1 Paulus, Xilas, thiab Timautes,

Xa rau pawgntseeg Thexalaunikes hauv peb Txiv Vajtswv Ntuj thiab tus Tswv Yexus Khetos.

2 Vajhmoov thiab kev thajyeeb ntawm peb Txiv Vajtswv Ntuj thiab tus Tswv Yexus Khetos rau nej.

3 Peb tsimnyog ua Vajtswv Ntuj tsaug nraim txog nej, cov kwvtij. Qhov no yeej tsimnyog, rauqhov nej txojkev ntseeg tau huam thiab nej txojkev hlub ntawm ibleeg rau ibleeg tau nthuav dav. 4 Peb tau khav rau Vajtswv Ntuj cov pawgntseeg txog nej txojkev siabntev thiab kev ntseeg nruab nrab txhua txojkev tsimtxom thiab kev ti uas nej tau raug.

5 Tej no yog puavpheej ntawm Vajtswv Ntuj txojkev txiavtxim ncajncees tias nej tsimnyog mus rau hauv Vajtswv Ntuj lub tswvkuj, uas nej tau raug txomnyem this. 6 Thiab nws yeej ncajncees rau Vajtswv Ntuj them kev ti rovqab rau cov neeg uas tau ua kev ti rau nej 7 thiab them kev lossiav rau nej, cov uas tau raug kev ti nrog peb, rau lub sijhawm tus Tswv Yexus nqis saum ntuj los nrog cov timtswv thiab nrog Nws lub hwjchim. 8 Nws yuav los hauv cov nplaim taws, los muab kev teemtxim rau cov tsis paub Vajtswv Ntuj thiab cov uas tsis mloog peb tus Tswv Yexus txojmoo zoo. 9 Lawv yuav raug txim mus rau txojkev puastsuaj ibtxhis, tawm ntawm tus Tswv lub xubntiag thiab ntawm Nws lub tshwjchim khov, 10 thaum Nws los txais tshwjchim thiab meejmom uas xav tsis tawm nruab nrab Nws cov ntseeg thiab cov dawbhuv. Nej yog ib feem rau hnub ntawd vim nej tau ntseeg peb qhov timkhawv.

11 Rau qhov no peb thiaj niajhnub thov Vajtswv rau nej, kom peb tus Vajtswv Ntuj yuav xam tias nej yog cov tsimnyog rau qhov uas Nws tau hu nej thiab cov puvnpo txhua txojkev zoo npluamias thiab tej haujlwm saum kev ntseeg nrog hwjchim. 12 Thaum ntawd peb tus Tswv Yexus lub npe yuav txais tshwjchim hauv nej thiab nej yuav raug qhuas hauv Nws, raws li vajhmoov ntawm Vajtswv Ntuj thiab peb tus Tswv Yexus Khetos.

1 Cov kwvtij, ntsig txog qhov uas peb tus Tswv Yexus Khetos rovlos thiab qhov peb yuav sibsau uake nrog Nws ntawd, peb taij nej 2 kom txhob maj ua vigvoog thiab ua teebmeem hauv hlwb vim tej lus moo cua li uas yog tshwm ntawm peb tuaj, tsis hais tej lus tawm ntawm ntsujplig, tawm ntawm ncauj lossis tawm ntawm ib tsab ntawv, uas hais tias tus Tswv hnub twb dhau lawm ntawd. 3 Txhob cia leejtwg hem nej los ntawm ib zaj dabtsi, rauqhov txojkev ntxeevsiab yov xub los thiab tus neeg tsis cojcai yuav raug nthuav uantej, xws li tus uas yuav mus raug kev puastsuaj. 4 Nws yuav sawv los tawmtsam thiab tsa tuskheej siab dua txhua yam uas raug hu ua vajtswv thiab tej uas raug pe. Yog li ntawd, nws yuav tsa tuskheej los zaum saum Vajtswv Ntuj lub tuamtsev thiab tshajtawm tias nws yog Vajtswv Ntuj.

5 Nej tsis nco tias thaum kuv tseem nrog nej nyob, kuv tau qhia tej ntawd rau nej lawm lod? 6 Ces nimno nej paub tias dabtsi tuav nws cia kom txog sijhawm nws mam yov raug nthuav tawm. 7 Rauqhov qhov mixatawlis ntawm tus tsis cojcai ntawd twb tshwm lawm; tabsis tus uas tuav nws cia ntawd tsuas nyob mus txog nrab. 8 Ces tus tsis cojcai yuav raug nthuav, tus uas tus Tswv Yexus yuav txo los ntawm Nws cov pa hauv qhovncauj thiab yuav rhuav thaum Nws tshwm plaws rovlos. 9 Tus tsis cojcai ntawd yuav tshwm los nrog Xatas tej haujlwm: Nrog hwjchim, cim thiab txujci ntawm tus dag 10 thiab nrog txhua tsav kev qias los ntxias cov neeg yuav liamsim. Lawv yuav liam mus vim lawv tsis txais txojkev hlub tseeb kom lawv raug cawm. 11 Vim li no, Vajtswv Ntuj thiaj xa lub zog plaskev rau lawv kom lawv ntseeg txojkev dag, 12 xwv Nws yuav txiavtxim rau txhua leej uas tsis tau ntseeg qhov tseeb tabsis ho tau raug siab rau kev tsis ncajncees.

