Yauhas — Hmong Bible Resource Center

Yauhas

Tshooj:

Txojmoo zoo raws li

Yauhas

Taw Qhia

Yauhas, tus tau sau phau ntawv no, yog ib tug ntawm pab kaum-ob leeg thiab yog tus thwjtim uas Tswv Yexus tau hlub (Yhs 21:20, 24). Nws yog tus hluas dua cov thwjtim huvsi thiab tau nyob ntev dua sawvdaws. Nws tus tijlaug yog unpaus; nkawv yog Xenpedais thiab Xalaumes tub (Mak 15:40-41). Petus, unpaus, thiab Yauhas tau nyob ze tus Tswv Yexus dua lwm leej huvsi. Nws tau tig los sau nws phau moo zoo no kwvlam li xyoo 80-85, tomqab cov thwjtim twb tuag tag lawm.

Laijthawj hauv phau moo zoo no yog los teb ob lolus nug no: Yexus puas yog Vajtswv? Vajtswv Ntsujplig ua dabtsi nruab nrab neeg ntiajteb? Cov ntseeg muaj ob lolus nug no, vim tomqab Tswv Yexus tau sawv hauv cov tuag rovlos, cov ntseeg tau pe Nws thiab saib Nws rau lub samxeeb ibyam li Vajtswv Ntuj lawm. Hauv phau ntawv no, Yauhas tau teev tej cim ntawm Yexus lub neej los ua timkhawv tias Nws yeej nyob ibtxwm, yog Vajtswv Ntuj, yog Txojlus uas tsim lub cejntug (Yhs 1:1-4).

Raws li Vajtswv Ntuj lub homphiaj, Yexus tau tshwmsim los ua noobneej, ua Vajtswv Ntuj tus menyuam yaj theej neeg lub txhoj, ua tus tuag this neeg lub txim, kom Nws cawm tau noobneej tagnrho mus ua Vajtswv Ntuj menyuam (Yhs 1:12-13; 3:1-15). Nws tau lub koob ua Vajtswv Ntuj tus Tub thiab ua Neeg Leej Tub, uas txhais tias: Nws yog noobneej thiab yog Vajtswv. Yog leejtwg ntseeg Yexus, tus ntawd yuav tau txojsia ibtxhis (Yhs 20:30-31).

Yauhas kuj tau sau Tswv Yexus tej lus qhia txog Vajtswv Ntsujplig, tus uas cov ntseeg sawvdaws tau pom Nws lub hwjchim hauv Tswv Yexus lub npe. Tus Ntsujplig Dawbhuv yeej yog Vajtswv Ntsujplig, sibtxig li Leej Txiv thiab Leej Tub; Nws tawm ntawm Leej Txiv thiab Leej Tub los ua timkhawv nruab nrab pawgntseeg txog Tswv Yexus (Yhs 14:15-26; 15:26-27; 16:8-11).

Txojlus Los Ua Neeg

1 Thaum chivkeeb yeej muaj Txojlus, Txojlus yeej nyob nrog Vajtswv Ntuj, thiab Txojlus yeej yog Vajtswv Ntuj. 2 Nws yeej nyob nrog Vajtswv Ntuj thaum chivkeeb.

3 Txhua yam tau tshwmsim los vim Nws thiab, dhau ntawm Nws, tsis muaj ib yam uas twb tshwmsim ntawd tau tshwmsim li. 4 Txojsia yeej nyob hauv Nws thiab txojsia yeej yog neeg qhov kaj. 5 Qhov kaj ci rau hauv qhov tsausntuj thiab qhov tsausntuj tau kov tsis yeej Nws.

6 Ib tug txivneej tau tshwmsim los, tau raug Vajtswv Ntuj xa los, uas npe hu ua Yauhas. 7 Nws tau los ua timkhawv txog qhov kaj kom txhua leej yuav ntseeg los ntawm nws. 8 Nws yeej tsis yog qhov kaj, tabsis kom nws yuav ua timkhawv txog qhov kaj. 9 Qhov kaj tseem, uas ci rau txhua tus neeg, tau los hauv lub cejntug.

10 Nws tau nyob hauv lub cejntug. Txawm lub cejntug tau tshwmsim los ntawm Nws, lub cejntug tsis tau paub Nws. 11 Nws tau los rau hauv Nws tej neeg, tabsis lawv tsis tau txais Nws. 12 Tabsis cov uas tau txais Nws, Nws tau muab tswjchim rau lawv—rau cov uas ntseeg hauv Nws lub npe—dhau mus ua Vajtswv Ntuj menyuam. 13 Lawv tsis tau yug los ntawm rojntsha, los ntawm kev ntshaw sab nqaijtawv lossis ntawm txivneej txojkev ntshaw, tabsis los ntawm Vajtswv Ntuj.

14 Txojlus tau tshwmsim ua nqaijtawv thiab tau cog tsev nruab nrab peb. Peb tau pom Nws tus tshwjchim, tus tshwjchim ntawm Leej Txiv tibleeg Tub, puvnpo vajhmoov thiab qhov tseeb.

15 Yauhas tau ua timkhawv txog Nws thiab twb qw nrovnrov tias, “Tus no yeej yog tus uas kuv tau hais tias, ‘Tus los tomqab kuv twb dhau ua kuv ntej, rauqhov Nws yeej nyob uantej kuv.’”

16 Los ntawm kev npluanuj hauv Nws, peb tau txais vajhmoov tsub vajhmoov. 17 Kevcai tau raug muab los ntawm Mauxes, tabsis vajhmoov thiab qhov tseeb tau tshwm ntawm Yexus Khetos los. 18 Tsis muaj leejtwg tau pom Vajtswv Ntuj dua, tshwj Vajtswv Ntuj tibleeg Tub uas nyob ntawm Leej Txiv xubntiag tau piav txog Nws xwb.

Yauhas Tsis Tau Lees Ua Khetos

19 Qhov no tau yog Yauhas li timkhawv: Thaum cov Yudais hauv Yeluxalees xa cov povthawj thiab cov Levis tuaj cuag Yauhas kom lawv nug nws tias, “Koj yog leejtwg?” 20 Yauhas tau lees thiab tsis cam li tias, “Kuv tsis yog tus Khetos.”

21 Lawv tau nug nws tias, “Ces koj yog leejtwg? Koj puas yog Eliyas?”

Nws tau teb tias, “Kuv tsis yog.”

Lawv tau nug tias, “Koj puas yog tus cevlus?”

Nws tau teb tias, “Tsis yog.”

22 Ces lawv tau nug nws, “Koj yog leejtwg kom peb yuav muab lus teb rau cov uas tau xa peb tuaj? Koj hais li cas txog tuskheej?”

23 Nws tau hais tias, “Kuv yog lub suab qw hauv mojsab qhua tias, ‘Kho tus Tswv txojkev kom ncaj,’ li tus cevlus Yaxayas tau hais.”

24 Cov Falixais ho tau xa ib cov tuaj. 25 Lawv tau nug thiab hais rau Yauhas tias, “Yog li ntawd, koj ho muab neeg rausdej ua dabtsi vim koj tsis yog Khetos, Eliyas, lossis tus cevlus na?”

26 Yauhas tau teb lawv tias, “Kuv muab neeg raus hauv dej, tabsis ib tug twb sawv nruab nrab nej uas nej tsis paub. 27 Tus los tomqab kuv ntawd kuv tsis phim daws Nws txoj hlua khau.”

28 Tej no tau muaj hauv Npethanis ntawm ntug dej Yuladees sab tid, qhov chaw uas Yauhas muab neeg rausdej.

Yexus, Vajtswv Tus Menyuam Yaj

29 Hnub tomqab, nws tau pom Yexus tuaj rau ntawm nws, ces nws tau hais tias, “Saib! Vajtswv Ntuj tus menyuam yaj uas ris lub cejntug txojkev txhaum. 30 Nws yog tus kuv tau hais txog tias ‘Tus txivneej uas los tomqab kuv twb dhau ua kuv ntej, rauqhov Nws yeej nyob uantej kuv.’ 31 Kuv tsis tau pom dua Nws, tabsis kuv tau los muab neeg rausdej vim qhov no: Kom Nws yov raug nthuav rau Yixayees pom.”

32 Yauhas tau ua timkhawv ntxiv tias, “Kuv tau pom tus Ntsujplig nqis saum ntuj li tus nquab dawb thiab tau nyob rau saum Nws. 33 Kuv tsis tau paub Nws, tabsis tus uas tau xa kuv los muab neeg rausdej tau hais rau kuv tias, ‘Tus uas koj pom tus Ntsujplig nqis los thiab nyob rau saum Nws, ces tus ntawd yog tus uas muab neeg rausdej los ntawm tus Ntsujplig Dawbhuv.’ 34 Mas kuv twb pom thiab twb ua timkhawv tias, Nws yog Vajtswv Ntuj tus Tub.”

Yexus Thawj Cov Thwjtim

Mat 4:18-22; Mak 1:16-20; Luk 5:2-11

35 Hnub tomqab, Yauhas tau sawv nrog nws ob tug thwjtim, 36 thiab thaum pom Yexus dua kev, nws tau hais tias, “Saib! Vajtswv Ntuj tus menyuam yaj.”

37 Nws ob tug thwjtim tau hnov li ntawd, mas nkawv tau caum Yexus. 38 Thaum tig tomqab thiab pom nkawv caum Nws, Yexus tau nug nkawv tias, “Neb nrhiav dabtsi?”

Ces nkawv tau teb tias, “Lanpis,” uas txhais tias xibfwb, “Koj so qhovtwg?”

39 Nws tau teb nkawv tias, “Los saib.”

Yog li ntawd, nkawv tau mus pom qhov chaw Nws so thiab nkawv tau so nrog Nws hnub ntawd. Sijhawm yog kaum teev.

40 Anres, Ximoos Petus tus kwv, txawm yog ib tug ntawm ob tug uas tau hnov Yauhas thiab tau caum Yexus. 41 Nws tau xub nrhiav nws tus tijlaug Ximoos thiab tau hais rau nws tias, “Wb tau ntsib tus Mexiyas,” uas txhais tias Khetos. 42 Anres tau coj nws los cuag Yexus.

Pom dheev nws, Yexus tau hais tias, “Koj yog Ximoos, Yauhas tus tub. Koj yuav raug hu ua Kefas,” uas txhais tias Petus.

Yexus Hu Filiv thiab Nathaniees

43 Hnub tomqab, Yexus tau xav mus Kalilais. Thaum ntsib Filiv, Yexus tau hais rau nws tias, “Caum kuv mus.”

44 Filiv yeej yog neeg Npexaidas, ibyam li Anres thiab Petus nkawv. 45 Filiv tau ntsib Nathaniees thiab tau hais rau nws tias, “Peb twb ntsib tus uas Mauxes tau hais hauv Kevcai thiab cov cevlus tau hais txog, xws li Yexus pem Naxalev, Yauxej tus tub.”

46 Nathaniees tau teb nws tias, “Puas yov muaj dabtsi zoo nyob Naxalev tuaj?”

Filiv tau teb nws tias, “Los saib.”

47 Yexus tau pom Nathaniees tuaj, thiab Nws tau hais txog nws tias, “Saib! Tus Yixayees tseeb uas tsis muaj qhov phem hauv nws li.”

48 Nathaniees tau nug Nws tias, “Koj paub kuv thaum twg?”

Yexus tau teb nws tias, “Uantej Filiv hu koj, kuv tau pom koj hauvqab tsob txiv ncuavpias.”

49 Nathaniees tau teb tias, “Lanpis, koj yog Vajtswv Ntuj tus Tub; koj yog Yixayees tus Vajntxwv.”

50 Yexus tau teb nws tias, “Vim kuv tau hais rau koj tias, kuv tau pom koj hauvqab tsob txiv ncuavpias, koj thiaj ntseeg puas yog? Koj yuav pom tej loj dua no.” 51 Ces Nws tau hais rau nws ntxiv tias, “Tseeb tiag, kuv hais rau nej, nej yuav pom ntuj qhib plho thiab Vajtswv Ntuj cov timtswv nce thiab nqis los rau saum Neeg Leej Tub.”

🔝

Yexus Hloov Dej Ua Cawv

1 Hnub peb, muaj ib roojtshoob nyob Kanas, huv Kalilais thiab Yexus niam tau nyob rau ntawd. 2 Yexus thiab Nws cov thwjtim kuj tau raug caw mus hauv roojtshoob. 3 Thaum cawv tau tag lawm, Yexus niam tau hais rau Nws tias, “Lawv tsis muaj cawv.”

4 Yexus tau teb nws tias, “Niam, nws muaj tus dabtsi rau koj thiab kuv? Nws tsis tau txog kuv lub sijhawm nad.”

5 Nws niam tau hais rau cov ncignum tias, “Nws hais dabtsi rau nej ces ua nawb.”

6 Txawb rau ntawd muaj rau lub hub, ib lub ntim taus li ob lossis peb thoob dej, raws li cov Yudais kevcai ntxuav. 7 Yexus tau hais rau lawv tias, “Ntim dej kom puv cov hub no.” Ces lawv tau ntim dej rau cov hub ntawd nto ncauj plaws.

8 Nws tau hais rau lawv tias, “Tsam no ce thiab nqa mus rau tus kavxwm.” Ces lawv tau nqa raws li.

9 Thaum tus kavxwm saj cov dej uas twb dhau ua cawv ntawd (nws tsis tau paub tias cawv tau los qhovtwg los, tabsis cov ncignum yeej paub), nws tau hu tus nraug vauv 10 thiab hais rau nws tias, “Txhua tus xub muab cov thawj caw uantej thiab thaum sawvdaws qaug lawm nws mam muab cov tw cawv, tabsis koj tau tseg cov thawj caw txog tsam no.”

11 Qhov no yog thawj lub cim uas Yexus tau ua nyob Kanas, hauv Kalilais. Nws tau nthuav Nws tus tshwjchim li no, ces Nws cov thwjtim tau ntseeg Nws.

Yexus Ntxuav Tuamtsev

Mat 21:12-13; Mak 11:15-17; Luk 19:45-46

12 Tomqab qhov no, Nws tau nqis mus Kapenaus nrog Nws niam, cov kwv, thiab cov thwjtim; lawv tau so nrad ntau hnub.

13 Thaum ze cov Yudais lub koobtsheej hladhau, Yexus tau nce mus Yeluxalees. 14 Nws tau ntsib cov neeg muag tej heev nyuj, yaj, thiab nquab thiab tej neeg pauv nyiaj zaum hauv lub tuamtsev. 15 Nws tau muab ib txoj hlua los ua ib tug nplawm, thiab Nws tau ntiab lawv tawm ntawm lub tuamtsev, nrog tej me heev nyuj thiab yaj, thiab Nws tau muab cov neeg pauv nyiaj tej nyiaj npib nchuav thiab tau muab lawv tej rooj ntxeev. 16 Nws tau hais rau cov muag nquab tias, “Nqa tej no tawm ntawm no, txhob muab kuv txiv lub tsev ua tsev lagluam.”

17 Cov thwjtim tau nco dheev tias twb muaj sau tseg tias, “Kev mobsiab rau koj lub tsev yuav muab kuv nqos.”

18 Yog li ntawd, cov Yudais thiaj tau teb thiab nug Nws tias, “Koj yuav muab lub cim dabtsi qhia rau peb tias koj ua tau tej no?”

19 Yexus tau teb tias, “Rhuav lub tuamtsev no ces peb hnub kuv yuav tsa dua tshiab.”

20 Cov Yudais tau hais tias, “Lub tuamtsev no raug ua los lawm plaubcaug-rau xyoo, es koj yuav ua cas ua peb hnub?”

21 Tabsis Nws tau hais txog lub tuamtsev uas yog Nws lub cev. 22 Yog li ntawd, thaum Nws tau sawv hauv cov tuag los, Nws cov thwjtim tau nco tias Nws tau hais li no thiab lawv tau ntseeg Vajlugkub thiab tej lus uas Yexus tau hais.

23 Thaum Nws tseem tau nyob Yeluxalees hauv lub koobtsheej hladhau ntawd, coob leej tau ntseeg Nws lub npe vim lawv tau pom tej cim uas Nws tau ua; 24 tabsis Yexus tuskheej tsis tau tsosiab rau lawv vim tias Nws tau paub txhua tus neeg. 25 Nws tsis tau muaj kev cheemtsum kom leejtwg ua timkhawv txog neeg rau Nws, rauqhov Nws yeej tau paub dabtsi tau nyob hauv neeg.

🔝

Yexus Qhia Nikaudemaus

1 Ib tug hauv cov Falixais, uas npe hu ua Nikaudemaus thiab tau ua ib tug thawjcoj ntawm cov Yudais, 2 tau tuaj cuag Yexus hmontuj thiab tau hais rau Nws tias, “Lanpis, peb paub tias koj yog ib tug xibfwb tawm ntawm Vajtswv Ntuj los, rauqhov leejtwg tsis muaj peevxwm ua tej cim uas koj ua, tshwj tias Vajtswv Ntuj nrog nws nyob.”

3 Yexus tau teb rau nws tias, “Tseeb tiag, kuv hais rau koj, tshwj tias leejtwg yug dua tshiab, nws tsis muaj peevxwm yuav pom Vajtswv Ntuj lub tswvkuj li.”

4 Nikaudemaus tau nug Nws tias, “Ib tug neeg laus yuav muaj peevxwm yug dua tshiab li cas? Nws tsis muaj peevxwm nkag mus rau nws niam plab zaum ob thiab mam yug dua pod?”

5 Yexus tau teb tias, “Tseeb tiag, kuv hais rau koj, tshwj leejtwg yug los ntawm dej thiab Ntsujplig, nws tsis muaj peevxwm nkag mus hauv Vajtswv Ntuj lub tswvkuj. 6 Tus yug ntawm nqaijtawv yog nqaijtawv thiab tus yug ntawm Ntsujplig yog ntsujplig. 7 Txhob xav tsis thoob qhov kuv tau hais rau koj tias, ‘Koj yuavtsum yug dua tshiab.’ 8 Cua ntsawj mus qhov nws xav mus thiab koj hnov nws lub suab, tabsis koj tsis paub nws tawm qhovtwg los thiab yuav mus qhovtwg. Txhua tus uas yug ntawm Ntsujplig zoo nkaus li ntawd.”

9 Nikaudemaus tau teb Nws tias, “Tej no yuav tshwmsim tau li cas?”

10 Yexus tau teb rau nws tias, “Koj yog Yixayees ib tug xibfwb tabsis koj ho tsis paub tej no? 11 Tseeb tiag, kuv hais rau koj, peb hais qhov peb paub thiab peb ua timkhawv txog qhov peb twb pom lawm, tabsis nej tsis txais peb li timkhawv. 12 Kuv tau hais rau koj txog tej hauv ntiajteb tabsis koj tsis ntseeg, koj yuav ua cas ntseeg yog kuv hais txog tej saum ntuj? 13 Tsis muaj leejtwg tau nce mus saum ntuj, tshwj tus tau nqis saum ntuj los, xws li Neeg Leej Tub. 14 Thiab ibyam li Mauxes tau tsa tus nab tooj tom mojsab qhua, Neeg Leej Tub yuavtsum raug tsa li ntawd, 15 kom txhua tus ntseeg Nws yov muaj txojsia ibtxhis.”

16 “Yam nkaus li no: Rauqhov Vajtswv Ntuj tau hlub lub cejntug, Nws tau muab Nws tibleeg Tub los, kom txhua tus uas ntseeg Nws yuav tsis puastsuaj tabsis yuav muaj txojsia ibtxhis. 17 Rauqhov Vajtswv Ntuj tsis tau xa Nws tus Tub los rau hauv lub cejntug kom Nws txiavtxim rau lub cejntug, tabsis kom lub cejntug raug cawm los ntawm Nws. 18 Tus uas ntseeg Nws yuav tsis raug txiavtxim, tabsis tus uas tsis ntseeg twb raug txiavtxim lawm, rauqhov nws tsis tau ntseeg Vajtswv Ntuj tibleeg Tub lub npe. 19 Kev txiavtxim yog qhov no: Qhov kaj tau los rau hauv lub cejntug tabsis neeg tau hlub qhov tsausntuj dua qhov kaj, vim lawv tej haujlwm phem. 20 Rauqhov txhua tus uas ua qhov cuav ntxub qhov kaj thiab tsis los rau ntawm qhov kaj kom nws tej haujlwm txhob raug muab nthuav tawm. 21 Tabsis tus uas ua qhov tseeb tawm los rau qhov kaj, kom nws tej haujlwm raug pom tias yog tej uas nws pheev tawm hauv Vajtswv Ntuj los.”

Yauhas Npatitaus Ua Timkhawv Txog Yexus

22 Tomqab tej no, Yexus tau los rau hauv Yudas nrog Nws cov thwjtim thiab Nws tau khwv nrog lawv thiab muab neeg rausdej. 23 Yauhas kuj tau muab neeg rausdej hauv Ainoos ze ntawm Xalim, rauqhov ntawd muaj dej ntau, thiab neeg coob tau tuaj rausdej 24 vim Yauhas tseem tsis tau raug ntes mus rau hauv tsev lojcuj. 25 Yog li ntawd, Yauhas cov thwjtim tau sibcav nrog cov Yudais txog kev ntxuav dawbhuv. 26 Ces lawv tau los cuag Yauhas thiab tau hais rau nws tias, “Lanpis, tus uas tau nrog koj nram ntug Yuladees thiab koj tau ua timkhawv txog ntawd, nimno Nws kuj muab neeg rausdej thiab sawvdaws tau mus cuag Nws.”

