabtsi thiab twb yov raug tsawm. Nws qhov kawg yog muab hlawv xwb.
9 Tabsis ntsig txog nej, cov kuv hlub, txawm peb tau hais li no los, peb twb ruajsiab rau tej zoo dua thiab khov dua saum nej kev cawmdim. 10 Rauqhov Vajtswv Ntuj tsis yog tus tsis ncajncees es yuav hnovqab nej tej haujlwm zoo thiab kev hlub uas nej tau nthuav tawm los ntawm Nws lub npe, thaum nej tu cov dawbhuv yav tag los thiab niajhnub no. 11 Peb ntshaw kom nej nyias nthuav nyias kev tomsiab mus kom txog thaum kawg, thaum txojkev ruajsiab nrees saum kev ciasiab tiav, 12 kom nej txhob ua cov tubnkeeg tabsis ua cov xyaum cov uas twb saws tej lus cogtseg los ntawm kev ntseeg thiab kev siabntev lawm.
Txojlus Cogtseg Ruaj Khov
13 Rauqhov thaum Vajtswv Ntuj coglus rau Anplahas, Nws tau tsa tes twv rau Nws tuskheej (vim tsis muaj ibtug loj dua Nws). 14 Nws tau hais tias, “Koobhmoov kuv yuav foom rau koj thiab kev huajvam kuv yuav tsub rau koj.” 15 Li no, Anplahas tau ua siabntev tos thiab nws tau txais txojlus cogtseg.
16 Rauqhov neeg ibtxwm twv txog tus loj dua lawv thaum lawv tsa tes, thiab kev twv txheem lawv tej lus tham thiab xaus txhua lolus cav. 17 Thaum Vajtswv Ntuj xav ua timkhawv rau cov yuav saws Nws txojlus cogtseg tias Nws yuav tsis hloov siab, Nws tau txheem txojlus ntawd los ntawm kev twv; 18 kom los ntawm ob yam uas tsis hloov--Vajtswv Ntuj tsis muaj peevxwm dag--uas peb cov khiav mus nraim rau hauv thiaj muaj kev txhawbzog khovkho mus tuav txojkev ciasiab ntawm peb hauvntej. 19 Txojkev ciasiab peb muaj hauv nruab nrog yam tus tswg, ruaj nrees, tsis txav thiab ntsia ntsees rau hauv qhov chaw uas muaj daim ntaub thaiv, 20 qhov chaw uas Yexus tau nkag uantej this peb. Nws tau dhau ua tus povthawj hlob mus ibtxhis raws li Mekhitxedev tus nom.
7
Mekhitxedev Tus Nom
1 Rauqhov tus Mekhitxedev no yog Vajntxwv Xalees, Vajtswv Ntuj tus loj kawgnkaus tus povthawj, thiab yog tus tau ntsib thiab foom koobhmoov rau Anplahas, tomqab Anplahas tua cov vajntxwv los. 2 Mekitxedev tau txais ib feem kaum ntawm Anplahas. Qhov ib, Nws lub npe txhais tias “Vajntxwv saum kev ncajncees;” thiab qhov ob, lub npe “Vajntxwv Xalees” txhais tias “Vajntxwv saum kev thajyeeb.” 3 Tsis paub niam, tsis paub txiv, tsis paub cajces, tsis paub hnub chiv, thiab tsis paub hnub xaus txojsia, tabsis zoo li Vajtswv Ntuj leej Tub, nws tseem ua povthawj hlob ibtxhis.
4 Xav saib nws loj npaum cas! Txiv Anplahas tau muab ib feem kaum ntawm tej teejtug uas nws tau txeeb los ntawd rau nws. 5 Raws li Kevcai, Levis cajces, cov txais lub meejmom ua povthawj, muaj txojcai txais ib feem kaum ntawm zejtsoom, xws li lawv cov kwvtij uas tau tawm ntawm Anplahas los. 6 Txawm Mekhitxedev tsis yog Levis cajces los nws twb yuav ib feem kaum ntawm Anplahas thiab tau foom koobhmoov rau Anplahas, tus tau txais txojlus cogtseg. 7 Sawvdaws yeej tsis cam tias tsuas yog tus hlob foom koobhmoov rau tus yau. 8 Raws li hais no, cov txais ib feem kaum ntawd muaj ob pab: ib pab yog cov neeg txawj tuag tabsis ib tug yog tus uas muaj timkhawv tias nws muajsia. 9 Ces peb hais tau tias, Levis tus muajcai txais ib feem kaum twb raug them ib feem kaum hauv Anplahas, 10 vim tias Mekhitxedev tau ntsib Levis thaum nws tseem nyob hauv nws txiv lub cev.
Yexus Zoo Li Mekhitxedev
11 Yog tias kev zoo kawgnkaus yeej txawm hauv Levis lub meejmom povthawj (rauqhov zejtsoom tau raug Kevcai tsa los ntawm lub meejmom ntawd), vim li cas ho cheemtsum muaj dua ib tug povthawj raws li Mekhitxedev tus nom thiab ho tsis raws li Aloos tus nom mad? 12 Thaum muaj kev hloov tus nom povthawj hlob, Kevcai kuj yuavtsum raug hloov thiab. 13 Tej no hais txog tus uas tau yug ntawm lwm xeem los, xeem uas tsis tau muaj feem tu lub thaj. 14 Peb pom tseeb tias tus Tswv tau yug hauv xeem Yudas, xeem uas Mauxes twb tsis hais txog kev ua povthawj li.
15 Thiab peb haj pom tseeb ntxiv tias yog muaj dua ib tug povthawj hlob raws Mekhitxedev tus nom, 16 ces nws tsis yog tshwmsim raws Kevcai li kabke sab nqaijtawv tabsis raws li lub hwjchim ntawm txojsia tsis txawj tu. 17 Rauqhov muaj timkhawv hais txog Nws tias:

“Koj yog povthawj mus ibtxhis
raws li Mekhitxedev tus nom.”