13 Peb tsimnyog ua tsaug nraim rau Vajtswv Ntuj txog nej, cov kwvtij uas tus Tswv hlub, rauqhov Nws tau xaiv nej ua thawj pwg mus rau kev cawmdim los ntawm kev ntxuav dawbhuv ntawm tus Ntsujplig thiab kev ntseeg qhov tseeb. 14 Nws tau hu nej rau txojkev cawmdim los ntawm peb txojmoo zoo kom nej raug ceev ua peb tus Tswv Yexus Khetos tus tshwjchim.

15 Yog li ntawd, cov kwvtij, sawv ntseg ntsos thiab tuav khovkho tej kabke uas nej tau raug cob, tsis hais los ntawm ncauj lus lossis ntawm peb tsab ntawv. 16 Peb tus Tswv Yexus Khetos tuskheej thiab peb Txiv Vajtswv Ntuj, tus uas tau hlub peb thiab tau muab kev txhawbzog ibtxhis thiab kev ciasiab zoo saum vajhmoov, 17 yuav txhawb nej tej siab thiab tsa nej rau txhua tes haujlwm thiab lolus zoo.

1 Qhov kawg, cov kwvtij, thov Vajtswv rau peb, kom tus Tswv txojlus yuav nthuav ceev thiab muaj tshwjchim ibyam li rau nej, 2 thiab kom peb yuav dim ntawm qhov chaw thiab cov neeg phem no; rauqhov kev ntseeg tsis yog rau txhua leej. 3 Tabsis tus Tswv ncajncees; Nws yuav tsa nej thiab thaiv nej tawm ntawm tus phem. 4 Peb twb ruajsiab hauv tus Tswv txog nej, tias nej samsim coj thiab yuav coj tej uas peb tau tshajtawm rau nej mus ntxiv. 5 Tus Tswv yuav taw nej lub siab ncaj nraim mus rau Vajtswv Ntuj txojkev hlub thiab rau Khetos txojkev siabntev.

6 Thiab peb tau tshajtawm rau nej, cov kwvtij, hauv tus Tswv Yexus Khetos lub npe kom nej txav deb txhua tus kwvtij uas uaneej nkees ntsuav thiab tsis raws li txoj kabke nej tau txais ntawm peb. 7 Rauqhov nej paub tias nej cheemtsum yuav caum peb tus qauv li cas. Peb tsis tau nkees nruab nrab nej 8 thiab tsis tau noj leejtwg tej zaubmov, tabsis peb tau ua haujlwm khwv thiab hnyav nruab hnub thiab hmontuj kom peb txhob ua nra rau nej leejtwg. 9 Nws tsis yog tias peb tsis muaj tswjchim ua nra rau nej, tabsis kom peb yuav muab tau qauv rau nej los xyaum peb. 10 Rauqhov thaum peb tseem nyob nrog nej, peb tau tshajtawm li no rau nej: “Yog leejtwg tsis xav ua haujlwm, txhob pub nws noj.”

11 Peb tau hnov tias nej ibtxhia nyob khuj khuav thiab tsis ua haujlwm, muab lub zog nkim xwb. 12 Peb tshajtawm thiab nquahu rau cov ntawd hauv tus Tswv Yexus Khetos, kom lawv pluav nrog zog lawv mam noj. 13 Cov kwvtij, nej txhob qaugzog ua zoo.

14 Yog leejtwg tsis mloog peb txojlus hauv tsab ntawv no, cim nws cia, txhob koom nrog nws kom nws txajmuag. 15 Txhob ua rau nws li rau yeebncuab, tabsis ntuas nws li kwvtij.

16 Tus Tswv kev thajyeeb tuskheej yuav muab kev thajyeeb rau nej txhua lub sijhawm thiab txhua txojkev. Tus Tswv nyob nrog nej sawvdaws.

17 Kuv, Paulus, xuas tes sau cov lus nojqab nyobzoo no, uas yog lub cim hauv txhua tsab ntawd. Kuv sau li no.

18 Vajhmoov ntawm peb tus Tswv Yexus Khetos rau nej sawvdaws.