27 Yauhas tau teb tias, “Ib tug neeg tsis muaj peevxwm txais dabtsi, tshwj yam uas twb raug muab rau nws saum ntuj los. 28 Nej puavleej ua timkhawv txog qhov kuv tau hais tias, kuv tsis yog Khetos, tabsis kuv raug xa ua Nws ntej. 29 Tus nkauj nyab yog tus nraug vauv li. Tus nraug vauv tus phoojywg, xws li tus sawv ib sab thiab mloog Nws, muaj kev zoo siab heev vim tus nraug vauv lub suab. Yog li no, kuv txojkev zoo siab tau tiav hlo. 30 Nws cheemtsum yuav loj ntxiv tabsis kuv yuav yau zujzus.”

31 “Tus nqis saud los yeej loj dua sawvdaws; tus nyob hauv ntiajteb yog neeg ntiajteb thiab hais lus ntiajteb. Tus nqis saum ntuj los loj dua sawvdaws. 32 Nws ua timkhawv txog tej uas Nws tau pom thiab tau hnov, thiab Nws qhov timkhawv tsis muaj leejtwg txais. 33 Tus uas txais Nws qhov timkhawv tau ntaus homthawj tias Vajtswv Ntuj yog tus tseem. 34 Rauqhov tus uas raug Vajtswv Ntuj xa los yeej hais Vajtswv Ntuj tej lus, vim Vajtswv Ntuj tau muab tus Ntsujplig laublug rau Nws. 35 Leej Txiv hlub tus Tub thiab twb muab txhua yam rau Nws txhais tes. 36 Tus uas ntseeg tus Tub muaj txojsia ibtxhis; tabsis tus uas tsis ntseeg tus Tub yuav tsis pom txojsia vim Vajtswv Ntuj txojkev chim nyob rau saum nws.”

🔝

Yexus Nrog Tus Pojniam Xamalis Tham

1 Yog li ntawd, thaum Yexus tau paub tias cov Falixais tau hnov Nws muab neeg rausdej thiab cob ntau tus thwjtim dua Yauhas, 2 txawm Yexus tuskheej tsis tau muab neeg rausdej, tsuas yog Nws cov thwjtim xwb los, 3 Yexus tau tawm ntawm Yudas thiab rovmus rau Kalilais.

4 Tabsis Nws cheemtsum mus phua plhawv Xamalias. 5 Nws tau los txog ib lub nroog hauv Xamalias uas hu ua Xikhas, ze rau cheebtsam uas Yakhauj twb muab pub rau nws tus tub Yauxej. 6 Yakhauj lub qhov tshij tau nyob ntawd. Vim Yexus tau lim heev rau txojkev, Nws tau zaum rau ntawm lub qhov tshij. Sijhawm kwvlam li rau teev.

7 Ib tug pojniam Xamalis tau tuaj ce dej. Ces Yexus tau hais rau nws tias, “Thov muab ib qho dej rau kuv haus.” 8 Rauqhov Nws cov thwjtim tau mus muas mov hauv nroog lawm.

9 Ces tus pojniam Xamalis tau hais rau Nws tias, “Cas koj tus neeg Yudais ko yuav taij dej haus ntawm kuv tus neeg Xamalis?” (Rauqhov cov Yudais tsis koom twjtaig nrog cov Xamalis.)

10 Yexus tau teb tias, “Yog koj paub Vajtswv Ntuj qhov khoom pub thiab leejtwg yog tus samsim hais lus rau koj tias, ‘Thov muab ib qho dej rau kuv haus,’ ces koj yov taij Nws thiab Nws yov muab dej muajsia rau koj.”

11 Tus pojniam tau teb tias, “Yawg hlob, koj tsis muaj thoob thiab lub qhov tshij no tob heev, es koj yuav muab dej muajsia qhovtwg? 12 Ntshe koj loj dua peb txiv Yakhauj, tus uas tau muab lub qhov tshij rau peb pod? Nws tuskheej, nws tej tub thiab nws tej tsiaj puavleej tau haus lub qhov tshij no.”

13 Yexus tau teb rau nws tias, “Txhua tus uas haus cov dej no yuav rov nqhis dua; 14 tabsis tus uas haus cov dej kuv muab rau nws yuav tsis nqhis mus ibtxhis, tabsis cov dej uas kuv yuav muab rau nws yuav peemtsheej ua lub qhov dej txhawv hauv nws mus rau txojsia ibtxhis.”

15 Tus pojniam tau hais rau Nws tias, “Yawg hlob, muab cov dej no rau kuv haus, kom kuv txhob nqhis thiab txhob tuaj ce ntawm no ntxiv.”

16 Yexus tau teb nws tias, “Mus hu koj tus txiv thiab rovtuaj ntawm no.”

17 Tus pojniam tau teb tias, “Kuv tsis muaj txiv.”

Yexus tau hais rau nws tias, “Koj hais tseeb tias ‘Kuv tsis muaj txiv.’ 18 Rauqhov koj tau muaj tsib tug txiv thiab tus nimno koj muaj los tsis yog koj tus txiv. Koj twb hais qhov tseeb no lawm.”

19 Tus pojniam tau hais rau Nws tias, “Yawg hlob, kuv pom tias koj yog ib tug cevlus. 20 Peb tej yawgkoob tau pehawm saum lub roob no, tabsis nej hais tias, qhov chaw pehawm yuavtsum yog Yeluxalees.”

21 Yexus tau hais rau nws tias, “Ntseeg kuv mog, tus ntxhais e, lub sijhawm yuav los txog uas nej yuav tsis pehawm Leej Txiv saum lub roob no lossis pem Yeluxalees. 22 Nej pehawm tus uas nej tsis paub, hos peb pehawm tus uas peb paub, rauqhov kev cawmdim yog tawm ntawm cov Yudais los. 23 Tabsis lub sijhawm yuav los txog ntawd kuj yog tamsis no. Cov pehawm, uas tseem, yuav pehawm Leej Txiv ntawm ntsujplig thiab qhov tseeb, rauqhov Leej Txiv nrhiav cov uas pehawm Nws li cov no. 24 Vajtswv Ntuj yog ntsujplig thiab cov pehawm Nws yuavtsum pehawm ntawm ntsujplig thiab qhov tseeb.”

25 Tus pojniam tau hais rau Nws tias, “Kuv paub tias tus Mexiyas uas hu ua Khetos yuav los. Thaum Nws los, Nws yuav tshajtawm txhua yam rau peb.”

26 Yexus tau teb nws tias, “Kuv tus samsim nrog koj tham no yog Nws.”

Cov Thwjtim Rovlos Nrog Yexus

27 Txog qhov no, Yexus cov thwjtim tau los thiab lawv tau xav tsis thoob vim Nws tau txuaslus nrog tus pojniam. Txawm li ntawd los, leejtwg tsis tau nug tias, “Koj nrhiav dabtsi?’ Lossis “Vim li cas koj txuaslus nrog nws?”

28 Ces tus pojniam no tau tso nws lub thoob dej thiab tau khiav mus hauv nroog thiab tau hais rau tej neeg tias, 29 “Tuaj xyuas tus txivneej uas tau qhia kuv txog txhua yam kuv tau ua los lawm seb Nws puas yog Khetos?” 30 Lawv tau tawm hauv nroog tuaj rau ntawm Nws.

31 Lub tsamthawj ntawd, cov thwjtim tau hu Nws tias, “Lanpis, noj mov.”

32 Tabsis Nws tau teb lawv tias, “Kuv muaj mov noj uas nej tsis paub.”

33 Ces cov thwjtim tau sibtham tias, “Tsis lam muaj leejtwg tau nqa mov rau Nws noj pod?”

34 Yexus tau hais rau lawv tias, “Kuv cov mov yog qhov kuv ua tus uas tau xa kuv los tus dejsiab thiab ua tiav Nws tes haujlwm. 35 Nej tsis hais tias, ‘Tshuav plaub hlis ces txog lub caij sau qoob’ lod? Tabsis kuv qhia nej, tsa nej tej qhovmuag thiab saib tej teb, rauqhov tej qoob twb siav zoo hlais lawm. 36 Tus hlais tabtom txais nqizog thiab sau cov qoob mus rau txojsia ibtxhis, kom tus cog yuav zoo siab li tus sau thiab. 37 Rauqhov lolus no yog lus tseeb: ‘Muaj ib tug cog tabsis muaj dua ib tug sau.’ 38 Kuv tau xa nej mus sau tej uas nej twb tsis tau khwv; luag twb khwv heev uantej ces nej tau nkag mus sau saum lawv txojkev khwv.”

Coob Tus Xamalis Ntseeg

39 Hauv lub nroog ntawd, coob tus Xamalis tau ntseeg Yexus vim lolus ntawm tus pojniam qhov timkhawv tias, “Nws tau qhia kuv txog txhua yam uas kuv tau ua.” 40 Ces thaum cov Xamalis tuaj rau ntawm Nws, lawv tau thov Nws mus so nrog lawv; thiab Nws tau so ntawd ob hnub. 41 Ntau leej tau ntseeg ntxiv vim Nws txojlus, 42 thiab lawv tau hais rau tus pojniam tias, “Tsis vim koj tej lus xwb es peb ntseeg, rauqhov peb tuskheej twb hnov thiab peb twb paub tias Nws yog lub cejntug tus Cawmseej tiag.”

Yexus Kho Tus Nom tus Tub

43 Ob hnub tomqab, Nws tau tawm ntawd mus rau Kalilais. 44 (Yexus tuskheej tau ua timkhawv tias, “Tus cevlus tsis raug hwm hauv nws lub zos”). 45 Thaum Nws los txog Kalilais, neeg Kalilais tau txais Nws vim lawv twb pom txhua yam uas Nws tau ua hauv lub koobtsheej hauv Yeluxalees, rauqhov lawv puavleej tau mus koom lub koobtsheej.

46 Ces Nws tau rovlos rau Kanas hauv Kalilais, qhov uas Nws tau muab dej ua cawv. Qhov ntawd tau muaj vajntxwv ib tug nom; nws tus tub tau mob nyob Kapenaus. 47 Thaum hnov tias Yexus tau tawm nram Yudas los rau Kalilais lawm, nws tau tuaj cuag Yexus thiab taij kom Nws nqis mus kho nws tus tub, rauqhov nws samsim yuav tuag.

48 Yexus tau hais rau nws tias, “Yog koj tsis pom tej cim thiab txujci txawv, koj yuav tsis ntseeg.”

49 Tus nom rau vajntxwv tau hais rau Nws tias, “Tus Tswv, nqis los uantej kuv tus tub tuag.”

50 Yexus tau hais rau nws tias, “Mus, koj tus tub ciaj lawm.”

Tus txivneej ntawd tau ntseeg lolus uas Yexus tau hais rau nws thiab nws tau tawm mus. 51 Sijhawm nws samsim nqis mus, nws cov tubtxib tau tuaj ntsib nws thiab tau hais tias nws tus tub tau ciaj lawm. 52 Ces nws tau nug meej txog lub sijhawm uas tus tub tau zoo. Lawv tau teb rau nws tias, “Nag hmo xya teev, nws tus npaws tau tso nws tseg.”

53 Yog li ntawd, leej txiv tau paub tias lub sijhawm ntawd Yexus tau hais rau nws tias, “Koj tus tub ciaj lawm.” Nws thiab nws tsevneeg tagnrho tau ntseeg.

54 Qhov no yog lub cim thij ob uas Yexus tau rovqab ua tomqab Nws tau tawm ntawm Yudas los rau Kalilais.

🔝

Kho Mob Ntawm Pasdej

1 Tomqab tej no nws tau txog cov Yudais lub koobtsheej thiab Yexus tau nce mus pem Yeluxalees. 2 Ze ntawm lub Roojvag Yaj hauv Yeluxalees muaj ib lub pasdej uas muaj tsib lub samthiaj thiab lus Henplais hu ua Npexathas. 3 Saum cov samthiaj no cov neeg mob, digmuag, qhuav ceg thiab qhuav testaw tau nyob coobcoob. 5 Ib tug txivneej ntawd tau ntoog mob pebcaug-yim xyoo lawm. 6 Thaum Yexus pom tus txivneej no pw ntawd thiab paub meej tias nws tau nyob ntawd ntev lawm, Yexus tau hais rau nws tias, “Koj puas xav ua tus zoo mob?”

7 Tus mob tau teb Nws tias, “Yawg hlob, kuv tsis muaj leejtwg pab kom thaum dej ntas, nws yuav muab kuv tso rau hauv lub pasdej. Sijhawm kuv samsim mus, lwm tus xub nqis uantej kuv lawm.”

8 Yexus tau hais rau nws tias, “Sawv, nqa koj lub lav thiab taugkev mus.” 9 Tamsis ntawd tus txivneej tau zoo hlo, nqa nws lub lav, thiab taugkev mus.

Tabsis hnub ntawd tau yog Xanpataus, 10 yog li ntawd, cov Yudais tau hais rau tus neeg zoo mob tias, “Hnub no yog Xanpataus, mas nws tsis raug cai rau koj nqa koj lub lav.”

11 Ces nws tau teb lawv tias, “Tus kho kuv zoo tau hais rau kuv tias, ‘Nqa koj lub lav thiab taugkev mus.’”

12 Lawv tau nug nws tias, “Leejtwg yog tus txivneej uas tau hais rau koj tias, ‘Nqa thiab taugkev mus?’”

13 Tus zoo mob tsis tau paub tias Yexus yog leejtwg, rauqhov Yexus tau tawm thaum muaj neeg coobcoob lawm.

14 Tomqab tej no, Yexus tau ntsib nws hauv lub tuamtsev thiab tau hais rau nws tias, “Saib, koj zoo hlo lawm. Txhob ua txhaum ntxiv kom txhob muaj kev phem tshwmsim rau koj.” 15 Nws tau mus qhia rau cov Yudais tias Yexus yog tus kho nws zoo hlo.

Txojsia Nyob Ntawm Tus Tub

16 Vim qhov no cov Yudais thiaj tau tsimtxom Yexus, rauqhov Nws tau ua tej no hnub Xanpataus. 17 Tabsis Yexus tau teb lawv tias, “Kuv Txiv niajhnub ua haujlwm los txog tamsis no, es kuv kuj ua thiab.” 18 Vim li no, cov Yudais tau hajyam nrhiav Nws tua; tsis yog Nws tau ua txhaum hnub Xanpataus xwb, tabsis Nws tseem tau hu Vajtswv Ntuj ua Nws Txiv, uas yog tsa tuskheej sibtxig nrog Vajtswv Ntuj.

19 Yog li ntawd, Yexus tau teb rau lawv tias, “Tseeb tiag, kuv hais rau nej, tus Tub tsis muaj peevxwm ua dabtsi ntawm tuskheej tshwj yam Nws pom Nws Txiv ua; rauqhov Leej Txiv ua dabtsi, tus Tub kuj ua tej ntawd ibyam nkaus. 20 Rauqhov Leej Txiv hlub tus Tub thiab qhia txhua yam uas Nws ua rau tus Tub. Nws yuav qhia tej haujlwm uas loj dua tej no rau tus Tub kom nej xav tsis thoob. 21 Ibyam li Leej Txiv tsa neeg tuag sawv thiab muab txojsia rau, tus Tub kuj yuav muab txojsia rau cov uas Nws xav muab rau. 22 Rauqhov Leej Txiv tsis txiavtxim rau ib tug twg, tabsis Nws tau muab kev txiavtxim tagnrho rau tus Tub, 23 kom txhua leej yuav hwm tus Tub ibyam li lawv hwm Leej Txiv. Tus uas tsis hwm tus Tub kuj tsis hwm Leej Txiv, tus uas tau xa Nws los.”

24 “Tseeb tiag, kuv hais rau nej tias, tus uas hnov kuv txojlus thiab ntseeg tus uas tau xa kuv los yuav muaj txojsia ibtxhis thiab yuav tsis mus raug txiavtxim, tabsis nws twb hla ntawm kev tuag mus rau txojsia lawm. 25 Tseeb tiag, kuv hais rau nej tias lub sijhawm yuav los thiab nimno los txog lawm thaum tej neeg tuag yuav hnov Vajtswv Ntuj tus Tub lub suab thiab cov uas hnov yuav muajsia. 26 Rauqhov ibyam li Leej Txiv muajsia hauv tuskheej, Nws tau muab txojsia rau tus Tub kom Nws muaj ntawm tuskheej thiab. 27 Nws tau muab lub tswjchim mus txiavtxim rau tus Tub rauqhov Nws yog Neeg Leej Tub.”

28 “Txhob xav tsis thoob txog qhov no, rauqhov lub sijhawm yuav los thaum txhua tus uas nyob hauv ntxa yuav hnov Nws lub suab 29 thiab cov uas tau ua zoo yuav sawv rovlos rau txojsia, tabsis cov uas tau coj phem yuav sawv rovlos rau kev txiavtxim. 30 Kuv tsis muaj peevxwm ua dabtsi ntawm tuskheej; kuv hnov li cas kuv txiavtxim li ntawd, thiab kuv kev txiavtxim kuj ncajncees, rauqhov kuv tsis nrhiav mus ua raws kuv tus dejsiab tabsis raws tus uas tau xa kuv los tus dejsiab.”

Cov Timkhawv Txog Yexus

31 “Yog kuv ua timkhawv txog tuskheej, kuv li timkhawv tsis tseeb; 32 tabsis muaj dua ib tug ua timkhawv txog kuv thiab kuv paub tias nws li timkhawv txog kuv yeej tseeb.”

33 “Nej twb xa neeg mus cuag Yauhas thiab nws twb ua timkhawv tseeb. 34 Txawm kuv tsis txais timkhawv ntawm neeg, kuv hais tej no kom nej dim. 35 Yauhas yeej yog lub teeb cig tsus thiab ci ntsavus, thiab nej tau xav mus nte nws tus duab teeb ib ntus.”

36 “Kuv tseem muaj timkhawv loj dua Yauhas, xws li tej haujlwm uas Leej Txiv tau muab rau kuv ua kom tiav. Tej haujlwm uas kuv ua no ua timkhawv txog kuv tias Leej Txiv twb xa kuv los. 37 Thiab Leej Txiv tus uas tau xa kuv los ntawd tau ua timkhawv txog kuv. Neeg twb tsis tau hnov Nws lub suab dua thiab twb tsis tau pom Nws lub cev ntajntsug dua. 38 Nej kuj tsis muaj Nws txojlus nyob hauv nej, rauqhov nej tsis ntseeg tus uas Nws tau xa los. 39 Nej tshawb hauv Vajlugkub rauqhov nej xav tias tej ntawd muaj txojsia ibtxhis, tabsis tej ntawd yog timkhawv ntsig txog kuv. 40 Txawm li los, nej tsis xav los cuag kuv kom nej muaj txojsia.”

41 “Kuv tsis txais tshwjchim ntawm neeg, 42 tabsis kuv paub nej. Nej tsis muaj Vajtswv Ntuj txojkev hlub hauv tuskheej. 43 Kuv twb los hauv kuv Txiv lub npe, tabsis nej tsis txais kuv. Hos yog lwm tus los ntawm nws lub npe, nej yuav txais nws. 44 Nej yuav ua cas muaj peevxwm ntseeg thaum nej ibleeg muab tshwjchim rau ibleeg, tabsis nej ho tsis tau nrhiav tshwjchim ntawm Vajtswv Ntuj tus tseem?”

45 “Nej txhob xav tias kuv yuav nkaug nej rau Leej Txiv, tus nkaug nej yog Mauxes, tus uas nej twb ciasiab rau ntag. 46 Rauqhov yog nej ntseeg Mauxes, nej kuj yov ntseeg kuv rauqhov nws tau sau txog kuv. 47 Tabsis nej twb tsis ntseeg nws tej ntaub ntawv, nej yuav ua cas ntseeg kuv tej lus?”

🔝

Yexus Yug Tsib Txhiab Leej

Mat 14:13-21; Mak 6:32-44; Luk 9:10-17

1 Tomqab tej no Yexus tau mus rau Hiavtxwv Kalilais (uas kuj hu ua Hiavtxwv Tinpelias) sab tid. 2 Ib pab neeg coobcoob tau caum Nws rauqhov lawv tau pom tej cim uas Nws tau kho cov neeg mob. 3 Ces Yexus tau nce mus saum ib lub roob thiab nrog cov thwjtim zaum saud. 4 Cov Yudais lub koobtsheej hladhau twb los ze lawm.

5 Yog li ntawd, thaum tsa qhovmuag saib thiab pom pab neeg coobcoob samsim tuaj cuag Nws, Yexus tau hais rau Filiv tias, “Peb yuav muas movci qhovtwg kom lawv tau noj?” 6 Yexus tau hais li no sim nws, rauqhov Yexus twb paub tias Nws yuav ua dabtsi.

7 Filiv tau teb Nws tias, “Muab ob puas denalis muas movci los tsis tau txaus lawv ib leeg ib nyuag qhov.”

8 Anres, Ximoos Petus tus kwv uas yog Nws ib tug thwjtim, tau hais rau Nws tias, 9 “Ib tug menyuam ntawm no muaj tsib lub movci qib thiab ob tug ntses, tabsis tej no yuav ua cas txhua rau coob npaud?”