18 Rauqhov txojcai nramntej tau raug txo vim nws tsis ruaj tsis khov, 19 vim Kevcai pab tsis tau leejtwg kom zoo kawgnkaus, tsuas yog txojkev ciasiab uas zoo dua, txoj uas peb samsim los ze rau ntawm Vajtswv Ntuj.
20 Txoj no muaj lus twv txheem, vim tias cov uas twb ua povthawj dhau los ntawd tsis muaj. 21 Lolus twv yog los ntawm tus uas tau hais rau Nws tias:

“Tus Tswv tau tsa tes twv
thiab Nws yuav tsis thim lus tias,
‘Koj yog povthawj mus ibtxhis.’”

22 Raws li hais no, Yexus tau dhau ua tus txheem tus txhooj uas zoo dua.
23 Tshaj li no, cov coobcoob uas twb ua povthawj nramntej puavleej hla tsis dhau kev tuag, 24 tabsis vim Yexus tuskheej nyob mus ibtxhis, Nws tus nom povthawj hlob tsis hloov. 25 Yog li ntawd Nws thiaj muaj peevxwm cawm cov uas los cuag Vajtswv Ntuj ntawm Nws txhua lub sijhawm, vim Nws muajsia zees ua txivlus rau lawv.
26 Tus zoo li no thiaj tsimnyog ua povthawj hlob rau peb: Nws yog tus Dawbhuv, tsis phem, tsis muaj chaw thuam, raug cais tawm ntawm tej neeg txhaum, tabsis raug tsa siab dua tej saum ntuj. 27 Tsis yam li lwm cov povthawj hlob, Nws tsis cheemtsum yuav niajhnub xub muab tsiaj fij theej Nws tej kev txhaum mam li muab theej zejtsoom, rauqhov Nws tau muab tuskheej theejtxhoj li no tibzaug ces tiav lawm. 28 Vim tias Kevcai tau tsa tej neeg uas muaj kev tsaugmuas los ua povthawj hlob; tabsis tomqab Kevcai, lolus twv tau tsa Leej Tub, tus uas zoo kawgnkaus, ua povthawj hlob mus ibtxhis.
8
Tus Povthawj Hlob Saum Tus Txhooj Tshiab
1 Lub tseem ntsiab ntawm tej lus uas peb hais yog li no: Peb muaj tus povthawj hlob uas tau zaum lub zwmtxwv ntawm tus muaj hwjchim loj kawgnkaus saum ntuj sab xis, 2 ua tus tu lub tuamtsev thiab lub tsev ntaub tseem uas tus Tswv tau tsa, tsis yog neeg tsa.
3 Rauqhov txhua tus povthawj hlob tau raug tsa mus fij khoom pub thiab muab tsiaj fij; ces tus no kuj cheemtsum muaj dabtsi mus fij thiab. 4 Yog hauv ntiajteb no ces Nws yuav tsis ua povthawj vim muaj cov povthawj uas fij tej khoom pub raws li Kevcai. 5 Lawv tau tu raws li tus qauv thiab tus duab ntawm tej uas txawm rau saum ntuj, ibyam li Mauxes tau raug ceebtoom thaum nws samsim yuav tsa lub tsev ntaub: “Saib tibzoo, ua txhua yam raws li tus qauv uas tau raug muab qhia rau koj saum roob.” 6 Tabsis Yexus tau txais tes haujlwm povthawj zoo tshaj, vim tus txhooj uas Nws dhau ua tus ceev kev ruajntseg ntawd kuj zoo dua, vim tus txhooj uas raug tsa saum tej lus cogtseg zoo dua.
7 Rauqhov yog thawj tus txhooj tsis puas, ces Nws yeej tsis nrhiav tus ob los hloov chaw. 8 Thaum Vajtswv Ntuj pom tej uas puas, Nws hais tias:

“Nimno lub caijnyoog yuav los,” tus Tswv hais,
“thiab kuv yuav tsa ib tug txhooj tshiab
rau Yixayees tsevneeg
thiab rau Yudas tsevneeg.
9 Nws tsis yog tus txhooj
uas kuv tau tsa nrog lawv tej yawgkoob,
sijhawm thaum kuv tau tuav lawv tes
coj lawv tawm hauv tebchaws Iziv.
Vim tias lawv tsis tau ceev kuv tus txhooj,
kuv twb tsis quavntsej lawv lawm,” tus Tswv hais.
10 “Vim tus txhooj no yog tus kuv yuav tsa rau Yixayees tsevneeg,
sijhawm tomqab ntawd,” tus Tswv hais,
“Kuv tej Kevcai kuv yuav muab rau hauv lawv hlwb
thiab tej ntawd kuv yuav sau hauv lawv siab.
Kuv yuav ua lawv tus Vajtswv Ntuj
thiab lawv yuav ua kuv zejtsoom.
11 Thiab tsis muaj ib tug yuav qhia nws tus pejxeem
lossis ib tug yuav qhia nws kwvtij tias,
‘Paub tus Tswv,’
vim tias txhua tus yuav paub kuv
txij li tus me hauv lawv mus rau tus loj.
12 Vim tias kuv yuav tabncuab lawv tej kev tsis ncaj
thiab kuv yuav hnovqab lawv tej kev txhaum mus li.”