10 Yexus tau hais tias, “Hais kom cov neeg zaum.” Qhov ntawd muaj nyom ntau. Cov txivneej tau zaum kwvlam li tsib txhiab leej. 11 Ces Yexus tau muab cov movci los ua tsaug, thiab muab rau cov neeg zaum. Nws tau muab ob tug ntses ua ibyam nkaus thiab muab rau lawv raws li lawv xav tau.

12 Tomqab lawv tsau lawm, Yexus tau hais rau Nws cov thwjtim tias, “Khaws tej seem kom txhob muaj dabtsi sw.” 13 Ces lawv tau khaws cov seem ntawm tsib lub movci qib, uas lawv tau noj, thiab muab ntim tau kaum-ob lub pobtawb.

14 Ces thaum pom lub cim uas Nws tau ua, cov neeg thiaj tau hais tias, “Tus no yog tus cevlus tseem uas yuav los rau hauv lub cejntug.” 15 Vim Nws tau paub tias lawv samsim los muab Nws tsa ua vajntxwv, Yexus tau rovqab tawm mus saum roob ib leeg.

Yexus Taugkev Saum Dej

Mat 14:22-33; Mak 6:47-51

16 Thaum tsausntuj los, Nws cov thwjtim tau nqis mus nram hiavtxwv 17 thiab tau nce rau hauv nkoj; lawv tau pib hla hiavtxwv mus rau Kapenaus. Tsausntuj kiag los Yexus twb tsis los rau ntawm lawv. 18 Mas hiavtxwv tau ntas loj heev vim cua dub nplawm. 19 Tomqab lawv mus li neesnkaum-tsib lossis pebcaug lub tshav ncaws pob, lawv tau pom Yexus taugkev saum hiavtxwv los ze lub nkoj, mas lawv tau ntshai heev. 20 Tabsis Nws tau hais rau lawv tias, “Nws yog kuv; txhob ntshai.” 21 Lawv kuj tau xav txais Nws los saum nkoj, tabsis tamsis ntawd lub nkoj tau mus txog tim ntug uas lawv mus ntawd.

22 Tagkis, pab neeg coobcoob tau sawv tim ntug hiavtxwv. Lawv tau pom tias tsis tau muaj dua lwm lub nkoj, tsuas tau muaj tib lub xwb, thiab Yexus tsis tau nce rau hauv nkoj nrog Nws cov thwjtim, thiab Nws cov thwjtim tau tawm nkaus xwb. 23 Ces lwm cov nkoj tau tawm tim Tinpelius tuaj rau qhov chaw uas lawv tau noj tej movci tomqab tus Tswv tau muab ua tsaug ntawd. 24 Thaum pab neeg coobcoob paub tias Yexus thiab Nws cov thwjtim tsis tau nyob ntawd, lawv tau nce nkoj los nrhiav Yexus rau Kapenaus.

Yexus Yog Lub Movci Ciajsia

25 Thaum lawv ntsib Yexus sab hiavtxwv tim no, lawv tau nug Nws tias, “Lanpis, thaum twg koj twb los rau tim no lawm?”

26 Yexus tau teb tias, “Tseeb tiag, kuv hais rau nej, nej nrhiav kuv tsis vim tias nej tau pom tej cim, tabsis vim nej tau noj movci tsau xwb. 27 Txhob khwv rau tej zaubmov liamsim tabsis khwv rau tej zaubmov nyob mus txog txojsia ibtxhis, uas Neeg Leej Tub yuav muab rau nej; vim Txiv Vajtswv Ntuj tau ntaus homthawj rau qhov no.”

28 Ces lawv tau hais rau Nws tias, “Peb yuav ua dabtsi es thiaj yog peb khwv rau Vajtswv Ntuj tej haujlwm?”

29 Yexus tau teb rau lawv tias, “Vajtswv Ntuj qhov haujlwm yog li no: Kom nej ntseeg tus uas Nws tau xa los.”

30 Ces lawv tau teb Nws tias, “Ces koj yuav ua lub cim dabtsi kom peb pom thiab ntseeg koj? Koj yuav ua dabtsi? 31 Peb tej pojyawm tau noj manas tom mojsab qhua, ibyam li twb sau tseg tias, ‘Nws tau muab movci saum ntuj rau lawv noj.’”

32 Yexus tau teb lawv tias, “Kuv hais tseeb rau nej, Mauxes tsis tau muab movci saum ntuj rau nej, tabsis kuv Txiv tau muab lub movci tseem saum ntuj rau nej. 33 Rauqhov Vajtswv Ntuj lub movci yog tus uas nqis saum ntuj los thiab muab txojsia rau lub cejntug.”

34 Ces lawv tau taij Nws tias, “Tus Tswv, muab lub movci no rau peb txhua lub sijhawm.”

35 Yexus tau teb rau lawv tias, “Kuv yog lub movci txojsia. Tus uas los cuag kuv yuav tsis tshaib thiab tus uas ntseeg kuv yuav tsis nqhis ntxiv. 36 Tabsis zoo li kuv tau hais rau nej lawm, nej twb pom kuv tabsis nej tsis ntseeg. 37 Txhua tus uas Leej Txiv muab rau kuv yuav los cuag kuv thiab tus uas los cuag kuv, kuv yuav tsis ntiab tawm sab nraud, 38 vim kuv twb nqis saum ntuj los, kom kuv yuav ua tus uas tau xa kuv los ntawd tus dejsiab, tsis yog ua kuv tus dejsiab. 39 Thiab qhov no yog tus uas tau xa kuv los tus dejsiab: Txhua tus uas Nws twb muab rau kuv ntawd kom kuv txhob cia poob tabsis kuv yuav tsa nws sawv rau hnub kawg. 40 Rauqhov kuv Txiv tus dejsiab yog kom txhua tus uas pom tus Tub thiab ntseeg Nws yuav txais txojsia ibtxhis thiab kuv yuav tsa nws sawv rau hnub kawg.”

41 Ces cov Yudais tau yws txog Nws tias, “Nws tau hais tias, ‘Kuv yog lub movci uas nqis saum ntuj los,’” 42 thiab lawv tau hais tias, “Nws tsis yog Yauxej tus tub Yexus, uas peb paub Nws niam Nws txiv lod? Vim li cas Nws hais tias, ‘Kuv twb nqis saum ntuj los?’”

43 Yexus tau teb rau lawv tias, “Txhob yws mas nej nas! 44 Tsis muaj leejtwg muaj peevxwm los cuag kuv, tshwj kuv Txiv tus uas tau xa kuv los ntawd tau qaws nws, thiab kuv yuav tsa nws sawv rau hnub kawg. 45 Twb sau tseg rau hauv cov cevlus tias, ‘Thiab lawv txhua tus yuav raug Vajtswv Ntuj cob.’ Ces txhua tus uas hnov thiab kawm ntawm Leej Txiv kuj yuav los cuag kuv. 46 Tsis yog tias ib leej twg twb pom Leej Txiv dua, tshwj tus tawm ntawm Vajtswv Ntuj los xwb. Nws twb pom Leej Txiv dua lawm. 47 Kuv hais tseeb rau nej tias, tus ntseeg muaj txojsia ibtxhis. 48 Kuv yog lub movci txojsia. 49 Nej tej laus tau noj manas tom mojsab qhua thiab tau tuag. 50 Tus no yog lub movci uas nqis saum ntuj los, kom leejtwg noj ces nws yov tsis tuag. 51 Kuv yog lub movci txojsia uas nqis saum ntuj los; yog leejtwg noj lub movci no, nws yuav muajsia mus ibtxhis, thiab lub movci uas kuv yuav muab ua txojsia rau lub cejntug yog kuv cev nqaij.”

52 Cov Yudais tau sibcav zomzaws tias, “Nws yov ua li cas muaj peevxwm muab Nws cev nqaij rau peb noj?”

53 Yog li ntawd, Yexus tau hais lawv tias, “Tseeb tiag kuv hais rau nej, tshwj nej noj Neeg Leej Tub cev nqaij thiab haus Nws cov ntshav, nej tsis muaj txojsia hauv tuskheej. 54 Tus noj kuv cev nqaij thiab haus kuv cov ntshav muaj txojsia ibtxhis, thiab kuv yuav tsa nws sawv rau hnub kawg; 55 rauqhov kuv cev nqaij yog cov tseem movci thiab kuv cov ntshav yog cov tseem dej haus. 56 Tus noj kuv cev nqaij thiab haus kuv cov ntshav nyob hauv kuv thiab kuv nyob hauv nws. 57 Ibyam li Leej Txiv tus uas tau xa kuv los ntawd muajsia, kuv muajsia vim Leej Txiv, ces tus uas noj kuv yuav muajsia vim kuv ibyam nkaus. 58 Tus no yog lub movci uas nqis saum ntuj los, thiab tsis thooj li qhov uas nej tej laus tau noj thiab tau tuag; tabsis tus uas noj lub movci no yuav muajsia mus ibtxhis.” 59 Nws tau hais tej no ntawm lub txoos sablaj thaum Nws qhuabqhia hauv Kapenaus.

Coob Tus Thwjtim Tso Yexus Tseg

60 Ces Nws cov thwjtim coob leej tau hais tias, “Txojlus no hnyav heev, leejtwg thiaj muaj peevxwm mloog?”

61 Vim Nws paub hauv tuskheej tias Nws cov thwjtim tau yws txog qhov no, Yexus tau hais rau lawv tias, “Qhov no dawm nej ntog? 62 Yog nej tseem pom Neeg Leej Tub nce mus rau qhov chaw uas Nws tau xub nyob ne? 63 Vajtswv Ntsujplig yog tus ua kom muaj txojsia, tabsis nqaijtawv tsis tsimtxiaj dabtsi. Tej lus uas kuv twb hais rau nej ntawd yog ntsujplig thiab yog txojsia; 64 tabsis nej qee leej tsis ntseeg.” Rauqhov Yexus twb paub thaum chivkeeb tias cov twg yog cov tsis ntseeg thiab leej twg yog tus ntxeevsiab rau Nws. 65 Nws tau hais ntxiv tias, “Vim li no, kuv twb qhia nej tias leejtwg tsis muaj peevxwm los cuag kuv, tshwj tus uas twb txais peevxwm ntawm kuv Txiv xwb.”

66 Txij ntawm los, Nws cov thwjtim coob leej tau tso Nws tseg thiab tsis nrog Nws taugkev.

67 Yexus tau hais rau pab kaum-ob leeg tias, “Nej tsis xav mus thiab lod?”

68 Ximoos Petus tau teb Nws tias, “Tus Tswv, peb yuav mus rau leejtwg? Koj muaj tej lus txojsia ibtxhis, 69 mas peb twb ntseeg thiab paub tias, koj yog Vajtswv Ntuj tus Tub Dawbhuv.”

70 Yexus tau teb lawv tias, “Kuv tsis tau xaiv nej kaum-ob leeg lod? Tabsis nej ib tug yog ntxwgnyoog tug.” 71 Nws tau hais txog Yudas, yawg Ximoos Ikhalaus tus tub, tus uas tau ntxeevsiab rau Nws, rauqhov nws yeej yog ib tug hauv pab kaum-ob leeg.

🔝

Yexus Koom Lub Koobtsheej Tsev Pheebsuab

1 Tomqab tej no Yexus kuj tau ncig hauv Kalilais. Nws tsis tau xav mus hauv Yudas vim cov Yudais tau nrhiav Nws tua. 2 Cov Yudais lub koobtsheej tsev pheebsuab twb los ze. 3 Ces Nws cov kwv tau hais rau Nws tias, “Tawm ntawm no thiab mus hauv Yudas, xwv koj cov thwjtim yuav pom tej haujlwm uas koj ua, 4 rauqhov tsis muaj leejtwg ua haujlwm nraim nkoos tabsis ho nrhiav koobmeej rau tuskheej. Yog koj ua tej no, koj yuavtsum nthuav tuskheej rau lub cejntug pom.” 5 Rauqhov Nws cov kwv tsis tau ntseeg Nws.

6 Ces Yexus tau hais rau lawv tias, “Kuv lub sijhawm tsis tau los txog, tabsis txhua lub sijhawm zoo rau nej huvsi. 7 Lub cejntug ntxub tsis taus nej, tabsis nws ntxub kuv vim kuv ua timkhawv tawmtsam nws tej haujlwm phem. 8 Nej nce mus koom lub koobtsheej; kuv tsis mus koom lub koobtsheej no, rauqhov kuv lub sijhawm tsis tau los txog.” 9 Ces tomqab hais tej no, Nws tau tauvpem hauv Kalilais.

10 Tomqab Nws cov kwv tau nce mus koom koobtsheej lawm, Nws kuj tau nce mus nraim nkoos, tsis cia neeg pom. 11 Ces cov Yudais tau nrhiav Nws hauv lub koobtsheej thiab lawv tau hais tias, “Nws nyob qhovtwg?”

12 Muaj kev sibcav heev txog Nws hauv tej neeg coobcoob. Ibtxhia tau hais tias, “Nws yog neeg zoo,” tabsis lwm cov tau hais tias, “Tsis yog, Nws tsuas coj zejtsoom plaskev xwb.” 13 Tiamsis tsis tau muaj leejtwg hais txog Nws tabmeeg lug vim kev ntshai cov Yudais.

Yexus Qhia Hauv Lub Koobtsheej

14 Nruab nrab lub koobtsheej, Yexus tau nce mus ntawm lub tuamtsev thiab tau qhuabqhia. 15 Ces cov Yudais tau xav tsis thoob tias, “Nws twb tsis tau raug cob, ua li cas Nws paub tej no?”

16 Yexus tau teb tias, “Kuv tej lus qhuabqhia tsis yog kuv li, tabsis yog tus uas tau xa kuv los li. 17 Yog leejtwg xav ua Vajtswv Ntuj tus dejsiab, nws yuav paub tias kuv zaj qhuabqhia tawm ntawm Vajtswv Ntuj los lossis kuv qhia tawm hauv tuskheej. 18 Tus uas hais tawm hauv tuskheej tsuas nrhiav tshwjchim rau nws, tabsis tus uas nrhiav tshwjchim rau tus uas tau xa nws los yeej yog tus tseem, thiab kev tsis ncaj tsis muaj hauv Nws. 19 Mauxes tsis tau muab Kevcai rau nej lod? Nej tsis muaj ib tug coj Kevcai li. Vim li cas nej ho nrhiav kuv tua?”

20 Pab neeg coobcoob tau teb tias, “Koj raug dab! Leejtwg nrhiav koj tua?”

21 Yexus tau teb tias, “Kuv tau ua ib qhov haujlwm xwb, nej sawvdaws twb xav tsis thoob. 22 Mauxes tau muab kev txiavtawv rau nej (tsis yog tawm ntawm Mauxes tabsis tawm ntawm cov yawgkoob) thiab nej tau txiavtawv rau neeg hnub Xanpataus. 23 Yog ib tug txivneej txais kev txiavtawv hnub Xanpataus kom Mauxes Kevcai txhob puas, cas nej ho chim rau kuv vim kuv tau kho ib tug txivneej zoo huvsi rau hnub Xanpataus? 24 Txhob txiavtxim li qhovmuag pom, tabsis txiavtxim li kev txiavtxim ncajncees.”

Yexus Puas Yog Khetos?

25 Ces ibtxhia neeg Yeluxalees tau hais tias, “Nws tsis yog tus uas lawv nrhiav tua lod? 26 Saib mas, Nws qhia tabmeeg lug tabsis lawv tsis hais dabtsi rau Nws. Ntshe cov thawjcoj tau paub tseeb tias Nws yog Khetos pod? 27 Tabsis peb paub tias tus txivneej no tawm qhovtwg los. Thaum Khetos los, tsis muaj leejtwg paub tias Nws tawm qhovtwg los.”

28 Yog li ntawd, Yexus tau qw ntawm lub tuamtsev thaum qhuabqhia hais tias, “Nej twb paub kuv thiab twb paub tias kuv tawm qhovtwg los. Kuv twb tsis los ntawm kuv tuskheej tabsis tus uas tau xa kuv los ntawd yog tus tseeb. Nej twb tsis paub Nws, 29 tabsis kuv paub Nws vim kuv yog tus tawm ntawm Nws los thiab Nws tau xa kuv los.”

30 Lawv tau nrhiav kev ntes Nws tabsis tsis muaj leejtwg tau tsa tes rau saum Nws vim Nws lub sijhawm twb tsis tau los txog. 31 Coob leej hauv tej neeg ntawd tau ntseeg Nws thiab tau hais tias, “Thaum Khetos los Nws puas yov ua ntau lub cim tshaj li tus no tau ua?”

32 Cov Falixais tau hnov pab neeg coobcoob sibcav li no txog Yexus, ces cov povthawj hlob thiab cov Falixais tau xa tub ceevxwm tuaj ntes Nws.

33 Yexus tau hais tias, “Kuv nyob nrog nej mentsis ces kuv yuav mus cuag tus uas tau xa kuv los. 34 Nej yuav nrhiav kuv tabsis yuav tsis ntsib kuv; thiab kuv nyob qhovtwg, nej tsis muaj peevxwm mus.”

35 Cov Yudais tau sibtham tias, “Nws samsim yuav mus qhovtwg uas peb nrhiav tsis ntsib Nws? Tsis yog Nws samsim yuav taugkev mus rau cov nyob xyaw tej Kilis thiab qhuabqhia rau Kilis lod? 36 Txojlus uas Nws tau hais tias, ‘Nej yuav nrhiav kuv tabsis yuav tsis ntsib kuv’ thiab ‘Kuv nyob qhovtwg nej tsis muaj peevxwm mus’ ntawd yog dabtsi?”

37 Hnub loj tshaj ntawm lub koobtsheej ntawd, Yexus tau sawv thiab qw tias, “Yog leejtwg nqhis dej, cia nws los cuag kuv thiab los haus. 38 Tus uas ntseeg kuv, ibyam li Vajlugkub tau hais tseg, dej muajsia yuav ntws yaws hauv nws lub nrog cev.” 39 Nws tau hais li no ntsig txog tus Ntsujplig uas cov ntseeg Nws tau txais tomqab no; tus Ntsujplig tseem tsis tau los vim Yexus tsis tau txais tshwjchim.

40 Ces thaum hnov tej lus no, qee leej ntawm pab neeg coobcoob tau hais tias, “Nws yog tus cevlus tseem.”

41 Tabsis lwm leej tau hais tias, “Nws tsis yog Khetos.”

Tseem muaj ibtxhia nug tias, “Khetos tsis lam tshwmsim rau Kalilais pod? 42 Vajlugkub tsis tau hais tias Khetos yog Daviv noob thiab yuav tshwm hauv Daviv lub zos Npelehees lod?” 43 Yog li ntawd, tau muaj kev sibtawg hauv pab neeg coobcoob vim Nws. 44 Thiab ibtxhia tau xav muab Nws ntes tabsis tsis tau muaj leejtwg tsa tes rau saum Nws.

Yixayees Cov Thawjcoj Tsis Ntseeg

45 Ces cov tub ceevxwm tau rovqab. Cov povthawj hlob thiab cov Falixais thiaj tau nug lawv tias, “Vim li cas nej tsis coj Nws los?”

46 Cov tub ceevxwm tau teb tias, “Tsis tau muaj leejtwg hais lus li tus txivneej no dua.”

47 Yog li, cov Falixais tau teb lawv tias, “Tsis yog nej raug ntxias plaskev lawm thiab lod? 48 Tsis muaj ib tug ntawm cov thawjcoj lossis cov Falixais ntseeg Nws li sad? 49 Tabsis tej neeg coobcoob tsis paub Kevcai ntawd tabtom raug tsawm.”

50 Nikaudemaus, tus uas tau tuaj cuag Yexus nram ntej thiab tau yog lawv ib tug, tau hais rau lawv tias, 51 “Peb Kevcai tsis txiavtxim rau ib tug neeg tshwj peb xub hnov Nws lus thiab paub tias Nws ua dabtsi los sad?”

52 Lawv tau teb rau Nws tias, “Koj tsis lam tawm Kalilais tuaj thiab pod? Tshawb ces koj yuav paub tias tsis muaj ib tug cevlus sawv hauv Kalilais.”

________________________

Zamtxim Rau Tus Pojniam

[ 53 Ces lawv nyias tau mus nyias tsev.

🔝

1 Yexus tau mus rau tom roob txiv ntooroj. 2 Tagkis kaj ntug Nws tau tuaj rau ntawm lub tuamtsev thiab tagnrho zejtsoom tau tuaj cuag Nws. Nws tau zaum thiab qhuabqhia lawv. 3 Cov xibfwb qhia Kevcai thiab cov Falixais tau coj ib tug pojniam, uas tau raug ntes thaum deev hluas, tuaj thiab tau muab nws sawv rau hauv plawv. 4 Lawv tau hais rau Nws tias, “Xibfwb, tus pojniam no tau raug ntes cheem nws samsim deev hluas. 5 Hauv peb Kevcai, Mauxes tau tsocai kom muab pobzeb ntaus tej pojniam li no. Yog li ntawd, koj hais li cas?” 6 Lawv tau hais li no sim Nws kom lawv muaj lus nkaug Nws.

Tabsis Yexus tau zaum khoobywb thiab muab ntivtes sau ntawv pem teb. 7 Vim lawv tau nyob ntawd nug Nws qujqees, Nws tau sawv thiab hais rau lawv tias, “Nej leejtwg tsis muaj kev txhaum ces nws xub muab pobzeb ntaus tus pojniam no.” 8 Nws tau rov zaum khoobywb thiab sau ntawv rau pem teb.

9 Cov uas tau hnov ntawd nyias txawm tau mus nyias, pib ntawm cov laus ib tug zujzus thiab tshuav Nws ibleeg nrog tus pojniam uas nyob hauv plawv. 10 Yexus tau sawv thiab hais rau nws tias, “Mentxhais, lawv nyob qhovtwg? Tsis muaj leejtwg txiavtxim rau koj lod?”

11 Nws tau teb tias, “Tsis muaj leejtwg, tus Tswv.”

Ces Yexus tau hais rau nws tias, “Kuv kuj tsis txiavtxim rau koj thiab. Mus es txij no txhob ua txhaum lawm mog.”]

_______________________

Timkhawv Tseeb Txog Yexus Tej Lus

12 Yexus tau rovqab hais rau lawv tias, “Kuv yog lub cejntug qhov kaj. Tus caum kuv yuav tsis taugkev hauv qhov tsausntuj, tabsis nws yuav muaj qhov kaj rau txojsia.”

13 Ces cov Falixais tau hais rau Nws tias, “Koj ua timkhawv txog koj tuskheej, mas koj qhov timkhawv tsis tseeb.”

14 Yexus tau teb rau lawv tias, “Txawm kuv ua timkhawv txog kuv tuskheej los kuv li timkhawv tseeb, rauqhov kuv paub tias kuv tau tawm qhovtwg los thiab yuav mus qhovtwg; tabsis nej tsis paub tias kuv tawm qhovtwg los thiab yuav mus qhovtwg. 15 Nej txiavtxim raws nqaijtawv; kuv tsis txiavtxim rau leejtwg. 16 Thiab txawm kuv txiavtxim los kuv kev txiavtxim tseeb, rauqhov kuv tsis yog ibleeg xwb tabsis kuv nrog kuv Txiv tus uas tau xa kuv los. 17 Nej Kevcai twb sau tseg tias ob tug qhov timkhawv yeej tseeb. 18 Kuv yog tus ua timkhawv txog kuv thiab kuv Txiv tus uas tau xa kuv los ntawd kuj ua timkhawv txog kuv.”

19 Ces lawv tau nug Nws tias, “Koj txiv nyob qhovtwg?”

Yexus tau teb tias, “Nej twb tsis paub kuv, ces nej kuj tsis paub kuv Txiv. Yog nej twb paub kuv lawm ces nej twb paub kuv Txiv thiab.” 20 Nws tau hais tej lus no thaum qhuabqhia ntawm tuamtsev ze ntawm lub thawv tso nyiaj. Tsis muaj leejtwg ntes Nws rauqhov Nws lub sijhawm tsis tau los txog.

21 Nws tau hais ntxiv rau lawv tias, “Kuv yuav mus thiab nej yuav nrhiav kuv, tabsis nej yuav tuag rau nej txojkev txhaum. Qhov kuv mus ntawd nej tsis muaj peevxwm mus.”

22 Ces cov Yudais tau hais tias, “Nws tsis lam yov tua tuskheej pod, vim Nws hais tias, ‘Qhov kuv mus ntawd nej tsis muaj peevxwm mus’?”

23 Nws tau hais rau lawv tias, “Nej yog cov hauv no, kuv yog tus sab saud; nej txawm rau hauv lub cejntug tabsis kuv tsis txawm rau hauv lub cejntug no. 24 Yog li ntawd, kuv tau hais rau nej tias nej yuav tuag hauv nej tej kev txhaum. Vim qhov nej tsis ntseeg tias kuv yog Nws, nej yuav tuag rau nej tej kev txhaum tiag.”

25 Lawv tau nug Nws tias, “Koj yog leejtwg?”

Yexus tau teb lawv tias, “Kuv twb hais rau nej pem hauvpaus li cas? 26 Kuv muaj ntau yam hais thiab txiavtxim rau nej. Tus uas tau xa kuv los yog tus tseeb, es kuv tau hnov dabtsi ntawm Nws, kuv hais tej ntawd rau lub cejntug.”

27 Lawv tsis tau paub tias Nws tau hais rau lawv txog Leej Txiv. 28 Ces Yexus tau hais ntxiv tias, “Thaum nej muab Neeg Leej Tub tsa, ces nej yuav paub tias kuv yog Nws, thiab tias kuv tsis ua dabtsi ntawm tuskheej, tabsis kuv hais tej uas Leej Txiv tau qhia kuv. 29 Thiab tus uas tau xa kuv los ntawd nrog nraim kuv nyob, Nws tsis tau tso kuv nyob ibleeg, vim kuv ibtxwm ua tej uas raug Nws siab xwb.” 30 Tomqab Nws hais tej no, coob leej tau ntseeg Nws.

Anplahas Menyuam

31 Rau cov Yudais uas tau ntseeg Nws, Yexus tau hais tias, “Yog nej nyob hauv kuv txojlus, nej yog kuv cov thwjtim tiag 32 thiab nej yuav paub qhov tseeb, thiab qhov tseeb yuav tso nej ywjpheej.”

33 Lawv tau teb Nws tias, “Peb yog noob Anplahas thiab peb ibtxwm tsis tau ua qhev rau leejtwg. Cas koj hais tias, ‘Nej yuav dhau ua neeg ywjpheej?’”

34 Yexus tau teb lawv tias, “Tseeb tiag, kuv hais rau nej tias txhua tus uas ua txhaum yog kev txhaum tus qhev. 35 Tus qhev tsis nyob hauv tsev mus ibtxhis, tus tub thiaj nyob mus ibtxhis. 36 Ces yog tus tub tso nej ywjpheej, nej thiaj yuav ywjpheej tiag. 37 Kuv paub tias nej yog noob Anplahas tabsis nej nrhiav kuv tua vim kuv txojlus tsis muaj chaw hauv nej. 38 Kuv hais tej uas kuv twb pom ntawm kuv Txiv, yog li ntawd, nej ua tej uas nej tau hnov ntawm nej txiv.”

39 Lawv tau teb rau Yexus tias, “Peb txiv yog Anplahas.”

Nws tau hais rau lawv tias, “Yog nej tseem Anplahas menyuam, nej yov ua Anplahas tej haujlwm. 40 Tabsis nej nrhiav tua kuv—ib tug neeg uas twb qhia qhov tseeb uas kuv tau hnov ntawm Vajtswv Ntuj rau nej. Anplahas tsis tau ua ib yam dabtsi li no. 41 Nej ua nej txiv tej haujlwm.”

Ces lawv tau teb Nws tias, “Peb twb tsis yog menyuam tsaub as. Peb muaj ib leej txiv, xws li Vajtswv Ntuj.”

Ntxwgnyoog Menyuam

42 Yexus tau hais rau lawv tias, “Yog Vajtswv Ntuj yog nej txiv, nej yov hlub kuv vim kuv tau tawm ntawm Vajtswv Ntuj los. Kuv tsis tau tawm los tuskheej tabsis Nws tau xa kuv los. 43 Vim li cas nej tsis totaub kuv txojlus? Rauqhov nej tsis muaj peevxwm hnov kuv txojlus. 44 Nej tawm ntawm nej txiv los, xws li ntxwgnyoog, thiab nej xav ua nej txiv tej kev ntshaw. Nws tau ua tus tua neeg thaum chivkeeb los thiab tsis tau sawv hauv qhov tseeb vim qhov tseeb tsis tau nyob hauv nws. Thaum nws hais lus dag, nws hais tawm hauv tuskheej vim tias nws yog tus dag thiab leej txiv ntawm kev dag. 45 Vim kuv hais lus tseeb, nej thiaj tsis ntseeg kuv. 46 Nej leejtwg yuav muab tau povthawj tias kuv muaj kev txhaum? Yog kuv hais qhov tseeb, vim li cas nej tsis ntseeg kuv? 47 Tus uas yug ntawm Vajtswv Ntuj los yeej hnov Vajtswv Ntuj tej lus. Vim li no, nej tsis hnov rauqhov nej tsis yug los ntawm Vajtswv Ntuj.”

Yexus Tej Lus Txog Tuskheej

48 Cov Yudais tau hais rau Nws tias, “Peb hais tsis tseeb lod, tias koj yog neeg Xamalis thiab koj muaj dab?”

49 Yexus tau teb tias, “Kuv tsis muaj dab tabsis kuv hwm kuv Txiv, hos nej tsis hwm kuv. 50 Kuv tsis nrhiav tshwjchim rau kuv; Nws yog tus nrhiav thiab tus txiavtxim. 51 Tseeb tiag, kuv hais rau nej, yog leejtwg ceev kuv txojlus, nws yuav tsis pom kev tuag mus ibtxhis.”

52 Cov Yudais tau hais rau Nws tias, “Nimno peb paub tias koj muaj dab. Anplahas thiab cov cevlus tau tuag, tabsis koj hais tias, ‘Yog leejtwg ceev kuv txojlus, nws yeej yuav tsis saj kev tuag mus ibtxhis.’ 53 Koj tsis lam loj dua peb txiv Anplahas? Nws tau tuag thiab cov cevlus kuj tau tuag. Koj tsa tuskheej loj npaum cas?”

54 Yexus tau teb tias, “Yog kuv muab tshwjchim rau tuskheej, kuv lub tshwjchim tsis muaj dabtsi. Kuv Txiv, tus uas nej hais tias Nws yog nej tus Vajtswv Ntuj, yog tus muab tshwjchim rau kuv. 55 Nej twb tsis paub Nws, tabsis kuv paub Nws. Yog kuv hais tias kuv tsis paub Nws, ces kuv yuav dhau ua tus dag zoo li nej; tabsis kuv twb paub Nws thiab kuv ceev Nws txojlus. 56 Nej txiv Anplahas tau zoo siab tias nws yuav pom hnub kuv los, thiab nws tau pom mas nws tau txaussiab heev.”

57 Cov Yudais tau hais rau Nws tias, “Koj tsis muaj tsibcaug xyoo, es koj twb pom Anplahas lod?”

58 Yexus tau hais rau lawv tias, “Tseeb tiag, kuv hais rau nej, uantej Anplahas tau tshwmsim kuv muajsia nyob.” 59 Ces lawv tau khaws pobzeb kom lawv tau ntaus Nws, tabsis Yexus tau nraim cev thiab tau tawm ntawm lub tuamtsev mus.

🔝

Yexus Kho Tus Digmuag Nruabthiab

1 Thaum taugkev mus, Yexus tau pom ib tug txivneej digmuag hauv nruabthiab los. 2 Cov thwjtim tau nug Nws tias, “Lanpis, leejtwg tau ua txhaum, nws lossis nws niam nws txiv, es nws thiaj tau yug digmuag tsus li?”

3 Yexus tau teb tias, “Tsis yog nws lossis nws niam nws txiv tau ua txhaum, tabsis kom nws yov nthuav Vajtswv Ntuj tej haujlwm hauv nws. 4 Peb cheemtsum ua tus uas tau xa kuv los ntawd tej haujlwm cheem nws tseem yog nruab hnub. Tsausntuj samsim los, thaum ntawd yus tsis muaj peevxwm ua haujlwm lawm. 5 Sijhawm kuv nyob hauv lub cejntug, kuv yog lub cejntug qhov kaj.”

6 Hais tej no tag, Nws tau nti qaubncaug rau av thiab tau muab Nws cov qaubncaug do xyaw av. Nws tau muab cov av pleev tus txivneej ob lub qhovmuag 7 thiab tau hais rau nws tias, “Mus ntxuav hauv pasdej Xilauas” (uas txhais tias ‘raug xa’). Ces tus txivneej ntawd tau mus ntxuav qhovmuag, thiab tau rovlos pomkev nrig.

8 Tej txheebze thiab tej neeg uas tau pom nws ua tus thov khawv nram ntej tau nug tias, “Tus no puas yog tus zaum thov khawv?”

9 Lwm leej tau hais tias, “Nws yog tus ntawd.”

Ibtxhia tau hais tias, “Tus no tsis yog, tabsis nws zoo li tus ntawd xwb.”

Tabsis nws tau teb lawv tias, “Kuv yog nws ntag.”

10 Ces lawv tau nug nws tias, “Yog li ntawd, ua li cas koj ob lub qhovmuag thiaj pomkev?”

11 Nws tau teb tias, “Tus txivneej hu ua Yexus tau ua ib cov av thiab tau muab pleev kuv ob lub qhovmuag thiab tau hais rau kuv tias, ‘Mus hauv Xilauas thiab ntxuav qhovmuag.’ Ces tomqab kuv ntxuav qhovmuag, kuv txawm tau pomkev.”

12 Lawv tau nug nws tias, “Tus ntawd nyob qhovtwg?”

Nws tau teb tias, “Kuv tsis paub.”

Cov Falixais Taug Pausntsis

13 Lawv tau coj tus digmuag nram ntej ntawd mus rau cov Falixais. 14 Hnub Yexus tau do av thiab kho nws ob lub qhovmuag pomkev ntawd yog hnub Xanpataus. 15 Cov Falixais tau nug nws dua seb vim li cas nws tau pomkev. Nws tau teb lawv tias, “Nws tau muab av pleev kuv ob lub qhovmuag, kuv tau mus ntxuav, ces kuv txawm tau pomkev.”

16 Qee tus Falixais tau hais tias, “Tus txivneej ntawd tsis nrog Vajtswv Ntuj, rauqhov Nws tsis ceev hnub Xanpataus.”

Tabsis qee leej ho tau hais tias, “Tus neeg txhaum yov ua li cas muaj peevxwm ua tej cim no?” Mas tau muaj kev sibtawg nruab nrab lawv.

17 Lawv tau nug tus digmuag dua, “Koj hais li cas txog tus ntawd rauqhov Nws tau kho koj qhovmuag?”

Nws tau teb tias, “Nws yog ib tug cevlus.”

18 Cov Yudais tsis tau ntseeg tias nws yeej yog tus digmuag thiab tau pomkev txog thaum lawv tau hu nws niam nws txiv tuaj. 19 Lawv tau nug nkawv tias, “Nws puas yog neb tus tub uas neb hais tias nws tau yug los digmuag tsus? Yog li ntawd, ua li cas nimno nws ho pomkev?”

20 Ces nws niam nws txiv tau teb tias, “Wb paub tseeb tias nws yog wb tus tub thiab tias nws tau yug los digmuag tsus, 21 tabsis wb tsis paub tseeb tias vim li cas nimno nws ho pomkev, thiab wb twb tsis paub tias leejtwg kho nws ob lub qhovmuag. Nug nws; nws muaj hnubnyoog lawm. Nws tuskheej yuav qhia.” 22 Nws niam nws txiv tau hais li no rauqhov nkawv tau ntshai cov Yudais, vim cov Yudais tau tuavhauv tias yog leejtwg lees Yexus ua Khetos, tus ntawd yuav raug rho tawm hauv lub txoos sablaj. 23 Vim li no, nws niam nws txiv thiaj tau hais tias, “Nws muaj hnubnyoog lawm, nug nws.”

24 Ces lawv tau hu tus txivneej uas ibtxwm digmuag dua zaum ob thiab tau nug nws tias, “Muab tshwjchim rau Vajtswv Ntuj. Peb paub meej tias tus txivneej no yog neeg txhaum.”

25 Nws tau teb tias, “Kuv tsis paub xyov Nws puas yog neeg txhaum. Kuv paub meej ib qhov tias kuv tau ibtxwm digmuag los txog thaum kuv pomkev.”

26 Lawv tau hais rau nws tias, “Nws tau ua dabtsi rau koj? Nws tau kho koj ob lub qhovmuag li cas?”

27 Nws tau teb lawv tias, “Kuv tau hais rau nej lawm tabsis nej tsis tau mloog. Vim li cas nej xav hnov dua? Tsis yog nej xav ua Nws thwjtim lod?”

28 Ces lawv tau thuam nws tias, “Koj yog Nws thwjtim, tabsis peb yog Mauxes cov thwjtim. 29 Peb paub meej tias Vajtswv Ntuj twb hais lus rau Mauxes, tabsis peb tsis paub tias tus no los qhovtwg los.”

30 Tus txivneej ntawd tau teb rau lawv tias, “Ntawm qhov no txaus xav heev, vim nej tsis paub tias Nws los qhovtwg los tabsis Nws tau kho kuv ob lub qhovmuag. 31 Peb twb paub tias Vajtswv Ntuj tsis mloog cov neeg txhaum, Nws tsuas mloog tus hwm Nws thiab ua Nws tus dejsiab. 32 Ibtxhis los peb tsis tau hnov txog leejtwg tau kho tus neeg digmuag nruabthiab ob lub qhovmuag. 33 Yog Nws tsis tau tawm ntawm Vajtswv Ntuj los, Nws yeej tsis muaj peevxwm ua ib yam dabtsi.”

34 Lawv tau teb nws tias, “Koj tau yug los puvnpo kev txhaum es koj ho yuav qhia peb no lod?” Ces lawv tau muab nws ntiab tawm.

Digmuag Sab Ntsujplig

35 Yexus tau hnov tias lawv tau ntiab nws tawm, ces thaum nrhiav ntsib nws Yexus tau hais tias, “Koj puas ntseeg Neeg Leej Tub?”

36 Nws tau teb hais tias, “Es Nws yog leejtwg, tus Tswv, xwv kuv yuav ntseeg Nws?”

37 Yexus tau hais rau nws tias, “Koj twb pom Nws thiab Nws samsim nrog koj tham.”

38 Ces nws tau hais tias, “Kuv ntseeg, tus Tswv.” Thiab nws tau pe Yexus.

39 Yexus tau hais rau nws ntxiv tias, “Kuv tau los hauv lub cejntug rau txojkev txiavtxim no: Kom cov digmuag ho pomkev thiab cov pomkev ho dhau ua cov digmuag.”

40 Qee leej Falixais uas nrog Nws tau hnov tej lus no thiab tau hais rau Nws tias, “Peb kuj tsis yog neeg digmuag pod?”

41 Yexus tau hais rau lawv tias, “Yog nej digmuag, nej yov tsis muaj kev txhaum, tabsis nimno nej hais tias, ‘Peb pomkev,’ nej txojkev txhaum tseem nyob.”

🔝

Tus Tswv Yaj

1 “Tseeb tiag, kuv hais rau nej tias, tus tsis nkag ntawm qhovrooj mus hauv lub nkuaj yaj tabsis nce lwm qhov mus, tus ntawd yog tubsab thiab tubnyiag. 2 Tus uas nkag ntawm qhovrooj thiaj yog tus tswv yaj. 3 Tus zov qhovrooj qhib rau tus no thiab pab yaj hnov nws lub suab. Nws hu nws cov yaj raws lawv lub npe thiab coj lawv tawm. 4 Thaum nws tso nws pab yaj tagnrho tawm, nws mus uantej thiab pab yaj caum nws rauqhov lawv paub nws lub suab. 5 Tabsis lawv ibtxwm tsis caum tus qhua, tsuas khiav tawm ntawm nws xwb, rauqhov lawv tsis paub nws lub suab.” 6 Yexus tau hais zaj luspiv no rau lawv tabsis lawv tsis tau totaub tias zaj Nws tau hais ntawd yog dabtsi.

7 Yog li ntawd, Yexus tau rov hais dua: “Tseeb tiag, kuv hais rau nej tias kuv yog lub qhovrooj rau pab yaj. 8 Txhua tus uas tau tuaj uantej kuv yog tubsab thiab tubnyiag, tabsis tej yaj tsis mloog lawv. 9 Kuv yog lub qhovrooj. Yog leejtwg nkag hauv kuv los, nws yuav raug cawm. Nws yuav nkag los lossis yuav tawm mus, nws yeej yuav ntsib tshav zaub. 10 Tus tubsab tsis lam tuaj, tshwj nws tuaj nyiag, tua, thiab rhuav tshem; tabsis kuv tau los kom lawv yov muaj txojsia thiab muaj puvnpo.”

11 “Kuv yog tus tswv yaj zoo. Tus tswv yaj zoo muab Nws txojsia tso plhuav theej pab yaj. 12 Tus tubzog tsis yog tus tswv yaj, pab yaj tsis yog nws tug. Nws pom hma tuaj mas nws tso pab yaj tseg thiab khiav lawm; ces tus hma tom thiab caum pab yaj rirws 13 rauqhov nws yog tubzog thiab tsis mobsiab pab yaj dabtsi.”

14 “Kuv yog tus tswv yaj zoo thiab kuv paub kuv cov yaj thiab kuv cov yaj paub kuv, 15 ibyam li kuv Txiv paub kuv thiab kuv paub kuv Txiv, thiab kuv muab kuv txojsia tso plhuav theej pab yaj. 16 Kuv muaj dua lwm cov yaj uas tsis nyob lub nkuaj no thiab kuv cheemtsum mus coj los. Lawv kuj yuav hnov kuv lub suab thiab lawv yuav los ua ib pab yaj, koom ib tug tswv. 17 Vim li no, kuv Txiv hlub kuv rauqhov kuv muab kuv txojsia tso plhuav kom kuv yuav khaws nws rovqab. 18 Tsis muaj leejtwg txeeb txojsia ntawm kuv tabsis kuv tso kuv txojsia, thiab kuv muab txojsia rovlos ntawm kuv lub tswjchim. Qhov no yog txojcai uas kuv tau txais ntawm kuv Txiv.”