13 Thaum Nws hais txog tus txhooj “tshiab,” Nws twb hu thawj tug ua tus qub; thiab txhua tsav qub thiab muaj hnubnyoog samsim ploj mus.
9
Kev Tu Lub Tuamtsev Ntiajteb
1 Nimno thawj tus txhooj tau muaj tej kabke kev pehawm thiab lub tsev dawbhuv hauv lub cejntug. 2 Rauqhov lub tsev ntaub raug tsa, mas hauv thawj chav muaj tus ncej teeb thiab lub rooj ua lub txee rau cov movci fij; qhov chaw ntawd hu ua Chav Dawbhuv. 3 Dhau daim ntaub thij ob ntawm lub tsev ntaub mus yog hu ua Chav Dawbhuv Dawbhuv, 4 uas muaj lub thaj hlawv tshuaj tswqabvuam kub thiab lub Phijxab txhooj uas raug vuam kub thoob plaws. Hauv lub Phijxab txhooj ntawd muaj lub hub vuam kub ntim manas, Aloos tus cwj hlav nplooj, thiab ob daim txiag zeb saum tus txhooj. 5 Saum lub Phijxab muaj ob tug khelunpees ntomeej khoov los roos lub chaw theejtxhoj. Nimno tsis yog sijhawm los tham txog tej no ib qho zujzus.
6 Thaum npaj tau tej no txhij, cov povthawj tau nkag txhua zaus mus hauv lub tsev ntaub thawj chav thiab mus tu lawv tej haujlwm povthawj, 7 tabsis tus povthawj hlob thiaj tau nkag dhau daim ntaub thij ob ib xyoos ib zaug, nqa ntshav mus theej nws thiab zejtsoom tej kev txhaum uas tsis nwm lawv tau ua lawm. 8 Tus Ntsujplig Dawbhuv qhia tseeb los ntawm qhov no tias, Nws tsis tau nthuav cov ntseeg txojkev mus hauv Chav Dawbhuv Dawbhuv thaum thawj lub tsev ntaub tseem sawv. 9 Lub tsev ntawd yog zaj luspiv txog tiam nimno, taw ntsees tias tej khoom pub thiab tsiaj fij ntawd tsis muaj peevxwm theej tus neeg fij txojkev totaub kom zoo kawgnkaus. 10 Tej ntawd tsuas hais txog mov noj, dej haus thiab tej kevcai ntxuav sibtxawv uas yog tej kabke sab nqaijtawv mus txog lub caijnyoog Vajtswv Ntuj hloov dua tshiab.
Khetos Cov Ntshav
11 Tabsis thaum Khetos tau los ua povthawj hlob saum tej kev zoo uas yuav tshwmsim ntawd, Nws tau los hauv lub tsev ntaub uas loj dua thiab zoo dua, tsis yog tes ua; txhais tias, tsis nyob hauv lub cejntug no. 12 Thiab Nws tau nkag tibzaug mus rau Chav Dawbhuv Dawbhuv ntawd, tsis nqa ntshav nyuj ntshav tshis, tabsis Nws tau nqa Nws cov ntshav, es Nws thiaj nrhiav tau kev theejtxhoj mus ibtxhis. 13 Vim tias yog kev nchos ntshav tshis, ntshav heev nyuj, thiab tej tshauv ntawm tus nyuj liab muaj peevxwm ntxuav dawbhuv cov neeg uas txhaum ntawd, kom lawv sab nqaijtawv huvsi, 14 ces Khetos cov ntshav hajyam zoo. Vim los ntawd tus Ntsujplig ibtxhis, Khetos tau coj Nws tuskheej, uas thuam tsis tau, mus fij rau Vajtswv Ntuj. Nws ntxuav tau peb txojkev totaub tawm ntawm tej haujlwm tuag huvsi mus tiam Vajtswv Ntuj tus muajsia.
15 Vim li no, Nws thiaj yog tus ceev kev ruajntseg rau tus txhooj tshiab no, xwv cov raug hu yuav txais txojlus cogtseg txog qhov nyiaj qabnas ibtxhis, vim tias Khetos txojkev tuag tau dhau ua kev txhiv cov uas tau hla thawj tus txhooj lawm.
16 Yog muaj ib tug txhooj nyiaj qabnas, mas tus uas tsa tus txhooj nyiaj qabnas ntawd cheemtsum muab nws kev tuag los txi. 17 Tus txhooj nyiaj qabnas sawv saum tus tuag lub cev, vim tias tus txhooj ntawd tsis tsheej sijhawm tus uas tau tsa tus txhooj ntawd tseem muajsia.
18 Ibyam li ntawd, thaum thawj tus txhooj raug tsa, nws thiaj muaj ntshav txi. 19 Tomqab Mauxes muab txhua nqe Kevcai hais rau zejtsoom tag lawm, nws tau muab cov ntshav nyuj thiab ntshav tshis tov nrog dej, tau muab daim ntaub plaub tsiaj tsamxem nrog zaub hixauv los raus rau cov ntshav, thiab ho tau muab nchos rau phau ntawv thiab zejtsoom sawvdaws. 20 Nws tau hais tias, “Ntawm no yog cov ntshav saum tus txhooj uas Vajtswv Ntuj tau tawmcai rau nej.” 21 Nws tau nchos ntshav rau lub tsev ntaub thiab txhua yam teej rau kev tiam tus Tswv tibyam nkaus. 22 Raws li Kevcai, yuavluag txhua tsav raug ntxuav dawbhuv los ntawm ntshav thiab yog tsis muaj ntshav nrog ces tsis muaj kev zamtxim.
23 Yog tias tej mojzeej ntawm tej tseem saum ntuj twb cheemtsum raug ntxuav li no, ces haj yam tsimnyog muab tej zoo tshaj saum ntuj ntxuav los ntawm yam khoom fij uas tsimtxiaj dua tej ntshav tsiaj no. 24 Vim Khetos tsis tau nkag mus hauv Chav Dawbhuv uas neeg txhais tes ua, chav uas yog tus mojzeej ntawm lub tseem, tabsis mus hauv lub tuamtsev saum ntuj. Thiab nimno Nws sawv rau ntawm Vajtswv Ntuj xubntiag pab peb, 25 kom Nws txhob ibsij coj tuskheej, ibyam li cov povthawj hlob niaj xyoo nkag mus hauv Chav Dawbhuv Dawbhuv nrog lwm tus tsiaj li ntshav. 26 Ua li ces Khetos kuj cheemtsum yuav ibsij tuag ib zaug txij thaum tsim lub cejntug los. Tabsis nimno Nws tau tshwmsim tibzaug nyob tiam kawg no rau kev zamtxim los ntawm qhov muab tuskheej ua khoom fij. 27 Ibyam li neeg yuavtsum tuag ib zaug thiab tomqab ntawd yog kev txiavtxim, 28 Khetos kuj tau raug coj los ris neeg coobleej tej txim ib zaug. Ces Nws yuav tshwm zaum ob, tsis ris txim, tabsis los muab kev cawmdim rau cov neeg uas tos ntsoov Nws.
10
Khetos Fij Tuskheej Ib Zaug Kav Ibtxhis
1 Vim Kevcai tsuas yog tus duab ntxoo ntawm tej zoo uas samsim los, tsis yog lub hwvxyeej ntawm tej tseeb, mas tej tsiaj fij uas neeg niajxyoo nqa tuaj thiaj tsis muaj peevxwm ua kom lawv zoo kawgnkaus. 2 Tsis li, lawv yov muab tej kev coj ntawd tsotseg lawm pod? Vim cov pehawm ntawd yov raug ntxuav tibzaug xwb thiab yov tsis muaj kev totaub txog kev txhaum hauv tuskheej ntxiv lawm. 3 Tabsis tej ntawd niajxyoo ua kev nco txog kev txhaum, 4 vim tias ntshav heev nyuj thiab tshis tsis muaj peevxwm zamtxim.
5 Yog li ntawd, thaum Khetos los rau hauv lub cejntug, Nws tau hais tias:

“Tsiaj fij thiab khoom xyom koj tsis tau ntshaw,
tabsis lub cev koj tau npaj rau kuv;
6 tej tsiaj hlawv thiab khoom fij theej kev txhaum
koj tsis tau raugsiab.”
7 Ces Nws tau hais tias, “Nimno kuv tau los,
tej haulus hauv phau ntawv puavleej tau sau ntsig txog kuv,
kom ua koj tus dejsiab, Aus Vajtswv Ntuj.”

8 Thaum Nws hais saum toj no tias, “Tsiaj fij thiab khoom xyom koj tsis tau ntshaw” thiab “tej tsiaj hlawv thiab khoom fij theej kev txhaum koj tsis tau raugsiab,” uas yog coj tuaj raws Kevcai, 9 Nws ho tau hais tias, “Nimno kuv tau los kom ua koj tus dejsiab,” Nws txo thawj qhov kom Nws yov tsa qhov thij ob. 10 Raws Vajtswv Ntuj tus dejsiab, peb twb raug ntxuav dawbhuv ntawm Yexus Khetos lub cev uas raug muab theej tib zaug xwb.
11 Txhua tus povthawj tau niaj hnub sawv pehawm Vajtswv Ntuj thiab tau coj tsiaj fij, tug tas tug tuaj, tabsis tej ntawd tsis muaj peevxwm ris kev txhaum. 12 Hos tus no tau coj ib qhov khoom fij mus ris kev txhaum, ces Nws tau zaum ntawm Vajtswv Ntuj sab xis mus li; 13 tshuav qhov uas Nws tos kom txog hnub Nws tej yeebncuab raug muab ua rooj tiagtaw rau Nws kotaw. 14 Rauqhov los ntawm tib qhov khoom fij, Nws tau ua rau cov neeg raug ntxuav dawbhuv ntawd zoo kawgnkaus mus li.
15 Thiab tus Ntsujplig Dawbhuv kuj tau ua timkhawv rau peb, vim tomqab ntawd Nws tau hais tias:

16 “Ntawm no yog tus txhooj uas kuv tau tsa rau lawv,
tomqab ntu ntawm,” tus Tswv hais,
“kuv yuav muab Kevcai cog rau lawv lub siab,
thiab kuv yuav sau tej ntawd rau hauv lawv hlwb,
17 mas lawv tej kev txhaum thiab kev hla cai
kuv yuav tsis nco mus ntxiv lawm.”

18 Qhovtwg muaj kev zamtxim, qhov ntawd tsis muaj khoom xyeem this kev txhaum ntxiv.
Nquahu Kom Ua Siabntev
19 Yog li ntawd, cov kwvtij, peb muaj kev ruajsiab rau txojkev mus hauv Chav Dawbhuv Dawbhuv los ntawm Yexus cov ntshav. 20 Nws tau qhib txojkev tshiab thiab muajsia dhau daim ntaub thaiv, uas yog Nws lub cev, 21 thiab vim peb ruajsiab rau tus povthawj hlob saibxyuas Vajtswv Ntuj tsevneeg, 22 cia peb los cuag Vajtswv Ntuj ntawm lub siab tseeb hauv kev ruajsiab nrees saum kev ntseeg, muaj lub siab uas raug muab cov ntshav nchos ntxuav txojkev totaub qias thiab lub cev uas raug ntxuav hauv cov dej ntshiab. 23 Cia peb tuav txojkev ciasiab uas peb tau lees, vim tus uas tau coglus rau peb yog tus ncajncees. 24 Thiab cia peb tig los xav txog kev ibleeg txhawb ibleeg rau kev hlub thiab kev ua zoo, 25 txhob tso kev txoos uake tseg, ibyam li ibtxhia txeev ua, tabsis hajyam sibtxhawb vim nej pom tias hnub ntawd twb los yuav txog.
26 Yog peb txhobtxwm ua txhaum tomqab peb tau txais kev paub txog qhov tseeb, mas tsis tshuav tsiaj fij theej kev txhaum ntxiv, 27 tsuas tshuav kev teemtxim txaus ntshai thiab lub cubtawg cig lamlug uas yuav hlawv cov tawmtsam Vajtswv Ntuj xwb. 28 Tus uas ua txhaum Mauxes Kevcai yuav raug txim tuag, tsis muaj kev tabncuab, thaum muaj ob lossis peb tug timkhawv. 29 Ces nej xav seb tus uas muab Vajtswv Ntuj tus Tub tsuj, muab cov ntshav saum tus txhooj xam tsis tseemceeb, cov ntshav uas ntxuav dawbhuv, thiab tuammom tus Ntsujplig vajhmoov yuav hajyam raug txim hnyav npaum cas? 30 Rauqhov peb paub tus uas hais tias:

“Kev pauj kev ntsimsiab yog kuv tug, kuv yuav pauj.”

Thiab tias:

“Tus Tswv yuav txiavtxim rau Nws haivneeg.”

31 Nws txaus ntshai heev rau txhua tus uas poob rau Vajtswv Ntuj tus muajsia txhais tes.
32 Nco txog yav nramntej thaum nej tau los paub qhov kaj. Nej tau tiv dhau txawm nej raug kev txomnyem hnyav heev. 33 Qee zaus nej tuskheej tau raug thuam thiab raug tsimtxom tabmeeg zejtsoom, qee zaus cov uas tau raug thuam ntawd yog nej tej kwvluag. 34 Nej tau raug txomnyem nrog cov raug kaw thiab tau txaussiab hlo thaum luag huab nej teej nej tug, vim nej paub tias nej muaj tej teejtug uas zoo thiab ruaj dua.
35 Yog li ntawd, txhob muab nej txojkev ruajsiab povtseg, txoj uas muaj nqis ntau heev. 36 Nej cheemtsum ua siabntev kom nej ua tiav Vajtswv Ntuj tus dejsiab thiab txais nqizog raws txojlus cogtseg. 37 Rauqhov:

“Tsuas tshuav ib nyuag pliag,
tus uas yuav los ntawd yuav los
thiab Nws yuav tsis laug.
38 Tabsis kuv tus neeg ncajncees yuav uaneej saum kev ntseeg,
es yog nws thim rovqab,
kuv txojsia hauv nws yuav tsis txaussiab.”