19 Kev sibtawg tau rovqab muaj nruab nrab cov Yudais vim tej lus no. 20 Coob leej tau hais tias, “Nws muaj dab thiab vwm lawm. Ua cas peb tseem yuav mloog Nws thiab?”

21 Tabsis ibtxhia ho tau hais tias, “Tej lus no tsis yog tawm ntawm tus raug dab. Dab tsis muaj peevxwm kho qhovmuag pomkev los sad?”

Cov Yudais Tsis Ntseeg

22 Txog lub koobtsheej fij tuamtsev hauv Yeluxalees, lub caij ntuj no, 23 Yexus tau taugkev hauv lub tuamtsev ntawm Xalumoos lub qabkhav. 24 Ces cov Yudais tau tuaj vij Nws thiab tau hais rau Nws tias, “Koj yuav ris peb txojsia txog thaum twg? Yog koj yog Khetos, qhia tabmeeg rau peb.”

25 Yexus tau teb lawv tias, “Kuv tau qhia nej tabsis nej tsis ntseeg. Tej haujlwm uas kuv ua ntawm kuv Txiv lub npe yog timkhawv txog kuv 26 tabsis nej tsis ntseeg vim nej tsis yog kuv pab yaj. 27 Kuv cov yaj hnov kuv lub suab thiab kuv paub lawv, thiab lawv caum kuv. 28 Kuv muab txojsia ibtxhis rau lawv thiab lawv yuav tsis puastsuaj mus ibtxhis, thiab tsis muaj leejtwg yuav txeeb tau lawv ntawm kuv tes. 29 Kuv Txiv, tus muab txhua yam rau kuv, loj dua ntais thiab leejtwg tsis muaj peevxwm txeeb dabtsi ntawm Nws tes. 30 Kuv thiab kuv Txiv yog ib tug.”

31 Cov Yudais tau rovqab khaws pobzeb los ntaus Nws. 32 Yexus tau hais rau lawv tias, “Kuv tau nthuav ntau tes haujlwm zoo ntawm kuv Txiv rau nej, vim tes haujlwm twg es nej yuav laim zeb rau kuv?”

33 Cov Yudais tau teb Nws tias, “Peb tsis muab pobzeb ntaus koj vim tes haujlwm zoo tabsis vim kev tuammom thiab vim koj yog neeg tabsis koj tsa tuskheej ua Vajtswv Ntuj.”

34 Yexus tau teb lawv tias, “Tsis yog twb sau rau hauv nej Kevcai tias, ‘Kuv tau hais tias, nej yog vajtswv ntuj’ lod? 35 Yog Nws tau hu cov cev Vajtswv Ntuj txojlus ua vajtswv ntuj, thiab Vajlugkub piam tsis tau, 36 ces tus uas Leej Txiv tau tshwj ua tus dawbhuv thiab tau xa los hauv lub cejntug nej ho hais tias ‘Nws yog neeg tuammom’ vim kuv tau hais tias, ‘Kuv yog Vajtswv Ntuj tus Tub’ lod? 37 Yog kuv tsis ua kuv Txiv tej haujlwm, txhob ntseeg kuv. 38 Tabsis yog kuv ua, txawm nej tsis ntseeg kuv los, ntseeg tej haujlwm ntawd kom nej paub thiab totaub tias Leej Txiv nyob hauv kuv thiab kuv nyob hauv Leej Txiv.” 39 Lawv tau nrhiav ntes Nws dua, tabsis Nws tau tawm plaws ntawm lawv tes mus lawm.

40 Ces Nws tau tawm, hla Yuladees rovmus rau qhov chaw uas Yauhas xub muab neeg rausdej thiab Nws tau so tid. 41 Coob leej tau tuaj cuag Nws thiab lawv tau hais tias, “Yauhas tsis tau ua cim dabtsi, tabsis tej uas Yauhas tau hais txog tus txivneej no yeej tseeb huvsi.” 42 Coob leej tau ntseeg Nws qhov ntawd.

🔝

Laxalaus Tuag

1 Nimno ib tug txivneej tau mob, xws li Laxalaus hauv lub zos Npethanis, uas yog nws ob tug muam Malis thiab Mathas lub zos. 2 Tus Malis no yog tus uas muab roj mules pleev tus Tswv thiab muab plaubhau so Nws kotaw. Nws tus nus Laxalaus tau mob. 3 Ces ob tug vivncaus tau xa xov mus rau Yexus tias, “Tus Tswv, nimno tus koj hlub ntawd tabtom mob.”

4 Tabsis thaum hnov li ntawd, Yexus tau hais tias, “Tus mob no yuav tsis coj mus rau kev tuag tabsis rau Vajtswv Ntuj tus tshwjchim, kom Vajtswv Ntuj tus Tub yuav txais tshwjchim los ntawm nws.” 5 Yexus tau hlub Mathas, nws tus niam hluas Malis thiab Laxalaus. 6 Yog li ntawd, thaum Yexus tau hnov tias nws tau muaj mob, Yexus thiaj tau nyob qhov ntawd ob hnub ntxiv.

7 Tomqab ntawd, Yexus tau hais rau cov thwjtim tias, “Cia peb rovmus hauv Yudas.”

8 Cov thwjtim tau hais rau Nws tias, “Lanpis, cov Yudais tau nrhiav kev muab pobzeb ntaus koj, es koj ho yuav rovmus?”

9 Yexus tau teb tias, “Ib hnub tsis muaj kaum-ob teev lod? Yog leejtwg taugkev nruab hnub, nws yuav tsis dawm ntog vim tias nws pom qhov kaj rau lub cejntug no. 10 Tabsis yog leejtwg taugkev hmontuj, nws yuav dawm ntog vim tias qhov kaj tsis nyob hauv nws.”

11 Nws tau hais tej no tag mas Nws tau hais rau lawv tias, “Peb tus phoojywg Laxalaus twb tsaugzog lawm, tabsis kuv yuav mus kom kuv tau tsa nws.”

12 Cov thwjtim tau teb Nws tias, “Tus Tswv, yog nws twb tsaugzog lawm, nws yuav zoo mob.” 13 Yexus tau hais txog nws kev tuag tabsis lawv tau xav tias Nws tau hais txog nws kev so tsaugzog.

14 Yog li ntawd, Yexus thiaj tau hais meej rau lawv tias, “Laxalaus tau tuag, 15 thiab kuv txaussiab tias peb tsis tau nyob ntawd kom nej yov ntseeg. Tabsis cia peb mus rau ntawm nws.”

16 Thaumas, tus hu ua Ntxaib, tau hais rau cov thwjtim tias, “Cia peb mus thiab, kom peb yov nrog Nws tuag.”

Yexus Nplig Ob Vivncaus

17 Thaum los txog, Yexus tau hnov tias Laxalaus twb raug faus hauv ntxa plaub hnub lawm. 18 Npethanis nyob ze Yeluxalees li kaum-tsib lub tshav ncaws pob. 19 Cov Yudais coobcoob tau tuaj xyuas Mathas thiab Malis kom lawv ho tau nplig nkawv siab txog nkawv tus nus Laxalaus. 20 Thaum Mathas hnov tias Yexus los, nws tau tuaj ntsib Nws; hos Malis tau zaum hauv tsev. 21 Ces Mathas tau hais rau Yexus tias, “Tus Tswv, yog koj tau nyob ntawm no mas kuv tus nus yov tsis tau tuag; 22 tabsis nimno los kuv paub tias koj thov Vajtswv Ntuj dabtsi, Nws yuav muab rau koj.”

23 Yexus tau hais rau nws tias, “Koj tus nus yuav sawv rovlos.”

24 Mathas tau teb Nws tias, “Kuv paub tias nws yuav sawv rovlos thaum kawg uas cov tuag sawv rovlos ntawd.”

25 Yexus tau hais rau nws tias, “Kuv yog txojkev sawv rovlos thiab yog txojsia. Tus ntseeg kuv, txawm tuag lawm los, nws yuav muajsia, 26 thiab txhua tus uas muajsia thiab ntseeg kuv yuav tsis tuag mus ibtxhis. Koj puas ntseeg qhov no?”

27 Nws tau teb tias, “Ntseeg mas, tus Tswv. Kuv ntseeg tias koj yog Khetos, Vajtswv Ntuj tus Tub, uas los rau hauv lub cejntug.”

28 Hais li no tag, nws tau rovmus hu nws tus niam hluas Malis thiab tau ntxhi rau nws tias, “Xibfwb los txog thiab Nws nug txog koj.” 29 Hnov dheev li no, Malis tau sawv ceevnrooj tuaj cuag Yexus. 30 Tabsis Yexus tseem tsis tau los rau hauv zos, Nws tau nres ntawm qhov chaw uas Mathas tau ntsib Nws. 31 Cov Yudais, uas tau nyob hauv tsev nrog Malis thiab nplig nws ntawd, tau pom nws sawv ceevnrooj thiab tawm sab nraud; lawv tau caum nws thiab tau xav tias nws samsim mus nyiav tom ntxa.

32 Malis tau tuaj txog rau ntawm qhov uas Yexus tau nres, thiab thaum pom Nws, Malis tau qhaucev rau ntawm Nws kotaw thiab hais tias, “Tus Tswv, yog koj tau nyob ntawm no ces kuv tus nus yov tsis tau tuag.”

33 Thaum Yexus pom nws quaj thiab cov Yudais uas nrog nws tuaj ntawd quaj, Nws tau ncia hauv ntsujplig thiab tau ntsawvsiab. 34 Nws tau nug tias, “Nej tau muab nws tso qhovtwg?”

Lawv tau teb Nws tias, “Tus Tswv, los mus saib.”

35 Yexus tau quaj.

36 Yog li ntawd, cov Yudais thiaj tau hais tias, “Saib, Nws hlub nws npaum cas.”

37 Tabsis lawv qee leej tau hais tias, “Tus txivneej uas kho tus digmuag ob lub qhovmuag pomkev tsis muaj peevxwm ua kom nws txhob tuag lod?”

Yexus Tsa Laxalaus Sawv

38 Ces Yexus tau ntsawvsiab ib zaug ntxiv mam los txog ntawm ntxa, uas yog lub ntxa zeb thiab muaj ib lub pobzeb npog rau. 39 Yexus tau hais tias, “Tshem lub pobzeb.”

Mathas, tus tuag tus muam, tau hais rau Nws tias, “Tus Tswv, nws tsw lwj vim hnub no twb yog hnub plaub lawm.”

40 Yexus tau hais rau nws tias, “Kuv tsis tau hais rau koj tias, yog koj ntseeg koj yov pom Vajtswv Ntuj tus tshwjchim lod?”

41 Ces lawv tau tshem lub pobzeb. Yexus tau tsa qhovmuag rau saum nruab ntug thiab hais tias, “Txiv, kuv ua koj tsaug tias koj tau hnov kuv 42 thiab kuv twb paub tias koj hnov ntsoov kuv. Tabsis vim pab neeg coobcoob uas sawv ntawm no, kuv thov kom lawv yov ntseeg tias koj tau xa kuv los.”

43 Hais li no tag, Nws tau qw tias, “Laxalaus, tawm los.” 44 Tus tuag tau tawm los, nrog cov ntaub pav nrees nws testaw thiab daim ntaub npog nws ntsejmuag.

Yexus tau hais rau lawv tias, “Daws nws thiab tso nws mus.”

Kev Tuavhauv Tua Yexus

45 Yog li ntawd, coob leej hauv cov Yudais, cov uas tau tuaj rau ntawm Malis thiab tau pom qhov Yexus tau ua ntawd, tau ntseeg Nws. 46 Tabsis ibtxhia tau mus cuag cov Falixais thiab tau qhia lawv txog qhov Yexus tau ua. 47 Ces cov povthawj hlob thiab cov Falixais tau hu lub rooj Xuhenris.

Lawv tau hais tias, “Peb yuav ua li cas vim tus neeg no tau ua ntau lub cim? 48 Yog peb tso Nws li no, sawvdaws yuav ntseeg Nws thiab cov Loo yuav sawv tawmtsam peb, peb lub tuamtsev thiab peb haivneeg.”

49 Ib tug hauv lawv, xws li Kaiyafas tus povthawj hlob xyoo ntawd, tau hais rau lawv tias, “Nej tsis paub dabtsi li! 50 Nej tsis xav tias cia ib tug tuag theej haivneeg zoo dua, kom haivneeg txhob liamsim.”

51 Qhov no nws tsis tau hais tawm ntawm tuskheej, tabsis vim nws yog tus povthawj hlob xyoo ntawd. Nws tau cevlus tias Yexus tabtom yov tuag theej haivneeg, 52 thiab tsis yog theej haivneeg xwb tabsis kom Nws yov qaws Vajtswv Ntuj cov menyuam uas tau tawg rirws los ua ib pab. 53 Ces txij hnub ntawd lawv thiaj tau npajsiab kom lawv tua tau Nws.

54 Yog li ntawd, Yexus tsis tau taugkev xyaw cov Yudais tabmeeg lug. Nws tau tawm qhov ntawd mus rau cheebtsam ze mojsab, mus rau lub nroog hu ua Efalas, thiab Nws tau so rau ntawd nrog cov thwjtim.

55 Cov Yudais lub koobtsheej hladhau tau los ze thiab neeg coobcoob tau tawm pem yajsab thiab nce tuaj rau Yeluxalees uantej lub koobtsheej kom lawv yuav ntxuav tuskheej dawbhuv. 56 Lawv tau nrhiav Yexus, thiab thaum sawv uake hauv lub tuamtsev, lawv tau sibtham tias, “Nej xav li cas? Nws yuav tsis tuaj koom lub koobtsheej pod?” 57 Sijhawm ntawd cov povthawj hlob thiab cov Falixais twb muab lus tawmcai tias, yog leejtwg paub Yexus nyob qhovtwg, nws yuavtsum qhia kom lawv thiaj yov ntes tau Yexus.

🔝

Yexus Raug Pleev

Mat 26:6-13; Mak 14:3-9; Luk 7:37-39

1 Rau hnub uantej lub koobtsheej hladhau, Yexus tau tuaj rau Npethanis, qhov uas Laxalaus nyob thiab Yexus tau tsa nws sawv ntawm cov tuag. 2 Lawv tau ua hmo rau Nws noj ntawd. Mathas tau tiam lawv, hos Laxalaus tau zaum nrog Yexus lawv uake.

3 Malis tau muab ib hwj tseem tshuaj naludas uas kimkim thiab tau muab hliv rau Yexus kotaw thiab muab nws cov plaubhau los so Yexus kotaw. Lub tsev tau tsw cov tshuaj mules thoob plaws.

4 Ib tug ntawm cov thwjtim, Yudas Ikhalaus, tus uas samsim yuav ntxeevsiab rau Yexus, tau hais tias, 5 “Ua cas nws tsis muab cov tshuaj mules no muag ob puas txiaj denalis thiab muab pub rau cov pluag!” 6 Tsis vim nws tau kubsiab cov pluag es nws tau hais li no, tabsis vim nws yeej yog tubsab. Ua tus tuav hnab nyiaj, mas nws txeev tau nyiag tej nyiaj hauv lub hnab.

7 Yexus tau teb tias, “Tso nws ua. Hwj tshuaj no raug ceev rau hnub faus kuv, 8 vim nej yuav muaj cov pluag nrog nej ibtxwm tabsis nej yuav tsis muaj kuv mus li.”

9 Ces thaum tej neeg Yudais coobcoob paub tias Nws nyob ntawd, lawv txawm tau tuaj, tsis vim Yexus xwb tabsis vim lawv xav pom Laxalaus tus uas Nws tau tsa sawv ntawm cov tuag thiab. 10 Cov povthawj hlob tau npajsiab tua Laxalaus thiab 11 rauqhov coob leej tau tso txojkev Yudais qub tseg thiab tau ntseeg Yexus vim nws.

Nkag Nroog Li Tus Muaj Yeej

Mat 21:4-9; Mak 11:7-10; Luk 19:35-38

12 Hnub tomqab, thaum lawv hnov tias Yexus tau tuaj hauv Yeluxalees, pab neeg coobcoob uas tuaj rau lub koobtsheej ntawd 13 tau txiav nplooj toovlaj thiab tau tuaj ntsib Nws, thiab lawv tau qw tias,

“Hausanas,

Qhuas tus uas los ntawm tus Tswv lub npe,

qhuas Yixayees tus Vajntxwv.”

14 Thaum pom ib tug menyuam nees luav, Yexus tau muab los caij kom raws li twb sau tseg tias,

15 “Txhob ntshai, Nkauj Xioos!

Saib mas, koj tus Vajntxwv samsim los,

caij ib tug menyuam nees luav.”

16 Xub thawj, Nws cov thwjtim tsis tau totaub tej no, tabsis tomqab Yexus tau txais tshwjchim mas lawv thiaj tau nco tias tej no twb raug sau txog Nws thiab neeg tau ua li no rau Nws.

17 Pab neeg coobcoob, uas tau nyob nrog Nws thaum Nws tau hu Laxalaus tawm hauv qhov ntxa thiab tsa nws sawv hauv cov tuag ntawd, tau ua timkhawv txog Nws. 18 Vim li no, tej neeg coobcoob tau tuaj cuag Nws rauqhov lawv tau hnov tias Nws tau ua lub cim li no. 19 Ces cov Falixais tau sibtham tias, “Saib, nej tsis tsam dabtsi li. Nimno lub cejntug tau caum Nws lawm.”

Yexus Qhia Txog Nws Kev Tuag

20 Ibtxhia Kilis tau tuaj hauv lub koobtsheej kom lawv tau pehawm Vajtswv Ntuj. 21 Yog li, lawv tau mus cuag Filiv, tus neeg Npexaidas huv Kalilais, thiab tau taij nws tias, “Yawg hlob, peb xav pom Yexus.” 22 Filiv tau mus qhia rau Anres, ces Filiv thiab Anres nkawv tau qhia Yexus.

23 Yexus tau teb nkawv tias, “Lub sijhawm twb los txog kom Neeg Leej Tub txais tshwjchim. 24 Kuv hais tseeb rau nej, tshwj lub noob mog uas poob rau pem teb tuag, nws nyob ib lub xwb, tabsis yog nws tuag ces nws yuav txi txiv ntau. 25 Tus uas hlub nws txojsia yuav plam txojsia, thiab tus ntxub nws txojsia hauv lub cejntug no yuav ceev txojsia ntawd mus rau txojsia ibtxhis. 26 Yog leejtwg tiam kuv, cia nws caum kuv; thiab kuv nyob qhovtwg, tus tiam kuv yuav nyob ntawd. Yog leejtwg tiam kuv, kuv Txiv yuav hwm nws.”

27 “Tamsis no kuv siabntsws tau ntxhov heev lawm, es kuv yuav hais dabtsi? Txiv aw, cawm kuv lub sijhawm no, no lod? Tabsis twb vim qhov no kuv thiaj tau los txog lub sijhawm no. 28 Txiv, txais tshwjchim rau koj lub npe.”

Ces ib lub suab tau hais saum ntuj tuaj tias, “Kuv tau txais tshwjchim lawm thiab yuav txais tshwjchim ntxiv.” 29 Pab neeg coobcoob uas sawv thiab hnov ntawd tau hais tias, “Xob nroo os.” Tabsis ibtxhia tau hais tias, “Ib tug timtswv tau nrog Nws tham.”

30 Yexus tau teb tias, “Tsis vim kuv es lub suab no tau hais tuaj, tabsis vim nej. 31 Nimno yog kev txiavtxim rau lub cejntug. Nimno tus kav lub cejntug samsim yuav raug ntiab tawm. 32 Thiab yog kuv raug tsa tawm hauv ntiajteb, kuv yuav qaws txhua leej los rau kuv.” 33 Yexus tau hais li no ua lub cim qhia tias Nws tabtom yuav tuag li cas.

34 Pab neeg coobcoob tau teb Nws tias, “Peb tau hnov hauv Kevcai tias tus Khetos yuav nyob mus ibtxhis, es ua li cas koj ho hais tias Neeg Leej Tub cheemtsum yuav raug tsa? Neeg Leej Tub yog leejtwg?”

35 Ces Yexus tau hais rau lawv tias, “Qhov kaj yuav nrog nej nyob mentsis. Taugkev li nej muaj qhov kaj, kom kev tsausntuj txhob caum tau nej. Tus taugkev hauv qhov tsausntuj twb tsis paub tias nws mus qhovtwg. 36 Cheem nej muaj qhov kaj, ntseeg qhov kaj kom nej dhau ua menyuam kaj.” Yexus tau hais tej no tag ces Nws tau tawm mus nraim cev.

Cov Yudais Txeev Tsis Ntseeg

37 Txawm Nws tau ua cim ntau npaum cas ntawm lawv xubntiag, lawv tsis tau ntseeg Nws, 38 es kom tus cevlus Yaxayas txojlus yuav tiav, qhov uas nws tau hais tias:

“Tus Tswv, leejtwg tau ntseeg peb tsab xov?

Thiab tus Tswv txhais npab raug nthuav rau leejtwg pom?”

39 Li no, lawv thiaj tsis tau muaj peevxwm ntseeg rauqhov Yaxayas tau hais ntxiv tias,

40 “Nws tau kaw lawv qhovmuag

thiab tau ua lawv lub siab tawv,

kom lawv qhovmuag txhob pom,

tsam lawv lub siab yov totaub,

thiab lawv yov tiglos, ces kuv yuav kho lawv.”

41 Yaxayas tau hais tej no rauqhov nws tau pom Yexus tus tshwjchim thiab tau hais txog Nws.

42 Txawm li ntawd los, coob tus thawjcoj tau ntseeg Nws. Tabsis vim cov Falixais, lawv tsis tau lees kom lawv txhob raug ntiab tawm hauv txoos sablaj; 43 thiab vim lawv tau nyiam neeg tshwjchim tshaj li Vajtswv Ntuj tshwjchim.

44 Ces Yexus tau qw tias, “Tus uas ntseeg kuv tsis ntseeg kuv xwb tabsis ntseeg tus uas tau xa kuv los, 45 thiab tus uas ntsia ntsoov kuv kuj ntsia ntsoov tus uas tau xa kuv los. 46 Kuv yog qhov kaj uas twb los rau hauv lub cejntug kom tus ntseeg kuv yuav tsis nyob tsausntuj nti.”

47 “Yog leejtwg hnov kuv tej lus tabsis tsis ceev, kuv yuav tsis txiavtxim rau nws. Kuv tsis tau los kom kuv txiavtxim rau lub cejntug tabsis kom kuv cawm lub cejntug. 48 Muaj ib tug txiavtxim, xws li txojlus uas kuv tau hais, uas yuav txiavtxim thaum kawg rau tus uas muab kuv tsotseg thiab tsis khaws kuv tej lus. 49 Vim tias kuv tsis tau hais lus ntawm kuv tuskheej, tabsis kuv Txiv, tus uas tau xa kuv los, twb muab txojcai rau kuv kom kuv hais dabtsi thiab qhia dabtsi. 50 Kuv paub tias Nws txojcai yog txojsia ibtxhis. Yog li ntawd, yam dabtsi kuv qhia, kuv qhia raws li Leej Txiv twb hais rau kuv lawm.”

🔝

Yexus Ntxuav Cov Thwjtim Kotaw

1 Uantej lub koobtsheej hladhau, Yexus twb paub tias Nws lub sijhawm tau los txog kom Nws hla ntawm lub cejntug no mus rau ntawm Leej Txiv. Vim Nws tau hlub Nws cov neeg mus txog qhov kawg, Nws tau nthuav kev hlub rau lawv.

2 Lub sijhawm noj hmo, ntxwgnyoog twb muab txojkev ntxeevsiab rau Yexus tso rau hauv Ximoos Ikhalaus tus tub Yudas lub siab lawm. 3 Yexus twb paub tias Leej Txiv tau muab txhua yam rau Nws txhais tes thiab tias Nws tau tawm ntawm Vajtswv Ntuj los thiab samsim yuav mus cuag Vajtswv Ntuj. 4 Nws tau sawv tawm ntawm rooj mov, hle lub tsholoj thiab muab ib txoj phuam los pav duav. 5 Nws tau hliv dej rau hauv ib lub phiab thiab Nws tau pib ntxuav cov thwjtim kotaw thiab muab txoj phuam pav duav los so.

6 Ces Nws tau los txog ntawm Ximoos Petus. Petus tau nug Yexus tias, “Tus Tswv, koj yuav ntxuav kuv kotaw lod?”

7 Yexus tau teb nws tias, “Koj tsis paub qhov kuv ua nimno, tabsis tomqab koj yuav paub.”

8 Petus tau hais rau Nws tias, “Koj yuav tsis ntxuav kuv kotaw mus ibtxhis.”

Yexus tau teb Nws tias, “Yog kuv tsis ntxuav koj, koj yuav tsis muaj feem nrog kuv.”

9 Ximoos Petus tau hais rau Nws tias, “Tus Tswv, tsis yog kuv kotaw xwb tabsis kuv tes thiab taubhau tibsi.”

10 Yexus tau hais rau nws tias, “Tus uas twb da dej lawm tsis muaj kev cheemtsum mus ntxuav cev dua; lub cev tagnrho huv lawm tshwj ob txhais kotaw xwb. Nej kuj huv tabsis tsis yog txhua leej.” 11 Rauqhov Nws twb paub tus ntxeevsiab rau Nws, vim li no Nws thiaj tau hais tias, “Tsis yog nej txhua leej huv.”

12 Yog li ntawd, thaum Nws ntxuav lawv tej kotaw tag thiab muab Nws lub tsholoj hnav, Nws tau rovqab zaum thiab tau hais rau lawv tias, “Nej puas paub kuv twb ua dabtsi rau nej lawm? 13 Nej hu kuv ua ‘Xibfwb thiab tus Tswv,’ mas nej hu yog, rauqhov kuv yeej yog tiag. 14 Ces yog kuv, tus ua Xibfwb thiab ua tus Tswv, tau ntxuav nej kotaw, nej kuj tshuav nqi kev ibleeg ntxuav ibleeg kotaw, 15 rauqhov kuv twb muab qauv rau nej kom nej ua ibyam li kuv tau ua rau nej. 16 Tseeb tiag, kuv hais rau nej, tus tubtxib yeej tsis loj dua nws tus tswv lossis tus timthawj tsis loj dua tus uas tau xa nws. 17 Yog nej twb paub tej no lawm, ces nej tau koobhmoov yog nej ua tej ntawd.”

Yexus Qhia Txog Tus Ntxeevsiab

18 “Kuv tsis hais txog nej tagnrho. Kuv twb paub cov kuv tau xaiv, tabsis kom Vajlugkub tiav nqe hais tias, ‘Tus noj kuv lub movci tau tsa nws lub lujtaws ncaws kuv.’”

19 “Kuv hais rau nej uantej qhov xwmtxheej tshwm, kom thaum nws tshwm nej yuav ntseeg tias kuv yog Nws. 20 Tseeb tiag, kuv hais rau nej, tus uas txais tus neeg kuv xa kuj txais kuv, thiab tus uas txais kuv kuj txais tus uas tau xa kuv.”

21 Hais tej no tag ces Yexus tau ntsawvsiab hauv ntsujplig thiab tau ua timkhawv tias, “Tseeb tiag kuv hais rau nej tias, nej ib tug yuav ntxeevsiab rau kuv.”

22 Cov thwjtim tau sibsaib zomzaws vim lawv tsis paub txog tus uas Nws hais ntawd. 23 Ib tug ntawm cov thwjtim, tus uas Yexus tau hlub, tau zaum hauv Nws xubntiag. 24 Ces Ximoos Petus tau ib nyuag tsa taubhau rau nws kom nws nug saib Yexus tau hais txog leejtwg.

25 Ces tus ntawd tau pheeb rau ntawm Yexus nrob thiab nug Nws tias, “Tus Tswv, nwg yog leejtwg?”

26 Yexus tau ntxhi tias, “Nws yog tus uas kuv yuav muab movci ntsw kuatxob thiab cev rau.” Tomqab muab movci ntsw kuatxob, Nws tau cev rau Ximoos Ikhalaus tus tub Yudas. 27 Tomqab Yudas tau noj qhov movci ntsw kuatxob, Xatas tau nkag rau hauv nws.

Ces Yexus tau hais rau nws tias, “Koj yuav ua dabtsi, ua majnroos.” 28 Tabsis cov zaum ntawd tsis tau muaj leejtwg paub tias Yexus tau hais dabtsi rau nws. 29 Qee leej tau xav tias Yexus tau hais rau nws tias, “Mus muas tej uas peb yuav siv hauv lub koobtsheej” lossis kom muab dabtsi pub rau cov pluag vim Yudas tau tuav lub hnab nyiaj. 30 Yog li ntawd, thaum txais kuatxob tag, nws tau tawm nraum zoov. Tamsis ntawd lub ntiajteb tau tsausnti.

Yexus Qhia Tias Petus Yuav Tsis Lees Nws

Mat 26:33-35; Mak 14:29-31; Luk 22:33-34

31 Ces tomqab nws tawm lawm, Yexus tau hais tias, “Sijhawm no Neeg Leej Tub tau txais tshwjchim thiab Vajtswv Ntuj tau txais tshwjchim hauv Nws. 32 Yog Vajtswv Ntuj txais tshwjchim hauv Leej Tub, ces Nws tuskheej yuav muab tshwjchim rau Leej Tub thiab yuav muab tshwjchim rau Nws tamsis.”

33 “Cov menyuam, kuv nrog nej nyob mentsis ntxiv, ces nej yuav nrhiav kuv. Kuv hais rau nej nimno, ibyam li kuv tau hais rau cov Yudais, tias ‘Qhov kuv mus ntawd nej mus tsis tau.’ 34 Kuv muab txoj kevcai tshiab rau nej: Nej ibleeg hlub ibleeg. Nej ibleeg hlub ibleeg ibyam li kuv tau hlub nej. 35 Ntawm qhov no sawvdaws thiaj paub tias nej yog kuv cov thwjtim, yog nej ibleeg muaj kev hlub rau ibleeg.”

36 Ximoos Petus tau hais rau Nws tias, “Tus Tswv, koj yuav mus qhovtwg?”

Yexus tau teb tias, “Qhov kuv mus ntawd koj tsis muaj peevxwm raws kuv qab nimno, tabsis lwm hnub koj yuav caum kuv.”

37 Petus tau hais rau Nws tias, “Tus Tswv, vim li cas kuv caum tsis tau koj nimno? Kuv yuav muab kuv txojsia theej koj.”

38 Yexus tau teb tias, “Koj yuav muab koj txojsia theej kuv lod? Tseeb tiag kuv hais rau koj, qaib twb tsis tau qua koj yuav tsis lees kuv peb zaug.”

🔝

Yexus Nplig Cov Thwjtim

1 “Txhob cia nej lub siab ntxhov, ntseeg hauv Vajtswv Ntuj thiab ntseeg hauv kuv. 2 Hauv kuv Txiv lub tsev muaj ntau lub chaw. Yog tsis muaj li, kuv yov hais rau nej tias kuv yuav mus npaj lub chaw rau nej nad? 3 Yog kuv mus thiab npaj chaw rau nej, kuv yuav rovlos coj nej mus nrog kuv, kom kuv nyob qhovtwg nej yuav nyob qhov ntawd. 4 Nej paub txojkev mus rau qhov kuv mus ntawd lawm.”

Yexus Yog Txojkev

5 Thaumas tau nug tias, “Tus Tswv, peb twb tsis paub koj mus qhovtwg as? Peb yov muaj peevxwm paub txojkev li cas?”

6 Yexus tau teb nws tias, “Kuv yog txojkev, qhov tseeb, thiab txojsia. Tsis muaj leejtwg mus cuag kuv Txiv tshwj los ntawm kuv mus. 7 Yog nej twb paub kuv lawm, nej yuav paub kuv Txiv. Txij no mus, nej paub Nws thiab nej twb pom Nws lawm.”

8 Filiv tau hais rau Nws tias, “Tus Tswv, muab Leej Txiv rau peb pom ces nws yuav txaus rau peb.”

9 Yexus tau hais rau nws tias, “Kuv nrog nej nyob tav li no, koj twb tsis paub kuv lod Filiv? Tus tau pom kuv ces nws twb pom Leej Txiv. Ua cas koj tseem nug tias, ‘Muab Leej Txiv rau peb pom?’ 10 Koj tsis ntseeg tias, kuv nyob hauv Leej Txiv thiab Leej Txiv nyob hauv kuv lod? Tej lus uas kuv hais rau nej ntawd tsis yog kuv hais ntawm tuskheej, tabsis Leej Txiv tus uas nyob hauv kuv ua Nws tej haujlwm. 11 Ntseeg kuv tias, kuv nyob hauv Leej Txiv thiab Leej Txiv nyob hauv kuv. Tsis li, ntseeg vim tej cim ntawd. 12 Tseeb tiag kuv hais rau nej tias, tus ntseeg kuv yuav ua tej haujlwm uas kuv ua thiab nws yuav ua tej haujlwm loj dua tej no, vim tias kuv samsim mus rau ntawm Leej Txiv. 13 Thiab yam dabtsi nej taij ntawm kuv lub npe, kuv yuav ua qhov ntawd kom Leej Txiv yuav txais tshwjchim hauv Leej Tub. 14 Yog nej taij dabtsi ntawm kuv lub npe, kuv yuav ua.”

Yexus Coglus Txog Vajtswv Ntsujplig

15 “Yog nej hlub kuv, nej yuav ceev kuv tej kevcai. 16 Thiab kuv yuav thov kuv Txiv mas Nws yuav muab ib tug txhawbzog rau nej kom Nws yuav nyob nrog nej mus ibtxhis, 17 xws li tus Ntsujplig Tseeb uas lub cejntug yuav tsis muaj peevxwm txais, vim lub cejntug tsis pom Nws thiab tsis paub Nws. Nej paub Nws rauqhov Nws nyob ntawm nej ib sab thiab hauv nej. 18 Kuv yuav tsis tso nej ua ntsuag, kuv yuav los cuag nej. 19 Tshuav mentsis lub cejntug yuav tsis pom kuv lawm, tabsis nej yuav pom kuv rauqhov kuv muajsia thiab nej yuav muajsia. 20 Hnub ntawd, nej yuav paub tias kuv nyob hauv kuv Txiv thiab nej nyob hauv kuv thiab kuv nyob hauv nej. 21 Tus uas muaj kuv tej kevcai thiab ceev tej ntawd yog tus hlub kuv, thiab tus uas hlub kuv yuav raug kuv Txiv hlub, thiab kuv yuav hlub nws thiab kuv yuav tshwm rau nws pom.”

22 Tus Yudas uas tsis yog Ikhalaus tau hais rau Nws tias, “Tus Tswv, muaj dabtsi es koj ho yuav tshwm rau peb pom tabsis tsis rau lub cejntug?”

23 Yexus tau teb nws tias, “Yog leejtwg hlub kuv nws yuav ceev kuv txojlus, ces kuv Txiv yuav hlub nws thiab wb yuav los rau ntawm nws thiab yuav ua ib lub chaw nyob ntawm nws. 24 Tus uas tsis hlub kuv yuav tsis ceev kuv tej lus. Txojlus uas nej hnov tsis yog kuv li tabsis yog Leej Txiv tus uas tau xa kuv los li.”

25 “Kuv twb hais tej no rau nej thaum kuv nrog nej nyob, 26 tabsis tus txhawbzog, xws li tus Ntsujplig Dawbhuv uas Leej Txiv yuav xa hauv kuv lub npe los, Nws yuav qhia nej txhua yam thiab yuav rovqab ntos txhua yam uas kuv tau hais rau nej. 27 Kev thajyeeb kuv tsotseg rau nej; kuv muab kuv txojkev thajyeeb rau nej. Kuv muab rau nej tsis yam li lub cejntug muab. Txhob cia nej lub siab ntxhov lossis taiscaus.”

28 “Nej tau hnov kuv hais rau nej tias, ‘Kuv mus thiab kuv yuav los cuag nej.’ Yog nej tau hlub kuv, nej yov zoo siab tias kuv mus cuag Leej Txiv, rauqhov Leej Txiv loj dua kuv. 29 Thiab nimno kuv twb qhia nej uantej nws tshwmsim, kom thaum nws tshwmsim nej yuav ntseeg. 30 Kuv yuav tsis tham ntau yam nrog nej rauqhov tus kav lub cejntug samsim tuaj. Nws tsis muaj dabtsi ntawm kuv, 31 tabsis kom lub cejntug yuav paub tias kuv hlub Leej Txiv, thiab tias kuv ua raws nraim li Leej Txiv tau tawmcai rau kuv. Sawv, cia peb tawm ntawm no.”

🔝

Tsob Txivhmab thiab Cov Ceg

1 “Kuv yog tsob txivhmab tseem thiab kuv Txiv yog tus tswv txivhmab. 2 Txhua tus ceg hauv kuv uas tsis txi txiv, Nws muab txiav; thiab txhua tus ceg uas txi txiv, Nws muab tav kom txi txiv ncw. 3 Nej twb huv lawm vim txojlus uas kuv tau hais rau nej. 4 Nyob hauv kuv ibyam li kuv nyob hauv nej. Yam nkaus li tus ceg tsis muaj peevxwm txi txiv ntawm tuskheej tshwj nws txuas rau tsob txivhmab, nej kuj zoo nkaus li ntawd: Tshwj nej nyob hauv kuv nej yuav tsis txi txiv.”

5 “Kuv yog tsob txivhmab; nej yog cov ceg. Tus nyob hauv kuv thiab kuv nyob hauv nws, tus ntawd txi txiv ncw rauqhov dhau ntawm kuv nej tsis muaj peevxwm ua dabtsi. 6 Yog tus twg tsis nyob hauv kuv, nws raug muab povtseg yam li tus ceg qhuav uas luag muab sau mus pov hlawv hauv lub cubtawg. 7 Yog nej nyob hauv kuv thiab kuv tej lus nyob hauv nej, taij yam uas nej xav tau, ces nws yuav peemtsheej rau nej. 8 Kuv Txiv tau txais tshwjchim rau qhov no: Tias nej txi txiv ncw thiab dhau ua kuv cov thwjtim.”

9 “Ibyam li Leej Txiv tau hlub kuv thiab kuv tau hlub nej, nyob hauv kuv txojkev hlub. 10 Yog nej ceev kuv tej kevcai, ces nej yuav nyob hauv kuv txojkev hlub, ibyam li kuv twb ceev kuv Txiv tej kevcai thiab nyob hauv Nws txojkev hlub. 11 Kuv twb hais tej no rau nej kom kuv kev zoo siab yov nyob hauv nej thiab nej kev zoo siab yov phwjyaws. 12 Kuv txoj kevcai yog li no: Nej ibleeg hlub ibleeg ibyam li kuv tau hlub nej. 13 Leejtwg tsis muaj kev hlub loj dua no, tias ib tug tso nws txojsia this nws cov phoojywg. 14 Nej yog kuv phoojywg yog nej ua txhua yam uas kuv tawmcai rau nej. 15 Kuv tsis hais rau nej li rau cov tubtxib ntxiv lawm, rauqhov tus tubtxib tsis paub tias nws tus tswv ua dabtsi; tabsis kuv twb hu nej ua phoojywg rauqhov kuv tau qhia rau nej paub txhua yam uas kuv tau hnov ntawm kuv Txiv. 16 Nej tsis tau xaiv kuv tabsis kuv tau xaiv nej thiab tau tsa nej kom nej txi txiv thiab nej tej txiv yuav nyob mus, thiab kom nej taij kuv Txiv dabtsi ntawm kuv lub npe, Nws yuav muab rau nej. 17 Kuv tawmcai nqe no rau nej kom nej ibleeg hlub ibleeg.”

Lub Cejntug Ntxub Cov Thwjtim

18 “Yog lub cejntug ntxub nej, nej paub tias nws twb ntxub kuv uantej. 19 Yog nej yog lub cejntug tug, lub cejntug yuav hlub nej li nws tug. Nej tsis yog lub cejntug tug, tabsis kuv tau xaiv nej tawm hauv lub cejntug. Vim li no, lub cejntug thiaj ntxub nej. 20 Nco txojlus uas kuv tau hais rau nej lawm tias, ‘Tus tubtxib tsis loj dua nws tus tswv.’ Yog lawv tau tsimtxom kuv, lawv yuav tsimtxom nej thiab. Yog lawv tau ceev kuv txojlus, ces lawv yuav ceev nej li thiab. 21 Tabsis lawv yuav ua tej no rau nej vim kuv lub npe, rauqhov lawv tsis paub tus uas tau xa kuv los. 22 Yog kuv tsis tau los thiab tsis tau hais rau lawv, lawv yuav tsis muaj txim; tabsis nimno lawv tsis muaj dabtsi npog lawv tej txim. 23 Tus uas ntxub kuv kuj ntxub kuv Txiv. 24 Yog kuv tsis tau ua tej cim uas tsis muaj leejtwg tau ua nruab nrab lawv, lawv yov tsis muaj txim. Tabsis nimno lawv twb pom lawm, los lawv haj tseem ntxub kuv thiab kuv Txiv. 25 Tabsis qhov no yog kom txojlus uas twb sau rau hauv lawv Kevcai ntawd yuav tiav tias, ‘Lawv ntxub kuv tsis muaj laijthawj.’”

Vajtswv Ntsujplig Tes Haujlwm

26 “Thaum tus txhawbzog los, tus uas kuv yuav xa ntawm Leej Txiv los rau nej, xws li tus Ntsujplig Tseeb uas tawm ntawm Leej Txiv los, Nws yuav ua timkhawv txog kuv, 27 thiab nej yuav ua timkhawv txog kuv vim nej tau nyob nrog kuv thaum chivthawj los.”

🔝

1 “Kuv twb hais tej no rau nej kom nej txhob dawm ntog. 2 Luag yuav muab nej ntiab tawm hauv tej txoos sablaj, thiab lub sijhawm yuav los txog thaum txhua tus uas tua nej yuav xav tias nws nqa ib qho khoom fij rau Vajtswv Ntuj. 3 Lawv yuav ua tej no vim lawv tsis paub Leej Txiv thiab kuv. 4 Tabsis kuv twb hais tej no rau nej kom thaum lub sijhawm los txog nej yuav nco tias kuv tau qhia nej lawm. Kuv tsis tau hais tej no rau nej thaum chivthawj vim kuv tau nrog nej nyob.”