39 Peb tsis yog cov thim rovqab mus rau kev puastsuaj tabsis yog cov ntseeg mus rau txojsia ibtxhis.
11
Kev Ntseeg
1 Kev ntseeg yog kev ruajsiab txog tej uas peb ciasiab rau, yog puavpheej rau tej uas peb qhovmuag tsis pom. 2 Vim kev ntseeg, tej laus tau raug qhuas ua timkhawv ntsees.
3 Vim kev ntseeg, peb totaub tias txhua yam uas muaj nyob ibtxhis tau raug tsim los ntawm Vajtswv Ntuj lolus, tej uas qhovmuag pom ntawd tsis tau tshwmsim los ntawm tej uas qhovmuag pom.
4 Vim kev ntseeg, Anpees tau coj qhov khoom fij zoo dua Kaees li mus rau Vajtswv Ntuj. Vim kev ntseeg, nws tau raug qhuas ua timkhawv ntsees tias nws yog tus ncajncees. Vajtswv Ntuj tau ua timkhawv txog nws qhov khoom pub. Vim kev ntseeg, txawm nws tau tuag lawm los, nws tseem hais lus.
5 Vim kev ntseeg, Enauj tau raug coj lawm kom nws txhob pom kev tuag; luag tsis tau pom nws ntxiv rauqhov Vajtswv Ntuj tau coj nws mus lawm. Uantej nws tau raug coj ntawd, twb muaj timkhawv tias nws tau raug Vajtswv Ntuj siab. 6 Yog tsis muaj kev ntseeg, neeg tsis muaj peevxwm ua haum Vajtswv Ntuj siab, rauqhov tus los cuag Vajtswv Ntuj cheemtsum ntseeg tias muaj Vajtswv Ntuj thiab Nws yog tus muab nqizog rau cov nrhiav Nws.
7 Vim kev ntseeg, Naues tau txais puavpheej txog tej uas qhovmuag tsis pom. Vim nws tau hwm Vajtswv Ntuj, nws thiaj tau tsim lub nkoj ua kev cawmdim rau nws tsevneeg thiab tau txiavtxim rau lub cejntug; thiab nws tau dhau ua tus saws kev ncajncees saum kev ntseeg.
8 Vim kev ntseeg, thaum raug hu ntawd Anplahas tau mlooglus thiab tau tawm mus rau daim av uas nws yuav saws ua nws tug; nws tau tawm mus tabsis tsis tau paub tias nws yuav mus qhovtwg. 9 Vim kev ntseeg, nws tau dhau ua neeg poob tebchaws los rau hauv daim av uas Vajtswv Ntuj tau coglus rau nws, nyob hauv tsev ntaub nrog Ixaj thiab Yakhauj, ob tug uas tau nrog nws saws daim av uas Vajtswv Ntuj tau coglus tseg. 10 Rauqhov nws tau tos ntsoov lub nroog muaj tej plag tsev uas Vajtswv Ntuj yog tus nraj thiab tus tsim.
11 Vim kev ntseeg, Xalas tau muaj peevxwm xeebtub, txawm nws ibtxwm ua pogqhuav thiab twb dhau hnub nyoog lawm, rauqhov nws tau xam tias tus uas tau coglus rau nws ntawd ncajncees. 12 Yog li ntawd, coob leej—suav tsis txheeb li cov hnubqub saum ntuj thiab cov xuabzeb nram suab puam—tau yug tawm ntawm ib tug neeg, txawm nws twb zoo li tus tuag lawm.
13 Nkawv ob leeg tau tuag saum kev ntseeg thaum nkawv tseem tsis tau txais raws li txojlus cogtseg. Nkawv tsuas tau pom thiab tau txais tej uas Vajtswv Ntuj tau coglus tseg ntawd thaum nkawv tseem nyob debdeb xwb. Nkawv kuj tau lees tias nkawv yog qhua thiab neeg dua kev hauv ntiajteb. 14 Rauqhov cov uas hais tej lus li no qhia rau luag paub tias, lawv samsim nrhiav lub tebchaws ruajkhov. 15 Yog nkawv tau nco txog lub tebchaws uas nkawv tau tawm los, nkawv yeej muaj zoo caij rovqab lawm; 16 tabsis nkawv tau thobfab rau lub tebchaws zoo dua, lub uas nyob saum ntuj. Yog li ntawd, Vajtswv Ntuj thiaj tsis tau txajmuag rau qhov Nws tau raug hu ua nkawv tus Vajtswv Ntuj vim Nws tau npaj ib lub nroog rau nkawv.
17 Vim kev ntseeg, thaum nws tau raug sim, Anplahas tau coj Ixaj mus fij, txawm nws yog Anplahas tibleeg tub uas nws tau txais raws txojlus cogtseg. 18 Txog tus tub ntawd, Vajlugkub tau hais tias, “Hauv Ixaj, koj lub noob yuav raug hu tawm los.” 19 Vim Anplahas tau totaub tias Vajtswv Ntuj muaj peevxwm tsa nws tus tub sawv hauv cov tuag rovlos, li zaj luspiv, Anplahas kuj tau txais nws tus tub rovlos tiag.
20 Vim kev ntseeg txog tej uas yuav tshwmsim los, Ixaj tau foom koobhmoov rau Yakhauj thiab Exaus.
21 Vim kev ntseeg, thaum nws yuav tuag Yakhauj tau foom koobhmoov rau Yauxej ob tug tub thiab tau pehawm Vajtswv Ntuj txheem nrees saum nws tus cwj nrig.
22 Vim kev ntseeg, thaum kawg txojsia Yauxej tau ntos txog cov Yixayees kev khiavdim thiab tau tawmlus rau lawv ntsig txog nws cov txha.
23 Vim kev ntseeg, thaum yug Mauxes los, nws niam thiab nws txiv tau muab nws zais peb lub hlis rauqhov nkawv tau pom nws zoo nraug thiab tsis ntshai vajntxwv txojcai.
24 Vim kev ntseeg, thaum tiav txiv lawm, Mauxes tau tsis lees ua Falaus tus ntxhais li tub, 25 tabsis Nws tau tuajyeem raug tsimtxom ib ntus nrog Vajtswv Ntuj haivneeg tshaj li nws muaj kev tau zoo nrog kev txhaum. 26 Vim nws tau xav tias qhov uas Khetos yuav los tsimtxiaj ntau dua lub txhab nyiaj hauv Iziv, mas nws tau saib ntsoov lub nqizog ntawd. 27 Vim kev ntseeg, nws tau tso Iziv tseg, tsis ntshai vajntxwv txojkev chim; thiab nws tau ua siabntev vim nws tau pom tus uas qhovmuag tsis pom. 28 Vim kev ntseeg, nws tau tsa lub Koobtsheej Hladhau thiab kev muab ntshav pleev kom tus timtswv tua neeg txhob kov cov Yixayees tej tub hlob.
29 Vim kev ntseeg cov Yixayees tau hla Hiavtxwv Liab li taugkev saum nqhuab tabsis cov Iziv uas tau sim hla tau poob dej tuag huvsi.
30 Vim kev ntseeg, tus ntsayeej ncig nroog Yelikaus tau vau tomqab cov Yixayees khiav vij xya hnub.
31 Vim kev ntseeg, tus niam ntiav Lahaj tsis tau raug puastsuaj nrog cov neeg tawvncauj; rauqhov nws tau tostxais ob tug tshuaj tebchaws thiab muab kev thajyeeb rau nkawv.
32 Kuv tshuav dabtsi hais thiab? Rauqhov yog tshuav sijhawm mas kuv yuav hais txog Kideoos, Npalaj, Xaxoos, Yefethas, thiab Daviv; Xamuyees thiab cov cevlus. 33 Vim kev ntseeg, lawv tau tua yeej tej tswvkuj, txiavtxim raws kev ncajncees, txais Vajtswv Ntuj tej lus cogtseg, kaw tsov ntxhuav tej qhovncauj, 34 sawv tusyees hauv nplaim taws, khiav dim hniav ntaj, tus tsaugmuag rov muaj zog tuaj, dhau ua tubrog muaj peevxwm hauv tshavrog, caum tsovrog tawm tej yeej. 35 Tej pojniam tau txais lawv tej menyuam tuag lawd saum txojkev sawv rovlos. Ibtxhia tau raug tsimtxom tuag kus, tsis yeem txais kev txhiv, kom lawv yov tsam kev sawv rovlos uas zoo dua. 36 Dua ibtxhia tau raug thuam thiab raug nplawm; ibtxhia ho tau raug cuab thiab raug khi. 37 Lawv tau raug muab pobzeb ntaus, raug kaw txiav ua ob ya, raug ntaj tua tuag. Lawv tau hnav tawv yaj thiab tawv tshis, tuncua kev noj kev hnav, raug tsimtxom, raug quabyuam. 38 Lub cejntug no yeej tsis phim lawv. Lawv tau uaneej rau yas kab yas kev tom mojsab qhua, pem tej roob, tim tej qhovtsua, thiab hauv qhov av.
39 Lawv txhua tus no tau muaj timkhawv ntsees txog lawv kev ntseeg, tabsis lawv tsis tau txais qhov uas Vajtswv Ntuj tau coglus tseg lawm, 40 vim Vajtswv Ntuj twb xub pom qhov zoo dua rau peb, es Nws thiaj tsis tau tso lawv dhau ua cov zoo kawgnkaus uantej peb.
12
1 Ces yog li no, thaum peb muaj ib pab timkhawv li cov huab puagncig peb, cia peb txo txhua lub nra thiab txhua txojkev txhaum uas khi peb tseg thiab cia peb nyiajntsees khiav rau tom peb hauvntej. 2 Cia peb ntsia ntsoov tus chiv thiab xaus kev ntseeg, xws li Yexus, tus uas, vim txojkev zoo siab tom hauvntej, tau tiv tus khaublig, ntsujntiag txojkev txajmuag, thiab tau los zaum lub zwmtxwv ntawm Vajtswv Ntuj sab xis. 3 Xav txog Nws tus uas tau tiv cov neeg txhaum kev tawmtsam kom nej tuskheej txhob tsaugmuag lossis tsotseg.
Vajtswv Ntuj Cob Nws Cov Tub
4 Thaum nej tawmtsam kev txhaum, nej tsis tau tiv txog qhov ntshav nrog. 5 Nej twb hnovqab txojkev txhawbzog ntawm qhov uas Nws tau tham nrog nej li Nws cov tub:

“Kuv tus tub,
txhob saib tsis taus tus Tswv kev qhuab,
txhob puas siab rau Nws txojkev ntuas;
6 rauqhov tus Tswv qhuab tus Nws hlub,
thiab Nws nplawm txhua tus uas Nws qaws ua tub.”

7 Tiv kev qhuab. Vajtswv Ntuj coj nej yam li tej tub, rauqhov leej tub twg uas leejtxiv tsis qhuab? 8 Tabsis yog nej tsis raug qhuab raws li txhua tus muaj feem ua tub tau raug, ces nej yog tsaub es tsis yog tub. 9 Dua li, peb tau raug peb txiv ntawm nqaijtawv qhuab thiab peb tau tig los hwm lawv. Peb yuav tsis hajyam tso Leej Txiv ntawm ntsujplig cob peb kom peb yov muajsia? 10 Vim lawv qhuab peb rau qhov uas lawv pom tias zoo hnub puav, tabsis Nws qhuab kom peb muaj feem txais Nws txojkev dawbhuv. 11 Txhua txojkev qhuab yam li muab kev mob rau yus thaum yus tabtom raug ntawd, es tsis muab kev zoo siab, tabsis dhau lub sijhawm ntawd nws muab txiajntsig kev ncajncees nrog kev thajyeeb rau yus.
12 Yog li ntawd, txhawb tej tes tsaug thiab tej hauvcaug txhav 13 thiab kho tej kev kom ncaj rau nej kotaw, xwv txhais uas qhuav lawm yuav zoo, tsis ntxee.
Ceebtoom Kom Txhob Nyom Vajtswv Ntuj
14 Nrhiav kev thajyeeb nrog txhua leej thiab kev dawbhuv, uas yog leejtwg tsis muaj, ces nws yov tsis pom tus Tswv. 15 Saibxyuas nej tuskheej, txhob cia leejtwg poob ntawm Vajtswv Ntuj vajhmoov, txhob cia kev chim nrhau cag thiab hlav tuaj xeebtxob nej, es txojkev chim ntawd yuav tsuas coobleej. 16 Txhob cia leejtwg txhaum kev nkauj nraug thiab tsis hwm Vajtswv Ntuj li Exaus, tus uas tau muab nws lub meejmom tij pauv ib pluag mov. 17 Rauqhov nej paub tias thaum nws xav los saws koobhmoov tomqab ntawd, nws tau raug txiav tawm, txawm nws yuav quaj kuamuag ntwsyaws los nws yeej thim tsis tau.
18 Rauqhov nej twb tsis los rau qhov chaw uas tes tuav tau, nplaim taws cig lamlug, ntuj dub lis nciab, teb tsaus lis nti, cua daj cua dub nplawm ntigntwg, 19 suab xyu nrov tawg nthe, suab lus nrov tawg ntho ua rau cov uas tau hnov ntawd thov kom txhob hais lus ntxiv, 20 rauqhov lawv tau tiv tsis taus tej lus nthe tias, “Tus tsiaj uas tuaj tsuj lub roob yuavtsum muab pobzeb ntaus kom tuag.” 21 Qhov uas tshwmsim ntawd tau txaus ntshai heev; Mauxes tuskheej tau hais tias, “Kuv tau ntshai heev, ib ce tshee nyho.”
22 Tabsis nej tau los rau ntawm roob Xioos thiab Vajtswv Ntuj tus muajsia lub nroog, lub Yeluxalees saum ntuj, qhov chaw uas qas txheeb qas pua tus timtswv tuaj txoos nquam paj; 23 rau ntawm cov tub hlob lub txoos, cov uas raug teev npe hauv ceebtsheej; rau ntawm Vajtswv Ntuj tus txiavtxim rau sawvdaws; rau ntawm cov ntsujplig ntawm cov neeg ncajncees uas twb raug hloov zoo kawgnkaus; 24 rau ntawm Yexus, tus ceev kev ruajntseg ntawm tus txhooj tshiab; thiab rau ntawm cov ntshav ntxuav sawvdaws uas hais lus zoo dua Anpees cov.
25 Ceevfaj kom nej txhob sawv tawmtsam tus uas hais lus ntawd. Vim tias yog lawv twb khiav tsis dim thaum lawv sawv tawmtsam tus muab puavpheej rau lawv hauv ntiajteb, ces peb hajyam khiav tsis dim yog peb tig tawm ntawm tus muab puavpheej rau peb saum ntuj. 26 Sijhawm ntawd Nws lub suab ua rau ntiajteb qeeg nkaws, tabsis nimno Nws tau coglus tias, “Tshuav ib zaug uas kuv yuav tsis ua rau ntiajteb qeeg xwb, tabsis saum ntuj tibsi.” 27 Mas lolus “tshuav ib zaug” taw qhia txog kev tshem tej uas txawj pob, xws li tej uas raug tsim, kom tej uas tsis txawj pob yov nyob ruaj nreb.
28 Yog li ntawd, vim peb samsim yov txais lub tswvkuj uas tsis txawj pob, cia peb tuav rawv vajhmoov. Los ntawm vajhmoov, peb pehawm Vajtswv Ntuj raws qhov uas raug Nws siab, paub hwm thiab paub ntshai. 29 Rauqhov peb tus “Vajtswv Ntuj yog cov nplaimtaws cigtsus.”
13
Cov Lus Txhawbzog Thaum Xaus
1 Cia kev hlub kwvtij nyob mus. 2 Txhob hnovqab kev txais qhua vim kev nyiam qhua ibtxhia tau txais tej timtswv. 3 Nco ntsoov cov raug txim yam li nej nrog lawv raug txim thiab cov raug tsimtxom yam li nej lub cev raug tsimtxom.
4 Sawvdaws yuavtsum hwm kev txijnkawm thiab txhob tsuas lub txaj txijnkawm, rauqhov Vajtswv Ntuj yuav txiavtxim rau cov nyiam kev dajdee thiab kev vuabtsuab. 5 Coj lub neej tsis nyiam nyiaj, txaus siab rau tej yus muaj. Rauqhov Vajtswv Ntuj tau hais tias:

“Kuv yeej yuav tsis xyeeb nej cia,
lossis tso nej tseg.”

6 Kom peb hais tawv qhawv tias:

“Tus Tswv yog tus pab kuv, mas kuv yuav tsis ntshai.
Leejtwg yuav ua dabtsi rau kuv?”

7 Nco ntsoov nej cov thawj, cov qhia Vajtswv Ntuj txojlus rau nej. Sojntsuam tes haujlwm hauv lawv lub neej, xyaum lawv txojkev ntseeg. 8 Yexus Khetos zoo li qub nag, hnub no, thiab mus ibtxhis.
9 Txhob coj tej lus qhia txaij thiab txawv, vim tias tej lus zoo saum vajhmoov thiaj txhawb neeg lub siab. Thiab txhob muab kev nojhaus saib hlob vim tej ntawd tsis muaj nujnqi rau neeg.
10 Peb muaj ib lub thaj sab nraud uas cov tu lub tsev ntaub tsis muaj tswjchim mus noj. 11 Rauqhov tus povthawj hlob tau nqa cov ntshav tsiaj mus theej kev txhaum hauv Chav Dawbhuv Dawbhuv, tabsis tus tsiaj lub cev raug muab hlawv ntawm lub yeej sab nraud. 12 Yexus kuj ibyam li ntawd, xwv Nws yov ntxuav zejtsoom dawbhuv los ntawm Nws cov ntshav, Nws tau tuag ntawm lub roojvag sab nraud. 13 Nimno cia peb mus cuag Nws ntawm lub yeej sab nraud thiab mus ris tej kev txobthuam uas Nws raug, 14 vim tias peb tsis muaj lub nroog ruajkhov ntawm no, tabsis peb nrhiav lub samsim los.
15 Ntawm Yexus lub npe, cia peb niajhnub coj khoom fij mus rau Vajtswv Ntuj, xws li cov txiv ntawm peb dincauj, cov lus lees Nws lub npe. 16 Tabsis txhob hnovqab kev ua zoo thiab kev koomxeeb, vim tias Vajtswv Ntuj raug siab rau tej khoom fij ntawd.
17 Ntseeg nej cov thawj thiab nyob hauv qab lawv kev tswjhwm, vim lawv tsis tsaugzog thaum lawv xam txog nej txojsia. Yog nej ua li ces lawv yuav ua haujlwm zoo siab hlo thiab tsis nroo, vim lawv kev nroo tsis muaj txiajntsig rau nej.
18 Thov Vajtswv rau peb. Peb ntseeg tias peb muaj kev totaub tuskheej zoo thiab ntshaw plias coj lub neej zoo saum txhua yam. 19 Dua ntawd, kuv nquahu kom nej ua li no xwv kuv yov raug tso los rau nej saisai.
20 Kuv thov tus Vajtswv Ntuj kev thajyeeb, tus uas, los ntawm cov ntshav txi tus txhooj ibtxhis, tau tsa peb tus Tswv Yexus, tus tswv yug yaj loj, tawm hauv cov tuag rovlos, 21 kom muab rab peevxwm saum txhua yam zoo rau nej mus ua Nws tus dejsiab, thiab mus ua tej haum Nws siab nruab nrab peb los ntawm Yexus Khetos. Thov kom Vajtswv Ntuj tau koobmeej mus ibtxhiab ibtxhis! Amees.
22 Cov kwvtij, kuv nquahu nej. Khaws kuv cov lus txhawbzog no vim tias kuv tau sau mentsis rau nej xwb. 23 Nej paub tias nej tus kwvtij Timautes twb raug tso lawm. Yog nws los txog sai ces nyaj kuv yuav pom nej nrog nws.
24 Pab xa kev nojqab nyobzoo rau nej cov thawj txhua leej thiab rau cov ntseeg txhua tus. Cov tawm tim Italis tuaj kuj xa kev nojqab nyobzoo rau nej.
25 Vajhmoov nrog nej sawvdaws os.