5 “Tabsis nimno kuv yuav mus cuag tus uas tau xa kuv los. Nej tsis muaj ib tug nug tias, ‘Koj yuav mus qhovtwg?’ 6 Vim kuv twb hais tej no rau nej thiab kev quajntsuag twb puv nej lub siab. 7 Tabsis kuv hais qhov tseeb rau nej tias, nws zoo dua rau nej yog kuv mus. Rauqhov yog kuv tsis mus, tus Txhawbzog yuav tsis los rau nej; tabsis yog kuv mus, kuv yuav xa Nws los rau nej. 8 Thiab thaum Nws los, Nws yuav nthuav rau lub cejntug paub txog kev txhaum, kev ncajncees, thiab kev txiavtxim: 9 txog kev txhaum vim lawv tsis ntseeg kuv; 10 txog kev ncajncees vim kuv mus cuag Leej Txiv thiab nej tsis pom kuv ntxiv lawm; 11 thiab txog kev txiavtxim vim tus kav lub cejntug twb raug txiavtxim lawm.”

12 “Kuv muaj ntau yam tseem yuav hais rau nej, tabsis nej tsis muaj peevxwm khaws lawm. 13 Thaum tus Ntsujplig Tseeb los, Nws yuav coj nej kev mus rau txhua qhov tseeb. Rauqhov Nws yuav tsis hais ntawm tuskheej, tabsis Nws yuav hais tej uas Nws tau hnov thiab Nws yuav tshajtawm tej uas yuav tshwmsim tomntej rau nej. 14 Nws yuav muab tshwjchim rau kuv, rauqhov Nws yuav txais ntawm kuv los tshajtawm rau nej. 15 Txhua yam uas Leej Txiv muaj yog kuv tug. Vim li no, kuv tau hais rau nej tias, ‘Nws yuav txais ntawm kuv los tshajtawm rau nej.’”

Kev Quajntsuag Hloov Ua Kev Zoo Siab

16 “Ib pliag ces nej yuav tsis pom kuv lawm, thiab ib pliag nej yuav pom kuv dua.”

17 Yog li ntawd, cov thwjtim qee leej tau sibtham tias, “Qhov Nws hais rau peb no yog dabtsi: ‘Ib pliag ces nej yuav tsis pom kuv lawm, thiab ib pliag nej yuav pom kuv dua’? thiab qhov tias, ‘Kuv mus cuag Leej Txiv’?” 18 Yog li ntawd, lawv tau hais tias, “Qhov Nws hais tias ‘ib pliag’ no yog dabtsi? Peb tsis paub Nws tau hais txog dabtsi.”

19 Yexus twb paub tias lawv tau xav nug Nws, ces Nws tau hais rau lawv tias, “Nej sibnug txog qhov uas kuv tau hais tias, ‘Ib pliag nej yuav tsis pom kuv lawm thiab ib pliag nej yuav pom kuv dua’ no puas yog? 20 Tseeb tiag kuv hais rau nej tias, nej yuav quaj thiab nej yuav nyiav, thaum lub cejntug zoo siab. Nej yuav quajntsuag tabsis nej kev quajntsuag yuav dhau ua kev zoo siab. 21 Sijhawm tus pojniam yug menyuam mas nws muaj kev quajntsuag, rauqhov nws lub sijhawm tau los txog; tabsis tomqab nws yug menyuam, nws tsis nco txog kev quajntsuag ntxiv vim txojkev zoo siab tias ib tug neeg tau yug los rau hauv lub cejntug. 22 Yam li ntawd, nej muaj kev quajntsuag nimno, tabsis kuv yuav rovqab pom nej thiab nej lub siab yuav zoo siab thiab tsis muaj leejtwg yuav txeeb tau nej txojkev zoo siab ntawd, 23 thiab hnub ntawd nej yuav tsis nug kuv dabtsi. Tseeb tiag kuv hais rau nej, nej thov Leej Txiv dabtsi ntawm kuv lub npe, Nws yuav muab rau nej. 24 Txog tav no nej tsis tau taij dabtsi ntawm kuv lub npe, taij es nej yuav tau txais kom nej kev zoo siab yuav puvnpo.”

25 “Yav tag los kuv twb hais tej no ua luspiv rau nej, lub sijhawm los txog lawm uas kuv yuav tsis hais luspiv rau nej ntxiv, tabsis kuv yuav tshajtawm Leej Txiv rau nej ncajnraim. 26 Hnub ntawd, nej yuav taij hauv kuv lub npe thiab kuv yuav tsis hais rau nej tias kuv yuav nug Leej Txiv rau nej. 27 Leej Txiv tuskheej hlub nej, vim nej twb hlub kuv thiab twb ntseeg tias kuv tau tawm ntawm Vajtswv Ntuj los. 28 Kuv tau tawm ntawm Vajtswv Ntuj los thiab twb los rau hauv lub cejntug; kuv yuav tso lub cejntug tseg thiab rovmus rau ntawm Leej Txiv.”

29 Cov thwjtim tau hais rau Nws tias, “Saib, nimno koj hais ncajnraim thiab tsis hais ua luspiv lawm. 30 Peb paub tias koj paub txhua yam thiab peb tsis tshuav dabtsi nug koj. Peb ntseeg qhov no, tias koj tau tawm ntawm Vajtswv Ntuj los.”

31 Yexus tau teb lawv tias, “Tav no nej mam ntseeg? 32 Saib mas, lub sijhawm yuav los ntawd twb los txog rauqhov nej yuav khiav rirws nyias mus nyias thiab yuav muab kuv tsotseg ibleeg. Tabsis kuv yuav tsis nyob ibleeg, rauqhov Leej Txiv nyob nrog kuv. 33 Kuv twb hais tej no rau nej kom nej muaj kev thajyeeb hauv kuv. Hauv lub cejntug nej yuav muaj kev txomnyem; tabsis ruajsiab vim kuv twb kovyeej lub cejntug lawm.”

🔝

Yexus Thov Vajtswv Rau Tuskheej

1 Tomqab hais tej no, Yexus tau tsa qhovmuag rau saum ntuj thiab hais tias, “Txiv e, lub sijhawm twb los txog lawm. Muab tshwjchim rau koj tus Tub kom tus Tub yov muab tshwjchim rau koj. 2 Ibyam li koj twb muab tswjchim sab nqaijtawv tagnrho rau Nws, kom Nws muab txojsia ibtxhis rau txhua leej uas koj twb muab rau Nws. 3 Thiab qhov no yog txojsia ibtxhis: Kom lawv paub tias koj tibleeg yog tus Vajtswv Ntuj tseem thiab Yexus Khetos yog tus uas koj tau xa los. 4 Kuv tau muab tshwjchim rau koj hauv ntiajteb los ntawm qhov kuv ua tiav txoj haujlwm uas koj twb muab rau kuv ua. 5 Ces nimno, Txiv, koj muab tshwjchim rau kuv ntawm koj xubntiag, lub tshwjchim uas kuv tau muaj nrog koj uantej lub cejntug tau tshwmsim.”

Yexus Thov Vajtswv Rau Cov Thwjtim

6 “Kuv tau muab koj lub npe nthuav rau cov neeg hauv lub cejntug uas koj tau muab rau kuv. Lawv yeej yog koj tug thiab koj tau muab rau kuv thiab lawv twb ceev koj Txojlus. 7 Nimno lawv twb paub tias txhua yam uas yog koj tug koj twb muab rau kuv. 8 Tej lus uas koj tau muab rau kuv ntawd kuv twb muab rau lawv thiab lawv tau txais lawm. Lawv tau paub tseeb tias kuv tau tawm ntawm koj los thiab lawv tau ntseeg tias koj tau xa kuv los. 9 Kuv thov rau lawv. Kuv tsis thov rau lub cejntug tabsis rau cov uas koj twb muab rau kuv, rauqhov lawv yog koj tug. 10 Txhua yam uas kuv muaj yog koj li thiab txhua yam uas koj muaj yog kuv tug. Kuv twb txais tshwjchim saum lawv. 11 Kuv tsis nyob hauv lub cejntug no ntxiv lawm thiab kuv samsim los rau ntawm koj, tabsis lawv tseem yuav nyob hauv lub cejntug. Txiv dawbhuv e, ceev lawv los ntawm koj lub npe uas koj twb muab rau kuv, kom lawv tsheej ua ib tug ibyam li wb. 12 Thaum kuv nrog lawv nyob, kuv tau ceev lawv hauv koj lub npe uas koj twb muab rau kuv. Kuv tau tivthaiv lawv thiab tsis tau muaj ib tug twg liamsim, tshwj tus tub kev liamsim kom Vajlugkub yov tiav.”

13 “Nimno kuv samsim los rau ntawm koj, es kuv hais tej no hauv lub cejntug kom lawv yuav muaj kuv txojkev zoo siab puvnpo rau hauv lawv. 14 Kuv twb muab koj Txojlus rau lawv lawm thiab lub cejntug tau ntxub lawv, vim lawv tsis yog lub cejntug tug ibyam li kuv tsis yog lub cejntug tug. 15 Kuv tsis thov kom koj muab lawv tshem hauv lub cejntug, tabsis kom koj ceev lawv tawm ntawm ntxwgnyoog. 16 Lawv tsis yog lub cejntug tug ibyam li kuv tsis yog lub cejntug tug. 17 Kuv muab lawv ntxuav dawbhuv los ntawm qhov tseeb; koj Txojlus yog qhov tseeb. 18 Ibyam li koj tau xa kuv los hauv lub cejntug, kuv kuj pib xa lawv mus hauv lub cejntug. 19 Kuv tau muab tuskheej ntxuav dawbhuv theej lawv, kom lawv yov raug ntxuav dawbhuv hauv qhov tseeb thiab.”

Yexus Thov Vajtswv Rau Cov Ntseeg

20 “Kuv tsis thov rau cov no xwb, tabsis rau cov uas ntseeg kuv los ntawm lawv txojlus, 21 kom lawv tagnrho yov ua ib tug os Txiv, ibyam li koj nyob hauv kuv thiab kuv nyob hauv koj, kom lawv yov nyob hauv wb thiab kom lub cejntug yov ntseeg tias koj tau xa kuv los. 22 Kuv tau muab lub tshwjchim uas koj twb muab rau kuv ntawd rau lawv, kom lawv yov ua ib tug ibyam li wb yog ib tug: 23 Kuv nyob hauv lawv thiab koj nyob hauv kuv; thiab kom lawv yov ua ib tug zoo kawgnkaus, xwv lub cejntug thiaj paub tias koj tau xa kuv los thiab koj tau hlub lawv ibyam li koj tau hlub kuv.”

24 “Txiv, kuv ntshaw kom kuv nyob qhovtwg, cov koj muab rau kuv ntawd nrog kuv nyob qhov ntawd, kom lawv pom kuv lub tshwjchim uas koj twb muab rau kuv vim koj tau hlub kuv uantej lub cejntug raug tsim.”

25 “Txiv ncajncees e, lub cejntug tsis tau paub koj, tabsis kuv tau paub koj thiab cov no tau paub tias koj tau xa kuv los; 26 thiab kuv tau muab koj lub npe nthuav rau lawv paub thiab kuv yuav muab nthuav ntxiv kom koj txojkev hlub kuv yov nyob hauv lawv thiab kuv yov nyob hauv lawv.”

🔝

Yexus Raug Ntes

Mat 26:47-56; Mak 14:43-50; Luk 22:47-53

1 Tomqab hais tej no tag, Yexus tau tawm nrog Nws cov thwjtim mus hla lub hav Kiloos rau sab tid. Qhov ntawm tau muaj ib lub vaj. Nws thiab Nws cov thwjtim tau mus rau hauv.

2 Yudas, tus ntxeevsiab rau Nws, twb paub txog lub chaw ntawd, vim Yexus txeev tau txoos nrog Nws cov thwjtim qhov ntawd. 3 Yog li ntawd, Yudas tau coj ib pab tubrog thiab tub ceevxwm ntawm cov povthawj hlob thiab cov Falixais tuaj rau ntawd, ibke nqa teeb tsav, tsau thiab cuabyeej uarog.

4 Vim Nws twb paub txhua yam uas los raug Nws, Yexus tau tawm mus nug lawv tias, “Nej nrhiav leej twg?”

5 Lawv tau teb Nws tias, “Yexus neeg Naxalev.”

Nws tau hais tias, “Kuv yog Nws mas.”

Yudas tus ntxeevsiab tau sawv nrog lawv ntawd. 6 Thaum Nws tau hais rau lawv tias, “Kuv yog Nws mas,” lawv tau thim rovqab thiab ntog rau pem teb.

7 Nws tau rovqab nug lawv tias, “Nej nrhiav leej twg tiag?”

Lawv tau teb tias, “Yexus neeg Naxalev.”

8 Yexus tau teb tias, “Kuv tau hais rau nej tias kuv yog Nws. Yog tias nej nrhiav kuv no ces, tso cov txivneej no mus.” 9 Qhov no tau tshwmsim kom txojlus uas Nws tau hais lawm tiav: “Cov neeg koj twb muab rau kuv ntawd, kuv tsis poob ib tug li.”

10 Ximoos Petus, tus muaj ib rab ntaj, tau thau rab ntaj los ibntag tus povthawj hlob ib tug tubtxib lub pobntseg sab xis tu nrho. Tus tubtxib ntawd lub npe hu ua Malekhus.

11 Ces Yexus tau hais rau Petus tias, “Muab rab ntaj rau hauv hnab ntaj! Lub khob uas kuv Txiv twb muab rau kuv ntawd kuv yuav tsis haus lod?”

12 Yog li ntawd, cov Yudais tej tubrog, nrog lawv tus thawj, thiab tej tub ceevxwm tau sau nthwv los ntes Yexus thiab muab Nws khi. 13 Lawv tau xub coj Nws mus cuag Anas vim tias nws yog Kaiyafas yawmtxiv. Kaiyafa tau ua povthawj hlob xyoo ntawd. 14 Tus Kaiyafas no txawm yog tus uas tau muab tswvyim rau cov Yudais tias, “Ib tug tuag theej haivneeg zoo dua.”

Petus Tsis Lees Thawj Zaug

Mat 26:69-70; Mak 14:66-68; Luk 22:55-57

15 Ximoos Petus thiab ib tug thwjtim tau caum Yexus. Vim tus povthawj hlob tau paub nws, tus thwjtim ntawd tau nrog Yexus mus rau hauv tus povthawj hlob lub loog, 16 tabsis Petus tau sawv ntawm roojvag sab nraud. Ces tus thwjtim uas tus povthawj hlob tau paub ntawd tau tawm mus tham nrog tus zov roojvag thiab nws tau coj Petus los sab hauv. 17 Yog li ntawd, tus ntxhais txib zov roojvag tau hais rau Petus tias, “Koj tsis lam yog tus txivneej no ib tug thwjtim pob?”

Nws tau teb tias, “Kuv tsis yog.”

18 Cov tubtxib thiab cov ceevxwm tau rauv ib lub cubtawg, vim nws tau no, thiab lawv tau nte taws. Petus kuj tau nrog lawv sawv thiab tau nte taws.

Tus Povthawj Hlob Nug Yexus

Mat 26:59-68; Mak 14:55-65; Luk 22:63-71

19 Ces tus povthawj hlob tau nug Yexus ntsig txog Nws cov thwjtim thiab Nws kev qhuabqhia. 20 Yexus tau teb nws tias, “Kuv twb qhia lub cejntug tabmeeg lug, kuv ibtxwm tau qhuabqhia hauv tej txoos sablaj thiab hauv lub tuamtsev, tej chaw uas cov Yudais sawvdaws txoos uake, thiab kuv tsis tau hais dabtsi nraim nkoos. 21 Cas koj nug kuv? Nug cov hnov seb kuv tau qhia lawv dabtsi. Lawv paub zaj uas kuv tau qhia.”

22 Nws tau hais li no, ces ib tug tub ceevxwm uas sawv ze ntawd tau ntaus Yexus thiab hais tias, “Koj teb tus povthawj hlob li no lod?”

23 Yexus tau teb nws tias, “Yog kuv tau hais lus phem, ua timkhawv txog qhov phem ntawd. Yog kuv hais lus zoo, vim li cas koj ntaus kuv?”

24 Ces Anas tau xa Yexus pav tes nrees mus rau Kaiyafas, tus povthawj hlob.

Petus Tsis Lees Zaum Ob thiab Peb

Mat 26:71-75; Mak 14:69-72; Luk 22:58-62

25 Ximoos Petus tau sawv thiab nte taws ntawm qhov qub. Ces lawv tau hais rau nws tias, “Koj tsis yog tus ntawd ib tug thwjtim lod?”

Nws tau tsis lees thiab hais tias, “Kuv tsis yog.”

26 Tus povthawj hlob ib tug tubtxib uas txheeb rau tus raug Petus txiav pobntseg tau hais tias, “Kuv tsis tau pom koj hauv lub vaj nrog Nws lod?”

27 Petus tau rovqab tsis lees, ces tamsis ntawd qaib tau qua.

Yexus Mus Rau Ntawm Philaj

Mat 27:11-18,20-23; Mak 15:2-15; Luk 23:2-3,18-25

28 Tomqab ntawd thaum kaj ntug txoog, lawv tau coj Yexus ntawm Kaiyafas mus hauv tus kavxeev lub vajloog, tabsis lawv tsis tau nkag hauv vajloog kom lawv txhob tsuas kev phem es lawv thiaj tau noj pluas mov hladhau. 29 Ces Philaj tau tawm tuaj cuag lawv sab nraud thiab tau nug tias, “Nej muaj lus dabtsi tawmtsam tus txivneej no?”

30 Lawv tau teb nws tias, “Tshwj tsis yog tus no tau ua phem, peb yeej tsis tau ntes Nws rau koj.”

31 Philaj tau hais rau lawv tias, “Nej coj Nws mus thiab txiavtxim rau Nws raws li nej txoj kevcai.”

Cov Yudais tau teb nws tias, “Nws tsis raug cai rau peb tua ib tug neeg.” 32 Qhov no tau tshwmsim kom Yexus txojlus uas Nws tau qhia txog Nws kev tuag li cas ntawd tiav.

33 Ces Philaj tau nkag rovqab rau hauv lub vajloog. Nws tau hu Yexus los thiab tau nug Nws tias, “Koj puas yog cov Yudais tus Vajntxwv?”

34 Yexus tau nug nws tias, “Koj hais qhov no ntawm tuskheej lossis luag tej tau qhia kuv rau koj?”

35 Philaj tau teb tias, “Kuv tsis yog Yudais sad? Koj haivneeg thiab cov povthawj hlob tau ntes koj rau kuv. Koj tau ua dabtsi?”

36 Yexus tau teb tias, “Kuv lub tswvkuj tsis yog tawm hauv lub cejntug no los. Yog kuv lub tswvkuj tau tawm hauv lub cejntug no, kuv tej tubtxib yeej yuav tivthaiv kom kuv txhob raug cov Yudais ntes. Tabsis kuv lub tswvkuj tsis yog tawm ntawm no los.”

37 Philaj tau hais tias, “Ces koj yog ib tug vajntxwv tiag?”

Yexus tau teb tias, “Koj hais lawm tias kuv yog ib tug vajntxwv. Kuv twb yug los rau qhov no, thiab vim qhov no kuv twb los rau hauv lub cejntug kom kuv yuav ua timkhawv txog qhov tseeb. Txhua leej uas nyob hauv qhov tseeb hnov kuv lub suab.”

38 Philaj tau nug Nws tias, “Dabtsi yog qhov tseeb?”

Thaum hais li no tag, Philaj tau tawm rau nraum cov Yudais thiab tau hais rau lawv tias, “Kuv nrhiav tsis pom ib qhov txhaum hauv Nws. 39 Tabsis muaj ib txoj kabke kom kuv tso ib tug neeg rau nej hauv lub koobtsheej hladhau. Yog li ntawd, nej puas xav kom kuv tso cov Yudais tus Vajntxwv rau nej?”

40 Ces lawv tau rovqw tias, “Txhob tso tus no tabsis tso Npa-Anpas.” Nimno Npa-Anpas yog ib tug ntxeev tebchaws.

🔝

Yexus Raug Txiavtxim Tuag

Mat 27:27-31; Mak 15:16-20

1 Yog li ntawd, Philaj tau coj Yexus thiab tau muab Nws nplawm. 2 Cov tubrog tau muab hmabpos los qhaib ua lub mom yeebkoob thiab muab rau Nws ntoo, thiab lawv tau muab ib lub tsholoj tsamxem rau Nws npua. 3 Lawv tau los rau ntawm Nws thiab hais tias, “Nyobzoo cov Yudais tus Vajntxwv,” thiab lawv tau xuas tawgncuav rau Nws.

4 Philaj tau tawm rau sab nraud dua thiab hais tias, “Saib nawb, kuv coj Nws tawm rau nej kom nej paub tias kuv nrhiav tsis tau ib qhov txhaum hauv Nws.” 5 Yexus tau tawm rau sab nraud, ntoo lub mom yeebkoob hmabpos thiab npua lub tsholoj tsamxem. Philaj tau hais rau lawv tias, “Saib tus neeg no.”

6 Ces thaum cov povthawj hlob thiab cov tub ceevxwm pom Nws, lawv tau qw tias, “Muab ntsia saum khaublig! Muab ntsia saum khaublig!”

Philaj tau teb lawv tias, “Nej coj Nws mus thiab muab Nws ntsia saum khaublig, rauqhov kuv nrhiav tsis pom kev txhaum hauv Nws.”

7 Cov Yudais tau teb nws tias, “Peb muaj Kevcai thiab raws li Kevcai mas Nws tsimnyog tuag, vim Nws tau tsa tuskheej ua Vajtswv Ntuj tus Tub.”

8 Thaum Philaj hnov lolus no, nws tau ntshai heev dua qub. 9 Nws tau nkag rau hauv lub vajloog dua thiab tau nug Yexus tias, “Koj nyob qhovtwg tuaj?”

Tabsis Yexus tsis tau muab lus teb rau nws.

10 Philaj tau hais rau Nws tias, “Koj tsis teb kuv lod? Koj puas paub tias kuv muaj tswjchim tso koj dim thiab kuv muaj tswjchim muab koj ntsia saum khaublig?”

11 Yexus tau teb nws tias, “Koj tsis muaj tswjchim dabtsi tawmtsam kuv, tshwj lub uas twb muab rau koj saum ntuj los. Vim li no, tus uas tau ntes kuv rau koj muaj txim loj dua.”

12 Txij li ntawd, Philaj tau nrhiav kev tso Nws tabsis cov Yudais tau qw tias, “Yog koj tso tus no, ces koj tsis yog Fajtim tus phoojywg, rauqhov txhua tus uas tsa nws tuskheej ua vajntxwv hais lus tawmtsam Fajtim.”

13 Thaum Philaj hnov tej lus no, nws tau coj Yexus tawm sab nraud thiab tau zaum saum lub rooj txiavtxim hauv qhov chaw hu ua Lub Plag Leem Zeb, uas lus Henplais hu ua Nkanpathas. 14 Nimno hnub ntawd yog hnub npaj pluas mov hladhau, sijhawm rau teev.

Philaj tau hais rau cov Yudais tias, “Saib nej tus vajntxwv.”

15 Lawv tau qw tias, “Coj Nws mus! Coj Nws mus! Muab ntsia saum khaublig!”

Philaj tau hais rau lawv tias, “Cia kuv muab nej tus vajntxwv ntsia saum khaublig lod?”

Cov povthawj hlob tau teb tias, “Peb tsis muaj vajntxwv tshwj Fajtim xwb.”

16 Yog li ntawd, Philaj thiaj tau muab Nws cob rau lawv kom coj mus ntsia saum khaublig.

Saum Khaublig

Mat 27:33-44; Mak 15:22-32; Luk 23:33-43

Ces lawv tau coj Yexus. 17 Nws tau kwv Nws tus khaublig thiab tau tawm mus rau qhov chaw hu ua Pobtxha Taubhau (lus Henplais hu ua Khaulakhauthas). 18 Lawv tau muab Nws ntsia saum khaublig nrog ob tug, ib tug rau ib sab, thiab Yexus rau nruab nrab.

19 Philaj kuj tau sau ib daim phiaj thiab muab tso saum tus khaublig. Nws tau sau tias,

“ Yexus neeg Naxalev,

Cov Yudais tus Vajntxwv.”

20 Cov Yudais coob leej tau nyeem daim phiaj no vim qhov chaw lawv tau muab Yexus ntsia saum khaublig ntawd ze lub nroog, thiab nws tau raug sau ua lus Henplais, Loo thiab Kilis. 21 Cov povthawj hlob ntawm cov Yudais tau hais rau Philaj tias, “Txhob sau tias, ‘Cov Yudais tus Vajntxwv,’” tabsis sau tias, “Nws tau hais tias, ‘Kuv yog cov Yudais tus vajntxwv.’”

22 Philaj tau teb tias, “Qhov kuv twb sau ntawd, kuv twb sau lawm.”

23 Thaum cov tubrog tau muab Yexus ntsia saum khaublig ntawd, lawv tau hle Nws lub tsholoj thiab muab dua ua plaub daim, ib tug tubrog ib daim. Lub tsho tab yeej yog lub uas tsis muaj leeg xov thiab tau raug ntos saum ntsej mus rau nram taw ua ib lub. 24 Lawv tau hais tias, “Cia peb txhob muab dua, tabsis cia peb twvpov seb leejtwg tau.”

Qhov no tau tshwmsim kom Vajlugkub yov tiav lolus hais tias:

“Lawv tau muab kuv lub tsholoj faib,

thiab kuv cev tsoos lawv tau muab twvpov.”

Mas cov tubrog tau ua tej no.

25 Yexus niam, Nws niam ib tug vivncaus, Malis uas yog Khelaupas pojniam, thiab Malis Madalees tau sawv ze ntawm Yexus tus khaublig. 26 Thaum Yexus tau pom Nws niam thiab tus thwjtim uas Nws tau hlub sawv ntawd, Yexus tau hais rau Nws niam tias, “Niam, saib nws ua koj tus tub.” 27 Nws kuj tau hais rau tus thwjtim tias, “Saib nws ua koj niam.” Txij lub sijhawm ntawd, tus thwjtim tau txais nws los ua nws niam.

Yexus Tuag

Mat 27:48,50; Mak 15:36-37; Luk 23:36

28 Tomqab qhov no, thaum Yexus tau pom tias txhua yam twb tiav lawm, thiab kom Vajlugkub yov tiav, Nws tau hais tias, “Kuv nqhis dej.” 29 Ib lub thoob cawv qaub tau txawb ntawd. Ces lawv tau muab lub xwbkuab raus cawv qaub los chob rau tus ceg hixauv thiab cev rau Yexus lub qhov ncauj. 30 Thaum Nws tau txais cov cawv qaub, Yexus tau hais tias, “Tiav lawm laud.” Nyo ntshis, Nws tau tso plhuav ntsujplig.

31 Vim hnub ntawd yeej yog hnub npaj pluas mov hladhau thiab kom cov tuag lub cev txhob tau nyob saum khaublig hnub Xanpataus, rauqhov hnub Xanpataus no yeej yog hnub tseemceeb heev, mas cov Yudais tau taij Philaj kom muab lawv ceg tsoo kom lov thiab muab lawv tshem. 32 Yog li ntawd, cov tubrog tau tuaj thiab lawv tau tsoo thawj tug uas raug ntsia saum khaublig nrog Yexus ob txhais ceg lov, ces lawv tau tsoo tus sab tod li. 33 Thaum lawv tau los txog rau ntawm Yexus, lawv tau pom tias Nws twb tuag lawm, ces lawv thiaj tsis tau tsoo Nws ob txhais ceg. 34 Tabsis ib tug tubrog ntawd tau muab hmuv nkaug Nws sab tav thiab tamsis ntawd ntshav thiab dej tau ntwssis los. 35 Tus txivneej uas tau pom ntawd twb ua timkhawv thiab nws qhov timkhawv tseeb, thiab nws paub tias nws hais lus tseeb kom nej yov ntseeg. 36 Rauqhov tej no tau tshwmsim kom Vajlugkub tiav nqe tias, “Nws ib tug txha yuav tsis lov li.” 37 Thiab lwm nqe Vajlugkub tau hais tias, “Lawv yuav tsa muag saib tus uas lawv tau muab hmuv nkaug.”

Yexus Raug Faus

Mat 27:57-61; Mak 15:42-47; Luk 23:50-56

38 Tomqab tej no, Yauxej pem Alimathas, uas tau ua Yexus ib tug thwjtim tabsis nws tau nraim cev vim kev ntshai cov Yudais, tau thov Philaj kom muab Yexus lub cev rau nws. Philaj tau pomzoo, ces nws tau tuaj nqa Yexus lub cev. 39 Nikaudemaus, tus tau tuaj cuag Yexus hmontuj nram ntej, kuj tau tuaj thiab. Nws tau nqa cov tshuaj tswqab hnyav li pebcaug-plaub kilus uas muab roj mules thiab alaues sibtov. 40 Nkawv tau nqa Yexus lub cev thiab tau muab ntaub mag pleev tshuaj tswqab los qhwv raws li cov Yudais kabke. 41 Ib lub vaj tau nyob ze qhov chaw uas Yexus tau raug ntsia saum khaublig, thiab hauv lub vaj ntawd tau muaj ib lub qhov ntxa tshiab uas tsis tau faus leejtwg rau li. 42 Vim tias nws tau yog hnub cov Yudais npaj pluas mov hladhau thiab vim tias lub qhov ntxa tau nyob ze, nkawv tau muab Yexus zais rau ntawd.

🔝

Lub Ntxa Khooblug

Mat 28:1-8; Mak 16:1-8; Luk 24:1-10

1 Sawv ntxov hnub ib hauv lub limtiam, thaum tsis tau kaj ntug, Malis Madalees tau tuaj rau ntawm ntxa thiab tau pom lub pobzeb tshem lawm. 2 Ces nws tau khiav mus cuag Ximoos Petus thiab tus thwjtim uas Yexus tau hlub thiab nws tau hais rau nkawv tias, “Lawv tau nyiag tus Tswv lub cev ntawm ntxa thiab peb tsis paub tias lawv tau muab tso qhovtwg lawm.”

3 Yog li, Petus thiab tus thwjtim ntawd tau tawm tuaj rau ntawm ntxa. 4 Nkawv tau khiav uake, tabsis tus thwjtim i tau khiav ceev dua Petus thiab nws tau xub tuaj txog ntawm lub ntxa. 5 Thaum khoov ntshis xauj, nws tau pom cov ntaub mag poob rau ntawd tabsis nws tsis tau mus hauv. 6 Ximoos Petus kuj tau tuaj txog tomqab nws thiab tau mus hauv lub qhov ntxa thiab tau pom tej ntaub mag poob rau ntawd 7 thiab daim thivhauv, daim ntaub mag uas tau npog Yexus lub taubhau, tsis tau poob nrog cov ntawd uake tabsis tau raug tais tibzoo rau ib qho. 8 Thaum tus thwjtim i, tus uas tau xub tuaj txog ntawm ntxa, tau los hauv, nws kuj tau pom thiab tau ntseeg. 9 Txawm nkawv los kuj tsis tau paub Vajlugkub tias Yexus cheemtsum sawv ntawm tej neeg tuag rovlos.

Yexus Tshwm Rau Malis Madalees

10 Ces ob tug thwjtim tau rovmus rau nkawv lub chaw, 11 tabsis Malis tau sawv thiab quaj ntawm lub ntxa sab nraud. Lub tsamthawj nws tau quaj ntawd, nws tau khoov xauj hauv lub qhov ntxa 12 ces nws tau pom ob tug timtswv hnav dawb zaum hauv, ib tug tom kotaw thiab ib tug tom taubhau ntawm qhov chaw tau tso Yexus lub cev.

13 Nkawv tau hais rau Malis tias, “Ua cas koj quaj?”

Nws tau teb nkawv tias, “Lawv tau coj kuv tus Tswv lawm thiab kuv tsis paub tias lawv muab Nws tso qhovtwg?” 14 Thaum hais tej lus no, Malis tau tig rau tomqab thiab nws tau pom Yexus sawv ntawd, tabsis nws tsis tau paub tias Nws tau yog Yexus.

15 Yexus tau hais rau nws tias, “Tus ntxhais, ua cas koj quaj? Koj nrhiav leejtwg?”

Vim Malis tau xav tias Nws tau yog tus tu lub vaj, nws tau nug tias, “Yawg hlob, yog koj tau muab Nws tshem, seb koj tau muab tso rau qhovtwg, es kuv ho mus nqa.”

16 Yexus tau hu nws tias, “Malis.”

Tig hlo mus, Malis tau hais ua lus Henplais tias, “Lanpunis,” uas txhais tias xibfwb.

17 Yexus tau hais rau nws tias, “Txhob tuav kuv, rauqhov kuv tsis tau nce mus cuag kuv Txiv. Mus rau kuv cov kwvtij thiab qhia lawv tias, ‘Kuv samsim nce mus rau ntawm kuv Txiv thiab nej Txiv, kuv tus Vajtswv Ntuj thiab Nej tus Vajtswv Ntuj.”

18 Malis Madalees tau los tshabxo rau cov thwjtim tias, “Kuv twb pom tus Tswv lawm” thiab tau qhia txog tej uas Yexus tau hais rau nws.

Yexus Tshwm Rau Cov Thwjtim

19 Hnub ntawd thaum tsausntuj, xws li hnub ib ntawm lub limtiam, tej qhovrooj ntawm qhov chaw cov thwjtim tau nyob uake kaw ntomnti, vim lawv tau ntshai cov Yudais. Yexus tau los sawv hauv nruab nrab lawv thiab Nws tau hais tias, “Kev thajyeeb rau nej.” 20 Hais li no tag, Nws tau muab Nws ob txhais tes thiab sab tav rau lawv saib. Cov thwjtim tau zoo siab heev vim lawv tau pom tus Tswv.

21 Yexus tau rovqab hais rau lawv tias, “Kev thajyeeb rau nej. Ibyam li Leej Txiv tau xa kuv, nimno kuv xa nej.” 22 Hais li no tag, Nws tau tshuab pa rau lawv thiab tau hais rau lawv tias, “Txais tus Ntsujplig Dawbhuv. 23 Nej zam txim rau leejtwg, ces lawv raug zam; hos nej txiavtxim rau leejtwg ces lawv muaj txim.”

Yexus Tshwm Rau Thaumas

24 Nimno Thaumas, tus hu ua Ntxaib ntawm pab kaum-ob leeg, tsis tau nrog lawv nyob uake thaum Yexus tau los. 25 Cov thwjtim tau hais rau nws tias, “Peb twb pom tus Tswv lawm.”

Tabsis nws tau teb lawv tias, “Tshwj kuv pom tej qhov ntsia hlau ntawm Nws ob txhais tes thiab muab ntivtes rau hauv tej qhov ntsia hlau ntawd, thiab muab tes tuav Nws sab tav, kuv tsis lam ntseeg.”

26 Yim hnub tomqab, cov thwjtim tau nyob uake thiab Thaumas tau nyob nrog lawv. Txawm tej qhovrooj tau kaw ntomnti, Yexus tau los sawv hauv nruab nrab lawv thiab tau hais tias, “Kev thajyeeb rau nej.” 27 Ces Nws tau hais rau Thaumas tias, “Cev koj tus ntivtes rau ntawm no thiab saib kuv ob txhais tes. Muab koj txhais tes los tuav kuv sab tav. Txhob ua tus tsis ntseeg, tabsis ua tus ntseeg.”

28 Thaumas tau teb tias, “Kuv tus Tswv thiab kuv tus Vajtswv.”

29 Yexus tau hais rau nws tias, “Vim koj twb pom kuv, koj thiaj tau ntseeg lod? Tau koobhmoov yog cov tsis tau pom tabsis tau ntseeg.”

30 Yexus tau ua ntau lub cim rau ntawm cov thwjtim xubntiag uas twb tsis tau muab sau rau hauv phau ntawv no. 31 Tabsis tej no raug muab sau kom nej yov ntseeg tias Yexus yog tus Khetos, Vajtswv Ntuj tus Tub, thiab yog nej ntseeg, nej yov muaj txojsia hauv Nws lub npe.

🔝

Cuab Tau Ntses Ntau

1 Tomqab tej no, Yexus tau tshwm ntxiv rau cov thwjtim ntawm ntug hiavtxwv Tinpelias. Nws tau tshwm li no: 2 Ximoos Petus, Thaumas tus hu ua Ntxaib, Nathaniees pem Kanas hauv Kalilais, thiab Xenpedais ob tug tub, thiab dua ob tug thwjtim tau nyob uake. 3 Ximoos Petus tau hais rau lawv tias, “Kuv yuav mus nrhiav ntses.” Lawv tau hais rau nws tias, “Peb nrog koj mus thiab.” Lawv sawvdaws tau mus nce rau saum nkoj, tabsis hmo ntawd lawv tau cuab tsis tau ib tug li.

4 Thaum sawv ntxov Yexus tau los rau ntawm ntug, tabsis cov thwjtim tsis tau paub tias Nws tau yog Yexus. 5 Ces Yexus tau hais rau lawv tias, “Cov menyuam, nej tsis tau ib nyuag ntses li lod?”

Lawv tau teb tias, “Tsis tau es.”

6 Ces Nws tau hais rau lawv tias, “Pov lub moo rau ntawm lub nkoj sab xis ces nej yuav tau.” Thaum lawv pov li hais, lub moo tau mag ntses puvnkaus thiab lawv tsis tau muaj peevxwm rub taus.

7 Tus thwjtim uas Yexus tau hlub tau hais rau Petus tias, “Nws yog tus Tswv.” Thaum hnov dheev tias ‘Nws yog tus Tswv,’ Ximoos Petus tau muab lub tsholoj khi duav (vim tias nws tau hnav khaub) thiab tau nqis rau hauv hiavtxwv. 8 Dua lwm cov thwjtim thiaj tau caij nkoj los vim lawv tau nyob tsis deb ntug, tsuas li ob puas tshim, thiab lawv tau luag ib niag moo ntses. 9 Ces thaum lawv tau nqis rau tim ntug, lawv tau pom lub cubtawg thiab ib tug ntses txhiab rau saud thiab ib lub movci.

10 Yexus tau hais rau lawv tias, “Nqa tus puav ntses uas nej nyuam qhuav cuab tau ntawd los.”

11 Ximoos Petus tau nce mus rub lub moo rau saum nqhuab; lub moo tau mag cov ntses loj ib puas tsibcaug-peb tug. Txawm tau mag ntau npaum ntawd los lub moo tsis tau ntuag. 12 Yexus tau hais rau lawv tias, “Los noj tshais.” Tsis tau muaj ib tug thwjtim tau nug Nws tias, “Koj yog leejtwg?” vim lawv twb paub tias Nws yog tus Tswv. 13 Yexus tau los, khaws lub movci thiab muab faib rau lawv; thiab Nws tau muab tus ntses ua tibyam. 14 Qhov no yog zaum peb uas Yexus tau tshwm rau cov thwjtim tomqab Nws tau raug tsa sawv ntawm cov tuag.

Yexus Rovqab Tsa Petus

15 Thaum lawv tau noj tshais tag, Yexus tau hais rau Ximoos Petus tias, “Ximoos Yauhas tus tub, koj puas hlub kuv tshaj cov no?”

Nws tau teb tias, “Yog mas tus Tswv, koj paub tias kuv nyiam koj.”

Yexus tau hais rau nws tias, “Yug kuv cov menyuam yaj.”

16 Yexus tau nug nws zaum ob tias, “Ximoos Yauhas tus tub, koj puas hlub kuv?”

Nws tau teb Nws tias, “Yog mas tus Tswv, koj paub tias kuv nyiam koj.”

Yexus tau hais rau nws tias, “Zov kuv cov yaj.”

17 Yexus tau hais zaum peb rau nws tias, “Ximoos Yauhas tus tub, koj nyiam kuv lod?”

Petus tau ntshaus kiag vim Yexus tau hais zaum peb tias, “Koj puas hlub kuv?” Ces nws tau teb tus Tswv tias, “Tus Tswv, koj twb paub txhua yam. Koj paub tias kuv nyiam koj.”

Yexus tau hais rau nws tias, “Yug kuv cov yaj. 18 Tseeb tiag kuv hais rau koj, thaum koj tseem hluas, koj tau sia koj txoj siv thiab tau mus qhov uas koj tau xav mus; tabsis thaum koj laus, koj yuav tsa koj ob txhais tes thiab lwm tus yuav muab siv los pav koj thiab coj koj mus qhov koj tsis xav mus.” 19 Nws tau hais li no ua lub cim tias nws yuav muab tshwjchim rau Vajtswv Ntuj saum kev tuag li cas. Tomqab hais li no tag, Yexus tau hais rau nws tias, “Caum kuv qab.”

20 Petus tau tig mus pom tus thwjtim uas Yexus tau hlub samsim caum qab, tus uas tau zaum ntawm tsum mov hauv Nws lub xubntiag thiab tau nug tias, “Tus Tswv, leejtwg yog tus ntxeevsiab rau koj?” 21 Thaum pom tus no, Petus tau hais rau Yexus tias, “Tus Tswv, nws ne?”

22 Yexus tau teb nws tias, “Yog kuv xav kom nws nyob txog thaum kuv los, ho ua li cas rau koj? Koj yuavtsum caum kuv qab.”

23 Yog li ntawd, lolus no tau nrov mus rau coob tus kwvtij ntseeg tias tus thwjtim ntawd yuav tsis tuag. Yexus tsis tau hais tias nws yov tsis tuag, tabsis tias, “Yog kuv xav kom nws nyob txog thaum kuv los, ho ua li cas rau koj?” no xwb.

24 Tus thwjtim no yog tus ua timkhawv txog tej no thiab tus sau tej no. Peb paub tias nws qhov timkhawv tseeb. 25 Yexus kuj tau ua ntau yam. Yog muab tagnrho sau uake, kuv kwvyees tias, lub cejntug no yov tsis muaj chaw ntim cov phau ntawv ntawd.

🔝